ਲੀਡਰਾਂ ਵਲੋਂ ਵੋਟਾਂ ਲਈ ਡੇਰਿਆਂ 'ਤੇ ਡੋਰੇ

ਹਿਸਾਰ, 19 ਜਨਵਰੀ— ਵਿਧਾਨ ਸਭਾ ਚੋਣਾਂ ਪੰਜਾਬ 'ਚ ਹਨ ਪਰ ਉਮੀਦਵਾਰਾਂ ਦੇ ਇੰਟਰਵਿਊ ਚੱਲ ਰਹੇ ਹਨ। ਹਰਿਆਣਾ ਦੇ ਸਿਰਸਾ 'ਚ ਮੌਜੂਦ ਡੇਰਾ ਸੱਚਾ ਸੌਦਾ 'ਚ ਬਾਬਾ ਰਾਮ ਰਹੀਮ ਦਾ ਅਸ਼ੀਰਵਾਦ ਪਾਉਣ ਲਈ ਹਰ ਪਾਰਟੀ ਦੇ ਤਕਰੀਬਨ 200 ਉਮੀਦਵਾਰ ਹੁਣ ਤੱਕ ਡੇਰੇ 'ਤੇ ਹਾਜ਼ਰੀ ਲਗਵਾ ਚੁੱਕੇ ਹਨ। ਜੋ ਉਮੀਦਵਾਰ ਡੇਰਾ ਸੱਚਾ ਸੌਦਾ ਦਾ ਸਮਰਥਨ ਚਾਹੁੰਦੇ ਹਨ, ਡੇਰੇ ਦਾ ਰਾਜਨੀਤਿਕ ਵਿੰਗ ਉਨ੍ਹਾਂ ਦਾ ਇੰਟਰਵਿਊ ਲੈ ਰਿਹਾ ਹੈ। ਉਮੀਦਵਾਰਾਂ ਤੋਂ ਪੁੱਛਿਆ ਜਾ ਰਿਹਾ ਹੈ ਕਿ ਚੋਣਾਂ ਜਿੱਤਣ ਦੀ ਸੂਰਤ 'ਚ ਉਹ ਇਲਾਕੇ ਦੇ ਲੋਕਾਂ ਲਈ ਕੀ ਕਰਨਗੇ।
ਜੋ ਉਮੀਦਵਾਰ ਆਪਣਾ ਇਲਾਕਾ ਛੱਡ ਕੇ ਦੂਜੇ ਇਲਾਕਿਆਂ 'ਚ ਚੋਣਾਂ ਲੜ ਰਹੇ ਹਨ, ਉਨ੍ਹਾਂ ਤੋਂ ਇਲਾਕਾ ਬਦਲਣ ਦਾ ਕਾਰਨ ਪੁੱਛਿਆ ਜਾ ਰਿਹਾ ਹੈ। ਸੂਤਰਾਂ ਮੁਤਾਬਕ ਪੰਜਾਬ ਚੋਣਾਂ ਨੂੰ ਲੈ ਕੇ ਡੇਰੇ ਨੇ ਹੁਣ ਤੱਕ ਆਪਣੇ ਪੱਤੇ ਨਹੀਂ ਖੋਲ੍ਹੇ ਹਨ ਅਤੇ ਨਾ ਕਿਸੇ ਨੂੰ ਸਮਰਥਨ ਦਾ ਐਲਾਨ ਕੀਤਾ ਹੈ।
ਅਸਲ 'ਚ ਪੰਜਾਬ ਦੇ ਮਾਲਵਾ ਇਲਾਕੇ ਦੀ ਸਿਆਸਤ ਡੇਰੇ ਦੀ ਅਣਦੇਖੀ ਕਰਕੇ ਨਹੀਂ ਕੀਤੀ ਜਾ ਸਕਦੀ। ਇਸ ਇਲਾਕੇ 'ਚ ਡੇਰਾ ਸੱਚਾ ਸੌਦਾ ਦਾ ਖਾਸਾ ਅਸਰ ਹੈ ਅਤੇ ਵੱਡੀ ਗਿਣਤੀ 'ਚ ਉਨ੍ਹਾਂ ਦੇ ਵੋਟਰਾਂ ਦੀ ਮੌਜੂਦਗੀ ਵੀ ਹੈ। ਮਾਲਵਾ ਦੇ 69 ਵਿਧਾਨ ਸਭਾ ਖੇਤਰਾਂ 'ਚੋਂ 45 'ਤੇ ਡੇਰਾ ਪ੍ਰੇਮੀ ਚੋਣ ਦਾ ਰੁਖ ਤੈਅ ਕਰਦੇ ਹਨ। 2007 ਦੀਆਂ ਚੋਣਾਂ 'ਚ ਡੇਰਾ ਨੇ ਖੁੱਲੇਆਮ ਕਾਂਗਰਸ ਨੂੰ ਸਮਰਥਨ ਦਿੱਤਾ ਸੀ ਅਤੇ 37 ਸੀਟਾਂ ਕਾਂਗਰਸ ਦੀ ਝੋਲੀ 'ਚ ਆਈਆਂ ਸਨ। ਉਦੋਂ ਸ਼੍ਰੋਮਣੀ ਅਕਾਲੀ ਦਲ ਦਾ ਗੜ੍ਹ ਰਿਹਾ ਇਹ ਇਲਾਕਾ ਕਾਂਗਰਸੀ ਰੰਗ 'ਚ ਰੰਗਿਆ ਗਿਆ ਸੀ। ਪਿਛਲੀਆਂ ਚੋਣਾਂ ਤੋਂ ਬਾਅਦ ਡੇਰਾ ਮੁਖੀ ਦੀ ਵਿਵਾਦਿਤ ਤਸਵੀਰ ਆਈ ਅਤੇ ਅਕਾਲੀ ਦਲ-ਭਾਜਪਾ ਸਰਕਾਰ ਨਾਲ ਉਸਦੇ ਸੰਬੰਧਾਂ 'ਚ ਖਟਾਸ ਪੈਦਾ ਹੋ ਗਈ ਸੀ ਪਰ ਸਿਆਸਤ ਹਮੇਸ਼ਾ ਇਕੋ ਜਿਹੀ ਨਹੀਂ ਰਹਿੰਦੀ। ਬਗੈਰ ਆਪਣਾ ਪੁਰਾਣਾ ਸਿੱਖ ਵੋਟ ਬੈਂਕ ਗੁਆਏ ਅਕਾਲੀ ਦਲ ਇਸ ਵਾਰ ਫਿਰ ਮਾਲਵਾ 'ਤੇ ਪਕੜ ਬਣਾਉਣ ਨੂੰ ਬੇਚੈਨ ਹੈ।
ਪੰਜਾਬ ਦੇ ਕਈ ਇਲਾਕਿਆਂ 'ਚ ਸਿੱਖਾਂ ਅਤੇ ਡੇਰਾ ਪ੍ਰੇਮੀਆਂ ਵਿਚਾਲੇ ਹੁਣ ਵੀ ਖਟਾਸ ਖਤਮ ਨਹੀਂ ਹੋਈ ਪਰ ਮਾਲਵਾ ਦੀ ਅਣਦੇਖੀ ਵੀ ਅਕਾਲੀ ਦਲ ਲਈ ਮੁਮਕਿਨ ਨਹੀਂ ਇਸ ਲਈ ਸਮਝੌਤੇ ਦੀ ਰਾਹ ਬਣਾਉਣ ਦੀ ਕੋਸ਼ਿਸ਼ ਜਾਰੀ ਹੈ। ਪੰਜਾਬ ਦੀ ਕੁਲ 117 ਸੀਟਾਂ 'ਚੋਂ 69 ਸੀਟਾਂ ਮਾਲਵਾ ਇਲਾਕੇ 'ਚ ਆਉਂਦੀਆਂ ਹਨ। ਇਸੇ ਇਲਾਕੇ 'ਚ ਡੇਰੇ ਦਾ ਸਭ ਤੋਂ ਜ਼ਿਆਦਾ ਦਬਦਬਾ ਹੈ ਲਿਹਾਜ਼ਾ ਡੇਰੇ ਦਾ ਅਸ਼ੀਰਵਾਦ ਲੈਣ ਲਈ ਹਰ ਪਾਰਟੀ ਦੇ ਉਮੀਦਵਾਰਾਂ 'ਚ ਦੌੜ ਲੱਗੀ ਹੈ। ਇਹ ਗੱਲ ਵੱਖ ਹੈ ਕਿ ਇਸ ਵਾਰ ਡੇਰੇ ਨੇ ਆਪਣੇ ਪੱਤੇ ਅਜੇ ਤੱਕ ਨਹੀਂ ਖੋਲ੍ਹੇ ਹਨ।

 ਹਵਾਈ ਅੱਡੇ 'ਤੇ ਆਤਮਘਾਤੀ ਹਮਲਾ!

ਕੰਧਾਰ,  19 ਜਨਵਰੀ -  ਅਫਗਾਨਿਸਤਾਨ ਦੇ ਦੱਖਣੀ ਸ਼ਹਿਰ ਕੰਧਾਰ 'ਚ ਵਿਦੇਸ਼ੀ ਸੈਨਾ ਨੂੰ ਨਿਸ਼ਾਨਾ ਬਣਾ ਕੇ ਕੌਮਾਂਤਰੀ ਹਵਾਈ ਅੱਡੇ 'ਤੇ ਅੱਜ ਤਾਲਿਬਾਨੀ ਅੱਤਵਾਦੀਆਂ  ਨੇ ਆਤਮਘਾਤੀ ਹਮਲਾ ਕੀਤਾ ਜਿਸ 'ਚ ਘੱਟੋ-ਘੱਟ 6 ਲੋਕ ਮਾਰੇ ਗਏ। ਅੱਤਵਾਦੀ ਸੰਗਠਨ ਤਾਲਿਬਾਨ ਨੇ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਕੰਧਾਰ ਪ੍ਰਾਂਤ ਦੇ ਪੁਲਸ ਮੁਖੀ ਅਬਦੁੱਲ ਰਜ਼ਾਕ ਨੇ ਇਥੇ ਦੱਸਿਆ ਕਿ ਹਮਲਾਵਰ ਪੈਦਲ ਆਇਆ ਸੀ ਅਤੇ ਉਸ ਨੇ ਕੰਧਾਰ ਏਅਰ ਫੀਲਡ ਕੋਲ ਪਹੁੰਚਣ ਦੀ ਕੋਸ਼ਿਸ਼ ਕੀਤੀ। ਇਸੇ ਵਿਚਾਲੇ ਉਸਨੇ ਵਿਸਫੋਟ ਕਰਕੇ ਖੁਦ ਨੂੰ ਉਡਾ ਦਿੱਤਾ। ਵਿਸਫੋਟ ਦੀ ਲਪੇਟ 'ਚ ਆਉਣ ਨਾਲ 6 ਲੋਕਾਂ ਦੀ ਮੌਤ ਹੋ ਗਈ।  ਹਾਲਾਂਕਿ ਨਾਟੋ ਦੇ ਬੁਲਾਰੇ ਨੇ ਦੱਸਿਆ ਕਿ ਹਮਲਾਵਰ ਵਾਹਨ 'ਚ ਆਇਆ ਸੀ। ਸੂਤਰਾਂ ਨੇ ਦੱਸਿਆ ਕਿ ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ ਬਾਅਦ ਕਰੀਬ 1.13 ਮਿੰਟ 'ਤੇ ਹੋਇਆ ਇਹ ਹਮਲਾ ਹਵਾਈ ਅੱਡੇ ਦੇ ਬਾਹਰੀ ਹਿੱਸੇ 'ਚ ਹੋਇਆ ਜਿੱਥੇ ਵਿਦੇਸ਼ੀ ਸੈਨਾ ਦੇ ਹਜ਼ਾਰਾਂ ਜਵਾਨ ਰਹਿੰਦੇ ਹਨ। ਅਜਿਹਾ ਲੱਗਦਾ ਹੈ ਕਿ ਇਨ੍ਹਾਂ ਜਵਾਨਾਂ ਨੂੰ ਨਿਸ਼ਾਨਾ ਬਣਾ ਕੇ ਹੀ ਇਹ ਹਮਲਾ ਕੀਤਾ ਗਿਆ ਸੀ। ਹਾਲਾਂਕਿ ਨਾਟੋ ਨੇ ਦੱਸਿਆ ਕਿ ਹਮਲੇ 'ਚ ਕਿਸੇ ਜਵਾਨ ਦੀ ਮੌਤ ਨਹੀਂ ਹੋਈ ਹੈ।

