ਕੀ ਹੈ ਬੀਬੀ ਜਾਗੀਰ ਕੌਰ ਦੀ ਧੀ ਦਾ ਕਤਲ ਕਾਂਡ

ਕੈਬਨਿਟ ਮੰਤਰੀ ਬੀਬੀ ਜਾਗੀਰ ਕੌਰ ਦੀ 19 ਸਾਲ ਧੀ ਹਰਪ੍ਰੀਤ ਕੌਰ 20-21 ਅਪ੍ਰੈਲ 2000 ਦੀ ਰਾਤ ਨੂੰ ਜਦੋਂ ਉਹ ਫਗਵਾੜਾ ਤੋਂ ਲੁਧਿਆਣਾ ਦੇ ਰਸਤੇ ਵਿਚ ਸੀ, ਦੀ ਭੇਦ-ਭਰੀ ਹਾਲਤਾਂ 'ਚ ਮੌਤ ਹੋ ਗਈ ਸੀ। ਉਸ ਸਮੇਂ ਉਹ ਕ੍ਰਿਸ਼ਚਨ ਮੈਡੀਕਲ ਕਾਲਜ ਐਂਡ ਹਸਪਤਾਲ ਜਾ ਰਹੀ ਸੀ। ਇਸ ਤੋਂ ਬਾਅਦ 21 ਅਪ੍ਰੈਲ 2000 ਨੂੰ ਉਸ ਨੂੰ ਪਿੰਡ ਬੇਗੋਵਾਲ ਵਿਖੇ ਹੀ ਹਰਪ੍ਰੀਤ ਕੌਰ ਦਾ ਸਸਕਾਰ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਪਿੰਡ ਬੇਗੋਵਾਲ ਦੇ ਰਹਿਣ ਵਾਲੇ ਕਮਲਜੀਤ ਸਿੰਘ ਨਾਮ ਦੇ ਨੌਜਵਾਨ ਨੇ ਇਹ ਦਾਅਵਾ ਕੀਤਾ ਕਿ ਹਰਪ੍ਰੀਤ ਕੌਰ ਉਸ ਦੀ ਪਤਨੀ ਸੀ ਤੇ ਉਸ ਇਸ ਦੀ ਸੀ. ਬੀ. ਆਈ. ਜਾਂਚ ਦੀ ਮੰਗ ਕਰਦੇ ਹੋਏ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦਾ ਦਰਵਾਜ਼ਾ ਖੜਕਾਇਆ। 9 ਜੂਨ 2000 ਨੂੰ ਮਾਣਯੋਗ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਨੇ ਇਸ ਮਾਮਲੇ ਦੀ ਜਾਂਚ ਸੀ. ਬੀ. ਆਈ. ਨੂੰ ਕਰਨ ਲਈ ਕਿਹਾ। ਇਸ ਦੌਰਾਨ ਕਮਲਜੀਤ ਨੇ ਕੁਝ ਵੀਡੀਓ, ਉਨ੍ਹਾਂ ਦੀਆਂ ਮੰਗਣੀ ਦੀਆਂ ਫੋਟੋਆਂ ਤੇ ਕੁਝ ਹੋਰ ਸਬੂਤ ਸੀ. ਬੀ. ਆਈ. ਨੂੰ ਸੌਂਪੇ। ਸਬੂਤ ਮਿਲਣ ਤੋਂ ਬਾਅਦ 3 ਅਕਤੂਬਰ 2000 ਨੂੰ ਸੀ. ਬੀ. ਆਈ. ਨੇ ਸਬੂਤਾਂ ਦੇ ਆਧਾਰ 'ਤੇ ਬੀਬੀ ਜਾਗੀਰ ਕੌਰ ਤੇ ਛੇ ਹੋਰਾਂ 'ਤੇ ਇੰਡੀਅਨ ਪਿਨਲ ਕੋਡ ਦੀਆਂ ਵੱਖ-ਵੱਖ ਧਾਰਾਵਾਂ ਦੇ ਤਹਿਤ ਮਾਮਲਾ ਦਰਜ ਕਰ ਲਿਆ।
ਕੇਸ ਰਜਿਸਟਰ ਕਰਨ ਦੇ ਦੋ ਦਿਨ ਬਾਅਦ ਹੀ ਸੀ. ਬੀ. ਆਈ. ਨੇ ਬੀਬੀ ਜਾਗੀਰ ਕੌਰ ਦੀ ਨਜ਼ਦੀਕੀ ਦਲਵਿੰਦਰ ਕੌਰ ਤੇ ਪਰਮਜੀਤ ਸਿੰਘ ਰਾਏਪੁਰ ਨੂੰ ਹਰਪ੍ਰੀਤ ਕੌਰ ਦੀ ਇੱਛਾ ਦੇ ਵਿਰੁੱਧ ਗਰਭਪਾਤ ਕਰਵਾਉਣ ਤੇ ਮੌਤ ਦੇ ਸਬੂਤਾਂ ਨੂੰ ਮਿਟਾਉਣ ਦੇ ਦੋਸ਼ ਤਹਿਤ ਗ੍ਰਿਫਤਾਰ ਕਰ ਲਿਆ।
ਇਸ ਦੇ ਨਾਲ ਹੀ ਡਰਾਈਵਰ ਹਰਮਿੰਦਰ ਸਿੰਘ, ਘਰੇਲੂ ਨੌਕਰਾਣੀ ਸਤਿਆ ਤੇ ਬੀਬੀ ਜਾਗੀਰ ਕੌਰ ਦੇ ਨਿੱਜੀ ਸਕਿਓਰਿਟੀ ਅਫਸਰ ਸਬ-ਇੰਸਪੈਕਟਰ ਨਿਸ਼ਾਨ ਸਿੰਘ ਦੇ ਖਿਲਾਫ ਵੀ. ਸੀ. ਬੀ. ਆਈ. ਨੇ ਮਾਮਲਾ ਦਰਜ ਕਰ ਲਿਆ। ਹੁਣ ਤਕ ਚੱਲੇ ਇਸ ਕੇਸ ਵਿਚ 100 ਤੋਂ ਜ਼ਿਆਦਾ ਗਵਾਹ ਭੁਗਤੇ। ਇਥੋਂ ਤਕ ਕਿ ਪਿਛਲੇ 12 ਸਾਲਾਂ ਤੋਂ ਚਲੇ ਆ ਰਹੇ ਇਸ ਕੋਰਟ ਟਰਾਇਲ ਵਿਚ 10 ਗਵਾਹਾਂ ਦੀ ਮੌਤ ਵੀ ਹੋ ਗਈ।
ਕੇਸ 'ਚ ਆਏ ਕਈ ਉਤਾਰ-ਚੜਾਅ
ਪੰਜਾਬ ਦੇ ਇਸ ਹਾਈ ਪ੍ਰੋਫਾਈਲ ਕੇਸ 'ਚ ਕਈ ਉਤਾਰ ਚੜਾਅ ਆਏ। ਜਿਸ 'ਚ ਸਭ ਤੋਂ ਜ਼ਿਆਦਾ ਟਰਨ ਮੁੱਖ ਸ਼ਿਕਾਇਤ ਕਰਤਾ ਕਮਲਜੀਤ ਨੇ ਲਏ। ਕਮਲਜੀਤ ਸਿੰਘ ਨੇ 25 ਫਰਵਰੀ 2010 ਨੂੰ ਆਪਣੇ ਪੁਰਾਣੇ ਬਿਆਨਾਂ ਤੋਂ ਮੁਕਰ ਕੇ ਮਾਮਲੇ ਨੂੰ ਨਵੀਂ ਹੀ ਦਿਸ਼ਾ ਦੇ ਦਿੱਤੀ ਸੀ। ਸਾਰੇ ਉਸ ਸਮੇਂ ਹੈਰਾਨ ਹੋਏ ਜਦ ਕਮਲਜੀਤ 21 ਮਾਰਚ 2011 ਨੂੰ ਉਹ ਫਿਰ ਆਪਣੀ 25 ਫਰਵਰੀ ਦੇ ਬਿਆਨ ਤੋਂ ਪਲਟ ਕੇ ਪੁਰਾਣੇ ਬਿਆਨ 'ਤੇ ਆ ਗਿਆ। ਕਮਲਜੀਤ ਸਿੰਘ ਨੇ ਕਈ ਵਾਰ ਆਪਣੇ ਆਪ ਨੂੰ ਜਾਨ ਤੋਂ ਖਤਰਾ ਦੱਸਿਆ। ਇਸ ਤਰ੍ਹਾਂ ਇਹ ਕੇਸ ਕਈ ਉਤਾਰ-ਚੜਾਵਾਂ 'ਚੋਂ ਲੰਘਿਆ।
ਧੀ ਦੀ ਮੌਤ ਨੇ ਕੀਤਾ ਦੋ ਵਾਰ ਸੱਤਾ ਤੋਂ ਬਾਹਰ
ਬੀਬੀ ਜਾਗੀਰ ਕੌਰ ਦੇ ਲਈ ਧੀ ਹਰਪ੍ਰੀਤ ਕੌਰ ਦੀ ਮੌਤ ਕਾਫੀ ਜ਼ਿਆਦਾ ਨੁਕਸਾਨਦਾਇਕ ਸਾਬਤ ਹੋ ਰਹੀ ਹੈ। ਧੀ ਹਰਪ੍ਰੀਤ ਦੀ ਮੌਤ ਤੋਂ ਬਾਅਦ ਨੇ ਬੀਬੀ ਜਾਗੀਰ ਕੌਰ ਨੂੰ ਦੋ ਵਾਰ ਸੱਤਾ ਤੋਂ ਬਾਹਰ ਕਰ ਦਿੱਤਾ। ਪਹਿਲਾਂ ਜਦੋਂ ਹਰਪ੍ਰੀਤ ਕੌਰ ਦੀ ਮੌਤ ਹੋਈ ਸੀ ਤਾਂ ਬੀਬੀ ਜਾਗੀਰ ਕੌਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਪ੍ਰਧਾਨ ਸੀ ਤੇ ਉਦੋਂ ਚਾਰਜ ਸ਼ੀਟ ਹੋਣ ਦੇ ਕਾਰਨ ਬੀਬੀ ਨੂੰ ਸੱਤਾ ਤੋਂ ਬਾਹਰ ਹੋਣਾ ਪਿਆ ਸੀ। ਉਸ ਤੋਂ ਬਾਅਦ ਬੀਬੀ ਜਾਗੀਰ ਕੌਰ ਨੂੰ ਸੱਤਾ ਦਾ ਸੁੱਖ ਨਸੀਬ ਨਹੀਂ ਹੋਇਆ। ਲਗਭਗ 12 ਸਾਲ ਬਾਅਦ ਬੀਬੀ ਨੂੰ ਫਿਰ ਨਵੀਂ ਬਣੀ ਅਕਾਲੀ-ਭਾਜਪਾ ਸਰਕਾਰ ਦੀ ਕੈਬਨਿਟ ਵਿਚ ਸ਼ਾਮਲ ਕੀਤਾ ਗਿਆ ਸੀ, ਜਿੱਥੇ ਸਿਰਫ 17 ਦਿਨਾਂ ਬਾਅਦ ਹੀ ਉਨ੍ਹਾਂ ਨੂੰ ਮੰਤਰੀ ਦੀ ਕੁਰਸੀ ਤੋਂ ਤਿਆਗ ਪੱਤਰ ਦੇਣਾ ਪਿਆ। ਇਸ ਵਾਰ ਧੀ ਹਰਪ੍ਰੀਤ ਕੌਰ ਦੀ ਮੌਤ ਦੇ ਆਏ ਫੈਸਲੇ ਵਿਚ ਬੀਬੀ ਜਾਗੀਰ ਕੌਰ ਨੂੰ ਦੋਸ਼ੀ ਪਾਇਆ ਗਿਆ ਹੈ।

ਡਾਂਸ ਬਾਰ ਦੇ ਨਾਂ ਹੇਠ ਜਿਸਮਫਰੋਸ਼ੀ ਦਾ ਧੰਦਾ, 22 ਗ੍ਰਿਫਤਾਰ

ਮੁੰਬਈ- ਮੁੰਬਈ ਪੁਲਸ ਨੇ ਇਕ ਬਾਰ 'ਤੇ ਛਾਪਾ ਮਾਰ ਕੇ 8 ਬਾਰ ਬਾਲਾਵਾਂ ਸਣੇ 22 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਮੁੰਬਈ ਪੁਲਸ ਨੇ ਪਾਸ਼ ਇਲਾਕਾ ਮੰਨੇ ਜਾਣ ਵਾਲੇ ਕੋਲਾਬਾ 'ਚ ਇਕ ਬਾਰ 'ਤੇ ਛਾਪਾ ਮਾਰ ਕੇ 8 ਬਾਰ ਬਾਲਾਵਾਂ ਸਣੇ 22 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਛਾਪੇਮਾਰੀ ਮੁੰਬਈ ਪੁਲਸ ਦੀ ਸਪੈਸ਼ਲ ਸਕੁਆਰਡ ਨੇ ਕੀਤੀ।
ਪੁਲਸ ਦੀ ਗ੍ਰਿਫਤ 'ਚ ਆਈਆਂ ਬਾਰ ਬਾਲਾਵਾਂ 'ਚ ਚਾਰ ਜਰਮਨੀ ਦੀਆਂ ਹਨ। ਇਨ੍ਹਾਂ ਨੂੰ ਪ੍ਰੀਵੇਸ਼ਨ ਆਫ ਟ੍ਰੈਫਕਿੰਗ ਐਕਟ ਤਹਿਤ ਗ੍ਰਿਫਤਾਰ ਕੀਤਾ ਹੈ। ਬਾਰ 'ਤੇ ਛਾਪੇਮਾਰੀ ਦੌਰਾਨ ਲੱਖਾਂ ਰੁਪਏ ਨਕਦ ਮਿਲੇ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਬਾਰ ਦੀ  ਆੜ ਹੇਠ ਇਥੇ ਜਿਸਮਫਰੋਸੀ ਦਾ ਧੰਦਾ ਚਲਾਇਆ ਜਾ ਰਿਹਾ ਸੀ।
ਮੁੰਬਈ ਪੁਲਸ ਇਸ ਨੂੰ ਆਪਣੀ ਵੱਡੀ ਸਫਲਤਾ ਮੰਨ ਰਹੀ ਹੈ। ਉਧਰ ਇਸ ਗ੍ਰਿਫਤਾਰੀ ਤੋਂ ਬਾਅਦ ਇਹ ਖੁੱਲ ਕੇ ਸਾਹਮਣੇ ਆਇਆ ਹੈ ਕਿ ਮੁੰਬਈ 'ਚ ਤਮਾਮ ਪਾਬੰਦੀਆਂ ਦੇ ਬਾਵਜੂਦ ਨਾ ਸਿਰਫ ਨਾਜਾਇਜ਼ ਡਾਂਸ ਬਾਰ ਚੱਲ ਰਹੇ ਹਨ ਸਗੋਂ ਇਨ੍ਹਾਂ ਡਾਂਸ ਬਾਰਾਂ 'ਚ  ਜਿਸਮਫਰੋਸ਼ੀ ਦਾ ਧੰਦਾ ਵੀ ਚਲਾਇਆ ਜਾ ਰਿਹਾ ਹੈ।

