ਧਰਮਿੰਦਰ, ਸ਼ਬਾਨਾ ਤੇ ਪਾਤਰ ਸਣੇ 51 ਨੂੰ ਪਦਮ ਪੁਰਸਕਾਰ ਰਾਸ਼ਟਰਪਤੀ ਪ੍ਰਤਿਭਾ ਪਾਟਿਲ ਤੋਂ ਪਦਮ ਭੂਸ਼ਨ ਪੁਰਸਕਾਰ ਲੈਂਦੇ ਹੋਏ ਅਦਾਕਾਰ ਧਰਮਿੰਦਰ ਤੇ ਅਦਾਕਾਰਾ ਸ਼ਬਾਨਾ ਆਜ਼ਮੀ। ਨਵੀਂ ਦਿੱਲੀ, 5 ਅਪ੍ਰੈਲ-ਆਪਣੇ ਜ਼ਮਾਨੇ ਦੇ ਪ੍ਰਸਿੱਧ ਤੇ ਹਰਮਨ ਪਿਆਰੇ ਅਦਾਕਾਰ ਧਰਮਿੰਦਰ ਤੇ ਅਦਾਕਾਰਾ ਸ਼ਬਾਨਾ ਆਜ਼ਮੀ , ਖਿਡਾਰੀ ਜ਼ਫਰ ਇਕਬਾਲ ਤੇ ਲਿੰਬਾ ਰਾਮ, ਕਲਾਕਾਰ ਮਿਨਾਤੀ ਮਿਸ਼ਰਾ, ਸਨਅਤਕਾਰ ਗੋਪੀਨਾਥ ਪਿਲੇ ਤੇ ਸਵਾਤੀ ਪੀਰਾਮਲ ਸਮੇਤ ਵੱਖ ਵੱਖ ਖੇਤਰਾਂ ਵਿਚ ਨਾਮਣਾ ਖੱਟਣ ਵਾਲੀਆਂ 51 ਸ਼ਖਸੀਅਤਾਂ ਨੂੰ ਰਾਸ਼ਟਰਪਤੀ ਪ੍ਰਤਿਭਾ ਦੇਵੀ ਸਿੰਘ ਪਾਟਿਲ ਨੇ ਪਦਮ ਪੁਰਸਕਾਰਾਂ ਨਾਲ ਸਨਮਾਨਤ ਕੀਤਾ। ਇਸ ਸਬੰਧੀ ਰਾਸ਼ਟਰਪਤੀ ਭਵਨ ਵਿਖੇ ਹੋਏ ਸਮਰੋਹ ਵਿਚ ਉੱਪ ਰਾਸ਼ਟਰਪਤੀ ਹਾਮਿਦ ਅਨਸਾਰੀ, ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ, ਯੂ.ਪੀ.ਏ ਚੇਅਰਪਰਸਨ ਸੋਨੀਆ ਗਾਂਧੀ, ਗ੍ਰਹਿ ਮੰਤਰੀ ਪੀ.ਚਿਦੰਬਰਮ, ਵਣਜ ਮੰਤਰੀ ਆਨੰਦ ਸ਼ਰਮਾ ਤੇ ਅਨੇਕਾਂ ਹੋਰ ਕੈਬਨਿਟ ਮੰਤਰੀਆਂ ਸਮੇਤ ਅਹਿਮ ਸ਼ਖਸੀਅਤਾਂ ਨੇ ਹਿੱਸਾ ਲਿਆ। ਜਿਨ੍ਹਾਂ ਸ਼ਖਸੀਅਤਾਂ ਨੂੰ ਪਦਮ ਵਿਭੂਸ਼ਣ ਪੁਰਸਕਾਰ ਨਾਲ ਸਨਮਾਨਿਆ ਗਿਆ ਉਨ੍ਹਾਂ ਵਿਚ ਭਾਰਤੀ ਕਾਰਟੂਨਿਸਟ ਮਾਰੀਓ ਮਿਰਾਂਡਾ (ਮਰਨ ਉਪਰੰਤ) ਸ਼ਾਮਿਲ ਹੈ ਜਦ ਕਿ ਅਦਾਕਾਰ ਧਰਮਿੰਦਰ , ਅਦਾਕਾਰਾ ਸ਼ਬਾਨਾ ਆਜ਼ਮੀ, ਸਤਿਆ ਨਰਾਇਣ ਗੋਇਨਕਾ, ਵਾਇਲਨਵਾਦਕ ਐਮ. ਐਸ ਗੋਪਾਲਕ੍ਰਿਸ਼ਨਨ, ਉੱਪ ਚੇਅਰਮੈਨ ਟਾਟਾ ਸਟੀਲ ਬੀ. ਮੁਥੂਰਮਨ, ਇਤਿਹਾਸਕਾਰ ਜੋਸ ਪਰੀਰਾ, ਸਰਕਾਰੀ ਅਧਿਕਾਰੀ ਮਾਤਾ ਪ੍ਰਸਾਦ, ਗਣਿਤ ਮਾਹਿਰ ਐਮ. ਐਸ ਰਘੂਨਾਥ, ਪ੍ਰਸਿੱਧ ਜੱਜ ਪੀ. ਸੀ ਰਾਓ, ਸਾਬਕਾ ਵਿਜੀਲੈਂਸ ਕਮਿਸ਼ਨਰ ਨਾਗਅਰਜਨ ਵਿਟਲ ਤੇ ਨਿਓਰੋਲੋਜੀ ਪ੍ਰੋਫੈਸਰ ਮੋਸ਼ੂਰ ਹੋਰਮੂਸਜੀ ਵਾਡੀਆ ਤੇ ਸਿੰਘਾਪੁਰ ਦੇ ਸਾਬਕਾ ਵਿਦੇਸ਼ ਮੰਤਰੀ ਯੰਗ ਬੂਨ ਯਿਓ ਨੂੰ ਪਦਮ ਭੂਸ਼ਣ ਪੁਰਸਕਾਰ ਨਾਲ ਸਨਮਾਨਤ ਕੀਤਾ ਗਿਆ। ਰਾਸ਼ਟਰਪਤੀ ਭਵਨ ਵਿਖੇ ਪਦਮ ਪੁਰਸਕਾਰ ਵੰਡ ਸਮਾਰੋਹ ਦੌਰਾਨ ਰਾਸ਼ਟਰਪਤੀ ਪ੍ਰਤਿਭਾ ਪਾਟਿਲ ਤੋਂ ਪਦਮ ਸ੍ਰੀ ਪੁਰਸਕਾਰ ਪ੍ਰਾਪਤ ਕਰਦੇ ਹੋਏ ਲਿੰਬਾ ਰਾਮ, ਸੁਰਜੀਤ ਪਾਤਰ, ਯਗਨਾਸਵਾਮੀ ਸੁੰਦਰਾ ਰਾਜਨ, ਜ਼ਫਰ ਇਕਬਾਲ, ਸਵਾਤੀ ਪਿਰਾਮਲ, ਫੂਲਬਾਸਨ ਯਾਦਵ, ਸਾਕਰ ਖਾਨ ਮਗੰਨੀਅਰ ਅਤੇ ਪਦਮ ਭੂਸ਼ਨ ਪ੍ਰਾਪਤ ਕਰਦੇ ਹੋਏ ਹੋਮੀ ਕੇ ਭਾਭਾ।  ਇਸ ਤੋਂ ਇਲਾਵਾ ਪ੍ਰਸਿੱਧ ਹਾਕੀ ਖਿਡਾਰੀ ਜਫਰ ਇਕਬਾਲ, ਤੀਰ ਅੰਦਾਜ਼ ਲਿੰਬਾ ਰਾਮ, ਕ੍ਰਿਕਟਰ ਕੁਮੈਂਟੇਟਰ ਰਵੀ ਚਤੁਰਵੇਦੀ, ਪੰਜਾਬੀ ਸ਼ਾਇਰ ਸੁਰਜੀਤ ਪਾਤਰ, ਇਸਰੋ ਪ੍ਰੋਫੈਸਰ ਵਾਈ. ਐਸ. ਰਾਜਨ, ਜੈਨੇਟਿਕ ਇੰਜੀਨੀਅਰਿੰਗ ਐਂਡ ਬਾਇਓਟੈਕਨਾਲੋਜੀ ਬਾਰੇ ਕੌਮਾਂਤਰੀ ਕੇਂਦਰ ਦੇ ਡਾਇਰੈਕਟਰ ਵਰਿੰਦਰ ਸਿੰਘ ਚੌਹਾਨ, ਕੁਈਨ ਆਫ ਲਵਾਨੀ ਯਮੁਨਾਬਾਈ ਵਿਕਰਮ ਜਾਵਲੇ, ਸਿਤਾਰਵਾਦਕ ਸਾਹਿਦ ਪਰਵੇਜ਼ ਖਾਨ, ਪ੍ਰੋ: ਮਹਿਦੀ ਹਸਨ, ਟੈਰਾਕੋਟਾ ਆਰਟਿਸਟ ਮੋਹਨ ਲਾਲ ਕੁੰਮਹਾਰ, ਪ੍ਰਸਿੱਧ ਚਾਰਟਿਡ ਅਕਾਊਂਟੈਂਟ ਯੇਜ਼ਦੀ ਹਿਰਜੀ ਮਾਲੇਗਮ, ਵਾਤਾਵਰਨ ਮਾਹਿਰ ਕੇ.ਵੀ ਸਾਰਾਭਾਈ, ਨਾਵਲਕਾਰ ਇਰਵਿਨ ਐਲਨ ਸੀਲੀ, ਕਲਾ ਇਤਿਹਾਸਕਾਰ ਵਿਜੇ ਸ਼ਰਮਾ, ਚਾਵਲ ਬਰੀਡਰ ਵਿਜੇਪਾਲ ਸਿੰਘ ਸਮੇਤ 38 ਸ਼ਖਸ਼ੀਅਤਾਂ ਨੂੰ ਪਦਮ ਸ੍ਰੀ ਪੁਰਸਕਾਰ ਨਾਲ ਨਿਵਾਜਿਆ ਗਿਆ। ਕਲਾਕਾਰ ਕੇ. ਜੀ ਸੁਬਰਾਮਨੀਅਨ, ਇਤਿਹਾਸਕਾਰ ਜੋਸ ਪਰੀਰਾ ਤੇ ਡਾ ਜੁਗਲ ਕਿਸ਼ੋਰ ਨੂੰ ਮਰਨ ਉਪਰੰਤ ਪੁਰਸਕਾਰਾਂ ਨਾਲ ਸਨਮਾਨਿਆ ਗਿਆ।

