ਖਾਲਸਾਈ ਜਾਹੋ ਜਲਾਲ ਨਾਲ ਅਨੰਦਪੁਰ ਸਾਹਿਬ ਹੋਲਾ ਮਹੱਲਾ ਆਰੰਭ

ਗੁ: ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ 'ਤੇ ਕੀਤੀ ਗਈ ਦੀਪਮਾਲਾ
 ਦਾ ਮਨਮੋਹਕ ਦ੍ਰਿਸ਼।

ਅਨੰਦਪੁਰ ਸਾਹਿਬ, 6 ਮਾਰਚ -ਖਾਲਸੇ ਦੇ ਬੋਲਬਾਲੇ ਬਹਾਦਰੀ, ਬੁਲੰਦੀਆਂ ਆਦਿ ਦਾ ਤਿਉਹਾਰ ਹੋਲਾ ਮਹੱਲਾ ਜੋ ਅਨੰਦਪੁਰ ਸਾਹਿਬ ਵਿਖੇ 7, 8, 9 ਮਾਰਚ ਨੂੰ ਪੂਰਨ ਖਾਲਸਾਈ ਸ਼ਾਨੋ ਸ਼ੌਕਤ ਨਾਲ ਮਨਾਇਆ ਜਾ ਰਿਹਾ ਹੈ। ਕੱਲ੍ਹ ਅਨੰਦਪੁਰ ਸਾਹਿਬ ਵਿਖੇ ਆਰੰਭ ਹੋਵੇਗਾ। ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਵਿਖੇ 7 ਮਾਰਚ ਨੂੰ ਸਵੇਰੇ 9 ਵਜੇ ਪੂਰਨ ਗੁਰਸਿੱਖ ਮਰਿਆਦਾ ਨਾਲ ਅਖੰਡ ਪਾਠ ਅਰੰਭ ਹੋਵੇਗਾ। ਇਹ ਜਾਣਕਾਰੀ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਜਥੇ: ਗਿਆਨੀ ਤਰਲੋਚਨ ਸਿੰਘ, ਮੈਨੇਜਰ ਜਵਾਹਰ ਸਿਘ, ਵਧੀਕ ਮੈਨੇਜਰ ਰਣਬੀਰ ਸਿੰਘ ਨੇ ਦਿੰਦਿਆਂ ਦੱਸਿਆ ਕਿ ਅਖੰਡ ਪਾਠ ਦੇ ਆਰੰਭ ਹੋਣ ਉਪਰੰਤ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਦੀਵਾਨ ਹਾਲ ਦੇ ਪਿਛਲੇ ਪਾਸੇ ਗਰਾਊਂਡ ਵਿਚ ਪਿਛਲੇ ਸਾਲ ਦੀ ਤਰ੍ਹਾਂ ਗਤਕੇ ਮੁਕਾਬਲੇ ਸਵੇਰੇ 10 ਵਜੇ ਕਰਾਏ ਜਾਣਗੇ। ਗਤਕੇ ਦੀਆਂ ਦੋਵੇਂ ਫੈਡਰੇਸ਼ਨਾਂ ਦੇ ਜਥੇ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਵਿਖੇ ਪੁੱਜ ਚੁੱਕੇ ਹਨ। ਇਸ ਮੌਕੇ ਸਿੰਘ ਸਾਹਿਬਾਨ ਤੋਂ ਇਲਾਵਾ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਜਥੇ: ਅਵਤਾਰ ਸਿੰਘ, ਪ੍ਰਿੰ: ਸੁਰਿੰਦਰ ਸਿੰਘ, ਭਾਈ ਅਮਰਜੀਤ ਸਿੰਘ ਚਾਵਲਾ, ਸ: ਦਿਲਜੀਤ ਸਿੰਘ ਭਿੰਡਰ ਆਦਿ ਕਈ ਸ਼੍ਰੋਮਣੀ ਕਮੇਟੀ ਮੈਂਬਰ, ਸ਼੍ਰੋਮਣੀ ਅਕਾਲੀ ਦਲ ਦੇ ਆਗੂ ਉਚੇਚੇ ਤੌਰ 'ਤੇ ਪੁੱਜ ਰਹੇ ਹਨ। ਇਹ ਵੀ ਪਤਾ ਲੱਗਾ ਹੈ ਕਿ ਸ: ਪ੍ਰਕਾਸ਼ ਸਿੰਘ ਬਾਦਲ, ਡਾ: ਦਲਜੀਤ ਸਿੰਘ ਚੀਮਾ ਮੁੱਖ ਸਲਾਹਕਾਰ, ਸ੍ਰੀ ਮਦਨ ਮੋਹਨ ਮਿੱਤਲ ਆਦਿ ਕਈ ਅਕਾਲੀ-ਭਾਜਪਾ ਦੇ ਜਿੱਤੇ ਉਮੀਦਵਾਰ ਵੀ ਪੁੱਜ ਰਹੇ ਹਨ। ਇਸ ਤੋਂ ਇਲਾਵਾ ਖਾਲਸਾ ਸਕੂਲ ਵਿਖੇ ਹੋਲਾ ਮਹੱਲਾ ਸਰਕਲ ਕਬੱਡੀ ਮੁਕਾਬਲੇ ਹੋਣਗੇ, ਜਿਸ ਵਿਚ ਵੱਖ-ਵੱਖ ਜ਼ਿਲ੍ਹਿਆਂ ਦੀਆਂ ਟੀਮਾਂ ਭਾਗ ਲੈ ਰਹੀਆਂ ਹਨ। ਇਹ ਕਬੱਡੀ ਮੁਕਾਬਲੇ ਸ਼੍ਰੋਮਣੀ ਕਮੇਟੀ ਦੇ ਸਹਿਯੋਗ ਨਾਲ ਕੀਤੇ ਜਾ ਰਹੇ ਹਨ। ਇਸ ਤੋਂ ਇਲਾਵਾ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਜਥੇ: ਅਵਤਾਰ ਸਿੰਘ ਦੁਪਹਿਰ ਇਕ ਵਜੇ ਮਾਤਾ ਨਾਨਕੀ ਨਿਵਾਸ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਵਿਖੇ ਸ਼੍ਰੋਮਣੀ ਕਮੇਟੀ ਦੇ ਸਕੱਤਰ ਦੀ ਪੁਸਤਕ ਅਤੇ ਉਸ ਦਾ ਅੰਗਰੇਜ਼ੀ ਵਿਚ ਕੀਤਾ ਤਰਜਮਾ ਵਾਲੀ ਪੁਸਤਕ ਵੀ ਰਿਲੀਜ਼ ਕਰਨਗੇ। ਸ਼੍ਰੋਮਣੀ ਕਮੇਟੀ ਦੇ ਮੈਂਬਰ ਪ੍ਰਿੰ: ਸੁਰਿੰਦਰ ਸਿੰਘ ਨੇ ਦੱਸਿਆ ਕਿ ਸਿੱਖ ਮਿਸ਼ਨਰੀ ਕਾਲਜ ਵੱਲੋਂ ਵੱਖ-ਵੱਖ ਥਾਵਾਂ 'ਤੇ ਸਿੱਖ ਲਿਟਰੇਚਰ ਦੇ ਸਟਾਲ ਲਗਾਏ ਜਾ ਰਹੇ ਹਨ। ਇਸ ਤੋਂ ਬਿਨਾਂ ਇਕ ਪ੍ਰਦਰਸ਼ਨੀ ਵੀ ਲਗਾਈ ਗਈ ਹੈ, ਜਿਸ ਵਿਚ ਲੋਕਾਂ ਨੂੰ ਵਹਿਮਾਂ-ਭਰਮਾਂ ਤੋਂ ਮੁਕਤ ਹੋ ਕੇ ਗੁਰੂ ਸਾਹਿਬਾਨ ਵੱਲੋਂ ਦੱਸੀ ਜੀਵਨ ਦੀ ਜਾਂਚ ਮੁਤਾਬਿਕ ਜੀਵਨ ਜਿਊਣ ਦੀ ਪ੍ਰੇਰਨਾ ਦੇਣਾ, ਪਤਿਤਪੁਣਾ ਨਸ਼ਿਆਂ ਤਿਆਗਣ, ਭੇਖੀ, ਪਾਖੰਡੀ ਸੰਤਾਂ ਬਾਬਿਆਂ ਦੇ ਮਗਰ ਲੱਗਣ ਦੀ ਥਾਂ ਗੁਰੂ ਗ੍ਰੰਥ ਸਾਹਿਬ ਦੇ ਲੜ ਲੱਗਣ ਦੀ ਪ੍ਰੇਰਨਾ ਦਿੱਤੀ ਗਈ ਹੈ। ਅਨੰਦਪੁਰ ਸਾਹਿਬ ਦੇ ਸਾਰੇ ਗੁਰਦੁਆਰੇ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ, ਕਿਲ੍ਹਾ ਅਨੰਦਗੜ੍ਹ ਸਾਹਿਬ, ਗੁ: ਸੀਸ ਗੰਜ ਸਾਹਿਬ, ਗੁ: ਭੌਰਾ ਸਾਹਿਬ, ਗੁ: ਹੋਲਗੜ੍ਹ, ਗੁ: ਕਿਲ੍ਹਾ ਲੋਹਗੜ੍ਹ, ਕਿਲ੍ਹਾ ਤਾਰਾਗੜ੍ਹ ਆਦਿ ਗੁਰਦੁਆਰਿਆਂ ਵਿਖੇ ਸ਼ਾਨਦਾਰ ਦੀਪਮਾਲਾ ਕੀਤੀ ਗਈ ਹੈ। ਅਨੰਦਪੁਰ ਸਾਹਿਬ ਵਿਖੇ ਪੁੱਜਣ ਵਾਲੀਆਂ ਸਾਰੀਆਂ ਸੜਕਾਂ 'ਤੇ ਵੱਖ-ਵੱਖ ਪਿੰਡਾਂ ਵੱਲੋਂ ਸੰਗਤਾਂ ਲਈ ਭਿੰਨ-ਭਿੰਨ ਪ੍ਰਕਾਰ ਦੇ ਲੰਗਰ ਲਗਾਏ ਹੋਏ ਹਨ।
ਭਾਵੇਂ ਮੇਲਾ ਅੱਜ ਸ਼ੁਰੂ ਹੋਣਾ ਹੈ, ਲੇਕਿਨ ਸਵੇਰ ਤੋਂ ਵੱਡੀ ਗਿਣਤੀ ਵਿਚ ਸੰਗਤਾਂ ਗੁਰਦੁਆਰਿਆਂ ਵਿਚ ਨਤਮਸਤਕ ਹੋ ਰਹੀਆਂ ਹਨ। ਸਿਵਲ ਅਤੇ ਪੁਲਿਸ ਪ੍ਰਸ਼ਾਸਨ ਨੇ ਸੰਗਤਾਂ ਦੀ ਸਹੂਲਤ ਲਈ ਪੁਖਤਾ ਪ੍ਰਬੰਧ ਕੀਤੇ ਹੋਏ ਹਨ। ਅਮਨ ਕਾਨੂੰਨ ਨੂੰ ਕਾਇਮ ਰੱਖਣ ਲਈ ਪੁਲਿਸ ਵੱਲੋਂ ਪੂਰੀ ਚੌਕਸੀ ਰੱਖੀ ਗਈ ਹੈ। ਰੋਪੜ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਸ: ਗੋਪਾਲ ਕ੍ਰਿਸ਼ਨ ਸਿੰਘ ਜ਼ਿਲ੍ਹਾ ਪੁਲਿਸ ਮੁਖੀ ਜਤਿੰਦਰ ਸਿੰਘ ਔਲਖ, ਐਸ. ਡੀ. ਐਮ.-ਕਮ-ਮੇਲਾ ਅਫਸਰ ਹਰਗੁਣਜੀਤ ਕੌਰ, ਉਪ ਪੁਲਿਸ ਕਪਤਾਨ ਸ: ਹਰਪ੍ਰੀਤ ਸਿੰਘ ਮੰਡੇਰ, ਤਹਿਸੀਲਦਾਰ ਗੁਰਚਰਨ ਸਿੰਘ ਬਰਾੜ ਆਦਿ ਅਧਿਕਾਰੀਆਂ ਨੇ ਸਾਰੇ ਮੇਲੇ 'ਤੇ ਪੂਰਨ ਨਿਗ੍ਹਾ ਰੱਖੀ ਹੋਈ ਹੈ। ਇਹ ਵੀ ਜਾਣਕਾਰੀ 'ਚ ਆਇਆ ਕਿ ਕੁਝ ਨੌਜਵਾਨ ਮੋਟਰ ਸਾਈਕਲਾਂ ਦੇ ਸਇਲੈਂਸਰ ਲਾਹ ਕੇ ਸ਼ੋਰ ਪ੍ਰਦੂਸ਼ਣ ਕਰ ਰਹੇ ਹਨ। ਇਨ੍ਹਾਂ ਨੂੰ ਰੋਕਣ ਦੀ ਵੱਡੀ ਲੋੜ ਹੈ। ਸ਼ਰਧਾਲੂਆਂ ਲਈ ਮੰਗਤੇ ਵੀ ਸਮੱਸਿਆ ਬਣੇ ਹੋਏ ਹਨ, ਪਕੌੜਿਆਂ ਦੀ ਆੜ ਵਿਚ ਕੁਝ ਦੁਕਾਨਦਾਰਾਂ ਵੱਲੋਂ ਭੰਗ ਦੇ ਪਕੌੜੇ ਵੇਚੇ ਜਾਣ ਦੀ ਵੀ ਸੂਚਨਾ ਪ੍ਰਾਪਤ ਹੋਈ ਹੈ। ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਉਹ ਇਨ੍ਹਾਂ ਬੁਰਾਈਆਂ ਦਾ ਹੱਲ ਕਰੇ।