ਜੇਲ 'ਚ ਪੁੱਜੀ ਬੀਬੀ ਦੇ ਪੈਰੀਂ ਪਏ ਵੱਡੇ ਅਫਸਰ

ਕਪੂਰਥਲਾ— ਹਰਪ੍ਰੀਤ ਕੌਰ ਦੀ ਸ਼ੱਕੀ ਮੌਤ ਦੇ ਮਾਮਲੇ 'ਚ ਸਜ਼ਾਜਾਬਤਾ ਪੰਜਾਬ ਦੀ ਸਾਬਕਾ ਕੈਬਨਿਟ ਮੰਤਰੀ ਬੀਬੀ ਜਗੀਰ ਕੌਰ ਕਾਨੂੰਨ ਦੀ ਨਜ਼ਰ 'ਚ ਭਾਵੇਂ ਹੀ ਸਜ਼ਾ ਜ਼ਾਬਤਾ ਹੋਵੇ ਪਰ ਲੱਗਦਾ ਹੈ ਕਿ ਕਾਨੂੰਨ ਦਾ ਪਾਲਣ ਕਰਾਉਣ ਵਾਲੇ ਉਨ੍ਹਾਂ ਨੂੰ ਅਦਾਲਤ ਦੇ ਫੈਸਲੇ ਤੋਂ ਬਾਅਦ ਵੀ ਅਪਰਾਧੀ ਨਹੀਂ ਮੰਨਦੇ।
ਬੀਬੀ ਜਗੀਰ ਕੌਰ ਨੂੰ ਸ਼ੁੱਕਰਵਾਰ ਨੂੰ ਪਟਿਆਲਾ ਜੇਲ ਤੋਂ ਕਪੂਰਥਲਾ ਜੇਲ ਸ਼ਿਫਟ ਕੀਤਾ ਗਿਆ। ਬੀਬੀ ਜਗੀਰ ਕੌਰ ਆਪਣੀ ਪ੍ਰਾਈਵੇਟ ਗੱਡੀ 'ਚ ਕਪੂਰਥਲਾ ਜੇਲ ਪੁੱਜੀ। ਕਪੂਰਥਲਾ ਜੇਲ ਪੁੱਜਦੇ ਹੀ ਜੇਲ 'ਚ ਡਿਊਟੀ 'ਤੇ ਮੌਜੂਦ ਪੁਲਸਕਰਮੀਆਂ 'ਚ ਉਨ੍ਹਾਂ ਦੇ ਪੈਰ ਫੜਨ ਦੀ ਧੱਕਾਮੁੱਕੀ ਸ਼ੁਰੂ ਹੋ ਗਈ। ਵਰਦੀ 'ਚ ਹੋਣ ਦੇ ਬਾਵਜੂਦ ਇਹ ਪੁਲਸ ਵਾਲੇ ਇਹ ਭੁੱਲ ਗਏ ਕਿ ਉਹ ਇਸ ਸਮੇਂ ਡਿਊਟੀ 'ਤੇ ਹਨ ਅਤੇ ਬੀਬੀ ਜਗੀਰ ਕੌਰ ਕੈਦੀ ਦੀ ਹੈਸੀਅਤ ਨਾਲ ਜੇਲ 'ਚ ਪਹੁੰਚੀ ਹੈ। ਦੋ ਪੁਲਸਕਰਮੀਆਂ ਤੋਂ ਇਲਾਵਾ ਇਕ ਡਾਕਟਰ ਨੇ ਵੀ ਬੀਬੀ ਦੇ ਪੈਰ ਫੜੇ।
ਜ਼ਿਕਰਯੋਗ ਹੈ ਕਿ ਪੰਜਾਬ ਸਰਕਾਰ 'ਚ ਕੈਬਨਿਟ ਮੰਤਰੀ ਰਹੀ ਅਤੇ ਐਸ. ਜੀ. ਪੀ. ਸੀ. ਦੀ ਸਾਬਕਾ ਪ੍ਰਧਾਨ ਬੀਬੀ ਜਗੀਰ ਕੌਰ ਨੂੰ ਪਟਿਆਲਾ ਦੀ ਸੀ. ਬੀ. ਆਈ. ਅਦਾਲਤ ਨੇ ਸ਼ੁੱਕਰਵਾਰ ਨੂੰ ਹੀ 5 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਸੀ। ਬੀਬੀ ਜਗੌਰ ਕੌਰ ਨੂੰ ਆਪਣੀ ਹੀ ਬੇਟੀ ਹਰਪ੍ਰੀਤ ਕੌਰ ਦੇ ਅਗਵਾ, ਜ਼ਬਰਦਸਤੀ ਗਰਭਪਾਤ ਅਤੇ ਅਪਰਾਧਿਕ ਸਾਜਿਸ਼ ਰਚਣ ਦਾ ਦੋਸ਼ੀ ਪਾਇਆ ਗਿਆ।

ਸ਼ਿਵਾਲਿਕ ਪਹਾੜੀਆਂ ਨੂੰ ਪੱਧਰਾ ਕਰਨ ਦਾ ਗੈਰਕਾਨੂੰਨੀ ਸਿਲਸਿਲਾ ਜਾਰੀ

 ਧਨਾਢ ਵਿਅਕਤੀ ਨਹੀਂ ਕਰ ਰਹੇ ਕਾਨੂੰਨਾਂ ਦੀ ਪ੍ਰਵਾਹ
ਕੁਦਰਤੀ ਸੋਮਿਆਂ ਨਾਲ ਛੇੜਛਾੜ

ਨੂਰਪੁਰ ਬੇਦੀ, 31 ਮਾਰਚ- ਰੂਪਨਗਰ ਜ਼ਿਲ੍ਹੇ ਦੇ ਘਾੜ ਇਲਾਕੇ ’ਚ ਪੈਂਦੀਆਂ ਸ਼ਿਵਾਲਿਕ ਪਹਾੜੀਆਂ ਨੂੰ ਗੈਰ-ਕਾਨੂੰਨੀ ਢੰਗ ਨਾਲ ਕੱਟ ਕੇ ਪੱਧਰਾ ਕੀਤਾ ਜਾ ਰਿਹਾ ਹੈ। ਇਹ ਸਿਲਸਿਲਾ ਬੇਰੋਕ ਜਾਰੀ ਹੈ। ਇਨ੍ਹਾਂ ਪਹਾੜੀਆਂ ਨਾਲ ਛੇੜਛਾੜ ਵੀ ਧਨਾਢ ਲੋਕਾਂ ਵੱਲੋਂ ਕੀਤੀ ਜਾ ਰਹੀ ਹੈ।
ਪਹਾੜੀਆਂ ਨੂੰ ਕੱਟਣ ਦਾ ਸਿਲਸਿਲਾ ਲਗਪਗ 15 ਸਾਲ ਪਹਿਲਾਂ ਨੂਰਪੁਰ ਬੇਦੀ ਨਜ਼ਦੀਕ ਪੈਂਦੇ ਇਕ ਪਿੰਡ ਦੀ ਹੱਦ-ਬਸਤ ਵਿੱਚ ਕੀਤਾ ਗਿਆ ਸੀ। ਉਥੇ ਇਕ ਰਿਜ਼ੌਰਟ ਦੀ ਉਸਾਰੀ ਕੀਤੀ ਗਈ ਸੀ। ਜੰਗਲਾਤ ਵਿਭਾਗ ਦੀ ਦਫ਼ਾ 4 ਤੇ 5 ਤਹਿਤ ਅਜਿਹਾ ਕਰਨ ਦੀ ਮੁਕੰਮਲ ਤੌਰ ’ਤੇ ਮਨਾਹੀ ਹੈ। ਇਹ ਵੀ ਪਤਾ ਲੱਗਾ ਹੈ ਕਿ ਇਸ ਦੇ ਮਾਲਕ ਦਾ ਕੇਂਦਰ ਸਰਕਾਰ ਵਿੱਚ ਚੰਗਾ ਅਸਰ ਰਸੂਖ ਹੈ। ਉਸ ਵੱਲੋਂ ਅੱਜ ਵੀ ਨਾਜਾਇਜ਼ ਤੌਰ ’ਤੇ ਸ਼ਿਵਾਲਿਕ ਪਹਾੜੀਆਂ ਨੂੰ ਕੱਟ ਕੇ ਪੱਧਰਾ ਬਣਾਇਆ ਜਾ ਰਿਹਾ ਹੈ। ਉਸ ਥਾਂ ’ਤੇ ਉਸਾਰੀਆਂ ਵੀ ਕੀਤੀਆਂ ਜਾ ਰਹੀਆਂ ਹਨ। ਪਿੰਡ ਵਾਸੀਆਂ ਨੇ ਨਾਜਾਇਜ਼ ਕੰਮਾਂ ਸਬੰਧੀ ਜੰਗਲਾਤ ਵਿਭਾਗ ਨੂੰ ਕਈ ਵਾਰ ਸ਼ਿਕਾਇਤਾਂ ਕੀਤੀਆਂ ਹਨ, ਪਰ ਇੰਜ ਲਗਦਾ ਹੈ ਕਿ ਸਬੰਧਤ ਵਿਭਾਗ ਰਿਜ਼ੌਰਟ ਮਾਲਕ ਅੱਗੇ ਬੇਵੱਸ ਹੈ। ਭਾਵੇਂ ਜੰਗਲਾਤ ਵਿਭਾਗ ਵੱਲੋਂ ਰਿਜ਼ੌਰਟ ਮਾਲਕ ਨੂੰ ਉਸ ਦੇ ਨਾਜਾਇਜ਼ ਕੰਮਾਂ ਸਬੰਧੀ ਕਈ ਵਾਰ ਨੋਟਿਸ ਭੇਜੇ ਗਏ, ਪਰ ਉਸ ਦਾ ‘ਗੋਰਖਧੰਦਾ’ ਬੰਦ ਨਹੀਂ ਹੋਇਆ। ਰੂਪਨਗਰ-ਹੁਸ਼ਿਆਰਪੁਰ ਤੇ ਨਵਾਂ ਸ਼ਹਿਰ ਜ਼ਿਲ੍ਹਿਆਂ ਦੀਆਂ ਹੱਦਾਂ ’ਤੇ ਸ਼ਿਵਾਲਿਕ ਪਹਾੜੀਆਂ ਨੂੰ ਢਾਹ ਕੇ ਇਕ ਪ੍ਰਾਈਵੇਟ ਕਾਲਜ ਦੀ ਉਸਾਰੀ ਸਬੰਧਤ ਵਿਭਾਗ ਦੇ ਕਾਨੂੰਨਾਂ ਨੂੰ ਛਿੱਕੇ ਟੰਗ ਕੇ ਕੀਤੀ ਗਈ। ਇਸ ਦੇ ਬਾਵਜੂਦ ਵਿਭਾਗ ਵੱਲੋਂ ਕਾਲਜ ਦੀ ਪ੍ਰਬੰਧਕ ਕਮੇਟੀ ਖਿਲਾਫ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਪਿੰਡ ਕਲਵਾਂ ਦੇ ਛਿਪਦੇ ਪਾਸੇ ਵੱਲ ਸ਼ਿਵਾਲਿਕ ਦੀਆਂ ਪਹਾੜੀਆਂ ਨੂੰ ਕੱਟ ਕੇ ਪੱਧਰਾ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਪਹਾੜੀਆਂ ਨੂੰ ਕੱਟ ਕੇ ਪੱਧਰਾ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਪਹਾੜੀਆਂ ਨੂੰ ਪਹਿਲਾਂ ਹੀ ਢਾਹ-ਢੇਰੀ ਕੀਤਾ ਗਿਆ ਹੈ। ਉਹ ਵੀ ਵਿਭਾਗ ਦੀ ਦਫ਼ਾ 4 ਅਤੇ 5 ਵਿੱਚ ਦੱਸਿਆ ਗਈਆਂ ਹਨ। ਲਗਪਗ 5 ਏਕੜ ਵਿੱਚ ਜੇ.ਸੀ. ਬੀ. ਅਤੇ ਬੁਲਡੋਜ਼ਰ ਲਾ ਕੇ ਪਹਾੜੀਆਂ ਨੂੰ ਢਾਹਿਆ ਗਿਆ ਹੈ। ਭਾਵੇਂ ਜੰਗਲਾਤ ਵਿਭਾਗ ਵੱਲੋਂ ਦਫ਼ਾ 4 ਅਤੇ 5 ਵਿੱਚ ਪੈਂਦੇ ਰਕਬੇ ਵਿੱਚ ਕੰਮ ਬੰਦ ਕਰਨ ਦੇ ਹੁਕਮ ਦਿੱਤੇ ਗਏ ਹਨ, ਪਰ ਉਸ ਵੱਲੋਂ ਵੀ ਇਹ ਵਰਤਾਰਾ ਲਗਪਗ ਜਾਰੀ ਹੈ। ਨੂਰਪੁਰ ਬੇਦੀ ਤੋਂ ਰੂਪਨਗਰ ਮੁੱਖ ਸੜਕ ’ਤੇ ਪੈਂਦੀਆਂ ਪਹਾੜੀਆਂ ਨੂੰ ਕੱਟ ਕੇ ਢਾਬੇ ਉਸਾਰੇ ਗਏ ਹਨ।
ਖੇੜਾ ਕਲਮੋਟ ਵਿਖੇ ਪਹਾੜੀਆਂ ’ਚ ਲੱਗੇ ਦਰਜਨਾਂ ਸਟੋਨ ਕਰੈਸ਼ਰਾਂ ਵੱਲੋਂ ਬਹੁਤ ਸਾਰੀਆਂ ਪਹਾੜੀਆਂ ਦਾ ਨਾਮੋਨਿਸ਼ਾਨ ਮਿਟਾ ਦਿੱਤਾ ਗਿਆ ਹੈ। ਭਾਵੇਂ ਇਹ ਰਕਬਾ ਦਫ਼ਾ 4 ਅਤੇ 5 ਤੋਂ ਬਾਹਰ ਦੱਸਿਆ ਗਿਆ ਹੈ, ਪਰ ਜੰਗਲਾਤ ਵਿਭਾਗ ਦੇ ਕਾਨੂੰਨ ਅਨੁਸਾਰ ਕੁਦਰਤੀ ਬਣੀਆਂ ਪਹਾੜੀਆਂ ਨਾਲ ਛੇੜਛਾੜ ਨਹੀਂ ਕੀਤੀ ਜਾ ਸਕਦੀ। ਖੇੜਾ ਕਲਮੋਟ ਦੇ ਵਣ ਵਿੱਚ ਜੇ ਕੰਮ ਇਸੇ ਤਰ੍ਹਾਂ ਚੱਲਦਾ ਰਿਹਾ ਤਾਂ ਪਹਾੜ ਖਤਮ ਹੋ ਜਾਣਗੇ। ਇਸ ਪੱਟੀ ਵਿੱਚ ਸਟੋਨ ਕਰੈਸ਼ਰ ਦਾ ਲੱਗਣਾ ਲਗਾਤਾਰ ਜਾਰੀ ਹੈ। ਪਿੰਡ ਪਲਾਟ ਦੀ ਦਫ਼ਾ 4 ਅਤੇ 5 ਵਿੱਚ ਨਾਜਾਇਜ਼ ਤੌਰ ’ਤੇ ਕਰੈਸ਼ਰ ਲਗਾਏ ਗਏ ਹਨ। ਜੰਗਲਾਤ ਵਿਭਾਗ ਕਾਰਵਾਈ ਕਰਨ ਦੀ ਬਜਾਏ ਮੂਕ-ਦਰਸ਼ਕ ਬਣ ਕੇ ਇਨ੍ਹਾਂ ਨਾਜਾਇਜ਼ ਪਹਾੜਾਂ ਦੀ ਢਹਿ-ਢੇਰੀ ਨੂੰ ਦੇਖ ਰਿਹਾ ਹੈ। ਜੋ ਪਹਾੜਾਂ ਨੂੰ ਢਹਿ-ਢੇਰੀ ਕਰਨ ਵਾਲੇ ਹਨ ਉਨ੍ਹਾਂ ਦਾ ਮੌਜੂਦਾ ਸਰਕਾਰ ਵਿੱਚ ਕਾਫੀ ਦਬਦਬਾ ਹੈ ਤੇ ਜੰਗਲਾਤ ਵਿਭਾਗ ਦੇ ਅਧਿਕਾਰੀ ਉਨ੍ਹਾਂ ਵਿਰੁੱਧ ਕਾਰਵਾਈ ਕਰਕੇ ਕਿਸੇ ਜੋਖਮ ’ਚ ਨਹੀਂ ਪੈਣਾ ਚਾਹੁੰਦੇ। ਜੇ ਨਾਜਾਇਜ਼ ਪੁਟਾਈ ਨੂੰ ਬੰਦ ਨਾ ਕੀਤਾ ਗਿਆ ਤਾਂ ਜੰਗਲੀ ਜੀਵ ਤੇ ਜਾਨਵਰ ਅਤੇ ਲੱਕੜ ਦਾ ਨਾਮੋਨਿਸ਼ਾਨ ਮਿਟ ਜਾਵੇਗਾ। ਜੰਗਲਾਤ ਵਿਭਾਗ ਦੇ ਜ਼ਿਲ੍ਹਾ ਅਫਸਰ ਨਾਲ ਇਨ੍ਹਾਂ ਪਹਾੜੀਆਂ ਦੀਆਂ ਨਾਜਾਇਜ਼ ਕੱਟਾਈ ਬਾਰੇ ਪ੍ਰਤੀਕਰਮ ਪੁੱਛਿਆ ਤਾਂ ਉਹ ਤਸੱਲੀਬਖਸ਼ ਜਵਾਬ ਨਹੀਂ ਦੇ ਸਕੇ। ਉਨ੍ਹਾਂ ਸਿਰਫ ਇੰਨਾ ਹੀ ਕਿਹਾ ਕਿ ਸਾਡੇ ਵਿਭਾਗ ’ਚ ਕਈ ਥਾਂ ਖੁੱਲ੍ਹਾ ਤੇ ਕਈ ਥਾਂ ਬੰਦ ਰਕਬਾ ਹੁੰਦਾ ਹੈ। ਜਦੋਂ ਗੈਰ-ਕਾਨੂੰਨੀ ਤੌਰ ’ਤੇ ਪਹਾੜੀਆਂ ਕੱਟ ਕੇ ਪੱਧਰਾ ਕਰਨ ਦਾ ਮਾਮਲਾ ਧਿਆਨ ਵਿੱਚ ਲਿਆਂਦਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਉਸ ਥਾਂ ਦੀ ਨਿਸ਼ਾਨਦੇਹੀ ਕੀਤੀ ਗਈ ਹੈ, ਜਿਹੜਾ ਰਕਬਾ 4 ਅਤੇ 5 ਵਿੱਚ ਆਉਂਦਾ ਹੈ, ਉਸ ਦੀ ਪੁਟਾਈ ਮੁਕੰਮਲ ਤੌਰ ’ਤੇ ਬੰਦ ਕਰਵਾ ਦਿੱਤੀ ਗਈ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਜੇ ਨਾਜਾਇਜ਼ ਧੰਦੇ ਇਸ ਤਰ੍ਹਾਂ ਚਲਦੇ ਰਹੇ ਤਾਂ ਸ਼ਿਵਾਲਿਕ ਦੀਆਂ ਪਹਾੜੀਆਂ ਖਤਮ ਹੋ ਜਾਣਗੀਆਂ। ਉਨ੍ਹਾਂ ਪੰਜਾਬ ਸਰਕਾਰ ਤੇ ਸਬੰਧਤ ਵਿਭਾਗ ਦੇ ਉੱਚ-ਅਧਿਕਾਰੀਆਂ ਨੂੰ ਕਿਹਾ ਕਿ ਕਥਿਤ ਦੋਸ਼ੀਆਂ ਖਿਲਾਫ ਕਾਰਵਾਈ ਕਰਕੇ ਸ਼ਿਵਾਲਿਕ ਦੀਆਂ ਪਹਾੜੀਆਂ ਨੂੰ ਕੱਟਣੋਂ ਬਚਾਇਆ ਜਾਵੇ।

