ਬਲਾਤਕਾਰ ਪੀੜਤ ਲੜਕੀ ਨੇ ਕਿਹਾ- 'ਮੈਂ ਜਿਉਣਾ ਚਾਹੁੰਦੀ ਹਾਂ ਮਾਂ'

ਨਵੀਂ ਦਿੱਲੀ- ਦਿੱਲੀ 'ਚ ਐਤਵਾਰ ਰਾਤ ਚੱਲਦੀ ਬੱਸ 'ਚ ਸਮੂਹਿਕ ਬਲਾਤਕਾਰ ਦੀ ਸ਼ਿਕਾਰ ਹੋਈ 23 ਸਾਲਾ ਪੈਰਾ ਮੈਡੀਕਲ ਵਿਦਿਆਰਥਣ ਦੀ ਹਾਲਤ ਅਜੇ ਵੀ ਨਾਜ਼ੁਕ ਬਣੀ ਹੋਈ ਹੈ। ਇਸ ਘਟਨਾ ਨੇ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਸੋਮਵਾਰ ਨੂੰ ਹਸਪਤਾਲ 'ਚ ਭਰਤੀ ਹੋਈ ਪੀੜਤ ਵਿਦਿਆਰਥਣ ਜ਼ਿੰਦਗੀ ਅਤੇ ਮੌਤ ਨਾਲ ਲੜ ਰਹੀ ਹੈ ਪਰ ਇਸ ਦੌਰਾਨ ਹਿੰਮਤ ਦਿਖਾ ਕੇ ਲੜਕੀ ਨੇ ਆਪਣੀ ਮਾਂ ਨੂੰ ਇਕ ਸੰਦੇਸ਼ ਲਿਖਿਆ।
ਪੀੜਤਾ ਨੇ ਆਪਣੀ ਮਾਂ ਨੂੰ ਸੰਦੇਸ਼ ਲਿਖਿਆ ਅਤੇ ਇਸ ਸੰਦੇਸ਼ ਨਾਲ ਸਾਡੇ ਸਮਾਜ ਦਾ ਇਕ ਕੌੜਾ ਸੱਚ ਸਾਹਮਣੇ ਆ ਗਿਆ ਹੈ। ਸੰਦੇਸ਼ 'ਚ ਉਸ ਨੇ ਕਿਹਾ ਕਿ ਮੈਂ ਜਿਉਣਾ ਚਾਹੁੰਦੀ ਹਾਂ ਮਾਂ...। ਉਸ ਰਾਤ ਮੇਰਾ ਕ੍ਰੈਡਿਟ ਕਾਰਡ ਵੀ ਚਲਾ ਗਿਆ। ਉਹ ਦਰਿੰਦੇ ਮੇਰਾ ਮੋਬਾਇਲ ਵੀ ਚੁੱਕ ਕੇ ਲੈ ਗਏ, ਪਰ ਘਰ 'ਚ ਜੋ ਮੇਰਾ ਪੁਰਾਣਾ ਮੋਬਾਇਲ ਪਿਆ ਹੈ ਉਸ 'ਚ ਮੇਰੇ ਦੋ ਦੋਸਤਾਂ ਦਾ ਨੰਬਰ ਹੈ। ਉਨ੍ਹਾਂ ਨੂੰ ਫੋਨ ਕਰਕੇ ਦੱਸ ਦੇਣਾ ਕਿ ਮੈਂ ਤਿੰਨ ਮਹੀਨੇ ਲਈ ਬਾਹਰ ਗਈ ਹਾਂ।
ਪੀੜਤ ਵਿਦਿਆਰਥਣ ਵੈਂਟੀਲੇਟਰ 'ਤੇ ਹੈ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਅਜੇ ਉਸ ਬਾਰੇ ਕੁਝ ਨਹੀਂ ਕਿਹਾ ਜਾ ਸਕਦਾ, ਜ਼ਖਮ ਬਹੁਤ ਡੂੰਘੇ ਹੋਣ ਕਾਰਨ ਹਾਲਤ ਨਾਜ਼ੁਕ ਹੈ। ਪੀੜਤ ਵਿਦਿਆਰਥਣ ਅਜੇ ਵੀ ਕੁਝ ਬੋਲ ਨਹੀਂ ਪਾ ਰਹੀ। ਡਾਕਟਰਾਂ ਨੇ ਇਤੋਂ ਤੱਕ ਕਿਹਾ ਕਿ ਮੈਂ ਬਿਆਨ ਨਹੀਂ ਕਰ ਸਕਦਾ ਕਿ ਕੀ-ਕੀ ਝੱਲਿਆ ਹੈ ਇਸ ਬੇਚਾਰੀ ਨੇ। ਮੈਨੂੰ ਬੋਲਦੇ ਹੋਏ ਵੀ ਸ਼ਰਮ ਆ ਰਹੀ ਹੈ।

ਮੈਨੂੰ ਫਾਂਸੀ ਦੇ ਦਿਓ- ਬਲਾਤਕਾਰੀ

ਨਵੀਂ ਦਿੱਲੀ- ਚੱਲਦੀ ਬੱਸ 'ਚ ਮੈਡੀਕਲ ਸਟੂਡੈਂਟ ਨਾਲ ਬਲਾਤਕਾਰ ਦੇ ਦੋਸ਼ੀ ਪਵਨ ਗੁਪਤਾ ਦਾ ਕਹਿਣਾ ਹੈ ਕਿ ਮੈਨੂੰ ਫਾਂਸੀ ਦੇ ਦਿਓ। ਪਵਨ ਨੂੰ ਬੁੱਧਵਾਰ ਨੂੰ ਕੋਰਟ 'ਚ ਪੇਸ਼ ਕੀਤਾ ਗਿਆ। ਕੋਰਟ 'ਚ ਹੀ ਉਸ ਨੇ ਆਪਣਾ ਗੁਨਾਹ ਕਬੂਲ ਕਰ ਲਿਆ। ਐਤਵਾਰ ਨੂੰ ਦਿੱਲੀ 'ਚ ਚੱਲਦੀ ਬੱਸ 'ਚ 6 ਲੋਕਾਂ ਨੇ ਇਕ ਮੈਡੀਕਲ ਸਟੂਡੈਂਟ ਨਾਲ ਬਲਾਤਕਾਰ ਕੀਤਾ। ਪੁਲਸ ਨੇ ਮੁੱਖ ਦੋਸ਼ੀ ਰਾਮ ਸਿੰਘ ਸਣੇ ਚਾਰ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਸੀ। ਫਿਲਹਾਲ ਉਹ 5 ਦਿਨਾਂ ਦੀ ਪੁਲਸ ਹਿਰਾਸਤ 'ਚ ਹੈ। ਇਸ ਦੌਰਾਨ ਪੰਜਵੇਂ ਦੋਸ਼ੀ ਅਕਸ਼ੈ ਠਾਕੁਰ ਨੂੰ ਬਿਹਾਰ ਦੇ ਔਰੰਗਾਬਾਦ ਜ਼ਿਲੇ 'ਚ ਗ੍ਰਿਫਤਾਰ ਕੀਤੇ ਜਾਣ ਦੀ ਖਬਰ ਹੈ। ਇਕ ਦੋਸ਼ੀ  ਅਜੇ ਵੀ ਫਰਾਰ ਹੈ। ਦੋਸ਼ੀ ਵਿਨੇ ਇਕ ਜਿਮ 'ਚ ਇੰਸਟਕਟਰ ਹੈ ਪਵਨ ਫਲ ਵਿਕਰੇਤਾ ਹੈ। ਮੁਕੇਸ਼ ਡ੍ਰਾਈਵਰ/ਕਲੀਨਰ ਦਾ ਕੰਮ ਕਰਦਾ ਹੈ। ਅਕਸ਼ੈ ਅਤੇ ਰਾਜੂ ਬੱਸ 'ਚ ਹੈਲਪਰ ਅਤੇ ਕਲੀਨਰ ਹਨ। ਪੁਲਸ ਅਨੁਸਾਰ ਰਾਮ ਸਿੰਘ ਵਾਰਦਾਤ ਤੋਂ ਬਾਅਦ ਬੱਸ ਨੂੰ ਨੋਏਡਾ ਦੇ ਰੋਹਿੱਲਾ ਖੁਰਦ 'ਚ ਲੈ ਗਿਆ ਸੀ ਅਤੇ ਬਾਅਦ 'ਚ ਬੱਸ ਨੂੰ ਵਾਪਸ ਆਰ. ਕੇ. ਪੁਰਮ ਲਿਆ ਕੇ ਖੜ੍ਹਾ ਕਰ ਦਿੱਤਾ ਸੀ। ਬੱਸ 'ਚ ਡੁੱਲੇ ਖੂਨ ਨੂੰ ਸਾਫ ਕਰਨ ਲਈ ਬੱਸ ਨੂੰ ਧੋਆ ਗਿਆ। ਲੜਕਾ-ਲੜਕੀ ਦੇ ਕੁਝ ਕੱਪੜੇ ਆਦਿ ਨੂੰ ਵੀ ਉਨ੍ਹਾਂ ਨੇ ਤਬਾਹ ਕਰ ਦਿੱਤਾ।

ਜ਼ਿਕਰਯੋਗ ਹੈ ਕਿ ਐਤਵਾਰ ਰਾਤ ਮੈਡੀਕਲ ਸਟੂਡੈਂਟ ਆਪਣੇ ਦੋਸਤ  ਨਾਲ ਬੱਸ 'ਚ ਸਵਾਰ ਹੋ ਕੇ ਮੁਨੀਰਕਾ ਤੋਂ ਦਵਾਰਕਾ ਜਾ ਰਹੀ ਸੀ। ਲੜਕੀ ਦੇ ਬੱਸ 'ਚ ਬੈਠਦੇ ਹੀ ਲਗਭਗ 6 ਲੋਕਾਂ ਨੇ ਉਸ ਨਾਲ ਛੇੜਛਾੜ ਸ਼ੁਰੂ ਕਰ ਦਿੱਤੀ। ਉਸ ਬਸ 'ਚ ਹੋਰ ਯਾਤਰੀ ਨਹੀਂ ਸਨ। ਉਤਰਾਖੰਡ ਦੀ ਰਹਿਣ ਵਾਲੀ 23 ਸਾਲਾ ਲੜਕੀ ਦੇ ਦੋਸਤ ਨੇ ਉਸ ਨੂੰ ਬਚਾਉਣ ਕੋਸ਼ਿਸ ਕੀਤੀ ਪਰ ਉਨ੍ਹਾਂ ਲੋਕਾਂ ਨੇ ਉਸ ਨਾਲ ਕੁੱਟਮਾਰ ਕੀਤੀ। ਇਸ ਤੋਂ ਬਾਅਦ ਲੜਕੀ ਨਾਲ ਗੈਂਗ ਰੇਪ ਕੀਤਾ ਗਿਆ। ਦੋਸ਼ੀਆਂ ਨੇ ਲੜਕੀ ਅਤੇ ਉਸ ਦੇ ਦੋਸਤ ਨੂੰ ਦੱਖਣੀ ਦਿੱਲੀ ਦੇ ਮਹਿਪਾਲਪੁਰ ਨੇੜੇ ਵਸੰਤ ਵਿਹਾਰ ਇਲਾਕੇ 'ਚ ਬੱਸ ਤੋਂ ਹੇਠਾਂ ਸੁੱਟ ਦਿੱਤਾ।

ਬਿਹਾਰੀ ਨੌਜਵਾਨ ਨੇ 14 ਸਾਲਾ ਕੁੜੀ ਭਜਾਈ,

 ਕੀਤਾ ਬਲਾਤਕਾਰ

ਮੋਗਾ- ਜ਼ਿਲਾ ਪੁਲਸ ਸੁਪਰਡੈਂਟ ਮੋਗਾ ਸੁਰਜੀਤ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਬੀਤੀ 6 ਦਸੰਬਰ ਨੂੰ ਮੋਗਾ ਨੇੜੇ ਪਿੰਡ ਸਿੰਘਾਵਾਲਾ ਨਿਵਾਸੀ ਬਲਵਿੰਦਰ ਸਿੰਘ ਦੀ 14 ਸਾਲਾ ਨਾਬਾਲਗ ਲੜਕੀ ਜੋ ਪ੍ਰਵਾਸੀ ਮਜ਼ਦੂਰ ਦੇ ਝਾਂਸੇ 'ਚ ਆ ਕੇ ਘਰੋਂ ਗਈ ਸੀ, ਨੂੰ ਥਾਣਾ ਚੜਿੱਕ ਦੇ ਮੁਖੀ ਇੰਸਪੈਕਟਰ ਦੀਪਕ ਸਿੰਘ ਵਲੋਂ ਗੁਪਤ ਸੂਚਨਾ ਦੇ ਆਧਾਰ 'ਤੇ ਬੁਘੀਪੁਰ ਚੌਕ ਮੋਗਾ ਤੋਂ ਬਰਾਮਦ ਕਰ ਲਿਆ ਹੈ  ਜਦੋਂਕਿ ਉਕਤ ਲੜਕੀ ਨੂੰ ਵਰਗਲਾ ਕੇ ਲਿਜਾਣ ਵਾਲਾ ਪ੍ਰਵਾਸੀ ਮਜ਼ਦੂਰ ਅਰਜੁਨ ਭਈਆ ਚੋਰੀ ਕੀਤਾ ਮੋਟਰਸਾਈਕਲ ਛੱਡ ਕੇ ਫਰਾਰ ਹੋਣ 'ਚ ਸਫਲ ਰਿਹਾ ਜਿਸ ਨੂੰ ਪੁਲਸ ਨੇ ਕਬਜ਼ੇ 'ਚ ਲੈ ਲਿਆ ਅਤੇ ਪੁਲਸ ਅਰਜੁਨ ਭਈਆ ਦੀ ਭਾਲ ਕਰ ਰਹੀ ਹੈ।
 ਕੀ ਸੀ ਮਾਮਲਾ
ਮੋਗਾ ਨੇੜੇ ਪਿੰਡ ਸਿੰਘਾਵਾਲਾ ਨਿਵਾਸੀ ਬਲਵਿੰਦਰ ਸਿੰਘ ਦੀ 14 ਸਾਲਾ ਨਾਬਾਲਗ ਲੜਕੀ ਨੂੰ ਉਸ ਦੇ ਘਰ ਨੇੜੇ ਰਹਿੰਦਾ ਪ੍ਰਵਾਸੀ ਮਜ਼ਦੂਰ ਅਰਜੁਨ ਭਈਆ 6 ਦਸੰਬਰ ਦੀ ਸਵੇਰ ਵਰਗਲਾ ਕੇ ਲੈ ਗਿਆ ਸੀ। ਅਰਜੁਨ ਭਈਆ  ਸੁਰਮੁਖ ਸਿੰਘ ਕੋਲ ਪਿਛਲੇ 5-6 ਸਾਲ ਤੋਂ ਕੰਮ ਕਰ ਰਿਹਾ ਸੀ ਅਤੇ ਉਹ ਫਰਾਰ ਹੁੰਦੇ ਸਮੇਂ ਉਸ ਦਾ ਮੋਟਰਸਾਈਕਲ ਵੀ ਚੋਰੀ ਕਰਕੇ ਲੈ ਗਿਆ। ਜਦੋਂ ਪਰਿਵਾਰਕ ਮੈਂਬਰ ਸਵੇਰੇ ਉਠੇ ਤਾਂ ਦੇਖਿਆ ਕਿ ਉਨ੍ਹਾਂ ਦੀ ਲੜਕੀ ਘਰ 'ਚ ਨਹੀਂ ਹੈ। ਉਨ੍ਹਾਂ ਨੇ ਉਸ ਦੀ ਕਾਫੀ ਭਾਲ ਕੀਤੀ ਪਰ ਪਤਾ ਲੱਗਾ ਕਿ ਅਰਜੁਨ ਭਈਆ ਉਸ ਨੂੰ ਵਰਗਲਾ ਕੇ ਲੈ ਗਿਆ ਹੈ। ਇਸ ਉਪਰੰਤ ਬਲਵਿੰਦਰ ਸਿੰਘ ਵਲੋਂ ਥਾਣਾ ਚੜਿੱਕ ਨੂੰ ਸੂਚਿਤ ਕੀਤਾ ਗਿਆ।
ਕਿਵੇਂ ਮਿਲਿਆ ਸੁਰਾਗ
ਜ਼ਿਲਾ ਪੁਲਸ ਸੁਪਰਡੈਂਟ ਮੋਗਾ ਸੁਰਜੀਤ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਮੈਂ ਉਕਤ ਸਾਰੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਥਾਣਾ ਚੜਿੱਕ ਦੇ ਮੁਖੀ ਇੰਸਪੈਕਟਰ ਦੀਪਕ ਸਿੰਘ ਨੂੰ ਲੜਕੀ ਦਾ ਪਤਾ ਲਗਾਉਣ ਅਤੇ ਪ੍ਰਵਾਸੀ ਮਜ਼ਦੂਰ ਨੂੰ ਕਾਬੂ ਕਰਨ ਦਾ ਹੁਕਮ ਦਿੱਤਾ। ਇੰਸਪੈਕਟਰ ਦੀਪਕ ਸਿੰਘ ਨੇ ਤਲਾਸ਼ ਸ਼ੁਰੂ ਕੀਤੀ ਤਾਂ ਉਸ ਨੂੰ ਸੁਰਾਗ ਮਿਲਿਆ ਕਿ ਕਥਿਤ ਦੋਸ਼ੀ ਬੁਘੀਪੁਰ ਚੌਕ 'ਚ ਲੜਕੀ ਸਣੇ ਖੜ੍ਹਾ ਹੈ ਅਤੇ ਬੱਸ ਦਾ ਇੰਤਜ਼ਾਰ ਕਰ ਰਿਹਾ ਹੈ, ਜਿਸ 'ਤੇ ਉਨ੍ਹਾਂ ਨੇ ਸਹਾਇਕ ਥਾਣੇਦਾਰ ਜਸਵੀਰ ਸਿੰਘ, ਹਵਲਦਾਰ ਜਗਸੀਰ ਸਿੰਘ, ਹਵਲਦਾਰ ਸੁਖਦੇਵ ਸਿੰਘ ਸਣੇ ਦੱਸੀ ਜਗ੍ਹਾ ਕੋਲ ਪੁੱਜੇ ਤਾਂ ਅਰਜੁਨ ਭਈਆ ਪੁਲਸ ਪਾਰਟੀ ਨੂੰ ਦੇਖ ਫਰਾਰ ਹੋ ਗਿਆ ਅਤੇ ਮੋਟਰਸਾਈਕਲ ਉਥੇ ਹੀ ਛੱਡ ਗਿਆ ਜੋ ਉਸ ਨੇ ਸੁਰਮੁਖ ਸਿੰਘ ਦੇ ਘਰੋਂ ਚੋਰੀ ਕੀਤਾ ਸੀ। ਪੁਲਸ ਪਾਰਟੀ ਨੇ ਲੜਕੀ ਨੂੰ ਬਰਾਮਦ ਕਰਨ ਤੋਂ ਇਲਾਵਾ ਮੋਟਰਸਾਈਕਲ ਕਬਜ਼ੇ 'ਚ ਲੈ ਲਿਆ।
ਇਸ ਸੰਬੰਧ 'ਚ ਜਦੋਂ ਥਾਣਾ ਚੜਿੱਕ ਦੇ ਥਾਣਾ ਮੁਖੀ ਦੀਪਕ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਜ਼ਿਲਾ ਪੁਲਸ ਸੁਪਰਡੈਂਟ ਦੇ ਹੁਕਮਾਂ 'ਤੇ ਹੀ ਲੜਕੀ ਨੂੰ ਤਲਾਸ਼ ਲਈ ਵਿਸ਼ੇਸ਼ ਮੁਹਿੰਮ ਚਲਾਈ ਗਈ। ਉਨ੍ਹਾਂ ਕਿਹਾ ਕਿ ਲੜਕੀ ਨੇ ਆਪਣੇ ਬਿਆਨ 'ਚ ਦੱਸਿਆ ਕਿ ਉਸ ਨੂੰ ਡਰਾ-ਧਮਕਾ ਕੇ ਉਸ ਨਾਲ ਸ਼ਰੀਰਕ ਸੰਬੰਧ ਬਣਾਏ ਗਏ। ਲੜਕੀ ਦਾ ਮੈਡੀਕਲ ਕਰਾਉਣ ਤੋਂ ਬਾਅਦ ਉਸ ਨੂੰ ਵਾਰਸਾਂ ਹਵਾਲੇ ਕਰ ਦਿੱਤਾ ਗਿਆ। ਲੜਕੀ ਦੇ ਪਰਿਵਾਰ ਵਾਲਿਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਲੜਕੀ ਉਨ੍ਹਾਂ ਨੂੰ ਮਿਲ ਗਈ ਹੈ ਅਤੇ ਉਹ ਚਾਹੁੰਦੇ ਹਨ ਕਿ ਦੋਸ਼ੀ ਖਿਲਾਫ ਸਖਤ ਤੋਂ ਸਖਤ ਕਾਰਵਾਈ ਕੀਤੀ ਜਾਏ। ਪੁਲਸ ਨੇ ਦੱਸਿਆ ਕਿ ਅਰਜੁਨ ਦੀ ਤਲਾਸ਼ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ ਅਤੇ ਉਸ ਦੇ ਸਾਥੀਆਂ ਤੋਂ ਪੁੱਛਗਿੱਛ ਜਾਰੀ ਹੈ। ਉਮੀਦ ਹੈ ਕਿ ਛੇਤੀ ਹੀ ਉਹ ਕਾਬੂ ਆ ਜਾਏਗਾ।  