ਭਾਰਤੀ ਤੇ ਅਮਰੀਕੀ ਫ਼ੌਜੀ ਵੱਲੋਂ ਰਾਜਸਥਾਨ
'ਚ ਪਹਿਲੀ ਵਾਰ ਸਾਂਝੀਆਂ ਮਸ਼ਕਾਂ ਸ਼ੁਰੂ

ਰਾਜਸਥਾਨ ਦੇ ਮਹਾਜਾਨ ਖੇਤਰ ਵਿਚ ਭਾਰਤੀ ਅਤੇ
ਅਮਰੀਕੀ ਫ਼ੌਜ ਸਾਂਝੀ ਮਸ਼ਕ ਮੌਕੇ।

ਬਠਿੰਡਾ, 6 ਮਾਰਚ -ਭਾਰਤੀ ਅਤੇ ਅਮਰੀਕੀ ਫ਼ੌਜ ਵੱਲੋਂ ਪਹਿਲੀ ਵਾਰ ਇਕੱਠਿਆਂ ਮਿਲ ਕੇ ਰਾਜਸਥਾਨ ਦੇ ਮਹਾਜਾਨ ਖੇਤਰ 'ਚ ਫੌਜੀ ਮਸ਼ਕਾਂ ਦੀ ਅੱਜ ਸ਼ੂਰੂਆਤ ਕੀਤੀ ਗਈ। ਰਾਜਸਥਾਨ ਦੇ ਮਾਰੂਥਲੀ ਖੇਤਰ ਮਹਾਜਾਨ ਵਿਖੇ ਸ਼ੁਰੂ ਹੋਏ ਸਾਲ 2011-12 ਦੇ ਯੁੱਧ ਅਭਿਆਸ ਪ੍ਰੋਗਰਾਮ ਤਹਿਤ ਦੋਵੇ ਦੇਸ਼ਾਂ ਦੀ ਫ਼ੌਜ ਨਵੀਂ ਤਕਨਾਲੋਜੀ ਦੇ ਸਾਜੋ ਸਾਮਾਨ ਅਤੇ ਹਥਿਆਰਾਂ ਨਾਲ ਦੇਸ਼ ਵਿਰੋਧੀ ਤਾਕਤਾਂ ਵਿਰੁੱਧ ਨਿਪਟਣ ਦੀ ਸਾਂਝੀ ਸਿਖਲਾਈ ਲੈਣਗੀਆਂ। ਅਮਰੀਕੀ ਫ਼ੌਜ ਦੀ ਟੁੱਕੜੀ ਦੀ ਕਮਾਂਡ ਕਰਨਲ ਜੇ. ਰੌਥ ਕਮਾਂਡਰ ਸੈਕਿੰਡ ਇੰਜੀਨਿਅਰ ਬ੍ਰਿਗੇਡ ਯੂ. ਐੱਸ. ਆਰਮੀ ਕਰ ਰਹੇ ਹਨ। ਜਦਕਿ ਬ੍ਰਿਗੇਡੀਅਰ ਬੀ. ਐੱਸ. ਧਨੋਆ ਭਾਰਤੀ ਫੌਜ ਦੀ ਟੁਕੜੀ ਦੀ ਅਗਵਾਈ ਕਰ ਰਹੇ ਹਨ। ਦੋ ਹਫਤਿਆਂ ਦੇ ਇਸ ਜੰਗੀ ਅਭਿਆਸ ਦੌਰਾਨ ਸੈਨਿਕ ਕਠਿਨ ਪ੍ਰਸਥਿਤੀਆਂ ਵਿਚ ਅਮਨ ਸ਼ਾਂਤੀ ਨੂੰ ਬਹਾਲ ਰੱਖਣ ਲਈ ਕਾਰਜਾਂ ਦਾ ਅਭਿਆਸ ਕਰਨਗੇ।

ਦਸਵੀਂ ਪਹਿਲੇ ਸਮੈਸਟਰ ਪ੍ਰੀਖਿਆ ਦੇ ਫੇਲ੍ਹ
ਪ੍ਰੀਖਿਆਰਥੀਆਂ ਲਈ ਵਿਸ਼ੇਸ਼ ਮੌਕਾ

ਅਜੀਤਗੜ੍ਹ, 6 ਮਾਰਚ -ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਸਕੱਤਰ ਵੱਲੋਂ ਜਾਰੀ ਪ੍ਰੈਸ ਬਿਆਨ ਵਿਚ ਦੱਸਿਆ ਗਿਆ ਹੈ ਕਿ ਦਸਵੀਂ ਮਾਰਚ -2010 ਵਿੱਚ ਦਾਖਲ ਹੋਏ ਵਿਦਿਆਰਥੀ ਜੋ ਸਮੈਸਟਰ-1 ਪ੍ਰੀਖਿਆ ਦੇ ਮਿਲੇ ਦੋ ਮੌਕਿਆਂ ਵਿੱਚ ਪ੍ਰੀਖਿਆ ਪਾਸ ਨਹੀਂ ਕਰ ਸਕੇ ਉਨ੍ਹਾਂ ਪ੍ਰੀਖਿਆਰਥੀਆਂ ਨੂੰ ਸਮੈਸਟਰ-1 ਪਾਸ ਕਰਨ ਲਈ ਮਾਰਚ 2012 ਵਿੱਚ ਬੋਰਡ ਵੱਲੋਂ ਇੱਕ ਵਿਸ਼ੇਸ਼ ਮੌਕਾ ਦਿੱਤਾ ਗਿਆ ਹੈ। ਅਜਿਹਾ ਵਿਸ਼ੇਸ਼ ਮੌਕਾ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਤੋਂ 11ਵੀਂ ਸ਼੍ਰੇਣੀ ਦੀ ਮਾਰਚ-2012 ਦੇ ਸਮੈਸਟਰ-2 ਦੀ ਪ੍ਰੀਖਿਆ ਸਕੂਲ ਵੱਲੋਂ ਲੈ ਲਈ ਜਾਵੇ ਅਤੇ ਸਬੰਧਿਤ ਵਿਦਿਆਰਥੀਆਂ ਦੀ ਦਸਵੀਂ ਦੀ ਪ੍ਰੀਖਿਆ ਦੇ ਵਿਸ਼ੇਸ਼ ਮੌਕੇ ਦਾ ਨਤੀਜਾ ਪਾਸ ਐਲਾਨ ਹੋਣ 'ਤੇ ਹੀ ਉਸ ਦਾ 11ਵੀਂ ਸ਼੍ਰੇਣੀ ਦਾ ਨਤੀਜਾ ਐਲਾਨਿਆ ਜਾਵੇ।

ਨਹਿਰ 'ਚ ਡੁੱਬਣ ਕਾਰਨ 2 ਨੌਜਵਾਨਾਂ ਦੀ ਮੌਤ

ਫ਼ਤਹਿਗੜ੍ਹ ਸਾਹਿਬ, 6 ਮਾਰਚ  - ਬੀਤੀ ਰਾਤ ਨਜ਼ਦੀਕੀ ਪਿੰਡ ਸਾਨੀਪੁਰ ਨੇੜਿਉਂ ਲੰਘਦੀ ਨਰਵਾਣਾ ਨਹਿਰ 'ਚ ਦੋ ਨੌਜਵਾਨਾਂ ਦੀ ਡੁੱਬਣ ਕਾਰਨ ਮੌਤ ਹੋ ਗਈ। ਸਰਹਿੰਦ ਥਾਣੇ ਦੇ ਸਹਾਇਕ ਥਾਣੇਦਾਰ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਬੀਤੀ ਰਾਤ ਲਗਭਗ 9.30 ਵਜੇ ਦੇ ਕਰੀਬ ਬਬਨੇਸ਼ ਉਰਫ਼ ਬਾਨੂ (21) ਪੁੱਤਰ ਸੰਜੀਵ ਪੁਰੀ ਵਾਸੀ ਸਰਹਿੰਦ ਮੰਡੀ ਘਰੇਲੂ ਝਗੜੇ ਕਾਰਨ ਘਰੋਂ ਨਾਰਾਜ਼ ਹੋ ਕੇ ਚਲਿਆ ਗਿਆ ਅਤੇ ਉਸ ਨੇ ਸਾਨੀਪੁਰ ਨੇੜਿਉਂ ਲੰਘਦੀ ਨਰਵਾਣਾ ਨਹਿਰ 'ਚ ਛਾਲ ਮਾਰ ਦਿੱਤੀ। ਜਦੋਂ ਉਸ ਨੂੰ ਅਰਵਿੰਦਰ ਪਾਲ (21) ਪੁੱਤਰ ਰਜ਼ੇਸਪਾਲ ਵਾਸੀ ਸਰਹਿੰਦ ਮੰਡੀ ਨੇ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਹ ਵੀ ਨਹਿਰ 'ਚ ਡੁੱਬ ਗਿਆ।

ਖੂੰਖਾਰ ਕੁੱਤਿਆਂ ਨੇ ਜਿਉਂਦੇ ਵਿਅਕਤੀ ਨੂੰ ਨੋਚ ਨੋਚ ਕੇ ਖਾਧਾ

ਠੱਠੀ ਭਾਈ, 6 ਮਾਰਚ-ਇਥੋਂ ਦੋ ਕਿਲੋਮੀਟਰ ਦੀ ਦੂਰੀ ਤੇ ਪਿੰਡ ਸੇਖਾ ਕਲਾਂ ਦੇ ਖੇਤਾਂ ਵਿਚ ਬਣੀ ਸ਼ਰਾਬ ਦੇ ਚੜ੍ਹਾਵੇ ਵਾਲੀ ਸਮਾਧ ਬਾਬਾ ਰੁੱਖੜ ਦਾਸ ਦੇ ਸਥਾਨ ਤੋਂ ਬੀਤੀ ਰਾਤ ਜ਼ਿਆਦਾ ਸ਼ਰਾਬ ਪੀ ਕੇ ਘਰ ਆ ਰਹੇ ਪਿੰਡ ਠੱਠੀ ਭਾਈ ਦੇ ਇਕ ਵਿਅਕਤੀ ਨੂੰ ਅਵਾਰਾ ਖੂੰਖਾਰ ਕੁੱਤਿਆਂ ਨੇ ਜਿਉਂਦੇ ਨੂੰ ਹੀ ਨੋਚ ਨੋਚ ਕੇ ਖਾ ਲਿਆ। ਜਾਣਕਾਰੀ ਅਨੁਸਾਰ ਬਲਵੀਰ ਸਿੰਘ ਉਰਫ ਨਿਕੜਾ ਪੁੱਤਰ ਬੂਟਾ ਸਿੰਘ ਵਾਸੀ ਠੱਠੀ ਭਾਈ ਅਕਸਰ ਇਸ ਸ਼ਰਾਬ ਚੜ੍ਹਾਵੇ ਵਾਲੇ ਸਥਾਨ 'ਤੇ ਸ਼ਰਾਬ ਪੀਣ ਜਾਇਆ ਕਰਦਾ ਸੀ। ਬੀਤੀ ਰਾਤ ਵੀ ਉਹ ਰੋਜ਼ਾਨਾ ਦੀ ਤਰ੍ਹਾਂ ਇਸ ਸਥਾਨ 'ਤੇ ਜਾ ਕੇ ਸ਼ਰਾਬ ਜ਼ਿਆਦਾ ਪੀ ਗਿਆ ਅਤੇ ਰਸਤੇ ਵਿਚ ਹੀ ਡਿੱਗ ਪਿਆ। ਇਥੇ ਘੁੰਮਦੇ ਅਵਾਰਾ ਕੁੱਤਿਆਂ ਨੇ ਉਸ ਦੇ ਸਿਰ, ਗਰਦਨ ਅਤੇ ਹੋਰ ਅੰਗਾਂ ਨੂੰ ਬੁਰੀ ਤਰ੍ਹਾਂ ਨੋਚਿਆ। ਜਿਸ ਦਾ ਅੱਜ ਸਵੇਰੇ ਕੁੱਝ ਲੋਕਾਂ ਨੂੰ ਪਤਾ ਲੱਗਣ 'ਤੇ ਉਸ ਦੇ ਘਰ ਵਾਲਿਆਂ ਨੂੰ ਸੂਚਿਤ ਕੀਤਾ। ਜਦ ਘਰ ਵਾਲਿਆਂ ਨੇ ਨਿਕੜਾ ਸਿੰਘ ਨੂੰ ਜਾ ਕੇ ਵੇਖਿਆ ਤਾਂ ਉਸ ਦੇ ਅਜੇ ਸਾਹ ਚੱਲ ਰਹੇ ਸਨ ਜਿਸ ਨੂੰ ਇਲਾਜ ਲਈ ਬਾਘਾ ਪੁਰਾਣਾ ਦੇ ਸਰਕਾਰੀ ਹਸਪਤਾਲ ਲਈ ਲਿਜਾਇਆ ਜਾ ਰਿਹਾ ਸੀ ਕਿ ਉਸ ਨੇ ਦਮ ਤੋੜ ਦਿੱਤਾ।

