ਦਲਿਤ ਨੇ ਛੂਇਆ ਤੇ ਕੱਟ ਦਿੱਤਾ ਹੱਥ

ਹਿਸਾਰ : ਹਰਿਆਣਾ ਦੇ ਹਿਸਾਰ ਦੇ ਦੌਲਤਪੁਰ ਪਿੰਡ 'ਚ ਇਕ ਸਨਸਨੀਖੇਜ ਮਾਮਾਲਾ ਸਾਹਮਣੇ ਆਇਆ ਹੈ। ਪਿੰਡ ਦੇ ਇਕ ਕਿਸਾਨ ਦੇ ਲੜਕੇ ਨੇ ਆਪਣੇ ਖੇਤ 'ਚ ਰੱਖੇ ਘੜੇ 'ਚੋਂ ਪਾਣੀ ਪੀਣ 'ਤੇ ਇਕ ਦਲਿਤ ਨੌਜਵਾਨ ਦਾ ਦਾਤਰੀ ਨਾਲ ਹੱਥ ਕੱਟ ਦਿੱਤਾ। ਦਲਿਤ ਨੌਜਵਾਨ ਗੰਭੀਰ ਰੂਪ 'ਚ ਜ਼ਖਮੀ ਹੋ ਗਿਆ। ਉਸ ਨੂੰ ਸ਼ਹਿਰ ਦੇ ਇਕ ਹਸਪਤਾਲ  'ਚ ਭਰਤੀ ਕਰਾਇਆ ਗਿਆ ਹੈ।
ਫਿਲਹਾਲ ਇਸ ਮਾਮਲੇ 'ਚ ਲਿਖਿਤ ਸ਼ਿਕਾਇਤ ਦੇ ਬਾਵਜੂਦ ਕੇਸ ਦਰਜ ਨਹੀਂ ਕੀਤਾ ਗਿਆ। ਰਾਜੇਸ਼ ਨਾਂ ਦਾ ਇਹ ਦਲਿਤ ਨੌਜਵਾਨ ਗੁਆਂਢੀ ਜ਼ਿਲ੍ਹੇ ਫਤਿਹਾਬਾਦ ਦੇ ਪਿੰਡ ਸਨਿਆਣਾ ਦਾ ਰਹਿਣ ਵਾਲਾ ਹੈ।
ਉਸ ਦੇ ਚਾਚੇ ਨੇ ਦੱਸਿਆ ਕਿ ਰਾਜੇਸ਼ ਪਿੰਡ ਦੇ ਹੀ ਇਕ ਠੇਕੇਦਾਰ ਦੇ ਕੋਲ਼ ਕਪਾਹ ਦੀਆਂ ਲੱਕੜੀਆਂ ਕੱਟਣ ਦਾ ਕੰਮ ਕਰਦਾ ਹੈ। ਬੀਤੀ ਕੱਲ ਸਵੇਰੇ ਨੌ ਵਜੇ ਉਹ ਦੌਲਤਪੁਰ ਪਿੰਡ 'ਚ ਕੰਮ ਕਰਨ ਗਿਆ ਸੀ। ਰਾਜੂ ਨੇ ਦੱਸਿਆ ਕਿ ਸਵੇਰੇ ਦੱਸ ਵਜੇ ਕੰਮ ਕਰਦਿਆਂ ਉਹ ਨੇੜੇ ਹੀ ਇਕ ਖੇਤ 'ਚ ਰੱਖੇ ਘੜੇ 'ਚੋਂ ਪਾਣੀ ਪੀਣ ਚਲਾ ਗਿਆ। ਇਸੇ ਦੌਰਾਨ ਇਕ ਨੌਜਵਾਨ ਉਸ ਕੋਲ਼ ਆਇਆ। ਦੋਸ਼ ਹੈ ਕਿ ਉਸ ਨੌਜਵਾਨ ਨੇ ਰਾਜੇਸ਼ ਦੀ ਜਾਤ ਪੁੱਛੀ ਅਤੇ ਉਸ ਦੇ ਇਹ ਦੱਸਣ 'ਤੇ ਕਿ ਉਹ ਹਰੀਜਨ ਹੈ, ਨੌਜਵਾਨ ਨੇ ਦਾਤਰੀ ਨਾਲ ਉਸ ਦਾ ਹੱਥ ਕੱਟ ਦਿੱਤਾ।