ਕੈਨੇਡਾ ਨੇ ਨਾਰਵੇ ਨੂੰ 46-36 ਨਾਲ ਹਰਾਇਆ

ਮਹਿਲਾ ਵਰਗ: ਭਾਰਤ ਨੇ ਕੈਨੇਡਾ ਨੂੰ 62-16 ਅਤੇ ਮਲੇਸ਼ੀਆ ਨੇ ਇੰਗਲੈਂਡ ਨੂੰ 38-29 ਨਾਲ ਹਰਾਇਆ
ਫਾਜ਼ਿਲਕਾ- ਇਥੋਂ ਦੇ ਐਮ. ਆਰ. ਸਰਕਾਰੀ ਕਾਲਜ ਦੇ ਸਟੇਡੀਅਮ ਵਿਖੇ ਅੱਜ 40 ਹਜ਼ਾਰ ਤੋਂ ਦਰਸ਼ਕਾਂ ਦੇ ਸਾਹਮਣੇ ਤੀਸਰੇ ਵਿਸ਼ਵ ਕੱਪ ਕਬੱਡੀ 2012 ਦੇ ਤਿੰਨ ਲੀਗ ਮੈਚ ਖੇਡੇ ਗਏ। ਭਾਰਤੀ ਮਹਿਲਾ ਕਬੱਡੀ ਟੀਮ ਨੇ ਆਪਣੇ ਦੂਜੇ ਲੀਗ ਵਿੱਚ ਮੈਚ ਕੈਨੇਡਾ ਨੂੰ 62-16 ਨਾਲ ਹਰਾ ਕੇ ਲਗਾਤਾਰ ਦੂਜੀ ਜਿੱਤ ਨਾਲ ਪੂਲ ‘ਏ’ ਵਿੱਚ ਚੋਟੀ ‘ਤੇ ਰਹਿੰਦਿਆਂ ਸੈਮੀ ਫਾਈਨਲ ਵਿੱਚ ਸ਼ਾਨ ਨਾਲ ਦਾਖਲਾ ਪਾਇਆ। ਇਸ ਪੂਲ ਵਿੱਚ ਕੈਨੇਡਾ ਦੀ ਦੂਜੀ ਹਾਰ ਕਾਰਨ ਡੈਨਮਾਰਕ ਦੀ ਟੀਮ ਵੀ ਸਿੱਧੇ ਤੌਰ ‘ਤੇ ਸੈਮੀ ਫਾਈਨਲ ਵਿੱਚ ਪਹੁੰਚ ਗਈ। ਮਹਿਲਾ ਵਰਗ ਦੇ ਇਕ ਹੋਰ ਮੈਚ ਵਿੱਚ ਮਲੇਸ਼ੀਆ ਨੇ ਇੰਗਲੈਂਡ ਨੂੰ 38-29 ਨਾਲ ਹਰਾ ਕੇ ਲਗਾਤਾਰ ਦੂਜੀ ਜਿੱਤ ਨਾਲ ਸੈਮੀ ਫਾਈਨਲ ਦਾ ਦਾਅਵਾ ਮਜ਼ਬੂਤ ਕੀਤਾ ਜਦੋਂ ਕਿ ਪੁਰਸ਼ ਵਰਗ ਦੇ ਖੇਡੇ ਗਏ ਇਕਲੌਤੇ ਮੈਚ ਵਿੱਚ ਕੈਨੇਡਾ ਨੇ ਨਾਰਵੇ ਨੂੰ 46-36 ਨਾਲ ਹਰਾ ਕੇ ਸੈਮੀ ਫਾਈਨਲ ਵੱਲ ਹੋਰ ਕਦਮ ਵਧਾਏ।
ਅੱਜ ਦੇ ਮੁਕਾਬਲਿਆਂ ਦੇ ਮੁੱਖ ਮਹਿਮਾਨ ਵਜੋਂ ਪੁੱਜੇ ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਨੇ ਭਾਰਤ ਤੇ ਕੈਨੇਡ ਦੀਆਂ ਮਹਿਲਾ ਟੀਮਾਂ ਨਾਲ ਜਾਣ ਪਛਾਣ ਕੀਤੀ। ਇਸ ਮੌਕੇ ਕੈਨੇਡਾ ਤੋਂ ਸਾਬਕਾ ਸੰਸਦ ਮੈਂਬਰ ਮਿਸ ਰੂਬੀ ਢੱਲਾ, ਪੰਜਾਬ ਦੇ ਜੰਗਲਾਤ ਮੰਤਰੀ ਸ੍ਰੀ ਸੁਰਜੀਤ ਕੁਮਾਰ ਜਿਆਣੀ, ਸਿੱਖਿਆ ਮੰਤਰੀ ਸ. ਸਿਕੰਦਰ ਸਿੰਘ ਮਲੂਕਾ ਤੇ ਸੰਸਦ ਮੈਂਬਰ ਸ. ਸ਼ੇਰ ਸਿੰਘ ਘੁਬਾਇਆ ਵਿਸ਼ੇਸ਼ ਮਹਿਮਾਨ ਵਜੋਂ ਪੁੱਜੇ।

ਮਾਈਨਿੰਗ ਦੇ ਮਾਮਲੇ ‘ਚ ਪ੍ਰਧਾਨ ਮੰਤਰੀ ਦਖਲ ਦੇਵੇ : ਬਾਦਲ

ਚੰਡੀਗੜ੍ਹ- ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਨੂੰ ਨਿੱਜੀ ਦਖਲ ਦੇਣ ਦੀ ਮੰਗ ਕਰਦੇ ਹੋਏ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ 95 ਮਾਈਨਿੰਗ ਪ੍ਰਾਜੈਕਟਾਂ ਦੀ ਜਲਦੀ ਦੇਣ ਮਨਜ਼ੂਰੀ ਲਈ ਅੱਜ ਉਨ੍ਹਾਂ ਨੂੰ ਲਟਕ ਰਹੇ ਮੁੱਦਿਆਂ ‘ਤੇ ਕੇਂਦਰੀ ਵਾਤਾਵਰਣ ਮੰਤਰਾਲੇ ਵਲੋਂ ਤੇਜੀ ਨਾਲ ਧਿਆਨ ਦਵਾਉਣ ਦੀ ਮੰਗ ਕੀਤੀ ਹੈ।
ਪ੍ਰਧਾਨ ਮੰਤਰੀ ਨੂੰ ਭੇਜੀ ਇਕ ਚਿੱਠੀ ‘ਚ ਬਾਦਲ ਨੇ ਕਿਹਾ ਕਿ ਵਾਤਾਵਰਣ ਮੰਤਾਰਾਲੇ ਤੋਂ ਮਨਜ਼ੂਰੀ ਨਾ ਮਿਲਣ ਕਾਰਨ ਸੂਬੇ ‘ਚ ਨਾ ਸਿਰਫ ਨਿਰਮਾਣ ਸਮੱਗਰੀ ਦੀ ਭਾਰੀ ਕਮੀ ਪੈਦਾ ਹੋ ਗਈ ਹੈ ਬਲਕਿ ਕਾਨੂੰਨ ਵਿਵਸਥਾ ਦੀ ਸਮੱਸਿਆ ਵੀ ਖੜੀ ਹੋ ਗਈ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਰੇਤਾ ਅਤੇ ਇੱਟਾਂ ਵਰਗੀ ਨਿਰਮਾਣ ਸਮੱਗਰੀ ਮੁਹੱਈਆ ਕਰਵਾਉਣ ਦੇ ਮਾਮਲੇ ‘ਚ ਔਖੇ ਹਾਲਾਤਾਂ ‘ਚੋਂ ਲੰਘ ਰਿਹਾ ਹੈ ਅਤੇ ਸੂਬੇ ‘ਚ ਹੋ ਰਹੀਆਂ ਉਸਾਰੀਆਂ ਦੀ ਗਤੀਵਿਧੀ ‘ਤੇ ਮਾੜਾ ਅਸਰ ਪੈ ਰਿਹਾ ਹੈ ਅਤੇ ਇਸਦਾ ਕਾਰਨ ਹੈ ਵਾਤਾਵਰਣ ਅਤੇ ਜੰਗਲਾਤ ਮੰਤਰਾਲੇ ‘ਚ ਮਾਮਲੇ ਲਟਕੇ ਰਹਿਣਾ। ਸਰਕਾਰੀ ਚਿੱਠੀ ਲਿਖਦੇ ਹੋਏ ਮੁੱਖ ਮੰਤਰੀ ਨੇ ਅਪੀਲ ਕੀਤੀ ਹੈ ਕਿ ਵਾਤਾਵਰਣ ਮੰਤਰਾਲੇ ਦੀ ਮੁਲਾਕਣ ਕਮੇਟੀ ਵਲੋਂ 95 ਮਾਈਨਿੰਗ ਪ੍ਰਾਜੈਕਟਾਂ ਦੀ ਲੜੀ-ਏ ਤਹਿਤ ਵਾਤਾਵਰਣ ਸੰਬੰਧੀ ਮਨਜ਼ੂਰੀ ਦੇਣ ਦੇ ਮਾਮਲੇ ‘ਤੇ ਵਿਚਾਰ ਕੀਤਾ ਜਾਵੇ। ਸੂਬਾ ਸਰਕਾਰ ਨੇ ਇਸ ਸਾਲ ਜੂਨ ‘ਚ ਇਸਦੇ ਸੰਬੰਧ ‘ਚ ਬਿੱਲ ਭੇਜਿਆ ਸੀ।
ਇਸ ਦੌਰਾਨ ਮੁੱਖ ਮੰਤਰੀ ਨੇ ਕੇਂਦਰੀ ਵਾਤਾਵਰਣ ਮੰਤਰੀ ਜੈਅੰਥੀ ਨਟਰਾਜਨ ਨੂੰ ਵੀ ਚਿੱਠੀ ਲਿਖੀ ਹੈ ਅਤੇ 3 ਦਸੰਬਰ ਨੂੰ ਮੁਲਾਕਾਤ ਦੇ ਦੌਰਾਨ ਉਨ੍ਹਾਂ ਵਲੋਂ ਦਿੱਤੇ ਗਏ ਭਰੌਸੇ ਦਾ ਮੁੱਦਾ ਉਠਾਇਆ ਹੈ। ਨਟਰਾਜਨ ਨੇ ਮੁਲਾਕਾਤ ਦੌਰਾਨ ਪ੍ਰਾਜੈਕਟਾਂ ਨੂੰ ਵਾਤਾਵਰਣ ਸੰਬੰਧੀ ਮਨਜ਼ੂਰੀ ‘ਤੇ ਤੁਰੰਤ ਕਾਰਵਾਈ ਦਾ ਭਰੌਸਾ ਦਿੱਤਾ ਸੀ।