 ਬੁਨਿਆਦੀ ਜਿੰਮੇਦਾਰੀਆਂ ਨਿਭਾਉਣ 'ਚ ਅਸਫਲ ਰਹੀ ਸੂਬਾ ਸਰਕਾਰ : ਸੋਨੀਆ

ਕਪੂਰਥਲਾ : ਪੰਜਾਬ ਸਰਕਾਰ 'ਤੇ  ਮਹਾਤਮਾ ਗਾਂਧੀ ਪੇਂਡੂ ਵਿਕਾਸ ਰੁਜ਼ਗਾਰ ਗਰੰਟੀ ਯੋਜਨਾ (ਮਨਰੇਗਾ) ਲਈ ਕੇਂਦਰ ਸਰਕਾਰ ਤੋਂ ਮਿਲੀ ਰਾਸ਼ੀ ਖਰਚ ਨਹੀਂ ਕਰਨ ਦਾ ਦੋਸ਼ ਲਾਉਂਦੇ ਹੋਏ ਕਾਂਗਰਸ ਪ੍ਰਧਾਨ ਸੋਨੀਆਂ ਗਾਂਧੀ ਨੇ ਅੱਜ ਇੱਥੇ ਕਿਹਾ ਕਿ ਸੂਬਾ ਸਰਕਾਰ ਪਿਛਲੇ 5 ਸਾਲਾਂ 'ਚ ਬੁਨਿਆਦੀ ਜਿੰਮੇਦਾਰੀਆਂ ਨਿਭਾਉਣ 'ਚ ਅਸਫਲ ਰਹੀ ਹੈ।
ਕਾਂਗਰਸ ਵਲੋਂ ਪੰਜਾਬ ਦੇ ਕਪੂਰਥਲਾ ਜ਼ਿਲ੍ਹੇ 'ਚ ਆਯੋਜਿਤ ਰੈਲੀ ਨੂੰ ਸੰਬੋਧਨ ਕਰਦੇ ਸੋਨੀਆ ਨੇ ਕਿਹਾ ਕਿ ਪ੍ਰਦੇਸ਼ 'ਚ ਕਾਂਗਰਸ ਦੀ ਸਰਕਾਰ ਦੌਰਾਨ ਵਿਕਾਸ ਦੀ ਜੋ ਗਤੀ ਸੀ ਉਹ ਮੌਜੂਦਾ ਸਰਕਾਰ ਦੌਰਾਨ ਰੁਕ ਗਈ।
ਸੋਨੀਆ ਨੇ ਕਿਹਾ, '' ਅਸੀਂ ਪੰਜਾਬ ਨੂੰ ਹਜ਼ਾਰਾਂ ਕਰੋੜ ਰੁ. ਦਿੱਤੇ। ਵਿਕਾਸ ਦੀਆਂ ਵੱਖ-ਵੱਖ ਯੋਜਨਾਵਾਂ ਅਰੰਭ ਕੀਤੀਆਂ ਪਰ ਉਨ੍ਹਾਂ ਦਾ ਲਾਭ ਪੰਜਾਬ ਦੀ ਜਨਤਾ ਨੂੰ ਨਹੀਂ ਮਿਲਿਆ। ਅਸੀਂ ਮਨਰੇਗਾ ਦੇ ਲਈ ਪੰਜਾਬ ਸਰਕਾਰ ਨੂੰ 5 ਸਾਲਾਂ 'ਚ 5 ਹਜਾਰ ਕਰੋੜ ਰੁ. ਦਿੱਤੇ ਹਨ ਪਰ ਪੰਜਾਬ ਸਰਕਾਰ ਲਈ ਸ਼ਰਮ ਦੀ ਗੱਲ ਹੈ ਕਿ ਉਸ ਨੇ 5 ਸੌ 26 ਕਰੌੜ ਰੁ. ਹੀ ਖਰਚ ਕੀਤੇ। ''
ਉਨ੍ਹਾਂ ਕਿਹਾ, '' ਅਕਾਲੀ-ਭਾਜਪਾ ਗੱਠਜੋੜ ਦੀਆਂ ਨੀਤੀਆਂ ਕਾਰਨ ਸੂਬੇ 'ਚੋਂ ਉਦਯੋਗ-ਧੰਦੇ ਦੂਜੇ ਰਾਜਾਂ 'ਚ ਚਲੇ ਗਏ ਹਨ ਤੇ ਇੱਥੋਂ ਦੇ ਲੋਕ ਬੇਰੁਜ਼ਗਾਰ ਹੋ ਗਏ ਹਨ। ਸਰਕਾਰ ਨੇ ਅਜਿਹੀਆਂ ਨੀਤੀਆਂ ਬਣਾਈਆਂ ਹਨ ਜਿਸ ਨਾਲ ਸਿਖਿਆ, ਸਿਹਤ ਅਤੇ ਬੁਨਿਆਦੀ ਵਿਵਸਥਾਵਾਂ ਬਰਬਾਦ ਹੋ ਗਈਆਂ ਤੇ ਗਰੀਬ ਤਬਕਾ ਇਨ੍ਹਾਂ ਤੋਂ ਵਾਝਾਂ ਹੋ ਗਿਆ। ''
ਉਨ੍ਹਾਂ ਨੇ ਸੂਬਾ ਸਰਕਾਰ 'ਤੇ ਦੋਸ਼ ਲਾਇਆ ਕਿ ਉਸ ਨੇ ਜਾਣਬੁਝ ਕੇ ਅਜਿਹੀਆਂ ਨੀਤੀਆਂ ਬਣਾਈਆਂ ਜਿਸ ਨਾਲ ਸਰਕਾਰ ਨੂੰ ਚਲਾਉਣ ਵਾਲੇ ਆਗਆਂ ਨੂੰ ਜਾਂ ਉਨ੍ਹਾਂ ਦੇ ਨਜ਼ਦੀਕੀਆਂ ਨੂੰ ਲਾਭ ਮਿਲਿਆ। ਇਨ੍ਹਾਂ ਨੀਤੀਆਂ ਦਾ ਗਰੀਬਾਂ ਨੂੰ ਕੋਈ ਲਾਭ ਨਹੀਂ ਹੋਇਆ, ਜਿਸ ਕਾਰਨ ਇੱਥੇ ਗਰੀਬੀ ਰੇਖਾ ਤੋਂ ਹੇਠਾਂ ਰਹਿਣ ਵਾਲੇ ਲੋਕਾਂ ਦੀ ਗਿਣਤੀ 'ਚ ਵਾਧਾ ਹੋਇਆ।
ਸੋਨੀਆ ਨੇ ਅਪੀਲ ਕਰਦਿਆਂ ਕਿਹਾ ਕਿ ਤੁਹਾਡੀ ਇਛਾ ਹੈ ਕਿ ਤੁਸੀਂ ਇਸੇ ਵਿਵਸਥਾ 'ਚ ਰਹਿਣਾ ਚਹੁੰਦੇ ਹੋ ਜਾਂ ਇਸ ਨੂੰ ਬਦਲਣਾ ਚਹੁੰਦੇ ਹੋ।

 ਗਰੀਬਾਂ ਨੂੰ ਮਿਲੇਗਾ 1 ਰੁ. ਕਿਲੋ ਆਟਾ : ਅਮਰਿੰਦਰ

ਮੋਗਾ : ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਕੈਪ. ਅਮਰਿੰਦਰ ਸਿੰਘ ਨੇ ਅੱਜ ਕਾਂਗਰਸ ਦੇ ਸੱਤਾ 'ਚ ਆਉਣ 'ਤੇ ਗਰੀਬਾਂ ਨੂੰ 1 ਰੁ. ਕਿਲੋ ਆਟਾ ਤੇ ਕਿਸਾਨਾ ਨੂੰ ਫਸਲ ਬੀਮਾ ਦੇਣ ਦਾ ਐਲਾਨ ਕੀਤਾ ਹੈ।
ਇੱਥੇ ਇਕ ਰੈਲੀ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ ਵਿਚਾਰਾਧੀਨ ਖਾਧ ਸੁਰੱਖਿਆ ਕਨੂੰਨ ਦੇ ਤਹਿਤ ਪੂਰੇ ਦੇਸ਼ ਦੇ ਗਰੀਬਾਂ ਨੂੰ 1 ਰੁ. ਕਿਲੋ ਆਟਾ ਦਿੱਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਇਸ ਬਿਲ ਨੂੰ ਮੰਜੂਰੀ ਮਿਲ ਚੁੱਕੀ ਹੈ ਤੇ ਇਸ ਨੂੰ ਸੰਸਦ 'ਚ ਪੇਸ਼ ਕੀਤਾ ਜਾਵੇਗਾ।
ਅਮਰਿੰਦਰ ਨੇ ਕਿਹਾ ਕਿ ਇਹ ਅਕਾਲੀਆਂ ਵਲੋਂ ਐਲਾਨੇ 4 ਰੁ. ਪ੍ਰਤੀ ਕਿਲੋ ਦਰ ਤੋਂ ਵੀ ਕਿਤੇ ਘੱਟ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਅਕਾਲੀਆਂ ਵਲੋਂ ਦਿੱਤੀ ਗਈ ਇਹ ਦਰ ਉਨ੍ਹਾਂ ਦੀ ਨਹੀਂ ਹੈ, ਕਿਉਂਕਿ ਕੇਂਦਰ ਸਰਕਾਰ ਗਰੀਬਾਂ 'ਚ ਵੰਡਣ ਲਈ ਸੂਬੇ ਨੂੰ ਹਰ ਮਹੀਨੇ 10 ਹਜ਼ਾਰ ਟਨ ਕਣਕ ਮੁਹੱਈਆ ਕਰਾਉਂਦੀ ਹੈ।

ਵਿਨਫ੍ਰੇ ਦੇ ਸੁਰੱਖਿਆ ਗਾਰਡਾਂ ਤੇ ਪੱਤਰਕਾਰਾਂ 'ਚ ਝੜਪ

 ਮਥੁਰਾ : ਭਾਰਤ ਦੇ ਪਹਿਲੇ ਦੌਰੇ 'ਤੇ ਅਮਰੀਕੀ ਟਾਕ ਸ਼ੋ ਕਵੀਨ ਓਪਰਾ ਵਿਨਫ੍ਰੇ ਅੱਜ ਵ੍ਰਿੰਦਾਵਨ 'ਚ ਭਾਰਤੀ ਔਰਤਾਂ ਦੀ ਕਥਿਤ ਦੁਰਦਸ਼ਾ 'ਤੇ ਨਵੇਂ ਟੀ.ਵੀ. ਪ੍ਰੋਗਰਾਮ ਦੀ ਸ਼ੂਟਿੰਗ ਕਰ ਰਹੀ ਸੀ। ਇਸ ਦੌਰਾਨ ਉਸਦੇ ਬਾਡੀਗਾਰਡ ਅਤੇ ਸਥਾਨਕ ਪੱਤ੍ਰਕਾਰਾਂ 'ਚ ਝੜਪ ਹੋ ਗਈ।