ਚੋਣ ਨਤੀਜਿਆਂ ਨੇ ਡੇਰਾਵਾਦ ਦੀ ਅਖੌਤੀ ਸ਼ਕਤੀ
 ਦੀਆਂ ਚੂਲਾਂ ਢਿੱਲੀਆਂ ਕੀਤੀਆਂ

ਬੱਧਨੀ ਕਲਾਂ, 6 ਮਾਰਚ )-ਅੱਜ ਪੰਜਾਬ ਵਿਧਾਨ ਸਭਾ ਦੇ ਆਏ ਚੋਣ ਨਤੀਜਿਆਂ ਨੇ ਮਨਪ੍ਰੀਤ ਸਿੰਘ ਬਾਦਲ ਦੀ ਅਗਵਾਈ ਵਾਲੇ ਸਾਂਝੇ ਮੋਰਚੇ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦੀਆਂ ਆਸਾਂ 'ਤੇ ਪਾਣੀ ਫੇਰਨ ਦੇ ਨਾਲ ਨਾਲ ਡੇਰਾਵਾਦ ਦੀ ਅਖੌਤੀ ਸ਼ਕਤੀ ਦੀਆਂ ਚੂਲਾਂ ਢਿੱਲੀਆਂ ਕਰਕੇ ਰੱਖ ਦਿੱਤੀਆਂ ਹਨ। ਇਨ੍ਹਾਂ ਚੋਣਾਂ ਵਿਚ ਡੇਰੇ ਦਾ ਸਮੱਰਥਨ ਪ੍ਰਾਪਤ ਕਰਨ ਵਾਲੇ ਵੱਡੀ ਗਿਣਤੀ ਵਿਚ ਉਮੀਦਵਾਰਾਂ ਨੂੰ ਜਿਥੇ ਚੋਣ ਹਾਰ ਕੇ ਮੂੰਹ ਦੀ ਖਾਣੀ ਪਈ ਉਥੇ ਜਥੇਦਾਰ ਤੋਤਾ ਸਿੰਘ ਵਰਗੇ ਕਈ ਉਮੀਦਵਾਰਾਂ ਨੇ ਡੇਰੇ ਅੱਗੇ ਝੁਕਣ ਤੋਂ ਇਨਕਾਰ ਕਰਨ ਦੇ ਬਾਵਜੂਦ ਸ਼ਾਨਦਾਰ ਜਿੱਤਾਂ ਹਾਸਲ ਕੀਤੀਆਂ। ਕੈਪਟਨ ਅਮਰਿੰਦਰ ਸਿੰਘ ਤੇ ਉਨ੍ਹਾਂ ਦੀ ਪਾਰਟੀ ਦੇ ਆਗੂਆਂ ਵੱਲੋਂ ਵੋਟ ਸਮੱਰਥਨ ਲਈ ਡੇਰੇ ਦੇ ਮੁਖੀ ਦੇ ਦਰਬਾਰ ਕੀਤੀ ਪੁਕਾਰ ਕਾਰਨ ਮਿਲੇ ਸਮਰਥਨ ਦੇ ਬਾਵਜੂਦ ਅਕਾਲੀ ਦਲ ਬਾਦਲ ਪਹਿਲਾਂ ਨਾਲੋਂ ਵੀ ਵੱਧ ਸੀਟਾਂ ਲੈ ਗਿਆ। ਹੋਰ ਤਾਂ ਹੋਰ ਮਹਾਂਰਾਣੀ ਪ੍ਰਨੀਤ ਕੌਰ ਅਤੇ ਰਣਇੰਦਰ ਸਿੰਘ ਵੱਲੋਂ ਡੇਰੇ 'ਤੇ ਮਾਰੇ ਗੇੜੇ ਸਗੋਂ ਪੁੱਠੇ ਹੀ ਪੈ ਗਏ ਤੇ ਸਿੱਖ ਵੋਟਰਾਂ ਦੀ ਨਰਾਜ਼ਗੀ ਸੇਹੜਨ ਕਾਰਨ ਕਾਂਗਰਸ ਸਮਾਣਾ ਸੀਟ ਵੀ 6 ਹਜ਼ਾਰ ਵੋਟਾਂ ਦੇ ਫਰਕ ਨਾਲ ਹਾਰ ਗਈ। ਦੂਜੇ ਪਾਸੇ ਭਾਵੇਂ ਮਨਪ੍ਰੀਤ ਸਿੰਘ ਬਾਦਲ ਸਮੇਤ ਉਨ੍ਹਾਂ ਦੀ ਪਾਰਟੀ ਦੇ ਬਹੁਤੇ ਉਮੀਦਵਾਰਾਂ ਨੇ ਵੋਟ ਸਮਰਥਨ ਖਾਤਰ ਡੇਰੇ ਵਿਚ ਅਨੇਕਾਂ ਗੇੜੇ ਮਾਰੇ ਅਤੇ ਸੂਤਰਾਂ ਅਨੁਸਾਰ ਕਈ ਹਲਕਿਆਂ ਵਿਚ ਡੇਰੇਦਾਰ ਵੱਲੋਂ ਕੀਤੀ ਹਮਾਇਤ ਦੇ ਬਾਵਜੂਦ ਕੁੱਝ ਹੱਥ ਪੱਲੇ ਨਾ ਆਇਆ। ਹੋਰ ਤਾਂ ਹੋਰ ਖੁਦ ਮਨਪ੍ਰੀਤ ਬਾਦਲ ਦੋ ਥਾਵਾਂ ਤੋਂ ਚੋਣਾਂ ਲੜਨ ਦੇ ਬਾਵਜੂਦ ਅਸਫਲ ਰਿਹਾ ਤੇ ਉਨ੍ਹਾਂ ਦਾ ਪਿਤਾ ਲੰਬੀ ਹਲਕੇ ਵਿਚੋਂ ਤਿੰਨਾਂ ਬਾਦਲਾਂ ਵਿਚੋਂ ਫਾਂਡੀ ਰਿਹਾ। ਜਗਮੀਤ ਸਿੰਘ ਬਰਾੜ ਵੱਲੋਂ ਡੇਰੇ ਦੀਆਂ ਲਾਈਆਂ ਫੇਰੀਆਂ ਸਿੱਖ ਵੋਟਰਾਂ ਦੀਆਂ ਅੱਖਾਂ ਵਿਚ ਰੜਕਣ ਕਾਰਨ ਅਕਾਲੀ ਉਮੀਦਵਾਰ ਮਨਤਾਰ ਸਿੰਘ ਬਰਾੜ ਦੀ ਜਿੱਤ ਦਾ ਰਾਹ ਪੱਧਰਾ ਹੋ ਗਿਆ। ਡੇਰੇਦਾਰਾਂ ਦੀਆਂ ਅੱਖਾਂ ਵਿਚ ਰੜਕਣ ਵਾਲਾ ਤਲਵੰਡੀ ਸਾਬੋ ਦਾ ਕਾਂਗਰਸੀ ਵਿਧਾਇਕ ਜੀਤਮਹਿੰਦਰ ਸਿੰਘ ਸਿੱਧੂ ਲਗਾਤਾਰ ਤੀਸਰੀ ਵਾਰੀ ਜਿੱਤ ਹਾਸਲ ਕਰ ਗਿਆ ਜਦੋਂ ਕਿ ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਬਾਬੇ ਦਾ ਕੁੜਮ ਹਰਮੋਹਿੰਦਰ ਜੱਸੀ ਖੁਦ 8000 ਵੋਟਾਂ ਦੇ ਭਾਰੀ ਫਰਕ ਨਾਲ ਚੋਣ ਹਾਰ ਗਿਆ। ਸੂਤਰਾਂ ਅਨੁਸਾਰ ਮੋਗਾ ਤੋਂ ਚੋਣ ਲੜਨ ਵਾਲੇ ਸਾਬਕਾ ਡੀ. ਜੀ. ਪੀ. ਪਰਮਦੀਪ ਸਿੰਘ ਗਿੱਲ ਨੇ ਵਰ੍ਹਦੇ ਮੀਂਹ ਵਿਚ ਵੀ ਬਾਬੇ ਦਾ ਭਰੋਸਾ ਜਿੱਤਣ ਦੀ ਕੋਸ਼ਿਸ਼ ਕੀਤੀ ਪ੍ਰੰਤੂ ਝੋਲੀ ਵਿਚ ਹਾਰ ਹੀ ਪੱਲੇ ਪਈ। ਦੂਜੇ ਪਾਸੇ ਵੋਟਾਂ ਖਾਤਰ ਆਪਣੇ ਆਪ ਨੂੰ ਅਸੂਲਪ੍ਰਸਤ ਅਖਵਾਉਣ ਵਾਲੇ ਕੁੱਝ ਕਮਿਊਨਿਸਟ ਉਮੀਦਵਾਰਾਂ ਨੇ ਵੀ ਬਾਬੇ ਦੇ ਡੇਰੇ ਫੇਰੀਆਂ ਮਾਰ ਕੇ ਚੌਂਕੀ ਭਰੀ ਪ੍ਰੰਤੂ ਹਾਰ ਨੇ ਉਨ੍ਹਾਂ ਦਾ ਵੀ ਪਿੱਛਾ ਨਾ ਛੱਡਿਆ।

ਵਿਧਾਨ ਸਭਾ ਚੋਣਾਂ ਦੀ ਜਿੱਤ ਲੋਕ ਸਭਾ ਚੋਣਾਂ ਦਾ ਸੈਮੀ ਫਾਈਨਲ-ਢੀਂਡਸਾ

ਸੰਗਰੂਰ, 6 ਮਾਰਚ  - ਸ਼੍ਰੋਮਣੀ ਅਕਾਲੀ ਦਲ ਦੇ ਸਕੱਤਰ ਜਨਰਲ ਸ. ਸੁਖਦੇਵ ਸਿੰਘ ਢੀਂਡਸਾ ਨੇ ਕਿਹਾ ਕਿ ਪੰਜਾਬ ਦੇ ਲੋਕਾਂ ਨੇ ਬਾਦਲ ਸਰਕਾਰ ਦੀਆਂ ਲੋਕਪੱਖੀ ਨੀਤੀਆਂ ਨੂੰ ਵਧੀਆ ਹੁੰਗਾਰਾ ਦਿੱਤਾ ਹੈ ਅਤੇ ਕਾਂਗਰਸ ਨੂੰ ਲਗਾਤਾਰ ਦੂਸਰੀ ਵਾਰ ਰੱਦ ਕਰ ਕੇ ਸੂਬੇ ਦੇ ਹੋਰ ਵਿਕਾਸ ਲਈ ਹੰਬਲਾ ਮਾਰਿਆ ਹੈ। ਦਿੱਲੀ ਤੋਂ ਫੋਨ ਉਤੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਸ. ਢੀਂਡਸਾ ਨੇ ਕਿਹਾ ਕਿ ਇਹ ਪੰਜਾਬ ਵਿਧਾਨ ਸਭਾ ਚੋਣਾਂ ਅਸਲ ਵਿਚ ਦੋ ਸਾਲ ਬਾਅਦ ਹੋਣ ਵਾਲੀਆਂ ਅਗਾਮੀ ਲੋਕ ਸਭਾ ਚੋਣਾਂ ਦਾ ਸੈਮੀ ਫਾਈਨਲ ਹਨ ਅਤੇ ਪੰਜਾਬ ਵਿਚੋਂ ਹੁਣ ਕਾਂਗਰਸ ਦਾ ਬਿਸਤਰਾ ਗੋਲ ਹੋਣ ਦਾ ਇਹ ਵਧੀਆ ਸੰਕੇਤ ਹੈ। ਜ਼ਿਲ੍ਹਾ ਸੰਗਰੂਰ ਦੀਆਂ 7 ਵਿਚੋਂ 5 ਸੀਟਾਂ ਉੱਤੇ ਅਕਾਲੀ ਉਮੀਦਵਾਰਾਂ ਦੇ ਜੇਤੂ ਰਹਿਣ ਬਾਰੇ ਉਨ੍ਹਾਂ ਕਿਹਾ ਕਿ ਇਥੋਂ ਦੇ ਲੋਕਾਂ ਨੇ ਜ਼ਿਲ੍ਹੇ ਦੇ ਹੋਏ ਵਿਕਾਸ ਨੂੰ ਸਮਰਥਨ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਗੋਡਿਆਂ ਦਾ ਆਪ੍ਰੇਸ਼ਨ ਹੋਣ ਕਾਰਨ ਸ. ਢੀਂਡਸਾ 15 ਮਾਰਚ ਤੱਕ ਦਿੱਲੀ ਵਿਖੇ ਆਰਾਮ ਕਰ ਰਹੇ ਹਨ ਅਤੇ ਫੋਨ 'ਤੇ ਹੀ ਉਨ੍ਹਾਂ ਨੇ ਜੇਤੂ ਉਮੀਦਵਾਰਾਂ ਨੂੰ ਵਧਾਈ ਵੀ ਦਿੱਤੀ ਹੈ।

ਸਰਕਾਰਾਂ ਜ਼ਹਿਰ ਵੇਚ ਕੇ ਪੈਸੇ ਕਮਾਉਣ ਦੀ ਥਾਂ ਸੱਚਾ
ਸੁੱਚਾ ਪ੍ਰਬੰਧ ਕਰਨ-ਗਿਆਨੀ ਗੁਰਬਚਨ ਸਿੰਘ

ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਦਾ ਗੁਰਦੁਆਰਾ ਸਾਹਿਬ ਪਹੁੰਚਣ 'ਤੇ
ਬਾਬਾ ਗੁਰਦੀਪ ਸਿੰਘ ਸਨਮਾਨ ਕਰਦੇ ਹੋਏ। ਨਾਲ ਹਨ ਹੋਰ ਸੰਗਤਾਂ।

ਬਾਘਾ ਪੁਰਾਣਾ, 6 ਫਰਵਰੀ -ਮਾਲਵੇ ਦੇ ਪ੍ਰਸਿੱਧ ਧਾਰਮਿਕ ਸਥਾਨ ਗੁਰਦੁਆਰਾ ਬਾਬਾ ਤੇਗਾ ਸਿੰਘ ਚੰਦ ਪੁਰਾਣਾ ਵਿਖੇ ਸੱਚ ਖੰਡ ਵਾਸੀ ਬਾਬਾ ਨਛੱਤਰ ਸਿੰਘ ਵੱਲੋਂ ਅਰੰਭੀ ਪ੍ਰੰਪਰਾ ਨੂੰ ਅੱਗੇ ਤੋਰਦਿਆਂ ਹੋਇਆਂ ਮੁੱਖ ਸੇਵਾਦਾਰ ਬਾਬਾ ਗੁਰਦੀਪ ਸਿੰਘ ਦੀ ਅਗਵਾਈ ਹੇਠ 11 ਮਾਰਚ ਨੂੰ ਮਨਾਏ ਜਾ ਰਹੇ ਸਾਲਾਨਾ ਸ਼ਹੀਦੀ ਜੋੜ ਮੇਲੇ ਸਬੰਧੀ ਅੱਜ ਸਿੰਘ ਸਾਹਿਬ ਗਿਆਨੀ ਗੁਰਬਚਨ ਸਿੰਘ ਜਥੇਦਾਰ ਸ੍ਰੀ ਅਕਾਲ ਤਖਤ ਸਾਹਿਬ ਉਚੇਚੇ ਤੌਰ 'ਤੇ ਗੁਰਦੁਆਰਾ ਸਾਹਿਬ ਪੁੱਜੇ ਤੇ ਬਾਬਾ ਗੁਰਦੀਪ ਸਿੰਘ ਨਾਲ ਗੁਰਮਤਿ ਵਿਚਾਰਾਂ ਸਾਂਝੀਆਂ ਕੀਤੀਆਂ ਗਈਆਂ। ਇਸ ਮੌਕੇ ਗਿਆਨੀ ਗੁਰਬਚਨ ਸਿੰਘ ਨੇ ਸੰਗਤਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਵਾਤਾਵਰਣ ਪਾਣੀ ਦੀ ਸੰਭਾਲ ਅਤੇ ਨਸ਼ੇ ਤੇ ਸਮਾਜਿਕ ਕੁਰੀਤੀਆਂ ਦਾ ਖਾਤਮਾ ਕਰਨਾ ਅਤਿ ਜ਼ਰੂਰੀ ਹੈ ਤਾਂ ਜੋ ਨਸ਼ਿਆਂ ਸਦਕਾ ਤਬਾਹ ਹੋ ਰਹੀ ਨੌਜਵਾਨੀ, ਸਮਾਜ ਵਿਚ ਆ ਰਹੇ ਨਿਘਾਰ ਅਤੇ ਦੇਸ਼ ਦੀ ਆਰਥਿਕਤਾ ਨੂੰ ਤਬਾਹ ਹੋਣੋਂ ਬਚਾਇਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਉਹ ਬਜਾਏ ਜ਼ਹਿਰ ਵੇਚ ਕੇ ਪੈਸਾ ਕਮਾਉਣ ਦੀ ਥਾਂ ਸੱਚਾ ਸਮੁੱਚਾ ਪ੍ਰਬੰਧ ਕਰਨ ਅਤੇਂ ਨੌਜਵਾਨ ਲੜਕੇ ਲੜਕੀਆਂ ਨੂੰ ਵੱਧ ਤੋਂ ਵੱਧ ਵਿੱਦਿਆ ਪ੍ਰਦਾਨ ਕਰਾਉਣ ਤਾਂ ਜੋ ਉਹ ਕਿਸੇ ਵੀ ਖੇਤਰ ਵਿਚ ਮੰਜ਼ਿਲ ਪ੍ਰਾਪਤ ਕਰ ਸਕਣ। ਉਨ੍ਹਾਂ ਪਿੰਡਾਂ ਵਿਚ ਸ਼ਰਾਬ ਦੇ ਠੇਕੇ ਨਾ ਖੋਲ੍ਹਣ ਦੇਣ ਵਾਲੀਆਂ ਪੰਚਾਇਤਾਂ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਵਾਤਾਵਰਣ ਦੀ ਸੰਭਾਲ ਲਈ 14 ਮਾਰਚ ਨੂੰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਪਟਿਆਲਾ ਵਿਖੇ ਵੱਡੇ ਪੱਧਰ ਦਾ ਸੈਮੀਨਾਰ ਕਰਵਾਇਆ ਜਾ ਰਿਹਾ ਹੈ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਚੇਅਰਮੈਨ ਹਰਪਾਲ ਸਿੰਘ ਧਾਲੀਵਾਲ, ਗਿਆਨੀ ਗੁਰਦੀਪ ਸਿੰਘ, ਪ੍ਰਧਾਨ ਭੁਪਿੰਦਰ ਸਿੰਘ, ਕੁਲਵੀਰ ਸਿੰਘ ਕੋਠੇ ਪੱਤੀ ਮੁਹੱਬਤ, ਮੈਂਬਰ ਚਮਕੌਰ ਸਿੰਘ, ਚਮਕੌਰ ਸਿੰਘ ਇਟਲੀ, ਨਛੱਤਰ ਸਿੰਘ ਚੰਦ ਪੁਰਾਣਾ, ਸ਼ੇਰ ਸਿੰਘ ਚੰਦ ਪੁਰਾਣਾ, ਜੋਗਿੰਦਰ ਸਿੰਘ, ਅਮਰਜੀਤ ਸਿੰਘ, ਤਰਲੋਕ ਸਿੰਘ, ਦਰਸ਼ਨ ਸਿੰਘ, ਕਰਮ ਸਿੰਘ, ਦਵਿੰਦਰ ਸਿੰਘ ਕੋਟ ਕਰੋੜ ਵੀ ਹਾਜ਼ਰ ਸਨ।