90 ਫੀਸਦੀ ਭਾਰਤੀ ਮੂਰਖ ਹਨ : ਕਾਟਜੂ

ਨਵੀਂ ਦਿੱਲੀ- ਭਾਰਤੀ ਪ੍ਰੈਸ ਪਰਿਸ਼ਦ ਦੇ ਮੁਖੀ ਜਸਟਿਸ ਮਾਰਕੰਡੇ ਕਾਟਜੂ ਨੇ ਕਿਹਾ ਹੈ ਕਿ 90 ਫੀਸਦੀ ਭਾਰਤੀ ਬੇਫਕੁਫ ਹੁੰਦੇ ਹਨ ਜੋ ਧਰਮ ਦੇ ਨਾਮ ‘ਤੇ ਆਸਾਨੀ ਨਾਲ ਮੂਰਖ ਬਣ ਜਾਂਦੇ ਹਨ। ਸੂਤਰਾਂ ਦੇ ਮੁਤਾਬਕ ਜਸਟਿਸ ਕਾਟਜੂ ਨੇ ਇਕ ਸੈਮੀਨਾਰ ਦੌਰਾਨ ਕਿਹਾ ਕਿ 90 ਫੀਸਦੀ ਭਾਰਤੀ ਬੇਵਕੂਫ ਹੁੰਦੇ ਹਨ ਅਤੇ ਉਨ੍ਹਾਂ ਦੇ ਸਿਰ ‘ਚ ਦਿਮਾਗ ਨਹੀਂ ਹੁੰਦਾ।
ਜਸਟਿਸ ਕਾਟਜੂ ਨੇ ਕਿਹਾ ਕਿ ਸਿਰਫ 2 ਹਜ਼ਾਰ ਰੁਪਏ ਦੇ ਕੇ ਦਿੱਲੀ ‘ਚ ਸੰਪਰਦਾਇਕ ਦੰਗੇ ਭੜਕਾਏ ਜਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਦੰਗੇ ਭੜਕਾਉਣ ਦੇ ਲਈ ਕਿਸੇ ਧਾਰਮਿਕ ਸਥਾਨ ‘ਤੇ ਛੋਟੀ ਜਿਹੀ ਸ਼ਰਾਰਤ ਦੀ ਜ਼ਰੂਰਤ ਹੁੰਦੀ ਹੈ, ਉਸਦੇ ਬਾਅਦ ਲੋਕ ਸ਼ੁਰੂ ਕਰ ਦਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਲੋਕ ਅਜਿਹੀਆਂ ਗੱਲਾਂ ਨੂੰ ਲੈ ਕੇ ਆਪਸ ‘ਚ ਲੜਨਾ ਸ਼ੁਰੂ ਕਰ ਦਿੰਦੇ ਹਨ ਪਰ ਉਹ ਇਹ ਨਹੀਂ ਸੋਚਦੇ ਕਿ ਪਿੱਛੇ ਮੁੱਦਾ ਕੀ ਹੈ।
ਉਨ੍ਹਾਂ ਕਿਹਾ ਕਿ 1857 ਤੋਂ ਪਹਿਲਾਂ ਦੇਸ਼ ‘ਚ ਸੰਪਰਦਾਇਕਤਾ ਨਹੀਂ ਸੀ ਪਰ ਹੁਣ ਹਾਲਾਤ ਹੋਰ ਹਨ ਅਤੇ 80 ਫੀਸਦੀ ਹਿੰਦੂ ਅਤੇ ਮੁਸਲਮਾਨ ਸੰਪਰਦਾਇਕ ਹਨ। ਕਾਟਜੂ ਨੇ ਇਹ ਵੀ ਕਿਹਾ ਕਿ ਪਿਛਲੇ 150 ਸਾਲਾਂ ਤੋਂ ਭਾਰਤੀ ਅੱਗੇ ਵਧਣ ਦੀ ਬਜਾਇ ਪਿੱਛੇ ਹੋਇਆ ਹੈ ਕਿਉਂਕਿ ਅੰਗਰੇਜਾਂ ਨੇ ਲਗਾਤਾਰ ਸੰਪਰਦਾਇਕਤਾ ਦਾ ਜ਼ਹਿਰ ਘੋਲਿਆ ਹੈ। ਉਨ੍ਹਾਂ ਕਿਹਾ ਕਿ ਅੰਗਰੇਜਾਂ ਦੀ ਨੀਤੀ ਸਾਫ ਸੀ ਕਿ ਭਾਰਤ ‘ਚ ਰਾਜ ਕਰਨ ਦਾ ਇਕੋ-ਇਕ ਰਸਕਾ ਹੈ ਕਿ ਹਿੰਦੂਆਂ ਅਤੇ ਮੁਸਲਮਾਨਾਂ ਨੂੰ ਆਪਸ ‘ਚ ਲੜਾਇਆ ਜਾਵੇ।
ਜਸਟਿਸ ਕਾਟਜੂ ਨੇ ਕਿਹਾ ਕਿ ਉਹ ਇਲ ਗੱਲਾਂ ਇਸ ਲਈ ਕਹਿ ਰਹੇ ਹਨ ਤਾਂ ਕਿ ਲੋਕਾਂ ਨੂੰ ਸੰਪਰਦਾਇਕਤਾ ਬਾਰੇ ਪਤਾ ਲੱਗ ਸਕੇ ਅਤੇ ਉਹ ਇਹ ਮੂਰਖਤਾ ਨਾ ਕਰਨ।

ਮਨਮੋਹਨ ਨੇ ਮੋਦੀ ਨੂੰ ਪੁੱਛਿਆ- ਗੁਜਰਾਤ 18ਵੇਂ ਨੰਬਰ ‘ਤੇ ਕਿਉਂ?

ਅਹਿਮਦਾਬਾਦ- ਗੁਜਰਾਤ ‘ਚ ਇਕ ਚੋਣ ਰੈਲੀ ਨੂੰ ਸੰਬੋਧਿਤ ਕਰਦੇ ਹੋਏ ਮਨਮੋਹਨ ਸਿੰਘ ਨੇ ਨਰਿੰਦਰ ਮੋਦੀ ‘ਤੇ ਜੰਮ ਕੇ ਨਿਸ਼ਾਨੇ ਲਗਾਏ। ਹੁਣ ਤੱਕ ਕਾਂਗਰਸ ਸੰਪਰਦਾਇਕਤਾ’ਤੇ ਬੋਲਣ ਤੋਂ ਪਰਹੇਜ਼ ਕਰ ਰਹੀ ਸੀ ਪਰ ਪ੍ਰਧਾਨ ਮੰਤਰੀ ਨੇ ਇਸ ਚੁੱਪੀ ਨੂੰ ਤੋੜਦੇ ਹੋਏ ਕਿਹਾ ਕਿ ਵਿਰੋਧੀ ਸਮਾਜ ਨੂੰ ਵੰਡਣ ਵਾਲੀ ਰਾਜਨੀਤੀ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਘੱਟ ਗਿਣਤੀ ਖੁਦ ਨੂੰ ਪ੍ਰਦੇਸ਼ ‘ਚ ਅਸੁਰੱਖਿਅਤ ਮਹਿਸੂਸ ਕਰ ਰਹੇ ਹਨ। ਗੁਜਰਾਤ ਦੇ ਵਾਸੰਦਾ ‘ਚ ਮਨਮੋਹਨ ਸਿੰਘ ਨੇ ਕਿਹਾ ਕਿ ਭਾਜਪਾ ਪ੍ਰਦੇਸ਼ ‘ਚ ਵਿਕਾਸ ਦੀ ਗੱਲ ਕਰਦੀ ਹੈ ਪਰ ਵਿਕਾਸ ਦਾ ਫਾਇਦਾ ਕਿਸ ਨੂੰ ਮਿਲ ਰਿਹਾ ਹੈ। ਜੇਕਰ ਵਿਕਾਸ ਦਾ ਫਾਇਦਾ ਹਰ ਸਮੁਦਾਏ ਨੂੰ ਨਹੀਂ ਮਿਲ ਰਿਹਾ ਤਾਂ ਅਜਿਹੇ ਵਿਕਾਸ ਦਾ ਕੀ ਮਤਲਬ? ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਵਿਕਾਸ ਦਾ ਹਿੱਸਾ ਘੱਟ ਗਿਣਤੀਆਂ, ਅਨੁਸੂਚਿਤ ਜਾਤੀਆਂ ਅਤੇ ਆਦੀਵਾਸੀਆਂ ਨੂੰ ਨਹੀਂ ਮਿਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਦੇਸ਼ ਦੇ ਆਦੀਵਾਸੀ ਅੱਜ ਵੀ ਸਮਾਜ ਦੀ ਮੁੱਖ ਧਾਰਾ ਤੋਂ ਬਾਹਰ ਹਨ।
ਮਨਮੋਹਨ ਸਿੰਘ ਨੇ ਪੁੱਛਿਆ ਕਿ ਜੇਕਰ ਪ੍ਰਦੇਸ਼ ‘ਚ ਵਿਕਾਸ ਹੋਇਆ ਹੈ ਤਾਂ ਲੋਕਾਂ ਨੂੰ ਪੀਣ ਲਈ ਪਾਣੀ ਕਿਉਂ ਨਹੀਂ ਮਿਲ ਰਿਹਾ ਹੈ। ਪ੍ਰਦੇਸ਼ ਦੇ ਕਈ ਖੇਤਰਾਂ ‘ਚ ਪੀਣ ਵਾਲੇ ਪਾਣੀ ਦੀ ਕਮੀ ਹੈ। ਮਨੁੱਖੀ ਵਿਕਾਸ ਸੂਚਕਾਂਕ ‘ਚ ਗੁਜਰਾਤ 18ਵੇਂ ਨੰਬਰ ‘ਤੇ ਕਿਉਂ ਹੈ? ਪ੍ਰਦੇਸ਼ ਦੀਆਂ 51 ਫੀਸਦੀ ਮਹਿਲਾਵਾਂ  ਭੁੱਖਮਰੀ ‘ਚ ਕਿਉਂ ਹਨ। ਬੱਚਿਆਂ ‘ਚ ਭੁੱਖਮਰੀ ਦੀ ਸਮੱਸਿਆ ਵੀ ਗੰਭੀਰ ਹੈ। ਪ੍ਰਦੇਸ਼ ਸਰਕਾਰ ਇਨ੍ਹਾਂ ਸਮੱਸਿਆਵਾਂ ‘ਤੇ ਕਿਉਂ ਨਹੀਂ ਧਿਆਨ ਦਿੰਦੀ। ਕੇਂਦਰ ਸਰਕਾਰ ਦੀਆਂ ਯੋਜਨਾਵਾਂ ਦਾ ਫਾਇਦਾ ਪ੍ਰਦੇਸ਼ ‘ਚ ਲੋੜਵੰਦ ਲੋਕਾਂ ਨੂੰ ਨਹੀਂ ਮਿਲ ਰਿਹਾ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਹਾਲਤ ਇਹ ਹਨ ਕਿ ਕੇਂਦਰ ਸਰਕਾਰ ਵਲੋਂਦਿੱਤੀ ਗਈ ਰਕਮ ਪ੍ਰਦੇਸ਼ ਸਰਕਾਰ ਵਿਕਾਸ ਦੀਆਂ ਯੋਜਨਾਵਾਂ ‘ਤੇ ਖਰਚ ਨਹੀਂ ਕਰ ਪਾ ਰਹੀ ਹੈ।
ਮਨਮੋਹਨ ਸਿੰਘ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਤੁਸੀਂ ਸਮਾਜ ਨੂੰ ਵੰਡਣ ਵਾਲੀਆਂ ਪਾਰਟੀਆਂ ਨੂੰ ਵੋਟ ਨਾ ਦਿਓ। ਕਾਂਗਰਸ ਨੂੰ ਸੱਤਾ ‘ਚ ਲਿਆਓਗੇ ਤਾਂ ਉਹ ਸਾਰੇ ਲੋਕਾਂ ਲਈ ਕੰਮ ਕਰੇਗੀ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਗਾਂਧੀ, ਜਵਾਹਰ ਲਾਲ ਨਹਿਰੂ, ਸਰਦਾਰ ਪਟੇਲ ਅਤੇ ਇੰਦਰਾ ਗਾਂਧੀ ਜਿਹੇ ਮਹਾਨ ਨੇਤਾਵਾਂ ਦੀ ਪਾਰਟੀ ਰਹੀ ਹੈ। ਕਾਂਗਰਸ ਦੇਸ਼ ਨੂੰ ਵੰਡਣ ਵਾਲੀ ਰਾਜਨੀਤੀ ਨਹੀਂ ਕਰਦੀ। ਵਿਰੋਧੀ ਦੇਸ਼ ਨੂੰ ਵੰਡਣ ਵਾਲੀ ਰਾਜਨੀਤੀ ਕਰ ਰਿਹਾ ਹੈ। ਪ੍ਰਧਾਨ ਮੰਤਰੀ ਨੇ ਪੁੱਛਿਆ ਕਿ ਕੀ ਵਿਰੋਧੀਆਂ ਦੀ ਰਾਜਨੀਤੀ ਨਾਲ ਦੇਸ਼ ਇਕਜੁੱਟ ਰਹੇਗਾ?

ਕਪਤਾਨੀ ਛੱਡਣ ਦਾ ਸਵਾਲ ਹੀ ਨਹੀਂ : ਧੋਨੀ

ਕੋਲਕਾਤਾ- ਇੰਗਲੈਂਡ ਦੇ ਵਿਰੁੱਧ ਘਰੇਲੂ ਜ਼ਮੀਨ ‘ਤੇ ਲਗਾਤਾਰ ਦੂਜੀ ਹਾਰ ਤੋਂ ਬਾਅਦ ਆਲੋਚਕਾਂ ਦੇ ਨਿਸ਼ਾਨੇ ‘ਤੇ ਆਏ ਭਾਰਤੀ ਕ੍ਰਿਕਟ ਟੀਮ ਦੇ ਕਪਤਾਨ ਮਹਿੰਦਰ ਸਿੰਘ ਧੋਨੀ ਨੇ ਕਿਹਾ ਕਿ ਇਸ ਸਮੇਂ ਟੀਮ ਦੀ ਕਪਤਾਨੀ ਛੱਡਣਾ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ। ਧੋਨੀ ਨੇ ਕਿਹਾ ਕਿ, ”ਇਸ ਸਮੇਂ ਮੇਰੇ ਲਈ ਸਭ ਤੋਂ ਆਸਾਨ ਚੀਜ਼ ਇਹ ਹੈ ਕਿ ਮੈਂ ਕਪਤਾਨੀ ਛੱਡ ਦੇਵਾਂ ਪਰ ਜੇਕਰ ਮੈਂ ਕਪਤਾਨੀ ਛੱਡਦਾ ਹਾਂ ਤਾਂ ਇਹ ਮੇਰੇ ਲਈ ਜ਼ਿੰਮੇਵਾਰੀਆਂ ਤੋਂ ਭੱਜਣਾ ਹੋਵੇਗਾ। ਇਸ ਲਈ ਅਜੇ ਕਪਤਾਨੀ ਛੱਡਣਾ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ ਪਰ ਕਪਤਾਨੀ ਨੂੰ ਲੈ ਕੇ ਆਖਰੀ ਫੈਸਲਾ ਬੀ. ਸੀ. ਸੀ. ਆਈ. ਨੇ ਕਰਨਾ ਹੈ। ਘਰੇਲੂ ਜ਼ਮੀਨ ‘ਤੇ ਇੰਗਲੈਂਡ ਹੱਥੋਂ ਟੈਸਟ ਲੜੀ ‘ਚ ਲਗਾਤਾਰ ਦੂਜੀ ਹਾਰ ਤੋਂ ਬਾਅਦ ਧੋਨੀ ਨੇ ਕਿਹਾ ਕਿ ਉਨ੍ਹਾਂ ਦੀ ਟੀਮ ਨੇ ਵਿਰੋਧੀ ਟੀਮ ਦੇ ਗੇਂਦਬਾਜ਼ਾਂ ਦੇ ਸਾਹਮਣੇ ਵੱਡਾ ਸਕੋਰ ਨਹੀਂ ਬਣਾਇਆ, ਜਿਸ ਦੇ ਕਾਰਨ ਉਨ੍ਹਾਂ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਧੋਨੀ ਨੇ ਕਿਹਾ, ”ਸਾਡੇ ਬੱਲੇਬਾਜ਼ਾਂ ਨੂੰ ਵੱਡਾ ਸਕੋਰ ਬਣਾਉਣਾ ਚਾਹੀਦਾ ਸੀ ਤਾਂ ਕਿ ਅਸੀਂ ਆਪਣੇ ਗੇਂਦਬਾਜ਼ਾਂ ਨੂੰ ਬਚਾਅ ਕਰਨ ਯੋਗ ਸਕੋਰ ਦੇ ਸਕੀਏ। ਅਸੀਂ ਲਗਾਤਾਰ 300 ਦਾ ਸਕੋਰ ਨਹੀਂ ਬਣਾਇਆ। ਇਸ ਵਿਕਟ ‘ਤੇ ਸਾਨੂੰ 450 ਤੋਂ ਵੱਧ ਦਾ ਸਕੋਰ ਬਣਾਉਣਾ ਚਾਹੀਦਾ ਸੀ” ਧੋਨੀ ਨੇ ਕਿਹਾ ਕਿ ਦੂਜੀ ਪਾਰੀ ‘ਚ ਸਾਡੇ ਬੱਲੇਬਾਜ਼ਾਂ ਨੇ ਵਧੀਆ ਸ਼ੁਰੂਆਤ ਕੀਤੀ ਸੀ ਪਰ ਇਸ ਤੋਂ ਬਾਅਦ ਉਹ ਵੱਡਾ ਸਕੋਰ ਨਹੀਂ ਬਣਾ ਸਕੇ। ਸਾਡੀ ਟੀਮ ਲਗਾਤਾਰ ਡਿੱਗਦੀ ਗਈ ਅਤੇ ਅਸੀਂ ਉਸ ਨੂੰ ਰੋਕ ਨਹੀਂ ਸਕੇ। ਲੜੀ ‘ਚ 1-2 ਨਾਲ ਪਿਛੜ ਚੁੱਕੀ ਭਾਰਤੀ ਟੀਮ ਦੇ ਕਪਤਾਨ ਨੇ ਹਾਲਾਂਕਿ ਚੌਥੇ ਅਤੇ ਆਖਰੀ ਟੈਸਟ ਮੈਚ ‘ਚ ਜਿੱਤ ਦਾ ਭਰੋਸਾ ਜ਼ਾਹਿਰ ਕਰਦੇ ਹੋਏ ਕਿਹਾ ਕਿ ਨਾਗਪੁਰ ਟੈਸਟ ‘ਚ ਸਾਡੇ ਕੋਲ ਲੜੀ ਡਰਾਅ ਕਰਨ ਦਾ ਮੌਕਾ ਹੈ। ਆਖਰੀ ਟੈਸਟ ਮੈਚ ਲਈ ਹੁਣ ਸਾਰਿਆਂ ਨੂੰ ਕਮਰ ਕੱਸਣੀ ਹੋਵੇਗੀ। ਟੀਮ ਦੇ ਬੱਲੇਬਾਜ਼ਾਂ ਤੋਂ ਲੈ ਕੇ ਗੇਂਦਬਾਜ਼ਾਂ ਨੂੰ ਬਿਹਤਰੀਨ ਪ੍ਰਦਰਸ਼ਨ ਕਰਨਾ ਹੋਵੇਗਾ।
ਧੋਨੀ ਨੇ ਇੰਗਲੈਂਡ ਦੇ ਖਿਡਾਰੀਆਂ ਦੀ ਪ੍ਰਸ਼ੰਸਾ ਕਰਦੇ ਹੋਏ ਕਿਹਾ, ”ਇੰਗਲਿਸ਼ ਖਿਡਾਰੀਆਂ ਦਾ ਪ੍ਰਦਰਸ਼ਨ ਬਿਹਤਰੀਨ ਸੀ। ਉਨ੍ਹਾਂ ਨੇ ਸਹੀ ਦਿਸ਼ਾ ‘ਚ ਗੇਂਦਬਾਜ਼ੀ ਕੀਤੀ ਅਤੇ ਉਨ੍ਹਾਂ ਦੀ ਫੀਲਡਿੰਗ ਵੀ ਕਮਾਲ ਦੀ ਸੀ। ਉਨ੍ਹਾਂ ਨੇ ਵਧੀਆ ਖੇਡਿਆ ਪਰ ਸਾਨੂੰ ਇਸ ਦਾ ਜਵਾਬ ਦੇਣਾ ਚਾਹੀਦਾ ਸੀ, ਜਿਸ ‘ਚ ਅਸੀਂ ਨਾਕਾਮ ਰਹੇ।”

