ਕੈਨੇਡੀਅਨਾਂ ਦੀ ਸਿਹਤ ਦਾ ਮਿਆਰ ਡਿੱਗਿਆ

ਕੈਨੇਡੀਅਨਾਂ ਦੀ ਸਿਹਤ ਦਾ ਮਿਆਰ ਹੁਣ ਪਹਿਲਾਂ ਵਾਲਾ ਨਹੀਂ ਰਿਹਾ। ਸਿਹਤ ਸਬੰਧੀ ਕੀਤੇ ਗਏ ਇੱਕ ਵਿਸ਼ਲੇਸ਼ਣ ਵਿੱਚ ਕੈਨੇਡੀਅਨਾਂ ਨੂੰ ਬੀ ਦਰਜਾ ਹਾਸਲ ਹੋਇਆ ਹੈ। ਕੈਨੇਡੀਅਨਾਂ ਵਿੱਚ ਦਿਨੋਂ ਦਿਨ ਮੋਟਾਪਾ ਵੱਧ ਰਿਹਾ ਹੈ ਤੇ ਲੰਮਾਂ ਸਮਾਂ ਚੱਲਣ ਵਾਲੀਆਂ ਬਿਮਾਰੀਆਂ ਨੇ ਵੀ ਕੈਨੇਡੀਅਨਾਂ ਨੂੰ ਜਕੜਿਆ ਹੋਇਆ ਹੈ। ਵੀਰਵਾਰ ਨੂੰ ਜਾਰੀ ਕੀਤੀ ਗਈ ਕਾਨਫਰੰਸ ਬੋਰਡ ਆਫ ਕੈਨੇਡਾ ਦੀ ਹੈਲਥ ਰਿਪੋਰਟ ਕਾਰਡ ਵਿੱਚ ਜਿ਼ੰਦਗੀ ਦੀ ਸੰਭਾਵਨਾ, ਬੱਚਿਆਂ ਦੀ ਮੌਤ ਦਰ ਤੇ ਵੱਖ ਵੱਖ ਬਿਮਾਰੀਆਂ ਕਾਰਨ ਮਰਨ ਵਾਲਿਆਂ ਦੇ ਅੰਕੜਿਆਂ ਦਾ ਵੇਰਵਾ ਜਾਰੀ ਕੀਤਾ ਗਿਆ। 17 ਸਨਅਤੀ ਮੁਲਕਾਂ ਦੇ ਕੀਤੇ ਗਏ ਤੁਲਨਾਤਮਕ ਅਧਿਐਨ ਵਿੱਚ ਕੈਨੇਡਾ 10ਵੇਂ ਸਥਾਨ ਉੱਤੇ ਰਿਹਾ। ਜਪਾਨ, ਸਵਿਟਜ਼ਰਲੈਂਡ ਤੇ ਇਟਲੀ ਨੇ ਪਹਿਲੇ ਤਿੰਨ ਸਥਾਨਾਂ ਉੱਤੇ ਕਬਜਾ ਕਰਕੇ ਏ ਗ੍ਰੇਡ ਹਾਸਲ ਕੀਤਾ। ਇਸੇ ਦੌਰਾਨ ਨਾਰਵੇ, ਫਿਨਲੈਂਡ, ਸਵੀਡਨ, ਫਰਾਂਸ, ਆਸਟਰੇਲੀਆ ਤੇ ਜਰਮਨੀ ਨੂੰ ਬੀ ਗ੍ਰੇਡ ਮਿਲਿਆ ਪਰ ਇਨ੍ਹਾਂ ਦੇ ਅੰਕ ਕੈਨੇਡਾ ਤੋਂ ਵੱਧ ਰਹੇ। ਰਿਪੋਰਟ ਦੇ ਅੰਕੜੇ ਅਨੁਸਾਰ ਕੈਨੇਡਾ ਵਿੱਚ ਡਾਇਬਟੀਜ਼ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਤੀਜੀ ਥਾਂ ਉੱਤੇ ਸੱਭ ਤੋਂ ਵੱਧ ਹੈ। ਇਹ ਵੀ ਸਾਹਮਣੇ ਆਇਆ ਹੈ ਕਿ ਦੇਸ਼ ਵਿੱਚ ਅਜਿਹਾ ਹੈਲਥ ਕੇਅਰ ਸਿਸਟਮ ਹੈ ਜਿਸ ਕਾਰਨ ਬਿਮਾਰੀ ਦਾ ਪਤਾ ਲਾਉਣ ਤੇ ਉਸ ਦੇ ਇਲਾਜ ਤੋਂ ਇਲਾਵਾ ਮੈਨੇਜਮੈਂਟ ਸਿਸਟਮ ਵੀ ਓਨਾ ਮਿਆਰੀ ਨਹੀਂ ਹੈ। 1990ਵਿਆਂ ਵਿੱਚ ਕੈਨੇਡਾ ਇਸ ਮਾਮਲੇ ਵਿੱਚ ਚੌਥੇ ਸਥਾਨ ਉੱਤੇ ਸੀ ਤੇ ਉੱਥੋਂ ਘੱਟ ਕੇ ਹੁਣ 10ਵੀਂ ਥਾਂ ਉੱਤੇ ਪਹੁੰਚ ਗਿਆ ਹੈ। ਇਸ ਤਰ੍ਹਾਂ ਦੇ ਨਕਾਰਾਤਮਕ ਸਿੱਟੇ ਆਉਣ ਤੋਂ ਬਾਅਦ ਵੀ ਕੈਨੇਡਾ ਨੇ ਸੈਲਫ ਰਿਪੋਰਟਿਡ ਹੈਲਥ ਸਟੇਟਸ, ਦਿਲ ਦੀਆਂ ਬਿਮਾਰੀਆਂ ਤੇ ਸਟਰੋਕ ਆਦਿ ਤੋਂ ਹੋਣ ਵਾਲੀਆਂ ਮੌਤਾਂ, ਪ੍ਰੀਮੈਚਿਓਰ ਮਰਨ ਦਰ ਵਰਗੇ ਖੇਤਰਾਂ ਵਿੱਚ ਚੰਗੀ ਕਾਰਗੁਜ਼ਾਰੀ ਵਿਖਾਈ ਹੈ। ਪਰ ਇਸ ਵਰਗ ਵਿੱਚ ਵੀ ਕੈਨੇਡਾ 17 ਮੁਲਕਾਂ ਵਿੱਚੋਂ ਨੌਂਵੇਂ ਸਥਾਨ ਉੱਤੇ ਹੀ ਆਇਆ।