ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਪੰਜਾਬ 'ਚ ਵੋਟਾਂ ਅੱਜ

ਚੰਡੀਗੜ੍ਹ, 29 ਜਨਵਰੀ -ਪੰਜਾਬ ਵਿਧਾਨ ਸਭਾ ਦੇ 117 ਹਲਕਿਆਂ ਲਈ ਅੱਜ ਵੋਟਾਂ ਪਾਈਆਂ ਜਾਣਗੀਆਂ। ਇੱਥੇ ਪੱਤਰਕਾਰਾਂ ਨੂੰ ਚੋਣ ਪ੍ਰਬੰਧਾਂ ਸਬੰਧੀ ਜਾਣਕਾਰੀ ਦਿੰਦਿਆਂ ਮੁੱਖ ਚੋਣ ਅਧਿਕਾਰੀ ਪੰਜਾਬ ਕੁਸਮਜੀਤ ਸਿੱਧੂ ਨੇ ਦੱਸਿਆ ਕਿ ਵੋਟਾਂ ਸਵੇਰੇ 8 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਪੈਣਗੀਆਂ ਤੇ ਇਸ ਲਈ ਪੋਲਿੰਗ ਪਾਰਟੀਆਂ ਪੋਲਿੰਗ ਸਟੇਸ਼ਨਾਂ 'ਤੇ ਪਹੁੰਚ ਚੁੱਕੀਆਂ ਹਨ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਬਿਨਾਂ ਕਿਸੇ ਡਰ, ਭੈਅ ਤੇ ਲਾਲਚ ਤੋਂ ਆਪਣੇ ਵੋਟ ਦੇ ਹੱਕ ਦੀ ਵਰਤੋਂ ਕਰਨ। ਚੋਣਾਂ ਲਈ ਤਾਇਨਾਤ ਸੁਰੱਖਿਆ ਦਸਤਿਆਂ ਬਾਰੇ ਉਨ੍ਹਾਂ ਦੱਸਿਆ ਕਿ ਕੇਂਦਰੀ ਸੁਰੱਖਿਆ ਬਲਾਂ ਦੀਆਂ 225 ਕੰਪਨੀਆਂ, ਹੋਰ ਰਾਜਾਂ ਤੋਂ ਸੁਰੱਖਿਆ ਦਸਤਿਆਂ ਦੀਆਂ 12 ਕੰਪਨੀਆਂ ਤੇ ਵੱਡੀ ਗਿਣਤੀ 'ਚ ਪੰਜਾਬ ਪੁਲਿਸ ਇਸ ਮੰਤਵ ਲਈ ਤਾਇਨਾਤ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਵੋਟਾਂ ਦੌਰਾਨ ਸਾਰੇ ਸੂਬੇ ਨੂੰ 1722 ਬੀਟਾਂ 'ਚ ਵੰਡਿਆ ਗਿਆ ਹੈ ਤੇ ਇਨ੍ਹਾਂ ਨੂੰ ਸੈਕਟਰਾਂ ਦਾ ਨਾਂਅ ਦਿੱਤਾ ਗਿਆ ਹੈ, ਜੋ ਕਿ ਹਰ ਇਕ ਸੈਕਟਰ ਇੰਚਾਰਜ ਦੇ ਅਧੀਨ ਕੰਮ ਕਰਨਗੀਆਂ, ਜਿਸ ਨੂੰ ਕਿ ਜ਼ਿਲ੍ਹਾ ਚੋਣ ਅਫ਼ਸਰ ਨਿਯੁਕਤ ਕਰੇਗਾ। ਉਸ ਦੀ ਸਹਾਇਤਾ ਲਈ ਗਸ਼ਤੀ ਪਾਰਟੀ ਹੋਵੇਗੀ, ਜਿਸ 'ਚ ਇੱਕ ਹੌਲਦਾਰ ਤੇ 3 ਸਿਪਾਹੀ ਹੋਣਗੇ। ਉਨ੍ਹਾਂ ਕਿਹਾ ਕਿ ਚੋਣ ਵਾਲੇ ਦਿਨ ਸ਼ਰਾਰਤੀ ਅਨਸਰਾਂ 'ਤੇ ਨਜ਼ਰ ਰੱਖਣ ਲਈ ਰਾਜ ਭਰ 'ਚ 374 ਨਾਕੇ ਲਗਾਏ ਜਾਣਗੇ,2ਜਦਕਿ ਦੂਜੇ ਰਾਜਾਂ 'ਤੋਂ ਇਨ੍ਹਾਂ ਦੀ ਆਮਦ ਰੋਕਣ ਲਈ ਹੱਦਾਂ 'ਤੇ ਵੀ 137 ਨਾਕੇ 2ਹੋਣਗੇ। ਉਨ੍ਹਾਂ ਦੱਸਿਆ ਕਿ ਦੋ ਥਾਵਾਂ 'ਤੇ ਦੋਹਰੀਆਂ ਵੋਟਾਂ ਬਣਨ ਸਬੰਧੀ ਆਈ ਸ਼ਿਕਾਇਤ ਪਿੱਛੋਂ ਬਠਿੰਡਾ ਵਿਖੇ ਹਨੂੰਮਾਨਗੜ੍ਹ ਤੇ ਡੱਬਵਾਲੀ ਪੋਲਿੰਗ ਬੂਥਾਂ 'ਤੇ ਹਰ ਵੋਟਰ ਦੀ ਵੋਟ ਵੇਲੇ ਵੀਡੀਓਗ੍ਰਾਫੀ ਹੋਵੇਗੀ ਤੇ ਫਿਰ ਇਨ੍ਹਾਂ ਦੇ ਵੋਟਰਾਂ ਦੀ ਜਾਂਚ-ਪੜਤਾਲ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਪਹਿਲੀ ਵਾਰ ਰਾਜ ਦੇ 203 ਪੋਲਿੰਗ ਬੂਥਾਂ 'ਤੋਂ ਵੈੱਬ ਕਾਮ ਰਾਹੀਂ ਵੋਟਾਂ ਪੈਣ ਦਾ ਸਿੱਧਾ ਪ੍ਰਸਾਰਨ ਕੀਤਾ ਜਾਵੇਗਾ, ਜਿਸ ਨੂੰ ਕਿ ਸਿਰਫ਼ ਚੋਣ ਕਮਿਸ਼ਨ ਦੇ ਅਧਿਕਾਰੀ ਹੀ ਦੇਖ ਸਕਣਗੇ। ਉਨ੍ਹਾਂ ਕਿਹਾ ਕਿ ਰਾਜ ਵਿਚ ਕੁੱਲ ਵੋਟਰਾਂ ਦੀ ਗਿਣਤੀ 1 ਕਰੋੜ 76 ਲੱਖ 83 ਹਜ਼ਾਰ 582 ਹੈ, ਜਿਨ੍ਹਾਂ 'ਚੋਂ 93 ਲੱਖ 22 ਹਜ਼ਾਰ 555 ਮਰਦ ਤੇ 83 ਲੱਖ 61 ਹਜ਼ਾਰ 27 ਔਰਤ ਵੋਟਰ ਹਨ। ਉਨ੍ਹਾਂ ਕਿਹਾ ਕਿ 18 ਤੋਂ 19 ਸਾਲ ਦੀ ਸ਼੍ਰੇਣੀ ਦੇ ਵੋਟਰਾਂ ਦੀ ਗਿਣਤੀ 4 ਲੱਖ 13 ਹਜ਼ਾਰ 144 ਹੈ, ਜਿਸ ਚੋਂ 2 ਲੱਖ 73 ਹਜ਼ਾਰ 434 ਲੜਕੇ ਤੇ 1 ਲੱਖ 39 ਹਜ਼ਾਰ 710 ਲੜਕੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਲੁਧਿਆਣਾ ਜ਼ਿਲ੍ਹੇ ਦੇ ਗਿੱਲ ਹਲਕੇ 'ਚ ਸਭ ਤੋਂ ਵੱਧ 1 ਲੱਖ 94 ਹਜ਼ਾਰ 331 ਵੋਟਰ ਹਨ ਜਦਕਿ ਅਮਲੋਹ ਹਲਕੇ 'ਚ ਸਭ ਤੋਂ ਘੱਟ 1 ਲੱਖ 13 ਹਜ਼ਾਰ 952 ਵੋਟਰ ਹਨ। ਉਨ੍ਹਾਂ ਦੱਸਿਆ ਕਿ ਰਾਜ 'ਚ 99.76 ਫ਼ੀਸਦੀ ਲੋਕਾਂ ਕੋਲ ਬਿਜਲਈ ਫ਼ੋਟੋ ਸ਼ਨਾਖ਼ਤੀ ਕਾਰਡ ਤੇ 99.68 ਫ਼ੀਸਦੀ ਲੋਕਾਂ ਦੀ ਫ਼ੋਟੋ ਵੋਟਰ ਸੂਚੀ 'ਚ ਦਰਜ ਹੈ। ਉਨ੍ਹਾਂ ਦੱਸਿਆ ਕਿ ਕੁੱਲ ਉਮੀਦਵਾਰਾਂ 'ਚੋਂ 93 ਔਰਤਾਂ ਤੇ 417 ਆਜ਼ਾਦ ਉਮੀਦਵਾਰ ਹਨ। ਉਨ੍ਹਾਂ ਕਿਹਾ ਕਿ ਆਜ਼ਾਦ ਉਮੀਦਵਾਰਾਂ 'ਚੋਂ 45 ਔਰਤਾਂ ਤੇ 372 ਮਰਦ ਉਮੀਦਵਾਰ ਹਨ। ਮੁੱਖ ਚੋਣ ਅਧਿਕਾਰੀ ਨੇ ਕਿਹਾ ਕਿ ਨਕੋਦਰ ਵਿਧਾਨ ਸਭਾ ਹਲਕੇ 'ਚ ਸਭ ਤੋਂ ਵੱਧ 238 ਪੋਲਿੰਗ ਬੂਥ ਹਨ ਤੇ ਅੰਮ੍ਰਿਤਸਰ ਕੇਂਦਰੀ ਹਲਕੇ 'ਚ ਸਭ ਤੋਂ ਘੱਟ 118 ਪੋਲਿੰਗ ਬੂਥ ਹਨ। ਭੁਲੱਥ ਅਜਿਹਾ ਹਲਕਾ ਹੈ, ਜਿੱਥੇ ਔਰਤ ਵੋਟਰਾਂ ਦੀ ਗਿਣਤੀ ਮਰਦਾਂ ਦੇ ਮੁਕਾਬਲੇ ਜ਼ਿਆਦਾ ਹੈ। ਭੁਲੱਥ ਵਿਖੇ 59 ਹਜ਼ਾਰ 391 ਔਰਤ ਵੋਟਰ ਹਨ, ਜਦਕਿ 59 ਹਜ਼ਾਰ 22 ਮਰਦ ਵੋਟਰ ਹਨ।