ਬਾਬਾ ਹਰਨਾਮ ਸਿੰਘ ਵੱਲੋਂ ਜਿੱਤ ਦੀ ਸਮੂਹ ਪੰਥ ਨੂੰ ਵਧਾਈ

ਜਲੰਧਰ, 6 ਮਾਰਚ-ਸੰਤ ਸਮਾਜ ਦੇ ਮੁਖੀ ਬਾਬਾ ਹਰਨਾਮ ਸਿੰਘ ਖਾਲਸਾ ਨੇ ਅਕਾਲੀ ਦਲ ਦੀ ਸ਼ਾਨਦਾਰ ਜਿੱਤ ਉੱਪਰ ਸਮੂਹ ਖਾਲਸਾ ਪੰਥ ਨੂੰ ਵਧਾਈ ਦਿੰਦਿਆਂ ਕਿਹਾ ਹੈ ਕਿ ਪੰਜਾਬੀਆਂ ਨੇ ਸਾਬਤ ਕਰ ਦਿੱਤਾ ਹੈ ਕਿ ਉਹ ਕਾਂਗਰਸ ਵਰਗੀ ਪੰਥ ਵਿਰੋਧੀ ਤਾਕਤ ਨੂੰ ਕਦੇ ਵੀ ਮੂੰਹ ਨਹੀਂ ਲਗਾਉਣਗੇ। ਉਨ੍ਹਾਂ ਕਿਹਾ ਕਿ ਜਿਵੇਂ ਸ਼੍ਰੋਮਣੀ ਕਮੇਟੀ ਚੋਣਾਂ ਦੌਰਾਨ ਸ਼੍ਰੋਮਣੀ ਅਕਾਲੀ ਦਲ, ਸੰਤ ਸਮਾਜ ਤੇ ਸਿੱਖ ਸੰਪਰਦਾਵਾਂ ਨੇ ਮਿਲ ਕੇ ਮੁਹਿੰਮ ਚਲਾਏ ਤੇ ਵੱਡੀ ਸਫਲਤਾ ਹਾਸਿਲ ਕੀਤੀ ਸੀ, ਉਸੇ ਤਰ੍ਹਾਂ ਦਾ ਇਤਿਹਾਸ ਇਨ੍ਹਾਂ ਚੋਣਾਂ ਵਿਚ ਵੀ ਦੁਹਰਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਸਮੁੱਚਾ ਪੰਥ ਇਸੇ ਤਰ੍ਹਾਂ ਏਕਤਾ ਵਿਚ ਪਰੋ ਕੇ ਪੰਥ ਵਿਰੋਧੀ ਸ਼ਕਤੀਆਂ ਨੂੰ ਹਰ ਖੇਤਰ ਵਿਚ ਹਾਰ ਦੇਵੇਗਾ।

 ਜਾਨ ਜੋਖਮ 'ਚ ਪਾ ਬੰਦ ਰੇਲਵੇ ਫਾਟਕ ਪਾਰ ਕਰਦੇ ਨੇ ਲੋਕ

ਗੁਰਦਾਸਪੁਰ, -ਬੇਸ਼ੱਕ ਰੇਲਵੇ ਵਿਭਾਗ ਨੇ ਹਰ ਰੇਲਵੇ ਕ੍ਰਾਸਿੰਗ 'ਤੇ ਰੇਲਵੇ ਫਾਟਕ ਲਗਾ ਰੱਖੇ ਹਨ ਤਾਂ ਕਿ ਲੋਕ ਰੇਲਗੱਡੀ ਆਉਣ ਤਕ ਰੇਲਵੇ ਲਾਈਨ ਨੂੰ ਪਾਰ ਨਾ ਕਰ ਸਕਣ। ਇਨ੍ਹਾਂ ਬੰਦ ਰੇਲਵੇ ਫਾਟਕਾਂ  ਕਾਰਨ ਕੁਝ ਸਮੇਂ ਲਈ ਲੋਕਾਂ ਨੂੰ ਫਾਟਕ 'ਤੇ ਰੁਕਣਾ ਵੀ ਪੈਂਦਾ ਹੈ ਪਰ ਉਸ ਦੇ ਬਾਵਜੂਦ ਜ਼ਿਆਦਾਤਰ ਲੋਕ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਬੰਦ ਰੇਲਵੇ ਫਾਟਕ ਦੇ ਹੇਠੋਂ ਨਿਕਲਣ ਤੋਂ ਵੀ ਗੁਰੇਜ ਨਹੀਂ ਕਰਦੇ। ਗੁਰਦਾਸਪੁਰ ਸ਼ਹਿਰ 'ਚ ਵੀ ਮੰਡੀ ਇਲਾਕੇ 'ਚ ਇਕ ਰੇਲਵੇ ਕ੍ਰਾਸਿੰਗ ਪੈਂਦਾ ਹੈ। ਜੀ. ਟੀ. ਰੋਡ 'ਤੇ ਇਹ ਰੇਲਵੇ ਕ੍ਰਾਸਿੰਗ ਹੋਣ ਕਾਰਨ ਇਸ ਫਾਟਕ ਨੂੰ ਰੇਲਗੱਡੀ ਆਉਣ ਤੋਂ ਕੁਝ ਸਮਾਂ ਪਹਿਲਾਂ ਹੀ ਬੰਦ ਕਰ ਦਿੱਤਾ ਜਾਂਦਾ ਹੈ। ਪਰ ਉਸ ਦੇ ਬਾਵਜੂਦ ਦੋ ਪਹੀਆ ਵਾਹਨ ਚਾਲਕ ਇਸ ਬੰਦ ਫਾਟਕ ਦੇ ਹੇਠੋਂ ਵਾਹਨਾਂ ਸਮੇਤ ਨਿਕਲਣ ਨੂੰ ਪਹਿਲ ਦਿੰਦੇ ਹਨ। ਕਈ ਵਾਰ ਤਾਂ ਰੇਲਗੱਡੀ ਬਿਲਕੁਲ ਲਾਗੇ ਆ ਚੁੱਕੀ ਹੁੰਦੀ ਹੈ ਅਤੇ ਲੋਕ ਉਸ ਦੇ ਬਾਵਜੂਦ ਬਿਨਾਂ ਕਿਸੇ ਡਰ ਦੇ ਰੇਲਵੇ ਫਾਟਕ ਹੇਠੋਂ ਨਿਕਲ ਕੇ ਰੇਲਵੇ ਲਾਈਨ ਪਾਰ ਕਰਦੇ ਹਨ। ਗੁਰਦਾਸਪੁਰ ਸ਼ਹਿਰ 'ਚ ਬਣੇ ਇਸ ਰੇਲਵੇ ਕ੍ਰਾਸਿੰਗ 'ਤੇ ਇਹ ਪ੍ਰੰਪਰਾ ਆਮ ਵੇਖੀ ਜਾਂਦੀ ਹੈ। ਇਸ ਸਬੰਧੀ ਪ੍ਰਸ਼ਾਸਨ ਵੀ ਆਪਣੀ ਜ਼ਿਮੇਵਾਰੀ ਤੋਂ ਪਿੱਛੇ ਹਟਿਆ ਹੋਇਆ ਕੰਭਕਰਨੀ ਨੀਂਦ ਸੁੱਤਾ ਹੈ। ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਬੰਦ ਫਾਟਕ ਹੇਠੋਂ ਲੰਘਣ ਵਾਲਿਆਂ ਖਿਲਾਫ ਸਖਤੀ ਵਰਤੇ ਤਾਂ ਕਿ ਹਾਦਸਾ ਨਾ ਵਾਪਰ ਸਕੇ।

 ਹਾਦਸੇ 'ਚ ਕੈਰੇਬੀਆਈ ਕ੍ਰਿਕਟਰ ਦੀ ਮੌਤ

ਪੋਰਟ ਆਫ ਸਪੇਨ— ਵੈਸਟਇੰਡੀਜ਼ ਟੀਮ ਦੇ ਮੈਂਬਰ ਰੁਨਾਕੋ ਮੋਰਟਨ ਦੀ ਐਤਵਾਰ ਰਾਤ ਇਕ ਸੜਕ ਹਾਦਸੇ 'ਚ ਮੌਤ ਹੋ ਗਈ। 33 ਸਾਲਾ ਮੋਰਟਨ, ਉਨ੍ਹਾਂ ਚੁਨਿੰਦਾ ਕ੍ਰਿਕਟਰਾਂ 'ਚੋਂ ਹੈ ਜੋ ਨੇਵਿਸ ਆਈਲੈਂਡ ਤੋਂ ਉਭਰੇ ਹਨ। ਖਬਰਾਂ ਮੁਤਾਬਕ ਉਨ੍ਹਾਂ ਦੀ ਕਾਰ ਬੇਕਾਬੂ ਹੋ ਕੇ ਇਕ ਖੰਭੇ ਨਾਲ ਟਕਰਾ ਗਈ ਜਿਸ ਕਾਰਨ ਮੌਕੇ 'ਤੇ ਹੀ ਮੋਰਟਨ ਦੀ ਮੌਤ ਹੋ ਗਈ। ਮੋਰਟਨ ਨੇ ਵੈਸਟਇੰਡੀਜ਼ ਲਈ 15 ਟੈਸਟ, 56 ਵਨ ਡੇ ਅਤੇ 7 ਟਵੰਟੀ-20 ਮੈਚ ਖੇਡੇ ਸਨ। ਉਹ ਪਹਿਲੀ ਵਾਰ 2002 'ਚ ਕੌਮੀ ਟੀਮ 'ਚ ਚੁਣੇ ਗਏ ਸਨ। ਮੋਰਟਨ ਨੇ ਆਖਰੀ ਵਾਰ 2010 'ਚ ਆਸਟ੍ਰੇਲੀਆਈ ਖਿਲਾਫ ਇਕ ਟਵੰਟੀ-20 ਮੈਚ ਖੇਡਿਆ ਸੀ।
ਮੋਰਟਨ ਦੀ ਮੌਤ 'ਤੇ ਕੈਰੇਬੀਆਈ ਟੀਮ ਦੇ ਸਾਬਕਾ ਕਪਤਾਨ ਕ੍ਰਿਸ ਗੇਲ ਨੇ ਟਵੀਟ ਕੀਤਾ ਹੈ ਕਿ ਅਸੀਂ ਇਕ ਸੱਚਾ ਲੜਕਾ ਗੁਆ ਦਿੱਤਾ। ਭਗਵਾਨ ਮੋਰਟਨ ਦੀ ਆਤਮਾ ਨੂੰ ਸ਼ਾਂਤੀ ਦੇਵੇ। ਸਾਡੀ ਯਾਦਾਂ ਕਾਫੀ ਸਮੇਂ ਤੱਕ ਨਾਲ ਰਹਿਣਗੀਆਂ। ਮੇਰੀ ਹਮਦਰਦੀ ਮੋਰਟਨ ਦੇ ਪਰਿਵਾਰ ਨਾਲ ਹੈ। ਇੰਗਲੈਂਡ ਟੀਮ ਦੇ ਖਿਡਾਰੀ ਕੇਵਿਨ ਪੀਟਰਸਨ ਨੇ ਵੀ ਟਵੀਟਰ 'ਤੇ ਮੋਰਟਨ ਨੂੰ ਯਾਦ ਕੀਤਾ। ਪੀਟਰਸਨ ਨੇ ਲਿਖਿਆ ਹੈ ਕਿ ਬਹੁਤ ਦੁਖ ਵਾਲਾ ਸਮਾਚਾਰ ਹੈ। ਮੋਰਟਨ ਬਹੁਤ ਚੰਗੇ ਖਿਡਾਰੀ ਸਨ। ਉਨ੍ਹਾਂ ਦੀ ਸੰਘਰਸ਼ ਸ਼ਕਤੀ ਬੜੀ ਸ਼ਾਨਦਾਰ ਸੀ। ਭਗਵਾਨ ਮੋਰਟਨ ਦੀ ਆਤਮਾ ਨੂੰ ਸ਼ਾਂਤੀ ਪ੍ਰਦਾਨ ਕਰੇ।