ਦੂਜੇ ਦਿਨ ਵੀ ਜਾਰੀ ਰਿਹਾ ਕਰਫ਼ਿਊ

ਕਰਫਿਊ ਦੇ ਦੂਸਰੇ ਦਿਨ ਗੁਰਦਾਸਪੁਰ ਸ਼ਹਿਰ ਅੰਦਰ ਸੁੰਨਸਾਨ ਸੜਕਾਂ 'ਤੇ ਘੁੰਮ ਰਹੇ
ਬੀ.ਐਸ.ਐਫ. ਦੇ ਜਵਾਨ।

ਗੁਰਦਾਸਪੁਰ, 31 ਮਾਰਚ -ਗੁਰਦਾਸਪੁਰ ਸ਼ਹਿਰ ਅੰਦਰ ਅੱਜ ਦੂਸਰੇ ਦਿਨ ਵੀ ਲਗਾਤਾਰ ਕਰਫਿਊ ਜਾਰੀ ਰਿਹਾ ਅਤੇ ਅੱਜ ਸ਼ਹਿਰ ਅੰਦਰ ਥਾਂ-ਥਾਂ 'ਤੇ ਤਾਇਨਾਤ ਕੀਤੇ ਪੁਲਿਸ ਮੁਲਾਜ਼ਮਾਂ ਵੱਲੋਂ ਇਸ ਕਰਫਿਊ ਨੂੰ ਕੱਲ੍ਹ ਦੇ ਮੁਕਾਬਲੇ ਕਾਫ਼ੀ ਸਖ਼ਤੀ ਨਾਲ ਲਾਗੂ ਕੀਤਾ ਗਿਆ। ਇੱਥੇ ਹੀ ਬੱਸ ਨਹੀਂ ਪ੍ਰਸ਼ਾਸਨ ਵੱਲੋਂ ਕਿਸੇ ਵੀ ਤਰ੍ਹਾਂ ਦੀ ਸਥਿਤੀ ਨਾਲ ਨਿਪਟਣ ਲਈ ਅੱਜ ਸ਼ਹਿਰ ਅੰਦਰ ਵਿਸ਼ੇਸ਼ ਤੌਰ 'ਤੇ ਬੀ. ਐਸ. ਐਫ. ਦੇ ਜਵਾਨ ਵੀ ਤਾਇਨਾਤ ਕੀਤੇ ਹੋਏ ਸਨ। ਸਵੇਰ ਤੋਂ ਹੀ ਗੁਰਦਾਸਪੁਰ ਸ਼ਹਿਰ ਨੂੰ ਆਉਂਦੇ ਸਾਰੇ ਰਸਤਿਆਂ 'ਤੇ ਵੱਡੀ ਗਿਣਤੀ ਵਿਚ ਪੁਲਿਸ ਅਤੇ ਬੀ. ਐਸ. ਐਫ. ਦੇ ਤਾਇਨਾਤ ਕੀਤੇ ਜਵਾਨਾਂ ਵੱਲੋਂ ਸਾਰਾ ਦਿਨ ਚਿੜੀ ਤੱਕ ਵੀ ਨਹੀਂ ਫੜਕਣ ਦਿੱਤੀ ਗਈ। ਇਹ ਕਰਫਿਊ ਅੱਜ ਇੰਨਾ ਜ਼ਬਰਦਸਤ ਰਿਹਾ ਕਿ ਪ੍ਰਿੰਟ ਤੇ ਬਿਜਲਈ ਮੀਡੀਆ ਨਾਲ ਜੁੜੇ ਪੱਤਰਕਾਰਾਂ ਨੂੰ ਵੀ ਪੁਲਿਸ ਵੱਲੋਂ ਸ਼ਹਿਰ ਅੰਦਰ ਦਾਖਲ ਹੋਣ ਦੀ ਇਜਾਜ਼ਤ ਨਹੀਂ ਸੀ ਦਿੱਤੀ ਜਾ ਰਹੀ। ਜ਼ਿਕਰਯੋਗ ਹੈ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਮੀਡੀਆ ਨਾਲ ਜੁੜੇ ਪੱਤਰਕਾਰਾਂ ਨੂੰ ਕਰਫਿਊ ਦੌਰਾਨ ਰਿਪੋਟਿੰਗ ਕਰਨ ਲਈ ਕਿਸੇ ਤਰ੍ਹਾਂ ਦੇ ਕੋਈ ਪਾਸ ਜਾਰੀ ਨਹੀਂ ਸੀ ਕੀਤੇ ਗਏ। ਇਸ ਸਬੰਧ ਵਿਚ ਸ਼ਹਿਰ ਤੋਂ ਬਾਹਰਵਾਰ ਰੁਕੇ ਮੀਡੀਆ ਨਾਲ ਜੁੜੇ ਪੱਤਰਕਾਰਾਂ ਵੱਲੋਂ ਜਦੋਂ ਗੁਰਦਾਸਪੁਰ ਦੇ ਲੋਕ ਸੰਪਰਕ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ ਗਿਆ ਤਾਂ ਇਸ ਸਬੰਧ ਵਿਚ ਉਨ੍ਹਾਂ ਨੇ ਵੀ ਆਪਣੀ ਬੇਵਸੀ ਹੀ ਪ੍ਰਗਟ ਕੀਤੀ। ਗੁਰਦਾਸਪੁਰ ਸ਼ਹਿਰ ਅੰਦਰ ਲਗਾਤਾਰ ਦੂਸਰੇ ਦਿਨ ਕਰਫਿਊ ਰਹਿਣ ਕਾਰਨ ਲੋਕਾਂ ਨੂੰ ਖਾਣ-ਪੀਣ ਦੀਆਂ ਚੀਜ਼ਾਂ ਦੇ ਸਬੰਧ ਵਿਚ ਕਈ ਤਰ੍ਹਾਂ ਦੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਤੋਂ ਇਲਾਵਾ ਗੁਰਦਾਸਪੁਰ ਸ਼ਹਿਰ ਨਾਲ ਸਬੰਧਿਤ ਬਾਹਰਲੇ ਸ਼ਹਿਰਾਂ ਵਿਚ ਨੌਕਰੀ ਕਰਦੇ ਸਰਕਾਰੀ ਮੁਲਾਜ਼ਮਾਂ ਨੂੰ ਕਰਫਿਊ ਕਾਰਨ ਆਪਣੀਆਂ ਨੌਕਰੀਆਂ 'ਤੇ ਪੁੱਜਣ ਵਿਚ ਵੀ ਕਈ ਤਰ੍ਹਾਂ ਦੀਆਂ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਿਆ। ਇੱਥੋਂ ਤੱਕ ਕਿ ਗੁਰਦਾਸਪੁਰ ਸ਼ਹਿਰ ਅੰਦਰ ਰਹਿ ਰਹੇ ਸਰਕਾਰੀ ਮੁਲਾਜ਼ਮ ਨੂੰ ਵੀ ਆਪਣੇ ਦਫ਼ਤਰਾਂ ਤੱਕ ਪੁੱਜਣ ਦੀ ਇਜਾਜ਼ਤ ਨਹੀਂ ਸੀ ਦਿੱਤੀ ਜਾ ਰਹੀ।

ਆਖਿਰ ਕਦੋਂ ਸੁਧਰੇਗੀ ਸ਼ਹਿਰ ਦੀ ਟ੍ਰੈਫਿਕ ਸਮੱਸਿਆ?