ਇਸ ਤੋਂ ਇਲਾਵਾ ਦੀਨਾਨਗਰ ਹਲਕੇ 'ਚ ਸਭ ਤੋਂ ਵੱਧ 3155 ਸਰਵਿਸ ਵੋਟਰ ਹਨ ਜਦਕਿ ਸਭ ਤੋਂ ਘੱਟ ਆਤਮ ਨਗਰ 'ਚ 16 ਸਰਵਿਸ ਵੋਟਰ ਹਨ। ਉਨ੍ਹਾਂ ਕਿਹਾ ਕਿ 19841 ਪੋਲਿੰਗ ਬੂਥਾਂ 'ਚੋਂ 6379 ਸੰਵੇਦਨਸ਼ੀਲ ਤੇ 2718 ਅਤਿ ਸੰਵੇਦਨਸ਼ੀਲ ਹਨ। ਇਸ ਤੋਂ ਇਲਾਵਾ 55 ਜਨਰਲ , 27 ਪੁਲਿਸ ਤੇ 43 ਖਰਚਾ ਆਬਜ਼ਰਵਰ ਨਿਯੁਕਤ ਕੀਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ 7638 ਸਹਾਇਕ ਖਰਚਾ ਆਬਜ਼ਰਵਰ , 2627 ਵੀਡੀਓਗ੍ਰਾਫੀ ਟੀਮਾਂ ਤੇ 554 ਡਿਜੀਟਲ ਕੈਮਰਾ ਟੀਮਾਂ ਨਿਯੁਕਤ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਦੱਸਿਆ ਕਿ ਡੀ. ਐੱਸ. ਪੀ. ਅਬੋਹਰ ਨੂੰ ਬਦਲ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਪ੍ਰਦੀਪ ਕੁਮਾਰ ਐੱਸ.ਐੱਚ.ਓ. ਲੱਖੋਕੇ ਬਹਿਰਾਮ ਨੂੰ ਫ਼ਿਰੋਜ਼ਪੁਰ ਵਿਖੇ ਬਦਲ ਦਿੱਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਦਫ਼ਤਰ ਮੁੱਖ ਚੋਣ ਅਧਿਕਾਰੀ ਨੂੰ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਹੁਣ ਤੱਕ ਕੁੱਲ 2830 ਸ਼ਿਕਾਇਤਾਂ ਪ੍ਰਾਪਤ ਹੋਈਆਂ ਹਨ, ਜਿਨ੍ਹਾਂ 'ਚੋਂ 2005 ਦਾ ਨਿਪਟਾਰਾ ਕੀਤਾ ਜਾ ਚੁੱਕਾ ਹੈ। ਉਨ੍ਹਾਂ ਦੱਸਿਆ ਕਿ ਚੋਣ ਖਰਚਾ ਨਿਗਰਾਨ ਟੀਮਾਂ ਵੱਲੋਂ ਹੁਣ ਤੱਕ ਕੁੱਲ 33 ਕਰੋੜ 66 ਲੱਖ ਰੁਪਏ ਬਰਾਮਦ ਕਰਕੇ ਆਮਦਨ ਕਰ ਵਿਭਾਗ ਨੂੰ ਭੇਜੇ ਗਏ ਹਨ। ਇਸ ਤੋਂ ਇਲਾਵਾ 2641 ਕਿੱਲੋ ਭੁੱਕੀ, 10891 ਗ੍ਰਾਮ ਅਫ਼ੀਮ, 6362 ਗ੍ਰਾਮ ਹੈਰੋਇਨ ਰਾਜ ਦੇ ਵੱਖ-ਵੱਖ ਭਾਗਾਂ ਤੋਂ ਬਰਾਮਦ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ 2 ਲੱਖ 13 ਹਜ਼ਾਰ 352 ਲਾਇਸੈਂਸੀ ਹਥਿਆਰ ਜਮ੍ਹਾਂ ਕਰਵਾਏ ਗਏ ਹਨ। ਸਰਕਾਰੀ ਅੰਦਾਜ਼ਿਆਂ ਅਨੁਸਾਰ ਰਾਜ ਵਿਚ ਵੋਟਾਂ ਪੈਣ ਦੀ ਪ੍ਰਤੀਸ਼ਤ 65 ਤੋਂ 75 ਪ੍ਰਤੀਸ਼ਤ ਤੱਕ ਰਹਿਣ ਦੀ ਸੰਭਾਵਨਾ ਹੈ ਅਤੇ ਮਗਰਲੇ ਦਿਨਾਂ ਦੀ ਸਰਦੀ ਤੋਂ ਬਾਅਦ ਮੌਸਮ ਦੇ ਖੁੱਲ੍ਹਣ ਕਾਰਨ ਲੋਕਾਂ ਲਈ ਵੋਟ ਪ੍ਰਕਿਰਿਆ ਵਿਚ ਹਿੱਸਾ ਲੈਣਾ ਸੁਖਾਲਾ ਹੋ ਜਾਵੇਗਾ।

ਅਕਾਲੀ-ਭਾਜਪਾ ਗੱਠਜੋੜ 80 ਸੀਟਾਂ 'ਤੇ ਜਿੱਤ ਹਾਸਲ ਕਰੇਗਾ-ਬਾਦਲ

ਦੇਵੀਗੜ੍ਹ, 29 ਜਨਵਰੀ -ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਦਾਅਵਾ ਕੀਤਾ ਹੈ ਕਿ ਅਕਾਲੀ-ਭਾਜਪਾ ਗੱਠਜੋੜ ਵਿਧਾਨ ਸਭਾ ਚੋਣਾਂ ਵਿਚ 80 ਸੀਟਾਂ 'ਤੇ ਜਿੱਤ ਪ੍ਰਾਪਤ ਕਰੇਗਾ। ਸ: ਬਾਦਲ ਬੀਤੇ ਦਿਨੀਂ ਇੱਥੇ ਹਲਕਾ ਸਨੌਰ ਤੋਂ ਅਕਾਲੀ-ਭਾਜਪਾ ਦੇ ਉਮੀਦਵਾਰ ਤੇਜਿੰਦਰਪਾਲ ਸਿੰਘ ਸੰਧੂ ਦੇ ਹੱਕ ਵਿਚ ਦਾਣਾ ਮੰਡੀ ਵਿਖੇ ਰੈਲੀ ਨੂੰ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਜਿਸ ਤਰ੍ਹਾਂ ਦੀ ਲਹਿਰ ਇਸ ਵੇਲੇ ਦਿਖਾਈ ਦੇ ਰਹੀ ਹੈ ਪਹਿਲਾਂ ਕਦੇ ਨਹੀਂ ਸੀ। ਉਨ੍ਹਾਂ ਇੱਕ ਸਵਾਲ ਦੇ ਜਵਾਬ ਵਿਚ ਕਿਹਾ ਕਿ ਅੱਧੇ ਹਲਕਿਆਂ ਵਿਚ ਮੈਂ ਅਤੇ ਬਾਕੀਆਂ ਵਿਚ ਸੁਖਬੀਰ ਸਿੰਘ ਬਾਦਲ ਚੋਣ ਪ੍ਰਚਾਰ ਕਰ ਰਹੇ ਹਨ। ਉਨ੍ਹਾਂ ਇੱਕ ਸਵਾਲ ਦੇ ਜਵਾਬ ਵਿਚ ਕਿਹਾ ਕਿ ਡੇਰਾਵਾਦ ਵਿਚ ਮੈਨੂੰ ਨਾ ਉਲਝਾਓ। ਮੈਨੂੰ ਨਹੀਂ ਪਤਾ ਕੌਣ ਕਿੱਥੇ ਜਾਂਦਾ ਹੈ। ਉਨ੍ਹਾਂ ਇੱਕ ਸਵਾਲ ਦੇ ਜਵਾਬ ਵਿਚ ਕਿਹਾ ਕਿ ਲੰਬੀ ਤੋਂ ਵੱਡੇ ਫ਼ਰਕ ਨਾਲ ਜਿੱਤਣਗੇ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਦਾਣਾ ਮੰਡੀ ਵਿਚ ਵਿਸ਼ਾਲ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਇੱਕ ਪਾਸੇ ਕੈਪਟਨ ਅਮਰਿੰਦਰ ਸਿੰਘ ਹੈ ਜਿਸ ਦੀ ਸ਼ਬਦਾਵਲੀ ਤੇ ਬਿਆਨਬਾਜ਼ੀ ਸੁਹਿਰਦ ਇਨਸਾਨਾਂ ਵਾਲੀ ਨਹੀਂ ਹੈ ਅਤੇ ਦੂਜੇ ਪਾਸੇ ਅਕਾਲੀ-ਭਾਜਪਾ ਗੱਠਜੋੜ। ਇਹ ਲੋਕਾਂ ਨੇ ਦੇਖਣਾ ਹੈ ਕਿ ਕਿਸ ਨੂੰ ਆਪਣੀ ਕਿਸਮਤ ਦੀ ਵਾਗਡੋਰ ਸੌਂਪਣੀ ਹੈ। ਸ: ਬਾਦਲ ਨੇ ਬੋਲਦਿਆਂ ਕਿਹਾ ਕਿ ਇੱਕ ਪਾਸੇ ਕੇਂਦਰੀ ਦੀ ਯੂ.ਪੀ.ਏ. ਸਰਕਾਰ ਹੈ ਜਿਸ ਦੇ ਪ੍ਰਧਾਨ ਮੰਤਰੀ ਡਾ: ਮਨਮੋਹਨ ਸਿੰਘ ਦੇ ਮੰਤਰੀ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਵਿਚ ਜੇਲ੍ਹ ਦੀਆਂ ਹਵਾਵਾਂ ਖਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਨੇ ਸਕੀਮਾਂ ਹੀ ਅਜਿਹੀਆਂ ਬਣਾਈਆਂ ਹਨ ਜਿਨ੍ਹਾਂ ਨਾਲ ਪੰਜਾਬ ਨਾਲ ਵਿਤਕਰਾ ਕੀਤਾ ਜਾ ਰਿਹਾ ਹੈ। ਸ: ਬਾਦਲ ਨੇ ਬੋਲਦਿਆਂ ਹੋਇਆਂ ਕਿਹਾ ਕਿ ਕਾਂਗਰਸ ਪਾਰਟੀ ਨੇ ਕੈਪਟਨ ਅਮਰਿੰਦਰ ਸਿੰਘ ਤਾਂ ਇੱਕ ਪਾਸੇ ਸਵਰਗੀ ਸ੍ਰੀਮਤੀ ਇੰਦਰਾ ਗਾਂਧੀ ਤੱਕ ਮੈਨੂੰ ਘੇਰਨ ਲਈ ਹਰ ਹੀਲੇ ਵਸੀਲੇ ਵਰਤ ਰਹੇ ਹਨ। ਉਨ੍ਹਾਂ ਕਿਹਾ ਕਿ 'ਮੈਂ' ਪੰਜਾਬ ਦੀ ਹਰ ਵੇਲੇ ਸੇਵਾ ਕੀਤੀ। ਜੋ ਵੀ ਲੋਕਾਂ ਦੀਆਂ ਮੰਗਾਂ ਸਨ ਉਨ੍ਹਾਂ ਨੂੰ ਪੂਰਾ ਕੀਤਾ। ਸ: ਬਾਦਲ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਮੁਲਕ ਭਰ ਵਿਚ ਅਜਿਹੀ ਪਹਿਲੀ ਸਰਕਾਰ ਹੈ ਜਿਸ ਨੇ ਗ਼ਰੀਬ ਲੋਕਾਂ ਦੀ ਆਟਾ-ਦਾਲ, ਕਿਸਾਨਾਂ ਲਈ ਮੁਫ਼ਤ ਟਿਊਬਵੈੱਲ ਦੀ ਸੁਵਿਧਾ ਮੁਹੱਈਆ ਕਰਵਾਈ। ਉਨ੍ਹਾਂ ਕਿਹਾ ਕਿ ਇਹ ਪਹਿਲੀ ਵਾਰ ਹੈ ਕਿ ਮੁਲਕ ਭਰ ਵਿਚੋਂ ਪੰਜਾਬ ਦੇ ਕਿਸਾਨਾਂ ਨੂੰ 65 ਸਾਲ ਦੀ ਉਮਰ ਤੱਕ ਪ੍ਰੋਵੀਡੈਂਟ ਫ਼ੰਡ ਦੀ ਸਹੂਲਤ ਮੁਹੱਈਆ ਕਰਵਾਈ ਜਾਵੇਗੀ। ਉਨ੍ਹਾਂ ਗਿਆਨੀ ਕਰਤਾਰ ਸਿੰਘ ਸਵਰਗੀ ਜਸਦੇਵ ਸਿੰਘ ਸੰਧੂ ਦਾ ਜ਼ਿਕਰ ਕਰਦਿਆਂ ਤੇਜਿੰਦਰਪਾਲ ਸਿੰਘ ਸੰਧੂ ਦੀਆਂ ਸਿਫ਼ਤਾਂ ਦੇ ਪੁਲ ਬੰਨ੍ਹੇ। ਉਨ੍ਹਾਂ ਖ਼ੁਸ਼ ਹੁੰਦਿਆਂ ਕਿਹਾ ਕਿ ਤੁਸੀਂ ਤੇਜਿੰਦਰਪਾਲ ਸਿੰਘ ਸੰਧੂ ਨੂੰ ਜਿਤਾਓ ਤਾਂ ਮੈਂ ਇਸ ਨੂੰ ਵੱਡਾ ਕੈਬਨਿਟ ਮੰਤਰੀ ਬਣਾਵਾਂਗਾ। ਇਸ ਮੌਕੇ ਤੇਜਿੰਦਰਪਾਲ ਸਿੰਘ ਸੰਧੂ ਨੇ ਆਪਣੇ ਪਿਤਾ ਸ: ਜਸਦੇਵ ਸਿੰਘ ਸੰਧੂ ਦੇ ਸਮੇਂ ਦੀਆਂ ਕੀਤੀਆਂ ਸੇਵਾਵਾਂ ਦਾ ਜ਼ਿਕਰ ਕੀਤਾ। ਇਸ ਮੌਕੇ 'ਤੇ ਸ੍ਰੀਮਤੀ ਅਨੂਪ ਇੰਦਰ ਕੌਰ ਸੰਧੂ, ਅਜਮੇਰ ਸਿੰਘ ਲੱਖੋਵਾਲ ਚੇਅਰਮੈਨ ਪੰਜਾਬ ਮੰਡੀ ਬੋਰਡ, ਹਰਮੀਤ ਸਿੰਘ ਪਠਾਣਮਾਜਰਾ, ਹਰਜੀਤ ਸਿੰਘ ਅਦਾਲਤੀਵਾਲਾ, ਸੁਰਜੀਤ ਸਿੰਘ ਗੜ੍ਹੀ, ਲਾਭ ਸਿੰਘ ਦੇਵੀਨਗਰ, ਜਸਮੇਰ ਸਿੰਘ ਲਾਛੜੂ, ਜਰਨੈਲ ਸਿੰਘ ਕਰਤਾਰਪੁਰ ਚਾਰੇ ਸ਼੍ਰੋਮਣੀ ਕਮੇਟੀ ਮੈਂਬਰ, ਸ: ਜੈ ਸਿੰਘ ਬਹਿਰੂ, ਬੂਟਾ ਸਿੰਘ ਸ਼ਾਦੀਪੁਰ ਆਦਿ ਨੇ ਸੰਬੋਧਨ ਕੀਤਾ। ਸਟੇਜ 'ਤੇ ਸ੍ਰੀਮਤੀ ਅਮਰਜੀਤ ਕੌਰ ਸਾਬਕਾ ਮੈਂਬਰ ਰਾਜ ਸਭਾ, ਸ: ਇੰਦਰਮੋਹਨ ਸਿੰਘ ਬਜਾਜ, ਮੰਜੂ ਕੁਰੈਸ਼ੀ, ਫੌਜਇੰਦਰ ਸਿੰਘ ਮੁਖਮੈਲਪੁਰ, ਗਿਆਨੀ ਸੁਬੇਗ ਸਿੰਘ ਕਛਵਾ, ਕਰਤਾਰ ਸਿੰਘ ਕਛਵਾ, ਗੁਰਬਖ਼ਸ਼ ਸਿੰਘ, ਗੁਰਮੁਖ ਸਿੰਘ ਸਾਬਕਾ ਸਰਪੰਚ, ਹਰੀ ਸਿੰਘ ਹਡਾਣਾ, ਸੁਖਦਰਸ਼ਨ ਸਿੰਘ ਮਿਹੋਣ, ਭੋਲਾ ਸਿੰਘ ਈਸਰਹੇੜੀ, ਗੁਲਜ਼ਾਰ ਸਿੰਘ ਭੁਨਰਹੇੜੀ, ਡਾ: ਯਸਪਾਲ ਖੰਨਾ, ਆਦਿ ਨੇ ਵੀ ਸੰਬੋਧਨ ਕੀਤਾ। ਇਸ ਮੌਕੇ ਸਤਨਾਮ ਸਿੰਘ ਨੰਦਗੜ੍ਹ, ਹਰਚੰਦ ਸਿੰਘ ਬਰਸਟ ਸਮੇਤ ਹੋਰ ਬਹੁਤ ਸਾਰੇ ਆਗੂ ਮੌਜੂਦ ਸਨ।