ਪੁਲਸ ਨੇ ਦੱਸਿਆ ਕਿ ਵਿਨਫ੍ਰੇ ਦੇ ਦੌਰੇ ਨੂੰ ਕਵਰ ਕਰ ਰਹੇ ਮੀਡੀਆ ਕ੍ਰਮੀਆਂ ਦਾ ਵੀਡੀਓ ਕੈਮਰਾ ਟੁੱਟਣ ਦੀ ਕਥਿਤ ਸ਼ਕਾਇਤ ਦੇ ਬਾਅਦ ਅਮਰੀਕਾ ਟੀ.ਵੀ. ਸਟਾਰ ਵਿਨਫ੍ਰੇ ਦੇ 3 ਭਾਰਤੀ ਸੁਰੱਖਿਆ ਕ੍ਰਮੀਆਂ ਨੂੰ ਗ੍ਰਿਫਤਾਰ ਕਰ ਲਿਆ, ਜਿਨ੍ਹਾਂ ਨੂੰ ਬਾਅਦ 'ਚ ਆਪਸੀ ਸੁਲਾ੍ਹ  ਦੇ ਬਾਅਦ ਛੱਡ ਦਿੱਤਾ ਗਿਆ।
ਓਪਰਾ ਵਿਨਫ੍ਰੇ ਦੋ ਅਮਰੀਕੀ ਸੁਰੱਖਿਆ ਕ੍ਰਮੀਆਂ ਅਤੇ ਇਕ ਦਰਜਨ ਤੋਂ ਵੱਧ ਭਾਰਤੀ ਸੁਰੱਖਿਆ ਕ੍ਰਮੀਆਂ ਨਾਲ ਵ੍ਰਿੰਦਾਵਨ ਪਹੁੰਚੀ ਸੀ। ਉਹ ਆਪਣੇ ਨਵੇਂ ਸ਼ੋ 'ਨੈਕਸਟ ਚੈਪਟਰ' ਦੀ ਸ਼ੂਟਿੰਗ ਦੇ ਸਿਲਸਿਲੇ 'ਚ ਭਾਰਤ ਆਈ ਹੈ। ਪੁਲਸ ਕ੍ਰਮੀਆਂ ਨੇ ਦੱਸਿਆ ਕਿ ਦੋ ਅਮਰੀਕੀ ਸੁਰਾਖਿਆ ਕ੍ਰਮੀਆਂ ਸਣੇ ਦਰਜਨ ਤੋਂ ਵੱਧ ਸੁਰੱਖਿਆ ਕ੍ਰਮੀਆਂ ਨੂੰ 'ਮਾਂ ਧਾਮ' ਤੋਂ ਕੱਢ ਦਿੱਤਾ।
ਪੁਲਸ ਕਮਿਸ਼ਨਰ ਰਾਮ ਕਿਸ਼ੋਰ ਨੇ ਦੱਸਿਆ ਕਿ ਦੋਵੇਂ ਥਾਵਾਂ ਸ਼ੂਟਿੰਗ ਪਬੰਧੀ ਮੁਕਤ ਹਨ, ਜਦੋਂ ਕਿ ਬਾਂਕੇ ਬਿਹਾਰੀ ਮੰਦਰ ਆਦਿ ਕੁਝ ਸਥਾਨਾ 'ਤੇ ਸ਼ੂਟਿੰਗ 'ਤੇ ਪਬੰਧੀ ਹੈ ਤੇ ਬਿਨ੍ਹਾਂ ਆਗਿਆ ਸ਼ੂਟਿੰਗ ਨਹੀਂ ਕੀਤੀ ਜਾ ਸਕਦੀ। ਉਨ੍ਹਾਂ ਦੱਸਿਆ ਕਿ ਬਾਅਦ 'ਚ ਓਪਰਾ ਸ਼ੂਟਿੰਗ ਲਈ ਆਗਰਾ ਰਵਾਨਾ ਹੋ ਗਈ।

ਸਰਕਾਰ ਬਣਨ 'ਤੇ ਹਰ ਵਰਗ ਦੀਆਂ ਮੁਸ਼ਕਿਲਾਂ ਹੱਲ ਕਰਾਂਗੇ-ਕੈਪਟਨ ਅਮਰਕੋਟ ਵਿਖੇ ਗੁਰਚੇਤ ਸਿੰਘ ਭੁਲਰ ਦੇ ਹਕ ਵਿਚ ਕਾਂਗਰਸ ਦੀ ਰੈਲੀ ਅਮਰਕੋਟ ਵਿਚ ਕਾਂਗਰਸ ਦੀ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ, ਨਾਲ ਗੁਰਚੇਤ ਸਿੰਘ ਭੁੱਲਰ, ਤੇਜਪ੍ਰੀਤ ਸਿੰਘ ਪੀਟਰ, ਯੂਥ ਆਗੂ ਸੁਖਪਾਲ ਸਿੰਘ ਭੁੱਲਰ ਤੇ ਹੋਰ। ਅਮਰਕੋਟ/ਖੇਮਕਰਨ, 19 ਜਨਵਰੀ -ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਪੰਜਾਬ ਅੰਦਰ ਅਕਾਲੀ ਭਾਜਪਾ ਸਰਕਾਰ ਨੇ ਇਸ ਸਰਕਾਰ ਦੌਰਾਨ 50 ਹਜ਼ਾਰ ਦੇ ਕਰੀਬ ਸਰਗਰਮ ਕਾਂਗਰਸੀ ਵਰਕਰਾਂ ਉਪਰ ਨਜਾਇਜ਼ ਕੇਸ ਦਰਜ ਕਰਵਾਏ ਹਨ। ਕਾਂਗਰਸ ਸਰਕਾਰ ਬਣਨ ਤੇ ਨਜਾਇਜ਼ ਕੇਸਾਂ ਦੀ ਜਾਂਚ ਸਬੰਧੀ ਇਕ ਕਮਿਸ਼ਨ ਬਿਠਾਇਆ ਜਾਵੇਗਾ। ਇਸ ਜਾਂਚ ਦੌਰਾਨ ਝੂਠੇ ਕੇਸ ਦਰਜ ਕਰਾਉਣ ਵਾਲੇ ਅਕਾਲੀ ਆਗੂਆਂ ਅਤੇ ਦਰਜ ਕਰਨ ਵਾਲੇ ਪੁਲਿਸ ਅਫ਼ਸਰਾਂ ਵਿਰੁੱਧ ਸਖਤ ਕਾਰਵਾਈ ਕੀਤੀ ਜਾਵੇਗੀ ਤੇ ਪੀੜਤ ਕਾਂਗਰਸੀਆਂ ਨੂੰ ਪੂਰਾ ਇਨਸਾਫ਼ ਦਿਵਾਇਆ ਜਾਵੇਗਾ। ਕਾਂਗਰਸ ਨੇ ਆਪਣੇ ਚੋਣ ਮਨੋਰਥ ਪੱਤਰ ਵਿਚ ਇਹ ਮੁੱਦਾ ਮੁੱਖ ਤੌਰ 'ਤੇ ਸ਼ਾਮਿਲ ਕੀਤਾ ਹੈ। ਅੱਜ ਵਿਧਾਨ ਸਭਾ ਹਲਕਾ ਖੇਮਕਰਨ ਤੋਂ ਕਾਂਗਰਸ ਦੇ ਉਮੀਦਵਾਰ ਤੇ ਸਾਬਕਾ ਮੰਤਰੀ ਸ: ਗੁਰਚੇਤ ਸਿੰਘ ਭੁੱਲਰ ਦੇ ਹੱਕ ਵਿਚ ਅੱਜ ਮੰਡੀ ਅਮਰਕੋਟ ਵਿਖੇ ਕਰਵਾਈ ਰੈਲੀ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਦੋਸ਼ ਲਗਾਇਆ ਕਿ ਅਕਾਲੀ ਸਰਕਾਰ ਨੇ ਪੂਰੇ ਪੰਜ ਸਾਲ ਰੇਤਾ, ਬਜਰੀ, ਟਰਾਂਸਪੋਰਟ, ਟੀ.ਵੀ. ਚੈਨਲਾਂ ਤੋਂ ਲੈ ਕੇ ਹਰੇਕ ਚੀਜ਼ ਉਪਰ ਕਬਜ਼ਾ ਕਰਕੇ ਪੰਜਾਬ ਨੂੰ ਪੂਰੀ ਤਰ੍ਹਾਂ ਲੁਟਿਆ ਤੇ ਪੰਜਾਬ ਦਾ ਬੇੜਾ ਗਰਕ ਕਰ ਦਿੱਤਾ। ਉਨ੍ਹਾਂ ਦਾਅਵਾ ਕੀਤਾ ਕਿ ਪੰਜਾਬ ਅੰਦਰ ਆਉਣ ਵਾਲੀ ਸਰਕਾਰ ਕਾਂਗਰਸ ਦੀ ਹੀ ਬਣੇਗੀ। ਪੰਜਾਬੀਆਂ ਨੇ ਤਬਦੀਲੀ ਦਾ ਮਨ ਬਣਾ ਲਿਆ ਹੈ, ਉਨ੍ਹਾਂ ਐਲਾਨ ਕੀਤਾ ਪੰਜਾਬ ਅੰਦਰ ਕਾਂਗਰਸ ਸਰਕਾਰ ਬਣਨ 'ਤੇ 47 ਲੱਖ ਬੇਰੁਜ਼ਗਾਰ ਨੌਜਵਾਨਾਂ ਨੂੰ ਰੁਜ਼ਗਾਰ ਦੇਣ ਦੇ ਸਾਧਨ ਮੁਹੱਈਆ ਕਰਵਾਏ ਜਾਣਗੇ ਤੇ ਹਰ ਵਰਗ ਦੀਆਂ ਮੁਸ਼ਕਿਲਾਂ ਪਹਿਲ ਦੇ ਆਧਾਂਰ 'ਤੇ ਹੱਲ ਹੋਣਗੀਆਂ। ਕੈਪਟਨ ਨੇ ਰੈਲੀ ਵਿਚ ਹੋਏ ਭਾਰੀ ਇਕੱਠ ਤੋਂ ਪ੍ਰਭਾਵਿਤ ਹੁੰਦਿਆਂ ਵੋਟਰਾਂ ਅੰਦਰ ਜੋਸ਼ ਭਰਦੇ ਹੋਏ ਅਪੀਲ ਕੀਤੀ ਕਿ ਇਸ ਵਾਰ ਕਾਂਗਰਸੀ ਉਮੀਦਵਾਰ ਸ: ਗੁਰਚੇਤ ਸਿੰਘ ਭੁੱਲਰ ਨੂੰ ਭਾਰੀ ਫਰਕ ਨਾਲ ਜਿਤਾਓ ਤੇ ਕਾਂਗਰਸ ਸਰਕਾਰ ਵਿਚ ਮੰਤਰੀ ਬਣਾ ਕੇ ਹਲਕੇ ਦੇ ਵਿਕਾਸ ਦੀ ਕੋਈ ਕਸਰ ਬਾਕੀ ਨਹੀਂ ਰਹਿਣ ਦਿੱਤੀ ਜਾਵੇਗੀ। ਸਾਬਕਾ ਮੰਤਰੀ ਤੇ ਹਲਕਾ ਕਾਂਗਰਸੀ ਉਮੀਦਵਾਰ ਸ: ਗੁਰਚੇਤ ਸਿੰਘ ਭੁੱਲਰ ਨੇ ਰੈਲੀ ਵਿਚ ਪੁੱਜੇ ਹਲਕਾ ਵਾਸੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਅੱਜ ਭਾਰੀ ਇਕੱਠ ਨੇ ਸਾਬਿਤ ਕਰ ਦਿੱਤਾ ਹੈ ਕਿ ਲੋਕ ਕਾਂਗਰਸ ਪਾਰਟੀ ਨਾਲ ਜੁੜ ਚੁੱਕੇ ਹਨ। ਸਿਰਫ ਦੋ ਦਿਨਾਂ ਅੰਦਰ ਹੀ ਇੰਨਾ ਭਾਰੀ ਇਕੱਠ ਸਾਫ ਕਰ ਦਿੰਦਾ ਹੈ ਕਿ ਇਸ ਹਲਕੇ ਤੋਂ ਅਕਾਲੀ ਦਲ (ਬ) ਹਾਰ ਚੁੱਕਾ ਹੈ। ਰੈਲੀ ਨੂੰ ਸ: ਭੁੱਲਰ ਤੋਂ ਇਲਾਵਾ ਤੇਜਪ੍ਰੀਤ ਸਿੰਘ ਪੀਟਰ, ਬਾਪੂ ਇੰਦਰਜੀਤ ਸਿੰਘ ਵਲਟੋਹਾ, ਸੁਖਪਾਲ ਸਿੰਘ ਭੁੱਲਰ, ਸਾਰਜ ਸਿੰਘ ਦਾਸੂਵਾਲ, ਜਥੇ: ਸਤਨਾਮ ਸਿੰਘ ਮਨਾਵਾਂ, ਅਨੂਪ ਸਿੰਘ ਭੁੱਲਰ, ਤਰਲੋਕ ਸਿੰਘ ਚੱਕਵਾਲੀਆ, ਸੁਰਿੰਦਰ ਸਿੰਘ ਆਸਲ, ਰਾਜ ਸਿੰਘ ਪੱਤੂ, ਮੰਗਤ ਰਾਮ ਗੁਲਾਟੀ, ਹਰਭਜਨ ਸਿੰਘ ਸੰਧੂ ਆੜ੍ਹਤੀ, ਸੁਖਵਿੰਦਰ ਸਿੰਘ ਬੁੱਟਰ, ਬਖਸ਼ੀਸ਼ ਸਿੰਘ ਦਰਿਆ, ਗੁਰਜਤਿੰਦਰਪਾਲ ਸਿੰਘ ਭਿੱਖੀਵਿੰਡ, ਕੁਲਦੀਪ ਸਿੰਘ ਜਗੀਰਦਾਰ, ਹਜ਼ੂਰ ਸਿੰਘ ਭਾਈ ਲੱਧੂ, ਮੋਹਨਪਾਲ ਸਿੰਘ ਪਨੂੰ, ਧਰਮਪਾਲ ਸਿੰਘ ਡਲੀਰੀ, ਰਾਜਬੀਰ ਸਿੰਘ ਮਾਛੀਕੇ, ਰਾਜਵੰਤ ਸਿੰਘ ਪਹੂਵਿੰਡ ਨੇ ਸੰਬੋਧਨ ਕੀਤਾ। ਇਸ ਮੌਕੇ 'ਤੇ ਭਾਰੀ ਗਿਣਤੀ ਵਿਚ ਕਾਂਗਰਸੀ ਵਰਕਰ ਪੰਚ, ਸਰਪੰਚ ਹਾਜ਼ਰ ਸਨ।