ਏ. ਐੱਸ. ਆਈ. ਦੇ ਪਰਿਵਾਰ ਨੂੰ ਹੌਂਸਲਾ ਦੇਣ ਪਹੁੰਚੇ ਬਾਦਲ

ਅੰਮ੍ਰਿਤਸਰ—ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਮ੍ਰਿਤਕ ਏ. ਐੱਸ. ਆਈ. ਰਵਿੰਦਰ ਪਾਲ ਦੇ ਪਰਿਵਾਰ ਵਾਲਿਆਂ ਨਾਲ ਦੁੱਖ ਸਾਂਝਾ ਕਰਨ ਲਈ ਉਨ੍ਹਾਂ ਦੇ ਘਰ ਪਹੁੰਚੇ। ਉਨ੍ਹਾਂ ਨੇ ਕਿਹਾ ਕਿ ਇਸ ਪਰਿਵਾਰ ਨੂੰ ਹਰ ਸੰਭਵ ਮਦਦ ਦਿੱਤੀ ਜਾਵੇਗੀ। ਮੁੱਖ ਮੰਤਰੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਇਹ ਇਕ ਦੁਖਦਾਈ ਘਟਨਾ ਹੈ ਅਤੇ ਉਨ੍ਹਾਂ ਨੂੰ ਵੀ ਇਸ ਘਟਨਾ ਦੇ ਵਾਪਰਨ ਦਾ ਪਰਿਵਾਰ ਵਾਲਿਆਂ ਜਿੰਨਾ ਹੀ ਦੁੱਖ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਮ੍ਰਿਤਕ ਦੇ ਪਰਿਵਾਰ ਨਾਲ ਪੂਰੀ ਹਮਦਰਦੀ ਹੈ ਅਤੇ ਉਹ ਇਸ ਪਰਿਵਾਰ ਦੀ ਰੱਖਿਆ ਕਰਨਗੇ। ਨਾਲ ਹੀ ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਲੋਕ ਇਸ ਘਟਨਾ ਨੂੰ ਰਾਜਨੀਤਿਕ ਮਾਮਲਾ ਨਾ ਬਣਾਉਣ। ਸ਼੍ਰੀ ਬਾਦਲ ਨੇ ਕਿਹਾ ਕਿ ਇਸ ਘਟਨਾ ਦੇ ਦੋਸ਼ੀਆਂ ਦੀ ਪੁਲਸ ਜਾਂਚ ਕਰ ਰਹੀ ਹੈ ਅਤੇ ਇਸ ਦੇ ਨਾਲ ਇਸ ਦੀ ਵੀ ਜਾਂਚ ਕੀਤੀ ਜਾਵੇਗੀ ਕਿ ਦੋਸ਼ੀ ਕੋਲ ਹਥਿਆਰ ਦਾ ਲਾਈਸੈਂਸ ਕਿਵੇਂ ਆਇਆ। ਬਾਦਲ ਨੇ ਦੱਸਿਆ ਕਿ ਰਾਜਨੀਤੀ ‘ਚ ਇਸ ਘਟਨਾ ਦੇ ਦੋਸ਼ੀ ਨੂੰ ਕੋਈ ਨਹੀਂ ਜਾਣਦਾ ਕਿਉਂਕਿ ਉਹ ਪਾਰਟੀ ‘ਚ ਅਜੇ ਨਵਾਂ ਹੀ ਆਇਆ ਸੀ। ਸ਼੍ਰੀ ਬਾਦਲ ਦੇ ਇੱਥੇ ਪਹੁੰਚਣ ‘ਤੇ ਪਰਿਵਾਰ ਵਾਲਿਆਂ ਨੇ ਉਨ੍ਹਾਂ ਦਾ ਧੰਨਵਾਦ ਕੀਤਾ ਅਤੇ ਨਾਲ ਹੀ ਸਮਾਜ ‘ਚ ਕੁੜੀਆਂ ਦੀ ਸੁਰੱਖਿਆ ਸੰਬੰਧੀ ਕਈ ਸਵਾਲ ਵੀ ਕੀਤੇ।
ਇਸ ਮਾਮਲੇ ‘ਚ ਇਲਾਕੇ ਦੇ ਲੋਕਾਂ ‘ਚ ਵੀ ਗੁੱਸਾ ਹੈ ਅਤੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਅਕਾਲੀ ਦਲ ਨੂੰ ਚਾਹੀਦਾ ਹੈ ਕਿ ਉਹ ਜਿਸ ਵਿਅਕਤੀ ਨੂੰ ਵੀ ਪਾਰਟੀ ‘ਚ ਸ਼ਾਮਲ ਕਰਦੀ ਹੈ, ਪਹਿਲਾਂ ਉਸ ਦੀ ਚੰਗੀ ਤਰ੍ਹਾਂ ਜਾਂਚ-ਪੜਤਾਲ ਕਰੇ। ਜ਼ਿਕਰਯੋਗ ਹੈ ਕਿ ਅਕਾਲੀ ਨੇਤਾ ਰਾਣਾ ਨੇ  ਏ. ਐੱਸ. ਆਈ. ਰਵਿੰਦਰ ਪਾਲ ਦੀ ਬਜ਼ਾਰ ‘ਚ ਸ਼ਰੇਆਮ ਗੋਲੀਆਂ ਚਲਾ ਕੇ ਹੱਤਿਆ ਕਰ ਦਿੱਤੀ ਸੀ, ਜਿਸ ਕਾਰਨ ਪੂਰੇ ਇਲਾਕੇ ‘ਚ ਇਸ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ।

ਸੋਨੀਆ ਗਾਂਧੀ 66 ਸਾਲ ਦੀ ਹੋਈ

ਨਵੀਂ ਦਿੱਲੀ- ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਐਤਵਾਰ ਨੂੰ 66 ਸਾਲ ਦੀ ਹੋ ਗਈ। ਉਨ੍ਹਾਂ ਨੂੰ ਵਧਾਈ ਦੇਣ ਲਈ ਵੱਡੀ ਗਿਣਤੀ ‘ਚ ਪਾਰਟੀ ਦੇ ਸਮਰਥਕ ਉਨ੍ਹਾਂ ਦੇ ਅਧਿਕਾਰਤ ਘਰ 10 ਜਨਪਥ ਦੇ ਬਾਹਰ ਜਮ੍ਹਾ ਹੋ ਗਏ। ਢੋਲ ਵਜਾ ਕੇ ਅਤੇ ਪਟਾਖੇ ਛੱਡ ਕੇ ਕਾਂਗਰਸ ਵਰਕਰਾਂ ਨੇ ਇਸ ਮੌਕੇ ‘ਤੇ ਮਿਠਾਈਆਂ ਵੰਡੀਆਂ। ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਦੇ ਨਾਲ-ਨਾਲ ਕੇਂਦਰੀ ਮੰਤਰੀਆਂ ਅਤੇ ਪਾਰਟੀ ਦੇ ਸੀਨੀਅਰ ਨੇਤਾਵਾਂ ਨੇ ਸੋਨੀਆ ਗਾਂਧੀ ਨੂੰ ਸ਼ੁਭਕਾਮਨਾਵਾਂ ਦਿੱਤੀਆਂ।
ਕਾਂਗਰਸ ਕਾਰਜਕਾਰੀ ਕਮੇਟੀ ਦੇ ਮੈਂਬਰਾਂ ਅਤੇ ਸੁਸ਼ੀਲ ਕੁਮਾਰ ਸ਼ਿੰਦੇ, ਬੇਨੀ ਪ੍ਰਸਾਦ ਵਰਮਾ, ਗੁਲਾਮ ਨਬੀ ਆਜ਼ਾਦ, ਕਪਿਲ ਸਿੱਬਲ, ਜਨਾਰਦਨ ਦਿਵੇਦੀ ਅਤੇ ਮੋਤੀਲਾਲ ਵੋਰਾ ਸਣੇ ਕੇਂਦਰੀ ਨੇਤਾ ਸੋਨੀਆ ਗਾਂਧੀ ਨੂੰ ਵਧਾਈ ਦੇਣ ਲਈ ਸ਼ਨੀਵਾਰ ਸ਼ਾਮ ਉਨ੍ਹਾਂ ਦੇ ਘਰ ਗਏ। ਸੂਤਰਾਂ ਨੇ ਦੱਸਿਆ ਕਿ ਸੋਨੀਆ ਗਾਂਧੀ ਦੇ ਐਤਵਾਰ ਨੂੰ ਕੁਝ ਰੁਝੇਵੇਂ ਹਨ, ਇਸ ਕਾਰਨ ਉਨ੍ਹਾਂ ਨੇ ਸ਼ਨੀਵਾਰ ਹੀ ਉਨ੍ਹਾਂ ਨੇਤਾਵਾਂ ਨਾਲ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਦੀਆਂ ਸ਼ੁਭਕਾਮਨਾਵਾਂ ਲਈਆਂ। ਹਰਿਆਣਾ ਦੇ ਮੁੱਖ ਮੰਤਰੀ ਭੂਪਿੰਦਰ ਸਿੰਘ ਹੁੱਡਾ ਅਤੇ ਆਂਧਰਾ ਪ੍ਰਦੇਸ਼ ਦੇ ਕਿਰਨ ਕੁਮਾਰ ਰੈੱਡੀ ਸਣੇ ਕਈ ਮੁੱਖ ਮੰਤਰੀਆਂ ਅਤੇ ਰਾਜ ਕਾਂਗਰਸ ਨੇਤਾਵਾਂ ਨੇ ਉਨ੍ਹਾਂ ਨੂੰ ਸ਼ੁਭ ਕਾਮਨਾਵਾਂ ਦਿੱਤੀਆਂ ਹਨ।

ਸਾਬਕਾ ਏਅਰ ਹੋਸਟਸ ਖੁਦਕੁਸ਼ੀ ਕੇਸ
ਗੋਪਾਲ ਕਾਂਡਾ ਦੀ ਜ਼ਮਾਨਤ ਅਰਜ਼ੀ
ਰੱਦ-ਗ੍ਰਿਫ਼ਤਾਰੀ ਲਈ ਛਾਪੇ

ਨਵੀਂ ਦਿੱਲੀ, 9 ਅਗਸਤ -ਸਾਬਕਾ ਏਅਰ ਹੋਸਟਸ ਗੀਤਿਕਾ ਸ਼ਰਮਾ ਵੱਲੋਂ ਕੀਤੀ ਖੁਦਕੁਸ਼ੀ ਦੇ ਮਾਮਲੇ ਵਿਚ ਦਿੱਲੀ ਦੀ ਇਕ ਅਦਾਲਤ ਨੇ ਹਰਿਆਣਾ ਦੇ ਸਾਬਕਾ ਮੰਤਰੀ ਗੋਪਾਲ ਕਾਂਡਾ ਦੀ ਅਗਾਊਂ ਜ਼ਮਾਨਤ ਦੀ ਅਰਜ਼ੀ ਰੱਦ ਕਰ ਦਿੱਤੀ ਜਦਕਿ ਇਸ ਮਾਮਲੇ ਵਿਚ ਗ੍ਰਿਫ਼ਤਾਰ ਉਸ ਦੀ ਸਹਿਯੋਗੀ ਅਰੁਣਾ ਚੱਢਾ ਨੂੰ ਦੋ ਦਿਨਾ ਪੁਲਿਸ ਰਿਮਾਂਡ 'ਤੇ ਭੇਜ ਦਿੱਤਾ। ਪੁਲਿਸ ਵੱਲੋਂ ਇਹ ਪੱਖ ਰੱਖਣ ਕਿ ਗੀਤਿਕਾ ਦੇ ਖੁਦਕੁਸ਼ੀ ਨੋਟ ਵਿਚ ਕਾਂਡਾ ਤੇ ਚੱਢਾ ਦਾ ਨਾਂਅ ਹੋਣ ਕਾਰਨ ਉਸ ਕੋਲੋਂ ਪੁੱਛਗਿੱਛ ਕਰਨੀ ਹੈ, ਐਡੀਸ਼ਨਲ ਚੀਫ਼ ਮੈਟਰੋਪਾਲੀਟਨ ਮੈਜਿਸਟਰੇਟ ਦਵੇਂਦਰ ਕੁਮਾਰ ਜੰਗਾਲਾ ਨੇ ਅਰੁਣਾ ਚੱਢਾ ਨੂੰ 11 ਅਗਸਤ ਤੱਕ ਪੁਲਿਸ ਰਿਮਾਂਡ 'ਤੇ ਭੇਜਣ ਦੇ ਹੁਕਮ ਸੁਣਾਏ।
ਗ੍ਰਿਫ਼ਤਾਰੀ ਲਈ ਛਾਪੇ
ਦਿੱਲੀ ਪੁਲਿਸ ਵੱਲੋਂ ਫਰਾਰ ਹੋਏ ਹਰਿਆਣਾ ਦੇ ਸਾਬਕਾ ਮੰਤਰੀ ਗੋਪਾਲ ਕਾਂਡਾ ਦੇ ਦਿੱਲੀ ਅਤੇ ਹਰਿਆਣਾ ਸਥਿਤ ਰਿਹਾਇਸ਼, ਹੋਟਲ ਅਤੇ ਹੋਰ ਦਫ਼ਤਰਾਂ ਵਿਚ ਛਾਪੇਮਾਰੀ ਕੀਤੀ। ਪੁਲਿਸ ਵੱਲੋਂ ਗੋਪਾਲ ਕਾਂਡਾ ਦੇ ਗੁੜਗਾਓਂ, ਫਰੀਦਾਬਾਦ, ਅਤੇ ਦਿੱਲੀ ਸਥਿਤ ਰਿਹਾਇਸ਼ ਤੇ ਦਫ਼ਤਰਾਂ ਵਿਚ ਛਾਪੇਮਾਰੀ ਕੀਤੀ ਗਈ। ਪੁਲਿਸ ਨੇ ਕਾਂਡਾ ਦੇ ਪਰਸ਼ੂਰਾਮ ਚੌਕ ਨੇੜੇ ਦਫ਼ਤਰ, ਰਾਨੀਆ ਰੋਡ 'ਤੇ ਸਥਿਤ ਰਿਹਾਇਸ਼ ਤੇ ਹੋਰਨੀਂ ਥਾਈਂ ਛਾਪੇਮਾਰੀ ਕੀਤੀ ਗਈ। ਗ੍ਰਿਫ਼ਤਾਰੀ ਡਰੋਂ ਭੱਜੇ ਕਾਂਡਾ ਦੀ ਸਹਿਯੋਗੀ ਅਰੁਣਾ ਚੱਢਾ ਨੂੰ ਪੁਲਿਸ ਨੇ ਬੁੱਧਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ।