ਕਾਂਗੋ ਦੇ ਅਸਲ੍ਹਾ ਡੀਪੂ 'ਚ ਧਮਾਕੇ-206 ਮੌਤਾਂ ਕਾਂਗੋ ਦੀ ਰਾਜਧਾਨੀ ਬਰੈਜ਼ਵਿਲੇ ਵਿਚ ਅਸਲ੍ਹੇ ਦੇ ਇਕ ਡਿਪੂ 'ਚ ਧਮਾਕਿਆਂ ਨਾਲ ਨੁਕਸਾਨਗ੍ਰਸਤ ਹੋਇਆ ਮਕਾਨ। ਪੈਰਿਸ, 4 ਮਾਰਚ - ਇਕ ਯੂਰਪੀ ਕੂਟਨੀਤਗ ਨੇ ਦੱਸਿਆ ਕਿ ਅੱਜ ਸਵੇਰੇ ਬਰਾਜ਼ਵਿਲੇ ਦੀ ਰਾਜਧਾਨੀ ਕਾਂਗੋਲੂਜ਼ ਦੇ ਪੂਰਬੀ ਹਿੱਸੇ 'ਚ ਸਥਿਤ ਸੈਨਾ ਦੇ ਅਸਲਾ ਡੀਪੂ 'ਚ ਹੋਏ ਸਿਲਸਿਲੇ ਵਾਰ ਧਮਾਕਿਆਂ ਦੌਰਾਨ ਘੱਟੋ-ਘੱਟ 206 ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ ਹਜ਼ਾਰਾਂ ਲੋਕ ਘਰਾਂ ਤੋਂ ਭੱਜ ਗਏ। ਟੈਲੀਫੋਨ 'ਤੇ ਪੈਰਿਸ ਵਿਖੇ ਉਨ੍ਹਾਂ ਨਾਲ ਸੰਪਰਕ ਕਰਨ 'ਤੇ ਉਨ੍ਹਾਂ ਦੱਸਿਆ ਕਿ ਸੈਨਾ ਹਸਪਤਾਲ 'ਚ 150 ਲੋਕਾਂ ਦੀਆਂ ਲਾਸ਼ਾਂ ਦੇਖੀਆਂ ਜਦੋਂ ਕਿ ਕਰੀਬ 1500 ਵਿਅਕਤੀ ਜ਼ਖਮੀ ਹਨ ਜਿਨ੍ਹਾਂ 'ਚੋਂ ਕਈਆਂ ਦੀ ਹਾਲਤ ਗੰਭੀਰ ਹੈ। ਦੱਸਿਆ ਜਾਂਦਾ ਹੈ ਕਿ ਮਰਨ ਵਾਲਿਆਂ 'ਚ ਸੈਨਿਕਾਂ ਦੇ ਨਾਲ ਆਮ ਲੋਕ ਵੀ ਸ਼ਾਮਿਲ ਹਨ। ਇਕ ਪੱਤਰਕਾਰ ਨੇ ਦੱਸਿਆ ਕਿ ਉਸ ਨੇ ਚਾਰ ਲਾਸ਼ਾਂ ਦੇਖੀਆਂ ਜਿਨ੍ਹਾਂ 'ਚ ਇਕ ਯੁਵਾ ਲੜਕੀ ਵੀ ਸੀ। ਚੀਨ ਦੇ ਨਿਊਜ਼ ਚੈਨਲ ਨੇ ਦੱਸਿਆ ਹੈ ਕਿ ਮਰਨ ਵਾਲਿਆਂ 'ਚ ਚੀਨੀ ਕਾਮਿਆਂ ਦੀ ਤਾਦਾਦ ਕਾਫੀ ਹੈ ਜਦੋਂ ਕਿ ਕਾਫੀ ਗਿਣਤੀ 'ਚ ਜ਼ਖਮੀ ਵੀ ਹੋਏ ਹਨ। ਆਪਣਾ ਨਾਮ ਨਾ ਦੱਸਣ ਦੀ ਸ਼ਰਤ 'ਤੇ ਕੁਝ ਸੈਨਿਕਾਂ ਨੇ ਦੱਸਿਆ ਕਿ ਅਸਲੇ ਦੇ ਦੋ ਡੀਪੂਆਂ 'ਚ ਧਮਾਕੇ ਹੋਏ ਅਤੇ ਉਨ੍ਹਾਂ ਨਾਲ ਆਸ ਪਾਸ ਦੇ ਕਈ ਘਰ ਪੂਰੀ ਤਰਾਂ ਨੁਕਸਾਨੇ ਗਏ ਜਦੋਂ ਕਿ ਡੀਪੂ ਦੇ ਕੋਲ ਸਥਿਤ ਇਕ ਚਰਚ ਨੂੰ ਵੀ ਕਾਫੀ ਨੁਕਸਾਨ ਹੋਇਆ। ਕੂਟਨੀਤਗਾਂ ਨੇ ਇਨ੍ਹਾਂ ਧਮਾਕਿਆਂ 'ਚ ਕਿਸੇ ਰਾਜਨੀਤਿਕ ਸਾਜ਼ਿਸ਼ ਤੋਂ ਇਨਕਾਰ ਕੀਤਾ ਹੈ ਤੇ ਕਿਹਾ ਹੈ ਕਿ ਰਾਸ਼ਟਰਪਤੀ ਬਚਾਅ ਕਾਰਜਾਂ 'ਚ ਪੂਰਾ ਸਹਿਯੋਗ ਕਰ ਰਹੇ ਹਨ। ਅਜੇ ਤਕ ਇਨ੍ਹਾਂ ਧਮਾਕਿਆਂ ਬਾਰੇ ਸਰਕਾਰ ਵੱਲੋਂ ਕੋਈ ਵੀ ਬਿਆਨ ਜਾਰੀ ਨਹੀਂ ਕੀਤਾ ਗਿਆ।

ਪੋਲੈਂਡ 'ਚ ਰੇਲ ਗੱਡੀਆਂ ਦੀ ਟੱਕਰ-16 ਮੌਤਾਂ ਪੋਲੈਂਡ ਦੇ ਸ਼ਹਿਰ ਸ਼ਜ਼ੇਸਜੋਸਿਨੀ 'ਚ ਦੋ ਰੇਲ ਗੱਡੀਆਂ 'ਚ ਹੋਈ ਟੱਕਰ ਦਾ ਦ੍ਰਿਸ਼। ਵਾਰਸਾ, 4 ਮਾਰਚ -ਪਿਛਲੇ 20 ਸਾਲਾਂ 'ਚ ਇਹ ਦੇਸ਼ ਦਾ ਸਭ ਤੋਂ ਭਿਆਨਕ ਰੇਲ ਹਾਦਸਾ ਹੈ। ਪੋਲੈਂਡ ਦੇ ਦੱਖਣੀ ਹਿੱਸੇ 'ਚ ਬੀਤੇ ਦਿਨ ਦੋ ਰੇਲ ਗੱਡੀਆਂ ਦੀ ਟੱਕਰ 'ਚ ਘੱਟ ਤੋਂ ਘੱਟ 16 ਲੋਕਾਂ ਦੀ ਮੌਤ ਤੇ 60 ਜ਼ਖਮੀ ਹੋ ਗਏ ਹਨ। ਜ਼ਖਮੀਆਂ ਨੂੰ ਹਸਪਤਾਲ 'ਚ ਦਾਖਲ ਕਰਵਾ ਦਿੱਤਾ ਗਿਆ ਹੈ ਜਿਸ 'ਚ 30 ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਅੱਗ ਬੁਝਾਉ ਦਸਤੇ ਦੇ ਅਧਿਕਾਰੀ ਨੇ ਦੱਸਿਆ ਕਿ ਉਹ ਅਜੇ ਤਕ ਹਾਦਸੇ ਦੇ ਅੰਤਿਮ ਪੀੜਤ ਨੂੰ ਬਾਹਰ ਨਹੀਂ ਕੱਢ ਸਕੇ ਹਾਂ। ਉਨ੍ਹਾਂ ਕਿਹਾ ਕਿ ਜ਼ਖਮੀਆਂ ਨੂੰ ਬਚਾਉਣ ਦਾ ਰਾਹਤ ਕਾਰਜ ਪੂਰਾ ਹੋ ਚੁੱਕਾ ਹੈ। ਅਸੀਂ ਜ਼ਖਮੀਆਂ ਅਤੇ ਲਾਸ਼ਾਂ ਦੀ ਸੂਹ ਲਈ ਵਿਸ਼ੇਸ਼ ਸਿਖਲਾਈ ਵਾਲੇ ਕੁੱਤਿਆਂ ਨੂੰ ਘਟਨਾ ਵਾਲੀ ਥਾਂ 'ਤੇ ਲਿਆਂਦਾ ਗਿਆ ਪਰ ਉਨ੍ਹਾਂ ਨੇ ਸਾਨੂੰ ਕਿਸੇ ਹੋਰ ਲਾਸ਼ ਜਾਂ ਜ਼ਖਮੀ ਦੇ ਕੋਈ ਸੰਕੇਤ ਨਹੀਂ ਦਿੱਤੇ ਪਰ ਅਸੀਂ 100 ਫ਼ੀਸਦੀ ਪੱਕਾ ਨਹੀਂ ਕਹਿ ਸਕਦੇ ਕਿ ਅਸੀਂ ਮਲਬਾ ਪੂਰੀ ਤਰ੍ਹਾਂ ਸਾਫ ਕਰ ਦਿੱਤਾ ਹੈ। ਹੰਗਾਮੀ ਹਾਲਤਾਂ ਦੀਆਂ ਸੇਵਾਵਾਂ ਰਾਹੀਂ ਘਟਨਾ ਵਾਲੇ ਸਥਾਨ ਤੋਂ ਦੁਰਘਟਨਾਗ੍ਰਸਤ ਇੰਜਨ ਤੇ ਡੱਬੇ ਹਟਾਉਣ ਦਾ ਕੰਮ ਵੀ ਜਾਰੀ ਹੈ। ਅੱਗ ਬੁਝਾਊ ਦਸਤੇ ਅਤੇ ਪੁਲਿਸ ਦੇ ਸੈਂਕੜੇ ਕਰਮਚਾਰੀ ਰੇਲ ਗੱਡੀਆਂ 'ਚ ਫਸੇ ਮੁਸਾਫਿਰਾਂ ਨੂੰ ਬਾਹਰ ਕੱਢਣ ਲਈ ਰਾਹਤ ਕਾਰਜਾਂ 'ਚ ਲੱਗੇ ਹੋਏ ਹਨ। ਸੂਤਰਾਂ ਮੁਤਾਬਿਕ ਜ਼ਖਮੀਆਂ 'ਚ ਕਈ ਫਰਾਂਸ ਤੇ ਸਪੇਨ ਦੇ ਨਾਗਰਿਕ ਵੀ ਸਫਰ ਕਰ ਰਹੇ ਸਨ ਪਰ ਉਹ ਜ਼ਿਆਦਾ ਜ਼ਖਮੀਂ ਨਹੀਂ ਹੋਏ। ਪੋਲੈਂਡ ਦੇ ਪ੍ਰਧਾਨ ਮੰਤਰੀ ਡੋਨਾਲਡ ਟਸਕ ਆਪਣੇ ਤਿੰਨ ਮੰਤਰੀ ਮੰਡਲ ਦੇ ਸਾਥੀਆਂ ਨਾਲ ਘਟਨਾ ਵਾਲੀ ਥਾਂ 'ਤੇ ਗਏ। ਦੋਵਾਂ ਰੇਲ ਗੱਡੀਆਂ 'ਚ ਕੁੱਲ ਮਿਲਾ ਕੇ 350 ਮੁਸਾਫਿਰ ਸਫਰ ਕਰ ਰਹੇ ਸਨ। ਇਹ ਦੁਰਘਟਨਾ ਸ਼ਜੁਸਜੋਸਿਨੀ ਸ਼ਹਿਰ 'ਚ ਵਾਰਸਾ-ਕਾਰਕੋ ਰੇਲ ਪੱਟੜੀ 'ਤੇ ਰਾਤ ਸਵਾ ਨੌ ਵਜੇ ਹੋਈ ਅਧਿਕਾਰੀਆਂ ਅਨੁਸਾਰ ਟੱਕਰ ਦਾ ਕਾਰਨ ਦੋਵਾਂ 'ਚ ਇਕ ਰੇਲ ਗੱਡੀ ਦੀ ਗਲਤ ਟ੍ਰੈਕ 'ਤੇ ਆ ਜਾਣਾ ਹੈ।

ਬੰਗਾ ਲਾਗੇ ਸੜਕ ਹਾਦਸੇ 'ਚ ਵਿਧਾਇਕ ਦੀ ਪਤਨੀ ਸਮੇਤ ਤਿੰਨ ਫਟੱੜ

ਬੰਗਾ ਲਾਗੇ ਸੜਕ ਹਾਦਸੇ 'ਚ ਵਿਧਾਇਕ ਰਾਣਾ ਕੇ. ਪੀ ਸਿੰਘ ਦੀ ਹਾਦਸਾ ਗ੍ਰਸਤ
ਗੱਡੀ ਅਤੇ ਕਾਰ।

ਬੰਗਾ, 4 ਮਾਰਚ-ਬੰਗਾ ਲਾਗੇ ਪੈਂਦੇ ਪਿੰਡ ਢਾਹਾਂ ਵਿਖੇ ਮੁੱਖ ਮਾਰਗ ਤੇ ਗੁਰੂ ਨਾਨਕ ਮਿਸ਼ਨ ਹਸਪਤਾਲ ਢਾਹਾਂ ਨੇੜੇ ਦੋ ਗੱਡੀਆਂ ਦੀ ਜਬਰਦਸਤ ਟੱਕਰ 'ਚ ਨੰਗਲ ਦੇ ਵਿਧਾਇਕ ਰਾਣਾ ਕੇ. ਪੀ ਸਿੰਘ ਦੀ ਗੱਡੀ ਪਲਟ ਗਈ ਜਿਸ ਕਾਰਨ ਉਨ੍ਹਾਂ ਦੀ ਪਤਨੀ ਸ੍ਰੀਮਤੀ ਸ਼ਸ਼ੀ ਰਾਣਾ, ਪੁੱਤਰੀ ਮਨੀਸ਼ ਰਾਣਾ ਅਤੇ ਗੰਨਮੈਨ ਜੀਵਨ ਕੁਮਾਰ ਜ਼ਖ਼ਮੀ ਹੋ ਗਏ। ਵਿਧਾਇਕ ਦੀ ਗੱਡੀ ਪੀ. ਬੀ. 12 ਯੂ. ਜੇ 7800 ਜੋ ਚੰਡੀਗੜ੍ਹ ਤੋਂ ਅੰਮ੍ਰਿਤਸਰ ਜਾ ਰਹੀ ਸੀ, ਜਿਸ ਨਾਲ ਸਿਟੀ ਹਾਂਡਾ ਕਾਰ ਪੀ. ਬੀ. 09 ਡੀ. 9675 ਟਕਰਾ ਗਈ। ਬੰਗਾ ਪੁਲਿਸ ਨੇ ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਬੰਗਾ ਦਾਖਿਲ ਕਰਵਾਇਆ ਅਤੇ ਬਾਅਦ 'ਚ ਸਿਵਲ ਹਸਪਤਾਲ ਰੋਪੜ ਰੈਫਰ ਕਰ ਦਿੱਤਾ ਗਿਆ। ਬੰਗਾ ਥਾਣੇ 'ਚ ਵਿਧਾਇਕ ਦੀ ਗੱਡੀ ਦੇ ਡਰਾਇਵਰ ਗੁਰਮੁੱਖ ਸਿੰਘ ਪੁੱਤਰ ਪਰਮਾ ਨੰਦ ਵਾਸੀ ਬੜਵਾ ਨੂਰਪੁਰ ਬੇਦੀ ਦੇ ਬਿਆਨਾਂ 'ਤੇ ਸਿਟੀ ਹਾਂਡਾ ਕਾਰ ਦੇ ਡਰਾਇਵਰ ਸੁਖਦੀਪ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਨਿਵਾਸੀ ਕਾਇਮਪੁਰਾ ਪੁਰਾਣੀ ਸਬਜ਼ੀ ਮੰਡੀ ਕਪੂਰਥਲਾ ਦੇ ਖਿਲਾਫ ਮੁਕੱਦਮਾ ਨੰ. 29 ਧਾਰਾ 279, 337, 427 ਅਧੀਨ ਮਾਮਲਾ ਦਰਜ ਕਰ ਲਿਆ। ਕਾਰ ਦਾ ਡਰਾਇਵਰ ਮੌਕੇ ਤੇ ਫਰਾਰ ਹੋ ਗਿਆ। ਘਟਨਾ ਸਥਾਨ ਦਾ ਥਾਣਾ ਮੁੱਖੀ ਜੀਵਨ ਕੁਮਾਰ ਕਾਲੀਆ ਨੇ ਜਾਇਜ਼ਾ ਲਿਆ।