ਫ਼ੌਜ ਮੁਖੀ ਵੀ. ਕੇ. ਸਿੰਘ ਨੂੰ ਛੁੱਟੀ 'ਤੇ ਭੇਜਣ ਦੀ ਤਿਆਰੀ ਨਵੀਂ ਦਿੱਲੀ, 19 ਜਨਵਰੀ -ਫ਼ੌਜ ਮੁਖੀ ਜਨਰਲ ਵੀ. ਕੇ. ਸਿੰਘ ਦੇ ਉਮਰ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ਦੀ ਲੜਾਈ ਅਦਾਲਤ 'ਚ ਪਹੁੰਚ ਜਾਣ ਤੋਂ ਬਾਅਦ ਕੇਂਦਰ ਸਰਕਾਰ ਸਖ਼ਤ ਕਦਮ ਉਠਾ ਸਕਦੀ ਹੈ। ਜਨਰਲ ਦੇ ਸੁਪਰੀਮ ਕੋਰਟ ਪਹੁੰਚ ਕਰਨ ਤੋਂ ਪ੍ਰੇਸ਼ਾਨ ਸਰਕਾਰ ਮੰਗਲਵਾਰ ਦੀ ਰਾਤ ਤੋਂ ਆਪਣੀ ਰਣਨੀਤੀ ਨੂੰ ਅੰਤਿਮ ਰੂਪ ਦੇਣ 'ਚ ਜੁੱਟ ਗਈ ਹੈ। ਖ਼ਬਰ ਇਹ ਹੈ ਕਿ ਸਰਕਾਰ ਇਸ ਮਾਮਲੇ ਨਾਲ ਨਜਿੱਠਣ ਦੇ ਲਈ ਕਈ ਪਹਿਲੂਆਂ 'ਤੇ ਵਿਚਾਰ ਕਰ ਰਹੀ ਹੈ, ਜਿਨ੍ਹਾਂ 'ਚ ਜਨਰਲ ਦੀ ਅਰਜ਼ੀ ਨੂੰ ਅਦਾਲਤ 'ਚ ਲਮਕਦੇ ਰਹਿਣ ਤੱਕ ਛੁੱਟੀ 'ਤੇ ਭੇਜੇ ਜਾਣ ਦੀ ਵੀ ਚਰਚਾ ਕੀਤੀ ਜਾ ਰਹੀ ਹੈ। ਕੱਲ੍ਹ ਸਰਕਾਰ ਨੇ ਸੁਪਰੀਮ ਕੋਰਟ 'ਚ ਸੋਧ ਪਟੀਸ਼ਨ ਵੀ ਦਾਇਰ ਕੀਤੀ ਸੀ ਜਿਸ ਵਿਚ ਰੱਖਿਆ ਮੰਤਰਾਲੇ ਵੱਲੋਂ ਅਪੀਲ ਕੀਤੀ ਗਈ ਹੈ ਕਿ ਇਸ ਮੁੱਦੇ 'ਤੇ ਉਸ ਦਾ ਪੱਖ ਸੁਣੇ ਬਿਨਾਂ ਕੋਈ ਆਦੇਸ਼ ਜਾਰੀ ਨਾ ਕੀਤਾ ਜਾਵੇ। ਦੂਸਰੇ ਪਾਸੇ ਰੱਖਿਆ ਮੰਤਰੀ ਸ੍ਰੀ ਏ. ਕੇ. ਐਂਟਨੀ ਅਤੇ ਕਾਨੂੰਨ ਮੰਤਰੀ ਸਲਮਾਨ ਖੁਰਸ਼ੀਦ ਨੇ ਪ੍ਰਧਾਨ ਮੰਤਰੀ ਡਾ: ਮਨਮੋਹਨ ਸਿੰਘ ਨਾਲ ਇਸ ਮੁੱਦੇ 'ਤੇ ਬੈਠਕ ਕੀਤੀ। ਮਲੇਸ਼ੀਆ ਦੇ ਦੌਰੇ 'ਤੇ ਗਏ ਰੱਖਿਆ ਸਕੱਤਰ ਸ਼ਸ਼ੀਕਾਂਤ ਸ਼ਰਮਾ ਨੂੰ ਵੀ ਵਾਪਸ ਬੁਲਾ ਲਿਆ ਗਿਆ ਹੈ। ਇਹ ਵੀ ਪਤਾ ਲੱਗਾ ਹੈ ਕਿ ਪ੍ਰਧਾਨ ਮੰਤਰੀ ਨਾਲ ਬੈਠਕ ਦੌਰਾਨ ਜਨਰਲ ਵੀ. ਕੇ. ਸਿੰਘ ਨੂੰ ਛੁੱਟੀ 'ਤੇ ਭੇਜਣ ਬਾਰੇ ਵੀ ਵਿਚਾਰ ਹੋਈ ਹੈ ਪ੍ਰੰਤੂ ਇਸ ਦੀ ਪੁਸ਼ਟੀ ਨਹੀਂ ਹੋ ਸਕੀ। ਕਾਰਵਾਈ ਮੰਦਭਾਗੀ-ਸਰਕਾਰ ਸਰਕਾਰ ਨੇ ਫ਼ੌਜ ਮੁਖੀ ਜਨਰਲ ਵੀ. ਕੇ. ਸਿੰਘ ਵੱਲੋਂ ਆਪਣੀ ਉਮਰ ਦੇ ਮੁੱਦੇ ਨੂੰ ਲੈ ਕੇ ਸੁਪਰੀਮ ਕੋਰਟ ਪਹੁੰਚ ਕਰਨ ਦੀ ਕਾਰਵਾਈ ਨੂੰ ਮੰਦਭਾਗੀ ਦੱਸਦਿਆਂ ਕਿਹਾ ਕਿ ਇਹ ਕੋਈ ਚੰਗੀ ਮਿਸਾਲ ਨਹੀਂ। ਮਾਮਲੇ ਨੂੰ ਗੰਭੀਰ ਦੱਸਦਿਆਂ ਰੱਖਿਆ ਰਾਜ ਮੰਤਰੀ ਐੱਮ. ਐੱਮ. ਪਾਲਮ ਰਾਜੂ ਨੇ ਕਿਹਾ ਕਿ ਇਹ ਮੰਦਭਾਗੀ ਕਾਰਵਾਈ ਹੈ ਅਤੇ ਮੰਤਰਾਲੇ ਜਾਂ ਹਥਿਆਰਬੰਦ ਫ਼ੌਜਾਂ ਲਈ ਕੋਈ ਵਧੀਆ ਮਿਸਾਲ ਨਹੀਂ। ਇਹ ਪ੍ਰਗਟਾਵਾ ਉਨ੍ਹਾਂ ਨੇ ਐੱਨ. ਸੀ. ਸੀ. ਦੇ ਇਕ ਸਮਾਗਮ 'ਚ ਸ਼ਿਰਕਤ ਕਰਨ ਤੋਂ ਬਾਅਦ ਪੱਤਰਕਾਰਾਂ ਵੱਲੋਂ ਪੁੱਛੇ ਗਏ ਇਕ ਸਵਾਲ ਕਿ ਕੀ ਸਰਕਾਰ ਫ਼ੌਜ ਮੁਖੀ ਨੂੰ ਛੁੱਟੀ 'ਤੇ ਭੇਜ ਰਹੀ ਹੈ ਜਾਂ ਨਵੇਂ ਮੁੱਖੀ ਦੀ ਨਿਯੁਕਤੀ ਬਾਰੇ ਸੋਚ ਰਹੀ ਹੈ, ਦੇ ਸਬੰਧ 'ਚ ਕੀਤਾ। ਕੀ ਸਰਕਾਰ ਜਨਮ ਤਰੀਕ ਦੇ ਮੁੱਦੇ ਨੂੰ ਸੁਪਰੀਮ ਕੋਰਟ ਲੈ ਜਾਣ ਦੇ ਮਾਮਲੇ 'ਤੇ ਫ਼ੌਜ ਮੁਖੀ ਤੋਂ ਪ੍ਰੇਸ਼ਾਨ ਹੈ? ਇਸ ਸਵਾਲ ਦੇ ਜਵਾਬ 'ਚ ਸ੍ਰੀ ਪਾਲਮ ਰਾਜੂ ਨੇ ਕਿਹਾ ਕਿ ਇਹ ਮਾਮਲਾ ਜਨਤਕ ਬਹਿਸ ਵਾਲਾ ਨਹੀਂ। ਉਨ੍ਹਾਂ ਦੱਸਿਆ ਕਿ ਮੰਤਰਾਲੇ ਨੇ ਫ਼ੌਜ ਮੁਖੀ ਦੀ ਜਨਮ ਤਰੀਕ 10 ਮਈ, 1950 ਹੀ ਮੰਨੀ ਹੈ ਨਾ ਕਿ 10 ਮਈ, 1951, ਜੋ ਕਿ ਜਨਰਲ ਨੇ ਆਪਣੇ ਦਸਵੀਂ ਦੇ ਸਰਟੀਫਿਕੇਟ ਅਨੁਸਾਰ ਸਹੀ ਦੱਸੀ ਹੈ।