ਪੁਲਿਸ ਅਧਿਕਾਰੀ ਪੀ.ਕਰੁਣਾਕਰਨ ਨੇ ਦੱਸਿਆ ਕਿ ਅੱਜ ਚੱਢਾ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਗੀਤਿਕਾ ਦੇ ਭਰਾ ਗੌਰਵ ਸ਼ਰਮਾ ਨੇ ਦੋਸ਼ ਲਾਇਆ ਕਿ ਕਾਂਡਾ ਤੇ ਚੱਢਾ ਵੱਲੋਂ ਉਸ ਦੀ ਭੈਣ ਨੂੰ ਮਾਨਸਿਕ ਤੌਰ 'ਤੇ ਪਰੇਸ਼ਾਨ ਕੀਤਾ ਜਾਂਦਾ ਰਿਹਾ। ਪੁਲਿਸ ਵੱਲੋਂ ਕਾਂਡਾ ਨੂੰ ਗ੍ਰਿਫ਼ਤਾਰ ਕਰਨ ਲਈ ਕਈ ਟੀਮਾਂ ਬਣਾਈਆਂ ਹਨ ਜਿਨ੍ਹਾਂ ਵੱਲੋਂ ਵੱਖ-ਵੱਖ ਥਾਵਾਂ 'ਤੇ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਬੁੱਧਵਾਰ ਨੂੰ ਵੀ ਕਾਂਡਾ ਦੇ ਫਾਰਮ ਹਾਊਸ, ਹੋਟਲ ਤੇ ਦਫ਼ਤਰਾਂ ਵਿਚ ਛਾਪੇਮਾਰੀ ਕੀਤੀ ਸੀ। ਪੁਲਿਸ ਨੇ ਗੁੜਗਾਓਂ ਸਥਿਤ ਸ਼ੁਸ਼ਾਕ ਰੋਡ 'ਤੇ ਸਥਿਤ ਕਾਂਡਾ ਦੇ ਹੋਟਲ ਪਾਰਕ ਪਲਾਜ਼ਾ ਵਿਚ ਵੀ ਛਾਪੇਮਾਰੀ ਕੀਤੀ।
ਸਿਰਸਾ 'ਚ ਛਾਪੇ

ਸਿਰਸਾ, (ਭੁਪਿੰਦਰ ਪੰਨੀਵਾਲੀਆ)-ਹਰਿਆਣਾ ਦੇ ਸਾਬਕਾ ਗ੍ਰਹਿ ਮੰਤਰੀ ਗੋਪਾਲ ਕਾਂਡਾ ਦੀ ਗ੍ਰਿਫ਼ਤਾਰੀ ਲਈ ਦਿੱਲੀ ਪੁਲਿਸ ਨੇ ਲੰਘੀ ਅੱਧੀ ਰਾਤ ਸਾਬਕਾ ਮੰਤਰੀ ਦੇ ਵੱਖ-ਵੱਖ ਟਿਕਾਣਿਆਂ 'ਤੇ ਛਾਪੇ ਮਾਰੇ ਪਰ ਕਾਂਡਾ ਹੱਥ ਨਹੀਂ ਆਇਆ । ਦਿੱਲੀ ਦੇ ਥਾਣਾ ਅਸ਼ੋਕ ਵਿਹਾਰ ਦੇ ਪੁਲਿਸ ਇੰਸਪੈਕਟਰ ਸਤਪਾਲ ਯਾਦਵ ਦੀ ਅਗਵਾਈ ਵਿੱਚ ਸਿਰਸਾ ਦੇ ਸਿਟੀ ਥਾਣੇ ਪੁੱਜੀ ਬਾਅਦ 'ਚ ਸਾਬਕਾ ਮੰਤਰੀ ਦੇ ਨਿਵਾਸ 'ਤੇ ਗਈ ਪਰ ਉਸ ਦੇ ਨਿਵਾਸ 'ਤੇ ਜਿੰਦਰਾ ਲੱਗਾ ਹੋਣ ਕਾਰਨ ਦਿੱਲੀ ਪੁਲਿਸ ਮੁੜ ਆਈ। ਬਾਅਦ ਵਿੱਚ ਪੁਲਿਸ ਨੇ ਗੋਪਾਲ ਕਾਂਡਾ ਦੇ ਨਿੱਜੀ ਦਫ਼ਤਰ ਪੁੱਜੀ ਜਿਥੇ ਮੌਜੂਦ ਕਰਮਚਾਰੀਆਂ ਤੋਂ ਪੁੱਛਗਿੱਛ ਕੀਤੀ। ਇਸ ਉਪਰੰਤ ਪੁਲਿਸ ਐਮ. ਡੀ. ਕੇ. ਸਕੂਲ ਪੁੱਜੀ ਜਿਥੇ ਕਰਮਚਾਰੀਆਂ ਤੋਂ ਪੁੱਛਗਿਛ ਕੀਤੀ । ਗੀਤਿਕਾ ਸ਼ਰਮਾ ਸਿਰਸਾ ਵਿਖੇ ਸਥਿਤ ਐਮ. ਡੀ. ਕੇ. ਸਕੂਲ ਦੀ ਟਰਸੱਟੀ ਵੀ ਸੀ। ਗੋਪਾਲ ਕਾਂਡਾ ਸਾਲ 2009 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਬਤੌਰ ਆਜ਼ਾਦ ਉਮੀਦਵਾਰ ਵੱਜੋਂ ਇਨੈਲੋ ਦੇ ਉਮੀਦਵਾਰ ਸ੍ਰੀ ਜੈਨ ਤੋਂ ਕਰੀਬ 6469 ਵੋਟਾਂ ਦੇ ਫਰਕ ਨਾਲ ਜੇਤੂ ਰਹੇ ਸਨ।

ਪਤਨੀ ਦਾ ਕਤਲ ਕਰਕੇ ਖੁਦਕੁਸ਼ੀ

ਲੁਧਿਆਣਾ, 9 ਅਗਸਤ -ਥਾਣਾ ਡਿਵੀਜ਼ਨ ਨੰਬਰ 2 ਦੇ ਘੇਰੇ ਅੰਦਰ ਪੈਂਦੇ ਇਲਾਕੇ ਫੀਲਡ ਗੰਜ ਦੇ ਕੂਚਾ ਨੰਬਰ 7 ਵਿਚ ਅੱਜ ਸਵੇਰੇ ਗਰਭਵਤੀ ਪਤਨੀ ਦਾ ਕਤਲ ਕਰਨ ਉਪਰੰਤ ਪਤੀ ਵੱਲੋਂ ਖੁਦਕਸ਼ੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮ੍ਰਿਤਕ ਦੀ ਸ਼ਨਾਖਤ ਹਿਮਾਂਸ਼ੂ (27) ਪੁੱਤਰ ਸ੍ਰੀ ਹੰਸ ਰਾਜ ਅਰੋੜਾ ਤੇ ਉਸਦੀ ਪਤਨੀ ਲਲਿਤਾ ਉਰਫ਼ ਪੂਜਾ (22) ਵਜੋਂ ਕੀਤੀ ਗਈ ਹੈ। ਪੂਜਾ ਨਾਭਾ ਦੀ ਰਹਿਣ ਵਾਲੀ ਤੇ 14 ਮਹੀਨੇ ਪਹਿਲਾਂ ਉਸਦਾ ਵਿਆਹ ਹਿਮਾਂਸ਼ੂ ਨਾਲ ਹੋਇਆ ਸੀ। ਹਿਮਾਂਸ਼ੂ ਅੱਜ ਸਵੇਰੇ ਬਾਥਰੂਮ ਜਾਣ ਲਈ 4 ਵਜੇ ਉਠਿਆ ਸੀ ਤੇ ਉਸ ਤੋਂ ਬਾਅਦ ਉਹ ਕਮਰੇ ਵਿਚ ਚਲਾ ਗਿਆ ਤੇ ਬਾਹਰ ਨਹੀਂ ਆਇਆ। ਅੱਜ ਸਵੇਰੇ ਜਦੋਂ 11 ਵਜੇ ਤੱਕ ਹਿਮਾਂਸ਼ੂ ਤੇ ਉਸ ਦੀ ਪਤਨੀ ਪੂਜਾ ਜਦੋਂ ਕਮਰੇ ਵਿਚੋਂ ਬਾਹਰ ਨਾ ਆਏ ਤਾਂ ਉਸਦੇ ਪਿਤਾ ਸ੍ਰੀ ਅਰੋੜਾ ਨੇ ਉਨ੍ਹਾਂ ਦੇ ਕਮਰੇ ਦਾ ਦਰਵਾਜ਼ਾ ਖੜਕਾਉਣਾ ਸ਼ੁਰੂ ਕਰ ਦਿੱਤਾ ਪਰ ਜਦੋਂ ਉਨ੍ਹਾਂ ਨੇ ਦਰਵਾਜ਼ਾ ਨਾ ਖੋਲ੍ਹਿਆ ਤਾਂ ਸ੍ਰੀ ਅਰੋੜਾ ਨੇ ਇਸ ਸਬੰਧੀ ਪੁਲਿਸ ਨੂੰ ਸੂਚਿਤ ਕੀਤਾ। ਸੂਚਨਾ ਮਿਲਦੇ ਥਾਣਾ ਡਿਵੀਜ਼ਨ ਨੰਬਰ 2 ਦੇ ਐਸ. ਐਚ. ਓ. ਇੰਸਪੈਕਟਰ ਗੁਰਪ੍ਰੀਤ ਸਿੰਘ ਮੌਕੇ 'ਤੇ ਪਹੁੰਚੇ ਤੇ ਉਨ੍ਹਾਂ ਦੇ ਨਾਲ ਆਏ ਪੁਲਿਸ ਮੁਲਾਜ਼ਮ ਜਦੋਂ ਦਰਵਾਜ਼ਾ ਤੋੜ ਕੇ ਅੰਦਰ ਗਏ ਤਾਂ ਉਨ੍ਹਾਂ ਦੇਖਿਆ ਕਿ ਪੂਜਾ ਦੀ ਲਾਸ਼ ਬੈੱਡ 'ਤੇ ਪਈ ਹੈ ਜਦਕਿ ਹਿਮਾਂਸ਼ੂ ਦੀ ਲਾਸ਼ ਖੂਨ ਨਾਲ ਲੱਥਪੱਥ ਜ਼ਮੀਨ 'ਤੇ ਪਈ ਸੀ। ਦੋਵਾਂ ਦੇ ਗਲੇ 'ਤੇ ਚਾਕੂ ਨਾਲ ਕੀਤੇ ਜ਼ਖਮਾਂ ਦੇ ਨਿਸ਼ਾਨ ਸਨ। ਡੀ. ਸੀ. ਪੀ. ਸ: ਗੁਰਪ੍ਰੀਤ ਸਿੰਘ ਤੂਰ, ਏ. ਡੀ. ਸੀ. ਪੀ. (ਅਪਰਾਧ) ਸ: ਹਰਜਿੰਦਰ ਸਿੰਘ ਤੇ ਏ. ਸੀ. ਪੀ. ਰਮਨੀਸ਼ ਚੌਧਰੀ ਮੌਕੇ 'ਤੇ ਪਹੁੰਚੇ।

ਸਹਾਇਕ ਥਾਣੇਦਾਰ ਵੱਲੋਂ ਖੁਦਕੁਸ਼ੀ

ਮੰਡੀ ਗੋਬਿੰਦਗੜ੍ਹ, 9 ਅਗਸਤ -ਮੰਡੀ ਗੋਬਿੰਦਗੜ੍ਹ ਥਾਣੇ 'ਚ ਤਾਇਨਾਤ ਸਹਾਇਕ ਥਾਣੇਦਾਰ ਸੁਖਮਿੰਦਰ ਸਿੰਘ ਵੱਲੋਂ ਮਾਨਸਿਕ ਤੇ ਦਿਮਾਗ਼ੀ ਤਣਾਅ ਦੇ ਕਾਰਨ ਆਪਣੀ ਸਰਵਿਸ ਰਿਵਾਲਵਰ ਨਾਲ ਆਪਣੇ ਆਪ ਨੂੰ ਗੋਲੀ ਮਾਰ ਕੇ ਆਤਮ ਹੱਤਿਆ ਕਰ ਲਈ ਹੈ। ਸੁਖਮਿੰਦਰ ਸਿੰਘ ਸੁੱਖੀ ਪੁੱਤਰ ਬੂਟਾ ਸਿੰਘ ਨਿਵਾਸੀ ਪਿੰਡ ਤਲਵੰਡੀ ਰਾਏ, ਥਾਣਾ ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ ਮੰਡੀ ਗੋਬਿੰਦਗੜ੍ਹ ਪੁਲਿਸ ਥਾਣੇ ਵਿਚ ਸਹਾਇਕ ਥਾਣੇਦਾਰ ਵਜੋਂ ਡਿਊਟੀ ਨਿਭਾ ਰਿਹਾ ਸੀ। ਬੀਤੀ 7-8 ਅਗਸਤ ਦੀ ਦਰਮਿਆਨੀ ਰਾਤ ਨੂੰ ਜਦੋਂ ਉਹ ਸਥਾਨਕ ਪੁਲਿਸ ਕਾਲੋਨੀ ਸਥਿਤ ਆਪਣੇ ਸਰਕਾਰੀ ਕੁਆਟਰ ਨੰਬਰ 23 ਵਿਚ ਇਕੱਲਾ ਸੀ ਤਾਂ ਉਸ ਨੇ ਆਪਣੀ ਸਰਵਿਸ ਰਿਵਾਲਵਰ ਨਾਲ ਗੋਲੀ ਮਾਰ ਲਈ। ਜਿਸ ਕਾਰਨ ਸੁਖਮਿੰਦਰ ਸਿੰਘ ਦੀ ਘਟਨਾ ਵਾਲੀ ਥਾਂ 'ਤੇ ਹੀ ਮੌਤ ਹੋ ਗਈ। ਮੰਡੀ ਗੋਬਿੰਦਗੜ੍ਹ ਪੁਲਿਸ ਨੇ 174 ਅਧੀਨ ਸੁਖਮਿੰਦਰ ਸਿੰਘ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾਉਣ ਉਪਰੰਤ ਲਾਸ਼ ਵਾਰਿਸਾਂ ਹਵਾਲੇ ਕਰ ਦਿੱਤੀ ਹੈ।

