ਨਿਹੰਗ ਸਿੰਘਾਂ ਵੱਲੋਂ ਦਿਖਾਏ ਗਏ ਘੋੜਿਆਂ ਦੀਆਂ ਦੌੜਾਂ ਦੇ ਜੌਹਰ

ਨੂਰਪੁਰ ਬੇਦੀ, 16 ਮਾਰਚ -ਇਤਿਹਾਸਕ ਗੁ: 34 ਸ਼ਹੀਦ ਸਿੰਘਾਂ ਸਰਾਂਏ ਪੱਤਣ (ਸ਼ਾਹਪੁਰ ਬੇਲਾ) ਵਿਖੇ ਬਾਬਾ ਸਵਰਨ ਸਿੰਘ ਕਾਰ ਸੇਵਾ ਵਾਲਿਆਂ ਵੱਲੋਂ ਘੋੜਿਆਂ ਦੀਆਂ ਦੌੜਾਂ ਕਰਵਾਈਆਂ ਗਈਆਂ ਜਿਸ ਦੌਰਾਨ ਨਿਹੰਗ ਸਿੰਘਾਂ ਦੀਆਂ ਵੱਖ-ਵੱਖ ਜਥੇਬੰਦੀਆਂ ਵੱਲੋਂ ਘੋੜਿਆਂ ਦੀਆਂ ਦੌੜਾਂ ਤੇ ਹੋਰ ਕਰਤੱਵ ਦਿਖਾਏ ਗਏ। ਕਰੀਬ 2 ਘੰਟੇ ਚੱਲੀਆਂ ਉਕਤ ਦੌੜਾਂ ਵਿਚ ਦੋ ਦਰਜਨ ਤੋਂ ਵਧੇਰੇ ਨਿਹੰਗ ਸਿੰਘਾਂ ਨੇ ਜੰਗਜੂ ਕਰਤੱਵ ਦਿਖਾਏ ਤੇ ਬੋਲੇ ਸੋ ਨਿਹਾਲ ਦੇ ਜੈਕਾਰਿਆਂ ਨਾਲ ਚੜਦੀ ਕਲਾ ਦਾ ਸੁਨੇਹਾ ਦਿੱਤਾ। ਮਿਸਲ ਸ਼ਹੀਦਾਂ ਪੰਥ ਅਕਾਲੀ ਤਰਨਾ ਦਲ ਦੇ ਜਥੇਦਾਰ ਬਾਬਾ ਨਿਹਾਲ ਸਿੰਘ ਹਰੀਆਂ ਵੇਲਾਂ ਵੱਲੋਂ ਜਥੇ: ਗੁਰਪ੍ਰੀਤ ਸਿੰਘ ਦੀ ਅਗਵਾਈ ਹੇਠ ਉਕਤ ਦੌੜਾਂ ਮੇਲੇ ਵਿਚ ਪਹੁੰਚੇ ਘੋੜ ਸਵਾਰ ਸਿੰਘਾਂ ਨੂੰ ਬਾਬਾ ਸਵਰਨ ਸਿੰਘ ਕਾਰ ਸੇਵਾ ਵਾਲਿਆਂ ਵੱਲੋਂ 5100 ਰੁਪਏ ਦੀ ਨਗਦੀ ਦੇ ਕੇ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਗਿਆ।
ਇਸ ਮੌਕੇ ਮਾ: ਜਸਵਿੰਦਰ ਸਿੰਘ ਮੀਰਪੁਰ, ਕਸ਼ਮੀਰ ਸਿੰਘ ਬੜਵਾ, ਨੰਬਰਦਾਰ ਗੁਰਚੇਤ ਸਿੰਘ ਸ਼ਾਹਪੁਰ ਬੇਲਾ ਤੇ ਪਰਮਜੀਤ ਸਿੰਘ ਗੁੱਡ ਫਾਈਟਰ ਆਦਿ ਵਿਸ਼ੇਸ਼ ਰੂਪ ਵਿਚ ਮੌਜੂਦ ਸਨ।