ਸ਼੍ਰੋਮਣੀ ਅਕਾਲੀ ਦਲ ਨੇ 9 ਹੋਰ ਬਾਗੀ ਪਾਰਟੀ 'ਚੋਂ ਕੱਢੇ

ਚੰਡੀਗੜ੍ਹ, 19 ਜਨਵਰੀ -ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਅਤੇ ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਨੇ ਪਾਰਟੀ ਦਾ ਅਨੁਸ਼ਾਸਨ ਭੰਗ ਕਰਨ ਅਤੇ ਮੌਜੂਦਾ ਵਿਧਾਨ ਸਭਾ ਚੋਣਾਂ ਵਿਚ ਆਪਣੇ ਅਧਿਕਾਰਤ ਉਮੀਦਵਾਰਾਂ ਦੇ ਖ਼ਿਲਾਫ਼ ਬਾਗੀ ਹੋ ਕੇ ਆਜ਼ਾਦ ਤੌਰ 'ਤੇ ਚੋਣ ਲੜ ਰਹੇ ਪਾਰਟੀ ਦੇ 9 ਹੋਰ ਆਗੂਆਂ ਨੂੰ ਦਲ ਦੀ ਮੁੱਢਲੀ ਮੈਂਬਰਸ਼ਿਪ ਤੋਂ ਖਾਰਜ ਕਰਨ ਦਾ ਐਲਾਨ ਕੀਤਾ ਹੈ। ਅੱਜ ਇਥੋਂ ਜਾਰੀ ਇਕ ਬਿਆਨ ਵਿਚ ਉਨ੍ਹਾਂ ਦੱਸਿਆ ਕਿ ਜਿਹੜੇ ਆਗੂ ਆਜ਼ਾਦ ਤੌਰ 'ਤੇ ਪਾਰਟੀ ਉਮੀਦਵਾਰਾਂ ਦੇ ਖਿਲਾਫ਼ ਚੋਣ ਲੜ ਰਹੇ ਹਨ, ਉਨ੍ਹਾਂ ਵਿਚ ਹਲਕਾ ਘਨੌਰ ਤੋਂ ਸ. ਬਲਵਿੰਦਰ ਸਿੰਘ ਸੈਫਦੀਪੁਰ, ਹਲਕਾ ਸਨੌਰ ਤੋਂ ਸ੍ਰੀ ਰਾਜਿੰਦਰ ਕਾਲਾ ਐੱਮ. ਸੀ., ਹਲਕਾ ਪਟਿਆਲਾ (ਦਿਹਾਤੀ) ਤੋਂ ਯੂਥ ਆਗੂ ਸ. ਸਤਬੀਰ ਸਿੰਘ ਖੱਟੜਾ, ਹਲਕਾ ਡੇਰਾਬੱਸੀ ਤੋਂ ਸਵਰਗੀ ਕੈਪਟਨ ਕੰਵਲਜੀਤ ਸਿੰਘ ਦੀ ਬੇਟੀ ਮਨਪ੍ਰੀਤ ਕੌਰ ਡੌਲੀ, ਲੁਧਿਆਣਾ (ਪੂਰਬੀ) ਹਲਕੇ ਤੋਂ ਸ. ਦਲਜੀਤ ਸਿੰਘ ਗਰੇਵਾਲ ਕੌਂਸਲਰ, ਹਲਕਾ ਬਾਬਾ ਬਕਾਲਾ ਰਾਖਵਾਂ ਤੋਂ ਸ. ਜਰਨੈਲ ਸਿੰਘ ਕੋਟ ਮਹਿਤਾਬ, ਹਲਕਾ ਤਰਨ ਤਾਰਨ ਤੋਂ ਸ. ਦਵਿੰਦਰ ਸਿੰਘ ਲਾਲੀ ਢਾਲਾ, ਜੋ ਕਿ ਸੀਨੀਅਰ ਆਗੂ ਸ. ਸੁਖਦੇਵ ਸਿੰਘ ਢੀਂਡਸਾ ਦੇ ਨਿਕਟਵਰਤੀ ਰਿਸ਼ਤੇਦਾਰ ਵੀ ਹਨ ਅਤੇ ਹਲਕਾ ਦਿੜ੍ਹਬਾ ਐੱਸ. ਸੀ. ਤੋਂ ਸ. ਭੋਲਾ ਸਿੰਘ ਕਮਾਲਪੁਰ ਸ਼ਾਮਿਲ ਹਨ, ਨੂੰ ਪਾਰਟੀ ਵਿਚੋਂ ਕੱਢਿਆ ਗਿਆ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਹਲਕਾ ਮਹਿਲ ਕਲਾਂ ਵਿਚ ਪਾਰਟੀ ਉਮੀਦਵਾਰ ਦਾ ਵਿਰੋਧ ਕਰਨ ਵਾਲੇ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਸ. ਅਜੀਤ ਸਿੰਘ ਕੁਤਬਾ ਨੂੰ ਵੀ ਪਾਰਟੀ ਵਿਚੋਂ ਖਾਰਜ ਕੀਤਾ ਜਾਂਦਾ ਹੈ। ਵਰਨਣਯੋਗ ਹੈ ਕਿ ਪਹਿਲਾਂ ਹੀ ਲੁਧਿਆਣਾ ਅਤੇ ਅੰਮ੍ਰਿਤਸਰ ਜ਼ਿਲ੍ਹਿਆਂ ਵਿਚ ਬਾਗੀ ਹੋ ਕੇ ਚੋਣ ਲੜਨ ਵਾਲੇ ਕੁਝ ਆਗੂਆਂ ਨੂੰ ਪਾਰਟੀ ਵਿਚੋਂ ਕੱਢੇ ਜਾਣ ਦਾ ਐਲਾਨ ਕੀਤਾ ਜਾ ਚੁੱਕਾ ਹੈ। ਸ. ਸੁਖਬੀਰ ਸਿੰਘ ਬਾਦਲ ਨੇ ਪਾਰਟੀ ਦੇ ਆਗੂਆਂ ਅਤੇ ਵਰਕਰਾਂ ਨੂੰ ਅਪੀਲ ਕੀਤੀ ਹੈ ਕਿ ਅਨੁਸ਼ਾਸਨ ਵਿਚ ਰਹਿ ਕੇ ਪਾਰਟੀ ਦੇ ਉਮੀਦਵਾਰਾਂ ਦੀ ਜਿੱਤ ਨੂੰ ਯਕੀਨੀ ਬਣਾਇਆ ਜਾਵੇ।

ਪਾਕਿ ਰਾਸ਼ਟਰਪਤੀ ਜ਼ਰਦਾਰੀ ਨੂੰ ਪ੍ਰਾਪਤ ਹੈ
ਮੁਕੱਦਮਿਆਂ ਤੋਂ ਪੂਰੀ ਛੋਟ-ਵਕੀਲ

ਇਸਲਾਮਾਬਾਦ, 19 ਜਨਵਰੀ -ਪਾਕਿਸਤਾਨ ਦੇ ਇਕ ਉੱਘੇ ਵਕੀਲ ਨੇ ਕਿਹਾ ਹੈ ਕਿ ਰਾਸ਼ਟਰਪਤੀ ਆਸਿਫ਼ ਅਲੀ ਜ਼ਰਦਾਰੀ ਨੂੰ ਪਾਕਿਸਤਾਨ ਅਤੇ ਵਿਦੇਸ਼ 'ਚ ਮੁਜਰਮਾਨਾ ਮਾਮਲਿਆਂ 'ਚ ਮੁਕੱਦਮੇ ਤੋਂ ਪੂਰੀ ਤਰ੍ਹਾਂ ਛੋਟ ਹਾਸਿਲ ਹੈ। ਵਕੀਲ ਵੱਲੋਂ ਇਹ ਬਿਆਨ ਰਾਸ਼ਟਰਪਤੀ ਦੇ ਖ਼ਿਲਾਫ਼ ਭ੍ਰਿਸ਼ਟਾਚਾਰ ਦੇ ਮਾਮਲਿਆਂ ਨੂੰ ਮੁੜ ਖੋਲ੍ਹਣ ਦੇ ਮੁੱਦੇ 'ਤੇ ਸੁਪਰੀਮ ਕੋਰਟ 'ਚ ਮਹੱਤਵਪੂਰਨ ਸੁਣਵਾਈ ਤੋਂ ਪਹਿਲਾਂ ਦਿੱਤਾ ਗਿਆ ਹੈ। ਮਾਣਹਾਨੀ ਨੋਟਿਸ 'ਤੇ ਵੀਰਵਾਰ ਨੂੰ ਸੁਪਰੀਮ ਕੋਰਟ ਦੇ ਬੈਂਚ ਦਾ ਸਾਹਮਣਾ ਕਰਨ ਜਾ ਰਹੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਯੂਸਫ਼ ਰਜ਼ਾ ਗਿਲਾਨੀ ਦੇ ਵਕੀਲ ਅਤੇ ਸਰਬ ਉੱਚ ਬਾਰ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਏਤਜ਼ਾਜ਼ ਅਹਸਨ ਨੇ ਇਹ ਵੀ ਕਿਹਾ ਹੈ ਕਿ ਪ੍ਰਧਾਨ ਮੰਤਰੀ ਦੋਸ਼ੀ ਨਹੀਂ ਹਨ ਪ੍ਰੰਤੂ ਦਬਾਅ ਦੇ ਸਾਹਮਣੇ ਝੁਕਣਾ ਚਾਹੀਦਾ ਹੈ ਅਤੇ ਸਵਿਟਜ਼ਰਲੈਂਡ ਨੂੰ ਭ੍ਰਿਸ਼ਟਾਚਾਰ ਦੇ ਮਾਮਲਿਆਂ ਨੂੰ ਖੋਲ੍ਹਣ ਲਈ ਕਿਹਾ ਜਾਣਾ ਚਾਹੀਦਾ ਹੈ। ਅਹਸਨ ਨੇ ਕਿਹਾ ਕਿ ਰਾਸ਼ਟਰਪਤੀ ਨੂੰ ਮਿਲੀ ਛੋਟ ਦਾ ਐਲਾਨ ਹੋ ਚੁੱਕਾ ਹੈ ਅਤੇ ਸੰਵਿਧਾਨ ਦੇ ਤਹਿਤ ਇਸ ਨੂੰ ਜ਼ਾਮਨੀ ਪ੍ਰਾਪਤ ਹੈ। ਉਨ੍ਹਾਂ ਨੇ ਕਿਹਾ ਕਿ ਕਿਉਂਕਿ ਰਾਸ਼ਟਰਪਤੀ ਨੂੰ ਸੰਵਿਧਾਨਕ ਛੋਟ ਪ੍ਰਾਪਤ ਹੈ ਇਸ ਲਈ ਪ੍ਰਧਾਨ ਮੰਤਰੀ ਦੇ ਖ਼ਿਲਾਫ਼ ਮਾਣਹਾਨੀ ਦਾ ਨੋਟਿਸ ਸਹੀ ਨਹੀਂ ਹੈ। ਅਹਸਨ ਨੇ ਇਸਲਾਮਾਬਾਦ 'ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਮੁਜਰਮਾਨਾ ਮਾਮਲਿਆਂ 'ਚ ਰਾਸ਼ਟਰਪਤੀ ਨੂੰ ਮਿਲੀ ਛੋਟ ਜਵਾਬਦੇਹੀ ਜਾਂ ਭ੍ਰਿਸ਼ਟਾਚਾਰ ਵਿਰੋਧੀ ਅਦਾਲਤਾਂ 'ਚ ਮੰਨਣਯੋਗ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਸ ਲਈ ਰਾਸ਼ਟਰਪਤੀ ਦੇ ਖ਼ਿਲਾਫ਼ ਸਵਿਟਜ਼ਰਲੈਂਡ 'ਚ ਮਾਮਲੇ ਸ਼ੁਰੂ ਨਹੀਂ ਕੀਤੇ ਜਾ ਸਕਦੇ ਕਿਉਂਕਿ ਉਨ੍ਹਾਂ ਨੂੰ ਵਿਆਨਾ ਸੰਧੀ ਦੇ ਤਹਿਤ ਉਸ ਦੇਸ਼ 'ਚ ਵੀ ਛੋਟ ਪ੍ਰਾਪਤ ਹੈ। ਅਹਸਨ ਨੇ ਕਿਹਾ ਕਿ ਵਿਆਨਾ ਸੰਧੀ ਤਹਿਤ ਜ਼ਰਦਾਰੀ ਨੂੰ ਉਸ ਸਮੇਂ ਤੱਕ ਛੋਟ ਪ੍ਰਾਪਤ ਹੈ ਜਦੋਂ ਉਹ ਰਾਸ਼ਟਰਪਤੀ ਦੇ ਅਹੁਦੇ 'ਤੇ ਹਨ। ਇਕ ਸਵਾਲ ਦੇ ਜਵਾਬ 'ਚ ਅਹਸਨ ਨੇ ਦੱਸਿਆ ਕਿ ਜੇ ਕਰ ਪਾਕਿਸਤਾਨ ਦੀ ਸਰਕਾਰ ਜ਼ਰਦਾਰੀ ਵਿਰੁੱਧ ਮੁਕੱਦਮੇ ਮੁੜ ਖੋਲ੍ਹੇ ਜਾਣ ਬਾਰੇ ਪੱਤਰ ਲਿਖ ਵੀ ਦੇਵੇ ਤਾਂ ਇਸ ਨਾਲ ਕੋਈ ਨੁਕਸਾਨ ਨਹੀਂ ਹੋ ਸਕਦਾ।