ਤਲਵਾਰ ਦੇ ਹਮਲੇ 'ਚ ਪਿਓ ਦੀ ਮੌਤ ਬੇਟਾ ਜ਼ਖ਼ਮੀ

ਮ੍ਰਿਤਕ ਜਸਬੀਰ ਸਿੰਘ ਦੇ ਲੜਕੇ ਅਮਨਪ੍ਰੀਤ ਤੇ ਰਵਿੰਦਰ ਹਮਲਾਵਰਾਂ ਵੱਲੋਂ ਛਾਤੀ
ਕੀਤੇ ਵਾਰ ਦਿਖਾਉਂਦੇ ਹੋਏ।

ਡੇਰਾਬਸੀ. 4 ਮਾਰਚ ૿ ਘਰ ਦੇ ਬਾਹਰ ਗਮਲੇ ਰੱਖਣ ਨੂੰ ਲੈ ਕੇ ਦੋ ਗੁਆਢੀਆਂ ਵਿਚਾਲੇ ਹੋਏ ਝਗੜੇ 'ਚ ਇਕ ਮੌਤ ਹੋ ਗਈ। ਮਾਮਲਾ ਡੇਰਾਬਸੀ 'ਚ ਬਰਵਾਲਾ ਰੋਡ ਸਥਿਤ ਚੰਡੀਗੜ੍ਹ ਅਪਾਰਟਮੈਂਟ ਵਿਖੇ ਫਲੈਟ ਨੰਬਰ 104 'ਚ ਰਾਮਗੜ੍ਹ ਭੁੱਡਾ ਵਾਸੀ ਜਸਬੀਰ ਸਿੰਘ ਦਾ ਪਰਿਵਾਰ ਹੈ ਤੇ ਉਨ੍ਹਾਂ ਦੇ ਗਵਾਂਢ 'ਚ 110 ਨੰਬਰ ਫਲੈਟ ਜਸਵੰਤ ਸਿੰਘ ਦਾ ਹੈ। ਬੀ. ਬੀ. ਏ. ਦੇ ਵਿਦਿਆਰਥੀ ਅਮਨਪ੍ਰੀਤ ਸਿੰਘ ਪੁੱਤਰ ਜਸਬੀਰ ਸਿੰਘ ਨੇ ਦੋਸ਼ ਲਾਇਆ ਕਿ ਜਸਵੰਤ ਦੇ ਪਰਿਵਾਰ ਵਾਲੇ ਅਕਸਰ ਉਨ੍ਹਾਂ ਦੇ ਘਰ ਦੇ ਬਾਹਰ ਵੀ ਗਮਲੇ ਰੱਖ ਜਾਂਦੇ ਸਨ ਜਿਸ ਕਾਰਨ ਉਨ੍ਹਾਂ ਨੂੰ ਗੱਡੀਆਂ ਕੱਢਣ 'ਚ ਮੁਸ਼ਕਿਲ ਪੇਸ਼ ਆਉਂਦੀ ਸੀ। ਸ਼ਾਮ ਨੂੰ ਕਰੀਬ 5 ਵਜੇ ਅਮਨਪ੍ਰੀਤ ਨੇ ਆਪਣੇ ਛੋਟੇ ਭਾਈ ਰਵਿੰਦਰ ਦੇ ਨਾਲ ਗਮਲੇ ਇਕ ਪਾਸੇ ਕਰਦਿਆਂ ਹੋਇਆ ਇਤਰਾਜ਼ ਜਤਾਇਆ ਤਾਂ ਜਸਵੰਤ ਦੇ ਲੜਕੇ ਕਸ਼ਮੀਰ ਸਿੰਘ ਅਤੇ ਲਖਬੀਰ ਸਿੰਘ ਨੇ ਬੇਰਹਿਮੀ ਨਾਲ ਉਨ੍ਹਾਂ ਦੇ ਪਿਤਾ ਅਤੇ ਉਨ੍ਹਾਂ 'ਤੇ ਤਲਵਾਰਾਂ ਨਾਲ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਨ੍ਹਾਂ ਦੇ ਪਿਤਾ ਜਸਬੀਰ ਸਿੰਘ ਦੀ ਮੌਤ ਹੋ ਗਈ ਅਤੇ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ। ਉਸ ਨੇ ਦੱਸਿਆ ਕਿ ਕਸ਼ਮੀਰ ਦੀ ਮਾਤਾ ਮਹਿੰਦਰ ਕੌਰ ਅਤੇ ਉਸ ਦੀ ਪਤਨੀ ਪੂਜਾ ਵੀ ਡੰਡੇ ਲੈ ਕੇ ਉਨ੍ਹਾਂ ਦੇ ਘਰ 'ਚ ਆ ਵੜੇ ਅਤੇ ਅਮਨਪ੍ਰੀਤ ਦੀ ਮਾਂ ਅਤੇ ਭੈਣ ਨਾਲ ਕੁੱਟ ਮਾਰ ਕੀਤੀ। ਡੇਰਾਬਸੀ ਪੁਲਿਸ ਨੇ ਅਮਨਪ੍ਰੀਤ ਦੇ ਬਿਆਨ ਉਤੇ ਹਮਲਾਵਰਾਂ 'ਚ ਦੋ ਭਰਾਵਾਂ ਕਸ਼ਮੀਰ ਅਤੇ ਲਖਬੀਰ, ਲਖਬੀਰ ਦੀ ਪਤਨੀ ਪੂਜਾ ਅਤੇ ਮਾਂ ਮਹਿੰਦਰ ਕੌਰ ਦੇ ਖਿਲਾਫ ਆਈ. ਪੀ. ਸੀ. 302,307,324,452 ਅਤੇ 34 ਦੇ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਹਮਲਾਵਰ ਪਰਿਵਾਰ ਫਰਾਰ ਦੱਸਿਆ ਗਿਆ ਹੈ।

ਮਾਮਲਾ ਪੀ. ਏ. ਯੂ. 201 ਝੋਨੇ ਦਾ
ਸੀ. ਬੀ. ਆਈ. ਵੱਲੋ ਐੱਫ. ਸੀ. ਆਈ. ਦੇ ਗੁਦਾਮਾਂ 'ਚ ਛਾਪੇ

ਸੀ. ਬੀ. ਆਈ. ਟੀਮ ਵੱਲੋਂ ਭਾਰਤੀ ਖੁਰਾਕ ਨਿਗਮ ਦੇ ਰਾਮਪੁਰਾ ਫੂਲ
ਵਿਖੇ ਗੁਦਾਮਾਂ 'ਚ ਛਾਪੇ।

ਰਾਮਪੁਰਾ ਫੂਲ, 4 ਮਾਰਚ- ਹਾਈਕੋਰਟ ਦੇ ਹੁਕਮਾਂ 'ਤੇ ਸੀ. ਬੀ. ਆਈ. ਵੱਲੋਂ ਭਾਰਤੀ ਖੁਰਾਕ ਨਿਗਮ ਦੇ ਗੁਦਾਮਾਂ 'ਤੇ ਸੀ. ਬੀ. ਆਈ. ਵੱਲੋਂ ਛਾਪੇ ਮਾਰੇ ਗਏ ਹਨ। ਮਾਮਲਾ ਝੋਨੇ ਦੀ 201 ਕਿਸਮ ਦੇ ਚੌਲ ਲਗਾਉਣ ਦਾ ਹੈ। ਇਸ ਮਾਮਲੇ ਵਿਚ ਸ਼ਿਕਾਇਤ ਕਰਤਾ ਦੀ ਅਪੀਲ 'ਤੇ ਪਹਿਲਾਂ ਹੀ ਹਾਈਕੋਰਟ ਦੇ ਨਿਰਦੇਸ਼ਾਂ 'ਤੇ ਚੌਲਾਂ ਦੇ 252 ਨਮੂਨੇ ਸੀ. ਬੀ. ਆਈ ਵੱਲੋਂ ਲਏ ਗਏ ਸਨ। ਭਾਂਵੇ ਉਹ ਨਮੂਨੇ ਨਿਰਧਾਰਿਤ ਮਾਪਦੰਡਾਂ 'ਤੇ ਪੜਤਾਲ ਵਿਚ ਸਹੀ ਦੱਸੇ ਜਾ ਰਹੇ ਹਨ ਪਰ ਸ਼ਿਕਾਇਤ ਕਰਤਾ ਨੇ ਮਾਨਯੋਗ ਅਦਾਲਤ ਵਿਚ ਥੈਲਿਆਂ ਨੂੰ ਲੱਗੇ ਧਾਗੇ ਦਾ ਰੰਗ ਬਾਰੇ ਜਾਣਕਾਰੀ ਦੇ ਕੇ ਦੱਸਿਆ ਕਿ ਇਹ ਚੌਲ ਪਿਛਲੇ ਸਾਲ ਦੀ ਥਾਂ ਨਵੇਂ ਸਾਲ ਦਾ ਹੈ। ਛਾਪੇਮਾਰੀ ਪਾਰਦਰਸ਼ੀ ਢੰਗ ਨਾਲ ਕਰਨ ਲਈ ਛਾਪੇਮਾਰ ਟੀਮ ਵੱਲੋਂ ਵੀਡੀਗ੍ਰਾਫੀ ਕੀਤੀ ਜਾ ਰਹੀ ਹੈ। ਟੀਮ ਵੱਲੋਂ 15 ਗੁਦਾਮਾਂ ਵਿਚ ਲੱਗੇ ਚੌਲਾਂ ਨੂੰ ਡੂੰਘਾਈ ਨਾਲ ਖੰਗਾਲਿਆ ਜਾ ਰਿਹਾ ਹੈ। ਦੱਸਣਾ ਬਣਦਾ ਹੈ ਕਿ ਪਿਛਲੇ ਸਮੇਂ ਪੀ. ਏ. ਯੂ. ਝੋਨੇ ਦੀ ਛੜਾਈ ਦੌਰਾਨ ਚੌਲਾਂ ਦੀ ਕੁਆਲਿਟੀ ਮਾੜੀ ਬਣਨ ਦੀ ਸ਼ਿਕਾਇਤ ਸ਼ੈਲਰ ਮਾਲਕਾਂ ਵੱਲੋਂ ਕੀਤੀ ਗਈ ਸੀ। ਇਸ 'ਤੇ ਉਨ੍ਹਾਂ ਨੇ ਸੰਘਰਸ਼ ਵੀ ਛੇੜਿਆ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਪੀ ਏ ਯੂ 201 ਕਿਸਮ ਦੇ ਝੋਨਾ ਕੁਆਲਟੀ ਪੱਖੋ ਮਾੜਾ ਸੀ ਤੇ ਚਾਵਲ ਦੀ ਡੈਮੇਜ, ਡਿਸਕਲਰ ਅਤੇ ਬਰੋਕਨ ਜਿਆਦਾ ਹੋਣ ਕਾਰਨ ਸਨਅਤਕਾਰ ਇਸ ਝੋਨੇ ਦੀ ਮਿਲਿੰਗ ਕਰਨ ਨੂੰ ਤਿਆਰ ਨਹੀ ਸਨ। ਜਿਸ ਨਾਲ ਸਰਕਾਰ ਨੇ ਸਹਿਮਤ ਹੁੰਦਿਆਂ ਸ਼ੈਲਰ ਮਾਲਕਾਂ ਨੂੰ 200 ਰੁਪਏ ਪ੍ਰਤੀ ਕੁਇੰਟਲ ਦੇ ਹਿਸਾਬ ਨਾਲ ਰਿਆਇਤ ਦੇ ਦਿੱਤੀ ਸੀ। ਇਸ ਦੇ ਬਾਵਜੂਦ ਸ਼ਿਕਾਇਤ ਕੀਤੀ ਜਾ ਰਹੀ ਹੈ ਕਿ ਸ਼ੈਲਰ ਮਾਲਕਾਂ ਨੂੰ ਚੌਲਾਂ ਦੀ ਅਪਗ੍ਰੇਡੇਸ਼ਨ ਨਹੀਂ ਕੀਤੀ ਅਤੇ ਗੁਦਾਮਾਂ ਵਿਚ ਨਵਾਂ ਮਾਲ ਲਗਾ ਦਿੱਤਾ। ਦੋਸ਼ ਲਗਾਏ ਜਾ ਰਹੇ ਹਨ ਕਿ ਉਸ ਵਕਤ ਗੋਦਾਮਾਂ ਵਿੱਚ ਲਗਾਏ ਗਏ ਚਾਵਲਾਂ ਦੇ ਥੈਲਿਆਂ ਨੂੰ ਲਾਲ ਰੰਗ ਦਾ ਧਾਗਾ ਲੱਗਿਆਂ ਹੋਇਆ ਸੀ ਜਦ ਕਿ ਅਗਲੇ ਸਾਲ ਇਸ ਧਾਗੇ ਦਾ ਰੰਗ ਨੀਲਾ ਕਰ ਦਿੱਤਾ ਗਿਆ ਸੀ। ਦੋਸ਼ ਲਗਾਏ ਜਾ ਰਹੇ ਹਨ ਕਿ ਸ਼ੈਲਰ ਵਾਲਿਆਂ ਨੇ ਵਿਭਾਗੀ ਅਧਿਕਾਰੀਆ ਨਾਲ ਮਿਲ ਕੇ ਕਥਿਤ ਤੌਰ 'ਤੇ ਘਟੀਆ ਦਰਜੇ ਦਾ ਨਵਾਂ ਚੌਲ ਡਿਪੂਆਂ ਵਿੱਚ ਲਗਾ ਦਿੱਤਾ ਅਤੇ 54 ਹਜ਼ਾਰ ਰੁਪਏ ਗੱਡੀ ਦੇ ਹਿਸਾਬ ਨਾਲ ਸਰਕਾਰ ਦਾ ਕਰੋੜਾਂ ਰੁਪਈਆ ਛੱਕ ਲਿਆ। ਸੂਤਰਾ ਅਨੁਸਾਰ ਇੱਥੇ ਮਿੱਲਰਾਂ ਵੱਲੋਂ ਪੀ ਏ ਯੂ 201 ਕਿਸਮ ਝੋਨੇ ਦੀ ਚਾਰ ਹਜ਼ਾਰ ਗੱਡੀ ਮਾਲ ਭਾਰਤੀ ਖੁਰਾਕ ਨਿਗਮ ਕੋਲ ਸਟਾਕ ਕੀਤਾ ਗਿਆ ਸੀ ਜਿਸ ਵਿੱਚੋ ਦੋ ਹਜ਼ਾਰ ਗੱਡੀ ਚੌਲ ਹੋਰਨਾਂ ਰਾਜਾਂ ਨੂੰ ਭੇਜਿਆਂ ਵੀ ਜਾ ਚੁੱਕਾ ਹੈ। ਛਾਪਾ ਮਾਰ ਟੀਮ ਨੇ ਇਹ ਆਖ ਕੇ ਕੁਝ ਵਿਚ ਜਾਣਕਾਰੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਕਿ ਰਿਪੋਰਟ ਅਦਾਲਤ ਵਿਚ ਪੇਸ਼ ਕੀਤੀ ਜਾਵੇਗੀ।