ਡਿਊਟੀ ਦੇ ਰਹੇ ਹਵਾਲਦਾਰ ਦੀ ਅਚਾਨਕ ਮੌਤ

ਬਟਾਲਾ, 29 ਜਨਵਰੀ -ਸਥਾਨਕ ਸਿਵਲ ਲਾਈਨ ਥਾਣੇ ਦੇ ਨੇੜੇ ਬਣੇ ਪੰਜਾਬ ਪੁਲਿਸ ਦੇ ਘਰੇਲੂ ਕਵਾਟਰਾਂ ਦੇ ਗੇਟ ਉਪਰ ਡਿਊਟੀ ਦੇ ਰਹੇ ਪੰਜਾਬ ਪੁਲਿਸ ਦੇ ਇੱਕ ਹੌਲਦਾਰ ਨੂੰ ਅਚਾਨਕ ਪਏ ਜ਼ਬਰਦਸਤ ਦਿਲ ਦੇ ਦੌਰੇ ਕਾਰਨ ਮੌਤ ਹੋ ਜਾਣ ਦਾ ਸਮਾਚਾਰ ਹੈ। ਪੁਲਿਸ ਜ਼ਿਲ੍ਹਾ ਬਟਾਲਾ ਦੇ ਥਾਣਾ ਸਿਟੀ ਵਿਖੇ ਤਾਇਨਾਤ ਹੌਲਦਾਰ ਸੁਰਜੀਤ ਸਿੰਘ ਪੇਟੀ ਨੰਬਰ 2367 ਪੁੱਤਰ ਉਜਾਗਰ ਸਿੰਘ ਵਾਸੀ ਪਿੰਡ ਡੱਬੂੜੀ ਨੇੜੇ ਦੋਰਾਂਗਲਾ ਦੇ ਲੜਕੇ ਨੇ ਦੱਸਿਆ ਕਿ ਬੀਤੀ ਰਾਤ ਮੇਰੇ ਪਿਤਾ ਹੌਲਦਾਰ ਸੁਰਜੀਤ ਸਿੰਘ ਥਾਣਾ ਸਿਵਲ ਲਾਇਨ ਨੇੜੇ ਬਣੇ ਪੰਜਾਬ ਪੁਲਿਸ ਦੇ ਰਹਿਣ ਵਾਲੇ ਰਿਹਾਇਸ਼ੀ ਕਵਾਟਰਾਂ ਦੇ ਗੇਟ ਮੋਹਰੇ ਡਿਊਟੀ ਦੇ ਰਹੇ ਸਨ ਜਿਨ੍ਹਾਂ ਨੂੰ ਤੜਕਸਾਰ ਅਚਾਨਕ ਕੁਝ ਦਰਦ ਮਹਿਸੂਸ ਹੋਈ ਅਤੇ ਕੁਝ ਸਮੇਂ ਬਾਅਦ ਉਨ੍ਹਾਂ ਦੀ ਮੌਤ ਹੋ ਗਈ। ਮ੍ਰਿਤਕ ਪੁਲਿਸ ਦਾ ਹੌਲਦਾਰ ਸੁਰਜੀਤ ਸਿੰਘ ਆਪਣੇ ਪਿੱਛੇ ਪਤਨੀ 'ਤੇ ਦੋ ਲੜਕੇ ਛੱਡ ਗਿਆ ਹੈ ਜਿਸ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਗਿਆ।

ਜਲੰਧਰ 'ਚ ਮਕਾਨ ਦੀ ਛੱਤ ਡਿੱਗੀ, ਮਾਵਾਂ-ਧੀਆਂ ਦੀ ਮੌਤ

ਜਲੰਧਰ, 29 ਜਨਵਰੀ  ਪਿੰਡ ਨਾਗਰਾ ਦੇ ਨਜ਼ਦੀਕ ਵਾਰਡ ਨੰ.39 ਚ ਪੈਂਦੇ ਮੁਹੱਲਾ ਸ਼ਿਵ ਨਗਰ ਵਿਚ ਰਾਤ ਅਚਾਨਕ ਮਕਾਨ ਦਾ ਗਾਡਰ ਵਿੰਗਾ ਹੋਣ ਕਾਰਣ ਮਕਾਨ ਦੀ ਛੱਤ ਡਿੱਗ ਪਈ, ਮਾਵਾਂ ਧੀਆਂ ਦੀ ਮੌਕੇ 'ਤੇ ਮੌਤ ਹੋ ਗਈ ਅਤੇ ਉਨ੍ਹਾਂ ਦਾ ਬੇਟਾ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਿਆ, ਘਟਨਾ ਸਬੰਧੀ ਜਾਣਕਾਰੀ ਦਿੰਦੇ ਮਾਲਕ ਮਕਾਨ ਰੋਸ਼ਨ ਲਾਲ ਨੇ ਦੱਸਿਆ ਕਿ ਉਹ ਭਾਰਗੋ ਕੈਂਪ ਖੇਡ ਇੰਡਸਟਰੀ ਵਿਚ ਕੰਮ ਕਰਦਾ ਹੈ, ਅਤੇ ਭਾਰਗੋ ਕੈਂਪ ਵਿਚ ਹੀ ਰਹਿੰਦਾ ਹੈ, ਅਤੇ ਹਰ ਐਤਵਾਰ ਉਹ ਆਪਣੇ ਪਰਿਵਾਰ ਨੂੰ ਮਿਲਣ ਲਈ ਸ਼ਿਵ ਨਗਰ ਵਿਚ ਆਉਂਦਾ ਰਹਿੰਦਾ ਹੈ । ਉਸ ਦੇ ਦੋ ਲੜਕੇ ਅਤੇ ਇੱਕ ਲੜਕੀ ਅਤੇ ਰਾਤ ਜਦੋਂ ਅਚਾਨਕ ਮਕਾਨ ਦੀ ਛੱਤ ਡਿੱਗੀ ਤਾਂ ਘਰ ਵਿਚ ਉਸ ਦੀ ਪਤਨੀ ਰੇਖਾ ਉਮਰ 40 ਸਾਲ ਤੇ ਲੜਕੀ ਰਾਜਨ 18 ਸਾਲ ਤੇ ਲੜਕੀ ਪੂਜਾ (19) ਉਸ ਮਕਾਨ ਵਿਚ ਸੌਂ ਰਹੇ ਸਨ, ਛੱਤ ਡਿੱਗਣ ਨਾਲ ਉਸ ਦੀ ਪਤਨੀ ਅਤੇ ਲੜਕੀ ਦੀ ਮੌਤ ਹੋ ਗਈ, ਜਦੋਂ ਉਸ ਦਾ ਵੱਡਾ ਲੜਕਾ ਪ੍ਰਿੰਸ ਜੋ ਵੇਟਰ ਦਾ ਕੰਮ ਕਰਦਾ ਹੈ, ਸਵੇਰੇ ਚਾਰ ਵਜੇ ਆਪਣਾ ਕੰਮ ਖਤਮ ਕਰਕੇ ਘਰ ਆਇਆ ਤਾਂ ਉਸ ਨੇ ਘਰ ਦਾ ਦਰਵਾਜ਼ਾ ਖੜਕਾਇਆ ਪਰ ਅੰਦਰੋ ਕਿਸੇ ਨੇ ਦਰਵਾਜ਼ਾ ਨਾ ਖੋਲ੍ਹਿਆ ਤਾਂ ਉਸ ਨੇ ਕੰਧ ਟੱਪ ਕੇ ਅੰਦਰ ਦਾਖ਼ਲ ਹੋ ਕਿ ਵੇਖਿਆ ਤਾਂ ਘਰ ਦੀ ਛੱਤ ਡਿੱਗੀ ਸੀ। ਲੋਕ ਭਾਰੀ ਗਿਣਤੀ ਵਿਚ ਇਕੱਠੇ ਗਏ ਤੇ ਮਿੱਟੀ ਦੇ ਢੇਰ ਹੇਠ ਦੱਬੇ ਲੋਕਾਂ ਨੂੰ ਬਾਹਰ ਕੱਢਿਆ। ਇਸ ਮੌਕੇ ਵਾਰਡ ਨੰ.39 ਦੇ ਕੌਂਸਲਰ ਗੁਰਦੀਪ ਸਿੰਘ ਨਾਗਰਾ ਪਹੁੰਚ ਗਏ, ਉਨ੍ਹਾਂ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਤੇ ਜਿਸ 'ਤੇ ਪੁਲਿਸ ਡਵੀਜ਼ਨ ਨੰ.1 ਦੇ ਥਾਣਾ ਮੁੱਖੀ ਨਿਰਮਲ ਸਿੰਘ ਨੇ ਪੁਲਿਸ ਨੂੰ ਮੌਕੇ 'ਤੇ ਭੇਜਿਆ ਜਿਸ 'ਤੇ ਲਾਸ਼ਾਂ ਨੂੰ ਮਲਬੇ ਵਿਚੋਂ ਕੱਢ ਕੇ ਸਿਵਲ ਹਸਪਤਾਲ ਪੋਸਟਮਾਰਟਮ ਵਾਸਤੇ ਭੇਜਿਆ। ਘਰ ਦੀ ਛੱਤ ਕੱਚੀ ਸੀ ਜਿਸ 'ਤੇ ਮਿੱਟੀ ਜ਼ਿਆਦਾ ਹੋਣ ਕਾਰਣ ਗਾਡਰ ਵਿੰਗਾ ਹੋ ਗਿਆ। ਰੋਸ਼ਨ ਲਾਲ ਨੇ ਦੱਸਿਆ ਕਿ ਉਸ ਦੀ ਪਤਨੀ ਤੇ ਲੜਕੀ ਘਰਾਂ ਵਿਚ ਮਿਹਨਤ ਮਜ਼ਦੂਰੀ ਕਰਕੇ ਘਰ ਦਾ ਗੁਜ਼ਾਰਾ ਚਲਾਉਂਦੀਆਂ ਸਨ। ਗੁਆਂਢਣ ਨਿਰਮਲਾ ਨੇ ਦੱਸਿਆ ਕਿ ਸਰਸਵਤੀ ਪੂਜਾ ਕਾਰਨ ਸਪੀਕਰ ਦੀ ਆਵਾਜ਼ ਇੰਨੀ ਜ਼ਿਆਦਾ ਸੀ ਕਿ ਸਪੀਕਰ ਦੇ ਰੌਲੇ ਵਿਚ ਛੱਤ ਡਿੱਗਣ ਦਾ ਪਤਾ ਨਹੀ ਲੱਗਾ। ਗੁਰਦੀਪ ਸਿੰਘ ਨਾਗਰਾ ਕੌਂਸਲਰ ਵੀ ਘਟਨਾ ਵਾਲੀ ਜਗ੍ਹਾ ਪਹੁੰਚੇ।