ਹਾਰੇ ਕਾਂਗਰਸੀ ਉਮੀਦਵਾਰਾਂ ਦੀ ਮੀਟਿੰਗ 'ਚ ਉੱਠੀ ਕੈਪਟਨ ਦੇ ਅਸਤੀਫੇ ਦੀ ਮੰਗ ਖਹਿਰਾ, ਸੀਬੀਆ, ਬਾਂਸਲ ਅਤੇ ਨਾਭਾ ਨੇ ਕੀਤਾ ਵਾਕ ਆਊਟ ਚੰਡੀਗੜ੍ਹ ਵਿਖੇ ਹੋਈ ਕਾਂਗਰਸ ਦੀ ਮੀਟਿੰਗ ਵਿਚ ਕੈਪਟਨ ਅਮਰਿੰਦਰ ਸਿੰਘ ਅਤੇ ਨਾਲ ਹਾਰੇ ਹੋਏ ਕਾਂਗਰਸੀ ਵਿਧਾਨਕਾਰ। ਚੰਡੀਗੜ੍ਹ, 5 ਅਪ੍ਰੈਲ -ਪੰਜਾਬ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਵੱਲੋਂ ਪੰਜਾਬ ਵਿਧਾਨ ਸਭਾ ਦੀਆਂ ਹੋਈਆਂ ਚੋਣਾਂ ਦੌਰਾਨ ਪਾਰਟੀ ਦੇ ਹਾਰੇ ਜਿਨ੍ਹਾਂ 71 ਉਮੀਦਵਾਰਾਂ ਦੀ ਅੱਜ ਇਥੇ ਬੈਠਕ ਸੱਦੀ ਸੀ ਉਸ ਵਿਚ ਪਹਿਲਾਂ ਤੋਂ ਐਲਾਨੇ ਜਾ ਰਹੇ ਪਾਰਟੀ ਦੀ ਹਾਰ ਦੇ ਕਾਰਨ ਵਿਚਾਰਨ ਦੀ ਥਾਂ ਇਸ ਮੀਟਿੰਗ ਨੂੰ ਕੇਵਲ ਇਕ ਚਾਹ ਪਾਰਟੀ ਤੱਕ ਹੀ ਸੀਮਤ ਕਰ ਦਿੱਤਾ ਗਿਆ, ਹਾਲਾਂਕਿ ਹਾਜ਼ਰ ਹੋਏ ਹਾਰੇ ਉਮੀਦਵਾਰਾਂ ਵਿਚੋਂ ਚਾਰ ਪਾਰਟੀ ਆਗੂਆਂ ਸ. ਸੁਖਪਾਲ ਸਿੰਘ ਖਹਿਰਾ, ਸੁਰਿੰਦਰਪਾਲ ਸਿੰਘ ਸੀਬੀਆ, ਮੰਗਤ ਰਾਏ ਬਾਂਸਲ ਅਤੇ ਰਣਦੀਪ ਸਿੰਘ ਨਾਭਾ ਨੇ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਦੀ ਕਾਰਗੁਜ਼ਾਰੀ ਸਬੰਧੀ ਨੁਕਤਾਚੀਨੀ ਕਰਦਿਆਂ ਮੀਟਿੰਗ ਤੋਂ ਵਾਕਆਊਟ ਕਰ ਦਿੱਤਾ ਅਤੇ ਇਸ ਗੱਲ 'ਤੇ ਰੋਸ ਜ਼ਾਹਿਰ ਕੀਤਾ ਕਿ ਉਨ੍ਹਾਂ ਨੂੰ ਇਸ ਮੀਟਿੰਗ ਦਾ ਸੱਦਾ ਪੱਤਰ ਇਹ ਕਹਿ ਕੇ ਦਿੱਤਾ ਗਿਆ ਸੀ ਕਿ ਅੱਜ ਦੀ ਮੀਟਿੰਗ ਵਿਚ ਪਾਰਟੀ ਦੀ ਹਾਰ ਦੇ ਕਾਰਨਾਂ ਦੀ ਪੜਚੋਲ ਕੀਤੀ ਜਾਣੀ ਹੈ। ਵਾਕਆਊਟ ਕਰਨ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਇਨ੍ਹਾਂ ਆਗੂਆਂ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਵੱਲੋਂ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਤੋਂ ਅਸਤੀਫੇ ਦੀ ਮੰਗ ਕੀਤੀ ਗਈ,  ਕਿਉਂਕਿ ਉਨ੍ਹਾਂ ਦੀ ਅਗਵਾਈ ਵਿਚ ਪਾਰਟੀ ਲਗਾਤਾਰ ਦੋ ਵਾਰ ਚੋਣਾਂ ਹਾਰ ਗਈ ਹੈ। ਉਨ੍ਹਾਂ ਇਹ ਵੀ ਦੋਸ਼ ਲਗਾਇਆ ਕਿ ਪਾਰਟੀ ਹਾਰ ਕਾਰਨ ਜਦੋਂ ਵਰਕਰ ਬੇਹੱਦ ਮਾਯੂਸੀ ਅਤੇ ਸਹਿਮ ਦੀ ਹਾਲਤ ਵਿਚੋਂ ਗੁਜ਼ਰ ਰਹੇ ਸਨ, ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਤੇ ਉਨ੍ਹਾਂ ਦੀ ਜੁੰਡਲੀ ਹੋਲੀ ਦੀਆਂ ਪਾਰਟੀਆਂ ਕਰ ਰਹੀ ਸੀ। ਜਦੋਂਕਿ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨਾ ਸ਼ਹੀਦ ਭਗਤ ਸਿੰਘ ਦੇ ਸਮਾਗਮ ਵਿਚ ਹਾਜ਼ਰ ਹੋਏ ਅਤੇ ਨਾ ਹੀ ਪਾਰਟੀ ਦੇ ਵਿਧਾਨਕਾਰ ਸੰਨੀ ਬਰਾੜ ਦੇ ਭੋਗ 'ਤੇ ਹੀ ਪੁੱਜੇ। ਸ੍ਰੀ ਮੰਗਤ ਰਾਏ ਬਾਂਸਲ ਨੇ ਦੋਸ਼ ਲਗਾਇਆ ਕਿ ਦਲਾਲਾਂ ਨੇ ਪਾਰਟੀ ਨੂੰ ਇਸ ਚੋਣ ਵਿਚ ਹਰਾ ਦਿੱਤਾ। ਉਨ੍ਹਾਂ ਇਹ ਵੀ ਦੋਸ਼ ਲਗਾਇਆ ਕਿ ਪਾਰਟੀ ਦੇ ਬਾਗੀਆਂ ਨੂੰ ਪਾਰਟੀ ਅੰਦਰੋਂ ਹੀ ਮਾਲੀ ਮੱਦਦ ਦਿੱਤੀ ਗਈ। ਸ. ਰਿਪਜੀਤ ਸਿੰਘ ਬਰਾੜ ਨੇ ਵੀ ਇਸੇ ਦੋਸ਼ ਨੂੰ ਦੁਹਰਾਉਂਦਿਆਂ ਕਿਹਾ ਕਿ ਉਨ੍ਹਾਂ ਵਿਰੁੱਧ ਚੋਣ ਲੜ ਰਹੇ ਇਕ ਬਾਗੀ ਉਪਿੰਦਰ ਸ਼ਰਮਾ ਨੂੰ ਲੋਕ ਸਭਾ ਚੋਣ ਤੋਂ ਪਹਿਲਾਂ ਪਾਰਟੀ ਵਿਚ ਸ਼ਾਮਿਲ ਕਰਨ ਦਾ ਭਰੋਸਾ ਦੇਣ ਨਾਲ ਮਾਲੀ ਮੱਦਦ ਵੀ ਦਿੱਤੀ ਗਈ। ਉਨ੍ਹਾਂ ਕਿਹਾ ਕੈਪਟਨ ਅਮਰਿੰਦਰ ਸਿੰਘ ਨਾਲੋਂ ਉਨ੍ਹਾਂ ਦੇ ਸਾਥੀਆਂ ਨੇ ਪਾਰਟੀ ਦਾ ਵਧੇਰੇ ਨੁਕਸਾਨ ਕੀਤਾ। ਸ. ਸੁਖਪਾਲ ਸਿੰਘ ਖਹਿਰਾ ਨੇ ਵੀ ਕਿਹਾ ਕਿ ਲਾਪ੍ਰਵਾਹੀ ਵਾਲੀ ਸੋਚ ਕਾਰਨ ਅਕਾਲੀਆਂ ਨੂੰ ਇਕ ਤਰ੍ਹਾਂ ਨਾਲ ਕਾਂਗਰਸ ਨੇ ਥਾਲੀ ਵਿਚ ਪਰੋਸ ਕੇ ਸਰਕਾਰ ਦੇ ਦਿੱਤੀ। ਉਨ੍ਹਾਂ ਪੱਤਰਕਾਰਾਂ ਨੂੰ ਕਿਹਾ ਕਿ ਮੈਂ ਆਪਣੀ ਜੋ ਗੱਲ ਕਹਿਣੀ ਸੀ ਅੰਦਰ ਮੀਟਿੰਗ ਵਿਚ ਕਹਿ ਦਿੱਤੀ ਹੈ ਅਤੇ ਬਾਕੀ ਪਾਰਟੀ ਹਾਈ ਕਮਾਨ ਸਾਹਮਣੇ ਰੱਖਾਂਗਾ। ਸੁਰਿੰਦਰਪਾਲ ਸਿੰਘ ਸੀਬੀਆ ਨੇ ਆਪਣੀ ਹਾਰ ਲਈ ਧੂਰੀ ਤੋਂ ਪਾਰਟੀ ਵਿਧਾਨਕਾਰ ਸ੍ਰੀ ਅਰਵਿੰਦ ਖੰਨਾ ਨੂੰ ਜ਼ਿੰਮੇਵਾਰ ਦੱਸਿਆ, ਜਦੋਂਕਿ ਪਠਾਨਕੋਟ ਤੋਂ ਚੋਣ ਹਾਰਨ ਵਾਲੇ ਸ੍ਰੀ ਰਮਨ ਭੱਲਾ ਨੇ ਵੀ ਮੀਟਿੰਗ ਅੰਦਰ ਦੋਸ਼ ਲਗਾਇਆ ਕਿ ਉਨ੍ਹਾਂ ਵਿਰੁੱਧ ਚੋਣ ਲੜਨ ਵਾਲੇ ਪਾਰਟੀ ਦੇ ਇਕ ਬਾਗੀ ਉਮੀਦਵਾਰ ਨੂੰ ਪਾਰਟੀ ਵੱਲੋਂ ਬਰਾਬਰ ਮੱਦਦ ਮਿਲਦੀ ਰਹੀ। ਲੇਕਿਨ ਦੂਸਰੇ ਪਾਸੇ ਅਗਰ ਦੇਖਿਆ ਜਾਵੇ ਤਾਂ ਵਾਕਆਊਟ ਕਰਨ ਵਾਲੇ ਉਕਤ ਚਾਰੋ ਆਗੂਆਂ ਨੂੰ ਛੱਡ ਬਾਕੀ ਹਾਜ਼ਰ ਦੂਜੇ ਸਾਰੇ ਉਮੀਦਵਾਰ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨਾਲ ਚਾਹ ਪਾਰਟੀ ਵਿਚ ਸ਼ਾਮਲ ਹੋਏ ਅਤੇ ਉਨ੍ਹਾਂ ਵਾਕਆਊਟ ਕਰਨ ਵਾਲੇ ਆਗੂਆਂ ਦਾ ਸਾਥ ਦੇਣ ਤੋਂ ਗੁਰੇਜ਼ ਕੀਤਾ। ਕੈਪਟਨ ਅਮਰਿੰਦਰ ਸਿੰਘ ਨੇ ਬਾਅਦ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਪੱਸ਼ਟ ਕੀਤਾ ਕਿ ਅੱਜ ਦੀ ਇਸ ਮੀਟਿੰਗ ਦਾ ਮੰਤਵ ਹਾਰੇ ਹੋਏ ਪਾਰਟੀ ਉਮੀਦਵਾਰਾਂ ਨੂੰ ਮਿਲਣ ਦਾ ਸੀ, ਜਿਨ੍ਹਾਂ ਨੂੰ ਉਹ ਮਗਰਲੇ ਦਿਨਾਂ ਦੌਰਾਨ ਨਹੀਂ ਮਿਲ ਸਕੇ ਸਨ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਮੀਟਿੰਗ ਕੇਵਲ ਗੈਰ ਸਿਆਸੀ ਚਾਹ ਪਾਰਟੀ ਸੀ ਅਤੇ ਸਿਆਸੀ ਗੱਲਬਾਤ ਕਰਨ ਲਈ ਅਗਰ ਉਨ੍ਹਾਂ ਮੀਟਿੰਗ ਸੱਦਣੀ ਹੁੰਦੀ ਤਾਂ ਉਹ ਪ੍ਰਦੇਸ਼ ਕਾਂਗਰਸ ਭਵਨ ਵਿਚ ਸੱਦੀ ਜਾਣੀ ਸੀ। ਕੈਪਟਨ ਅਮਰਿੰਦਰ ਸਿੰਘ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਨੂੰ ਪ੍ਰਧਾਨ ਰੱਖਣ ਜਾਂ ਨਾ ਰੱਖੇ ਜਾਣ ਸਬੰਧੀ ਫੈਸਲਾ ਕਾਂਗਰਸ ਪ੍ਰਧਾਨ ਸ੍ਰੀਮਤੀ ਸੋਨੀਆ ਗਾਂਧੀ ਵੱਲੋਂ ਲਿਆ ਜਾਣਾ ਹੈ ਅਤੇ ਉਹ ਜਦੋਂ ਵੀ ਚਾਹੁਣਗੇ ਉਹ ਬਿਨਾਂ ਕਿਸੇ ਦੇਰੀ ਆਪਣਾ ਅਹੁਦਾ ਤਿਆਗ ਦੇਣਗੇ। ਉਨ੍ਹਾਂ ਇਸ ਗੱਲ ਨੂੰ ਫਿਰ ਦੁਹਰਾਇਆ ਕਿ ਇਸ ਚੋਣ ਵਿਚ ਪਾਰਟੀ ਦੀ ਹਾਰ ਦੀ ਜ਼ਿੰਮੇਵਾਰੀ ਉਹ ਆਪਣੇ ਸਿਰ ਲੈ ਚੁੱਕੇ ਹਨ, ਇਸ ਲਈ ਕਿਸੇ ਹੋਰ ਨੂੰ ਇਸ ਲਈ ਜ਼ਿੰਮੇਵਾਰ ਨਾ ਠਹਿਰਾਇਆ ਜਾਵੇ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਮੀਟਿੰਗ ਦਾ ਮੰਤਵ ਪਾਰਟੀ ਉਮੀਦਵਾਰਾਂ ਨੂੰ ਦੁਬਾਰਾ ਹੌਸਲੇ ਵਿਚ ਲਿਆਉਣਾ ਸੀ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਮੀਟਿੰਗ ਵਿਚੋਂ ਜਾਣ ਵਾਲੇ ਚਾਰ ਆਗੂਆਂ ਨਾਲ ਉਹ ਦਿੱਲੀ ਦੀ ਫੇਰੀ ਤੋਂ ਵਾਪਸ ਆਉਣ 'ਤੇ ਜ਼ਰੂਰ ਗੱਲਬਾਤ ਕਰਨਗੇ ਅਤੇ ਉਨ੍ਹਾਂ ਦੇ ਵਿਚਾਰ ਲੈਣਗੇ। ਉਨ੍ਹਾਂ ਦੀ ਜੁੰਡਲੀ ਸਬੰਧੀ ਲੱਗ ਰਹੇ ਦੋਸ਼ਾਂ ਦਾ ਜੁਆਬ ਦਿੰਦੇ ਉਨ੍ਹਾਂ ਕਿਹਾ ਕਿ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨੂੰ ਆਪਣਾ ਕੰਮ ਕਾਜ ਚਲਾਉਣ ਲਈ 3-4 ਬੰਦੇ ਤਾਂ ਆਪਣੇ ਨਾਲ ਰੱਖਣੇ ਹੀ ਪੈਣਗੇ। ਪਹਿਲਾਂ ਚਾਹਲ ਅਤੇ ਸੋਢੀ ਨੂੰ ਮੇਰੀ ਜੁੰਡਲੀ ਦਾ ਨਾਮ ਦੇ ਦਿੱਤਾ ਗਿਆ ਸੀ ਅਤੇ ਹੁਣ ਦੂਸਰੇ ਨਵੇਂ ਬੰਦਿਆਂ ਨੂੰ ਵੀ ਜੁੰਡਲੀ ਦਾ ਨਾਮ ਦੇ ਦਿੱਤਾ ਗਿਆ ਹੈ। ਚੰਡੀਗੜ੍ਹ ਵਿਖੇ ਹੋਈ ਕਾਂਗਰਸ ਦੀ ਮੀਟਿੰਗ ਵਿਚੋਂ ਵਾਕ ਆਊਟ ਕਰਦੇ ਹੋਏ ਕਾਂਗਰਸੀ ਆਗੂ ਸ: ਸੁਖਪਾਲ ਸਿੰਘ ਖਹਿਰਾ, ਸੁਰਿੰਦਰਪਾਲ ਸਿੰਘ ਸੀਬੀਆ, ਮੰਗਤ ਰਾਏ ਬਾਂਸਲ ਅਤੇ ਰਣਦੀਪ ਸਿੰਘ ਨਾਭਾ ਅਤੇ (ਸੱਜੇ) ਮੀਟਿੰਗ ਵਿਚ ਪੁੱਜੇ ਕਾਂਗਰਸੀ ਵਿਧਾਨਕਾਰ। ਬੀਬੀ ਜਗੀਰ ਕੌਰ ਨੂੰ ਮਿਲੀਆਂ ਸਹੂਲਤਾਂ ਕੋਈ ਨਵੀਂ ਗੱਲ ਨਹੀਂ-ਕੈਪਟਨ ਕੈਪਟਨ ਅਮਰਿੰਦਰ ਸਿੰਘ ਨੇ ਸਾਬਕਾ ਮੰਤਰੀ ਬੀਬੀ ਜਗੀਰ ਕੌਰ ਨੂੰ ਕਪੂਰਥਲਾ ਜੇਲ੍ਹ ਵਿਚ ਮਿਲੀਆਂ ਸਹੂਲਤਾਂ ਨੂੰ ਕੋਈ ਖਾਸ ਮਹੱਤਤਾ ਦੇਣ ਤੋਂ ਅੱਜ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਮੈਂ ਵੀ ਮੁੱਖ ਮੰਤਰੀ ਹੁੰਦਿਆਂ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸੁਖਬੀਰ ਸਿੰਘ ਬਾਦਲ ਨੂੰ ਜੇਲ੍ਹ ਵਿਚ ਵਿਸ਼ੇਸ਼ ਸਹੂਲਤਾਂ ਦਿੱਤੀਆਂ ਸਨ ਅਤੇ ਉਨ੍ਹਾਂ ਨੂੰ ਨਵੇਂ ਬਾਥਰੂਮਾਂ ਤੋਂ ਇਲਾਵਾ ਟੀ.ਵੀ. ਸੈਟ, ਨਵੇਂ ਬਿਸਤਰੇ ਅਤੇ ਡਾਇਟ ਕੋਕ ਤੱਕ ਵੀ ਮੁਹੱਈਆ ਕਰਵਾਇਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਅਗਰ ਬੀਬੀ ਜਗੀਰ ਕੌਰ ਨੂੰ ਵੀ ਕੋਈ ਟੀ.ਵੀ. ਆਦਿ ਦੀ ਸਹੂਲਤ ਮਿਲ ਗਈ ਹੈ ਤਾਂ ਇਸ ਵਿਚ ਕੋਈ ਨਵੀਂ ਗੱਲ ਨਹੀਂ, ਜਿਸ ਨੂੰ ਬਹੁਤੀ ਮਹੱਤਤਾ ਦਿੱਤੀ ਜਾਵੇ। ਕੈਪਟਨ ਦੀ ਚੰਡੀਗੜ੍ਹ ਮੀਟਿੰਗ ਮੇਰੀ ਸਹਿਮਤੀ ਨਾਲ ਹੋਈ-ਚੜਕ ਗੁਲਚੈਨ ਸਿੰਘ ਚੜਕ ਚੰਡੀਗੜ੍ਹ, 5 ਅਪ੍ਰੈਲ -ਪੰਜਾਬ ਕਾਂਗਰਸ ਮਾਮਲਿਆਂ ਦੇ ਇੰਚਾਰਜ ਗੁਲਚੈਨ ਸਿੰਘ ਚੜੱਕ ਨੇ ਇਹ ਦਿਲਚਸਪ ਪ੍ਰਗਟਾਵਾ ਕੀਤਾ ਹੈ ਕਿ ਅੱਜ ਚੰਡੀਗੜ੍ਹ ਵਿਚ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਨੇ ਪੰਜਾਬ ਵਿਧਾਨ ਸਭਾ ਦੀ ਚੋਣ ਹਾਰਨ ਵਾਲੇ ਕਾਂਗਰਸੀ ਉਮੀਦਵਾਰਾਂ ਦੀ ਜੋ ਮੀਟਿੰਗ ਬੁਲਾਈ ਸੀ, ਉਹ ਮੇਰੀ ਸਹਿਮਤੀ ਨਾਲ ਹੀ ਹੋਈ ਹੈ। ਸੰਭਵ ਹੈ ਕਿ ਉਸ ਵਿਚ ਕੁਝ ਇਹੋ ਜਿਹੇ ਕਾਂਗਰਸੀ ਵੀ ਬੁਲਾਏ ਗਏ ਹੋਣ, ਜਿਨ੍ਹਾਂ ਨੂੰ ਮੈਂ ਵੀ ਅੱਜ ਦੇ ਦਿਨ ਉਨ੍ਹਾਂ ਦੀ ਗੱਲ ਇਕੱਲੇ ਇਕੱਲੇ ਤੌਰ 'ਤੇ ਸੁਣਨ ਲਈ ਦੇਸ਼ ਦੀ ਰਾਜਧਾਨੀ ਵਿਚ ਬੁਲਾਇਆ ਸੀ, ਕਿਉਂਕਿ ਇਨ੍ਹਾਂ ਲੋਕਾਂ ਨੇ ਆਪਣੀ ਹਾਰ ਨੂੰ ਲੈ ਕੇ ਖੁੱਲ੍ਹੇਆਮ ਬਿਆਨਬਾਜ਼ੀ ਕੀਤੀ ਸੀ। ਅੱਜ ਟੈਲੀਫੋਨ ਰਾਹੀਂ ਸੰਪਰਕ ਕਰਨ 'ਤੇ 'ਅਜੀਤ' ਨਾਲ ਗੱਲਬਾਤ ਕਰਦੇ ਹੋਏ ਸ੍ਰੀ ਚੜੱਕ ਨੇ ਕਿਹਾ ਕਿ ਇਨ੍ਹਾਂ ਵਿਚੋਂ ਕੁਝ ਲੋਕ ਤਾਂ ਮੈਨੂੰ ਇਕ-ਇਕ ਕਰਕੇ ਕੱਲ੍ਹ 3 ਅਪ੍ਰੈਲ ਨੂੰ ਅਤੇ ਕੁਝ ਇਕ ਅੱਜ ਨਵੀਂ ਦਿੱਲੀ ਆ ਕੇ ਮਿਲ ਗਏ ਹਨ। ਇਨ੍ਹਾਂ 'ਚ ਬੀਬੀ ਰਜਿੰਦਰ ਕੌਰ ਭੱਠਲ, ਸੁਨੀਲ ਜਾਖੜ ਤੇ ਮੁਨੀਸ਼ ਤਿਵਾੜੀ ਸ਼ਾਮਿਲ ਹਨ। ਮੈਂ ਪੰਜਾਬ ਦੇ ਇਨ੍ਹਾਂ ਕਾਂਗਰਸੀਆਂ ਦੀ 4 ਅਪ੍ਰੈਲ ਨੂੰ ਦਿੱਲੀ ਵਿਚ ਕੋਈ ਬਕਾਇਦਾ ਮੀਟਿੰਗ ਨਹੀਂ ਸੀ ਬੁਲਾਈ। ਉਨ੍ਹਾਂ ਕਿਹਾ ਕਿ ਮੈਂ ਕੱਲ੍ਹ 5 ਅਪ੍ਰੈਲ ਵਾਲੇ ਦਿਨ ਕੈਪਟਨ ਅਮਰਿੰਦਰ ਸਿੰਘ ਨੂੰ ਵੀ ਦਿੱਲੀ ਬੁਲਾਇਆ ਹੈ ਤਾਂ ਕਿ ਉਨ੍ਹਾਂ ਦਾ ਪੱਖ ਵੀ ਸੁਣ ਲਿਆ ਜਾਏ। ਸ੍ਰੀ ਚੜੱਕ ਦੇ ਸ਼ਬਦਾਂ ਅਨੁਸਾਰ 'ਮੈਂ ਤੇ ਕੈਪਟਨ ਨੇ ਇਕੋ ਦਿਨ ਬਰਾਬਰ ਮੀਟਿੰਗਾਂ ਨਹੀਂ ਸਨ ਬੁਲਾਈਆਂ।''