ਬੁੱਤ ਢੱਕਣ ਦੇ ਫੈਸਲੇ 'ਤੇ ਮੁੜ ਵਿਚਾਰ ਨਹੀਂ-ਚੋਣ ਕਮਿਸ਼ਨ

ਨਵੀਂ ਦਿੱਲੀ, 19 ਜਨਵਰੀ -ਉਤਰ ਪ੍ਰਦੇਸ਼ 'ਚ ਲੋਕਾਂ ਦੇ ਪੈਸੇ ਨਾਲ ਬਣਾਏ ਗਏ ਬਹੁਜਨ ਸਮਾਜ ਪਾਰਟੀ (ਬਸਪਾ) ਦੇ ਚੋਣ ਨਿਸ਼ਾਨ ਹਾਥੀ ਅਤੇ ਪ੍ਰਦੇਸ਼ ਦੀ ਮੁੱਖ ਮੰਤਰੀ ਮਾਇਆਵਤੀ ਦੇ ਬੁੱਤਾਂ ਨੂੰ ਢੱਕਣ ਦੇ ਚੋਣ ਕਮਿਸ਼ਨ ਦੇ ਫੈਸਲੇ 'ਤੇ ਪਾਰਟੀ ਵੱਲੋਂ ਕੀਤੀ ਗਈ ਮੁੜ ਵਿਚਾਰ ਕਰਨ ਦੀ ਅਪੀਲ ਚੋਣ ਕਮਿਸ਼ਨ ਨੇ ਖਾਰਜ ਕਰ ਦਿੱਤੀ ਹੈ। ਬਸਪਾ ਦੇ ਨੇਤਾ ਸਤੀਸ਼ ਚੰਦਰ ਮਿਸ਼ਰਾ ਦੀ ਸ਼ਿਕਾਇਤ ਦਾ ਜਵਾਬ ਦਿੰਦਿਆਂ ਚੋਣ ਕਮਿਸ਼ਨ ਨੇ ਉਨ੍ਹਾਂ ਦੀ ਇਹ ਦਲੀਲ ਰੱਦ ਕਰ ਦਿੱਤੀ ਕਿ ਹਾਥੀ ਦੇ ਬੁੱਤ ਪਾਰਟੀ ਦੇ ਫੰਡ ਖਰਚ ਕੇ ਬਣਾਏ ਗਏ ਹਨ ਅਤੇ ਬੁੱਤਾਂ ਵਿਚਲੇ ਹਾਥੀਆਂ ਦਾ ਆਸਣ ਪਾਰਟੀ ਦੇ ਚੋਣ ਨਿਸ਼ਾਨ ਵਾਲੇ ਹਾਥੀ ਨਾਲੋਂ ਅਲੱਗ ਹੈ। ਮਿਸ਼ਰਾ ਨੂੰ ਲਿਖੇ ਪੱਤਰ 'ਚ ਚੋਣ ਕਮਿਸ਼ਨ ਦੇ ਮੁੱਖ ਸਕੱਤਰ ਆਰ.ਕੇ.ਸ੍ਰੀਵਾਸਤਵ ਨੇ ਕਿਹਾ ਹੈ ਕਿ ਸਾਨੂੰ ਫੈਸਲੇ 'ਤੇ ਮੁੜ ਵਿਚਾਰ ਕਰਨ ਦੀ ਕੋਈ ਤੁਕ ਨਹੀਂ ਲੱਗਦੀ। ਵਰਨਣਯੋਗ ਹੈ ਕਿ ਬਸਪਾ ਨੇ ਚੋਣ ਕਮਿਸ਼ਨ ਦੇ ਹਾਥੀ ਅਤੇ ਮਾਇਆਵਤੀ ਦੇ ਬੁੱਤ ਢੱਕਣ ਦੇ ਫੈਸਲੇ ਨੂੰ ਇਕਤਰਫ਼ਾ ਕਾਰਵਾਈ ਕਰਾਰ ਦਿੰਦਿਆਂ ਆਪਣੀ ਸ਼ਿਕਾਇਤ ਦਰਜ ਕਰਾਈ ਸੀ।

ਸੰਘਣੀ ਧੁੰਦ ਕਾਰਨ ਹਵਾਈ, ਰੇਲ ਅਤੇ ਸੜਕੀ
ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ

ਨਵੀਂ ਦਿੱਲੀ, 19 ਜਨਵਰੀ -ਪੂਰਾ ਦੇਸ਼ ਇਸ ਵੇਲੇ ਸਰਦੀ ਦੀ ਜਕੜ 'ਚ ਹੈ ਅਤੇ ਖਾਸ ਕਰ ਕੇ ਉੱਤਰੀ ਅਤੇ ਦੱਖਣੀ ਖੇਤਰ 'ਚ ਠੰਢ ਨੇ ਬੀਤੇ 100 ਸਾਲਾਂ ਦਾ ਰਿਕਾਰਡ ਤੋੜ ਦਿੱਤਾ ਹੈ। ਅੱਜ ਗਹਿਰੀ ਧੁੰਦ ਕਾਰਨ ਆਮ ਜਨਜੀਵਨ ਪ੍ਰਭਾਵਿਤ ਹੋ ਕੇ ਰਹਿ ਗਿਆ, ਹਵਾਈ, ਰੇਲ ਅਤੇ ਸੜਕੀ ਆਵਾਜਾਈ 'ਚ ਭਾਰੀ ਵਿਘਨ ਪਿਆ। ਕੌਮੀ ਰਾਜਧਾਨੀ 'ਚ ਅੱਜ ਸਵੇਰੇ ਗਹਿਰੀ ਧੁੰਦ ਛਾਈ ਰਹੀ ਅਤੇ ਜੈੱਟ ਏਅਰਵੇਜ਼, ਗੋਅ ਏਅਰ ਅਤੇ ਏਅਰ ਇੰਡੀਆ ਦੀਆਂ ਉਡਾਣਾਂ ਦੇਰੀ ਨਾਲ ਆਪਣੀ ਮੰਜ਼ਿਲ ਵੱਲ ਰਵਾਨਾ ਹੋਈਆਂ। ਇਥੋਂ ਵੱਖ ਵੱਖ ਥਾਵਾਂ ਨੂੰ ਜਾਣ ਅਤੇ ਆਉਣ ਵਾਲੀਆਂ ਕਰੀਬ ਸਾਰੀਆਂ ਰੇਲ ਗੱਡੀਆਂ ਵੀ ਕਈ ਕਈ ਘੰਟੇ ਪਛੜ ਕੇ ਰਹਿ ਗਈਆਂ। ਪੰਜਾਬ, ਹਰਿਆਣਾ ਅਤੇ ਚੰਡੀਗੜ੍ਹ 'ਚ ਵੀ ਗਹਿਰੀ ਧੁੰਦ ਪਈ ਅਤੇ ਠੰਢ ਦਾ ਪ੍ਰਭਾਵ ਵੀ ਵਧ ਗਿਆ। ਕਸ਼ਮੀਰ ਵਾਦੀ ਚੌਥੇ ਦਿਨ ਵੀ ਬਾਕੀ ਦੁਨੀਆਂ ਨਾਲੋਂ ਕੱਟੀ ਰਹੀ। ਹਿਮਾਚਲ ਦੀਆਂ ਪਹਾੜੀਆਂ 'ਤੇ ਭਾਰੀ ਬਰਫ਼ਬਾਰੀ ਹੋਈ। ਨਵੀਂ ਦਿੱਲੀ 'ਚ ਅੱਜ ਘੱਟ ਤੋਂ ਘੱਟ ਤਾਪਮਾਨ 5.6 ਡਿਗਰੀ ਸੈਲਸੀਅਸ ਰਿਕਾਰਡ ਕੀਤਾ ਗਿਆ। ਕਸ਼ਮੀਰ 'ਚ ਪਹਿਲਗਾਮ ਅਤੇ ਗੁਲਮਰਗ ਸਭ ਤੋਂ ਠੰਢੇ ਰਹੇ ਅਤੇ ਲੇਹ 'ਚ ਤਾਪਮਾਨ ਮਨਫੀ 20 ਡਿਗਰੀ ਸੈਲਸੀਅਸ ਰਿਹਾ। ਪੰਜਾਬ 'ਚ ਅੰਮ੍ਰਿਤਸਰ ਜ਼ਿਲ੍ਹੇ 'ਚ ਤਾਪਮਾਨ 4.4 ਡਿਗਰੀ ਸੈਲਸੀਅਸ ਅਤੇ ਹਰਿਆਣਾ 'ਚ ਕਰਨਾਲ ਜ਼ਿਲ੍ਹੇ 'ਚ ਘੱਟ ਤੋਂ ਘੱਟ ਤਾਪਮਾਨ 7.4 ਡਿਗਰੀ ਸੈਲਸੀਅਸ ਰਿਕਾਰਡ ਕੀਤਾ ਗਿਆ। ਚੰਡੀਗੜ੍ਹ 'ਚ ਤਾਪਮਾਨ 10 ਡਿਗਰੀ ਸੈਲਸੀਅਸ ਰਿਹਾ। ਹਿਮਾਚਲ 'ਚ ਗੌਹਰ ਵਿਖੇ 13 ਮਿਲੀਮੀਟਰ ਬਰਫ਼ ਰਿਕਾਰਡ ਕੀਤੀ ਗਈ। ਲਾਹੌਲ ਸਪਿਤੀ 'ਚ ਕੀਲਾਂਗ ਦਾ ਤਾਪਮਾਨ ਮਨਫੀ 11 ਡਿਗਰੀ ਸੈਲਸੀਅਸ ਰਿਕਾਰਡ ਕੀਤਾ ਗਿਆ। ਮੌਸਮ ਵਿਭਾਗ ਅਨੁਸਾਰ ਅਜੇ ਅਗਲੇ 2 ਦਿਨ ਲੋਕਾਂ ਨੂੰ ਠੰਢ ਤੋਂ ਰਾਹਤ ਨਹੀਂ ਮਿਲੇਗੀ।