2 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਇਕ ਗ੍ਰਿਫ਼ਤਾਰ

ਖਰੜ, 29 ਜਨਵਰੀ-ਖਰੜ ਸਿਟੀ ਪੁਲਿਸ ਨੇ ਦੋ ਪੇਟੀਆਂ ਸ਼ਰਾਬ ਸਮੇਤ ਇਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਸਿਟੀ ਥਾਣੇ ਦੇ ਐਸ. ਐਚ. ਓ. ਧਰਮਪਾਲ ਨੇ ਦੱਸਿਆ ਕਿ ਸਹਾਇਕ ਥਾਣੇਦਾਰ ਅੰਮ੍ਰਿਤ ਲਾਲ ਨੇ ਖਾਨਪੁਰ ਟੀ-ਪੁਆਇੰਟ 'ਤੇ ਪੁਲਿਸ ਫੋਰਸ ਸਮੇਤ ਨਾਕਾ ਲਗਾਇਆ ਹੋਇਆ ਸੀ ਕਿ ਜਦੋਂ ਵਾਹਨਾਂ ਦੀ ਜਾਂਚ ਕੀਤੀ ਜਾ ਰਹੀ ਸੀ ਤਾਂ ਇਕ ਗੱਡੀ ਵਿਚੋਂ ਦੋ ਪੇਟੀਆਂ ਨਾਜਾਇਜ਼ ਸ਼ਰਾਬ ਜਿਨ੍ਹਾਂ 'ਤੇ ਫੋਰ ਸੇਲ ਇੰਨ ਚੰਡੀਗੜ੍ਹ ਲਿਖਿਆ ਹੋਇਆ ਸੀ ਬਰਾਮਦ ਕੀਤੀਆਂ। ਪੁਲਿਸ ਨੇ ਦਲਬੀਰ ਸਿੰਘ ਨਾਮਕ ਵਿਅਕਤੀ ਖਿਲਾਫ਼ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਠੰਡ ਕਾਰਨ ਇਕ ਮੌਤ

ਬਟਾਲਾ, 29 ਜਨਵਰੀ -ਕੜਾਕੇ ਦੀ ਪੈ ਰਹੀ ਠੰਡ ਕਾਰਨ ਇਥੇ ਇਕ ਵਿਅਕਤੀ ਦੀ ਮੌਤ ਹੋ ਜਾਣ ਦਾ ਸਮਾਚਾਰ ਹੈ। ਠੰਡ ਕਾਰਨ ਮੌਤ ਦੇ ਮੂੰਹ ਵਿਚ ਗਏ ਸਵਿੰਦਰ ਸਿੰਘ 40 ਸਾਲ ਪੁੱਤਰ ਲਾਲ ਸਿੰਘ ਵਾਸੀ ਕ੍ਰਿਸ਼ਨਾ ਕਾਲੋਨੀ ਅਲੀਵਾਲ ਰੋਡ ਬਟਾਲਾ ਦੀ ਭੈਣ ਲਖਵਿੰਦਰ ਕੌਰ ਨੇ ਦੱਸਿਆ ਕਿ ਉਹ ਦਾ ਭਰਾ ਸਵਿੰਦਰ ਸਿੰਘ ਨਸ਼ਾ ਕਰਦਾ ਸੀ, ਇਸ ਲਈ ਬੀਤੀ ਰਾਤ ਵੀ ਉਹ ਨਸ਼ੇ ਦੀ ਹਾਲਤ ਵਿਚ ਘਰ ਤੋਂ ਬਾਹਰ ਹੀ ਲੰਮਾ ਪੈ ਗਿਆ, ਜਿਸ ਕਾਰਨ ਭਾਰੀ ਠੰਡ 'ਚ ਉਸ ਦੀ ਮੌਤ ਹੋ ਗਈ।

ਕਾਂਗਰਸੀ ਉਮੀਦਵਾਰ ਦੇ ਅਸ਼ਲੀਲ ਪੋਸਟਰ ਲੱਗੇ

ਬਠਿੰਡਾ 29 ਜਨਵਰੀ -ਅੱਜ ਇਥੇ ਬਠਿੰਡਾ ਸ਼ਹਿਰ ਵਿਚ ਕਾਂਗਰਸੀ ਉਮੀਦਵਾਰ ਹਰਮੰਦਰ ਸਿੰਘ ਜੱਸੀ ਦੀ ਬਦਨਾਮੀ ਕਰਨ ਲਈ ਸ਼ਰਾਰਤੀ ਵਿਅਕਤੀਆਂ ਨੇ ਵੱਡੀ ਗਿਣਤੀ 'ਚ ਅਸ਼ਲੀਲ ਪੋਸਟਰ ਜਗ੍ਹਾ-ਜਗ੍ਹਾ ਲਗਾ ਦਿੱਤੇ ਅਤੇ ਕਈ ਥਾਂਵਾਂ 'ਤੇ ਵੰਡ ਦਿੱਤੇ, ਜਿਸ ਕਾਰਨ ਸ਼ਹਿਰ ਵਿਚ ਸਥਿਤੀ ਤਣਾਅ ਵਾਲੀ ਬਣੀ ਹੋਈ ਹੈ। ਜੱਸੀ ਨੇ ਇਸਨੂੰ ਵਿਰੋਧੀਆਂ ਦੀ ਹਰਕਤ ਦੱਸਿਆ ਹੈ, ਜਦਕਿ ਅਕਾਲੀ ਉਮੀਦਵਾਰ ਸਰੂਪ ਸਿੰਗਲਾ ਨੇ ਵੀ ਇਸਦੀ ਕਰੜੀ ਨਿੰਦਾ ਕੀਤੀ ਹੈ। ਜਾਣਕਾਰੀ ਮੁਤਾਬਕ ਅੱਜ ਸ਼ਹਿਰ ਵਿਚ ਕਈ ਥਾਂਵਾਂ 'ਤੇ ਹਰਮੰਦਰ ਸਿੰਘ ਜੱਸੀ ਨੂੰ ਬਦਨਾਮ ਕਰਨ ਲਈ ਅਸ਼ਲੀਲ ਪੋਸਟਰ ਲਗਾਏ ਗਏ। ਕੁਝ ਥਾਂਵਾਂ 'ਤੇ ਇਹ ਪੋਸਟਰ ਵੰਡੇ ਵੀ ਗਏ, ਜਦਕਿ ਬਹੁਤ ਸਾਰੀਆਂ ਥਾਂਵਾਂ 'ਤੇ ਪੋਸਟਰ ਖਿਲਾਰ ਦਿੱਤੇ ਗਏ ਤਾਂ ਕਿ ਪਤਾ ਨਾ ਲੱਗੇ ਕਿ ਇਸ ਘਟਨਾ ਦਾ ਮਾਸਟਰਮਾਇੰਡ ਕੌਣ ਹੈ। ਸਿੱਟੇ ਵਜੋਂ ਸ਼ਹਿਰੀਆਂ ਵਲੋਂ ਇਸਨੂੰ ਘਟੀਆ ਕਿਸਮ ਦੀ ਰਾਜਨੀਤੀ ਕਰਾਰ ਦਿੱਤਾ ਗਿਆ ਹੈ। ਲੋਕ ਇਸ ਘਟਨਾ ਲਈ ਰਾਜਨੀਤੀਵਾਨਾਂ ਦੀ ਕਰੜੀ ਨਿੰਦਾ ਕਰ ਰਹੇ ਹਨ। ਸ਼ਹਿਰ ਵਿਚ ਮਾਹੌਲ ਤਣਾਅਪੂਰਨ ਬਣ ਗਿਆ ਹੈ ਤੇ ਕਿਸੇ ਵੀ ਸਮੇਂ ਲੜਾਈ-ਝਗੜਾ ਹੋਣ ਦਾ ਡਰ ਬਣਿਆ ਹੋਇਆ ਹੈ। ਇਸ ਬਾਰੇ ਅਕਾਲੀ ਉਮੀਦਵਾਰ ਸਰੂਪ ਸਿੰਗਲਾ ਨੇ ਕਿਹਾ ਕਿ ਜਿਸਨੇ ਵੀ ਇਹ ਕੀਤਾ, ਬਹੁਤ ਮਾੜੀ ਗੱਲ ਹੈ। ਘਟਨਾ ਪਿੱਛੇ ਕੁਝ ਸ਼ਰਾਰਤੀ ਲੋਕ ਹੋ ਸਕਦੇ ਹਨ, ਜੋ ਸਿਆਸੀ ਧਿਰਾਂ ਦੀ ਆਪਸੀ ਖਹਿਬਾਜ਼ੀ ਦਾ ਲਾਹਾ ਲੈਂਦੇ ਹੋਏ ਆਪਣੀਆਂ ਖੁੰਦਕਾਂ ਕੱਢ ਰਹੇ ਹਨ। ਪੁਲਸ ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਦੋਸ਼ੀਆਂ ਨੂੰ ਸਖ਼ਤ ਸਜ਼ਾਵਾਂ ਤੱਕ ਪਹੁੰਚਾਏ। ਦੂਜੇ ਪਾਸੇ ਹਰਮੰਦਰ ਸਿੰਘ ਜੱਸੀ ਨੇ ਕਿਹਾ ਕਿ ਘਟਨਾ ਪਿੱਛੇ ਵਿਰੋਧੀ ਧਿਰਾਂ ਜ਼ਿੰਮੇਵਾਰ ਹਨ। ਇਸ ਸੰਬੰਧ ਵਿਚ ਉਹ ਪੁਲਸ ਅਤੇ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਕਰਨਗੇ, ਜਦਕਿ ਮਾਨਹਾਨੀ ਦਾ ਦਾਅਵਾ ਵੀ ਕਰਨਗੇ। ਜੱਸੀ ਨੇ ਕਿਹਾ ਕਿ ਇਸ ਘਟਨਾ ਸਦਕਾ ਉਨ੍ਹਾਂ ਦੇ ਦਿਲ ਨੂੰ ਵੱਡੀ ਸੱਟ ਲੱਗੀ ਹੈ, ਪਰ ਕੱਲ ਹੀ ਲੋਕ ਇਸ ਦਾ ਫੈਸਲਾ ਕਰ ਦੇਣਗੇ।

ਸਪੇਨ 'ਚ ਪੰਜਾਬਣ ਦੀ ਚਾਕੂ ਮਾਰ ਕੇ ਹੱਤਿਆ

ਹੁਸ਼ਿਆਰਪੁਰ/ਜਹਾਨਖੇਲਾਂ, 29 ਜਨਵਰੀ- ਸਪੇਨ ਵਿਚ ਰਹਿ ਰਹੀ ਪਿੰਡ ਖੜਕਾਂ ਦੀ ਵਿਆਹੁਤਾ ਦੀ ਕਿਸੇ ਅਣਪਛਾਤੇ ਵਿਅਕਤੀ ਨੇ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਵਿਆਹੁਤਾ ਉਥੇ ਇੱਕ ਧਾਗਾ ਫੈਕਟਰੀ ਵਿਚ ਕੰਮ ਕਰਦੀ ਸੀ। ਪੁਲਿਸ ਨੇ ਵਿਆਹੁਤਾ ਦੀ ਲਾਸ਼ ਕਬਜ਼ੇ ਵਿਚ ਲੈ ਕੇ ਇਸ ਸਬੰਧੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਘਟਨਾ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਪੰਚਾਇਤ ਮੈਂਬਰ ਖੜਕਾਂ ਕੁਲਦੀਪ ਸਿੰਘ ਨੇ ਦੱਸਿਆ ਕਿ 12 ਦਸੰਬਰ 2004 ਤੋਂ ਉਸ ਦਾ ਲੜਕਾ ਅਜੀਤ ਸਿੰਘ ਸੋਢੀ ਸਪੇਨ ਦੇ ਸ਼ਹਿਰ ਅਲੋਟ ਗਰੋਨਾ ਵਿਚ ਪੱਕੇ ਤੌਰ 'ਤੇ ਰਹਿੰਦਾ ਹੈ। ਅਜੀਤ ਦਾ ਵਿਆਹ ਮਨਪ੍ਰੀਤ ਕੌਰ (27) ਵਾਸੀ ਪਟਿਆਲਾ ਨਾਲ ਹੋਇਆ ਸੀ। ਉਸ ਨੇ ਦੱਸਿਆ ਕਿ ਸਪੇਨ ਵਿਚ ਉਸ ਦੀ ਨੂੰਹ ਮਨਪ੍ਰੀਤ ਕੌਰ ਵੀ ਇਕ ਧਾਗਾ ਫੈਕਟਰੀ ਵਿਚ ਕੰਮ ਕਰਨ ਲੱਗੀ। ਕੁਲਦੀਪ ਸਿੰਘ ਦੇ ਮੁਤਾਬਿਕ ਉਸ ਦੀ ਨੂੰਹ ਮਨਪ੍ਰੀਤ ਕੌਰ ਜਦ ਫੈਕਟਰੀ ਤੋਂ ਵਾਪਸ ਸਵੇਰੇ 8 ਵਜੇ ਘਰ ਪਹੁੰਚੀ ਤਾਂ ਕਿਸੇ ਅਣਪਛਾਤੇ ਵਿਅਕਤੀ ਨੇ ਉਸ ਦੀ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ। ਉਸ ਦਾ ਲੜਕਾ ਅਜੀਤ ਸਿੰਘ ਜਦ ਦੁਪਹਿਰ 12 ਵਜੇ ਦੇ ਕਰੀਬ ਘਰ ਪਹੁੰਚਿਆ ਤਾਂ ਮਨਪ੍ਰੀਤ ਦੀ ਖੂਨ ਨਾਲ ਲੱਥਪੱਥ ਹੋਈ ਲਾਸ਼ ਕਮਰੇ ਵਿਚ ਅੰਦਰ ਪਈ ਸੀ। ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਉਸ ਦੇ ਲੜਕੇ ਨੇ ਤੁਰੰਤ ਪੁਲਿਸ ਨੂੰ ਫੋਨ ਕੀਤਾ ਅਤੇ ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਕੁਲਦੀਪ ਸਿੰਘ ਅਨੁਸਾਰ ਸਪੇਨ ਦੀ ਪੁਲਿਸ ਵੱਲੋਂ ਉਥੇ ਰਹਿੰਦੇ ਉਸਦੇ ਪਰਿਵਾਰਕ ਮੈਂਬਰਾਂ ਨੂੰ ਘਟਨਾ ਸਬੰਧੀ ਕੁਝ ਵੀ ਨਹੀਂ ਦੱਸਿਆ ਜਾ ਰਿਹਾ। ਮ੍ਰਿਤਕਾ ਮਨਜੀਤ ਕੌਰ ਆਪਣੇ ਪਿਛੇ ਇੱਕ ਪੰਜ ਸਾਲਾਂ ਦਾ ਬੱਚਾ ਹਰਿਕ੍ਰਿਸ਼ ਸਿੰਘ ਸੋਢੀ ਛੱਡ ਗਈ ਹੈ। ਘਟਨਾ ਦੀ ਖਬਰ ਮਿਲਦੇ ਹੀ ਪਿੰਡ ਖੜਕਾਂ ਅਤੇ ਮਨਪ੍ਰੀਤ ਦੇ ਪੇਕੇ ਘਰ ਵਿਚ ਸੋਗ ਦੀ ਲਹਿਰ ਦੌੜ ਗਈ ਹੈ।