ਲੁਟੇਰਿਆਂ ਵੱਲੋਂ ਸ੍ਰੀ ਦਰਬਾਰ ਸਾਹਿਬ
ਤਰਨ ਤਾਰਨ ਦੇ ਗ੍ਰੰਥੀ ਦੀ ਹੱਤਿਆ

ਤਰਨਤਾਰਨ, 5ਅਪ੍ਰੈਲ -ਅੱਜ ਸਵੇਰੇ ਸ੍ਰੀ ਦਰਬਾਰ ਸਾਹਿਬ ਤਰਨ ਤਾਰਨ ਦੇ ਬਾਹਰੋਂ ਦੋ ਲੁਟੇਰਿਆਂ ਨੂੰ ਮੋਟਰਸਾਈਕਲ ਚੋਰੀ ਕਰਨ ਤੋਂ ਰੋਕਣ 'ਤੇ ਲੁਟੇਰਿਆਂ ਨੇ ਗੋਲੀ ਮਾਰ ਕੇ ਸ੍ਰੀ ਦਰਬਾਰ ਸਾਹਿਬ ਦੇ ਗ੍ਰੰਥੀ ਦੀ ਹੱਤਿਆ ਕਰ ਦਿੱਤੀ। ਬਾਅਦ ਵਿਚ ਦੋਵੇਂ ਲੁਟੇਰੇ ਫਰਾਰ ਹੋਣ ਸਮੇਂ ਰਸਤੇ ਵਿਚੋਂ ਕਿਸੇ ਹੋਰ ਦਾ ਮੋਟਰਸਾਈਕਲ ਖੋਹ ਕੇ ਲੈ ਗਏ, ਜੋ ਬਾਠ ਰੋਡ 'ਤੇ ਮੋਟਰਸਾਈਕਲ ਸੁੱਟ ਦਿੱਤੇ ਜਾਣ ਤੋਂ ਬਾਅਦ ਉਹ ਇਕ ਕਾਰ ਵਿਚ ਸਵਾਰ ਹੋ ਕੇ ਫਰਾਰ ਹੋ ਗਏ। ਜ਼ਖ਼ਮੀ ਹਾਲਤ ਵਿਚ ਗ੍ਰੰਥੀ ਸੁਖਚੈਨ ਸਿੰਘ ਨੂੰ ਤਰਨਤਾਰਨ ਸਿਵਲ ਹਸਪਤਾਲ ਵਿਖੇ ਲਿਜਾਇਆ ਗਿਆ, ਜਿਥੇ ਹਾਲਤ ਨਾਜ਼ੁਕ ਹੋਣ 'ਤੇ ਅੰਮ੍ਰਿਤਸਰ ਭੇਜ ਦਿੱਤਾ, ਪਰ ਅੰਮ੍ਰਿਤਸਰ ਦੇ ਗੁਰੂ ਨਾਨਕ ਹਸਪਤਾਲ ਪਹੁੰਚਣ 'ਤੇ ਡਾਕਟਰਾਂ ਨੇ ਉਸਨੂੰ ਮ੍ਰਿਤਕ ਕਰਾਰ ਦੇ ਦਿੱਤਾ। ਘਟਨਾ ਦੀ ਜਾਣਕਾਰੀ ਮਿਲਦਿਆਂ ਹੀ ਸ੍ਰੀ ਦਰਬਾਰ ਸਾਹਿਬ ਦੇ ਮੈਨੇਜਰ ਅਰਜਨ ਸਿੰਘ ਤੇ ਹੋਰ ਮੁਲਾਜ਼ਮਾਂ ਤੋਂ ਇਲਾਵਾ ਡੀ.ਐੱਸ.ਪੀ. ਸਿਟੀ ਦਲਜੀਤ ਸਿੰਘ ਢਿੱਲੋਂ ਤੇ ਐੱਸ. ਐੱਚ. ਓ. ਸਿਟੀ ਗੁਰਚਰਨ ਸਿੰਘ ਭਾਰੀ ਪੁਲਿਸ ਫੋਰਸ ਸਮੇਤ ਘਟਨਾ ਵਾਲੀ ਜਗ੍ਹਾ 'ਤੇ ਪਹੁੰਚ ਗਏ। ਇਸ ਸਬੰਧੀ ਸ੍ਰੀ ਦਰਬਾਰ ਸਾਹਿਬ ਦੇ ਮੈਨੇਜਰ ਅਰਜਨ ਸਿੰਘ ਦੇ ਬਿਆਨਾਂ 'ਤੇ ਪੁਲਿਸ ਨੇ ਅਣਪਛਾਤੇ ਲੁਟੇਰਿਆਂ ਖਿਲਾਫ ਕਤਲ ਦਾ ਕੇਸ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਅਨੁਸਾਰ ਸ੍ਰੀ ਦਰਬਾਰ ਸਾਹਿਬ ਤਰਨ ਤਾਰਨ ਵਿਖੇ ਬਤੌਰ ਗ੍ਰੰਥੀ ਸਿੰਘ ਡਿਊਟੀ ਕਰਦੇ ਭਾਈ ਸੁਖਚੈਨ ਸਿੰਘ ਪੁੱਤਰ ਸੁਬੇਗ ਸਿੰਘ ਵਾਸੀ ਪੱਟੀ ਦੀ ਸਵੇਰੇ 7 ਵਜੇ ਡਿਊਟੀ ਸੀ, ਜਦ ਉਹ ਸਾਢੇ ਛੇ ਵਜੇ ਦੇ ਕਰੀਬ ਸ੍ਰੀ ਦਰਬਾਰ ਸਾਹਿਬ ਦੇ ਬਾਹਰਲੇ ਗੇਟ 'ਤੇ ਪਹੁੰਚੇ ਤਾਂ ਦੋ ਨੌਜਵਾਨ ਇਕ ਕਾਲੇ ਰੰਗ ਦੇ ਪਲਸਰ ਮੋਟਰਸਾਈਕਲ ਨੰਬਰ ਪੀ. ਬੀ. 46-ਕੇ-1121 ਨੂੰ ਘਸੀਟ ਕੇ ਲੈ ਜਾ ਰਹੇ ਸਨ ਤਾਂ ਗ੍ਰੰਥੀ ਸੁਖਚੈਨ ਸਿੰਘ ਨੇ ਉਨ੍ਹਾਂ ਨੂੰ ਰੋਕਿਆ ਤਾਂ ਉਨ੍ਹਾਂ ਵਿਚੋਂ ਇਕ ਲੁਟੇਰੇ ਨੇ ਪਿਸਤੌਲ ਕੱਢ ਕੇ ਇਕ ਗੋਲੀ ਸੁਖਚੈਨ ਸਿੰਘ ਦੇ ਮਾਰ ਦਿੱਤੀ, ਜੋ ਉਸਦੇ ਸੱਜੇ ਪਾਸੇ ਛਾਤੀ ਵਿਚ ਲੱਗੀ ਤੇ ਗ੍ਰੰਥੀ ਸੁਖਚੈਨ ਸਿੰਘ ਜ਼ਮੀਨ 'ਤੇ ਡਿੱਗ ਪਿਆ। ਘਟਨਾ ਨੂੰ ਅੰਜਾਮ ਦੇਣ ਤੋਂ ਬਾਅਦ ਦੋਵੇਂ ਲੁਟੇਰੇ ਸ੍ਰੀ ਦਰਬਾਰ ਸਾਹਿਬ ਦੀ ਪ੍ਰਕਰਮਾ ਦੇ ਬਰਾਂਡਿਆਂ ਦੇ ਰਸਤੇ ਲੰਗਰ ਹਾਲ ਦੇ ਬਾਹਰ ਨਿਕਲ ਕੇ ਫਰਾਰ ਹੋ ਗਏ। ਇਹ ਵੀ ਪਤਾ ਲੱਗਾ ਹੈ ਕਿ ਦੋਵਾਂ ਲੁਟੇਰਿਆਂ ਨੇ ਰਸਤੇ ਵਿਚੋਂ ਪਿਸਤੌਲ ਦੀ ਨੋਕ 'ਤੇ ਇਕ ਵਿਅਕਤੀ ਕੋਲੋਂ ਉਸਦਾ ਮੋਟਰਸਾਈਕਲ ਵੀ ਖੋਹਿਆ ਤੇ ਫਿਰ ਇਹ ਮੋਟਰਸਾਈਕਲ ਵੀ ਕੁਝ ਦੂਰੀ 'ਤੇ ਸੁੱਟ ਕੇ ਇਕ ਕਾਰ ਵਿਚ ਫਰਾਰ ਹੋ ਗਏ। ਘਟਨਾ ਦੀ ਜਾਣਕਾਰੀ ਮਿਲਦਿਆਂ ਹੀ ਸ਼ਹਿਰ ਨਿਵਾਸੀ ਸ੍ਰੀ ਦਰਬਾਰ ਸਾਹਿਬ ਦੇ ਕੋਲ ਇਕੱਠੇ ਹੋਣੇ ਸ਼ੁਰੂ ਹੋ ਗਏ। ਇਸ ਸਬੰਧੀ ਪੁਲਿਸ ਥਾਣਾ ਸਿਟੀ ਦੇ ਐੱਸ.ਐੱਚ.ਓ. ਗੁਰਚਰਨ ਸਿੰਘ ਨੇ ਅਣਪਛਾਤੇ ਲੁਟੇਰਿਆਂ ਖਿਲਾਫ ਕੇਸ ਦਰਜ ਕਰਕੇ ਮ੍ਰਿਤਕ ਗ੍ਰੰਥੀ ਦਾ ਸਿਵਲ ਹਸਪਤਾਲ ਤਰਨ ਤਾਰਨ ਤੋਂ ਪੋਸਟਮਾਰਟਮ ਕਰਵਾਉਣ ਤੋਂ ਬਾਅਦ ਲਾਸ਼ ਨੂੰ ਵਾਰਿਸਾਂ ਦੇ ਹਵਾਲੇ ਕਰ ਦਿੱਤਾ ਹੈ। ਇਸ ਸਬੰਧੀ ਐੱਸ.ਐੱਸ.ਪੀ. ਮਨਮਿੰਦਰ ਸਿੰਘ ਨੇ ਦੱਸਿਆ ਕਿ ਪੁਲਿਸ ਵੱਲੋਂ ਲੁਟੇਰਿਆਂ ਦੇ ਸਕੈੱਚ ਤਿਆਰ ਕੀਤੇ ਜਾ ਰਹੇ ਹਨ ਅਤੇ ਇਨ੍ਹਾਂ ਲੁਟੇਰਿਆਂ ਨੂੰ ਜਲਦ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਇਲਾਕੇ ਵਿਚ ਨਾਕਾਬੰਦੀ ਕਰ ਦਿੱਤੀ ਗਈ ਹੈ।