ਗੁਰਦਾਸਪੁਰ ਸ਼ਹਿਰ ਦੀ ਇੱਕ ਸੜਕ ਤੋਂ 3 ਨੌਜਵਾਨ ਦੋ ਪਹੀਆ ਵਾਹਨ 'ਤੇ ਸਵਾਰ
ਹੋ ਕੇ ਜਾਂਦੇ ਹੋਏ।

ਗੁਰਦਾਸਪੁਰ-31 ਮਾਰਚ ਗੁਰਦਾਸਪੁਰ ਸ਼ਹਿਰ ਅੰਦਰ ਸ਼ਰੇਆਮ ਨਿੱਤ ਟ੍ਰੈਫ਼ਿਕ ਨਿਯਮਾਂ ਦੀਆਂ ਧੱਜੀਆਂ ਉਡਾਈਆਂ ਜਾਂਦੀਆਂ ਹਨ। ਪਰ ਟ੍ਰੈਫ਼ਿਕ ਪੁਲਿਸ ਮੂਕ ਦਰਸ਼ਕ ਬਣ ਕੇ ਇਹ ਸਾਰਾ ਤਮਾਸ਼ਾ ਦੇਖਦੀ ਰਹਿੰਦੀ ਹੈ। ਆਮ ਤੌਰ 'ਤੇ ਤਾਂ ਗੁਰਦਾਸਪੁਰ ਸ਼ਹਿਰ ਦੇ ਵੱਖ-ਵੱਖ ਚੌਕਾਂ 'ਚ ਟ੍ਰੈਫ਼ਿਕ ਪੁਲਿਸ ਦੇ ਕਰਮਚਾਰੀ ਕਦੇ-ਕਦੇ ਹੀ ਦਿਖਾਈ ਦਿੰਦੇ ਹਨ ਪਰ ਜਦੋਂ ਕਦੇ ਟ੍ਰੈਫ਼ਿਕ ਪੁਲਿਸ ਕਰਮਚਾਰੀ ਦਿਖਾਈ ਦਿੰਦੇ ਹਨ ਤਾਂ ਉਨ੍ਹਾਂ ਵੱਲੋਂ ਚੌਕਾਂ 'ਚ ਟ੍ਰੈਫ਼ਿਕ ਦੀ ਆਵਾਜਾਈ ਨੂੰ ਸੁਚਾਰੂ ਰੂਪ ਵਿਚ ਚਲਾਉਣ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾਂਦਾ। ਜਾਣਕਾਰੀ ਅਨੁਸਾਰ ਕਈ ਸਾਲ ਪਹਿਲਾਂ ਗੁਰਦਾਸਪੁਰ ਪੁਲਿਸ ਵੱਲੋਂ ਗੁਰਦਾਸਪੁਰ ਸ਼ਹਿਰ ਦੇ ਐਨ ਵਿਚਕਾਰ ਪੈਂਦੇ ਡਾਕਖਾਨਾ ਚੌਕ ਵਿਚ ਬਕਾਇਦਾ ਲਾਈਟਾਂ ਵੀ ਲਗਾਈਆਂ ਗਈਆਂ ਸਨ। ਪਰ ਕਾਫ਼ੀ ਮਹੀਨਿਆਂ ਤੋਂ ਇਹ ਲਾਈਟਾਂ ਖ਼ਰਾਬ ਹੀ ਪਈਆਂ ਹਨ ਤੇ ਇਨ੍ਹਾਂ ਦੀ ਮੁਰੰਮਤ ਵੱਲ ਕਦੇ ਕੋਈ ਧਿਆਨ ਨਹੀਂ ਦਿੱਤਾ ਜਾਂਦਾ। ਜੀ. ਟੀ. ਰੋਡ 'ਤੇ ਸਥਿਤ ਇਸ ਡਾਕਖਾਨਾ ਚੌਕ 'ਚ ਅਕਸਰ ਹੀ ਆਵਾਜਾਈ ਪ੍ਰਭਾਵਿਤ ਰਹਿੰਦੀ ਹੈ। ਇਸ ਚੌਕ ਵਿਚੋਂ ਇਕ ਸੜਕ ਅੰਮ੍ਰਿਤਸਰ ਤੇ ਦੂਸਰੇ ਪਾਸੇ ਦੀ ਸੜਕ ਪਠਾਨਕੋਟ ਨੂੰ ਜਾਂਦੀ ਹੈ। ਜਦੋਂ ਕਿ ਇਕ ਸੜਕ ਭੀੜ-ਭੜੱਕੇ ਵਾਲੇ ਸਦਰ ਬਾਜ਼ਾਰ ਤੇ ਉਸ ਦੇ ਸਾਹਮਣੇ ਵਾਲੀ ਸੜਕ ਜੇਲ੍ਹ ਰੋਡ ਨੂੰ ਜਾਂਦੀ ਹੈ। ਇਸ ਚੌਕ 'ਚ ਆਮ ਤੌਰ 'ਤੇ ਟ੍ਰੈਫ਼ਿਕ ਪੁਲਿਸ ਦੇ ਕਰਮਚਾਰੀ ਚੌਕ ਦੇ ਐਨ ਵਿਚਕਾਰ ਬਣੇ ਗੋਲੇ 'ਚ ਖੜਨ ਦੀ ਬਜਾਏ ਕਿਨਾਰਿਆਂ 'ਤੇ ਇਕ ਪਾਸੇ ਖੜ੍ਹੇ ਦੇਖੇ ਜਾ ਸਕਦੇ ਹਨ। ਇਸੇ ਤਰ੍ਹਾਂ ਦਾ ਹਾਲ ਗੁਰਦਾਸਪੁਰ ਸ਼ਹਿਰ ਦੇ ਹੋਰ ਚੌਕਾਂ ਦਾ ਬਣਿਆ ਰਹਿੰਦਾ ਹੈ। ਇੱਥੇ ਜ਼ਿਕਰਯੋਗ ਹੈ ਕਿ ਟ੍ਰੈਫ਼ਿਕ ਪੁਲਿਸ ਵੱਲੋਂ ਕੁਝ ਮਹੀਨੇ ਪਹਿਲਾਂ ਸ਼ਹਿਰ ਅੰਦਰ ਚਾਰ ਪਹੀਆ ਵਾਹਨਾਂ ਦੇ ਜਾਣ 'ਤੇ ਪਾਬੰਦੀ ਲਗਾਈ ਗਈ ਸੀ। ਇਸ ਨੂੰ ਅਮਲੀ ਰੂਪ ਦੇਣ ਲਈ ਸਬੰਧਿਤ ਥਾਵਾਂ 'ਤੇ ਬਕਾਇਦਾ ਬੈਰੀਗੇਡ ਵੀ ਲਗਾਏ ਸਨ ਤਾਂ ਜੋ ਉਸ ਤੋਂ ਅਗਾਂਹ ਚਾਰ ਪਹੀਆ ਵਾਹਨ ਬਾਜ਼ਾਰਾਂ ਵਿਚ ਜਾ ਹੀ ਨਾ ਸਕਣ। ਪਰ ਪਿਛਲੇ ਕਈ ਮਹੀਨਿਆਂ ਤੋਂ ਕਾਰਾਂ, ਜੀਪਾਂ ਵੱਲੋਂ ਇਨ੍ਹਾਂ ਬੈਰੀਗੇਡਾਂ ਦੀ ਕੋਈ ਪ੍ਰਵਾਹ ਨਹੀਂ ਕੀਤੀ ਜਾ ਰਹੀ ਤੇ ਉਹ ਆਪਣੇ ਇਹ ਵਾਹਨ ਭੀੜ-ਭੜੱਕੇ ਵਾਲੇ ਬਾਜ਼ਾਰਾਂ ਵਿਚ ਲਿਜਾ ਕੇ ਦੁਕਾਨਾਂ ਮੂਹਰੇ ਕਰ ਦਿੰਦੇ ਹਨ। ਟ੍ਰੈਫ਼ਿਕ ਪੁਲਿਸ ਵੱਲੋਂ ਲਾਇਬ੍ਰੇਰੀ ਚੌਕ ਦੇ ਨਜ਼ਦੀਕ ਪਾਰਕਿੰਗ ਵਾਸਤੇ ਬਕਾਇਦਾ ਇਕ ਜਗ੍ਹਾ ਵੀ ਨਿਸ਼ਚਿਤ ਕੀਤੀ ਹੋਈ ਹੈ ਪਰ ਇਸ ਕਾਰ ਪਾਰਕਿੰਗ 'ਚ ਬਹੁਤ ਘੱਟ ਲੋਕਾਂ ਵੱਲੋਂ ਆਪਣੇ ਵਾਹਨ ਖੜ੍ਹੇ ਕੀਤੇ ਜਾਂਦੇ ਹਨ। ਇਸ ਤੋਂ ਇਲਾਵਾ ਗੁਰਦਾਸਪੁਰ ਸ਼ਹਿਰ ਅੰਦਰ ਅਕਸਰ ਹੀ 3-3 ਨੌਜਵਾਨ ਇਕ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਸਾਰਾ ਦਿਨ ਸੜਕਾਂ 'ਤੇ ਫਿਰਦੇ ਹਨ। ਇੱਥੋਂ ਤੱਕ ਕਿ ਇਨ੍ਹਾਂ ਨੌਜਵਾਨਾਂ ਵੱਲੋਂ ਆਪਣੇ ਮੋਟਰਸਾਈਕਲਾਂ 'ਤੇ ਬਹੁਤ ਹੀ ਡਰਾਉਣੇ ਕਿਸਮ ਦੇ ਹਾਰਨ ਲਗਾਏ ਹੁੰਦੇ ਹਨ। ਅਜਿਹਾ ਨਜ਼ਾਰਾ ਆਮ ਤੌਰ 'ਤੇ ਸ਼ਾਮ ਸਮੇਂ ਡੀ. ਸੀ. ਗੁਰਦਾਸਪੁਰ ਦੀ ਰਿਹਾਇਸ਼ ਦੇ ਨਜ਼ਦੀਕ ਫਿਸ਼ ਪਾਰਕ ਸਾਹਮਣੇ ਦੇਖਿਆ ਜਾ ਸਕਦਾ ਹੈ।

'ਪੁਤਲਿਆਂ ਦਾ ਸ਼ਮਸ਼ਾਨਘਾਟ' ਬਣ ਚੁੱਕਾ ਹੈ ਅੰਮ੍ਰਿਤਸਰ ਦਾ ਹਾਲ ਗੇਟ ਚੌਕ

ਹਾਲ ਗੇਟ ਚੌਕ ਅੰਮ੍ਰਿਤਸਰ ਵਿਖੇ ਪੁਤਲਾ ਅਗਨ ਭੇਟ ਕਰਦੇ ਹੋਏ ਪ੍ਰਦਰਸ਼ਨਕਾਰੀ। (ਸੱਜੇ) ਇੱਕ ਰੋਸ ਪ੍ਰਦਰਸ਼ਨ ਦਾ ਦ੍ਰਿਸ਼।