ਡਾਕਟਰ ਹੜਤਾਲ 'ਤੇ ਗਏ ਤਾਂ ਹੱਥ ਕੱਟ ਦਿਆਂਗੇ-ਚੋਬੇ

ਪਟਨਾ, 29 ਜਨਵਰੀ -ਬਿਹਾਰ ਦੇ ਸਿਹਤ ਮੰਤਰੀ ਅਸ਼ਵਨੀ ਕੁਮਾਰ ਚੋਬੇ ਨੇ ਹੜਤਾਲ ਦੀ ਧਮਕੀ ਦੇਣ ਵਾਲੇ ਜੂਨੀਅਰ ਡਾਕਟਰਾਂ ਦੇ ਹੱਥ ਕੱਟ ਦੇਣ ਦੀ ਧਮਕੀ ਦਿੱਤੀ ਹੈ। ਚੋਬੇ ਨੇ ਸਨਿਚਰਵਾਰ ਨੂੰ ਲੋਕ ਸਿਹਤ ਜਾਗਰੂਕਤਾ ਯਾਤਰਾ ਦੀ ਸ਼ੁਰੂਆਤ ਕਰਦਿਆਂ ਕਿਹਾ ਕਿ ਡਾਕਟਰਾਂ ਨੂੰ ਸਮੇਂ ਸਿਰ ਹਸਪਤਾਲ ਪਹੁੰਚਣਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਡਾਕਟਰਾਂ ਨੂੰ ਨਿੱਜੀ ਪ੍ਰੈਕਟਿਸ ਤੋਂ ਕੋਈ ਨਹੀਂ ਰੋਕ ਰਿਹਾ, ਪਰ ਹਸਪਤਾਲ ਦਾ ਕੰਮ ਛੱਡ ਕੇ ਨਿੱਜੀ ਪ੍ਰੈਕਟਿਸ ਕਰਨ ਵਾਲਿਆਂ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਚੋਬੇ ਨੇ ਕਿਹਾ ਕਿ ਲੋਕਾਂ ਦੇ ਕਲਿਆਣ ਦੀ ਜੋ ਵਿਵਸਥਾ ਹੈ, ਉਸ ਨੂੰ ਜੇਕਰ ਤੁਸੀਂ ਸੱਟ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਅਸੀਂ ਹੱਥ ਕੱਟਣਾ ਜਾਣਦੇ ਹਾਂ। ਜ਼ਿਕਰਯੋਗ ਹੈ ਕਿ ਤਨਖਾਹ ਵਧਾਏ ਜਾਣ ਦੀ ਮੰਗ ਨੂੰ ਲੈ ਕੇ ਜੂਨੀਅਰ ਡਾਕਟਰਾਂ ਨੇ 31 ਜਨਵਰੀ ਤੋਂ ਹੜਤਾਲ 'ਤੇ ਜਾਣ ਦਾ ਐਲਾਨ ਕੀਤਾ ਹੈ। ਜਦੋਂ ਇਸ ਬਿਆਨ ਸਬੰਧੀ ਸਿਹਤ ਮੰਤਰੀ ਤੋਂ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਤਾਂ ਕੇਵਲ ਇਕ ਉਦਾਹਰਣ ਦੇ ਕੇ ਡਾਕਟਰਾਂ ਨੂੰ ਸਜ਼ਾ ਦੇਣ ਦੀ ਕਾਰਵਾਈ ਕਰਨ 'ਤੇ ਜੂਨੀਅਰ ਡਾਕਟਰਾਂ ਦੇ ਹੱਥ ਕੱਟਣ ਸਬੰਧੀ ਬਿਆਨ ਦਿੱਤਾ ਸੀ। ਉਨ੍ਹਾਂ ਕਿਹਾ ਕਿ ਜੂਨੀਅਰ ਡਾਕਟਰਾਂ ਵੱਲੋਂ ਤਨਖਾਹਾਂ ਵਧਾਉਣ ਦੀ ਮੰਗ ਦੇ ਚਲਦਿਆਂ ਸਿਹਤ ਸੇਵਾਵਾਂ ਪ੍ਰਭਾਵਿਤ ਹੁੰਦੀਆਂ ਹਨ। ਵਿਧਾਨ ਸਭਾ ਪ੍ਰੀਸ਼ਦ ਦੇ ਸਭਾਪਤੀ ਤਾਰਾਕਾਂਤ ਝਾਅ, ਜਿਨ੍ਹਾਂ ਨੇ ਕੱਲ੍ਹ ਪ੍ਰੋਗਰਾਮ ਨੂੰ ਸੰਬੋਧਨ ਕੀਤਾ, ਨੇ ਕਿਹਾ ਸੀ ਕਿ ਪੇਂਡੂ ਇਲਾਕਿਆਂ 'ਚ ਸਿਹਤ ਸੇਵਾਵਾਂ ਚੰਗੇ ਮਿਆਰ ਦੀਆਂ ਨਹੀਂ ਹਨ ਅਤੇ ਸਿਹਤ ਮੰਤਰੀ ਨੂੰ ਬਿਹਾਰ ਵਿਚ ਸਿਹਤ ਸੇਵਾਵਾਂ ਨੂੰ ਸੁਧਾਰਨ ਲਈ ਕਾਰਜ ਯੋਜਨਾ ਲਈ ਸਲਾਹ ਦਿੱਤੀ ਸੀ। ਪ੍ਰੋਗਰਾਮ ਵਿਚ ਇਸ ਤੋਂ ਇਲਾਵਾ ਸਪੀਕਰ ਉਦੈ ਨਰਾਇਣ ਚੌਧਰੀ, ਖੇਤੀਬਾੜੀ ਮੰਤਰੀ ਨਰਿੰਦਰ ਸਿੰਘ, ਸ਼ਹਿਰੀ ਵਿਕਾਸ ਮੰਤਰੀ ਪ੍ਰੇਮ ਕੁਮਾਰ ਨੇ ਵੀ ਸੰਬੋਧਨ ਕੀਤਾ।

ਮਨਮੋਹਨ ਸਿੰਘ ਇਮਾਨਦਾਰ ਵਿਅਕਤੀ-ਗਿਲਾਨੀ

ਇਸਲਾਮਾਬਾਦ, 29 ਜਨਵਰੀ -ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਯੂਸਫ ਰਜ਼ਾ ਗਿਲਾਨੀ ਨੇ ਪ੍ਰਧਾਨ ਮੰਤਰੀ ਡਾ: ਮਨਮੋਹਨ ਸਿੰਘ ਨੂੰ ਇਮਾਨਦਾਰ ਵਿਅਕਤੀ ਦੱਸਿਆ ਹੈ ਅਤੇ ਕਿਹਾ ਕਿ ਉਹ ਪਾਕਿਸਤਾਨ ਦੇ ਨਾਲ ਕਸ਼ਮੀਰ ਸਮੇਤ ਸਾਰੇ ਮੁੱਦਿਆਂ ਦਾ ਹੱਲ ਚਾਹੁੰਦੇ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਸਾਡੀ ਭਾਰਤ ਨਾਲ ਗੱਲਬਾਤ ਸ਼ੁਰੂ ਹੋ ਗਈ ਹੈ ਅਤੇ ਇਕ-ਦੂਜੇ ਨਾਲ ਵਪਾਰਕ ਸਬੰਧ ਸਮਾਨ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਾਂ, ਜਿਸ ਨਾਲ ਦੋਵਾਂ ਦੇਸ਼ਾਂ ਨੂੰ ਫਾਇਦਾ ਹੋਵੇਗਾ। ਉਹ ਸਵਿਟਜ਼ਰਲੈਂਡ ਦੇ ਡਾਵੋਸ ਸ਼ਹਿਰ ਵਿਚ ਆਏ ਹੋਏ ਹਨ।

ਸਰਕਾਰ ਸੀਨੀਅਰ ਅਧਿਕਾਰੀਆਂ ਨੂੰ ਚੋਣ ਲੜਨ
ਤੋਂ ਰੋਕੇ-ਚੋਣ ਕਮਿਸ਼ਨ

ਨਵੀਂ ਦਿੱਲੀ, 29 ਜਨਵਰੀ -ਵੱਡੀ ਗਿਣਤੀ ਵਿਚ ਸੀਨੀਅਰ ਸਰਕਾਰੀ ਅਧਿਕਾਰੀਆਂ ਵੱਲੋਂ ਚੋਣ ਅਖਾੜੇ ਵਿਚ ਕੁੱਦਣ ਤੋਂ ਚਿੰਤਤ ਚੋਣ ਕਮਿਸ਼ਨ ਨੇ ਸਰਕਾਰ ਨੂੰ ਕਿਹਾ ਕਿ ਉਹ ਇਨ੍ਹਾਂ ਅਧਿਕਾਰੀਆਂ ਨੂੰ ਸਰਕਾਰੀ ਨੌਕਰੀ ਛੱਡਣ ਅਤੇ ਕਿਸੇ ਰਾਜਸੀ ਪਾਰਟੀ ਵਿਚ ਸ਼ਾਮਿਲ ਹੋਣ ਲਈ ਸਮੇਂ ਦੀ ਸ਼ਰਤ ਲਾਵੇ। ਹਾਲ ਹੀ ਵਿਚ ਕਰਮਚਾਰੀ ਵਿਭਾਗ ਨੂੰ ਇਸ ਸਬੰਧੀ ਚੋਣ ਕਮਿਸ਼ਨ ਦਾ ਪੱਤਰ ਮਿਲਿਆ ਹੈ, ਜਿਸ ਵਿਚ ਉਸ ਨੇ ਆਈ. ਏ. ਐਸ., ਆਈ. ਪੀ. ਐਸ. ਅਤੇ ਦੂਸਰੇ ਏ ਕਲਾਸ ਅਧਿਕਾਰੀਆਂ ਦੇ ਸੇਵਾ ਨਿਯਮਾਂ ਵਿਚ ਸੋਧਾਂ ਦਾ ਸੁਝਾਅ ਦਿੱਤਾ ਹੈ। ਮੌਜੂਦਾ ਸਮੇਂ ਸੇਵਾ ਨਿਯਮਾਂ ਮੁਤਾਬਕ ਇਕ ਸਰਕਾਰੀ ਅਧਿਕਾਰੀ ਆਪਣੀ ਸੇਵਾ-ਮੁਕਤੀ ਤੋਂ ਇਕ ਸਾਲ ਤੱਕ ਕੋਈ ਪ੍ਰਾਈਵੇਟ ਨੌਕਰੀ ਨਹੀਂ ਕਰ ਸਕਦਾ, ਪਰ ਰਾਜਸੀ ਪਾਰਟੀਆਂ ਜਾਂ ਸਰਗਰਮ ਰਾਜਨੀਤੀ ਵਿਚ ਹਿੱਸਾ ਲੈਣ ਸਬੰਧੀ ਕੋਈ ਨਿਯਮ ਮੌਜੂਦ ਨਹੀਂ। ਕਮਿਸ਼ਨ ਨੇ ਕਰਮਚਾਰੀ ਅਤੇ ਸਿਖਲਾਈ ਵਿਭਾਗ ਨੂੰ ਸੁਝਾਅ ਦਿੱਤਾ ਕਿ ਉਹ ਇਨ੍ਹਾਂ ਅਧਿਕਾਰੀਆਂ ਨੂੰ ਸੇਵਾ-ਮੁਕਤੀ ਤੋਂ ਪਿੱਛੋਂ ਕੁਝ ਅਰਸਾ ਰਾਜਨੀਤੀ ਤੋਂ ਦੂਰ ਰੱਖਣ ਲਈ ਸੇਵਾ-ਨਿਯਮਾਂ 'ਚ ਸੋਧ ਕਰੇ, ਤਾਂ ਜੋ ਉਹ ਸਰਕਾਰੀ ਅਧਿਕਾਰੀ ਵਜੋਂ ਆਪਣੇ ਸੇਵਾ ਕਾਲ ਦੌਰਾਨ ਨਿਰਪੱਖ ਰਹਿਣ ਅਤੇ ਇਮਾਨਦਾਰੀ ਨਾਲ ਫ਼ੈਸਲੇ ਲੈਣ।