ਬਟਾਲਾ 'ਚ ਦਿਨ-ਦਿਹਾੜੇ ਡਾਕਾ

ਬਟਾਲਾ ਵਿਖੇ ਲੁਟੇਰਿਆਂ ਵੱਲੋਂ ਖਾਲੀ ਕੀਤੇ ਸੋਨੇ ਨਾਲ ਭਰੇ ਡੱਬੇ ਅਤੇ ਖਿਲਾਰਿਆ ਸਾਮਾਨ।

ਬਟਾਲਾ, 5 ਅਪ੍ਰੈਲ -ਸ਼ਹਿਰ ਦੇ ਭਰੇ ਬਜ਼ਾਰ ਵਿਚ ਵੱਸਦੀ ਕਾਲੋਨੀ ਬਸੰਤ ਐਵੇਨਿਊ ਵਿਚ ਅੱਜ ਦਿਨ-ਦਿਹਾੜੇ ਲੁਟੇਰੇ ਸੁਨਿਆਰੇ ਦੇ ਘਰੋਂ 6 ਕਿਲੋ ਸੋਨਾ, 22 ਕਿਲੋ ਚਾਂਦੀ ਅਤੇ 2 ਲੱਖ ਦੀ ਨਕਦੀ ਲੈ ਕੇ ਫਰਾਰ ਹੋ ਗਏ। ਜਾਣਕਾਰੀ ਮੁਤਾਬਿਕ ਮਮਤਾ ਲੂਥਰਾ ਪਤਨੀ ਸਵਰਗੀ ਵਿਜੇ ਕੁਮਾਰ ਲੂਥਰਾ ਅਤੇ ਉਸਦੀ ਨੂੰਹ ਜੋਤੀ ਪਤਨੀ ਅਮਨ ਲੂਥਰਾ ਦੋ ਛੋਟੇ ਬੱਚਿਆਂ ਸਮੇਤ ਘਰ ਵਿਚ ਸਨ। ਬਾਅਦ ਦੁਪਹਿਰ ਕੋਈ ਪੌਣੇ ਤਿੰਨ ਵਜੇ ਦੇ ਕਰੀਬ 6-7 ਨੌਜਵਾਨ ਘਰ ਵਿਚ ਦਾਖਲ ਹੋਏ, ਜਿਨ੍ਹਾਂ ਵਿਚੋਂ ਇਕ ਦਾ ਚਿਹਰਾ ਢਕਿਆ ਨਹੀਂ ਸੀ, ਪਰ ਬਾਕੀ ਸਾਰੇ ਨਕਾਬਪੋਸ਼ ਸਨ। ਮਮਤਾ ਲੂਥਰਾ ਅਤੇ ਉਸਦੀ ਨੂੰਹ ਜੋਤੀ ਨੇ ਦੱਸਿਆ ਕਿ ਉਨ੍ਹਾਂ ਦਾ ਬੇਟਾ ਅਮਨ ਸਵਰਨਕਾਰ ਸੰਘ ਵੱਲੋਂ ਸ਼ਹਿਰ ਵਿਚ ਦਿੱਤੇ ਜਾ ਰਹੇ ਧਰਨੇ ਵਿਚ ਸ਼ਾਮਿਲ ਹੋਣ ਗਿਆ ਸੀ ਅਤੇ ਉਨ੍ਹਾਂ ਦੀ ਪੋਤਰੀ 2:30 ਵਜੇ ਸਕੂਲ ਤੋਂ ਘਰ ਆਈ ਸੀ। ਛੋਟਾ ਪੋਤਰਾ ਅਤੇ ਉਹ ਇਕ ਕਮਰੇ ਵਿਚ ਸਨ ਅਤੇ ਨੂੰਹ ਅਤੇ ਪੋਤਰੀ ਦੂਸਰੇ ਕਮਰੇ ਵਿਚ, ਜਦੋਂ ਅਚਨਚੇਤ 6-7 ਨੌਜਵਾਨ ਅੰਦਰ ਦਾਖਲ ਹੋਏ, ਜਿਨ੍ਹਾਂ ਕੋਲ ਬੰਦੂਕ, ਪਿਸਤੌਲ, ਕ੍ਰਿਪਾਨ ਅਤੇ ਚਾਕੂ ਤੋਂ ਇਲਾਵਾ ਹੋਰ ਹਥਿਆਰ ਵੀ ਸਨ। ਉਨ੍ਹਾਂ ਨੇ ਦੱਸਿਆ ਕਿ ਸਾਰੇ ਲੁਟੇਰੇ ਛੋਟੇ ਕੱਦ ਦੇ ਅਤੇ 20 ਤੋਂ 25 ਸਾਲ ਦੀ ਉਮਰ ਦੇ ਸਨ ਅਤੇ ਉਨ੍ਹਾਂ ਵਿਚੋਂ ਇਕ ਨੇ ਪੱਗ, ਇਕ ਨੇ ਪਟਕਾ ਬੰਨ੍ਹਿਆ ਹੋਇਆ ਸੀ ਅਤੇ ਬਾਕੀ ਸਾਰੇ ਮੋਨੇ ਸਨ, ਜਿਨ੍ਹਾਂ ਨੇ ਸਾਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ ਕਿ ਜੇ ਉਨ੍ਹਾਂ ਵਿਚੋਂ ਕਿਸੇ ਨੇ ਵੀ ਰੌਲਾ ਪਾਇਆ ਤਾਂ ਉਹ ਉਨ੍ਹਾਂ ਨੂੰ ਮਾਰ ਦੇਣਗੇ।ਇਸ ਤੋਂ ਬਾਅਦ ਸਾਡੇ ਮੂੰਹਾਂ 'ਤੇ ਹੱਥ ਰੱਖ ਕੇ ਹੱਥਾਂ, ਕੰਨਾਂ ਅਤੇ ਉਂਗਲੀਆਂ ਵਿਚੋਂ ਸੋਨਾ ਆਪ ਹੀ ਲਾਹ ਲਿਆ। ਸਾਡੇ ਕੋਲੋਂ ਅਲਮਾਰੀਆਂ ਅਤੇ ਲਾਕਰ ਦੀ ਚਾਬੀ ਮੰਗਣ 'ਤੇ ਜਦੋਂ ਅਸੀਂ ਨਾਂਹ ਕਰ ਦਿੱਤੀ ਤਾਂ ਸਾਨੂੰ ਚਾਰਾਂ ਨੂੰ ਇਕ ਕਮਰੇ ਵਿਚ ਬੰਦ ਕਰ ਦਿੱਤਾ ਅਤੇ ਸਾਰੇ ਘਰ ਦੀ ਫਰੋਲਾ-ਫਰਾਲੀ ਸ਼ੁਰੂ ਕਰ ਦਿੱਤੀ ਅਤੇ ਪਤਾ ਹੀ ਨਹੀਂ ਚੱਲਿਆ, ਕਿਸ ਤਰ੍ਹਾਂ ਉਨ੍ਹਾਂ ਨੇ ਲਾਕਰ ਅਤੇ ਅਲਮਾਰੀਆਂ ਵਿਚ ਪਿਆ 6 ਕਿਲੋ ਸੋਨਾ ਅਤੇ 22 ਕਿਲੋ ਚਾਂਦੀ ਅਤੇ 2 ਲੱਖ ਦੇ ਕਰੀਬ ਨਕਦੀ, 2 ਮੋਬਾਈਲ, ਇਕ ਲੈਪਟਾਪ ਅਤੇ ਇਕ ਟੈਬ ਕੱਢ ਕੇ ਫਰਾਰ ਹੋ ਗਏ, ਜਦੋਂ ਥੋੜ੍ਹੀ ਦੇਰ ਤੱਕ ਬਾਹਰੋਂ ਕੋਈ ਅਵਾਜ਼ ਨਾ ਆਈ ਤਾਂ ਅਸੀਂ ਆਪਣੇ ਕਮਰੇ ਦਾ ਦਰਵਾਜ਼ਾ ਖੋਲ੍ਹਿਆ ਉਦੋਂ ਤੱਕ ਉਹ ਜਾ ਚੁੱਕੇ ਸਨ। ਮੌਕੇ 'ਤੇ ਐਸ. ਐਸ. ਪੀ. ਬਟਾਲਾ ਸ: ਗੁਰਕ੍ਰਿਪਾਲ ਸਿੰਘ, ਐਸ.ਪੀ. ਪਰਮਜੀਤ ਸਿੰਘ ਗੋਰਾਇਆ ਅਤੇ ਡੀ. ਐਸ. ਪੀ. ਬਲਜੀਤ ਸਿੰਘ ਪੁਲਿਸ ਪਾਰਟੀ ਸਮੇਤ ਪਹੁੰਚ ਗਏ ਅਤੇ ਤਫਤੀਸ਼ ਸ਼ੁਰੂ ਕਰ ਦਿੱਤੀ।

ਬਟਾਲਾ ਵਿਖੇ ਹੋਈ ਲੁੱਟ ਤੋਂ ਬਾਅਦ ਮੌਕੇ 'ਤੇ ਪਹੁੰਚੇ ਡੀ.ਆਈ.ਜੀ. ਬਾਰਡਰ ਰੇਂਜ਼ ਰਾਮ ਸਿੰਘ, ਐਸ.ਐਸ.ਪੀ. ਗੁਰਕ੍ਰਿਪਾਲ ਸਿੰਘ ਪੁਲਿਸ ਪਾਰਟੀ ਸਮੇਤ ਜਾਇਜ਼ਾ ਲੈਂਦੇ ਹੋਏ।

ਘਰ ਦੇ ਮਾਲਕ ਅਮਨ ਲੂਥਰਾ ਨੇ ਦੱਸਿਆ ਕਿ ਸਵਰਨਕਾਰਾਂ ਅਤੇ ਜਿਊਲਰਜ਼ ਦੀ ਪਿਛਲੇ ਦਿਨਾਂ ਤੋਂ ਚੱਲ ਰਹੀ ਹੜਤਾਲ ਕਾਰਨ ਦੁਕਾਨ ਵਿਜੇ ਜਿਊਲਰਜ਼ 'ਤੇ ਪਿਆ ਸੋਨਾ ਅਤੇ ਚਾਂਦੀ ਘਰ ਵਿਚ ਲਿਆ ਕੇ ਰੱਖਿਆ ਹੋਇਆ ਸੀ। ਇਸ ਮੌਕੇ 'ਤੇ ਸਥਾਨਕ ਵਿਧਾਇਕ ਸ੍ਰੀ ਅਸ਼ਵਨੀ ਸੇਖੜੀ ਅਤੇ ਬਟਾਲਾ ਸਵਰਨਕਾਰ ਸੰਘ ਦੇ ਪ੍ਰਧਾਨ ਅਸ਼ੋਕ ਲੂਥਰਾ ਨੇ ਕਿਹਾ ਕਿ ਗੁਰਦਾਸਪੁਰ ਜ਼ਿਲ੍ਹੇ ਵਿਚ ਏਨੀ ਵੱਡੀ ਘਟਨਾ ਪਹਿਲੀ ਵਾਰ ਹੋਈ ਹੈ। ਸ਼ਹਿਰ ਵਾਸੀਆਂ ਦੇ ਮਨਾਂ ਵਿਚ ਰੋਸ ਹੈ। ਇਸ ਤੋਂ ਇਲਾਵਾ ਸਾਬਕਾ ਵਿਧਾਇਕ ਸ: ਲਖਬੀਰ ਸਿੰਘ ਲੋਧੀਨੰਗਲ, ਸਾਬਕਾ ਵਿਧਾਇਕ ਸ੍ਰੀ ਜਗਦੀਸ਼ ਰਾਜ ਸਾਹਨੀ, ਸਾਬਕਾ ਚੇਅਰਮੈਨ ਸ੍ਰੀ ਦੇਵ ਰਾਜ ਚਾਚੋਵਾਲੀਆ ਨੇ ਵੀ ਪੀੜ੍ਹਤ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟ ਕੀਤੀ। ਬਾਅਦ ਦੇਰ ਸ਼ਾਮ ਡੀ.ਆਈ.ਜੀ. ਬਾਰਡਰ ਰੇਂਜ਼ ਸ: ਰਾਮ ਸਿੰਘ ਨੇ ਸਥਿਤੀ ਦਾ ਜਾਇਜ਼ਾ ਲਿਆ।