ਅੰਮ੍ਰਿਤਸਰ 31 ਮਾਰਚ-ਪੁਰਾਣੇ ਅੰਮ੍ਰਿਤਸਰ ਸ਼ਹਿਰ ਵਿਚ ਦਾਖਲ ਹੋਣ ਲਈ ਪ੍ਰਮੁੱਖ ਵਪਾਰਕ ਕੇਂਦਰ ਹਾਲ ਬਾਜਾਰ ਦੇ ਬਾਹਰ ਬਣਿਆਂ 'ਹਾਲ ਗੇਟ', ਜਿਸ ਨੂੰ ਸੰਨ੍ਹ '47 ਤੋਂ ਬਾਦ ਗਾਂਧੀ ਗੇਟ ਦਾ ਨਾਂ ਦਿੱਤਾ ਗਿਆ, ਇੱਕ ਤਰ੍ਹਾਂ ਨਾਲ ਸ਼ਹਿਰ ਦਾ ਮੁੱਖ ਪ੍ਰਵੇਸ਼ ਦੁਆਰ ਹੈ। ਪਰ ਪਿਛਲੇ ਕਈ ਦਹਾਕਿਆਂ ਤੋਂ ਇਹ ਹਾਲ ਗੇਟ ਦਰਵਾਜ਼ਾ ਅਤੇ ਚੌਕ ਜਲਸੇ- ਮੁਜ਼ਾਹਰਿਆਂ ਤੇ ਹੜਤਾਲਾਂ ਦਾ ਮੁੱਖ ਕੇਂਦਰ ਬਣਨ ਦੇ ਨਾਲ ਨਾਲ ਵੱਖ ਵੱਖ ਪਾਰਟੀਆਂ ਦੇ ਆਗੂਆਂ ਦੇ ਪੁਤਲਿਆਂ ਦਾ ਸ਼ਮਸ਼ਾਨਘਾਟ ਬਣ ਚੁੱਕਾ ਹੈ। ਹਾਲ ਗੇਟ ਦੇ ਇਤਿਹਾਸਕ ਪੱਖ 'ਤੇ ਝਾਤ ਮਾਰਿਆਂ ਪਤਾ ਲੱਗਦਾ ਹੈ ਕਿ ਸੰਨ੍ਹ 1876 ਵਿਚ ਅੰਮ੍ਰਿਤਸਰ ਦੇ ਉਸ ਸਮੇਂ ਦੇ ਅੰਗਰੇਜ਼ ਡਿਪਟੀ ਕਮਿਸ਼ਨਰ ਕਰਨਲ ਸੀ.ਐੱਚ. ਹਾਲ ਵਲੋਂ ਆਪਣੇ ਨਾਂ 'ਤੇ ਇਹ ਗੇਟ ਤਿਆਰ ਕਰਵਾਇਆ ਗਿਆ ਸੀ, ਇਸ ਦੇ ਉਪਰ ਲੱਗੀ ਘੜੀ ਅਤੇ ਇਮਾਰਤ ਦਾ ਡਿਜ਼ਾਇਨ ਇੰਜੀਨੀਅਰ ਜਾਨ ਗਾਰਡਨ ਵੱਲੋਂ ਸੰਨ੍ਹ 1873-74 'ਚ ਤਿਆਰ ਕੀਤਾ ਗਿਆ ਸੀ। ਦਰਵਾਜ਼ਾ ਬਨਣ ਤੋਂ ਪਹਿਲਾਂ ਇਥੇ ਪੁਰਾਣੀ ਦੀਵਾਰ ਦਾ ਬੁਰਜ ਹੁੰਦਾ ਸੀ। ਦੇਸ ਦੀ ਅਜ਼ਾਦੀ ਤੋਂ ਬਾਦ ਇਸ ਦੇ ਦਰਵਾਜ਼ੇ ਉੱਪਰ ਇਸ ਦਾ ਨਵਾਂ ਨਾਮ 'ਗਾਂਧੀ ਦਰਵਾਜ਼ਾ' ਉੱਕਰ ਦਿੱਤਾ ਗਿਆ, ਪਰ ਸ਼ਹਿਰ ਵਾਸੀ ਇਸ ਨੂੰ ਅਜੇ ਵੀ ਗਾਂਧੀ ਗੇਟ ਵਜੋਂ ਘੱਟ ਤੇ ਅੰਗਰੇਜ਼ ਡੀ.ਸੀ. ਦੇ ਨਾਮ 'ਹਾਲ ਗੇਟ' ਦੇ ਨਾਂ ਨਾਲ ਜ਼ਿਆਦਾ ਜਾਣਦੇ ਹਨ। ਅੱਜ ਕੱਲ ਇਹ ਗੇਟ ਸ਼ਹਿਰ ਵਿੱਚ ਹੁੰਦੇ ਜਲਸੇ ਜਲੂਸਾਂ ਦੇ ਮੁੱਖ ਕੇਂਦਰ ਅਤੇ ਪੁਤਲੇ ਸਾੜ ਕੇ ਨਾਅਰੇਬਾਜ਼ੀ ਕਰਨ ਦਾ ਪ੍ਰਮੁੱਖ ਕੇਂਦਰ ਬਣ ਚੁੱਕਾ ਹੈ। ਆਏ ਦਿਨ ਕਿਸੇ ਨਾ ਕਿਸੇ ਪਾਰਟੀ ਜਾਂ ਉਸ ਨਾਲ ਸਬੰਧਤ ਕਿਸੇ ਆਗੂ ਦੇ ਪੁਤਲੇ ਇਸ ਚੌਕ ਵਿੱਚ ਅਗਨ ਭੇਟ ਕੀਤੇ ਜਾਂਦੇ ਹਨ। ਇਸ ਗੇਟ ਦੀ ਵਰਤੋਂ ਰੋਜ਼ਾਨਾਂ ਲੱਖਾਂ ਸ਼ਹਿਰ ਵਾਸੀ ਤੇ ਦੇਸੀ-ਵਿਦੇਸ਼ੀ ਸੈਲਾਨੀ ਸ੍ਰੀ ਦਰਬਾਰ ਸਾਹਿਬ ਦੇ ਦਰਸ਼ਨਾਂ ਲਈ ਜਾਣ ਅਤੇ ਪੁਰਾਣੇ ਚਾਰਦੀਵਾਰੀ ਵਾਲੇ ਅੰਮ੍ਰਿਤਸਰ ਸ਼ਹਿਰ ਵਿੱਚ ਦਾਖਲ ਹੋਣ ਲਈ ਕਰਦੇ ਹਨ। ਇਸ ਚੌਕ ਵਿੱਚ ਪੁਤਲੇ ਸਾੜਣ ਸਮੇਂ ਹੁੰਦੀ ਨਾਅਰੇਬਾਜ਼ੀ ਕਾਰਣ ਲੰਬੇ ਲੰਬੇ ਜਾਮ ਲੱਗ ਜਾਂਦੇ ਹਨ, ਜਿਸ ਕਾਰਣ ਜਾਮ ਵਿੱਚ ਫਸਣ ਕਰਕੇ ਸਥਾਨਕ ਲੋਕਾਂ ਦੇ ਨਾਲ ਨਾਲ ਗੂਰੂ ਨਗਰੀ ਦੀ ਯਾਤਰਾ ਤੇ ਆਏ ਸੈਲਾਨੀਆਂ ਨੂੰ ਵੀ ਪ੍ਰੇਸ਼ਾਨ ਹੋਣਾ ਪੈਂਦਾ ਹੈ। ਸ਼ਹਿਰ ਵਿੱਚ ਕਿਸੇ ਵੀ ਧਾਰਮਿਕ, ਸਮਾਜਿਕ ਜਾਂ ਰਾਜਨੀਤਕ ਪਾਰਟੀ ਜਾਂ ਫਿਰ ਕਿਸੇ ਮੁਲਾਜ਼ਮ ਜਥੇਬੰਦੀ ਵੱਲੋਂ ਰੋਸ ਪ੍ਰਦਰਸ਼ਨ, ਹੜਤਾਲ ਜਾਂ ਬੰਦ ਦਾ ਸੱਦਾ ਹੋਵੇ, ਇਸ ਦਾ ਪ੍ਰਮੁੱਖ ਕੇਂਦਰ ਹਾਲ ਗੇਟ ਹੀ ਬਣਦਾ ਹੈ। ਹਾਲ ਬਾਜ਼ਾਰ ਅਤੇ ਹਾਲ ਗੇਟ ਨੇੜੇ ਕੁੱਝ ਅਖਬਾਰਾਂ ਦੇ ਦਫਤਰ ਹੋਣ ਕਾਰਣ ਵੀ ਪ੍ਰਦਰਸ਼ਨਕਾਰੀ ਪੁਤਲੇ ਅਗਨ ਭੇਟ ਕਰਨ ਲਈ ਇਸ ਸਥਾਨ ਦੀ ਚੋਣ ਕਰਨ ਨੂੰ ਤਰਜੀਹ ਦਿੰਦੇ ਹਨ। ਇਸ ਗੇਟ ਦੇ ਨੇੜੇ ਬਕਾਇਦਾ ਪੁਲਿਸ ਚੌਕੀ ਵੀ ਬਣੀ ਹੋਈ ਹੈ, ਪਰ ਪੁਲਿਸ ਕਰਮੀ ਤੇ ਅਧਿਕਾਰੀ ਪ੍ਰਦਰਸ਼ਨਕਾਰੀਆਂ ਨੂੰ ਪੁਤਲੇ ਸਾੜਨ ਜਾਂ ਆਵਾਜਾਈ ਨੂੰ ਪ੍ਰਭਾਵਿਤ ਕਰਨ ਤੋਂ ਰੋਕਣ ਦੀ ਥਾਂ, ਮੂਕ ਦਰਸ਼ਕ ਬਣਕੇ ਖੜੇ ਰਹਿੰਦੇ ਹਨ। ਇਸ ਚੌਕ ਵਿੱਚ ਜਾਮ ਲੱਗਣ ਕਾਰਣ ਤੇ ਆਵਾਜਾਈ ਬੰਦ ਹੋ ਜਾਣ ਕਾਰਣ ਹਾਲ ਬਾਜਾਰ ਦੇ ਦੁਕਾਨਦਾਰਾਂ ਦਾ ਕੰਮਕਾਜ ਵੀ ਪ੍ਰਭਾਵਿਤ ਹੁੰਦਾ ਹੈ। ਹਾਲ ਬਾਜਾਰ ਦੇ ਕੁੱਝ ਦੁਕਾਨਦਾਰਾਂ ਤੇ ਸ਼ਹਿਰ ਵਾਸੀਆਂ ਨੇ ਅਜੀਤ ਪ੍ਰਤੀਨਿਧ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਜ਼ਿਲ੍ਹਾ ਤੇ ਪੁਲਿਸ ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਉਹ ਨਵੀਂ ਦਿੱਲੀ ਜਾਂ ਚੰਡੀਗੜ੍ਹ ਵਾਂਗ ਪੁਤਲੇ ਸਾੜਨ ਅਤੇ ਰੋਸ ਪ੍ਰਦਰਸ਼ਨ ਕਰਨ ਵਾਲਿਆਂ ਲਈ ਹਾਲ ਗੇਟ ਦੀ ਥਾਂ ਸ਼ਹਿਰ ਵਿੱਚ ਕੋਈ ਹੋਰ ਸੜਕ ਜਾਂ ਚੌਕ ਅਲਾਟ ਕਰੇ ਤਾਂ ਕਿ ਪੁਰਾਣੇ ਤੇ ਨਵੇਂ ਸ਼ਹਿਰ ਨੂੰ ਜੋੜਨ ਵਾਲੇ ਹਾਲ ਗੇਟ ਚੌਕ ਵਿਖੇ ਨਿਤਦਿਨ ਸੜਦੇ ਪੁਤਲਿਆਂ ਅਤੇ ਹੁੰਦੇ ਰੋਸ ਪ੍ਰਦਰਸ਼ਨਾਂ ਕਾਰਣ ਲੋਕਾਂ ਨੂੰ ਹੁੰਦੀ ਪ੍ਰੇਸ਼ਾਨੀ ਤੋਂ ਨਿਜ਼ਾਤ ਮਿਲ ਸਕੇ।

ਪੁਲਿਸ ਕਮਿਸ਼ਨਰ ਦੇ ਰੀਡਰ ਦੇ ਘਰ ਲੁੱਟ-ਖੋਹ

ਪੁਲਿਸ ਇੰਸਪੈਕਟਰ ਦੇ ਘਰ ਹੋਈ ਲੁੱਟ ਖੋਹ ਉਪਰੰਤ ਸੀ. ਆਈ. ਏ. ਸਟਾਫ਼ ਦੇ ਇੰਚਾਰਜ
ਸ੍ਰੀ ਵਿਕਰਮ ਸ਼ਰਮਾ ਇੰਸਪੈਕਟਰ ਜਾਂਚ ਕਰਦੇ ਹੋਏ। 

ਅੰਮ੍ਰਿਤਸਰ, 31 ਮਾਰਚ -ਸ਼ਹਿਰ 'ਚ ਲੁਟੇਰਿਆਂ ਦੇ ਹੌਂਸਲੇ ਇੰਨ੍ਹੇ ਬੁਲੰਦ ਹੋ ਚੁੱਕੇ ਹਨ ਕਿ ਹੁਣ ਉਨ੍ਹਾਂ ਨੇ ਪੁਲਿਸ ਮੁਲਾਜ਼ਮਾਂ ਨੂੰ ਵੀ ਨਿਸ਼ਾਨਾ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ, ਜਿਸ ਤਾਜ਼ਾ ਮਿਸਾਲ ਅੱਜ ਪੁਲਿਸ ਕਮਿਸ਼ਨਰ ਦੇ ਰੀਡਰ ਦੇ ਘਰ ਬਿਜਲੀ ਮੁਲਾਜ਼ਮਾਂ ਦੇ ਭੇਸ 'ਚ ਦਾਖਲ ਹੋਏ ਲੁਟੇਰਿਆਂ ਵੱਲੋਂ ਲੁੱਟ-ਖੋਹ ਕੀਤੇ ਜਾਣ ਦੀ ਹੈ। ਲੁਟੇਰਿਆਂ ਵੱਲੋਂ ਜਿੱਥੇ ਘਰ ਦੀ ਸੇਫ਼ 'ਚ ਪਏ 25 ਹਜ਼ਾਰ ਦੀ ਨਗਦੀ ਤੇ ਤਿੰਨ ਤੋਲੇ ਸੋਨੇ ਦੇ ਗਹਿਣ ਲੁੱਟ ਲਏ, ਉੱਥੇ ਪੁਲਿਸ ਇੰਸਪੈਕਟਰ ਦੀ ਪਤਨੀ ਨੂੰ ਵੀ ਸੱਟਾਂ ਲਾ ਕੇ ਜਖ਼ਮੀ ਕਰ ਦਿੱਤਾ ਗਿਆ ਜੋ ਇਸ ਵੇਲੇ ਨਿੱਜੀ ਹਸਪਤਾਲ 'ਚ ਜ਼ੇਰੇ ਇਲਾਜ਼ ਹੈ। ਇਹ ਘਟਨਾ ਅੱਜ ਦੁਪਿਹਰ ਵੇਲੇ ਸਥਾਨਕ ਲੁਹਾਰਕਾ ਰੋਡ ਰਣਜੀਤ ਐਵੀਨਿਊ ਵਿਖੇ ਵਾਪਰੀ ਜਦੋਂ ਕਿ ਬੀਬੀ ਗੁਰਮਿੰਦਰ ਕੌਰ ਪਤਨੀ ਸ: ਸੁਰਜੀਤ ਸਿੰਘ 'ਬਾਬਾ' ਘਰ 'ਚ ਮੌਜ਼ੂਦ ਸਨ, ਕਿ ਤਿੰਨ ਵਿਅਕਤੀਆਂ ਨੇ ਆਪਣੇ ਆਪ ਨੂੰ ਬਿਜਲੀ ਮੁਲਾਜ਼ਮ ਦੱਸਕੇ ਘਰ 'ਚ ਦਾਖਲ ਹੋ ਗਏ ਅਤੇ ਉਕਤ ਕਾਰਵਾਈ ਨੂੰ ਅੰਜ਼ਾਮ ਦਿੱਤਾ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਸੀ. ਆਈ. ਏ. ਸਟਾਫ਼ ਦੇ ਇੰਚਾਰਜ ਇੰਸਪੈਕਟਰ ਵਿਕਰਮ ਸ਼ਰਮਾ, ਥਾਣਾ ਛਾਓਣੀ ਦੇ ਮੁੱਖੀ ਇੰਸਪੈਕਟਰ ਸੋਹਨ ਸਿੰਘ ਤੇ ਹੋਰ ਪੁਲਿਸ ਅਧਿਕਾਰੀ ਭਾਰੀ ਸੁਰੱਖਿਆ ਬੱਲਾਂ ਸਮੇਤ ਪੁੱਜ ਗਏ। ਥਾਣਾ ਛਾਓਣੀ ਦੇ ਮੁੱਖੀ ਸ: ਸੋਹਨ ਸਿੰਘ ਨੇ ਵਾਪਰੀ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਪੁਲਿਸ ਨੇ ਮਾਮਲਾ ਦਰਜ਼ ਕਰਕੇ ਲੁਟੇਰਿਆਂ ਦੀ ਭਾਲ ਜਾਰੀ ਕਰ ਦਿੱਤੀ ਹੈ

ਟਰਾਂਸਫ਼ਾਰਮਰ ਚੋਰੀ ਕਰਨ ਵਾਲੇ ਗਰੋਹ ਦੇ ਚਾਰ ਮੈਂਬਰ ਕਾਬੂ

ਗੁਰਾਇਆ ਪੁਲਿਸ ਟਰਾਂਸਫ਼ਾਰਮਰ ਚੋਰੀ ਕਰਨ ਵਾਲੇ ਗਰੋਹ ਦੇ ਮੈਂਬਰਾਂ ਨਾਲ ਉਨ੍ਹਾਂ ਕੋਲੋਂ ਬਰਾਮਦ ਮੋਟਰਸਾਈਕਲਾਂ, ਸਕੂਟਰਾਂ, ਤਾਂਬੇ ਦੀਆਂ ਤਾਰਾਂ ਤੇ ਹੋਰ ਸਮਾਨ ਨਾਲ।