ਸੇਵਾ-ਮੁਕਤੀ 'ਤੇ ਮਿਲੇਗੀ 1000 ਰੁਪਏ ਪੈਨਸ਼ਨ

ਨਵੀਂ ਦਿੱਲੀ, 29 ਜਨਵਰੀ-ਪ੍ਰਾਵੀਡੈਂਟ ਫੰਡ ਸੰਸਥਾ ਦਾ ਪੀ. ਐਫ. ਓ. ਤਹਿਤ ਪੈਨਸ਼ਨ ਪਾਉਣ ਵਾਲਿਆਂ ਨੂੰ ਜਲਦੀ ਹੀ ਖੁਸ਼ਖਬਰੀ ਮਿਲ ਸਕਦੀ ਹੈ। ਈ. ਪੀ. ਐਫ. ਓ. 1000 ਰੁਪਏ ਮਾਸਿਕ ਪੈਨਸ਼ਨ ਨਿਰਧਾਰਤ ਕਰ ਸਕਦਾ ਹੈ। ਕੇਂਦਰੀ ਬੋਰਡ ਆਫ ਟਰੱਸਟੀ ਦੀ 22 ਫਰਵਰੀ ਨੂੰ ਹੋਣ ਵਾਲੀ ਮੀਟਿੰਗ ਵਿਚ ਇਸ ਬਾਰੇ ਫੈਸਲਾ ਲਿਆ ਜਾ ਸਕਦਾ ਹੈ। ਜੇਕਰ ਇਹ ਫੈਸਲਾ ਹੁੰਦਾ ਹੈ ਤਾਂ ਪੈਨਸ਼ਨਰਾਂ ਦੀ ਬੇਸਿਕ ਤਨਖਾਹ ਅਤੇ ਮਹਿੰਗਾਈ ਭੱਤੇ ਦੇ ਲਈ ਇਸ ਤੋਂ ਇਲਾਵਾ 0.63 ਪ੍ਰਤੀਸ਼ਤ ਦਾ ਭਾਰ ਪਵੇਗਾ। ਸੀ. ਬੀ. ਟੀ. ਕਰਮਚਾਰੀ ਵਰਤਮਾਨ ਪ੍ਰਾਵੀਡੈਂਟ ਫੰਡ ਸੰਗਠਨ ਦਾ ਮੁੱਖ ਫੈਸਲਾ ਹੈ। ਸੂਤਰਾਂ ਦੇ ਮੁਤਾਬਿਕ ਦਸੰਬਰ ਵਿਚ ਹੋਈ ਸੀ. ਬੀ. ਟੀ. ਦੀ ਬੈਠਕ ਵਿਚ ਇਹ ਫੈਸਲਾ ਰੱਦ ਕਰ ਦਿੱਤਾ ਗਿਆ ਸੀ। ਸੂਤਰਾਂ ਦੇ ਮੁਤਾਬਿਕ 22 ਫਰਵਰੀ ਨੂੰ ਹੋਣ ਵਾਲੀ ਮੀਟਿੰਗ ਦਾ ਮੁੱਦਾ ਨਿਰਧਾਰਤ ਨਹੀਂ ਹੋਇਆ ਹੈ, ਪਰ ਮੁੱਦੇ 'ਤੇ ਚਰਚਾ ਜ਼ਰੂਰ ਹੋਵੇਗੀ। 31 ਮਾਰਚ 2010 ਤੱਕ ਦੇ ਅੰਕੜਿਆਂ ਅਨੁਸਾਰ ਈ. ਪੀ. ਐਫ. ਓ. ਵਿਚ 35 ਲੱਖ ਪੈਨਸ਼ਨਰ ਦਰਜ ਹਨ। ਇਨ੍ਹਾਂ ਵਿਚੋਂ 14 ਲੱਖ ਨੂੰ ਹਰ ਮਹੀਨੇ 500 ਰੁਪਏ ਤੋਂ ਘੱਟ ਪੈਨਸ਼ਨ ਮਿਲਦੀ ਹੈ। ਇਕ ਹਜ਼ਾਰ ਰੁਪਏ ਪੈਨਸ਼ਨ ਪਾਉਣ ਵਾਲਿਆਂ ਦੀ ਗਿਣਤੀ ਫਿਲਹਾਲ 7 ਲੱਖ ਹੈ। ਅੰਕੜਿਆਂ ਦੇ ਮੁਤਾਬਿਕ ਕਈ ਲੋਕ ਤਾਂ ਹਰ ਮਹੀਨੇ 12 ਤੋਂ 38 ਰੁਪਏ ਪੈਨਸ਼ਨ ਲੈ ਰਹੇ ਹਨ। ਹਾਲਾਂ ਕਿ ਪ੍ਰਾਵੀਡੈਂਟ ਫੰਡ ਦੇ ਪ੍ਰਤੀਨਿਧੀਆਂ ਅਤੇ ਕਰਮਚਾਰੀਆਂ ਦੇ ਵਿਚਕਾਰ 1000 ਰੁਪਏ ਪੈਨਸ਼ਨ ਨਿਰਧਾਰਤ ਕਰਨ 'ਤੇ ਸਮਝੌਤਾ ਹੋ ਚੁੱਕਾ ਹੈ, ਪਰ ਇਸ ਤੋਂ ਇਲਾਵਾ ਜਮ੍ਹਾਂ ਪੂੰਜੀ ਦੀਆਂ ਜ਼ਰੂਰਤਾਂ ਨੂੰ ਵਧਾਏ ਜਾਣ 'ਤੇ ਕੋਈ ਫੈਸਲਾ ਨਹੀਂ ਹੋਇਆ ਹੈ।

ਸਿੰਘਵੀ ਵੱਲੋਂ ਹਜ਼ਾਰੇ ਖਿਲਾਫ਼ ਗਵਾਹ ਵਜੋਂ ਉਨ੍ਹਾਂ ਦੇ
ਸੰਮਨ ਵਾਪਸ ਲੈਣ ਲਈ ਅਰਜ਼ੀ

ਨਵੀਂ ਦਿੱਲੀ, 29 ਜਨਵਰੀ -ਕਾਂਗਰਸ ਦੇ ਰਾਜ ਸਭਾ ਮੈਂਬਰ ਅਭਿਸ਼ੇਕ ਮਨੂ ਸਿੰਘਵੀ ਨੇ ਦਿੱਲੀ ਦੀ ਇਕ ਅਦਲਾਤ ਵਿਚ ਅਰਜ਼ੀ ਦੇ ਕੇ ਸਮਾਜ ਸੇਵੀ ਅੰਨਾ ਹਜ਼ਾਰੇ ਅਤੇ ਉਨ੍ਹਾਂ ਦੀ ਟੀਮ ਵਿਰੁੱਧ ਇਕ ਸ਼ਿਕਾਇਤ ਵਿਚ ਗਵਾਹ ਵਜੋਂ ਪੇਸ਼ ਹੋਣ ਲਈ ਉਨ੍ਹਾਂ ਨੂੰ ਜਾਰੀ ਸੰਮਨ ਵਾਪਸ ਲੈਣ ਦੀ ਮੰਗ ਕੀਤੀ ਹੈ। ਸ੍ਰੀ ਸਿੰਘਵੀ ਨੇ ਕਮਲਾ ਮਾਰਕੀਟ ਮੈਟਰੋਪੋਲੀਟਨ ਮਜਿਸਟਰੇਟ ਦੀ ਅਦਾਲਤ ਵਿਚ ਅਰਜ਼ੀ ਦਿੱਤੀ ਹੈ, ਜਿਸ ਨੇ ਉਨ੍ਹਾਂ ਨੂੰ ਇਕ ਵਿਅਕਤੀ ਵੱਲੋਂ ਦਾਇਰ ਸ਼ਿਕਾਇਤ ਵਿਚ ਸੰਮਨ ਭੇਜਿਆ ਸੀ। ਇਸ ਵਿਅਕਤੀ ਨੇ ਪਟੀਸ਼ਨ ਦਾਇਰ ਕਰਕੇ ਦੋਸ਼ ਲਾਇਆ ਕਿ ਅਗਸਤ ਮਹੀਨੇ ਭ੍ਰਿਸ਼ਟਾਚਾਰ ਵਿਰੋਧੀ ਅੰਦੋਲਨ ਦੌਰਾਨ ਟੀਮ ਅੰਨਾ ਨੇ ਜਨਤਾ ਨੂੰ ਸਰਕਾਰ ਖਿਲਾਫ ਭੜਕਾਇਆ ਸੀ। ਉਨ੍ਹਾਂ ਵਲੋਂ ਦਾਇਰ ਅਰਜ਼ੀ 'ਚ ਉਨ੍ਹਾਂ ਕਿਹਾ ਕਿ ਬਿਨੈਕਾਰ ਉਨ੍ਹਾਂ ਨੂੰ ਜਾਰੀ ਸੰਮਨ ਵਾਪਸ ਲੈਣ ਦੀ ਮੰਗ ਕਰਦਾ ਹੈ, ਕਿਉਂਕਿ ਉਸ ਦਾ ਸ਼ਿਕਾਇਤ ਕਰਨ ਵਾਲੇ ਜਾਂ ਮੌਜੂਦਾ ਕੇਸ ਨਾਲ ਕੋਈ ਸਬੰਧ ਨਹੀਂ। ਹਰਿਆਣਾ ਵਾਸੀ ਸਤਬੀਰ ਨੇ ਸ੍ਰੀ ਸਿੰਘਵੀ ਦੀ ਸਹਿਮਤੀ ਤੋਂ ਬਿਨਾਂ ਹੀ ਉਨ੍ਹਾਂ ਦਾ ਨਾਂਅ ਗਵਾਹ ਵਜੋਂ ਰੱਖ ਲਿਆ ਸੀ। ਅਦਾਲਤ ਨੇ ਭ੍ਰਿਸ਼ਟਾਚਾਰ ਵਿਰੋਧੀ ਅੰਦੋਲਨ ਦੌਰਾਨ ਜਨਤਾ ਨੂੰ ਸਰਕਾਰ ਖਿਲਾਫ ਭੜਕਾਉਣ ਲਈ ਹਜ਼ਾਰੇ ਅਤੇ ਉਨ੍ਹਾਂ ਦੀ ਟੀਮ ਖਿਲਾਫ ਅਪਰਾਧਿਕ ਕੇਸ ਦਰਜ ਕਰਨ ਲਈ ਦਾਇਰ ਸਤਬੀਰ ਦੀ ਅਪੀਲ ਨੂੰ ਖਾਰਜ ਕਰਦਿਆਂ ਉਸ ਨੂੰ ਆਪਣੇ ਦੋਸ਼ਾਂ ਦੇ ਪੱਖ ਵਿਚ ਗਵਾਹੀ ਪੇਸ਼ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਸੀ। ਸਿੰਘਵੀ ਨੇ ਕਿਹਾ ਕਿ ਉਹ ਸ਼ਿਕਾਇਤ ਕਰਨ ਵਾਲੇ ਨੂੰ ਨਹੀਂ ਜਾਣਦਾ ਅਤੇ ਨਾ ਹੀ ਉਨ੍ਹਾਂ ਦਾ ਇਸ ਸ਼ਿਕਾਇਤ ਨਾਲ ਕੋਈ ਸਬੰਧ ਹੈ, ਇਸ ਲਈ ਉਨ੍ਹਾਂ ਨੂੰ ਭੇਜੇ ਸੰਮਨ ਵਾਪਸ ਲਏ ਜਾਣ। ਅਦਾਲਤ ਨੇ ਉਨ੍ਹਾਂ ਦੀ ਅਰਜ਼ੀ 'ਤੇ ਸੁਣਵਾਈ 17 ਮਾਰਚ 'ਤੇ ਪਾ ਦਿੱਤੀ ਹੈ।