ਮੁੱਖ ਮੰਤਰੀ ਵੱਲੋਂ ਕਣਕ ਦੀ ਖਰੀਦ ਦੇ ਪ੍ਰਬੰਧਾਂ ਦਾ ਜਾਇਜ਼ਾ

ਮੁੱਖ ਮੰਤਰੀ ਪੰਜਾਬ ਸ: ਪ੍ਰਕਾਸ਼ ਸਿੰਘ ਬਾਦਲ ਚੰਡੀਗੜ੍ਹ ਵਿਚ ਕਣਕ ਦੀ ਖਰੀਦ ਸਬੰਧੀ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਅਧਿਕਾਰੀਆਂ ਦੀ ਮੀਟਿੰਗ ਲੈਂਦੇ ਹੋਏ।

ਚੰਡੀਗੜ੍ਹ, 5 ਅਪ੍ਰੈਲ -ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਰਾਜ ਵਿੱਚ ਅਨਾਜ ਭੰਡਾਰ ਦੀ ਸਮੱਸਿਆ ਦਾ ਹੱਲ ਕਰਨ ਲਈ ਸੂਬੇ ਵਿੱਚ ਕਣਕ ਤੇ ਚਾਵਲ ਦੇ ਸਟਾਕ ਨੂੰ ਹੋਰਨਾਂ ਰਾਜਾਂ 'ਚ ਲਿਜਾਣ ਦੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਲਈ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਅਤੇ ਕੇਂਦਰੀ ਖੁਰਾਕ ਮੰਤਰੀ ਪ੍ਰੋ. ਕੇ.ਵੀ. ਥਾਮਸ ਨੂੰ ਮਿਲ ਕੇ ਉਨ੍ਹਾਂ ਦੇ ਨਿੱਜੀ ਦਖਲ ਦੀ ਮੰਗ ਕਰਨਗੇ। ਇਹ ਪ੍ਰਗਟਾਵਾ ਕਰਦਿਆਂ ਅੱਜ ਇੱਥੇ ਮੁੱਖ ਮੰਤਰੀ ਦਫ਼ਤਰ ਦੇ ਇੱਕ ਬੁਲਾਰੇ ਨੇ ਦੱਸਿਆ ਕਿ ਪੰਜਾਬ ਵਿੱਚ ਪਹਿਲਾਂ ਹੀ ਭੰਡਾਰ ਹੋਏ ਕਣਕ ਅਤੇ ਚਾਵਲ ਨੂੰ ਦੇਸ਼ ਦੇ ਹੋਰਨਾਂ ਹਿੱਸਿਆਂ ਵਿੱਚ ਲਿਜਾਣ ਲਈ ਜੇਕਰ ਵਿਸ਼ੇਸ਼ ਰੇਲਵੇ ਰੈਕ ਦੀ ਲੋੜ ਪਈ ਤਾਂ ਸ. ਬਾਦਲ ਇਸ ਮਾਮਲੇ ਨੂੰ ਵੀ ਕੇਂਦਰੀ ਰੇਲਵੇ ਮੰਤਰੀ ਕੋਲ ਮਿਲ ਕੇ ਉਠਾਉਣਗੇ। ਮੁੱਖ ਮੰਤਰੀ ਜੋ ਅੱਜ ਕਣਕ ਦੀ ਖਰੀਦ ਦੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਇੱਕ ਮੀਟਿੰਗ ਦੀ ਪ੍ਰਧਾਨਗੀ ਕਰ ਰਹੇ ਸਨ, ਨੇ ਖੁਰਾਕ ਤੇ ਸਿਵਲ ਸਪਲਾਈ ਮੰਤਰੀ ਸ. ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਨੂੰ ਆਖਿਆ ਕਿ ਸੂਬੇ ਵਿੱਚ ਘੱਟੋ ਘੱਟ 25 ਲੱਖ ਮੀਟਰਕ ਟਨ ਦੀ ਸਮਰੱਥਾ ਵਾਲਾ ਗੁਦਾਮ ਵਿਗਿਆਨਕ ਢੰਗ ਨਾਲ ਬਣਾਉਣ ਲਈ ਭਾਰਤ ਸਰਕਾਰ ਪਾਸੋਂ ਜਲਦ ਪ੍ਰਵਾਨਗੀ ਲੈਣ ਲਈ ਯਤਨ ਹੋਰ ਤੇਜ਼ ਕੀਤੇ ਜਾਣ। ਮੁੱਖ ਮੰਤਰੀ ਨੇ ਮੁੱਖ ਸਕੱਤਰ ਨੂੰ ਵੀ ਐਫ.ਸੀ.ਆਈ. ਵਲੋਂ ਖਰੀਦ ਨਾਲ ਸਬੰਧਤ ਬਕਾਇਆ ਮਾਮਲਿਆਂ ਨੂੰ ਨਿਪਟਾਉਣ ਲਈ ਕੇਂਦਰੀ ਖੇਤੀ ਅਤੇ ਖੁਰਾਕ ਮੰਤਰਾਲੇ ਨਾਲ ਤਾਲਮੇਲ ਕਰਨ ਦਾ ਆਦੇਸ਼ ਦਿੱਤਾ। ਸ. ਬਾਦਲ ਨੇ ਮੁੱਖ ਸਕੱਤਰ ਨੂੰ 20 ਲੱਖ ਮੀਟਰਕ ਟਨ ਦੀ ਵਾਧੂ ਭੰਡਾਰਨ ਸਮਰੱਥਾ ਜਿਸ ਨੂੰ ਹੋਰਨਾਂ ਰਾਜਾਂ ਵਿੱਚ ਤਬਦੀਲ ਕਰ ਦਿੱਤਾ ਗਿਆ ਹੈ, ਨੂੰ ਵਾਪਸ ਪੰਜਾਬ ਨੂੰ ਪ੍ਰਵਾਨਗੀ ਦਿਵਾਉਣ ਲਈ ਇਹ ਮਾਮਲਾ ਵੀ ਮੰਤਰਾਲੇ ਕੋਲ ਉਠਾਉਣ ਲਈ ਆਖਿਆ ਕਿਉਂਕਿ ਪੰਜਾਬ ਵਿੱਚ ਪਹਿਲਾਂ ਹੀ ਅਨਾਜ ਭੰਡਾਰ ਦੀ ਵੱਡੀ ਘਾਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸ. ਬਾਦਲ ਨੇ ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਦੀ ਸਕੱਤਰ ਨੂੰ ਆਦੇਸ਼ ਦਿੱਤਾ ਕਿ ਖਰੀਦ ਪ੍ਰਕਿਰਿਆ ਨਿਰਵਿਘਨ ਹੋਣ ਨੂੰ ਯਕੀਨੀ ਬਣਾਉਣ ਲਈ ਸਾਰੇ ਡਿਪਟੀ ਕਮਿਸ਼ਨਰਾਂ ਅਤੇ ਜ਼ਿਲ੍ਹਾ ਕੰਟਰੋਲਰ, ਖੁਰਾਕ ਤੇ ਸਪਲਾਈ ਨਾਲ ਨੇੜਿਓਂ ਤਾਲਮਾਲੇ ਰੱਖਿਆ ਜਾਵੇ। ਇਸ ਦੌਰਾਨ ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਦੇ ਸਕੱਤਰ ਸ. ਡੀ.ਐਸ. ਗਰੇਵਾਲ ਨੇ ਮੁੱਖ ਮੰਤਰੀ ਨੂੰ ਜਾਣੂ ਕਰਵਾਇਆ ਕਿ ਵਰਤਮਾਨ ਵਿੱਚ ਭਾਰਤ ਸਰਕਾਰ ਵਲੋਂ ਅਨਾਜ ਦੀ ਢੋਆ-ਢੁਆਈ ਸੁਸਤ ਹੋਣ ਕਾਰਨ ਰਾਜ ਵਿੱਚ ਅੰਨ ਭੰਡਾਰ ਵੱਡੀ ਸਮੱਸਿਆ ਬਣੀ ਹੋਈ ਹੈ। ਇੱਕ ਅਪ੍ਰੈਲ, 2012 ਨੂੰ ਸੂਬੇ ਵਿੱਚ 68.5 ਲੱਖ ਮੀਟਰਕ ਟਨ ਅਤੇ 67 ਲੱਖ ਮੀਟਿਰਕ ਟਨ ਚਾਵਲ ਭੰਡਾਰ ਹਨ ਜਦ ਕਿ ਪਿਛਲੇ ਸਾਲ ਇਸੇ ਸਮੇਂ ਦੌਰਾਨ 51 ਲੱਖ ਮੀਟਰਕ ਟਨ ਕਣਕ ਅਤੇ 68 ਲੱਖ ਮੀਟਰਕ ਟਨ ਚਾਵਲ ਦਾ ਖੁਲ੍ਹਾ ਸਟਾਕ ਸੀ। ਸ. ਗਰੇਵਾਲ ਨੇ ਮੁੱਖ ਮੰਤਰੀ ਨੂੰ ਇਹ ਵੀ ਜਾਣਕਾਰੀ ਦਿੱਤੀ ਕਿ ਇਸ ਸਾਲ ਕਣਕ ਦਾ ਉਤਪਾਦਨ 156 ਲੱਖ ਮੀਟਰਕ ਟਨ ਤੱਕ ਪਹੁੰਚਣ ਦੀ ਸੰਭਾਵਨਾ ਹੈ ਅਤੇ ਖਰੀਦ ਏਜੰਸੀਆਂ ਰਾਹੀਂ 115 ਲੱਖ ਮੀਟਰਕ ਟਨ ਕਣਕ ਦੀ ਖਰੀਦ ਲਈ ਪ੍ਰਬੰਧ ਮੁਕੰਮਲ ਕਰ ਲਏ ਗਏ ਹਨ। ਕਣਕ ਦੀ ਨਿਰਵਿਘਨ ਖਰੀਦ ਲਈ ਸੂਬੇ ਵਿੱਚ 1769 ਖਰੀਦ ਕੇਂਦਰ ਸਥਾਪਤ ਕੀਤੇ ਜਾ ਚੁੱਕੇ ਹਨ। ਮੀਟਿੰਗ 'ਚ ਖੁਰਾਕ ਤੇ ਸਿਵਲ ਸਪਲਾਈ ਮੰਤਰੀ ਸ. ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ, ਮੁੱਖ ਸਕੱਤਰ ਸ਼੍ਰੀ ਰਾਕੇਸ਼ ਸਿੰਘ, ਵਿੱਤ ਕਮਿਸ਼ਨਰ ਵਿਕਾਸ ਸ਼੍ਰੀ ਜੀ.ਐਸ. ਸੰਧੂ, ਸਕੱਤਰ ਖੁਰਾਕ ਤੇ ਸਿਵਲ ਸਪਲਾਈ ਸ. ਡੀ.ਐਸ. ਗਰੇਵਾਲ, ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਦੇ ਡਾਇਰੈਕਟਰ ਡਾ. ਹਰੀਕੇਸ਼ ਸਿੰਘ ਸਿੱਧੂ, ਮੁੱਖ ਮੰਤਰੀ ਦੇ ਵਿਸ਼ੇਸ਼ ਪ੍ਰਮੁੱਖ ਸਕੱਤਰ ਸ. ਕੇ.ਐਸ. ਪਨੂੰ, ਐਮ.ਡੀ. ਮਾਰਕਫ਼ੈਡ ਸ. ਏ.ਐਸ. ਪਨੂੰ, ਐਮ.ਡੀ. ਪਨਸਪ ਸ਼੍ਰੀ ਵਿਕਾਸ ਪ੍ਰਤਾਪ, ਸਕੱਤਰ ਮੰਡੀ ਬੋਰਡ ਡਾ. ਕੇ.ਐਸ. ਸਰਾ, ਐਮ.ਡੀ. ਪੰਜਾਬ ਐਗਰੋ ਸ਼੍ਰੀ ਅਸ਼ੋਕ ਗੁਪਤਾ ਅਤੇ ਜਨਰਲ ਮੈਨੇਜਰ ਐਫ.ਸੀ.ਆਈ. ਪੰਜਾਬ ਰੀਜਨ ਸ਼੍ਰੀ ਨੀਲ ਕੰਠ ਸ਼ਾਮਲ ਸਨ।