ਅਗਲੀ-2 ਮਿਜ਼ਾਈਲ ਦਾ ਸਫ਼ਲ ਤਜਰਬਾ

ਬਾਲਾਸੋਰ (ਓਡੀਸ਼ਾ), 9 ਅਗਸਤ -ਭਾਰਤ ਨੇ ਆਪਣੀ ਮਿਜ਼ਾਈਲ ਸਮਰੱਥਾ ਵਧਾਉਂਦਿਆਂ ਮੱਧਮ ਦੂਰੀ ਦੀ ਪ੍ਰਮਾਣੂ ਸ਼ਕਤੀ ਵਾਲੀ ਅਗਨੀ-2 ਮਿਜ਼ਾਈਲ ਦਾ ਅੱਜ ਓਡੀਸ਼ਾ ਦੇ ਵੀਲ੍ਹਰ ਟਾਪੂ ਤੋਂ ਸਫਲਤਾਪੂਰਵਕ ਤਜ਼ਰਬਾ ਕੀਤਾ ਜੋ ਕਿ 2000 ਕਿਲੋਮੀਟਰ ਦੀ ਦੂਰੀ ਤੱਕ ਮਾਰ ਕਰ ਸਕਦੀ ਹੈ। ਰੱਖਿਆ ਸੂਤਰਾਂ ਅਨੁਸਾਰ ਸਤ੍ਹਾ ਤੋਂ ਸਤ੍ਹਾ 'ਤੇ ਮਾਰ ਕਰਨ ਵਾਲੀ ਇਸ ਮਿਜ਼ਾਈਲ ਦਾ ਤਜ਼ਰਬਾ 'ਇੰਟੈਗਰੇਟਿਡ ਟੈਸਟ ਰੇਜ਼' (ਆਈ. ਟੀ. ਆਰ.) ਤੋਂ ਸਵੇਰ ਦੇ 8 ਵੱਜ ਕੇ 48 ਮਿੰਟ 'ਤੇ ਮੋਬਾਈਲ ਲਾਂਚਰ ਰਾਹੀਂ ਕੀਤਾ ਗਿਆ। ਇਸ ਤਜ਼ਰਬੇ ਨੂੰ ਪੂਰੀ ਤਰ੍ਹਾਂ ਸਫਲ ਦੱਸਦਿਆਂ ਆਈ. ਟੀ. ਆਰ. ਦੇ ਨਿਰਦੇਸ਼ਕ ਐੱਮ. ਵੀ. ਕੇ. ਵੀ. ਪ੍ਰਸਾਦ ਨੇ ਕਿਹਾ 'ਇਸ ਸਵਦੇਸ਼ੀ ਮਿਜ਼ਾਈਲ ਦੇ ਤਜ਼ਰਬੇ ਦੌਰਾਨ ਮਿਸ਼ਨ ਦੇ ਸਾਰੇ ਮਾਪਦੰਡਾਂ ਨੂੰ ਪੂਰਾ ਕੀਤਾ ਗਿਆ।' ਇੰਟਰਮੀਡਿਅਟ ਰੇਜ਼ ਬੈਲਿਸਟਿਕ ਮਿਜ਼ਾਈਲ (ਆਈ. ਆਰ. ਬੀ. ਐੱਮ.) ਅਗਨੀ-2 ਨੂੰ ਸੇਵਾ 'ਚ ਪਹਿਲਾਂ ਹੀ ਸ਼ਾਮਿਲ ਕਰ ਲਿਆ ਗਿਆ ਹੈ ਅਤੇ ਅੱਜ ਦਾ ਤਜ਼ਰਬਾ ਫ਼ੌਜ ਦੀ ਰਣਨੀਤਕ ਬਲ ਕਮਾਨ (ਐੱਸ. ਐੱਫ. ਸੀ.) ਨੇ ਕੀਤਾ, ਜਦੋਂ ਕਿ ਇਸ ਦੇ ਲਈ ਸਾਜੋ ਸਾਮਾਨ ਰੱਖਿਆ ਖੋਜ ਅਤੇ ਵਿਕਾਸ ਸੰਗਠਨ (ਡੀ. ਆਰ. ਡੀ. ਓ.) ਨੇ ਮੁਹੱਈਆ ਕਰਵਾਇਆ। ਇਹ ਮਿਜ਼ਾਈਲ 20 ਮੀਟਰ ਲੰਮੀ, 17 ਟਨ ਭਾਰੀ ਅਤੇ 1000 ਕਿਲੋਗ੍ਰਾਮ ਭਾਰ 2000 ਕਿਲੋਮੀਟਰ ਦੀ ਦੂਰੀ ਤੱਕ ਲੈ ਜਾਣ ਦੇ ਸਮਰੱਥ ਹੈ। ਇਹ ਮਿਜ਼ਾਈਲ ਉੱਨਤ ਪ੍ਰਣਾਲੀ ਪ੍ਰਯੋਗਸ਼ਾਲਾ ਨੇ ਡੀ. ਆਰ. ਡੀ. ਓ. ਦੀਆਂ ਹੋਰ ਪ੍ਰਯੋਗਸ਼ਾਲਾਵਾਂ ਦੇ ਨਾਲ ਮਿਲ ਕੇ ਬਣਾਈ ਹੈ ਅਤੇ ਭਾਰਤ ਡਾਇਆਨੈਮਿਕਸ ਲਿਮਟਿਡ ਹੈਦਰਾਬਾਦ ਨੇ ਇਸ ਵਿਚ ਸਹਿਯੋਗ ਦਿੱਤਾ ਹੈ।

ਕਸ਼ਮੀਰ 'ਚ ਫ਼ੌਜ ਦੇ ਜਵਾਨ ਤੇ ਅਫਸਰ ਹੋਏ
ਆਹਮੋ ਸਾਹਮਣੇ-ਐਂਟਨੀ ਨੇ ਮੰਗੀ ਰਿਪੋਰਟ

ਨਵੀਂ ਦਿੱਲੀ, 9 ਅਗਸਤ-ਜੰਮੂ ਤੇ ਕਸ਼ਮੀਰ ਵਿਚ ਫ਼ੌਜ ਦੀ ਇਕ ਯੂਨਿਟ ਵਿਚ ਟਕਰਾਅ ਦੀ ਇਕ ਹੋਰ ਘਟਨਾ ਸਾਹਮਣੇ ਆਈ ਹੈ ਜਿਸ ਨੂੰ ਲੈ ਕੇ ਪ੍ਰੇਸ਼ਾਨ ਰੱਖਿਆ ਮੰਤਰੀ ਏ. ਕੇ. ਐਂਟਨੀ ਨੇ ਮਾਮਲੇ ਦੀ ਫ਼ੌਜ ਮੁਖੀ ਤੋਂ ਵਿਸਥਾਰ ਪੂਰਵਕ ਰਿਪੋਰਟ ਮੰਗੀ ਹੈ ਜਦਕਿ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਨੇ ਮਾਮਲੇ ਨੂੰ ਮਾਮੂਲੀ ਦੱਸਿਆ ਹੈ। ਸੂਤਰਾਂ ਨੇ ਦੱਸਿਆ ਕਿ ਕਲ੍ਹ ਜੰਮੂ ਤੇ ਕਸ਼ਮੀਰ ਦੇ ਸਾਂਬਾ ਸੈਕਟਰ ਵਿਚ ਇਕ ਸੈਨਿਕ ਵਲੋਂ ਖੁਦਕੁਸ਼ੀ ਕੀਤੇ ਜਾਣ ਪਿੱਛੋਂ ਘੋੜ ਸਵਾਰ ਫ਼ੌਜ ਦੀ 16 ਯੂਨਿਟ ਦੇ ਜਵਾਨ ਅਤੇ ਅਧਿਕਾਰੀਆਂ 'ਚ ਕਥਿਤ ਰੂਪ 'ਚ ਮੂੰਹ ਜ਼ੁਬਾਨੀ ਟਕਰਾਅ ਹੋ ਗਿਆ। ਇਹ ਟਕਰਾਅ ਇਸ ਯੂਨਿਟ ਦੇ ਤਿਰੂਵਨੰਤਪੁਰਮ ਦੇ ਇਕ ਸੈਨਿਕ ਅਰੁਨ ਵੀ ਵਲੋਂ ਖੁਦਕੁਸ਼ੀ ਕਰਨ ਪਿੱਛੋਂ ਸਾਹਮਣੇ ਆਇਆ। ਉਸ ਦੀ ਮੌਤ ਕੋਰਟ ਆਫ ਇਨਕੁਆਰੀ ਦਾ ਹੁਕਮ ਦਿੱਤਾ ਗਿਆ ਹੈ। ਸੂਤਰਾਂ ਨੇ ਦੱਸਿਆ ਕਿ ਇਸ ਜਵਾਨ ਨੇ ਘਰ ਕਿਸੇ ਕੰਮ ਲਈ ਛੁੱਟੀ ਦੀ ਮੰਗ ਕੀਤੀ ਸੀ ਪਰ ਉਸ ਨੂੰ ਛੁੱਟੀ ਨਾ ਦਿੱਤੀ ਗਈ। ਉਸ ਦੀ ਮੌਤ ਪਿੱਛੋਂ ਉਸ ਦੇ ਸਾਥੀ ਸੈਨਿਕਾਂ ਨੇ ਅਧਿਕਾਰੀਆਂ ਵਿਰੁੱਧ ਰੋਸ ਜ਼ਾਹਿਰ ਕੀਤਾ ਅਤੇ ਉਨ੍ਹਾਂ ਦੇ ਘਰਾਂ ਨੂੰ ਘੇਰਾ ਪਾ ਲਿਆ। ਘਟਨਾ ਤੋਂ ਪ੍ਰੇਸ਼ਾਨ ਰੱਖਿਆ ਮੰਤਰੀ ਏ. ਕੇ. ਐਂਟਨੀ ਨੇ ਸੈਨਾ ਮੁਖੀ ਜਨਰਲ ਬਿਕਰਮ ਸਿੰਘ ਤੋਂ ਵਿਸਥਾਰ ਪੂਰਵਕ ਰਿਪੋਰਟ ਮੰਗੀ ਹੈ। ਇਹ ਮਾਮਲਾ ਅੱਜ ਸੰਸਦ ਵਿਚ ਵੀ ਉੱਠਿਆ ਜਿਥੇ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਨੇ ਮਾਮਲੇ ਨੂੰ ਸ਼ਾਂਤ ਕਰਨ ਕਰਨ ਦਾ ਯਤਨ ਕਰਦਿਆਂ ਕਿ ਇਹ ਮਾਮੂਲੀ ਘਟਨਾ ਹੈ ਅਤੇ ਇਸ ਨੂੰ ਵਧਾ ਚੜ੍ਹਾ ਕੇ ਪੇਸ਼ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਸਦਨ ਨੂੰ ਬੇਨਤੀ ਕਰਦੇ ਹਨ ਕਿ ਇਸ ਮੁੱਦੇ 'ਤੇ ਚਰਚਾ ਨਾ ਕੀਤੀ ਜਾਵੇ, ਇਹ ਬਹੁਤ ਛੋਟੀ ਘਟਨਾ ਹੈ। ਇਹ ਸਾਡੀਆਂ ਹਥਿਆਰਬੰਦ ਸੈਨਾਵਾਂ ਦੇ ਮਨੋਬਲ ਲਈ ਠੀਕ ਨਹੀਂ। ਸੂਤਰਾਂ ਨੇ ਦੱਸਿਆ ਕਿ ਇਸ ਘਟਨਾ ਕਾਰਨ ਯੂਨਿਟ ਵਿਚ ਤਣਾਅ ਪਾਇਆ ਜਾ ਰਿਹਾ ਹੈ ਅਤੇ ਤਣਾਅ ਨੂੰ ਜ਼ਿਆਦਾ ਵਧਣ ਤੋਂ ਰੋਕਣ ਲਈ ਹੋਰ ਸੈਨਿਕਾਂ ਨੂੰ ਮੌਕੇ 'ਤੇ ਭੇਜਿਆ ਗਿਆ ਹੈ।

ਜਯਾ ਬਚਨ ਨੇ ਗ੍ਰਹਿ ਮੰਤਰੀ ਸ਼ਿੰਦੇ ਤੋਂ ਮੰਗਵਾਈ ਮੁਆਫ਼ੀ

ਨਵੀਂ ਦਿੱਲੀ, 9 ਅਗਸਤ -ਵੀਰਵਾਰ ਨੂੰ ਰਾਜ ਸਭਾ ਵਿਚ ਗ੍ਰਹਿ ਮੰਤਰੀ ਸੁਸ਼ੀਲ ਕੁਮਾਰ ਸ਼ਿੰਦੇ ਦੇ ਬਿਆਨ 'ਤੇ ਰਾਜ ਸਭਾ ਮੈਂਬਰ ਜਯਾ ਬਚਨ ਭੜਕ ਗਈ ਤੇ ਸਾਰਾ ਵਿਰੋਧੀ ਧਿਰ ਵੀ ਜਯਾ ਨਾਲ ਹੋ ਗਿਆ। ਵਿਰੋਧੀ ਧਿਰ ਦੇ ਹੰਗਾਮੇ ਦੇ ਚਲਦਿਆਂ ਸ਼ਿੰਦੇ ਨੂੰ ਮੁਆਫ਼ੀ ਮੰਗਦੇ ਹੋਏ ਸ਼ਬਦ ਵਾਪਸ ਲੈਣੇ ਪਏ। ਸ੍ਰੀ ਸ਼ਿੰਦੇ ਜਦੋਂ ਆਸਾਮ ਹਿੰਸਾ 'ਤੇ ਇਕ ਲਿਖਤੀ ਰਿਪੋਰਟ ਰਾਹੀਂ ਜਵਾਬ ਦੇ ਰਹੇ ਸਨ ਤਾਂ ਉਸੇ ਵੇਲੇ ਜਯਾ ਬਚਨ ਨੇ ਇਤਰਾਜ਼ ਜਤਾਉਂਦਿਆਂ ਕਿਹਾ ਕਿ ਸਰਕਾਰ ਦੱਸੇ ਕਿ ਹਿੰਸਾ ਰੋਕਣ ਲਈ ਹੁਣ ਤੱਕ ਕੀ ਕਦਮ ਚੁੱਕੇ ਹਨ? ਜਯਾ ਦੇ ਇਤਰਾਜ਼ 'ਤੇ ਗ੍ਰਹਿ ਮੰਤਰੀ ਸ਼ਿੰਦੇ ਨੇ ਕਿਹਾ ਕਿ ਮੇਰੀ ਭੈਣ ਇਹ ਗੰਭੀਰ ਵਿਸ਼ਾ ਹੈ। ਇਹ ਫਿਲਮ ਦਾ ਵਿਸ਼ਾ ਨਹੀਂ ਹੈ। ਸ਼ਿੰਦੇ ਦੇ ਇਹ ਕਹਿੰਦੇ ਹੀ ਵਿਰੋਧੀ ਧਿਰ ਦੇ ਮੈਂਬਰ ਭੜਕ ਉਠੇ। ਹੰਗਾਮੇ ਦੌਰਾਨ ਸ਼ਿੰਦੇ ਨੂੰ ਮੁਆਫੀ ਮੰਗਣੀ ਪਈ ਤੇ ਆਪਣੇ ਸ਼ਬਦ ਵਾਪਸ ਲੈਣੇ ਪਏ।

ਵਿਸਕਾਂਸਿਨ ਗੁਰਦੁਆਰਾ ਮੁੜ ਸੰਗਤਾਂ ਲਈ ਖੋਲ੍ਹਿਆ
ਪੁਲਿਸ ਨੇ ਪ੍ਰਬੰਧ ਮੈਨੇਜਮੈਂਟ ਨੂੰ ਸੌਂਪਿਆ

ਵਾਸ਼ਿੰਗਟਨ, 9 ਅਗਸਤ -ਪਿਛਲੇ ਦਿਨੀਂ ਵਿਸਕਾਂਸਿਨ ਦੇ ਗੁਰਦੁਆਰਾ 'ਸਿੱਖ ਟੈਂਪਲ' ਵਿਖੇ ਵਾਪਰੀ ਦਰਦਨਾਕ ਤ੍ਰਾਸਦੀ ਉਪਰੰਤ ਅੱਜ ਗੁਰਦੁਆਰਾ ਸਾਹਿਬ ਮੁੜ ਸੰਗਤਾਂ ਲਈ ਖੋਲ੍ਹ ਦਿੱਤਾ ਗਿਆ। ਸਥਾਨਕ ਪੁਲਿਸ ਨੇ ਅੱਜ ਸਵੇਰੇ ਗੁਰਦੁਆਰਾ ਸਾਹਿਬ ਦਾ ਪ੍ਰਬੰਧ ਸਥਾਨਕ ਪ੍ਰਬੰਧਕ ਕਮੇਟੀ ਦੇ ਹਵਾਲੇ ਕਰ ਦਿੱਤਾ, ਜਿਸ ਨੇ ਗੁਰਦੁਆਰਾ ਸਾਹਿਬ ਦੀ ਸਫਾਈ ਕਰਵਾਉਣੀ ਸ਼ੁਰੂ ਕਰ ਦਿੱਤੀ। ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਜਗਅਜੀਤ ਸਿੰਘ ਸੰਧੂ ਨੇ ਦੱਸਿਆ ਕਿ ਗੁਰਦੁਆਰਾ ਸਾਹਿਬ ਨੂੰ ਸੰਗਤਾਂ ਲਈ ਖੋਲ੍ਹ ਦਿੱਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ 5 ਅਗਸਤ ਨੂੰ ਇੱਕ ਹਮਲਾਵਰ ਨੇ ਗੁਰਦੁਆਰਾ ਸਾਹਿਬ ਵਿਖੇ ਇਕੱਤਰ ਹੋਈਆਂ ਸੰਗਤਾਂ 'ਤੇ ਅੰਨ੍ਹੇਵਾਹ ਗੋਲੀਬਾਰੀ ਕੀਤੀ ਸੀ ਜਿਸ ਵਿਚ ਹਮਲਾਵਰ ਸਮੇਤ ਸੱਤ ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ।

ਕਸਾਬ ਵੱਲੋਂ ਅਬੂ ਜ਼ਿੰਦਾਲ ਦੀ ਮੁੰਬਈ
ਹਮਲੇ ਦਾ ਮੁੱਖ ਸਾਜਿਸ਼ਕਰਤਾ ਵਜੋਂ ਸ਼ਨਾਖਤ
ਮੁੰਬਈ ਦੀ ਆਰਥਰ ਜੇਲ੍ਹ 'ਚ ਹੋਏ ਆਹਮੋ-ਸਾਹਮਣੇ