ਸਚਿਨ ਪਾਇਲਟ ਦੇ ਸੁਰੱਖਿਆ ਕਰਮੀ ਵੱਲੋਂ ਖੁਦਕੁਸ਼ੀ

ਨਵੀਂ ਦਿੱਲੀ,29 ਜਨਵਰੀ -ਕੇਂਦਰੀ ਸੰਚਾਰ ਰਾਜ ਮੰਤਰੀ ਸਚਿਨ ਪਾਇਲਟ ਦੇ ਘਰ ਸੁਰੱਖਿਆ ਲਈ ਤਾਇਨਾਤ ਇਕ ਸੁਰੱਖਿਆ ਕਰਮੀ ਨੇ ਅੱਜ ਸਵੇਰੇ ਆਪਣੀ ਸਰਵਿਸ ਰਾਈਫ਼ਲ ਨਾਲ ਆਪਣੇ-ਆਪ ਨੂੰ ਗੋਲੀ ਮਾਰ ਕੇ ਆਤਮ ਹੱਤਿਆ ਕਰ ਲਈ। ਉਸ ਦੀ ਪਛਾਣ ਈਨਾਪੂ ਦੇ ਤੌਰ 'ਤੇ ਕੀਤੀ ਗਈ ਅਤੇ ਉਹ ਨਾਗਾਲੈਂਡ ਦੇ ਕੋਹਿਮਾ ਦਾ ਨਿਵਾਸੀ ਸੀ। ਇਕ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਉਹ 6 ਦਿਨ ਪਹਿਲਾਂ ਕੋਹਿਮਾ ਤੋਂ ਵਾਪਸ ਆਇਆ ਸੀ ਅਤੇ ਪਰੇਸ਼ਾਨ ਸੀ। ਮੌਕੇ ਤੋਂ ਕੋਈ ਖੁਦਕਸ਼ੀ ਨੋਟ ਪ੍ਰਾਪਤ ਨਹੀਂ ਹੋਇਆ ਹੈ।

ਪਾਕਿਸਤਾਨ ਨੇ 22 ਭਾਰਤੀ ਮਛੇਰੇ ਫੜੇ

ਇਸਲਾਮਾਬਾਦ, 29 ਜਨਵਰੀ-ਇਕ ਅਧਿਕਾਰੀ ਬੁਲਾਰੇ ਨੇ ਐਤਵਾਰ ਨੂੰ ਦੱਸਿਆ ਕਿ ਪਾਕਿਸਤਾਨੀ ਅਧਿਕਾਰੀਆਂ ਨੇ ਦੇਸ਼ ਦੀ ਸਮੁੰਦਰੀ ਸਰਹੱਦ ਦੀ ਉਲੰਘਣਾ ਕਰਨ 'ਤੇ 22 ਭਾਰਤੀ ਮਛੇਰੇ ਅਤੇ ਚਾਰ ਕਿਸ਼ਤੀਆਂ ਨੂੰ ਕਬਜ਼ੇ 'ਚ ਲੈ ਲਿਆ ਹੈ। ਇਕ ਏਜੰਸੀ ਦੇ ਬੁਲਾਰੇ ਨੇ ਦੱਸਿਆ ਕਿ ਇਹ ਮਛੇਰੇ ਸਮੁੰਦਰੀ ਸੁਰੱਖਿਆ ਏਜੰਸੀ ਦੀ ਰੋਜ਼ਾਨਾ ਦੀ ਗਸ਼ਤ ਦੌਰਾਨ ਹਿਰਾਸਤ 'ਚ ਲਏ ਗਏ ਸਨ। ਉਨ੍ਹਾਂ ਦੱਸਿਆ ਕਿ ਪਾਕਿਸਤਾਨੀ ਪਾਣੀ ਅੰਦਰ ਲਗਭਗ 70 ਸਮੁੰਦਰੀ ਮੀਲ 'ਚ ਨਾਜਾਇਜ਼ ਤੌਰ 'ਤੇ ਦਾਖਲ ਹੋਣ 'ਤੇ ਹਿਰਾਸਤ 'ਚ ਲੈ ਲਿਆ ਗਿਆ। 22 ਮਛੇਰਿਆਂ ਨੂੰ ਅਗਲੀ ਜਾਂਚ ਲਈ ਕਰਾਚੀ 'ਚ ਪੁਲਿਸ ਥਾਣੇ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ। ਕੱਲ੍ਹ ਗ੍ਰਿਫ਼ਤਾਰ ਕੀਤੇ ਗਏ ਭਾਰਤੀ ਮਛੇੜਿਆਂ ਨੂੰ ਮਿਲਾ ਕੇ ਇਸ ਮਹੀਨੇ ਦੀ ਇਹ ਗਿਣਤੀ 53 ਤੱਕ ਪਹੁੰਚ ਗਈ ਹੈ।

ਕਸ਼ਮੀਰ ਦੇ ਲੋਕਾਂ ਨੂੰ ਦਿਨ ਵੇਲੇ ਮਿਲੀ ਠੰਢ ਤੋਂ ਕੁਝ ਰਾਹਤ

ਸ੍ਰੀਨਗਰ, 29 ਜਨਵਰੀ - ਭਾਵੇਂ ਕਿ ਪ੍ਰਦੇਸ਼ 'ਚ ਸਭ ਤੋਂ ਵੱਧ ਸਰਦੀ ਪੈਣ ਦਾ ਮੌਸਮ ਖਤਮ ਹੋ ਗਿਆ ਹੈ, ਫਿਰ ਵੀ ਰਾਤ ਦਾ ਤਾਪਮਾਨ ਕਾਫੀ ਘੱਟ ਰਿਹਾ ਅਤੇ ਲੋਕ ਠੰਢ ਨਾਲ ਕੰਬਦੇ ਰਹੇ। ਦਿਨ ਵੇਲੇ ਜ਼ਰੂਰ ਤਾਪਮਾਨ 'ਚ ਥੋੜ੍ਹਾ ਜਿਹਾ ਵਾਧਾ ਹੋਇਆ। ਲੱਦਾਖ ਦਾ ਇਲਾਕਾ ਅਜੇ ਤੱਕ ਦੇਸ਼ ਦੇ ਦੂਜੇ ਹਿੱਸਿਆਂ ਤੋਂ ਕੱਟਿਆ ਹੋਇਆ ਹੈ ਅਤੇ 434 ਕਿਲੋਮੀਟਰ ਲੰਮਾ ਸ੍ਰੀਨਗਰ-ਲੇਹ ਰਾਸ਼ਟਰੀ ਰਾਜਮਾਰਗ ਪੂਰੀ ਤਰ੍ਹਾਂ ਬੰਦ ਹੈ। ਮੌਸਮ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਆਉਣ ਵਾਲੇ 24 ਘੰਟਿਆਂ 'ਚ ਘਾਟੀ 'ਚ ਮੌਸਮ ਖੁਸ਼ਕ ਰਹਿਣ ਦੇ ਹੀ ਆਸਾਰ ਹਨ। ਉਨ੍ਹਾਂ ਕਿਹਾ ਕਿ ਘੱਟੋ-ਘੱਟ ਤਾਪਮਾਨ ਆਮ ਨਾਲੋਂ ਘੱਟ ਰਹਿਣ ਦੀ ਸੰਭਾਵਨਾ ਹੈ, ਜਦੋਂ ਕਿ ਵੱਧ ਤੋਂ ਵੱਧ ਤਾਪਮਾਨ 'ਚ ਹਲਕਾ ਵਾਧਾ ਹੋ ਸਕਦਾ ਹੈ। 21 ਦਸੰਬਰ ਤੋਂ ਸ਼ੁਰੂ ਹੋਇਆ 40 ਦਿਨਾਂ ਦਾ ਸਭ ਤੋਂ ਵੱਧ ਸਰਦੀ ਦਾ ਪੀਰੀਅਡ ਕੱਲ੍ਹ ਰਾਤ ਖਤਮ ਹੋ ਗਿਆ। ਇਨ੍ਹਾਂ 40 ਦਿਨਾਂ 'ਚ ਘਾਟੀ 'ਚ ਬਹੁਤ ਸਰਦੀ ਪਈ ਅਤੇ ਕਈ ਵਾਰ ਸ੍ਰੀਨਗਰ ਦਾ ਤਾਪਮਾਨ ਮਨਫ਼ੀ 7.8 ਡਿਗਰੀ ਤੱਕ ਪਹੁੰਚ ਗਿਆ।

ਜਨਰਲ ਵੀ. ਕੇ. ਸਿੰਘ ਦੀ ਜਨਮ ਤਰੀਕ 'ਚ ਤਬਦੀਲੀ ਲਈ ਸਰਕਾਰ ਨੇ ਲਿਖਿਆ ਪੱਤਰ 10 ਮਈ, 1950 ਨੂੰ ਮੰਨਿਆ ਜਾਵੇ ਸਹੀ ਨਵੀਂ ਦਿੱਲੀ, 29 ਜਨਵਰੀ -ਰੱਖਿਆ ਮੰਤਰਾਲੇ ਨੇ ਫ਼ੌਜ ਦੀ ਐਡਜੂਟੈਂਟ ਜਨਰਲ ਸ਼ਾਖਾ ਨੂੰ ਪੱਤਰ ਲਿਖ ਕੇ ਸੈਨਾ ਮੁਖੀ ਜਨਰਲ ਵੀ ਕੇ ਸਿੰਘ ਦੀ ਜਨਮ ਤਰੀਕ ਰਿਕਾਰਡ 'ਚ ਤਬਦੀਲੀ ਕਰਨ ਦੀ ਸਲਾਹ ਦਿੱਤੀ ਹੈ। ਸੂਤਰਾਂ ਨੇ ਦੱਸਿਆ ਕਿ ਪੱਤਰ ਵਿਚ ਕਿਹਾ ਗਿਆ ਹੈ ਕਿ ਸੈਨਾ ਮੁਖੀ ਦੇ ਜਨਮ ਤਰੀਕ ਰਿਕਾਰਡ ਵਿਚ ਸੋਧ ਕਰਕੇ ਜਨਮ ਤਰੀਕ ਮਈ 1950 ਦਰਸਾਈ ਜਾਵੇ। ਇਸ ਤਰ੍ਹਾਂ ਦੀ ਸੋਧ ਰੱਖਿਆ ਮੰਤਰਾਲੇ ਦੇ ਇਸ ਪੱਖ ਨਾਲ ਮੇਲ ਖਾਵੇਗੀ ਕਿ 1950 ਦੀ ਜਨਮ ਤਾਰੀਕ ਸਹੀ ਹੈ। ਸੁਪਰੀਮ ਕੋਰਟ ਸੈਨਾ ਮੁਖੀ ਵੱਲੋਂ ਦਾਇਰ ਪਟੀਸ਼ਨ 'ਤੇ 3 ਫਰਵਰੀ ਨੂੰ ਸੁਣਵਾਈ ਕਰੇਗੀ, ਜਿਸ ਵਿਚ ਉਨ੍ਹਾਂ ਮੰਗ ਕੀਤੀ ਸੀ ਕਿ ਸਰਕਾਰ ਨੂੰ ਹਦਾਇਤ ਕੀਤੀ ਜਾਵੇ ਕਿ ਉਸ ਦੀ ਜਨਮ ਤਰੀਕ 10 ਮਈ 1950 ਦੀ ਬਜਾਏ 10 ਮਈ 1951 ਸਹੀ ਮੰਨੇ। ਇਸ ਮੁੱਦੇ 'ਤੇ ਇਕ ਜਨਤਕ ਹਿੱਤ ਪਟੀਸ਼ਨ ਸੁਪਰੀਮ ਕੋਰਟ ਵੱਲੋਂ ਪਹਿਲਾਂ ਹੀ ਖਾਰਜ ਕੀਤੀ ਜਾ ਚੁੱਕੀ ਹੈ। ਰੱਖਿਆ ਮੰਤਰਾਲੇ ਵਲੋਂ ਜਨਰਲ ਸਿੰਘ ਦੀ ਜਨਮ ਤਰੀਕ 10 ਮਈ 1951 ਨੂੰ ਮੰਨਣ ਤੋਂ ਇਨਕਾਰ ਕਰਨ ਪਿੱਛੋਂ ਸੈਨਾ ਮੁਖੀ ਦੀ ਬੇਮਿਸਾਲ ਕਾਰਵਾਈ ਨੇ ਸਰਕਾਰ ਨੂੰ ਸੁਪਰੀਮ ਕੋਰਟ ਖਿੱਚ ਲਿਆਂਦਾ ਹੈ। ਰੱਖਿਆ ਮੰਤਰਾਲੇ ਵਲੋਂ ਸਵੀਕਾਰ ਕੀਤੇ ਰਿਕਾਰਡ ਮੁਤਾਬਕ ਸੈਨਾ ਮੁਖੀ ਇਸ ਸਾਲ ਮਈ ਵਿਚ ਸੇਵਾ ਮੁਕਤ ਹੋ ਜਾਣਗੇ। ਜਨਰਲ ਸਿੰਘ ਨੇ ਆਪਣੀ 68 ਸਫਿਆਂ ਦੀ ਪਟੀਸ਼ਨ ਵਿਚ ਸੁਪਰੀਮ ਕੋਰਟ ਨੂੰ ਦੱਸਿਆ ਕਿ ਸਰਕਾਰ ਨੇ ਇਸ ਤਰੀਕੇ ਨਾਲ ਉਨ੍ਹਾਂ ਨਾਲ ਵਿਵਹਾਰ ਕੀਤਾ ਹੈ, ਜਿਸ ਤੋਂ ਉਨ੍ਹਾਂ ਦੀ ਉਮਰ ਬਾਰੇ ਫ਼ੈਸਲਾ ਕਰਨ ਦੇ ਕਿਸੇ ਤੌਰ-ਤਰੀਕੇ ਅਤੇ ਕੁਦਰਤੀ ਨਿਆਂ ਦੇ ਸਿਧਾਂਤਾਂ ਦੀ ਕੋਈ ਝਲਕ ਨਹੀਂ ਮਿਲਦੀ। ਸਰਕਾਰ ਦੇ ਉਨ੍ਹਾਂ ਦੀ ਜਨਮ ਤਰੀਕ ਮਈ 1951 ਦੀ ਬਜਾਏ ਮਈ 1950 ਮੰਨਣ ਦੇ ਫ਼ੈਸਲੇ ਨੂੰ ਚੁਣੌਤੀ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਉਸ ਸਮੇਂ ਦੇ ਸੈਨਾ ਮੁਖੀ ਦੇ ਵਚਨ 'ਤੇ ਭਰੋਸਾ ਕਰਕੇ ਆਪਣੀ ਜਨਮ ਤਰੀਕ 1950 ਸਵੀਕਾਰ ਕਰ ਲਈ ਸੀ ਨਾ ਕਿ ਫ਼ੌਜ ਦੀ ਸਕੱਤਰੇਤ ਸ਼ਾਖਾ ਨਾਲੇ ਹੋਏ ਸਮਝੌਤੇ ਤਹਿਤ। ਪਟੀਸ਼ਨ ਵਿਚ ਕਿਹਾ ਗਿਆ ਕਿ ਸਰਕਾਰ ਤੋਂ ਇਹ ਸਪਸ਼ਟੀਕਰਨ ਲੈਣ ਦੀ ਲੋੜ ਹੈ ਕਿ ਫ਼ੌਜ ਦੇ ਸਭ ਤੋਂ ਸੀਨੀਅਰ ਅਧਿਕਾਰੀ ਨਾਲ ਇਸ ਤਰ੍ਹਾਂ ਦਾ ਵਿਵਹਾਰ ਕਿਉਂ ਕੀਤਾ ਗਿਆ, ਜਿਸ 'ਚੋਂ ਤੌਰ-ਤਰੀਕਿਆਂ ਅਤੇ ਕੁਦਰਤੀ ਨਿਆਂ ਦੇ ਸਿਧਾਂਤਾਂ ਦੀ ਮੁਕੰਮਲ ਘਾਟ ਰੜਕਦੀ ਹੈ।