ਗੁਰਾਇਆ-ਵਿਰਦੀ 31 ਮਾਰਚ  ਯੁਰਿੰਦਰ ਸਿੰਘ ਹੇਅਰ ਐੱਸ.ਐੱਸ.ਪੀ ਸਾਹਿਬ ਜਲੰਧਰ ਦਿਹਾਤੀ ਨੇ ਦੱਸਿਆ ਕਿ ਅਮਰਪ੍ਰੀਤ ਸਿੰਘ ਘੁੰਮਣ ਡੀ.ਐੱਸ.ਪੀ ਫਿਲੌਰ ਦੀ ਅਗਵਾਈ 'ਚ ਸਰਬਜੀਤ ਰਾਏ ਐੱਸ. ਐੱਚ.ਓ ਗੁਰਾਇਆ ਨੇ ਟਰਾਂਸਫ਼ਾਰਮਰ ਚੋਰੀ ਕਰਨ ਵਾਲੇ ਗਰੋਹ ਦੇ 4 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਨ੍ਹਾਂ ਨੇ ਫਿਲੌਰ ਅਤੇ ਨਕੋਦਰ ਸਬਡਵੀਜ਼ਨ ਵਿਚ 30 ਤੋਂ ਵੱਧ ਟਰਾਂਸਫ਼ਾਰਮਰ ਚੋਰੀ ਕਰਨ ਨੂੰ ਕਬੂਲਿਆ ਹੈ। ਉਨ੍ਹਾਂ ਦੱਸਿਆ ਕਿ ਐੱਸ.ਐੱਚ.ਓ ਗੁਰਾਇਆ ਅਤੇ ਅਮਰਜੀਤ ਸਿੰਘ ਚੌਂਕੀ ਇੰਚਾਰਜ ਰੁੜਕਾ ਕਲਾਂ ਨੂੰ ਸੂਚਨਾ ਮਿਲੀ ਕਿ ਜੀਵਨ ਲਾਲ ਪੁੱਤਰ ਨਸੀਬ ਚੰਦ ਵਾਸੀ ਪਿੰਡ ਮਨਸੂਰਪੁਰ, ਰਣਜੀਤ ਸਿੰਘ ਉਰਫ਼ ਜੀਤਾ ਪੁੱਤਰ ਜ਼ੈਲਾਂ ਰਾਮ ਵਾਸੀ ਕਮਾਲਪੁਰ, ਦੀਪਾ ਪੁੱਤਰ ਮੋਹਨ ਲਾਲ ਵਾਸੀ ਕਮਾਲਪੁਰ ਕਾਲੋਨੀ ਅਤੇ ਸੁਮਿਤ ਕੁਮਾਰ ਪੁੱਤਰ ਵਰਿੰਦਰ ਕੁਮਾਰ ਵਾਸੀ ਵਿਰਕਾਂ ਰਾਤ ਵੇਲੇ ਟਿਊਬਵਲਾਂ ਤੋਂ ਟਰਾਂਸਫ਼ਾਰਮਰ ਚੋਰੀ ਕਰਨ ਦਾ ਧੰਦਾ ਕਰਦੇ ਹਨ। ਪੁਲਿਸ ਨੇ ਮੁਖ਼ਬਰੀ ਦੇ ਆਧਾਰ 'ਤੇ ਛਾਪਾਮਾਰੀ ਕੀਤੀ ਅਤੇ ਚਾਰ ਵਿਅਕਤੀਆਂ ਨੂੰ ਕਾਬੂ ਕਰ ਲਿਆ। ਉਨ੍ਹਾਂ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਨ੍ਹਾਂ ਪਿੰਡ ਲੋਹਗੜ੍ਹ, ਕੰਗ ਜਗੀਰ, ਧੁਲੇਤਾ, ਫਿਲੌਰ, ਨੂਰਮਹਿਲ, ਫਲਪੋਤਾ, ਮੁਠੱਡਾ, ਅੱਟੀ, ਮਹਿਤਪੁਰ, ਨਕੋਦਰ, ਜੰਡਿਆਲਾ, ਸਮਰਾੜੀ, ਹਰੀਪੁਰ ਖ਼ਾਲਸਾ, ਭੋਗਪੁਰ ਅਤੇ ਗੁਰਾਇਆ ਇਲਾਕੇ ਵਿਚੋਂ ਅਨੇਕਾਂ ਬਿਜਲੀ ਟਰਾਂਸਫ਼ਾਰਮਰ ਚੋਰੀ ਕਰਕੇ ਸਾਰਾ ਸਮਾਨ ਜਲੰਧਰ ਵੇਚਿਆ ਹੈ। ਦੋਸ਼ੀਆਂ ਕੋਲੋਂ ਦੋ ਮੋਟਰਸਾਈਕਲ ਤੇ ਸਕੂਟਰ ਬਰਾਮਦ ਕੀਤੇ ਗਏ ਹਨ। ਇਹਨਾਂ ਪਾਸੋਂ ਦਾਤਰ, ਟਰਾਂਸਫ਼ਾਰਮਰ ਖੋਲ੍ਹਣ ਵਾਲੇ ਔਜ਼ਾਰ, ਚਾਬੀਆਂ ਚੋਰੀ ਕੀਤੀ ਗਈ ਤਾਰ, ਤਾਂਬਾ ਵੀ ਬਰਾਮਦ ਹੋਇਆ ਹੈ। ਵੱਖ-ਵੱਖ ਥਾਵਾਂ 'ਤੇ ਹੋਈਆ ਚੋਰੀਆਂ ਸਬੰਧੀ ਪਹਿਲਾ ਹੀ ਥਾਣਾ ਗੁਰਾਇਆ, ਫਿਲੌਰ ਅਤੇ ਨੂਰਮਹਿਲ 'ਚ ਮੁਕੱਦਮੇ ਦਰਜ ਹਨ।

873 ਲੀਟਰ ਨਾਜਾਇਜ਼ ਸਪਿਰਟ ਬਰਾਮਦ

ਫੜੀ ਗਈ ਸਪਿਰਟ ਨਾਲ ਪੁਲਿਸ ਪਾਰਟੀ।

ਜਲੰਧਰ 31 ਮਾਰਚ - ਥਾਣਾ ਭਾਰਗੋ ਕੈਂਪ ਦੀ ਪੁਲਿਸ ਨੇ ਤਿਲਕ ਨਗਰ 'ਚ ਨਾਜਾਇਜ਼ ਤੌਰ 'ਤੇ ਸਟਾਕ ਕਰਕੇ ਰੱਖੀ 873 ਲੀਟਰ ਸਪਿਰਟ ਬਰਾਮਦ ਕੀਤੀ ਹੈ। ਹਾਲਾਂਕਿ ਦੋਸ਼ੀ ਮੌਕੇ ਤੋਂ ਫਰਾਰ ਹੋਣ 'ਚ ਕਾਮਯਾਬ ਹੋ ਗਿਆ ਹੈ। ਦੋਸ਼ੀ ਦੀ ਪਹਿਚਾਣ ਪੁਲਿਸ ਨੇ ਇਬਰਾਹੀਮ ਮੁਹੰਮਦ ਵਾਸੀ ਤਿਲਕ ਨਗਰ ਦੇ ਰੂਪ 'ਚ ਹੋਈ ਹੈ। ਥਾਣਾ ਭਾਰਗੋ ਕੈਂਪ ਦੀ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਤਿਲਕ ਨਗਰ 'ਚ ਇਕ ਵਿਅਕਤੀ ਨੇ ਘਰ 'ਚ ਸਪਿਰਟ ਨਾਜਾਇਜ਼ ਤਰੀਕੇ ਨਾਲ ਸਟਾਕ ਕਰਕੇ ਰੱਖੀ ਹੈ, ਜਿਸ 'ਤੇ ਛਾਪਾਮਾਰੀ ਕਰਕੇ ਬਰਾਮਦ ਕਰ ਲਿਆ ਹੈ, ਪਰ ਦੋਸ਼ੀ ਇਬਰਾਹੀਮ ਫਰਾਰ ਹੋਣ 'ਚ ਸਫ਼ਲ ਹੋ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਬਸਤੀ ਖੇਤਰ 'ਚ ਨਾਜਾਇਜ਼ ਅਤੇ ਘਟੀਆ ਸ਼ਰਾਬ ਦਾ ਧੰਦਾ ਜ਼ੋਰਾਂ 'ਤੇ ਹੈ। ਜਿਥੇ ਤਸਕਰ ਸ਼ਰਾਬ 'ਚ ਸਪਿਰਟ ਮਿਲਾ ਕੇ ਬਾਜ਼ਾਰ 'ਚ ਵੇਚਦੇ ਹਨ।

ਦਿਨ-ਦਿਹਾੜੇ ਔਰਤ ਤੋਂ ਪਰਸ ਖੋਹਿਆ- ਇਕ ਕਾਬੂ, ਇਕ ਫ਼ਰਾਰ

ਪੁਲਿਸ ਦੇ ਸਾਹਮਣੇ ਹੀ ਕਾਬੂ ਕੀਤੇ ਲੁਟੇਰੇ ਦੀ ਛਿੱਤਰ ਪਰੇਡ ਕਰਦੇ ਲੋਕ।

ਚੁਗਿੱਟੀ/ਜੰਡੂਸਿੰਘਾ, 31 ਮਾਰਚ -ਅੱਜ ਬਾਅਦ ਦੁਪਹਿਰ ਸਥਾਨਕ ਕਾਜ਼ੀ ਮੰਡੀ ਦੇ ਨਾਲ ਲੱਗਦੇ ਮੁਹੱਲਾ ਦੌਲਤਪੁਰੀ ਦੀ ਇਕ ਗਲੀ 'ਚ ਦਿਨ-ਦਿਹਾੜੇ ਦੋ ਲੁਟੇਰਿਆਂ ਵੱਲੋਂ ਇਕ ਔਰਤ ਦਾ ਪਰਸ ਖੋਹ ਲਿਆ ਗਿਆ। ਘਟਨਾ ਸਬੰਧੀ ਪੀੜਤ ਔਰਤ ਨੇ ਦੱਸਿਆ ਕਿ ਦੁਪਹਿਰ ਵੇਲੇ ਉਹ ਆਪਣੇ 2 ਬੱਚਿਆਂ ਨਾਲ ਬਾਜ਼ਾਰ ਵੱਲ ਨੂੰ ਜਾ ਰਹੀ ਸੀ ਕਿ ਇਸੇ ਦੌਰਾਨ ਦੋ ਲੜਕੇ ਇਕ ਮੋਟਰਸਾਈਕਲ 'ਤੇ ਆਏ ਤੇ ਉਨ੍ਹਾਂ 'ਚੋਂ ਇਕ ਨੇ ਉਸ ਦਾ ਪਰਸ ਖੋਹ ਲਿਆ, ਜਿਸ 'ਤੇ ਉਸ ਨੇ ਰੌਲਾ ਪਾ ਕੇ ਲੋਕਾਂ ਨੂੰ ਦੱਸਿਆ। ਜਿਨ੍ਹਾਂ ਨੇ ਉਕਤ ਮੋਟਰਸਾਈਕਲ ਸਵਾਰਾਂ ਦਾ ਪਿੱਛਾ ਕਰਕੇ ਇਕ ਲੁਟੇਰੇ ਨੂੰ ਕਾਬੂ ਕਰ ਲਿਆ। ਜਦੋਂ ਕਿ ਮੋਟਰਸਾਈਕਲ ਚਲਾ ਰਿਹਾ ਲੁਟੇਰਾ ਮੋਟਰਸਾਈਕਲ ਛੱਡਕੇ ਫਰਾਰ ਹੋਣ 'ਚ ਸਫਲ ਹੋ ਗਿਆ। ਇਸ ਸਬੰਧੀ ਉਕਤ ਲੋਕਾਂ ਵੱਲੋਂ ਸੂਚਿਤ ਕੀਤੇ ਜਾਣ 'ਤੇ ਵੀ ਜਦੋਂ ਪੁਲਿਸ ਸਮੇਂ ਸਿਰ ਨਾ ਪਹੁੰਚੀ ਤਾਂ ਸਥਾਨਕ ਨਿਵਾਸੀਆਂ ਨੇ ਪੁਲਿਸ ਪ੍ਰਸ਼ਾਸਨ ਖਿਲਾਫ਼ ਰੋਸ ਪ੍ਰਦਰਸ਼ਨ ਕੀਤਾ। ਇਸ ਮੌਕੇ ਲੋਕਾਂ ਨੇ ਕਾਬੂ ਕੀਤੇ ਲੁਟੇਰੇ ਦੀ ਖੂਬ ਸੇਵਾ ਕੀਤੀ ਤੇ ਬਾਅਦ ਵਿਚ ਮੌਕੇ 'ਤੇ ਪਹੁੰਚੇ ਪੀ. ਸੀ. ਆਰ. ਮੁਲਾਜ਼ਮਾਂ ਦੇ ਜ਼ਰੀਏ ਉਕਤ ਲੁਟੇਰੇ ਨੂੰ ਸੂਰਿਆ ਇਨਕਲੇਵ ਚੌਕੀ 'ਚ ਪੇਸ਼ ਕਰ ਦਿੱਤਾ, ਉਧਰ ਲੋਕਾਂ ਮੁਤਾਬਿਕ ਕੁਝ ਹੀ ਦੂਰੀ 'ਤੇ ਖੋਹਿਆ ਗਿਆ ਪਰਸ ਵੀ ਪੁਲਿਸ ਨੂੰ ਮਿਲਿਆ। ਜਿਸ ਵਿਚੋਂ ਕਿ ਸਾਮਾਨ ਤੇ ਨਗਦੀ ਵਗੈਰਾ ਗਾਇਬ ਸੀ। ਜਾਣਕਾਰੀ ਅਨੁਸਾਰ ਇਸ ਸਬੰਧੀ ਪੁਲਿਸ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ।

ਜ਼ਮੀਨਾਂ ਦੇ ਰਜਿਸਟਰੀ ਰੇਟ ਵਧਣ ਦੇ ਡਰੋਂ ਤਹਿਸੀਲਾਂ 'ਚ ਭੀੜ ਵਧੀ

ਜਲੰਧਰ ਤਹਿਸੀਲ 'ਚ ਰਜਿਸਟਰੀਆਂ ਕਰਵਾਉਣ ਆਏ ਲੋਕਾਂ ਦਾ ਦ੍ਰਿਸ਼।

ਜਲੰਧਰ, 31 ਮਾਰਚ -ਪਹਿਲੀ ਅਪ੍ਰੈਲ ਤੋਂ ਜਾਇਦਾਦਾਂ ਦੇ ਰਜਿਸਟਰੀ ਰੇਟ ਵੱਧਣ ਦੀਆਂ ਆ ਰਹੀਆਂ ਖ਼ਬਰਾਂ ਨੂੰ ਦੇਖਦਿਆਂ ਤਹਿਸੀਲਾਂ ਵਿਚ ਰਜਿਸਟਰੀਆਂ ਦੇ ਕੰਮ ਵਿਚ ਇਕ ਦਮ ਤੇਜ਼ੀ ਦਿਖਾਈ ਦਿੱਤੀ। ਜਲੰਧਰ ਦੇ ਨਾਇਬ ਤਹਿਸੀਲਦਾਰ ਸ: ਕਰਨਦੀਪ ਸਿੰਘ ਭੁੱਲਰ ਨੇ ਦੱਸਿਆ ਕਿ ਰੇਟ ਵੱਧਣ ਦੇ ਡਰੋਂ ਪਿਛਲੇ ਸੋਮਵਾਰ ਤੋਂ ਹੀ ਰਜਿਸਟਰੀਆਂ ਕਰਵਾਉਣ ਵਾਲੇ ਲੋਕਾਂ ਦੀ ਗਿਣਤੀ ਇਕ ਦਮ ਵਧ ਗਈ ਸੀ। ਅੱਜ ਸ਼ੁੱਕਰਵਾਰ ਆਖਰੀ ਦਿਨ ਹੋਣ ਕਾਰਨ ਰਜਿਸਟਰਆਂ ਪਹਿਲਾਂ ਨਾਲੋਂ ਕਰੀਬ ਦੁੱਗਣੀਆਂ ਹੋਈਆਂ। ਆਮ ਲੋਕਾਂ 'ਚ ਇਹ ਖਦਸ਼ਾ ਹੈ ਕਿ ਪਹਿਲੀ ਤਾਰੀਖ ਤੋਂ ਰਜਿਸਟਰੀ ਰੇਟ ਵਧਣ ਕਾਰਨ ਰਜਿਸਟਰੀ ਖਰਚੇ ਵਿਚ ਵਾਧਾ ਹੋ ਜਾਵੇਗਾ। ਸਰਕਾਰੀ ਅਧਿਕਾਰੀਆਂ ਨੇ ਹਾਲ ਦੀ ਘੜੀ ਰਜਿਸਟਰੀ ਰੇਟਾਂ ਵਿਚ ਵਾਧੇ ਬਾਰੇ ਕੋਈ ਨਵਾਂ ਹੁਕਮ ਜਾਰੀ ਹੋਣ ਤੋਂ ਇਨਕਾਰ ਕੀਤਾ ਹੈ।