ਮੁੰਬਈ, 9 ਅਗਸਤ -26/11 ਮੁੰਬਈ ਹਮਲੇ ਦੇ ਦੋਸ਼ 'ਚ ਮੁੰਬਈ ਦੀ ਆਰਥਰ ਰੌਡ ਜ਼ੇਲ੍ਹ 'ਚ ਬੰਦ ਅੱਤਵਾਦੀ ਅਜ਼ਮਲ ਕਸਾਬ ਦੀ ਅੱਜ ਅਬੂ ਜ਼ਿੰਦਾਲ ਨਾਲ ਆਹਮੋ-ਸਾਹਮਣੇ ਮੁਲਾਕਾਤ ਹੋਈ। ਮਹਾਰਾਸ਼ਟਰ ਸਰਕਾਰ ਵਲੋਂ ਮਨਜ਼ੂਰੀ ਮਿਲਣ ਤੋਂ ਬਾਅਦ ਮੁੰਬਈ ਪੁਲਿਸ ਦੀ ਕ੍ਰਾਇਮ ਬਰਾਂਚ ਟੀਮ ਅਬੂ ਜ਼ਿੰਦਾਲ ਨੂੰ 2008 ਤੋਂ ਜੇਲ੍ਹ 'ਚ ਕੈਦ ਅਜਮਲ ਕਸਾਬ ਦੇ ਕੋਲ ਲੈ ਕੇ ਗਈ। ਇਹ ਮੁਲਾਕਾਤ ਕਰੀਬ ਡੇਢ ਘੰਟੇ ਤੱਕ ਚੱਲੀ। ਇਸ ਮੁਲਾਕਾਤ ਦੌਰਾਨ ਪਾਕਿਸਤਾਨੀ ਮੂਲ ਦੇ ਅੱਤਵਾਦੀ ਅਜ਼ਮਲ ਕਸਾਬ ਨੇ ਅਬੂ ਜ਼ਿੰਦਾਲ ਨੂੰ ਮੁੰਬਈ ਹਮਲੇ ਦਾ ਮੁੱਖ ਸਾਜਿਸ਼ਕਾਰ ਮੰਨਿਆ। ਜਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਵੀ ਕਸਾਬ ਪੁਲਿਸ ਨੂੰ ਦੱਸ ਚੁੱਕਿਆ ਸੀ ਕਿ ਇਸ ਹਮਲੇ 'ਚ ਸ਼ਾਮਿਲ ਅੱਤਵਾਦੀਆਂ ਨੂੰ ਜ਼ਿੰਦਾਲ ਨੇ ਹਿੰਦੀ ਭਾਸ਼ਾ ਸਿਖਾਈ ਸੀ। ਇਸ ਤੋਂ ਇਲਾਵਾ ਜ਼ਿੰਦਾਲ ਵੀ ਇਹ ਮੰਨ ਚੁੱਕਿਆ ਹੈ ਕਿ ਉਹ ਮੁੰਬਈ ਹਮਲਿਆਂ ਲਈ ਇਕ ਹੋਰ ਦੋਸ਼ੀ ਡੇਵਿਡ ਹੇਡਲੀ ਨੂੰ ਵੀ ਮਿਲ ਚੁੱਕਿਆ ਹੈ। ਕਸਾਬ ਵਲੋਂ ਜ਼ਿੰਦਾਲ ਨੂੰ ਮੁੰਬਈ ਹਮਲੇ ਦਾ ਮੁੱਖ ਸਾਜਿਸ਼ਕਰਤਾ ਮੰਨਣ ਤੋਂ ਬਾਅਦ ਹੁਣ ਭਾਰਤ ਦਾ ਉਹ ਦਾਅਵਾ ਹੋਰ ਮਜ਼ਬੂਤ ਹੋ ਗਿਆ ਹੈ ਜਿਸ 'ਚ ਉਨ੍ਹਾਂ ਇਸ ਹਮਲੇ ਦੀ ਪਾਕਿਸਤਾਨ 'ਚ ਯੋਜਨਾ ਬਣਨ ਦੀ ਗੱਲ ਆਖੀ ਸੀ।

ਫਿਜ਼ਾ ਦੇ ਘਰੋਂ 92 ਲੱਖ ਨਗਦ ਤੇ ਡੇਢ ਕਿੱਲੋ ਸੋਨੇ ਦੇ ਗਹਿਣੇ ਬਰਾਮਦ ਨੇੜਲੇ ਲੋਕਾਂ ਤੋਂ ਪੁਛਗਿੱਛ ਜਾਰੀ *ਮੌਤ ਤੋਂ ਪਹਿਲਾਂ ਦਾ ਆਖਰੀ ਵੀਡੀਓ ਜਾਰੀ ਅਜੀਤਗੜ੍ਹ, 9 ਅਗਸਤ -ਹਰਿਆਣਾ ਦੇ ਸਾਬਕਾ ਉਪ ਮੁੱਖ ਮੰਤਰੀ ਚੰਦਰ ਮੋਹਨ ਦੀ ਸਾਬਕਾ ਪਤਨੀ ਅਨੁਰਾਧਾ ਬਾਲੀ ਉਰਫ ਫਿਜ਼ਾ ਦੀ ਮੌਤ ਸਬੰਧੀ ਪੁਲਿਸ ਵੱਲੋਂ ਕੀਤੀ ਜਾ ਰਹੀ ਜਾਂਚ ਦੌਰਾਨ ਅਜੇ ਤੱਕ ਉਸਦੀ ਹੱਤਿਆ ਜਾਂ ਆਤਮ ਹੱਤਿਆ ਸਬੰਧੀ ਕੋਈ ਤੱਥ ਸਾਹਮਣੇ ਨਹੀਂ ਆਇਆ, ਪਰ ਫਿਜ਼ਾ ਦੇ ਘਰ ਦੀ ਲਈ ਤਲਾਸ਼ੀ ਦੌਰਾਨ 92 ਲੱਖ 86 ਹਜ਼ਾਰ 160 ਰੁਪਏ ਨਗਦ ਅਤੇ ਇਕ ਕਿੱਲੋ 429 ਗ੍ਰਾਮ ਸੋਨਾ ਬਰਾਮਦ ਕੀਤਾ ਗਿਆ ਹੈ। ਬੇਸ਼ੱਕ ਫਿਜ਼ਾ ਦੀ ਮੌਤ ਸਬੰਧੀ ਲੋਕਾਂ ਵਿਚ ਕਈ ਤਰ੍ਹਾਂ ਦੀਆਂ ਅਟਕਲਾਂ ਲਗਾਈਆਂ ਜਾ ਰਹੀਆਂ ਹਨ, ਪਰ ਉਸਦੇ ਪਰਿਵਾਰ ਦੇ ਮੈਂਬਰਾਂ ਨੇ ਅਜੇ ਤੱਕ ਉਸਦੇ ਕਤਲ ਹੋਣ ਦੀ ਸ਼ੰਕਾ ਸਬੰਧੀ ਕੋਈ ਲਿਖਤੀ ਸ਼ਿਕਾਇਤ ਨਹੀਂ ਕੀਤੀ। ਇਸ ਸਬੰਧ ਵਿਚ ਜ਼ਿਲ੍ਹਾ ਪੁਲਿਸ ਮੁਖੀ ਸ: ਗੁਰਪ੍ਰੀਤ ਸਿੰਘ ਭੁੱਲਰ ਨੇ ਕਿਹਾ ਕਿ ਫਿਜ਼ਾ ਦੇ ਨਾਲ ਰਾਬਤਾ ਰੱਖਣ ਵਾਲੇ ਲੋਕਾਂ ਤੋਂ ਪੁਛਗਿੱਛ ਕੀਤੀ ਜਾ ਰਹੀ ਹੈ। ਐਸ. ਐਸ. ਪੀ. ਭੁੱਲਰ ਨੇ ਦੱਸਿਆ ਕਿ ਡੇਰਾ ਬੱਸੀ ਵਿਖੇ ਫਾਈਵ ਸਟਾਰ ਨਾਂਅ ਦੀ ਸਕਿਊਰਟੀ ਏਜੰਸੀ ਚਲਾ ਰਹੇ ਬਲਵਿੰਦਰ ਸਿੰਘ ਤੋਂ ਵੀ ਪੁੱਛ-ਗਿੱਛ ਕੀਤੀ ਗਈ ਹੈ ਕਿਉਂਕਿ ਉਸ ਨੇ ਅਖ਼ਬਾਰਾਂ ਵਿਚ ਫਿਜ਼ਾ ਸੰਬੰਧੀ ਬਿਆਨ ਦਿੱਤਾ ਸੀ। ਉਧਰ ਇਹ ਚਰਚਾ ਜ਼ੋਰਾਂ 'ਤੇ ਹੈ ਕਿ ਇਸ ਮਾਮਲੇ ਵਿਚ ਕੁਝ ਪੱਤਰਕਾਰਾਂ ਅਤੇ ਹਰਿਆਣਾ ਦੇ ਕੁਝ ਪੁਲਿਸ ਅਧਿਕਾਰੀਆਂ ਅਤੇ ਨੇਤਾਵਾਂ ਦੇ ਨਾਂਅ ਵੀ ਸਾਹਮਣੇ ਆ ਰਹੇ ਹਨ, ਪਰ ਅਜਿਹੇ ਲੋਕਾਂ ਨੂੰ ਕਿਸੇ ਤਰ੍ਹਾਂ ਦੀ ਜਾਂਚ ਵਿਚ ਅਜੇ ਤੱਕ ਸ਼ਾਮਿਲ ਨਹੀਂ ਕੀਤਾ ਗਿਆ। ਅੱਜ ਡਿਊਟੀ ਮੈਜਿਸਟ੍ਰੇਟ ਦੀ ਹਾਜ਼ਰੀ ਵਿਚ ਫਿਜ਼ਾ ਦੀ ਭੈਣ ਨੂੰ ਮੌਕੇ 'ਤੇ ਬੁਲਾਕੇ ਉਸ ਦੇ ਘਰ ਦੀ ਤਲਾਸ਼ੀ ਦੌਰਾਨ ਅਲਮਾਰੀਆਂ ਤੋੜੀਆਂ ਗਈਆਂ ਜਿਨ੍ਹਾਂ ਵਿਚੋਂ ਇਹ ਰਾਸ਼ੀ ਅਤੇ ਸੋਨੇ ਦੇ ਗਹਿਣੇ ਬਰਾਮਦ ਹੋਏ ਹਨ। ਪੁਲਿਸ ਵੱਲੋਂ ਨਗਦੀ ਗਿਣਨ ਲਈ ਇਕ ਬੈਂਕ ਤੋਂ ਮਸ਼ੀਨ ਵੀ ਮੰਗਵਾਈ ਗਈ। ਸੂਤਰਾਂ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਫਿਜ਼ਾ ਦੀ ਆਖਰੀ ਵੀਡੀਓ ਵਿਚ ਬੀਤੀ 1 ਅਗਸਤ ਦੀ ਸ਼ਾਮ 5.46 ਮਿੰਟ 'ਤੇ ਉਹ ਅਜੀਤ ਹੁੱਡਾ ਨਾਂਅ ਦੇ ਵਕੀਲ ਨਾਲ ਚੰਡੀਗੜ੍ਹ ਦੇ ਰਾਜਸ਼੍ਰੀ ਹੋਟਲ ਵਿਚ ਜਾਂਦੀ ਹੋਈ ਦਿਖਾਈ ਦੇ ਰਹੀ ਹੈ ਅਤੇ ਫਿਜ਼ਾ ਦੇ ਉਹੀ ਕੱਪੜੇ ਪਹਿਨੇ ਹੋਏ ਹਨ ਜਿਨ੍ਹਾਂ ਵਿਚ ਉਸਦੀ ਲਾਸ਼ ਬਰਾਮਦ ਹੋਈ ਸੀ। ਵੀਡੀਓ ਵਿਚ ਫਿਜ਼ਾ ਸ਼ਾਮ 6.43 'ਤੇ ਵਾਪਸ ਆਉਂਦੀ ਹੈ। ਜਦਕਿ 6.47 ਮਿੰਟ 'ਤੇ ਵਕੀਲ ਬਾਹਰ ਆਉਂਦਾ ਹੈ। ਉਸਦੇ ਹੱਥ ਵਿਚ ਪੋਲੀਥੀਨ ਦਾ ਲਿਫਾਫਾ ਜਿਸ ਵਿਚ ਖਾਣੇ ਦਾ ਸਮਾਨ ਸੀ ਜੋ ਕਿ ਪੁਲਿਸ ਨੇ ਜਾਂਚ ਲਈ ਲੈਬ ਵਿਚ ਭੇਜਿਆ ਹੋਇਆ ਹੈ।

ਮੁੱਖ ਮੰਤਰੀ ਵੱਲੋਂ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਪੰਜ-ਪੰਜ ਲੱਖ ਰੁਪਏ ਦੇਣ ਦਾ ਐਲਾਨ ਵਿਸਕਾਸਨ ਗੁਰਦੁਆਰਾ ਵਿਖੇ ਸ਼ੋਕ ਸਭਾ 'ਚ ਕੀਤੀ ਸ਼ਮੂਲੀਅਤ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ, ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਸ: ਚਰਨਜੀਤ ਸਿੰਘ ਅਟਵਾਲ, ਕੈਬਨਿਟ ਮੰਤਰੀ ਸ: ਸੁਰਜੀਤ ਸਿੰਘ ਰੱਖੜਾ, ਸ਼੍ਰੋਮਣੀ ਕਮੇਟੀ ਮੈਂਬਰ ਭਾਈ ਅਮਰਜੀਤ ਸਿੰਘ ਚਾਵਲਾ ਤੇ ਹੋਰ ਅਮਰੀਕਾ ਦੇ ਸ਼ਹਿਰ ਵਿਸਕਾਸਨ ਵਿਖੇ ਓਕ ਕਰਿਕ ਗੁਰਦੁਆਰਾ ਦੇ ਗੋਲੀ ਕਾਂਡ ਵਿਚ ਮਾਰੇ ਗਏ ਸਿੱ ਸ਼ਿਕਾਗੋ/ ਚੰਡੀਗੜ੍ਹ, 9 ਅਗਸਤ -ਮੁੱਖ ਮੰਤਰੀ ਪੰਜਾਬ ਸ. ਪ੍ਰਕਾਸ਼ ਸਿੰਘ ਬਾਦਲ ਜੋ ਇਨ੍ਹਾਂ ਦਿਨਾਂ ਵਿਚ ਅਮਰੀਕਾ ਦੇ ਦੌਰੇ 'ਤੇ ਹਨ ਵੱਲੋਂ ਅੱਜ ਅਮਰੀਕਾ ਸਥਿਤ ਭਾਰਤ ਦੀ ਰਾਜਦੂਤ ਸ੍ਰੀਮਤੀ ਨਿਰੂਪਮਾ ਰਾਓ ਨੂੰ ਲੈ ਕੇ ਓਕ ਕਰਿਕ ਗੁਰਦੁਆਰਾ ਵਿਖੇ ਗੋਲੀ ਕਾਂਡ ਵਿਚ ਮਾਰੇ ਗਏ ਗੁਰਦੁਆਰੇ ਦੇ ਪ੍ਰਧਾਨ ਸਤਵੰਤ ਸਿੰਘ ਕਾਲੇਕੇ ਅਤੇ ਦੋ ਹੋਰ ਸ਼ਰਧਾਲੂਆਂ ਸੁਬੇਗ ਸਿੰਘ ਖੱਟੜਾ ਅਤੇ ਬੀਬੀ ਪਰਮਜੀਤ ਕੌਰ ਦੇ ਪਰਿਵਾਰਾਂ ਨਾਲ ਦੁੱਖ ਸਾਂਝਾ ਕੀਤਾ। ਉਨ੍ਹਾਂ ਐਲਾਨ ਕੀਤਾ ਕਿ ਰਾਜ ਸਰਕਾਰ ਮਰਨ ਵਾਲੇ ਸ਼ਰਧਾਲੂਆਂ ਦੇ ਪਰਿਵਾਰਾਂ ਨੂੰ 5-5 ਲੱਖ ਰੁਪਏ ਦੀ ਐਕਸਗ੍ਰੇਸ਼ੀਆ ਗਰਾਂਟ ਦੇਣ ਤੋਂ ਇਲਾਵਾ ਅਗਰ ਉਨ੍ਹਾਂ ਦਾ ਕੋਈ ਬੱਚਾ ਪੰਜਾਬ ਦੇ ਸਕੂਲ, ਕਾਲਜਾਂ ਤੇ ਯੂਨੀਵਰਸਿਟੀਆਂ ਵਿਚ ਪੜ੍ਹਨਾ ਚਾਹਵੇਗਾ, ਉਸ ਦਾ ਵੀ ਸਾਰਾ ਖਰਚਾ ਦੇਵੇਗੀ। ਮੁੱਖ ਮੰਤਰੀ ਨੇ ਫਰਾਈਡਾਟ ਜਨਰਲ ਹਸਪਤਾਲ ਮਿਲਵਾਕੀ ਵਿਖੇ ਜ਼ਖ਼ਮੀ ਪੁਲਿਸ ਅਧਿਕਾਰੀ ਲੈਫ. ਮਰਸੀ ਨਾਲ ਵੀ ਮੁਲਾਕਾਤ ਕੀਤੀ । ਉਹ ਹਸਪਤਾਲ ਵਿਚ ਜ਼ਖਮੀ ਦੂਸਰੇ ਦੋ ਹੋਰ ਸਿੱਖ ਸ਼ਰਧਾਲੂਆਂ ਨੂੰ ਵੀ ਮਿਲੇ। ਮੁੱਖ ਮੰਤਰੀ ਨੇ ਵਿਸਕਾਸਨ ਬਰੁਕਫੀਲਡ ਗੁਰਦੁਆਰਾ ਸਾਹਿਬ ਵਿਖੇ ਮਾਰੇ ਗਏ ਸਿੱਖ ਸ਼ਰਧਾਲੂਆਂ ਦੀ ਯਾਦ ਵਿਚ ਰੱਖੀ ਗਈ ਅੰਤਿਮ ਅਰਦਾਸ ਵਿਚ ਵੀ ਸ਼ਮੂਲੀਅਤ ਕੀਤੀ। ਅਮਰੀਕਾ ਆਪਣੇ ਮਾਰੇ ਗਏ ਰਿਸ਼ਤੇਦਾਰਾਂ ਦੀਆਂ ਅੰਤਿਮ ਰਸਮਾਂ ਵਿਚ ਸ਼ਾਮਲ ਹੋਣ ਲਈ ਜਾਣ ਵਾਲੇ ਕੁਝ ਰਿਸ਼ਤੇਦਾਰਾਂ ਲਈ ਵੀ ਰਾਜ ਸਰਕਾਰ ਵੱਲੋਂ ਭਾਰਤ ਸਥਿਤ ਸਫਾਰਤਖਾਨੇ ਨਾਲ ਉਨ੍ਹਾਂ ਨੂੰ ਵੀਜ਼ੇ ਦਿਵਾਉਣ ਦਾ ਮਾਮਲਾ ਉਠਾਇਆ ਹੈ।