ਮਲਕੀਤ ਸਿੰਘ ਨੇ ਸ੍ਰੀ ਹਰਿਮੰਦਰ ਸਾਹਿਬ ਮੱਥਾ ਟੇਕਿਆ

ਮਲਕੀਤ ਸਿੰਘ ਸ੍ਰੀ ਹਰਿਮੰਦਰ ਸਾਹਿਬ ਮੱਥਾ ਟੇਕਣ ਸਮੇਂ। ਉਨ੍ਹਾਂ ਨਾਲ ਸ: ਸਰਬਜੀਤ
ਸਿੰਘ ਤੇ ਹੋਰ ਵੀ ਨਜ਼ਰ ਆ ਰਹੇ ਹਨ।

ਅੰਮ੍ਰਿਤਸਰ, 4 ਮਾਰਚ -ਪੰਜਾਬੀ ਲੋਕ ਗਾਇਕ ਮਲਕੀਤ ਸਿੰਘ ਅੱਜ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਮੱਥਾ ਟੇਕਿਆ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ: ਮਲਕੀਤ ਸਿੰਘ ਨੇ ਕਿਹਾ ਕਿ ਸ੍ਰੀ ਹਰਿਮੰਦਰ ਸਾਹਿਬ ਆ ਕੇ ਉਨ੍ਹਾਂ ਨੂੰ ਸ਼ਾਂਤੀ ਮਿਲਦੀ ਹੈ ਅਤੇ ਉਹ ਜਦ ਵੀ ਪੰਜਾਬ ਆਉਂਦੇ ਹਨ ਗੁਰੂ ਘਰ ਵਿਖੇ ਜ਼ਰੂਰ ਨਤਮਸਤਕ ਹੁੰਦੇ ਹਨ। ਮਲਕੀਤ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦੀ ਨਵੀਂ ਧਾਰਮਿਕ ਐਲਬਮ ਜੋ ਵਿਸਾਖੀ 'ਤੇ ਆ ਰਹੀ ਹੈ ਜਿਸ ਦੀ ਰਿਕਾਰਡਿੰਗ ਅੱਜ ਮੁਕੰਮਲ ਹੋਣ 'ਤੋਂ ਬਾਅਦ ਸ਼ੁਕਰਾਨੇ ਵਜੋਂ ਇੱਥੇ ਮੱਥਾ ਟੇਕਣ ਆਏ ਹਨ। ਉਨ੍ਹਾਂ ਕਿਹਾ ਕਿ ਬਾਲੀਵੁੱਡ 'ਚ ਤਾਂ ਪੰਜਾਬੀ ਸੰਗੀਤ ਨੂੰ ਕਾਫ਼ੀ ਲੰਬੇ ਸਮੇਂ 'ਤੋਂ ਪਸੰਦ ਕੀਤਾ ਜਾ ਰਿਹਾ ਸੀ ਹੁਣ ਹਾਲੀਵੁਡ 'ਚ ਵੀ ਪੰਜਾਬੀ ਸੰਗੀਤ ਦਾ ਬੋਲਬਾਲਾ ਹੋਣ ਲੱਗ ਪਿਆ ਹੈ।

ਚੰਡੀਗੜ੍ਹ ਦੇ ਗੋਲਫ਼ ਕਲੱਬ 'ਚ ਫ਼ਨਕਾਰਾਂ ਨੇ ਲਾਈਆਂ ਰੌਣਕਾਂ

ਚੰਡੀਗੜ੍ਹ ਪੁੱਜੇ ਅਭਿਨੇਤਾ ਸੰਨੀ ਦਿਓਲ, ਸੰਜੇ ਦੱਤ, ਅਭਿਨੇਤਰੀ ਕਿਰਨ ਖੇਰ, ਅਭੈ
ਦਿਓਲ ਅਤੇ ਨੀਰੂ ਬਾਜਵਾ।

ਚੰਡੀਗੜ੍ਹ. 4 ਮਾਰਚ ૿ ਅੱਜ ਸਥਾਨਕ ਗੋਲਫ਼ ਕਲੱਬ ਵਿਖੇ 'ਆਈ.ਜੀ. ਪੁਲਿਸ ਗੋਲਫ ਟੂਰਨਾਮੈਂਟ' ਦੇ ਮੌਕੇ 'ਤੇ ਫ਼ਿਲਮੀ ਖੇਤਰ ਨਾਲ ਜੁੜੇ ਫ਼ਨਕਾਰਾਂ ਮਿਲ ਕੇ ਖੂਬ ਰੌਣਕਾਂ ਲਾਈਆਂ। ਇਨ੍ਹਾਂ ਵਿਚ ਬਾਲੀਵੁੱਡ ਦੇ ਉੱਘੇ ਅਦਾਕਰਾਂ ਸੰਨੀ ਦਿਓਲ, ਸੰਜੇ ਦੱਤ, ਅਭੈ ਦਿਓਲ, ਹਰਭਜਨ ਮਾਨ, ਲਖਵਿੰਦਰ ਬਡਾਲੀ, ਕਿਰਨ ਖੇਰ, ਨੀਰੂ ਬਾਜਵਾ ਆਦਿ ਜਿਥੇ ਦਰਸ਼ਕਾਂ ਦੇ ਸਨਮੁੱਖ ਹੋਏ ਉਥੇ ਅਭਿਨੇਤਰੀ ਕਿਰਨ ਖੇਰ ਦੇ ਬੇਟੇ ਸਿਕੰਦਰ ਖੇਰ ਤੋਂ ਇਲਾਵਾ ਉਡਣਾ ਸਿੱਖ ਮਿਲਖਾ ਸਿੰਘ, ਜੀਵ ਮਿਲਖਾ ਸਿੰਘ, ਗੋਲਫਰ ਹਰਮੀਤ ਕਾਹਲੋਂ ਆਦਿ ਨੇ ਵੀ ਸ਼ਿਰਕਤ ਕੀਤੀ। ਇਸ ਅਵਸਰ 'ਤੇ ਚੰਡੀਗੜ੍ਹ ਪੁਲਿਸ ਦੇ ਆਈ.ਜੀ. ਸ੍ਰੀ ਪ੍ਰਦੀਪ ਸ੍ਰੀਵਾਸਤਵਾ ਅਤੇ ਚੰਡੀਗੜ੍ਹ ਪੁਲਿਸ ਦੇ ਐੱਸ.ਐੱਸ.ਪੀ. ਨੌਨਿਹਾਲ ਸਿੰਘ ਸਮੇਤ ਹੋਰ ਵੀ ਨਾਮੀ ਸਖਸ਼ੀਅਤਾਂ ਸਮਾਰੋਹ 'ਚ ਪੁੱਜੀਆਂ। ਇਸ ਮੌਕੇ 'ਤੇ ਸੰਨੀ ਦਿਓਲ ਨੇ ਕਿਹਾ ਕਿ ਉਸ ਨੂੰ ਵਾਰ-ਵਾਰ ਪੰਜਾਬ ਆਉਣਾ ਚੰਗਾ ਲੱਗਦੈ, ਕਿਉਂ ਜੋ ਆਪਣੀ ਮਿੱਟੀ ਨਾਲ ਜੁੜ ਕੇ ਇਕ ਵੱਖਰਾ ਹੀ ਸਕੂਨ ਮਿਲਦੈ। ਸੰਜੇ ਦੱਤ ਨੇ ਕਿਹਾ ਕਿ ਉਹ ਫ਼ਿਲਮ 'ਸਨ ਆਫ ਪੰਜਾਬ' ਦੀ ਸ਼ੂਟਿੰਗ ਦੇ ਸਿਲਸਿਲੇ 'ਚ ਨਿਰੰਤਰ ਪੰਜਾਬ ਨਾਲ ਜੁੜੇ ਹੋਏ ਹਨ ਤੇ ਇਥੋਂ ਦੇ ਲੋਕਾਂ 'ਚ ਵਿਚਰਨਾ ਬਹੁਤ ਚੰਗਾ ਲੱਗ ਰਿਹੈ। ਇਸ ਮੌਕੇ 'ਤੇ ਅਦਾਕਾਰ ਅਤੇ ਗਾਇਕ ਹਰਭਜਨ ਮਾਨ ਨੇ ਆਪਣੇ ਵਧੀਆ ਲਹਿਜ਼ੇ ਵਿਚ ਆਪਣੀ ਗਾਇਕੀ ਪੇਸ਼ ਕਰਕੇ ਵੀ ਚੰਗੀ ਰੌਣਕ ਲਾਈ। ਗਾਇਕ ਤੇ ਅਦਾਕਾਰ ਲਖਵਿੰਦਰ ਬਡਾਲੀ ਨੇ ਕਿਹਾ ਕਿ ਅੱਜ ਦੇ ਸਮਾਰੋਹ 'ਚ ਉਸ ਨੂੰ ਬਹੁਤ ਕੁਝ ਸਿੱਖਣ ਨੂੰ ਮਿਲਿਆ ਹੈ। ਅਭਿਨੇਤਰੀ ਕਿਰਨ ਖੇਰ ਨੇ ਕਿਹਾ ਕਿ ਚੰਡੀਗੜ੍ਹ ਉਸ ਦਾ ਸ਼ਹਿਰ ਹੈ ਤੇ ਆ ਕੇ ਉਸ ਦੇ ਜ਼ਹਿਨ 'ਚ ਪੁਰਾਣੀਆਂ ਯਾਦਾਂ ਤਾਜ਼ਾ ਹੋ ਜਾਂਦੀਆਂ ਨੇ। ਨੀਰੂ ਬਾਜਵਾ ਨੇ ਕਿਹਾ ਕਿ ਪੰਜਾਬੀਆਂ ਦਾ ਜੋ ਭਰਪੂਰ ਹੁੰਗਾਰਾ ਉਸ ਦੀਆਂ ਫ਼ਿਲਮਾਂ ਨੂੰ ਮਿਲ ਰਿਹਾ ਉਸ ਲਈ ਉਹ ਸਦਾ ਰਿਣੀ ਰਹੇਗੀ।