ਲੋਧੀ ਦੀ ਪਟੀਸ਼ਨ 'ਤੇ ਜ਼ਰਦਾਰੀ ਤੇ ਗਿਲਾਨੀ ਤੋਂ ਜਵਾਬ ਤਲਬ

ਇਸਲਾਮਾਬਾਦ, 19ਜਨਵਰੀ -ਪਾਕਿਸਤਾਨ ਦੀ ਇਕ ਅਦਾਲਤ ਨੇ ਸਾਬਕਾ ਰੱਖਿਆ ਸਕੱਤਰ ਲੈਂਫਟੀਨੈਂਟ ਜਨਰਲ (ਸੇਵਾ ਮੁਕਤ) ਖਾਲਿਦ ਨਈਮ ਲੋਧੀ ਦਾ ਪਟੀਸ਼ਨ 'ਤੇ ਰਾਸ਼ਟਰਪਤੀ ਅਤੇ ਪ੍ਰਧਾਨ ਮੰਤਰੀ ਨੂੰ ਜਵਾਬ ਦੇਣ ਲਈ ਕਿਹਾ ਹੈ। ਲੋਧੀ ਨੇ ਸਰਕਾਰ ਵੱਲੋਂ ਉਨ੍ਹਾਂ ਨੂੰ ਬਰਤਰਫ਼ ਕਰਨ ਦੇ ਫ਼ੈਸਲੇ ਨੂੰ ਚੁਣੌਤੀ ਦਿੱਤੀ ਹੈ। ਇਸਲਾਮਾਬਾਦ ਹਾਈ ਕੋਰਟ ਨੇ ਜਸਟਿਸ ਸ੍ਰੀ ਰਿਆਜ਼ ਖਾਨ ਨੇ ਰਾਸ਼ਟਰਪਤੀ, ਪ੍ਰਧਾਨ ਮੰਤਰੀ, ਪ੍ਰਸ਼ਾਸਨ ਸਕੱਤਰ ਅਤੇ ਮੌਜੂਦ ਰੱਖਿਆ ਸਕੱਤਰ ਕੋਲੋਂ ਲੋਧੀ ਦੀ ਪਟੀਸ਼ਨ ਤੋਂ ਜਵਾਬ ਮੰਗਿਆ ਅਤੇ ਇਸ ਤੋਂ ਬਾਅਦ ਮਾਮਲੇ ਦੀ ਸੁਣਵਾਈ ਫਰਵਰੀ ਦੇ ਦੂਸਰੇ ਹਫਤੇ ਲਈ ਮੁਲਤਵੀ ਕਰ ਦਿੱਤੀ। ਫ਼ੌਜ ਮੁੱਖੀ ਜਨਰਸ ਅਸ਼ਫਾਕ ਪ੍ਰਵੇਜ਼ ਕਿਆਨੀ ਦੇ ਵਫਾਦਾਰ ਲੋਧੀ ਨੂੰ ਪ੍ਰਧਾਨ ਮੰਤਰੀ ਯੂਸਫ਼ ਰਜ਼ਾ ਗਿਲਾਨੀ ਨੇ ਬੀਤੇ ਹਫ਼ਤੇ ਸਰਕਾਰ ਅਤੇ ਫ਼ੌਜ ਵਿਚਾਲੇ ਮੀਮੋ ਕਾਂਡ 'ਚ ਗਲਤ ਫਹਿਮੀਆਂ ਪੈਦਾ ਕਰਨ ਦੇ ਦੋਸ਼ ਤਹਿਤ ਬਰਤਰਫ਼ ਕਰ ਦਿੱਤਾ ਸੀ।

ਜਬਰ ਜਨਾਹ ਦੀ ਕੋਸ਼ਿਸ਼ ਤੇ ਕਤਲ ਦੇ ਦੋਸ਼ੀ ਨੂੰ ਫਾਂਸੀ ਦੀ ਸਜ਼ਾ

ਗੁਰਦਾਸਪੁਰ, 19 ਜਨਵਰੀ-ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਗੁਰਦਾਸਪੁਰ ਦੀ ਅਦਾਲਤ ਵੱਲੋਂ ਅੱਜ ਇੱਕ ਔਰਤ ਨਾਲ ਜਬਰ ਜਨਾਹ ਦੀ ਕੋਸ਼ਿਸ਼ ਪਿੱਛੋਂ ਉਸ ਦਾ ਕਤਲ ਕਰਨ ਦੇ ਦੋਸ਼ੀ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਗਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਫਤਿਹਗੜ੍ਹ ਚੂੜੀਆਂ ਥਾਣੇ ਅਧੀਨ ਪੈਂਦੇ ਪਿੰਡ ਕਾਲਾ ਅਫ਼ਗਾਨਾ ਦੇ ਨਵਰਾਜ ਸਿੰਘ ਪੁੱਤਰ ਸੰਤੋਖ ਸਿੰਘ ਨੇ ਪੁਲਿਸ ਨੂੰ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਉਹ 2009 ਵਿਚ 15-16 ਜੂਨ ਦੀ ਰਾਤ ਨੂੰ 11.30 ਵਜੇ ਦੇ ਕਰੀਬ ਪਿੰਡ ਦੇ ਹੀ ਨੰਬਰਦਾਰ ਗੁਰਬਖਸ਼ ਸਿੰਘ ਦੇ ਨਾਲ ਇੱਕ ਗਲੀ ਵਿਚੋਂ ਗੁਜ਼ਰ ਰਿਹਾ ਸੀ। ਇਸੇ ਦੌਰਾਨ ਉਨ੍ਹਾਂ ਨੇ ਗਲੀ ਵਿਚ ਉਸ ਦੀ ਮਾਸੀ ਦੀ ਨੂੰਹ ਦਲਜੀਤ ਕੌਰ ਦੇ ਘਰੋਂ ਚੀਕਾਂ ਦੀ ਆਵਾਜ਼ ਸੁਣੀ। ਇਸ ਦੇ ਬਾਅਦ ਉਨ੍ਹਾਂ ਦੋਵਾਂ ਨੇ ਅੰਦਰ ਜਾ ਕੇ ਦੇਖਿਆ ਕਿ ਉਨ੍ਹਾਂ ਦੇ ਹੀ ਪਿੰਡ ਦਾ ਸਲੀਮ ਮਸੀਹ ਪੁੱਤਰ ਦਾਰਾ ਮਸੀਹ ਦਲਜੀਤ ਕੌਰ ਨਾਲ ਜਬਰ ਜਨਾਹ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਉਨ੍ਹਾਂ ਦੇ ਦੇਖਦਿਆਂ-ਦੇਖਦਿਆਂ ਹੀ ਦਲਜੀਤ ਕੌਰ ਵੱਲੋਂ ਵਿਰੋਧ ਕਰਨ 'ਤੇ ਸਲੀਮ ਮਸੀਹ ਨੇ ਉਸ ਦੇ ਸਿਰ ਵਿਚ 2 ਵਾਰ ਇੱਟਾਂ ਮਾਰੀਆਂ ਜਿਸ ਨਾਲ ਉਹ ਲਹੂ ਲੁਹਾਣ ਹੋ ਗਈ। ਉਨ੍ਹਾਂ ਨੂੰ ਅੰਦਰ ਆਇਆਂ ਦੇਖ ਕੇ ਸਲੀਮ ਮਸੀਹ ਉੱਥੋਂ ਫ਼ਰਾਰ ਹੋ ਗਿਆ ਅਤੇ ਉਨ੍ਹਾਂ ਨੇ ਦਲਜੀਤ ਕੌਰ ਨੂੰ ਗੰਭੀਰ ਹਾਲਤ ਵਿਚ ਬਟਾਲਾ ਦੇ ਸਿਵਲ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਜਿੱਥੇ ਉਹ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦਿਆਂ ਦਮ ਤੋੜ ਗਈ। ਇਹ ਮਾਮਲਾ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਗੁਰਦਾਸਪੁਰ ਸ੍ਰੀ ਕੇਵਲ ਕ੍ਰਿਸ਼ਨ ਗਰਗ ਦੀ ਅਦਾਲਤ ਵਿਚ ਚੱਲ ਰਿਹਾ ਸੀ ਅਤੇ ਮਾਨਯੋਗ ਅਦਾਲਤ ਵੱਲੋਂ ਅੱਜ ਉਕਤ ਕੇਸ ਦੀ ਸੁਣਵਾਈ ਕਰਦਿਆਂ ਦੋਸ਼ੀ ਸਲੀਮ ਮਸੀਹ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਗਈ ਹੈ।

ਚਾਰਾ ਘੁਟਾਲਾ ਮਾਮਲੇ 'ਚ 41 ਨੂੰ ਸਜ਼ਾ

ਰਾਂਚੀ, 19 ਜਨਵਰੀ -ਝਾਰਖੰਡ 'ਚ ਸੀ. ਬੀ. ਆਈ. ਦੀ ਇਕ ਅਦਾਲਤ ਨੇ 41 ਵਿਅਕਤੀਆਂ ਨੂੰ 4 ਤੋਂ 7 ਸਾਲ ਦੀ ਕੈਦ ਅਤੇ 2 ਲੱਖ ਤੋਂ 30 ਲੱਖ ਰੁਪਏ ਤੱਕ ਦੇ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ। ਜੱਜ ਪੀ.ਕੇ.ਸਿੰਘ ਨੇ ਅੱਜ ਇਹ ਸਜ਼ਾ ਸੁਣਾਈ। ਉਕਤ ਮਾਮਲੇ 'ਚ 61 ਲੋਕਾਂ ਨੂੰ ਦੋਸ਼ੀ ਮੰਨਦੇ ਹੋਏ 20 ਲੋਕਾਂ ਨੂੰ ਸੋਮਵਾਰ ਨੂੰ ਸਜ਼ਾ ਸੁਣਾਈ ਗਈ ਸੀ ਅਤੇ 41 ਦੋਸ਼ੀਆਂ ਦਾ ਫ਼ੈਸਲਾ ਅੱਜ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਬਿਹਾਰ ਦੇ ਸਾਬਕਾ ਮੁੱਖ ਮੰਤਰੀ ਲਾਲੂ ਪ੍ਰਸਾਦ ਯਾਦਵ ਅਤੇ ਜਗਨ ਨਾਥ ਮਿਸ਼ਰਾ ਇਸ ਮਾਮਲੇ 'ਚ ਦੋਸ਼ੀ ਹਨ ਅਤੇ ਅਦਾਲਤ 'ਚ ਇਨ੍ਹਾਂ ਦੇ ਖ਼ਿਲਾਫ ਕੇਸ ਚਲ ਰਹੇ ਹਨ।