1

ਪੰਜਾਬ ਦੀ 62.51 ਫੀਸਦੀ ਵਸੋਂ ਪਿੰਡਾਂ ਤੇ 37.49 ਫੀਸਦੀ ਸ਼ਹਿਰੀ ਖੇਤਰਾਂ 'ਚ * ਲੁਧਿਆਣਾ, ਅਜੀਤਗੜ੍ਹ, ਅੰਮ੍ਰਿਤਸਰ ਤੇ ਜਲੰਧਰ 'ਚ ਪੰਜਾਬ ਦੀ ਅੱਧੀ ਤੋਂ ਵੱਧ ਸ਼ਹਿਰੀ ਵਸੋਂ  * ਤਰਨ ਤਾਰਨ ਜ਼ਿਲ੍ਹੇ 'ਚ ਕੇਵਲ 12.63 ਫੀਸਦੀ ਸ਼ਹਿਰੀ ਵਸੋਂ ਚੰਡੀਗੜ੍ਹ, 9 ਅਗਸਤ -ਪੰਜਾਬ ਦੇ ਜਨਗਣਨਾ ਵਿਭਾਗ ਵੱਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਅਨੁਸਾਰ ਪੰਜਾਬ ਦੇ 4 ਜ਼ਿਲ੍ਹਿਆਂ ਲੁਧਿਆਣਾ, ਅਜੀਤਗੜ੍ਹ, ਅੰਮ੍ਰਿਤਸਰ ਅਤੇ ਜਲੰਧਰ ਵਿਚ ਪੰਜਾਬ ਦੀ ਅੱਧੇ ਤੋਂ ਵੱਧ ਸ਼ਹਿਰੀ ਵਸੋਂ ਹੈ। ਲੁਧਿਆਣਾ ਵਿਚ ਸਭ ਤੋਂ ਵੱਧ ਸ਼ਹਿਰੀ ਵਸੋਂ ਹੈ ਅਤੇ ਪੰਜਾਬ ਦੀ ਕੋਈ 19.86 ਫੀਸਦੀ ਸ਼ਹਿਰੀ ਵਸੋਂ ਕੇਵਲ ਲੁਧਿਆਣਾ ਵਿਚ ਹੈ, ਜਦੋਂਕਿ ਅਜੀਤਗੜ੍ਹ ਦੂਜੇ ਅਤੇ ਅੰਮ੍ਰਿਤਸਰ ਤੀਸਰੇ ਸਥਾਨ 'ਤੇ ਆਉਂਦਾ ਹੈ। ਤਰਨਤਾਰਨ ਜ਼ਿਲ੍ਹਾ ਜਿੱਥੇ ਕਰੀਬ 12.63 ਫੀਸਦੀ ਸ਼ਹਿਰੀ ਵਸੋਂ ਹੈ ਰਾਜ ਵਿਚੋਂ ਸਭ ਤੋਂ ਘੱਟ ਸ਼ਹਿਰੀ ਵਸੋਂ ਵਾਲਾ ਜ਼ਿਲ੍ਹਾ ਹੈ, ਪ੍ਰੰਤੂ ਇਹ ਜ਼ਿਲ੍ਹਾ ਵੀ ਬਿਹਾਰ ਦੀ ਕੁੱਲ ਸ਼ਹਿਰੀ ਵਸੋਂ ਜੋ ਕਿ 11.30 ਫੀਸਦੀ ਹੈ ਨਾਲੋਂ ਵੱਧ ਸ਼ਹਿਰੀਕਰਨ ਵਾਲਾ ਜ਼ਿਲ੍ਹਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਅੱਜ ਇਥੇ ਸ੍ਰੀਮਤੀ ਸੀਮਾ ਜੈਨ ਆਈ.ਏ.ਐਸ., ਡਾਇਰੈਕਟਰ ਸੈਂਸਰ ਪੰਜਾਬ ਨੇ ਦੱਸਿਆ ਕਿ ਸਾਲ 2001 ਤੋਂ ਸਾਲ 2011 ਦੌਰਾਨ ਪੰਜਾਬ ਵਿਚ ਸ਼ਹਿਰੀ ਵਸੋਂ ਦੀ ਵਾਧਾ ਦਰ 25.72 ਫੀਸਦੀ ਸੀ, ਜੋ ਕਿ ਰਾਜ ਦੀ ਵਾਧਾ ਦਰ ਨਾਲੋਂ 2 ਗੁਣਾ ਹੈ। ਦਿਹਾਤੀ ਖੇਤਰਾਂ ਵਿਚ ਵਸੋਂ ਦੀ ਦਰ 7.58 ਫੀਸਦੀ ਸੀ। ਬਠਿੰਡਾ ਜ਼ਿਲ੍ਹੇ ਵਿਚ ਸ਼ਹਿਰੀ ਵਸੋਂ 35.99 ਫੀਸਦੀ ਅਤੇ ਗੁਰਦਾਸਪੁਰ ਜ਼ਿਲ੍ਹੇ ਵਿਚ 28.50 ਫੀਸਦੀ ਸੀ। ਮਗਰਲੇ 10 ਸਾਲਾਂ ਦੌਰਾਨ ਪੰਜਾਬ ਵਿਚ ਸ਼ਹਿਰਾਂ ਦੀ ਗਿਣਤੀ ਵੀ 157 ਤੋਂ ਵੱਧ ਕੇ 217 ਹੋ ਗਈ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਦੀ ਕੋਈ 74.24 ਫੀਸਦੀ ਸ਼ਹਿਰੀ ਵਸੋਂ ਕਲਾਸ-1 ਅਤੇ ਕਲਾਸ-2 ਦੇ ਸ਼ਹਿਰਾਂ ਵਿਚ ਰਹਿ ਰਹੀ ਹੈ।

 ਮੰਢਾਲੀ ਮੇਲੇ ਦੇ ਤੀਜੇ ਦਿਨ ਮਿਸ ਪੂਜਾ ਨੇ ਕਰਾਈ ਧੰਨ ਧੰਨ
       ਖੜ੍ਹ ਕੇ ਦੇਖ ਸ਼ੋਕੀਨਾ ਮੜ੍ਹਕ ਪੰਜਾਬਣ ਦੀ ਸਮੇਤ ਹਿੱਟ ਗੀਤ ਗਾ ਕੇ ਮੇਲਾ ਲੁੱਟਿਆ
ਬੰਗਾ, ੩੦ ਜੂਨ (ਹਰਨੇਕ ਸਿੰਘ ਵਿਰਦੀ, ਲੇਖਰਾਜ)-ਦਰਬਾਰ ਰੋਜ਼ਾ ਸ਼ਰੀਫ ਮੰਢਾਲੀ ਦੇ ਗੱਦੀ ਨਸ਼ੀਨ ਸਾਂਈ ਉਮਰੇ ਸ਼ਾਹ ਕਾਦਰੀ ਜੀ ਦੀ ਸਰਪ੍ਰਸਤੀ ਹੇਠ ਵਿਸ਼ਵ ਪ੍ਰਸਿਧ ਦਰਬਾਰ ਰੋਜ਼ਾ ਸ਼ਰੀਫ ਮੰਢਾਲੀ ਜਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਵਿਖੇ  ਚੱਲ ਰਹੇ ਸੱਯਦ ਉਲ ਸ਼ੇਖ ਬਾਬਾ ਅਬਦੁੱਲਾ ਸ਼ਾਹ ਕਾਦਰੀ ਜੀ ਦੇ ਸਲਾਨਾ ਜੋੜ ਮੇਲੇ ਦੇ ਤੀਸਰੇ ਦਿਨ ਵਿਸ਼ਵ ਪ੍ਰਸਿਧ ਗਾਇਕਾ ਮਿਸ ਪੂਜਾ, ਫਿਰੌਜ ਖਾਨ, ਸਰਦੂਲ ਸਿਕੰਦਰ, ਰਣਜੀਤ ਰਾਣਾ, ਬੂਟਾ ਮੁਹੰਮਦ, ਚਮਕ ਚਮਕੀਲਾ, ਗੁਲਜਾਰ ਲਹੌਰੀਆ ਆਦਿ ਨੇ ਗੀਤਾਂ ਰਾਹੀ ਹਾਜ਼ਰੀ ਲਗਾਈ। ਗਾਇਕਾ ਮਿਸ ਪੂਜਾ ਨੇ ਆਪਣੇ ਹਿੱਟ ਗੀਤ 'ਹਰ ਕੋਈ ਆਸ਼ਕ ਹੋਇਆ ਫਿਰਦਾ, ਸੀਟੀ ਮਾਰ ਕੇ ਬੁਲੋਣੋ ਹਟ ਜਾ, ਮਿਰਜਾ, ਦਮਾਦਮ ਮਸਤ ਕਲੰਧਰ, ਬਹਿ ਜਾ ਬਹਿ ਜਾ ਹੋ ਗਈ, ਮੁੰਡਾ ਤਾਜ ਮਹਿਲ ਮੇਰੇ ਲਈ ਬਣਾਉਣ ਨੂੰ ਫਿਰੇ, ਖੜ੍ਹ ਕੇ ਦੇਖ ਸ਼ੋਕੀਨਾ ਮੜ੍ਹਕ ਪੰਜਾਬਣ ਦੀ ਸਮੇਤ ਹਿੱਟ ਗੀਤ ਗਾ ਕੇ ਮੇਲਾ ਲੁੱਟਿਆ। ਮੇਲੇ 'ਚ ਤੂੰਬੇ, ਅਲਗੋਜੇ, ਕਵਾਲ, ਨਕਾਲ ਅਤੇ ਢੋਲਾਂ ਵਾਲੇ ਆਪੋ-ਆਪਣੇ ਰੰਗ 'ਚ ਦੇਸ਼ਾ-ਵਿਦੇਸ਼ਾ ਤੋ ਆਈਆਂ ਸੰਗਤਾਂ ਦੇ ਰੁ-ਬ-ਰੁ ਹੋ ਰਿਹੇ ਹਨ ਅਤੇ ਵੱਡੀ ਗਿਣਤੀ 'ਚ ਦਾਤਾ ਜੀ ਦੇ ਸ਼ਰਧਾਲੂਆਂ ਨੇ ਦਰਬਾਰ ਤੇ ਸਿਜਦਾ ਕੀਤਾ। ਮੇਲੇ 'ਚ ਹੋਰਨਾਂ ਤੋਂ ਇਲਾਵਾ ਸਾਂਈ ਫੱਕਰ ਸ਼ਾਹ ਜੀ ਦਾਦੂਵਾਲ, ਬੀਬੀ ਤੇਜਿੰਦਰ ਕੌਰ ਡੇਰਾ ਰਾਜਾ ਸਾਹਿਬ ਨੰਦਨਪੁਰ, ਬਾਬਾ ਬਿੱਟੂ ਜੀ ਰਾੜਾ ਸਾਹਿਬ, ਬਾਬਾ ਜੀਤ ਜੀ ਰੁੜਕਾ ਕਲਾਂ, ਬਾਬਾ ਸੋਮੇ ਸ਼ਾਹ ਜੀ ਝੰਡੀ ਪੀਰ, ਬਾਬਾ ਬੱਬੀ ਸ਼ਾਹ ਡੇਰਾ ਨੰਨਦਨਪੁਰ ਜਲੰਧਰ, ਕਾਲੀ ਨਾਥ ਜੀ ਐਮਾਂ ਜੱਟਾ, ਕੁੱਲੇ ਵਾਲੀ ਸਰਕਾਰ ਦਰਵੇਸ਼ ਪਿੰਡ, ਸੁਰਿੰਦਰ ਸਿੰਘ ਸੋਢੀ ਡੀ.ਆਈ.ਜੀ, ਰਵਨੀਤ ਸਿੰਘ ਬਿੱਟੂ ਅੈਮ.ਪੀ, ਜੁਗਿੰਦਰ ਸਿੰਘ ਮਾਨ ਸਾਬਕਾ ਮੰਤਰੀ ਪੰਜਾਬ, ਤਰਲੋਚਨ ਸਿੰਘ ਸੂੰਢ ਵਿਧਾਇਕ ਬੰਗਾ,  ਰਜਿੰਦਰ ਸ਼ਰਮਾ ਕੁਲਥਮ, ਮਹੁੰਮਦ ਆਸ਼ਿਕ ਨੀਲਾ, ਸਰਵਨ ਸਿੰਘ, ਸ੍ਰੀਮਤੀ ਕਮਲਜੀਤ ਕੌਰ ਸਰਪੰਚ ਮੰਢਾਲੀ, ਕਾਮਰੇਡ ਗੁਰਮੇਜ ਸਿੰਘ ਮੰਢਾਲੀ, ਮਹਿੰਦਰਪਾਲ ਸਾਬਕਾ ਸਰਪੰਚ, ਕਾਜਲ ਮਹੰਤ ਫਗਵਾੜਾ, ਹਰਬੰਸ ਕੌਰ ਸਰਪੰਚ ਜੰਡਿਆਲੀ, ਰਘਵੀਰ ਸਿੰਘ ਫੀਜੀ ਵਾਲੇ, ਨੀਲਮ ਸ਼ਰਮਾ, ਬਲਜੀਤ ਸਿੰਘ ਜੀਤਾ ਕੁਲਥਮ, ਲਾਲ•ਾਂ ਮਲੇਰਕੋਟਲਾ, ਸ਼ਫੀ ਮਹੁੰਮਦ, ਡਾ.ਸਤਨਾਮ ਪਰਸੋਵਾਲ, ਜਸਵੀਰ ਸਿੰਘ ਪੰਚ, ਕਰਨ ਬੰਗਾ, ਸੋਨੀ ਮੰਢਾਲੀ, ਜੱਸਾ ਮੰਢਾਲੀ, ਹਰਨੇਕ ਸਿੰਘ ਨੇਕਾ, ਬਲਵਿੰਦਰ ਸਿੰਘ, ਜਗਜੀਤ ਸਿੰਘ ਪੀਟਾ, ਗੁਰਮੇਲ ਸਿੰਘ ਗੇਲੀ ਪੰਚ, ਚਰਨਜੀਤ ਸੇਵਾਦਾਰ, ਬੱਬੀ ਦੁਸਾਂਝ, ਰਾਣਾ ਪ੍ਰਧਾਨ, ਜਿੰਦਰ ਦਕੋਹਾ, ਸੋਨੂੰ ਪਟਿਆਲਾ, ਰਜਿੰਦਰ ਥਾਪਰ ਲੁਧਿਆਣਾ, ਅਮਰਦੀਪ, ਗਗਨਦੀਪ, ਨਵਦੀਪ, ਸੀਤਾ ਰਾਣੀ, ਮਨਜੀਤ ਕੌਰ, ਬਬਲੀ, ਸੋਨੂੰ ਜੱਸੋਮਜਾਰਾ, ਕਾਲਾ ਚੰਡੀਗੜ, ਆਦਿ ਵੱਖ-ਵੱਖ ਡੇਰਿਆਂ ਦੇ ਸਾਧੂ-ਸੰਤ ਅਤੇ ਸੰਗਤਾਂ ਵੱਡੀ ਗਿਣਤੀ 'ਚ ਹਾਜ਼ਰ ਸਨ।