2 ਜੀ ਮਾਮਲਾ
ਚਿਦੰਬਰਮ ਬਾਰੇ ਫ਼ੈਸਲਾ 11 ਨੂੰ

ਨਵੀਂ ਦਿੱਲੀ, 5 ਅਪ੍ਰੈਲ  -ਗ੍ਰਹਿ ਮੰਤਰੀ ਪੀ ਚਿਦੰਬਰਮ ਦੇ ਖਿਲਾਫ ਦੋ ਪਟੀਸ਼ਨਾਂ 'ਤੇ ਅੱਜ ਸੁਪਰੀਮ ਕੋਰਟ ਵਿਚ ਹੋਣ ਵਾਲੀ ਸੁਣਵਾਈ ਨੂੰ 11 ਅਪ੍ਰੈਲ ਤਕ ਲਈ ਟਾਲ ਦਿੱਤਾ ਹੈ। ਅਦਾਲਤ ਨੇ ਪਟੀਸ਼ਨ 'ਤੇ ਸੁਣਵਾਈ ਕਰਦੇ ਹੋਏ ਸੀ ਬੀ ਆਈ ਨੂੰ 3 ਹਫਤੇ ਵਿਚ ਸਟੇਟਸ ਰਿਪੋਰਟ ਪੇਸ਼ ਕਰਨ ਲਈ ਕਿਹਾ ਹੈ। ਇਸ ਮਾਮਲੇ ਵਿਚ ਅਗਲੀ ਸੁਣਵਾਈ 11 ਅਪ੍ਰੈਲ ਤੋਂ 13 ਅਪ੍ਰੈਲ ਨੂੰ ਹੋਵੇਗੀ। ਅਦਾਲਤ ਵਿਚ ਸੁਣਵਾਈ ਟਲ ਜਾਣ ਤੋਂ ਬਾਅਦ ਜਨਤਾ ਪਾਰਟੀ ਦੇ ਪ੍ਰਧਾਨ ਸੁਭਰਾਮਨੀਅਮ ਸਵਾਮੀ ਨੇ ਕਿਹਾ ਕਿ ਮੈਨੂੰ ਕੋਈ ਨਿਰਾਸ਼ਾ ਨਹੀਂ ਹੈ ਕਿ ਅੱਜ ਮੇਰੀ ਪਟੀਸ਼ਨ 'ਤੇ ਸੁਣਵਾਈ ਨਹੀਂ ਹੋਈ। ਉਨ੍ਹਾਂ ਨੇ ਕਿਹਾ ਕਿ 2 ਜੀ ਮਾਮਲੇ ਵਿਚ ਚਿਦੰਬਰਮ ਸਹਿ ਦੋਸ਼ੀ ਹਨ ਜੇਕਰ ਅਦਾਲਤ ਮੇਰੀ ਪਟੀਸ਼ਨ ਨੂੰ ਖਾਰਜ ਕਰਦੀ ਹੈ ਤਾਂ ਮੈਂ ਫਿਰ ਤੋਂ ਟਰਾਇਲ ਕੋਰਟ ਵਿਚ ਜਾਵਾਂਗਾ। ਸਵਾਮੀ ਦੀ ਪਟੀਸ਼ਨ ਤੋਂ ਇਲਾਵਾ ਦੂਜੀ ਪਟੀਸ਼ਨ ਟੀਮ ਅੰਨਾ ਦੇ ਮੈਂਬਰ ਅਤੇ ਸੁਪਰੀਮ ਕੋਰਟ ਦੇ ਸੀਨੀਅਰ ਵਕੀਲ ਪ੍ਰਸ਼ਾਂਤ ਭੂਸ਼ਣ ਨੇ ਦਾਖਲ ਕੀਤੀ ਹੈ। ਪਟੀਸ਼ਨ ਵਿਚ ਕਿਹਾ ਗਿਆ ਹੈ ਕਿ ਵਿੱਤ ਮੰਤਰੀ ਦੇ ਰੂਪ ਵਿਚ ਚਿਦੰਬਰਮ ਨੇ ਆਪਣੇ ਅਹੁਦੇ ਦੀ ਦੁਰਵਰਤੋਂ ਕੀਤੀ ਅਤੇ ਉਨ੍ਹਾਂ ਨੇ ਸਪੈਰਟ੍ਰਮ ਦੀ ਨਿਲਾਮੀ ਦਾ ਪੱਖ ਲਿਆ ਸੀ। ਇੱਥੇ ਵਰਣਨਯੋਗ ਹੈ ਕਿ ਦਿੱਲੀ ਸਥਿਤ ਸੀ ਬੀ ਆਈ ਦੀ ਵਿਸ਼ੇਸ਼ ਅਦਾਲਤ ਨੇ ਸਵਾਮੀ ਦੀ ਪਟੀਸ਼ਨ ਨੂੰ ਖਾਰਜ ਕਰ ਦਿੱਤਾ ਸੀ। ਅਦਾਲਤ ਨੇ ਚਿਦੰਬਰਮ ਨੂੰ ਪਾਕਿ ਸਾਫ ਕਰਾਰ ਦਿੱਤਾ ਸੀ।

ਸੁਭਾਸ਼ ਘਈ ਨੂੰ ਵਾਪਸ ਕਰਨੀ ਪਵੇਗੀ ਜ਼ਮੀਨ

ਨਵੀਂ ਦਿੱਲੀ, 5 ਅਪ੍ਰੈਲ- ਮਸ਼ਹੂਰ ਫਿਲਮ ਨਿਰਦੇਸ਼ਕ ਸੁਭਾਸ਼ ਘਈ ਨੂੰ ਸੁਪਰੀਮ ਕੋਰਟ ਨੇ ਝਟਕਾ ਦਿੰਦਿਆਂ ਕਿਹਾ ਹੈ ਕਿ ਉਹ ਗੋਰੇਗਾਓਂ ਸਥਿਤ ਫਿਲਮ ਸਿਟੀ 'ਚ ਫਿਲਮ ਅਕੈਡਮੀ ਵਿਸਲਿੰਗ ਵੁੱਡਸ ਦੇ ਲਈ ਖਰੀਦੀ ਗਈ ਜ਼ਮੀਨ ਨੂੰ ਵਾਪਸ ਕਰਨ। ਸੁਪਰੀਮ ਕੋਰਟ ਨੇ ਮੁੰਬਈ ਹਾਈ ਕੋਰਟ ਦੇ ਫੈਸਲੇ ਨੂੰ ਬਰਕਾਰ ਰੱਖਿਆ ਹੈ ਜਿਸ 'ਚ ਘਈ ਨੂੰ 14.5 ਏਕੜ ਜ਼ਮੀਨ ਵਾਪਸ ਕਰਨ ਲਈ ਕਿਹਾ ਗਿਆ ਸੀ ਤੇ 5.5 ਏਕੜ ਜ਼ਮੀਨ 2014 ਤਕ ਸਰਕਾਰ ਨੂੰ ਵਾਪਸ ਕਰਨ ਲਈ ਕਿਹਾ ਸੀ ਤਾਂ ਜੋ ਅਕੈਡਮੀ 'ਚ ਪੜ੍ਹਨ ਵਾਲੇ ਵਿਦਿਆਰਥੀ ਆਪਣੀ ਪੜ੍ਹਾਈ ਬਿਨਾਂ ਕਿਸੇ ਮੁਸ਼ਕਿਲ ਦੇ ਪੂਰੀ ਕਰ ਲੈਣ ਨਾਲ ਹੀ ਘਈ ਨੂੰ 2000 ਤੋਂ 5 ਕਰੋੜ ਦਾ ਜੁਰਮਾਨਾ ਵੀ ਦੇਣ ਨੂੰ ਕਿਹਾ ਸੀ। ਘਈ ਨੇ ਹਾਈ ਕੋਰਟ ਦੇ ਫੈਸਲੇ ਵਿਰੁੱਧ ਸੁਪਰੀਮ ਕੋਰਟ 'ਚ ਅਪੀਲ ਦਾਖਲ ਕੀਤੀ ਸੀ।

ਪੰਜਾਬ ਸਰਕਾਰ ਵੱਲੋਂ ਮ੍ਰਿਤਕ ਮੁਲਾਜ਼ਮਾਂ ਦੇ
ਪਰਿਵਾਰਾਂ ਦੀਆਂ ਪੈਨਸ਼ਨਾਂ ਵਿਚ ਵਾਧਾ

ਚੰਡੀਗੜ੍ਹ, 5 ਅਪ੍ਰੈਲ -ਪੰਜਾਬ ਸਰਕਾਰ ਨੇ ਨੌਕਰੀ ਦੌਰਾਨ ਮਰਨ ਵਾਲੇ ਸਰਕਾਰੀ ਕਰਮਚਾਰੀਆਂ ਦੇ ਪਰਿਵਾਰਾਂ ਨੂੰ ਦਿੱਤੀ ਜਾਂਦੀ 'ਫੈਮਿਲੀ ਪੈਨਸ਼ਨ' ਵਿੱਚ ਵਾਧੇ ਸਬੰਧੀ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ। ਸਰਕਾਰੀ ਬੁਲਾਰੇ ਨੇ ਅੱਜ ਇਥੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮ੍ਰਿਤਕ ਮੁਲਾਜ਼ਮ ਦੀ ਮੌਤ ਹੋਣ ਤੋਂ 15 ਸਾਲਾਂ ਤੱਕ ਜਾਂ ਸਰਕਾਰੀ ਮੁਲਾਜ਼ਮ ਦੀ 65 ਸਾਲ ਉਮਰ ਹੁਣ ਤੱਕ (ਜੋ ਵੀ ਸਮਾਂ ਘੱਟ ਹੋਵੇ) 10 ਹਜ਼ਾਰ ਰੁਪਏ ਤੱਕ ਤਨਖਾਹ ਲੈਣ ਵਾਲੇ ਮੁਲਾਜ਼ਮਾਂ ਦੇ ਪਰਿਵਾਰਾਂ ਦੀ 'ਫੈਮਿਲੀ ਪੈਨਸ਼ਨ' ਨੂੰ 60 ਫੀਸਦੀ ਤੱਕ ਵਧਾ ਦਿੱਤਾ ਹੈ। ਇਸ ਤੋਂ ਇਲਾਵਾ 10 ਹਜ਼ਾਰ ਰੁਪਏ ਤੋਂ ਵੱਧ ਤਨਖਾਹ ਲੈਣ ਵਾਲੇ ਮੁਲਾਜ਼ਮਾਂ ਦੇ ਪਰਿਵਾਰਾਂ ਦੀ 'ਫੈਮਿਲੀ ਪੈਨਸ਼ਨ' ਨੂੰ 50 ਫੀਸਦੀ ਤੱਕ ਵਧਾ ਦਿੱਤਾ ਹੈ ਜੋ ਕਿ ਘੱਟੋ-ਘੱਟ 6000 ਰੁਪਏ ਹੋਵੇਗੀ। ਸਰਕਾਰੀ ਬੁਲਾਰੇ ਅਨੁਸਾਰ ਮ੍ਰਿਤਕ ਮੁਲਾਜ਼ਮ ਦੀ ਮੌਤ ਹੋਣ ਤੋਂ 15 ਸਾਲਾਂ ਬਾਅਦ ਜਾਂ ਸਰਕਾਰੀ ਮੁਲਾਜ਼ਮ ਦੀ 65 ਸਾਲ ਉਮਰ ਤੋਂ ਬਾਅਦ (ਜੋ ਵੀ ਸਮਾਂ ਘੱਟ ਹੋਵੇ) 10 ਹਜ਼ਾਰ ਰੁਪਏ ਤੱਕ ਤਨਖਾਹ ਲੈਣ ਵਾਲੇ ਮੁਲਾਜ਼ਮਾਂ ਦੇ ਪਰਿਵਾਰਾਂ ਦੀ 'ਫੈਮਿਲੀ ਪੈਨਸ਼ਨ' ਨੂੰ 40 ਫੀਸਦੀ ਤੱਕ ਵਧਾ ਦਿੱਤਾ ਹੈ। ਇਸ ਤੋਂ ਇਲਾਵਾ 10 ਹਜ਼ਾਰ ਰੁਪਏ ਤੋਂ ਵੱਧ ਤਨਖਾਹ ਲੈਣ ਵਾਲੇ ਮੁਲਾਜ਼ਮਾਂ ਦੇ ਪਰਿਵਾਰਾਂ ਦੀ 'ਫੈਮਿਲੀ ਪੈਨਸ਼ਨ' ਨੂੰ 30 ਫੀਸਦੀ ਤੱਕ ਵਧਾ ਦਿੱਤਾ ਹੈ ਜੋ ਕਿ ਘੱਟੋ-ਘੱਟ 4000 ਰੁਪਏ ਹੋਵੇਗੀ।