ਡੇਰਾ ਸਿਰਸਾ ਵੱਲੋਂ ਸਪੱਸ਼ਟ ਹਮਾਇਤ ਬਾਰੇ ਫ਼ੈਸਲਾ ਨਾ ਲੈਣ 'ਤੇ ਸਥਿਤੀ ਗੁੰਝਲਦਾਰ ਬਣੀ ਅਕਾਲੀ ਦਲ ਦੀ ਸਥਿਤੀ ਇਸ ਵਾਰ ਮਜ਼ਬੂਤ ਸੰਗਰੂਰ, 29 ਜਨਵਰੀ  - ਪੰਜਾਬ ਵਿਧਾਨ ਸਭਾ ਚੋਣਾਂ ਦੌਰਾਨ ਪਿਛਲੇ ਕਈ ਦਿਨ ਤੋਂ ਸਿਆਸੀ ਆਗੂਆਂ ਦੇ ਨਾਲ-ਨਾਲ ਆਮ ਲੋਕਾਂ ਦੀਆਂ ਨਜ਼ਰਾਂ ਵੀ ਡੇਰਾ ਸਿਰਸਾ ਤੋਂ ਹੋਣ ਵਾਲੇ ਫ਼ੈਸਲੇ ਵੱਲ ਲੱਗੀਆਂ ਰਹੀਆਂ। ਡੇਰੇ ਦਾ ਪੰਜਾਬ ਖਾਸ ਕਰ ਮਾਲਵਾ ਖੇਤਰ ਦੀਆਂ 69 ਸੀਟਾਂ ਉਤੇ ਵਿਸ਼ੇਸ਼ ਪ੍ਰਭਾਵ ਮੰਨਿਆ ਜਾਂਦਾ ਹੈ। ਪਿਛਲੀ ਵਾਰ 2007 ਵਿਚ ਡੇਰੇ ਦੇ ਫ਼ੈਸਲੇ ਕਾਰਨ ਮਾਲਵਾ ਖੇਤਰ ਵਿਚ ਅਕਾਲੀ ਦਲ ਨੂੰ ਭਾਰੀ ਨੁਕਸਾਨ ਉਠਾਉਣਾ ਪਿਆ ਸੀ, ਪਰ ਮਾਝਾ ਅਤੇ ਦੁਆਬਾ ਖੇਤਰ ਵਿਚ ਅਕਾਲੀ-ਭਾਜਪਾ ਗਠਜੋੜ ਨੂੰ ਮਿਲੇ ਸਮੱਰਥਨ ਕਾਰਨ ਸਥਿਤੀ ਗਠਜੋੜ ਦੇ ਹੱਕ ਵਿਚ ਬਦਲ ਗਈ ਸੀ। ਇਸ ਵਾਰ ਸਥਿਤੀ 2007 ਨਾਲੋਂ ਕੁਝ ਵੱਖਰੀ ਤਰ੍ਹਾਂ ਦੀ ਹੈ। ਡੇਰੇ ਦੇ ਰਾਜਨੀਤਕ ਵਿੰਗ ਵੱਲੋਂ ਭਾਵੇਂ ਕਿਸੇ ਮਜਬੂਰੀ ਵਿਚ ਕਾਂਗਰਸ ਵੱਲ ਪਲੜਾ ਭਾਰੀ ਰੱਖਿਆ ਜਾ ਰਿਹਾ ਹੈ, ਪਰ ਇਸ ਦੇ ਬਾਵਜੂਦ ਅਕਾਲੀ ਦਲ ਨੂੰ ਮਾਲਵਾ ਖੇਤਰ ਵਿਚ 2007 ਵਰਗਾ ਨੁਕਸਾਨ ਹੋਣ ਦੀ ਸੰਭਾਵਨਾ ਨਹੀਂ। ਇਸ ਵਾਰ ਕੁਝ ਸੀਟਾਂ ਉਤੇ ਡੇਰੇ ਦੇ ਰਾਜਨੀਤਕ ਵਿੰਗ ਵੱਲੋਂ ਅਕਾਲੀ ਦਲ ਅਤੇ ਕੁਝ ਸੀਟਾਂ ਉਤੇ ਪੀ.ਪੀ.ਪੀ. ਉਮੀਦਵਾਰਾਂ ਨੂੰ ਵੀ ਸਮੱਰਥਨ ਦਿੱਤਾ ਜਾ ਰਿਹਾ ਹੈ, ਜਿਸ ਕਾਰਨ ਇਸ ਵਾਰ ਡੇਰਾ ਸਮੱਰਥਨ ਦੀ ਸਥਿਤੀ 2007 ਨਾਲੋਂ ਵੱਖਰੀ ਰਹੇਗੀ। ਇਸ ਵਾਰ ਕਈ ਹਲਕਿਆਂ ਵਿਚ ਕਾਂਗਰਸ ਦੇ ਬਾਗੀ ਉਮੀਦਵਾਰ ਕਾਂਗਰਸੀ ਉਮੀਦਵਾਰਾਂ ਦੇ ਜੜ੍ਹੀਂ ਤੇਲ ਦੇ ਰਹੇ ਹਨ। ਪੀਪਲਜ਼ ਪਾਰਟੀ ਦੀ ਅਗਵਾਈ ਵਾਲਾ ਗਠਜੋੜ ਵੀ ਕਾਂਗਰਸ ਨੂੰ ਹੀ ਨੁਕਸਾਨ ਪਹੁੰਚਾ ਰਿਹਾ ਹੈ। ਜੇ ਇਸ ਗਠਜੋੜ ਦੇ ਉਮੀਦਵਾਰ ਖੜ੍ਹੇ ਨਾ ਹੁੰਦੇ ਤਾਂ ਇਸ ਵੋਟ ਦਾ ਵੱਡਾ ਹਿੱਸਾ ਕਾਂਗਰਸ ਨੂੰ ਭੁਗਤਣਾ ਸੀ। ਕਈ ਹਲਕਿਆਂ ਵਿਚ ਤਾਂ ਇਸ ਗਠਜੋੜ ਦੇ ਉਮੀਦਵਾਰਾਂ ਨੇ ਕਾਂਗਰਸ ਦੇ ਕਹਿੰਦੇ ਕਹਾਉਂਦੇ ਉਮੀਦਵਾਰਾਂ ਨੂੰ ਸਰਦੀ ਵਿਚ ਪਸੀਨੇ ਲਿਆ ਰੱਖੇ ਹਨ। ਦੂਸਰੇ ਪਾਸੇ ਡੇਰੇ ਦੇ ਅਨੇਕਾਂ ਪ੍ਰੇਮੀ ਅਕਾਲੀ ਉਮੀਦਵਾਰਾਂ ਨਾਲ ਸ਼ਰੇਆਮ ਚੱਲ ਰਹੇ ਵਿਖਾਈ ਦੇ ਰਹੇ ਹਨ। ਗੱਲ ਕਰਨ ਉਤੇ ਉਨ੍ਹਾਂ ਦੱਸਿਆ ਕਿ ਉਹ ਡੇਰਾ ਮੁਖੀ ਪਿਤਾ ਜੀ ਦੇ ਹੁਕਮਾਂ ਦੇ ਪਾਬੰਦ ਹਨ, ਡੇਰੇ ਦੇ ਰਾਜਨੀਤਕ ਵਿੰਗ ਦੇ ਨਹੀਂ। ਇਹ ਵੀ ਪਤਾ ਲੱਗਾ ਹੈ ਕਿ ਡੇਰਾ ਸਿਰਸਾ ਵੱਲੋਂ ਕਿਸੇ ਵੀ ਥਾਂ 'ਤੇ ਵੋਟਾਂ ਦੇਣ ਜਾਂ ਨਾ ਦੇਣ ਸਬੰਧੀ ਕੋਈ ਸਪੱਸ਼ਟ ਸੁਨੇਹਾ ਨਹੀਂ ਭੇਜਿਆ ਗਿਆ, ਜਿਸ ਕਰਕੇ ਸਥਿਤੀ ਅਸਪੱਸ਼ਟ ਬਣੀ ਹੋਈ ਹੈ।

1

ਮੈਡੀਕਲ ਜਾਂਚ ਲਈ ਗੁੜਗਾਉਂ ਪਹੁੰਚੇ ਅੰਨਾ ਨਵੀਂ ਦਿੱਲੀ, 29 ਜਨਵਰੀ -ਸਮਾਜਿਕ ਕਾਰਕੁਨ ਅੰਨਾ ਹਜ਼ਾਰੇ ਜੋ ਪਿੱਠ ਦਰਦ ਅਤੇ ਖਾਂਸੀ ਤੋਂ ਪੀੜਤ ਹਨ, ਅੱਜ ਦੇਸ਼ ਦੀ ਰਾਜਧਾਨੀ ਪਹੁੰਚੇ ਅਤੇ ਗੁੜਗਾਉਂ ਵਿਖੇ ਉਨ੍ਹਾਂ ਨੂੰ ਇਕ ਨਿੱਜੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। 74 ਸਾਲਾ ਅੰਨਾ ਹਜ਼ਾਰੇ ਨੂੰ ਮੇਦੰਤਾ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ, ਜਿਥੇ ਉਨ੍ਹਾਂ ਦੇ ਵੱਖ-ਵੱਖ ਚੈੱਕਅੱਪ ਕੀਤੇ ਜਾਣਗੇ। ਹਜ਼ਾਰੇ ਦਵਾਈਆਂ ਦੇ ਸਾਈਡ ਇਫੈਕਟ ਤੋਂ ਪੀੜਤ ਹਨ। ਗਾਂਧੀਵਾਦੀ ਹਜ਼ਾਰੇ ਆਪਣੀਆਂ ਰਿਪੋਰਟਾਂ ਪ੍ਰਾਪਤ ਕਰਨ ਤੋਂ ਬਾਅਦ ਅਗਲੇ ਦੋ-ਤਿੰਨ ਦਿਨਾਂ ਵਿਚ ਆਯੁਰਵੈਦਿਕ ਇਲਾਜ ਲਈ ਬੰਗਲੌਰ ਜਾਣਗੇ। ਅੰਨਾ ਆਪਣੀ ਸਿਹਤ ਠੀਕ ਨਾ ਹੋਣ ਕਾਰਨ ਚੋਣ ਵਾਲੇ ਪੰਜ ਰਾਜਾਂ ਵਿਚ ਨਹੀਂ ਜਾ ਸਕੇ। ਉਨ੍ਹਾਂ ਦੀ ਟੀਮ ਇਨ੍ਹਾਂ ਰਾਜਾਂ ਵਿਚ ਪ੍ਰਚਾਰ ਕਰ ਰਹੀ ਹੈ।