ਦੂਜੇ ਵਿਸ਼ਵ ਯੁੱਧ 'ਚ ਸ਼ਹੀਦ 11 ਜਾਪਾਨੀ ਸੈਨਿਕਾਂ
ਦੇ ਅੰਸ਼ ਵਾਪਸ ਭੇਜੇ ਜਾਣਗੇ

ਗੁਹਾਟੀ, 19 ਜਨਵਰੀ - ਦੂਜੇ ਵਿਸ਼ਵ ਯੁੱਧ ਦੌਰਾਨ ਸ਼ਹੀਦ ਹੋਏ 11 ਜਾਪਾਨੀ ਸੈਨਿਕਾਂ ਦੀਆਂ ਕਬਰਾਂ ਦੀ ਖੁਦਾਈ ਅੱਜ ਇਥੇ ਗੁਹਾਟੀ ਦੇ ਕਬਰਸਤਾਨ 'ਚ ਸ਼ੁਰੂ ਹੋ ਗਈ। ਕਮਰੂਪ ਸ਼ਹਿਰ ਦੇ ਡਿਪਟੀ ਕਮਿਸ਼ਨਰ ਆਸ਼ੂਤੋਸ਼ ਅਗਨੀਹੋਤਰੀ ਨੇ ਦੱਸਿਆ ਕਿ ਜਾਪਾਨ ਦੇ ਤਿੰਨ ਅਧਿਕਾਰੀ ਕੱਲ੍ਹ ਇਥੇ ਪਹੁੰਚ ਗਏ ਸਨ ਅਤੇ ਉਹ ਅੰਤਿਮ ਰਸਮਾਂ ਆਪਣੇ ਦੇਸ਼ 'ਚ ਪੂਰੀਆਂ ਕਰਨ ਲਈ ਯੁੱਧ ਦੇ ਸ਼ਹੀਦਾਂ ਦੇ ਅੰਸ਼ ਲੈ ਕੇ ਜਾਣਗੇ। ਅਗਨੀਹੋਤਰੀ ਨੇ ਦੱਸਿਆ ਕਿ ਇਸ ਮੁੱਦੇ 'ਤੇ ਜਾਪਾਨ ਦੀ ਸਰਕਾਰ ਨੇ ਭਾਰਤ ਸਰਕਾਰ ਤਕ ਪਹੁੰਚ ਕੀਤੀ ਸੀ ਜਿਸ ਅਨੁਸਾਰ ਕਬਰਾਂ ਦੀ ਖੁਦਾਈ ਸ਼ੁਰੂ ਕੀਤੀ ਗਈ ਹੈ ਜੋ ਕਿ ਕੱਲ੍ਹ ਤੱਕ ਪੂਰੀ ਹੋਣ ਦੀ ਸੰਭਾਵਨਾ ਹੈ। ਦੱਸਿਆ ਜਾਂਦਾ ਹੈ ਕਿ ਕਬਰਸਤਾਨ 'ਚੋਂ ਲੱਭੇ ਅੰਸ਼ਾ ਨੂੰ ਫੌਰੈਂਸਿਕ ਪ੍ਰਯੋਗਸ਼ਾਲਾ 'ਚ ਭੇਜਿਆ ਜਾਵੇਗਾ ਅਤੇ ਲੋੜੀਂਦੇ ਟੈਸਟ ਕਰਨ ਤੋਂ ਬਾਅਦ ਜਾਪਾਨੀ ਅਧਿਕਾਰੀਆਂ ਨੂੰ ਸੌਂਪ ਦਿੱਤਾ ਜਾਵੇਗਾ।

ਟੀਮ ਅੰਨਾ ਵੱਲੋਂ ਬਾਬਾ ਰਾਮਦੇਵ ਨੂੰ ਚੋਣ ਪ੍ਰਚਾਰ ਦਾ ਸੱਦਾ

ਨਵੀਂ ਦਿੱਲੀ, 19 ਜਨਵਰੀ - ਟੀਮ ਅੰਨਾ ਨੇ ਅੱਜ ਯੋਗ ਗੁਰੂ ਬਾਬਾ ਰਾਮਦੇਵ ਨੂੰ ਉਨ੍ਹਾਂ ਦੇ ਨਾਲ ਮਿਲ ਕੇ ਉਤਰਾਖੰਡ ਦੀਆਂ ਆਗਾਮੀ ਵਿਧਾਨ ਸਭਾ ਚੋਣਾਂ 'ਚ ਪ੍ਰਚਾਰ ਕਰਨ ਦਾ ਸੱਦਾ ਦਿੱਤਾ ਹੈ। ਟੀਮ ਅੰਨਾ ਭ੍ਰਿਸ਼ਟਾਚਾਰ ਦੇ ਖਿਲਾਫ ਅਤੇ ਮਜ਼ਬੂਤ ਲੋਕਪਾਲ ਬਿੱਲ ਲਈ ਉਨ੍ਹਾਂ ਸਾਰੇ ਰਾਜਾਂ 'ਚ ਪ੍ਰਚਾਰ ਕਰੇਗੀ ਜਿਨ੍ਹਾਂ 'ਚ ਚੋਣਾਂ ਹੋਣ ਵਾਲੀਆਂ ਹਨ। ਬਾਬਾ ਰਾਮਦੇਵ ਨੂੰ ਇਹ ਸੱਦਾ ਉਨ੍ਹਾਂ ਉਪਰ ਸਿਆਹੀ ਦੁਆਰਾ ਹਮਲਾ ਹੋਣ ਤੋਂ 2 ਦਿਨ ਬਾਅਦ ਮਿਲਿਆ ਹੈ। ਜ਼ਿਕਰਯੋਗ ਹੈ ਕਿ ਬਾਬਾ ਰਾਮਦੇਵ ਕਾਲੇ ਧਨ ਦੇ ਖਿਲਾਫ ਪਿਛਲੇ ਕਾਫੀ ਸਮੇਂ ਤੋਂ ਪ੍ਰਚਾਰ ਕਰ ਰਹੇ ਹਨ।

ਰੇਲਵੇ 'ਚ ਏ. ਸੀ. ਡੱਬੇ ਦੇ ਯਾਤਰੀਆਂ ਕੋਲ
ਪਛਾਣ ਪੱਤਰ ਹੋਣਾ ਜ਼ਰੂਰੀ

ਨਵੀਂ ਦਿੱਲੀ, 19 ਜਨਵਰੀ -ਟਿਕਟਾਂ ਦੀ ਦੁਰਵਰਤੋਂ ਵਰਗੀਆਂ ਘਟਨਾਵਾਂ ਦਾ ਸਾਹਮਣਾ ਕਰ ਰਹੀ ਰੇਲਵੇ ਵੱਲੋਂ ਇਹ ਜਰੂਰੀ ਕਰ ਦਿੱਤਾ ਗਿਆ ਹੈ ਕਿ ਏ.ਸੀ. ਕਲਾਸ 'ਚ ਸਫ਼ਰ ਕਰ ਰਹੇ ਸਾਰੇ ਮੁਸਾਫਿਰਾਂ ਕੋਲ ਪਛਾਣ ਪੱਤਰ ਹੋਣਾ ਚਾਹੀਦਾ ਹੈ। ਹੁਣ ਤਕ ਸਿਰਫ ਉਨ੍ਹਾਂ ਯਾਤਰੀਆਂ ਕੋਲ ਹੀ ਪਛਾਣ ਪੱਤਰ ਹੋਣਾ ਜਰੂਰੀ ਸੀ ਜਿਨ੍ਹਾਂ ਕੋਲ ਈ ਟਿਕਟ ਜਾਂ ਤਤਕਾਲ ਟਿਕਟ ਹੁੰਦੀ ਸੀ। ਰੇਲਵੇ ਮੰਤਰਾਲੇ ਨੇ ਕਿਹਾ ਹੈ ਕਿ ਦੇਸ਼ ਭਰ 'ਚ ਰੇਲਵੇ ਦਾ ਨਵਾਂ ਫੈਸਲਾ 15 ਫਰਵਰੀ ਤੋਂ ਲਾਗੂ ਹੋ ਜਾਵੇਗਾ। ਇਕ ਅਧਿਕਾਰੀ ਨੇ ਦੱਸਿਆ ਕਿ ਕਿਸੇ ਦਲ 'ਚ ਯਾਤਰਾ ਕਰ ਰਹੇ ਯਾਤਰੀਆਂ 'ਚੋਂ ਕਿਸੇ ਇਕ ਕੋਲ ਪਛਾਣ ਪੱਤਰ ਹੋਣਾ ਚਾਹੀਦਾ ਹੈ। ਪਛਾਣ ਪੱਤਰ 'ਚ ਵੋਟਰ ਕਾਰਡ, ਪੈਨਕਾਰਡ, ਡਰਾਈਵਿੰਗ ਲਾਈਸੈਂਸ, ਫੋਟੋ ਲੱਗੀ ਰਾਸ਼ਟਰੀ ਬੈਂਕਾਂ ਦੀ ਪਾਸ ਕਾਪੀ ਜਾਂ ਆਧਾਰ ਕਾਰਡ ਆਦਿ ਮੰਨਣਯੋਗ ਹੋਵੇਗਾ।

ਭਾਰਤੀ ਏਅਰਟੈੱਲ 'ਤੇ 1,067 ਕਰੋੜ ਦਾ ਟੈਕਸ ਬਕਾਇਆ

ਨਵੀਂ ਦਿੱਲੀ, 19 ਜਨਵਰੀ-ਆਮਦਨ ਕਰ ਵਿਭਾਗ ਨੇ ਦੇਸ਼ ਦੀ ਵੱਡੀ ਦੂਰਸੰਚਾਰ ਕੰਪਨੀ ਭਾਰਤੀ ਏਅਰਟੈਲ ਨੂੰ ਵਿਦੇਸ਼ਾਂ 'ਚ ਕਾਰੋਬਾਰ ਕਰਨ ਦੇ ਸਬੰਧ 'ਚ 1,067 ਕਰੋੜ ਰੁਪਏ ਬਕਾਏ ਦਾ ਨੋਟਿਸ ਭੇਜਿਆ ਹੈ। ਵਿਭਾਗ ਅਨੁਸਾਰ ਇਹ ਬਕਾਇਆ ਚਾਰ ਵਿੱਤੀ ਸਾਲਾਂ ਲਈ ਹੈ ਜਿਸ ਵਿਚ ਸਾਲ 2007-8 ਲਈ 202.07 ਕਰੋੜ, 2009-09 ਲਈ 329.913 ਕਰੋੜ, 2009-10 ਲਈ 313.577 ਕਰੋੜ ਅਤੇ ਸਾਲ 2010-11 ਲਈ 221.681 ਕਰੋੜ ਹੈ। ਉਧਰ ਕੰਪਨੀ ਦੇ ਬੁਲਾਰੇ ਨੇ ਕਿਹਾ ਹੈ ਕਿ ਉਸ ਨੇ ਆਮਦਨ ਕਰ ਦੀਆਂ ਸਾਰੀਆਂ ਸ਼ਰਤਾਂ ਪੂਰੀਆਂ ਕੀਤੀਆਂ ਹਨ ਅਤੇ ਇਸ ਲਈ ਅਸੀਂ ਕਾਨੂੰਨੀ ਮੱਦਦ ਲਵਾਂਗੇ।