ਲੰਬੀ ਅਦਾਲਤੀ ਪ੍ਰਕਿਰਿਆ ਬਾਅਦ ਵੀ ਨਹੀਂ ਮਿਲਿਆ ਇਨਸਾਫ਼
ਅਣ-ਪਛਾਤੀਆਂ ਲਾਸ਼ਾਂ ਦਾ ਮਾਮਲਾ

ਜਲੰਧਰ, 5 ਅਪ੍ਰੈਲ -ਕਰੀਬ 16 ਸਾਲ ਦੀ ਲੰਬੀ ਅਦਾਲਤੀ ਪ੍ਰਕਿਰਿਆ ਬਾਅਦ ਵੀ ਖਾੜਕੂ ਲਹਿਰ ਦੌਰਾਨ ਅਤੇ ਤਿੰਨ ਪੁਲਿਸ ਜ਼ਿਲ੍ਹਿਆਂ ਵਿਚ 2097 ਨੌਜਵਾਨਾਂ ਦੀਆਂ ਲਾਸ਼ਾਂ ਨੂੰ ਅਣ-ਪਛਾਤੀਆਂ ਕਹਿ ਕੇ ਪੁਲਿਸ ਵੱਲੋਂ ਸਾੜ ਦਿੱਤੇ ਜਾਣ ਦੇ ਮਾਮਲੇ 'ਚ ਪੀੜਤ ਪਰਿਵਾਰਾਂ ਨੂੰ ਪੂਰਾ ਇਨਸਾਫ ਨਹੀਂ ਮਿਲਿਆ। 1994-1995 ਵਿਚ ਪੁਲਿਸ ਵੱਲੋਂ ਚੁੱਕ ਕੇ ਕਥਿਤ ਰੂਪ 'ਚ ਕਤਲ ਕਰ ਦਿੱਤੇ ਗਏ ਮਨੁੱਖੀ ਅਧਿਕਾਰ ਆਗੂ ਜਸਵੰਤ ਸਿੰਘ ਖਾਲੜਾ ਨੇ ਤਰਨ ਤਾਰਨ, ਅੰਮ੍ਰਿਤਸਰ ਤੇ ਮਜੀਠਾ ਤਿੰਨ ਪੁਲਿਸ ਜ਼ਿਲ੍ਹਿਆਂ ਦੇ ਖੇਤਰਾਂ ਦੇ ਸ਼ਮਸ਼ਾਨਘਾਟਾਂ ਤੋਂ ਕੀਤੀ ਪੜਤਾਲ 'ਚ ਇਹ ਤੱਥ ਸਾਹਮਣੇ ਲਿਆਂਦਾ ਸੀ ਕਿ 2097 ਵਿਅਕਤੀਆਂ ਦੀਆਂ ਲਾਸ਼ਾਂ ਪੁਲਿਸ ਨੇ ਅਣ-ਪਛਾਤੀਆਂ ਕਹਿ ਕੇ ਸਾੜ ਦਿੱਤੀਆਂ ਸਨ। ਸ: ਖਾਲੜਾ ਨੇ ਆਪਣੀ ਪੜਤਾਲ ਵਿਚ ਅਣ-ਪਛਾਤੀਆਂ ਲਾਸ਼ਾਂ ਕਹਿ ਕੇ ਮਾਰੇ ਗਏ ਨੌਜਵਾਨਾਂ ਬਾਰੇ ਅਨੇਕ ਵੇਰਵੇ ਵੀ ਦਰਜ ਕੀਤੇ ਸਨ। ਸ: ਖਾਲੜਾ ਦੇ ਗੁੰਮ ਕਰ ਦਿੱਤੇ ਜਾਣ ਬਾਅਦ ਇਹ ਸਾਰੀ ਰਿਪੋਰਟ ਪੰਜਾਬ ਮਨੁੱਖੀ ਅਧਿਕਾਰ ਸੰਗਠਨ ਦੀ ਅਗਵਾਈ ਵਿਚ ਕਈ ਸੰਗਠਨਾਂ ਵੱਲੋਂ ਸੁਪਰੀਮ ਕੋਰਟ ਵਿਚ ਇਕ ਪਟੀਸ਼ਨ ਵਜੋਂ ਦਾਇਰ ਕੀਤੀ ਗਈ ਸੀ। ਸੁਪਰੀਮ ਕੋਰਟ ਨੇ ਸਾਰੇ ਮਾਮਲੇ ਦੀ ਸੁਣਵਾਈ ਕਰਦਿਆਂ 12 ਦਸੰਬਰ, 1996 ਨੂੰ ਇਹ ਮਾਮਲਾ ਮਨੁੱਖੀ ਅਧਿਕਾਰ ਕਮਿਸ਼ਨ ਨੂੰ ਸੌਂਪਦਿਆਂ ਇਹ ਹਦਾਇਤ ਕੀਤੀ ਸੀ ਕਿ ਅਣ-ਪਛਾਤੀਆਂ ਲਾਸ਼ਾਂ ਕਰਾਰ ਦੇ ਕੇ ਸਾੜੇ ਗਏ ਵਿਅਕਤੀਆਂ ਦੇ ਮਾਮਲਿਆਂ ਦੇ ਅਪਰਾਧ ਤੇ ਪੀੜਤ ਪਰਿਵਾਰਾਂ ਨੂੰ ਮੁਆਵਜ਼ੇ ਬਾਰੇ ਉਹ ਖੁਦ ਪੜਤਾਲ ਕਰੇ ਅਤੇ ਫੈਸਲਾ ਲਵੇ। ਮੁਆਵਜ਼ੇ 'ਤੇ ਅਪਰਾਧਕ ਕੇਸਾਂ ਬਾਰੇ ਕਮਿਸ਼ਨ ਨੂੰ ਖੁਦ ਹੀ ਅਧਿਕਾਰ ਦੇਣ ਦਾ ਫੈਸਲਾ ਬੜਾ ਹੀ ਨਿਵੇਕਲਾ ਸੀ। 2097 ਕੇਸਾਂ ਵਿਚੋਂ ਮੁੱਖ ਸੀ. ਬੀ. ਆਈ. ਨੇ ਸਿਰਫ 35 ਕੇਸਾਂ 'ਚ ਚਾਰਜਸ਼ੀਟ ਦਾਇਰ ਕੀਤੀ ਪਰ ਮੁਕੱਦਮਾ ਅੱਜ ਤੱਕ ਕਿਸੇ ਇਕ ਉੱਪਰ ਵੀ ਨਹੀਂ ਚੱਲਿਆ। ਇਹ ਸਾਰੇ ਕੇਸ ਅਜੇ ਵੀ ਸੁਪਰੀਮ ਕੋਰਟ ਵਿਚ ਸਟੇਅ ਅਧੀਨ ਹਨ। 2001 ਵਿਚ ਫਿਰ 18 ਪੀੜਤ ਪਰਿਵਾਰਾਂ ਨੂੰ ਇਕ-ਇਕ ਲੱਖ ਰੁਪਏ ਮੁਆਵਜ਼ਾ ਦੇਣ ਦਾ ਫੈਸਲਾ ਕਮਿਸ਼ਨ ਨੇ ਕੀਤਾ। ਪਰ ਗੁੱਸੇ 'ਚ ਆਏ ਪੀੜਤ ਪਰਿਵਾਰਾਂ ਨੇ ਕਮਿਸ਼ਨ ਵੱਲੋਂ ਦਿੱਤੇ ਫੈਸਲੇ ਨੂੰ ਭੱਦਾ ਮਜ਼ਾਕ ਕਰਾਰ ਦਿੰਦਿਆਂ ਇਹ ਮੁਆਵਜ਼ਾ ਲੈਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਫਿਰ ਮਨੁੱਖੀ ਅਧਿਕਾਰ ਕਮਿਸ਼ਨ ਦੀ ਹਦਾਇਤ ਉੱਪਰ ਭੱਲਾ ਕਮੇਟੀ ਬੈਠੀ ਤੇ ਆਈ. ਜੀ. ਦੀ ਅਗਵਾਈ ਵਾਲੀ ਕਮੇਟੀ ਨੇ ਵੀ ਗਵਾਹੀਆਂ ਲਈਆਂ। ਅਖੀਰ ਹੁਣ 16 ਸਾਲ ਬਾਅਦ 2097 ਵਿਅਕਤੀਆਂ ਨੂੰ ਅਣ-ਪਛਾਤੀਆਂ ਲਾਸ਼ਾਂ ਕਹਿਕੇ ਸਾੜੇ ਗਏ ਵਿਅਕਤੀਆਂ ਵਿਚੋਂ 1513 ਵਿਅਕਤੀਆਂ ਨੂੰ ਪੌਣੇ ਦੋ ਲੱਖ ਰੁਪਏ ਪ੍ਰਤੀ ਪਰਿਵਾਰ ਦੇਣ ਦਾ ਫੈਸਲਾ ਸੁਣਾਇਆ ਹੈ। ਵਰਨਣਯੋਗ ਹੈ ਕਿ 1513 ਜਿਨ੍ਹਾਂ ਵਿਅਕਤੀਆਂ ਦੇ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇਣ ਦਾ ਫੈਸਲਾ ਸੁਣਾਇਆ ਗਿਆ ਹੈ, ਉਨ੍ਹਾਂ ਵਿਚ 195 ਅਜਿਹੇ ਵਿਅਕਤੀ ਹਨ, ਜਿਨ੍ਹਾਂ ਬਾਰੇ ਖੁਦ ਕਮਿਸ਼ਨ ਇਹ ਆਖ ਰਿਹਾ ਹੈ ਕਿ ਇਨ੍ਹਾਂ ਦੀ ਮੌਤ ਪੁਲਿਸ ਹਿਰਾਸਤ ਵਿਚ ਹੋਈ ਸੀ ਤੇ ਇਸ ਕਾਰਨ ਇਨ੍ਹਾਂ ਦੇ ਪੀੜਤ ਪਰਿਵਾਰਾਂ ਨੂੰ ਮੁਆਵਜ਼ਾ ਢਾਈ-ਢਾਈ ਲੱਖ ਰੁਪਏ ਦਿੱਤਾ ਜਾ ਰਿਹਾ ਹੈ। ਪਹਿਲੀ ਗੱਲ ਤਾਂ ਇਹ ਹੈ ਕਿ 2097 ਵਿਅਕਤੀਆਂ ਦੀ ਖਾਲੜਾ ਵੱਲੋਂ ਤਿਆਰ ਸੂਚੀ ਵਿਚੋਂ 532 ਵਿਅਕਤੀਆਂ ਨੂੰ ਤਾਂ ਇਹ ਕਹਿ ਕੇ ਬਾਹਰ ਕੱਢ ਦਿੱਤਾ ਹੈ ਕਿ ਉਨ੍ਹਾਂ ਬਾਰੇ ਕੋਈ ਸਬੂਤ ਹੀ ਨਹੀਂ ਮਿਲੇ। ਖਾਲੜਾ ਮਿਸ਼ਨ ਦੇ ਪ੍ਰਧਾਨ ਹਰਮਨਦੀਪ ਸਿੰਘ ਦਾ ਕਹਿਣਾ ਹੈ ਕਿ ਇਨ੍ਹਾਂ ਸਾਰੇ ਵਿਅਕਤੀਆਂ ਬਾਰੇ ਭੱਲਾ ਕਮੇਟੀ ਤੇ ਆਈ. ਜੀ. ਸਾਹਮਣੇ ਤੱਥ ਤੇ ਸਬੂਤ ਪੇਸ਼ ਕੀਤੇ ਗਏ ਸਨ ਪਰ ਉਨ੍ਹਾਂ ਨੂੰ ਕਿਸੇ ਨੇ ਰਿਕਾਰਡ ਉੱਪਰ ਹੀ ਨਹੀਂ ਲਿਆਂਦਾ। ਸੁਪਰੀਮ ਕੋਰਟ ਨੇ ਕਮਿਸ਼ਨ ਨੂੰ ਮੁਆਵਜ਼ੇ ਦੇ ਨਾਲ ਅਪਰਾਧਕ ਮਾਮਲੇ ਪੜਤਾਲਣ ਲਈ ਵੀ ਜ਼ਿੰਮੇਵਾਰੀ ਸੌਂਪੀ ਸੀ। ਇਸ ਮਾਮਲੇ ਦੀ ਅਦਾਲਤੀ ਪੈਰਵਾਈ ਕਰਦੇ ਆ ਰਹੇ ਸ: ਰਾਜਵਿੰਦਰ ਸਿੰਘ ਬੈਂਸ ਐਡਵੋਕੇਟ ਦਾ ਕਹਿਣਾ ਹੈ ਕਿ ਅਪਰਾਧਕ ਮਾਮਲਿਆਂ ਬਾਰੇ ਕਮਿਸ਼ਨ ਨੇ ਕੋਈ ਕਾਰਵਾਈ ਹੀ ਨਹੀਂ ਕੀਤੀ। ਸ: ਬੈਂਸ ਦਾ ਕਹਿਣਾ ਹੈ ਕਿ ਸਾਰੀ ਅਦਾਲਤੀ ਕਾਰਵਾਈ ਪੰਜਾਬ ਸਰਕਾਰ ਦੇ ਅਸਹਿਯੋਗ ਦੌਰਾਨ ਹੀ ਨੇਪਰੇ ਚੜ੍ਹੀ ਹੈ ਕਿਉਂਕਿ ਸਰਕਾਰ ਨੇ ਕਦੇ ਵੀ ਐਫ. ਆਈ. ਆਰ. ਦੀਆਂ ਕਾਪੀਆਂ ਮੁਹੱਈਆ ਨਹੀਂ ਕਰਵਾਈਆਂ। ਜੇ ਦਿੱਤੀਆਂ ਵੀ ਤਾਂ ਉਸ ਵਿਚੋਂ ਸਬੰਧਿਤ ਅਧਿਕਾਰੀਆਂ ਜਾਂ ਕਰਮਚਾਰੀਆਂ ਦੇ ਨਾਂਅ ਕੱਟ ਦਿੱਤੇ, ਅਜਿਹੀ ਹਾਲਤ 'ਚ ਕਿਸੇ ਖਿਲਾਫ ਕੀ ਕਾਰਵਾਈ ਹੋ ਸਕਦੀ ਹੈ।

ਆਦਰਸ਼ ਘੁਟਾਲੇ ਵਿਚ ਸ਼ਾਮਿਲ 7 ਦੋਸ਼ੀਆਂ ਦੀ
ਜ਼ਮਾਨਤ ਅਰਜ਼ੀ ਖਾਰਜ

ਮੁੰਬਈ, 5 ਅਪ੍ਰੈਲ-ਅੱਜ ਆਦਰਸ਼ ਘੁਟਾਲੇ ਵਿਚ ਸ਼ਾਮਿਲ 7 ਦੋਸ਼ੀਆਂ ਦੀ ਜ਼ਮਾਨਤ ਅਰਜ਼ੀ ਨੂੰ ਵਿਸ਼ੇਸ਼ ਅਦਾਲਤ ਵੱਲੋਂ ਖਾਰਜ ਕਰ ਦਿੱਤਾ ਗਿਆ। ਜੱਜ ਐਮ. ਵੀ. ਕੁਲਕਰਨੀ ਨੇ ਫੈਸਲਾ ਸੁਣਾਉਂਦਿਆਂ ਕਿਹਾ ਕਿ ਇਸ ਕੇਸ ਵਿਚ ਕਾਰਵਾਈ ਮਹੱਤਵਪੂਰਨ ਪੜਾਅ 'ਤੇ ਪੁੱਜ ਚੁੱਕੀ ਹੈ। ਇਸ ਕਰਕੇ ਦੋਸ਼ੀਆਂ ਨੂੰ ਜ਼ਮਾਨਤ ਨਹੀਂ ਦਿੱਤੀ ਜਾ ਸਕਦੀ। ਇਨ੍ਹਾਂ 7 ਦੋਸ਼ੀਆਂ ਵਿਚ ਸਾਬਕਾ ਕਾਂਗਰਸ ਵਿਧਾਇਕ ਕੇ. ਐਲ. ਗਿਡਵਾਨੀ, ਪ੍ਰਦੀਪ ਵਿਆਸ, ਸਾਬਕਾ ਮੇਜਰ ਜਨਰਲ ਟੀ. ਕੇ. ਕੌਲ, ਸਾਬਕਾ ਮੇਜਰ ਜਨਰਲ ਏ. ਆਰ. ਕੁਮਾਰ, ਸਾਬਕਾ ਬ੍ਰਿਗੇਡੀਅਰ ਐਮ. ਐਮ. ਬਾਂਚੂ, ਸਾਬਕਾ ਅਧਿਕਾਰੀ ਆਰ. ਸੀ. ਠਾਕੁਰ ਅਤੇ ਪੀ. ਵੀ. ਦੇਸ਼ਮੁਖ ਦੇ ਨਾਂਅ ਸ਼ਾਮਿਲ ਹਨ। ਇਨ੍ਹਾਂ ਸਾਰਿਆਂ ਨੂੰ 17 ਅਪ੍ਰੈਲ ਤੱਕ ਰਿਮਾਂਡ ਲਈ ਭੇਜਿਆ ਗਿਆ ਹੈ।