ਪਰਾਗਪੁਰ 'ਚ 'ਜੈਨ ਅਡਵਾਈਜ਼ਰ' ਖੇਤੀ ਮੇਲਾ 7 ਤੋਂ

ਕਿਸਾਨ ਮੇਲੇ ਬਾਰੇ ਜਾਣਕਾਰੀ ਦੇਣ ਸਮੇਂ ਮੁੱਖ ਪ੍ਰਬੰਧਕ ਝਰਮਲ ਸਿੰਘ, ਰਣਜੀਤ
ਟੁੱਟ ਤੇ ਹੋਰ।

ਜਲੰਧਰ, 4 ਮਾਰਚ -ਕਿਸਾਨੀ ਦੇ ਵਿਕਾਸ ਦੇ ਮਨੋਰਥ ਨਾਲ ਅਡਵਾਈਜ਼ਰ ਪਬਲੀਕੇਸ਼ਨਜ਼ ਵੱਲੋਂ ਪਿੰਡ ਪਰਾਗਪੁਰ, ਜੀ. ਟੀ. ਰੋਡ ਜਲੰਧਰ ਵਿਖੇ 7, 8 ਅਤੇ 9 ਮਾਰਚ ਨੂੰ ਦੂਸਰਾ ਜੈਨ-ਅਡਵਾਈਜ਼ਰ ਖੇਤੀ ਮੇਲਾ 2012 ਕਰਵਾਇਆ ਜਾ ਰਿਹਾ ਹੈੇ। ਅੱਜ ਪ੍ਰੈੱਸ ਕਾਨਫਰੰਸ ਦੌਰਾਨ ਮੁੱਖ ਮੇਲਾ ਪ੍ਰਬੰਧਕ ਝਰਮਲ ਸਿੰਘ ਨੇ ਦੱਸਿਆ ਕਿ ਪਹਿਲੇ ਦਿਨ ਵੱਖ-ਵੱਖ ਖੇਤਰਾਂ ਵਿਚ ਯੋਗਦਾਨ ਪਾਉਣ ਵਾਲੀਆਂ 7 ਸ਼ਖਸੀਅਤਾਂ ਦਾ ਸਨਮਾਨ ਹੋਵੇਗਾ। ਮੇਲੇ ਦੇ ਅਖੀਰਲੇ ਦਿਨ 9 ਕਿਸਾਨਾਂ ਨੂੰ ਖੇਤੀ ਵਿਭਿੰਨਤਾ, ਬਾਗਬਾਨੀ ਅਤੇ ਡੇਅਰੀ ਵਿਚ ਜੈਨ ਅਡਵਾਈਜ਼ਰ ਕਿਸਾਨ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਮੇਲੇ ਮੌਕੇ ਸਮਾਜ ਸੇਵਾ ਦੇ ਖੇਤਰ ਵਿਚ ਯੋਗਦਾਨ ਪਾਉਣ ਲਈ ਡੁਬਈ ਦੇ ਉੱਘੇ ਕਾਰੋਬਾਰੀ ਤੇ ਸਮਾਜ ਸੇਵੀ ਸ: ਐਸ. ਪੀ. ਸਿੰਘ ਉਬਰਾਏ ਨੂੰ 'ਭਾਰਤੀਆਂ ਦਾ ਮਾਣ' ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਇੰਗਲੈਂਡ ਵਿਚ ਰਹਿਣ ਵਾਲੇ ਸ: ਰਾਮ ਸਿੰਘ ਢੇਸੀ ਨੂੰ 'ਧਰਤ ਸੁਹਾਵੀ' ਪੁਰਸਕਾਰ, ਪਿੰਗਲਵਾੜਾ ਅੰਮ੍ਰਿਤਸਰ ਦੀ ਮੁੱਖ ਪ੍ਰਬੰਧਕ ਡਾ: ਇੰਦਰਜੀਤ ਕੌਰ ਨੂੰ 'ਕੁਦਰਤ ਅਨਮੋਲ' ਪੁਰਸਕਾਰ, ਸਾਫ-ਸੁਥਰੀ ਗਾਇਕੀ ਲਈ ਮਨਮੋਹਨ ਵਾਰਿਸ ਨੂੰ 'ਸਾਡਾ ਵੱਸਦਾ ਰਹੇ ਪੰਜਾਬ' ਪੁਰਸਕਾਰ ਅਤੇ ਖੇਤੀ ਉਦਯੋਗ ਦੇ ਖੇਤਰ ਵਿਚ ਪਾਏ ਸ਼ਾਨਦਾਰ ਯੋਗਦਾਨ ਬਦਲੇ ਨਿਊ ਹਾਲੈਂਡ ਟਰੈਕਟਰ ਨੂੰ 'ਐਕਸੀਲੈਂਸ ਇਨ ਐਗਰੋ ਇੰਡਸਟਰੀਜ਼' ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। ਖੇਤੀ ਸਾਹਿਤ ਨੂੰ ਸਮਰਪਿਤ ਸ਼ਖਸੀਅਤ ਡਾ: ਰਣਜੀਤ ਸਿੰਘ ਨੂੰ ਉਮਰ ਭਰ ਦੀਆਂ ਪ੍ਰਾਪਤੀਆਂ ਲਈ 'ਖੇਤੀ ਵਿਕਾਸ ਪੁਰਸਕਾਰ' ਦਿੱਤਾ ਜਾਵੇਗਾ। ਇਸ ਦੇ ਨਾਲ ਹੀ ਖੇਤੀ ਉਦਯੋਗ ਵਿਚ ਉਮਰ ਭਰ ਦੇ ਯੋਗਦਾਨ ਲਈ ਅਖਤਿਆਰ ਐਗਰੋ ਕਿੰਗ ਦੇ ਸੰਸਥਾਪਕ ਸ: ਸਾਧੂ ਸਿੰਘ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਜਾਵੇਗਾ। ਮੇਲੇ ਨੂੰ ਕਰਵਾਉਣ ਵਿਚ ਅਹਿਮ ਯੋਗਦਾਨ ਪਾਉਣ ਵਾਲੀ ਸ਼ਖਸੀਅਤ ਸ: ਗੁਰਦੀਪ ਸਿੰਘ ਸੈਂਹਬੀ ਮੋਗਾ (ਅਮਰੀਕਾ) ਦਾ ਵਿਸ਼ੇਸ਼ ਸਨਮਾਨ ਹੋਵੇਗਾ। 9 ਮਾਰਚ ਨੂੰ ਖੇਤੀ ਵਿਭਿੰਨਤਾ ਵਿਚ ਗੁਰਦਿਆਲ ਸਿੰਘ ਪਿੰਡ ਰਾਏਪੁਰ ਕਲਾਂ ਜ਼ਿਲ੍ਹਾ ਅੰਮ੍ਰਿਤਸਰ, ਸੁਖਦੇਵ ਸਿੰਘ ਬੈਂਸ ਪਿੰਡ ਸ਼ਾਦੀਪੁਰ ਤਹਿਸੀਲ ਫਿਲੌਰ, ਜ਼ਿਲ੍ਹਾ ਜਲੰਧਰ ਅਤੇ ਮਨਦੀਪ ਕੁਮਾਰ ਪਿੰਡ ਢੋਲੇਵਾਲ ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ ਨੂੰ ਸਨਮਾਨਿਤ ਕੀਤਾ ਜਾਵੇਗਾ। ਬਾਗਬਾਨੀ ਦੇ ਖੇਤਰ ਵਿਚ ਸ: ਰਾਜਿੰਦਰ ਸਿੰਘ ਧਰਾਂਗਵਾਲਾ ਜ਼ਿਲ੍ਹਾ ਫਾਜ਼ਿਲਕਾ, ਸ: ਦਵਿੰਦਰ ਸਿੰਘ ਸੰਧੂ ਮੁਹੱਲਾ ਪ੍ਰੀਤ ਨਗਰ ਨਕੋਦਰ ਜ਼ਿਲ੍ਹਾ ਜਲੰਧਰ ਅਤੇ ਸ: ਜਗਤਾਰ ਸਿੰਘ ਬਰਾੜ ਪਿੰਡ ਮਹਿਮਾ ਸਰਜਾ ਜ਼ਿਲ੍ਹਾ ਬਠਿੰਡਾ ਦਾ ਨਾਂਅ ਸ਼ਾਮਿਲ ਹੈ। ਡੇਅਰੀ ਦੇ ਧੰਦੇ ਵਿਚ ਯੋਗਦਾਨ ਪਾਉਣ ਵਾਲਿਆਂ ਵਿਚ ਦਵਿੰਦਰ ਸਿੰਘ ਪਿੰਡ ਕਿਸ਼ਨਪੁਰਾ ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ, ਬੀਬੀ ਹਰਦੇਬ ਕੌਰ ਕੰਗ ਪਿੰਡ ਫਿੱਡੇ ਜ਼ਿਲ੍ਹਾ ਫਿਰੋਜ਼ਪੁਰ ਅਤੇ ਸ: ਯਾਦਵਿੰਦਰ ਸਿੰਘ ਪੰਨੂੰ ਪਿੰਡ ਰੂੜੇ ਆਸਲ ਤਹਿਸੀਲ ਪੱਟੀ ਜ਼ਿਲ੍ਹਾ ਤਰਨ ਤਾਰਨ ਨੂੰ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਮੇਲੇ ਵਿਚ ਉਪਰੋਕਤ ਕਿਸਾਨਾਂ ਤੋਂ ਇਲਾਵਾ ਕੁਝ ਹੋਰ ਕਿਸਾਨਾਂ ਨੂੰ ਖੇਤੀ ਅਤੇ ਸਹਾਇਕ ਧੰਦਿਆਂ ਵਿਚ ਸ਼ਲਾਘਾਯੋਗ ਕੰਮ ਬਦਲੇ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਜਾਵੇਗਾ। ਜਿਨ੍ਹਾਂ ਵਿਚ ਸ: ਭੁਪਿੰਦਰ ਸਿੰਘ ਪਿੰਡ ਮਨਸੂਰਪੁਰ ਜ਼ਿਲ੍ਹਾ ਹੁਸ਼ਿਆਰਪੁਰ (ਡੇਅਰੀ), ਸ: ਸੁਖਵਿੰਦਰ ਸਿੰਘ ਗਰੇਵਾਲ ਪਿੰਡ ਕੋਟਲੀ ਜ਼ਿਲ੍ਹਾ ਲੁਧਿਆਣਾ (ਸੂਰ ਪਾਲਣ), ਸ: ਗੁਰਪ੍ਰੀਤ ਸਿੰਘ ਪਿੰਡ ਬੂਲਪੁਰ ਤਹਿਸੀਲ ਸੁਲਤਾਨਪੁਰ ਲੋਧੀ ਜ਼ਿਲ੍ਹਾ ਕਪੂਰਥਲਾ (ਸਬਜ਼ੀਆਂ), ਸ: ਦਰਸ਼ਨ ਸਿੰਘ ਪਿੰਡ ਸੌਡਾ ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ (ਡੇਅਰੀ), ਸ: ਗੁਰਰਾਜ ਸਿੰਘ ਵਿਰਕ ਮੁਹੱਲਾ ਸੁਰਗਾਪੁਰੀ ਕੋਟਕਪੂਰਾ ਜ਼ਿਲ੍ਹਾ ਫਰੀਦਕੋਟ (ਬਾਗਬਾਨੀ) ਅਤੇ ਸ: ਜਸਪ੍ਰੀਤ ਸਿੰਘ ਪਿੰਡ ਗਾਲਿਬ ਖੁਰਦ ਜਗਰਾਓਂ ਜ਼ਿਲ੍ਹਾ ਲੁਧਿਆਣਾ (ਸਬਜ਼ੀਆਂ) ਦਾ ਨਾਂਅ ਸ਼ਾਮਿਲ ਹੈ। ਮੇਲਾ ਪ੍ਰਬੰਧਕ ਅਮਰੀਕਾ ਦੇ ਸਫਲ ਕਿਸਾਨ ਸ: ਰਣਜੀਤ ਸਿੰਘ ਟੁੱਟ ਨੇ ਦੱਸਿਆ ਕਿ ਇਹ ਸਾਡੇ ਲਈ ਬੜੀ ਖੁਸ਼ੀ ਦੀ ਗੱਲ ਹੈ ਕਿ ਜੈਨ ਅਡਵਾਈਜ਼ਰ ਖੇਤੀ ਮੇਲਾ ਸਾਡੇ ਪਿੰਡ ਪਰਾਗਪੁਰ ਵਿਚ ਕਰਵਾਇਆ ਜਾ ਰਿਹਾ ਹੈ। ਮੇਲੇ ਵਿਚ ਆਉਣ ਲਈ ਪੰਜਾਬ ਦੇ ਕਿਸਾਨਾਂ ਨੂੰ ਸੱਦਾ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਇਹ ਮੇਲਾ ਜਲੰਧਰ ਵਿਚ ਹਰ ਸਾਲ ਹੋਇਆ ਕਰੇਗਾ।

ਭੁੱਚੋ ਮੰਡੀ ਸਥਿਤ ਕੁਝ ਸਰਕਾਰੀ ਖਰੀਦ ਏਜੰਸੀਆਂ ਦੇ
ਗੋਦਾਮਾਂ ਤੇ ਸੀ.ਬੀ.ਆਈ. ਵੱਲੋਂ ਛਾਪਾ

ਭੁੱਚੋ ਮੰਡੀ. 4 ਮਾਰਚ ૿ ਸ਼ੈਲਰ ਮਾਲਕਾਂ ਵਲੋਂ ਸਾਲ 2009-10 'ਚ ਝੋਨੇ ਦੀ ਕਿਸਮ ਪੀ. ਏ. ਯੂ.-201 ਦੀ ਮਿਲਿੰਗ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ਦੀ ਪੜਤਾਲ ਸਬੰਧੀ ਅੱਜ ਸਵੇਰੇ ਹਾਈ ਕੋਰਟ ਦੇ ਆਦੇਸ਼ਾਂ ਅਨੁਸਾਰ ਸੀ. ਬੀ. ਆਈ. ਦੀ ਵਿਸ਼ੇਸ਼ ਟੀਮ ਨੇ ਭੁੱਚੋ ਮੰਡੀ ਵਿਖੇ ਸਰਕਾਰੀ ਖਰੀਦ ਏਜੰਸੀ ਅੱੈਫ. ਸੀ. ਆਈ. ਅਤੇ ਵੇਅਰ ਹਾਊਸ ਦੇ ਗੋਦਾਮਾਂ ਵਿਚ ਅਚਾਨਕ ਛਾਪਾ ਮਾਰਨ ਉਪਰੰਤ ਗੋਦਾਮਾਂ 'ਚ ਪਏ ਹੋਏ ਮਾਲ ਦੀ ਬਰੀਕੀ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ। ਵਰਣਨਯੋਗ ਹੈ ਕਿ ਇਸੇ ਤਰ੍ਹਾਂ ਹੀ ਸੀ. ਬੀ. ਆਈ. ਵੱਲੋਂ ਪਿਛਲੇ ਕੁਝ ਦਿਨਾਂ ਤੋਂ ਰਾਮਪੁਰਾਫੂਲ ਸਥਿਤ ਸਬੰਧਤ ਖਰੀਦ ਏਜੰਸੀਆਂ ਦੇ ਗੋਦਾਮਾਂ ਤੋਂ ਇਲਾਵਾ ਹੋਰ ਕਈ ਥਾਵਾਂ ਤੇ ਸਰਕਾਰੀ ਖਰੀਦ ਏਜੰਸੀਆਂ ਦੇ ਗੋਦਾਮਾਂ ਵਿਚ ਵੀ ਛਾਪੇ ਦੌਰਾਨ ਜਾਂਚ ਕੀਤੀ ਜਾ ਰਹੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਕਰੀਬ 2 ਸਾਲ ਤੋਂ ਵੱਧ ਸਮਾਂ ਪਹਿਲਾਂ ਸ਼ੈਲਰ ਮਾਲਕਾਂ ਨੇ ਇਹ ਕਹਿ ਕੇ ਝੋਨੇ ਦੀ ਕਿਸਮ ਪੀ.ਏ.ਯੂ.-201 ਦੀ ਮਿਲਿੰਗ ਕਰਨ ਤੋਂ ਇਸ ਲਈ ਇਨਕਾਰ ਕਰ ਦਿੱਤਾ ਸੀ ਕਿ ਇਹ ਝੋਨਾਂ ਕੁਆਲਟੀ ਪੱਖੋਂ ਮਾੜਾ ਹੈ ਅਤੇ ਇਸ ਝੋਨੇ ਦੀ ਮਿਲਿੰਗ ਸਮੇਂ ਚੌਲ ਦੀ ਬਦਰੰਗੀ ਅਤੇ ਟੁੱਟ ਜ਼ਿਆਦਾ ਹੁੰਦੀ ਹੈ। ਇਸ ਵਿਵਾਦ ਦੇ ਚਲਦਿਆਂ ਸ਼ੈਲਰ ਮਾਲਕਾਂ ਦੀ ਮੰਗ ਸੀ, ਕਿ ਸਰਕਾਰ ਇਸ ਕਿਸਮ ਦੇ ਚੌਲਾਂ ਨੂੰ ਬਿਨ੍ਹਾਂ ਸ਼ਰਤ ਸਵੀਕਾਰ ਕਰੇ ਜਾਂ ਫਿਰ ਸਰਕਾਰੀ ਖਰੀਦ ਏਜੰਸੀਆਂ ਇਸ ਝੋਨੇ ਨੂੰ ਚੁੱਕ ਲੈਣ। ਸਰਕਾਰ ਨੇ ਸ਼ੈਲਰਾਂ ਮਾਲਕਾਂ ਦੀ ਮੰਗ ਨੂੰ ਮੁੱਖ ਰੱਖਦਿਆਂ ਚੌਲ ਦੀ ਅਪਗਰੇਡੇਸ਼ਨ ਸਮੇਂ 200 ਰੁਪਏ ਪ੍ਰਤੀ ਕੁਇੰਟਲ ਰਿਆਇਤ ਦੇਣ ਦਾ ਐਲਾਨ ਕੀਤਾ ਸੀ। ਇਸ ਸਬੰਧੀ ਹਾਈ ਕੋਰਟ ਨੂੰ ਸ਼ਿਕਾਇਤ ਪ੍ਰਾਪਤ ਹੋਈ ਸੀ ਕਿ ਕੁਝ ਸ਼ੈਲਰ ਮਾਲਕਾਂ ਵਲੋਂ ਵਿਭਾਗ ਦੇ ਅਧਿਕਾਰੀਆਂ ਦੀ ਮਿਲੀ ਭੁਗਤ ਨਾਲ ਸਰਕਾਰ ਨੂੰ ਵੱਡੇ ਪੱਧਰ ਤੇ ਕਰੋੜਾਂ ਰੁਪਏ ਦਾ ਚੂਨਾ ਲਗਾਇਆ ਗਿਆ ਹੈ।