ਬੰਗਾ ਲਾਗੇ ਸੜਕ ਹਾਦਸੇ 'ਚ ਵਿਧਾਇਕ ਦੀ ਪਤਨੀ ਸਮੇਤ ਤਿੰਨ ਫਟੱੜ

ਬੰਗਾ ਲਾਗੇ ਸੜਕ ਹਾਦਸੇ 'ਚ ਵਿਧਾਇਕ ਰਾਣਾ ਕੇ. ਪੀ ਸਿੰਘ ਦੀ ਹਾਦਸਾ ਗ੍ਰਸਤ
ਗੱਡੀ ਅਤੇ ਕਾਰ।

ਬੰਗਾ, 4 ਮਾਰਚ-ਬੰਗਾ ਲਾਗੇ ਪੈਂਦੇ ਪਿੰਡ ਢਾਹਾਂ ਵਿਖੇ ਮੁੱਖ ਮਾਰਗ ਤੇ ਗੁਰੂ ਨਾਨਕ ਮਿਸ਼ਨ ਹਸਪਤਾਲ ਢਾਹਾਂ ਨੇੜੇ ਦੋ ਗੱਡੀਆਂ ਦੀ ਜਬਰਦਸਤ ਟੱਕਰ 'ਚ ਨੰਗਲ ਦੇ ਵਿਧਾਇਕ ਰਾਣਾ ਕੇ. ਪੀ ਸਿੰਘ ਦੀ ਗੱਡੀ ਪਲਟ ਗਈ ਜਿਸ ਕਾਰਨ ਉਨ੍ਹਾਂ ਦੀ ਪਤਨੀ ਸ੍ਰੀਮਤੀ ਸ਼ਸ਼ੀ ਰਾਣਾ, ਪੁੱਤਰੀ ਮਨੀਸ਼ ਰਾਣਾ ਅਤੇ ਗੰਨਮੈਨ ਜੀਵਨ ਕੁਮਾਰ ਜ਼ਖ਼ਮੀ ਹੋ ਗਏ। ਵਿਧਾਇਕ ਦੀ ਗੱਡੀ ਪੀ. ਬੀ. 12 ਯੂ. ਜੇ 7800 ਜੋ ਚੰਡੀਗੜ੍ਹ ਤੋਂ ਅੰਮ੍ਰਿਤਸਰ ਜਾ ਰਹੀ ਸੀ, ਜਿਸ ਨਾਲ ਸਿਟੀ ਹਾਂਡਾ ਕਾਰ ਪੀ. ਬੀ. 09 ਡੀ. 9675 ਟਕਰਾ ਗਈ। ਬੰਗਾ ਪੁਲਿਸ ਨੇ ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਬੰਗਾ ਦਾਖਿਲ ਕਰਵਾਇਆ ਅਤੇ ਬਾਅਦ 'ਚ ਸਿਵਲ ਹਸਪਤਾਲ ਰੋਪੜ ਰੈਫਰ ਕਰ ਦਿੱਤਾ ਗਿਆ। ਬੰਗਾ ਥਾਣੇ 'ਚ ਵਿਧਾਇਕ ਦੀ ਗੱਡੀ ਦੇ ਡਰਾਇਵਰ ਗੁਰਮੁੱਖ ਸਿੰਘ ਪੁੱਤਰ ਪਰਮਾ ਨੰਦ ਵਾਸੀ ਬੜਵਾ ਨੂਰਪੁਰ ਬੇਦੀ ਦੇ ਬਿਆਨਾਂ 'ਤੇ ਸਿਟੀ ਹਾਂਡਾ ਕਾਰ ਦੇ ਡਰਾਇਵਰ ਸੁਖਦੀਪ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਨਿਵਾਸੀ ਕਾਇਮਪੁਰਾ ਪੁਰਾਣੀ ਸਬਜ਼ੀ ਮੰਡੀ ਕਪੂਰਥਲਾ ਦੇ ਖਿਲਾਫ ਮੁਕੱਦਮਾ ਨੰ. 29 ਧਾਰਾ 279, 337, 427 ਅਧੀਨ ਮਾਮਲਾ ਦਰਜ ਕਰ ਲਿਆ। ਕਾਰ ਦਾ ਡਰਾਇਵਰ ਮੌਕੇ ਤੇ ਫਰਾਰ ਹੋ ਗਿਆ। ਘਟਨਾ ਸਥਾਨ ਦਾ ਥਾਣਾ ਮੁੱਖੀ ਜੀਵਨ ਕੁਮਾਰ ਕਾਲੀਆ ਨੇ ਜਾਇਜ਼ਾ ਲਿਆ।