ਜ਼ੁਲਫਕਾਰ ਭੁੱਟੋ ਦੇ ਕਤਲ ਲਈ ਸੁਪਰੀਮ
ਕੋਰਟ ਮੁਆਫ਼ੀ ਮੰਗੇ-ਬਿਲਾਵਲ

ਇਸਲਾਮਾਬਾਦ, 5 ਅਪ੍ਰੈਲ - ਸੱਤਾਧਾਰੀ ਪੀਪਲਜ਼ ਪਾਰਟੀ ਪਾਕਿਸਤਾਨ ਦੇ ਮੁਖੀ ਬਿਲਾਵਲ ਭੁੱਟੋ ਜ਼ਰਦਾਰੀ ਨੇ ਸੁਪਰੀਮ ਕੋਰਟ ਨੂੰ ਨਿਸ਼ਾਨਾ ਬਣਾਉਂਦਿਆਂ ਕਿਹਾ ਹੈ ਕਿ ਉਹ ਜ਼ੁਲਫਕਾਰ ਅਲੀ ਭੁੱਟੋ ਦੇ ਨਿਆਇਕ ਕਤਲ ਵਿਚ ਨਿਭਾਈ ਭੂਮਿਕਾ ਲਈ ਮੁਆਫੀ ਮੰਗੇ ਤੇ ਇਸ ਗੱਲ ਨੂੰ ਯਕੀਨੀ ਬਣਾਵੇ ਕਿ ਪ੍ਰਧਾਨ ਮੰਤਰੀ ਯੂਸਫ ਰਜ਼ਾ ਗਿਲਾਨੀ ਵਿਰੁੱਧ ਚੱਲ ਰਹੇ ਮਾਣਹਾਨੀ ਦੇ ਮਾਮਲੇ 'ਚ ਦੋਹਰੇ ਮਾਪਦੰਡ ਨਹੀਂ ਅਪਣਾਏ ਜਾਣਗੇ। 23 ਸਾਲਾ ਬਿਲਾਵਲ ਨੇ ਇਹ ਸਖਤ ਸ਼ਬਦਾਵਲੀ ਵਾਲਾ ਭਾਸ਼ਣ ਬੀਤੀ ਰਾਤ ਸਾਬਕਾ ਰਾਸ਼ਟਰਪਤੀ ਜ਼ੁਲਫਕਾਰ ਅਲੀ ਭੁੱਟੋ ਦੀ ਸ਼ਹਾਦਤ ਦੀ ਵਰ੍ਹੇਗੰਢ ਮੌਕੇ ਸਿੰਧ ਰਾਜ ਵਿਚ ਨਾਉਦੇਰੋ ਵਿਖੇ ਹੋਏ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਦਿੱਤਾ। ਇਹ ਖੇਤਰ ਭੁੱਟੋ ਪਰਿਵਾਰ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ਪਾਰਟੀ ਵੱਲੋਂ ਸਾਬਕਾ ਰਾਸ਼ਟਰਪਤੀ ਨੂੰ ਦਿੱਤੀ ਮੌਤ ਦੀ ਸਜ਼ਾ ਬਾਰੇ ਦਾਇਰ ਜਾਇਜ਼ਾ ਮਾਮਲੇ ਦਾ ਹਵਾਲਾ ਦਿੰਦਿਆਂ ਬਿਲਾਵਲ ਨੇ ਕਿਹਾ ਕਿ ਮੈਨੂੰ ਵਿਸ਼ਵਾਸ ਹੈ ਕਿ ਸੁਪਰੀਮ ਕੋਰਟ ਅੜਿੱਕਾ ਨਹੀਂ ਬਣੇਗੀ ਤੇ ਆਖਰਕਾਰ ਸਾਨੂੰ ਨਿਆਂ ਮਿਲੇਗਾ।

ਓਡੀਸ਼ਾ ਸਰਕਾਰ ਕਰੇਗੀ 8 ਨਕਸਲੀਆਂ
ਸਮੇਤ 27 ਲੋਕਾਂ ਨੂੰ ਰਿਹਾਅ

ਭੁਵਨੇਸ਼ਵਰ, 5 ਅਪ੍ਰੈਲ  - ਓਡੀਸ਼ਾ ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ ਉਹ ਇਟਲੀ ਦੇ ਅਗਵਾ ਕੀਤੇ ਸੈਲਾਨੀ ਤੇ ਬੀ. ਜੇ. ਡੀ. ਦੇ ਵਿਧਾਇਕ ਦੀ ਰਿਹਾਈ ਬਦਲੇ 8 ਨਕਸਲੀਆਂ ਸਮੇਤ 27 ਜਾਣਿਆ ਨੂੰ ਜੇਲ੍ਹ ਤੋਂ ਰਿਹਾਅ ਕਰੇਗੀ। ਸਰਕਾਰ ਦੇ ਬੁਲਾਰੇ ਨੇ ਦੱਸਿਆ ਕਿ ਅਗਵਾ ਕੀਤੇ ਵਿਅਕਤੀਆਂ ਦੀ ਰਿਹਾਈ ਬਦਲੇ ਰਿਹਾਅ ਕੀਤੇ ਜਾਣ ਵਾਲਿਆਂ ਦੇ ਨਾਂਅ ਕੱਲ੍ਹ ਨੂੰ ਐਲਾਨੇ ਜਾਣਗੇ। ਅਧਿਕਾਰੀ ਨੇ ਦੱਸਿਆ ਕਿ ਸਰਕਾਰ ਇਟਲੀ ਦੇ ਸੈਲਾਨੀ ਤੇ ਵਿਧਾਇਕ ਦੀ ਰਿਹਾਈ ਲਈ ਹਰ ਸੰਭਵ ਕਦਮ ਉਠਾ ਰਹੀ ਹੈ।

ਸੁਪਰੀਮ ਕੋਰਟ ਵੱਲੋਂ 2 ਜੀ ਘੁਟਾਲੇ ਸਬੰਧੀ
11 ਨਜ਼ਰਸਾਨੀ ਪਟੀਸ਼ਨਾਂ ਵਿਚੋਂ 10 ਖਾਰਜ

ਨਵੀਂ ਦਿੱਲੀ, 5 ਅਪ੍ਰੈਲ -ਸੁਪਰੀਮ ਕੋਰਟ ਨੇ 2 ਜੀ ਘੁਟਾਲੇ ਸਬੰਧੀ ਕੇਂਦਰ ਦੁਆਰਾ 122 ਕੰਪਨੀਆਂ ਦੇ ਲਾਇਸੰਸ ਖਾਰਜ ਕਰਨ ਸਬੰਧੀ ਨਜ਼ਰਸਾਨੀ ਪਟੀਸ਼ਨ ਮਨਜ਼ੂਰ ਕਰਦਿਆਂ ਬਾਕੀ 10 ਪਟੀਸ਼ਨਾਂ ਖਾਰਜ ਕਰ ਦਿੱਤੀਆਂ, ਜਿਨ੍ਹਾਂ ਵਿਚ ਸੱਤ ਟੈਲੀਕਾਮ ਕੰਪਨੀਆਂ ਅਤੇ ਸਾਬਕਾ ਮੰਤਰੀ ਏ ਰਾਜਾ ਦੀ ਨਜ਼ਰਸਾਨੀ ਪਟੀਸ਼ਨ ਵੀ ਸ਼ਾਮਿਲ ਸੀ। ਅਦਾਲਤ ਨੇ ਮਨਜ਼ੂਰ ਕੀਤੀ ਪਟੀਸ਼ਨ ਦੀ ਸੁਣਵਾਈ ਲਈ ਅਗਲੀ ਤਰੀਕ 13 ਅਪ੍ਰੈਲ ਪਾਈ ਹੈ। ਨਜ਼ਰਸਾਨੀ ਪਟੀਸ਼ਨਾਂ ਖਾਰਜ ਕਰਦਿਆਂ ਅਦਾਲਤ ਨੇ ਕਿਹਾ ਕਿ ਇਹੋ ਜਿਹੀ ਕੋਈ ਗਲਤੀ ਨਹੀਂ ਹੋਈ, ਜਿਸ 'ਤੇ ਮੁੜ-ਵਿਚਾਰ ਕਰਨ ਦੀ ਲੋੜ ਹੈ। ਅਦਾਲਤ ਨੇ ਪਟੀਸ਼ਨਾਂ ਖਾਰਜ ਕਰਦਿਆਂ ਕਿਹਾ ਇਹ ਕਾਨੂੰਨ ਅਧੀਨ ਹੀ ਖਾਰਜ ਕੀਤੀਆਂ ਗਈਆਂ ਹਨ।

ਅਗਲੇ ਸੈਨਾ ਮੁਖੀ ਨਿਯੁਕਤੀ ਤੋਂ ਪਹਿਲਾਂ ਵਿਵਾਦਾਂ 'ਚ

ਨਵੀਂ ਦਿੱਲੀ, 5ਅਪ੍ਰੈਲ  -ਨਵੇਂ ਸੈਨਾ ਮੁਖੀ ਦੇ ਰੂਪ 'ਚ ਨਿਯੁਕਤੀ ਤੋਂ ਪਹਿਲਾਂ ਹੀ ਲੈਫ: ਜਨਰਲ ਬਿਕਰਮ ਸਿੰਘ ਵਿਵਾਦਾਂ 'ਚ ਆ ਗਏ ਹਨ। ਸੁਪਰੀਮ ਕੋਰਟ 'ਚ ਬਿਕਰਮ ਸਿੰਘ ਨੂੰ ਅਗਲੇ ਸੈਨਾ ਮੁਖੀ ਦੇ ਰੂਪ 'ਚ ਨਿਯੁਕਤੀ ਨੂੰ ਚੁਣੌਤੀ ਦਿੱਤੀ ਗਈ ਹੈ। ਸੁਪਰੀਮ ਕੋਰਟ 'ਚ ਇਕ ਜਨ ਹਿੱਤ ਪਟੀਸ਼ਨ ਦਾਖਲ ਕੀਤੀ ਗਈ ਹੈ। ਪਟੀਸ਼ਨ 'ਚ ਕਿਹਾ ਗਿਆ ਹੈ ਕਿ ਬਿਕਰਮ ਸਿੰਘ ਜੰਮੂ-ਕਸ਼ਮੀਰ 'ਚ ਹੋਏ ਇਕ ਕਥਿਤ ਫਰਜ਼ੀ ਮੁਕਾਬਲੇ 'ਚ ਸ਼ਾਮਿਲ ਸਨ। ਸਰਕਾਰ ਨੇ 3 ਮਾਰਚ ਨੂੰ ਅਗਲੇ ਸੈਨਾ ਮੁਖੀ ਦੇ ਰੂਪ 'ਚ ਬਿਕਰਮ ਸਿੰਘ ਦੇ ਨਾਂਅ ਦਾ ਐਲਾਨ ਕੀਤਾ ਸੀ। ਮੌਜੂਦਾ ਸੈਨਾ ਮੁਖੀ ਜਨਰਲ ਵੀ. ਕੇ. ਸਿੰਘ 31 ਮਈ ਨੂੰ ਸੇਵਾ ਮੁਕਤ ਹੋ ਰਹੇ ਹਨ।

ਕਾਂਗਰਸ ਤੇ ਭਾਜਪਾ 'ਚ ਕੋਈ ਫ਼ਰਕ ਨਹੀਂ ਹੈ-ਕਰਾਤ

ਕੋਜ਼ੀਕੋਡ, 5 ਅਪ੍ਰੈਲ-ਸੀ. ਪੀ. ਆਈ. (ਐਮ) ਨੇ ਅੱਜ ਕਿਹਾ ਹੈ ਕਿ ਭ੍ਰਿਸ਼ਟਾਚਾਰ ਨਵ ਉਦਾਰਵਾਦੀ ਪ੍ਰਬੰਧ ਦੁਆਰਾ ਅਪਣਾਈਆਂ ਨੀਤੀਆਂ ਦੀ ਪੈਦਾਵਾਰ ਹੈ ਤੇ ਕੇਵਲ ਖੱਬਾ-ਲੋਕਤੰਤਰਿਕ ਬਦਲ ਹੀ ਇਸ ਵਿਰੁੱਧ ਲੜ ਸਕਦਾ ਹੈ। ਪਾਰਟੀ ਨੇ ਕਿਹਾ ਹੈ ਕਿ ਸੱਤਾਧਾਰੀ ਰਾਜਸੀ ਨੇਤਾ ਤੇ ਨੌਕਰਸ਼ਾਹੀ ਜਨਤਿਕ ਫੰਡਾਂ ਤੇ ਦੁਰਲੱਭ ਸਾਧਨਾਂ ਨੂੰ ਲੱਟ ਰਹੇ ਹਨ। ਮਾਰਕਸੀ ਪਾਰਟੀ ਦੇ ਜਨਰਲ ਸਕੱਤਰ ਪ੍ਰਕਾਸ਼ ਕਰਾਤ ਨੇ ਇਥੇ 20 ਵੀਂ ਪਾਰਟੀ ਕਾਨਫਰੰਸ ਦਾ ਉਦਘਾਟਨ ਕਰਦਿਆਂ ਦਾਅਵਾ ਕੀਤਾ ਕਿ ਸਾਂਝਾ ਪ੍ਰਗਤੀਸ਼ੀਲ ਗਠਜੋੜ ਦੇ ਰਾਜ ਦੌਰਾਨ ਕੁਦਰਤੀ ਸਾਧਨਾਂ ਦੀ ਲੁੱਟ ਸਿਖਰਾਂ 'ਤੇ ਪੁੱਜ ਗਈ ਹੈ ਜਿਸ ਦੀ ਕਿਤੇ ਮਿਸਾਲ ਨਹੀਂ ਮਿਲਦੀ। ਕਰਾਤ ਨੇ ਕਿਹਾ ਹੈ ਕਿ ਸਰਕਾਰੀ ਅਧਿਕਾਰੀਆਂ ਦੇ ਭ੍ਰਿਸ਼ਟਾਚਾਰ ਨਾਲ ਨਜਿੱਠਣ ਲਈ ਕੇਵਲ ਇਕ ਮਜ਼ਬੂਤ ਤੇ ਪ੍ਰਭਾਵੀ ਲੋਕਪਾਲ ਕਾਫੀ ਨਹੀਂ ਹੈ ਤੇ ਭ੍ਰਿਸ਼ਟਾਚਾਰ ਵਿਰੁੱਧ ਲੜਾਈ ਨਵ ਉਦਾਰਵਾਦੀ ਪ੍ਰਬੰਧ ਤੇ ਭ੍ਰਿਸ਼ਟ ਸਬੰਧਾਂ ਵਿਰੁੱਧ ਸੇਧਿਤ ਹੋਣੀ ਚਾਹੀਦੀ ਹੈ ਜੋ ਜਨਤਿਕ ਫੰਡਾਂ ਤੇ ਸਾਧਨਾਂ ਦੀ ਲੁੱਟ ਦਾ ਰਾਹ ਪੱਧਰਾ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਦੇਸ਼ ਵਿਚ ਦੋ ਦਹਾਕੇ ਦੇ ਉਦਾਰੀਕਰਨ ਦੌਰਾਨ ਬੇਮਿਸਾਲ ਨਾਬਰਾਬਰਤਾ ਵਧੀ ਹੈ ਜਿਸ ਦੇ ਨਤੀਜੇ ਵਜੋਂ ਭਾਰਤ ਨੇ ਕੁਝ ਸਿਖਰ ਦੇ ਅਮੀਰ ਲੋਕ ਪੈਦਾ ਕੀਤੇ ਹਨ ਜਦ ਕਿ ਕਰੋੜਾਂ ਲੋਕਾਂ ਨੂੰ ਜੀਵਨ ਦੀਆਂ ਬੁਨਿਆਦੀ ਲੋੜਾਂ ਤੋਂ ਵਾਂਝਿਆਂ ਰੱਖਿਆ ਗਿਆ ਹੈ।