ਜੱਜ ਵਿਜੈ ਸਿੰਘ ਕਤਲ ਕੇਸ ’ਚ ਦੋਵਾਂ ਦੋਸ਼ੀਆਂ ਨੂੰ ਮਰਨ ਤੱਕ ਉਮਰ ਕੈਦ

ਚੰਡੀਗੜ੍ਹ, 31 ਮਾਰਚ -ਇੱਥੋਂ ਦੀ ਵਧੀਕ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਵੀ.ਪੀ. ਸਰੋਹੀ ਨੇ ਜੱਜ ਵਿਜੈ ਸਿੰਘ ਦੇ ਕਤਲ ਕੇਸ ਦੇ ਦੋਸ਼ੀਆਂ ਨੂੰ ਮਰਨ ਤਕ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ  ਦੋਵੇਂ ਦੋਸ਼ੀਆਂ ਡਾਕਟਰ ਰਵਦੀਪ ਕੌਰ ਅਤੇ ਗ੍ਰੰਥੀ ਮਨਜੀਤ ਸਿੰਘ ਨੂੰ ਪੰਜਾਹ ਹਜ਼ਾਰ ਰੁਪਏ ਜੁਰਮਾਨਾ ਵੀ ਕੀਤਾ ਹੈ। ਅਦਾਲਤ ਵੱਲੋਂ ਦੋਹਾਂ ਨੂੰ 28 ਮਾਰਚ ਨੂੰ ਧਾਰਾ 302 ਤਹਿਤ ਦੋਸ਼ੀ ਕਰਾਰ ਦਿੰਦਿਆਂ ਸਜ਼ਾ ਦਾ ਐਲਾਨ ਅੱਜ ਉੱਤੇ ਛੱਡ ਦਿੱਤਾ ਸੀ। ਵਿਜੈ ਸਿੰਘ ਦਾ 13 ਅਕਤੂਬਰ 2005 ਨੂੰ ਪੋਲੋ ਗਰਾਉਂਡ ਪਟਿਆਲਾ ਵਿਖੇ ਰਾਤ ਦੀ ਸੈਰ ਵੇਲੇ ਕਤਲ ਕਰ ਦਿੱਤਾ ਗਿਆ ਸੀ। ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵਿਜੈ ਸਿੰਘ ਕਤਲ ਵੇਲੇ ਲੇਬਰ ਕੋਰਟ ਚੰਡੀਗੜ੍ਹ ਵਿੱਚ ਤਾਇਨਾਤ ਸਨ। ਉਹ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੇ ਸਾਬਕਾ ਚੇਅਰਮੈਨ ਦੇ ਪੁੱਤਰ ਸਨ । ਪੁਲੀਸ ਨੇ ਜੱਜ ਕਤਲ ਕੇਸ ਵਿੱਚ 18 ਅਕਤੂਬਰ 2005 ਨੂੰ ਡਾਕਟਰ ਰਵਦੀਪ ਕੌਰ ਅਤੇ ਗ੍ਰੰਥੀ ਮਨਜੀਤ ਸਿੰਘ ਨੂੰ ਗ੍ਰਿਫਤਾਰ ਕੀਤਾ ਸੀ। ਇਹ ਕੇਸ ਪਟਿਆਲਾ ਦੀ ਅਦਾਲਤ ਤੋਂ ਚੰਡੀਗੜ੍ਹ ਵਿੱਚ ਇਸ ਕਰਕੇ ਤਬਦੀਲ ਕਰ ਦਿੱਤਾ ਗਿਆ ਸੀ ਕਿਉਂਕਿ ਉਥੋਂ ਦੇ ਵਕੀਲਾਂ ਨੇ ਕੇਸ ਲੜਨ ਤੋਂ ਨਾਂਹ ਕਰ ਦਿੱਤੀ ਸੀ। ਦੋਹਾਂ ਵਿਰੁੱਧ 18 ਅਗਸਤ 2006 ਨੂੰ ਦੋਸ਼ ਆਇਦ ਕਰ ਦਿੱਤੇ ਗਏ ਸਨ। ਅਦਾਲਤ ਵੱਲੋਂ 28 ਮਾਰਚ ਨੂੰ ਦੋਹਾਂ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਅਤੇ ਅੱਜ ਉਮਰ ਕੈਦ ਦੀ ਸਜ਼ਾਈ ਗਈ। ਉਂਝ ਪੁਲੀਸ ਦਾ ਦਾਅਵਾ ਸੀ ਕਿ ਡਾਕਟਰ ਰਵਦੀਪ ਕੌਰ ਨੇ ਜੱਜ ਦਾ ਕਤਲ ਗ੍ਰੰਥੀ ਮਨਜੀਤ ਸਿੰਘ ਨੂੰ ਪੰਜ ਲੱਖ ਰੁਪਏ ਦੀ ਸੁਪਾਰੀ ਦੇ ਕੇ ਕਰਾਇਆ ਸੀ। ਪੁਲੀਸ ਮੁਤਾਬਕ ਮ੍ਰਿਤਕ ਅਤੇ ਰਵਦੀਪ ਕੌਰ ਦਰਮਿਆਨ ਬਚਪਨ ਤੋਂ  ਦੋਸਤੀ ਚੱਲੀ ਆ ਰਹੀ ਸੀ ਪਰ ਦੋਹਾਂ ਦਾ ਵਿਆਹ ਨਹੀਂ ਹੋ ਸਕਿਆ ਸੀ। ਦੋਹਾਂ ਦਾ ਵਿਆਹ ਪਰਿਵਾਰ ਦੇ ਯਤਨਾਂ ਕਰਕੇ ਕਿਧਰੇ ਹੋਰ ਹੋ ਗਿਆ ਪਰ ਬਾਵਜੂਦ ਇਸ ਦੇ ਦੋਹਾਂ ਦਰਮਿਆਨ ਦੋਸਤੀ ਚੱਲਦੀ ਰਹੀ। ਡਾਕਟਰ ਰਵਦੀਪ ਕੌਰ ਨੇ ਜੱਜ ਵਿਜੈ ਸਿੰਘ ਉਤੇ ਆਪਣੀ ਪਤਨੀ ਤੋਂ ਤਲਾਕ ਲੈ ਕੇ ਉੋਸ ਨਾਲ ਵਿਆਹ ਕਰਾਉਣ ਲਈ ਜੋਰ ਪਾਉਣਾ ਸ਼ੁਰੂ ਕਰ ਦਿੱਤਾ ਪਰ ਤਿੰਨ ਬੱਚਿਆਂ ਦੇ ਪਿਤਾ ਵਿਜੈ ਸਿੰਘ ਵੱਲੋਂ ਹੁੰਗਾਰਾ ਨਾ ਮਿਲਣ ‘ਤੇ ਉਸ ਨੇ ਖੁੰਦਕ ਵਿੱਚ ਉਸਨੂੰ ਜਾਨੋਂ ਖਤਮ ਕਰਨ ਦੀ ਠਾਣ ਲਈ। ਇਸੇ ਸਮੇਂ ਦੌਰਾਨ ਉਸ ਦਾ ਸੰਪਰਕ ਗ੍ਰੰਥੀ ਮਨਜੀਤ ਸਿੰਘ ਨਾਲ ਬਣ ਗਿਆ। ਉਸ ਨੇ ਮਨਜੀਤ ਸਿੰਘ ਨੂੰ ਸਾਰੀ ਵਿਥਿਆ ਸੁਣਾ ਕੇ ਵਿਜੈ ਸਿੰਘ ਦਾ ਕਤਲ ਕਰਨ ਲਈ ਮਨਾ ਲਿਆ। ਇਸ ਲਈ ਰਵਦੀਪ ਕੌਰ ਨੇ ਉਸ ਨੂੰ ਪੰਜ ਲੱਖ ਰੁਪਏ ਦੀ ਸੁਪਾਰੀ ਦਿੱਤੀ ਸੀ। ਗ੍ਰੰਥੀ ਮਨਜੀਤ ਸਿੰਘ ਕਿੱਤੇ ਵਜੋਂ ਰਾਗੀ ਸੀ ਅਤੇ ਗੱਤਕੇ ਦਾ ਵੀ ਮਾਹਰ ਸੀ। ਡਾਕਟਰ ਰਵਦੀਪ ਅਤੇ ਮਨਜੀਤ ਸਿੰਘ ਦਾ ਸੰਪਰਕ ਉਦੋਂ ਹੋਇਆ ਜਦੋਂ ਉਹ ਉਸ ਦੇ ਹਸਪਤਾਲ ਵਿੱਚ ਅਰਦਾਸ ਕਰਨ ਲਈ ਆਇਆ ਸੀ। ਇਹ ਮਿਲਣੀ ਨੇੜਤਾ ਵਿੱਚ ਬਦਲ ਗਈ ਅਤੇ ਮਿਲਣੀਆਂ ਬੰਦ ਕਮਰੇ ਵਿੱਚ ਸ਼ੁਰੂ ਹੋ ਗਈਆਂ। ਪੁਲੀਸ ਦੀ ਜਾਂਚ ਮੁਤਾਬਕ ਡਾਕਟਰ ਰਵਦੀਪ ਕੌਰ ਨੇ ਮਨਜੀਤ ਸਿੰਘ ਨੂੰ ਵਿਆਹ ਕਰਾ ਕੇ ਕੈਨੇਡਾ ਲੈ ਜਾਣ ਦਾ ਝਾਂਸਾ ਵੀ ਦਿੱਤਾ ਸੀ। ਦੱਸਿਆ ਜਾਂਦਾ ਹੈ ਕਿ ਪੁਲੀਸ ਨੇ ਕਤਲ ਤੋਂ ਬਾਅਦ ਮਨਜੀਤ ਸਿੰਘ ਨੂੰ ਦਿੱਤੀ ਸੁਪਾਰੀ ਦੀ ਰਕਮ ਵੀ ਬਰਾਮਦ ਕਰ ਲਈ ਸੀ। ਕੇਸ ਦਾ ਚੰਡੀਗੜ੍ਹ ਤਬਾਦਲਾ ਹੋਣ ਤੋਂ ਬਾਅਦ ਦੋਹਾਂ ਨੂੰ ਬੁੜੈਲ ਜੇਲ੍ਹ ਵਿੱਚ ਭੇਜ ਦਿੱਤਾ ਗਿਆ। ਅੱਜ ਫੈਸਲੇ ਦੇ ਐਲਾਨ ਵੇਲੇ ਦੋਹੇਂ ਦੋਸ਼ੀ ਅਦਾਲਤ ਵਿੱਚ ਮੌਜੂਦ ਸਨ।
* 13 ਅਕਤੂਬਰ 2005- ਜੱਜ ਵਿਜੈ ਸਿੰਘ ਦਾ ਕਤਲ
* 18 ਅਕਤੂਬਰ 2005- ਡਾਕਟਰ ਰਵਦੀਪ ਕੌਰ ਅਤੇ ਰਾਗੀ ਮਨਜੀਤ ਸਿੰਘ ਗ੍ਰਿਫਤਾਰ
* 22 ਫਰਵਰੀ 2006- ਕੇਸ  ਪਟਿਆਲਾ ਤੋਂ ਚੰਡੀਗੜ੍ਹ ਦੀ ਕਚਹਿਰੀ ਵਿੱਚ ਤਬਦੀਲ
* 18 ਅਗਸਤ 2006- ਮੁਲਜ਼ਮਾਂ ਵਿਰੁੱਧ ਦੋਸ਼ ਆਇਦ
* 28 ਮਾਰਚ 2012- ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵੱਲੋਂ ਦੋਵੇਂ ਮੁਲਜ਼ਮ ਦੋਸ਼ੀ ਕਰਾਰ
* 30 ਮਾਰਚ 2012- ਦੋਸ਼ੀਆਂ ਨੂੰ ਰਹਿੰਦੀ ਜ਼ਿੰਦਗੀ ਲਈ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ

ਲੋਕਾਂ ਨੇ ਕਾਂਗਰਸ ਆਗੂ ਨੂੰ ਪੁਲੀਸ ਹਿਰਾਸਤ ਵਿੱਚੋਂ ਛੁਡਵਾਇਆ

ਗਿੱਦੜਬਾਹਾ, 31 ਮਾਰਚ- ਪਿੰਡ ਮਧੀਰ ਵਿੱਚ ਕਾਂਗਰਸ ਪਾਰਟੀ ਨਾਲ ਸਬੰਧਤ ਗਰੀਬ ਪਰਿਵਾਰ ਦਾ ਮਕਾਨ ਢਾਹੁਣ ਦੇ ਮਾਮਲੇ ਵਿੱਚ ਪੁਲੀਸ ਨੇ ਲੋਕਾਂ ਦੇ ਰੋਹ ਅੱਗੇ ਝੁਕਦਿਆਂ ਸਰਪੰਚ ਤੇ ਉਸ ਦੇ ਸਾਥੀਆਂ ਵਿਰੁੱਧ ਪਰਚਾ ਦਰਜ ਕਰ ਲਿਆ ਹੈ।
ਜਾਣਕਾਰੀ ਅਨੁਸਾਰ ਕੱਲ੍ਹ ਸੱਤਾਧਾਰੀ ਪੱਖ ਦੇ ਇਸ਼ਾਰੇ ‘ਤੇ ਥਾਣਾ ਕੋਟਭਾਈ ਦੇ ਮੁਖੀ ਨੇ ਪੀੜਤ ਪਰਿਵਾਰ ਦੀ ਇਨਸਾਫ਼ ਖਾਤਰ ਮਦਦ ਕਰ ਰਹੇ ਕਾਂਗਰਸੀ ਆਗੂ ਗੁਰਅਵਤਾਰ ਸਿੰਘ ਮਧੀਰ ਨੂੰ ਹਿਰਾਸਤ ਵਿੱਚ ਲੈ ਲਿਆ ਸੀ। ਪੁਲੀਸ ਨੇ ਕੁੱਝ ਹੋਰ ਘਰਾਂ ਵਿੱਚ ਵੀ ਛਾਪਾ ਮਾਰਿਆ ਅਤੇ ਘਰਾਂ ਵਿੱਚ ਆਦਮੀ ਨਾ ਮਿਲਣ ‘ਤੇ ਕੁਝ ਔਰਤਾਂ ਨੂੰ ਵੀ ਗ੍ਰਿਫਤਾਰ ਕਰ ਲਿਆ। ਇਸ ਦੌਰਾਨ ਸੁਖਦੀਪ ਸਿੰਘ ਪੁੱਤਰ ਛਿੰਦਰ ਸਿੰਘ ਦੇ ਬਿਆਨਾਂ ‘ਤੇ ਗੁਰਅਵਤਾਰ ਸਿੰਘ, ਡਾ. ਗੁਰਜੀਤ ਸਿੰਘ, ਅਮਰ ਸਿੰਘ, ਗੁਰਜੰਟ ਸਿੰਘ, ਰਾਜਪਾਲ ਸਿੰਘ ਅਤੇ ਸੁਖਦੇਵ ਸਿੰਘ ਵਿਰੁੱਧ ਐਸ.ਸੀ., ਐਸ.ਟੀ. ਐਕਟ ਅਤੇ ਜਨਤਕ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣ ਦੇ ਸਬੰਧ ਵਿੱਚ ਧਾਰਾ 323, 427, 148 ਅਤੇ 149 ਤਹਿਤ ਕੇਸ ਦਰਜ ਕਰ ਲਿਆ।
ਗੁਰਅਵਤਾਰ ਸਿੰਘ ਨੂੰ ਗ੍ਰਿਫਤਾਰ ਕਰਨ ਦਾ ਪਿੰਡ ਵਾਸੀਆਂ ਨੇ ਵਿਰੋਧ ਕੀਤਾ। ਦਲਿਤ ਪਰਿਵਾਰ ਦਾ ਮਕਾਨ ਢਾਹੁਣ ਅਤੇ ਕਾਂਗਰਸੀ ਆਗੂ ਨੂੰ ਬਿਨਾਂ ਵਜ੍ਹਾ ਹਿਰਾਸਤ ਵਿੱਚ ਲੈਣ ‘ਤੇ ਲੋਕ ਥਾਣਾ ਕੋਟਭਾਈ ਵਿੱਚ ਇਕੱਠੇ ਹੋ ਗਏ। ਦੂਜੇ ਪਿੰਡਾਂ ਦੇ ਕਾਂਗਰਸੀ ਆਗੂ ਅਤੇ ਵਰਕਰ ਵੀ ਥਾਣਾ ਕੋਟਭਾਈ ਵਿੱਚ ਪੁੱਜ ਗਏ ਅਤੇ ਕਾਂਗਰਸੀ ਵਿਧਾਇਕ ਰਾਜਾ ਵੜਿੰਗ ਦੀ ਅਗਵਾਈ ਵਿੱਚ ਥਾਣੇ ਦਾ ਘਿਰਾਓ ਕਰ ਲਿਆ। ਲਗਾਤਾਰ ਛੇ ਘੰਟੇ ਤੱਕ ਲੋਕਾਂ ਨੇ ਸਰਕਾਰ ਅਤੇ ਪੁਲੀਸ ਪ੍ਰਸ਼ਾਸਨ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ। ਰੋਸ ਧਰਨੇ ਦੌਰਾਨ ਪੁਲੀਸ ਨੂੰ ਉਸ ਵੇਲੇ ਹੱਥਾਂ ਪੈਰਾਂ ਦੀ ਪੈ ਗਈ, ਜਦੋਂ ਵਿਧਾਇਕ ਰਾਜਾ ਵੜਿੰਗ ਨੇ ਸਾਥੀਆਂ ਸਮੇਤ ਆਤਮਦਾਹ ਕਰਨ ਦਾ ਐਲਾਨ ਕਰ ਦਿੱਤਾ। ਇਸ ‘ਤੇ ਪੁਲੀਸ ਨੇ ਰਾਤ 1 ਵਜੇ ਦੇ ਕਰੀਬ ਕਾਂਗਰਸੀ ਆਗੂ ਨੂੰ ਰਿਹਾਅ ਕਰ ਦਿੱਤਾ ਅਤੇ ਇਸ ਮਾਮਲੇ ਵਿੱਚ ਪੀੜਤ ਵਿਅਕਤੀ ਸੁਖਪਾਲ ਸਿੰਘ ਦੇ ਬਿਆਨਾਂ ‘ਤੇ ਪਿੰਡ ਮਧੀਰ ਦੇ ਸਰਪੰਚ ਬੀਰਦਵਿੰਦਰ ਸਿੰਘ, ਉਸ ਦੇ ਪਿਤਾ ਗੁਰਦੀਪ ਸਿੰਘ ਅਤੇ ਨੰਬਰਦਾਰ ਬਲਦੇਵ ਸਿੰਘ ਖ਼ਿਲਾਫ਼ ਐਸ.ਸੀ., ਐਸ.ਟੀ. ਐਕਟ ਅਤੇ ਆਈ.ਪੀ.ਸੀ. ਦੀ ਧਾਰਾ 379 427, 506 ਅਤੇ 34 ਤਹਿਤ ਕੇਸ ਦਰਜ ਕਰ ਲਿਆ ਅਤੇ ਭਰੋਸਾ ਦਿਵਾਇਆ ਕਿ ਮੁਲਜ਼ਮਾਂ ਨੂੰ ਜਲਦੀ ਗ੍ਰਿਫਤਾਰ ਕੀਤਾ ਜਾਵੇਗਾ।
ਇਸ ਦੌਰਾਨ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਵਿਧਾਇਕ ਰਾਜਾ ਵੜਿੰਗ ਨੇ ਆਖਿਆ ਕਿ ਅਕਾਲੀ ਆਗੂਆਂ ਦੇ ਇਸ਼ਾਰੇ ‘ਤੇ ਕਿਸੇ ਵੀ ਸਿਵਲ ਜਾਂ ਪੁਲੀਸ ਅਧਿਕਾਰੀ ਨੂੰ ਲੋਕਾਂ ਨਾਲ ਬੇਇਨਸਾਫ਼ੀ ਨਹੀਂ ਕਰਨ ਦਿੱਤੀ ਜਾਵੇਗੀ।

ਭੰਗਾਲਾ ਮੰਡੀ ਵਿਖੇ ਹੋਏ ਅੰਨ੍ਹੇ ਕਤਲ ਦਾ ਕਾਤਲ ਕਾਬੂ

ਪਿੰਡ ਭੰਗਾਲਾ ਵਿਖੇ ਹੋਏ ਕਤਲ 'ਚ ਨਾਮਜ਼ਦ ਦੋਸ਼ੀ ਪੁਲਿਸ ਪਾਰਟੀ ਨਾਲ।

ਪੱਟੀ, 31 ਮਾਰਚ - 23 ਮਾਰਚ ਨੁੰ ਭੰਗਾਲਾ ਵਿਖੇ ਹੋਏ ਅੰਨੇ ਕਤਲ ਦੀ ਗੁੱਥੀ ਸੁਲਝਾਉਦਿਆਂ ਪੱਟੀ ਪੁਲਿਸ ਨੂੰ ਕਾਤਲ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਇਸ ਸੰਬੰਧੀ ਜਾਣਕਾਰੀ ਦਿੰਦੇਆਂ ਥਾਣਾ ਮੁਖੀ ਪੱਟੀ ਇੰਸਪੈਕਟਰ ਗੁਰਜੀਤ ਸਿੰਘ ਨੇ ਦੱਸਿਆ ਕਿ 6 ਦਿਨ ਪਹਿਲਾਂ ਪਿੰਡ ਤੂਤ ਭੰਗਾਲਾ ਨੇੜੇ ਅਨਾਜ ਮੰਡੀ 'ਚ ਜੋ ਸ਼ਿੰਗਾਰਾ ਸਿੰਘ ਪੁੱਤਰ ਮੇਜਰ ਸਿੰਘ ਕੌਮ ਜੱਟ ਵਾਸੀ ਕਿਸੇ ਅਣਪਛਾਤੇ ਵਿਅਕਤੀ ਵੱਲੋਂ ਕਤਲ ਕਰ ਦਿੱਤਾ ਗਿਆ ਸੀ। ਇਸਦੀ ਜਾਂਚ ਕਰਦਿਆਂ ਪੱਟੀ ਪੁਲਿਸ ਨੇ ਉਸ ਕਾਤਲ ਨੂੰ ਕਾਬੂ ਕਰਨ ਵਿਚ ਸਫ਼ਲਤਾ ਹਾਸਿਲ ਕੀਤੀ ਹੈ। ਇਸ ਸੰਬੰਧ ਵਿਚ ਗੁਰਸੇਵਕ ਸਿੰਘ ਪੁੱਤਰ ਦਰਸ਼ਨ ਸਿੰਘ ਕੌਮ ਜੱਟ ਵਾਸੀ ਖੇਮਕਰਨ ਨੂੰ ਪੁਲਿਸ ਨੇ ਪਿੰਡ ਮਹਿਦੀਪੁਰ ਨੇੜੇ ਤੋਂ ਗ੍ਰਿਫਤਾਰ ਕਰ ਲਿਆ, ਜਿਸਦੀ ਸ਼ਨਾਖਤ ਗੁਰਮੇਜ ਸਿੰਘ ਪੁੱਤਰ ਗੁਰਦੀਪ ਸਿੰਘ ਵਾਸੀ ਖੇਮਕਰਨ ਨੇ ਕੀਤੀ। ਛਾਣਬੀਣ ਦੌਰਾਨ ਇਹ ਸਾਹਮਣੇ ਆਇਆ ਕਿ ਕਾਤਲ ਨਸ਼ੇ ਦਾ ਆਦੀ ਸੀ, ਜਿਸਨੇ ਸ਼ਿੰਗਾਰਾ ਸਿੰਘ ਤੋਂ ਉਸਦਾ ਮੋਟਰਸਾਈਕਲ, ਮੋਬਾਈਲ ਤੇ ਪਰਸ ਖੋਹਿਆ ਸੀ ਤੇ ਸ਼ਿੰਗਾਰਾ ਸਿੰਘ ਦੇ ਵਿਰੋਧ ਕਰਨ ਤੇ ਗੁਰਸੇਵਕ ਸਿੰਘ ਨੇ ਤੇਜ਼ਧਾਰ ਹਥਿਆਰ ਨਾਲ ੳਸਦਾ ਕਤਲ ਕਰਕੇ ਫਰਾਰ ਹੋ ਗਿਆ ਸੀ। ਉਕਤ ਦੋਸ਼ੀ ਪਾਸੋਂ ਮ੍ਰਿਤਕ ਦਾ ਸਾਰਾ ਸਾਮਾਨ ਵੀ ਬਰਾਮਦ ਕਰ ਲਿਆ ਗਿਆ ਹੈ। ਇਸ ਸੰਬਧੀ ਪੁਲਿਸ ਥਾਣਾ ਪੱਟੀ ਵਿਖੇ ਮੁਕੱਦਮਾ ਨੰਬਰ 71 ਜੇਰੇ ਧਾਰਾ 302 ਤਹਿਤ ਦਰਜ ਕੀਤਾ ਗਿਆ ਸੀ। ਥਾਣਾ ਮੁਖੀ ਪੱਟੀ ਇੰਸਪੈਕਟਰ ਗੁਰਜੀਤ ਸਿੰਘ ਨੇ ਦੱਸਿਆ ਕਿ ਕਾਤਲ ਦਾ ਰਿਮਾਂਡ ਲੈ ਕੇ ਪੁਛ ਗਿੱਛ ਕੀਤੀ ਜਾ ਰਹੀ ਹੈ।

ਮਿੰਨੀ ਬੱਸ ਨੇ ਮੋਟਰ ਸਾਈਕਲ ਸਵਾਰ ਕੁਚਲਿਆ

ਪੱਟੀ ਮੋੜ ਚੂਸਲੇਵੜ ਵਿਖੇ ਬੱਸ ਹੇਠ ਕੁਚਲਿਆ ਗਿਆ ਵਿਅਕਤੀ, ਤਫਤੀਸ਼ ਕਰਦੀ ਪੁਲਿਸ
ਤੇ ਮ੍ਰਿਤਕ ਦੇ ਪਰਿਵਾਰਕ ਮੈਂਬਰ।

ਪੱਟੀ, 31 ਮਾਰਚ )- ਪੱਟੀ ਮੋੜ ਚੂਸਲੇਵੜ ਨੇੜੇ ਆ ਰਹੀ ਇਕ ਤੇਜ਼ ਰਫਤਾਰ ਬੱਸ ਨੇ ਮੋਟਰ ਸਾਈਕਲ ਸਵਾਰ ਤੇ ਨਾਲ ਬੈਠੇ ਬੱਚੇ ਨੂੰ ਕੁਚਲ ਦਿੱਤਾ। ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਮਿੰਨੀ ਬੱਸ ਨੰ: ਪੀ.ਬੀ. 02 ਏ.ਜੀ. 9651 ਚੰਬਾ ਮਿੰਨੀ ਬੱਸ ਸਰਵਿਸ ਭੰਗਾਲਾ ਤੋਂ ਪੱਟੀ ਆ ਰਹੀ ਸੀ, ਕਿ ਬਾਬਾ ਬਿਧੀ ਚੰਦ ਨਰਸਿੰਗ ਹੋਮ ਵਿਖੇ ਕੰਮ ਕਰਦਾ ਮੋਟਰ ਸਾਈਕਲ ਸਵਾਰ ਹਰਜਿੰਦਰ ਸਿੰਘ ਪੁੱਤਰ ਕੁਲਵੰਤ ਸਿੰਘ (24) ਆਪਣੇ ਮਾਲਕ ਦੇ ਬੱਚੇ ਨੂੰ ਸੈਕਰਡ ਹਾਰਟ ਸਕੂਲ ਪੱਟੀ ਠੱਕਰਪੁਰਾ ਤੋਂ ਛੁੱਟੀ ਉਪਰੰਤ ਲੈ ਕੇ ਆ ਰਿਹਾ ਸੀ, ਕਿ ਸਾਹਮਣੇ ਤੋਂ ਆ ਰਹੀ ਮਿੰਨੀ ਬੱਸ ਉਸ ਨਾਲ ਆ ਟਕਰਾਈ ਤੇ ਹਰਜਿੰਦਰ ਸਿੰਘ ਪੂਰੀ ਤਰ੍ਹਾਂ ਕੁਚਲਿਆ ਗਿਆ ਜਿਸਦੀ ਹਸਪਤਾਲ ਪੱਟੀ ਜਾ ਕੇ ਮੌਤ ਹੋ ਗਈ ਤੇ ਬੱਚੇ ਨੂੰ ਗੰਭੀਰ ਸੱਟਾਂ ਵੱਜਣ ਕਾਰਨ ਅੰਮ੍ਰਿਤਸਰ ਰੈਫਰ ਕਰ ਦਿੱਤਾ ਗਿਆ। ਮੌਕੇ 'ਤੇ ਪਹੁੰਚੀ ਥਾਣਾ ਸਦਰ ਪੱਟੀ ਪੁਲਸ ਨੇ ਲਾਸ਼ ਕਬਜੇ 'ਚ ਲੈ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ, ਬੱਸ ਦਾ ਡਰਾਈਵਰ ਮੌਕੇ ਤੋਂ ਫਰਾਰ ਹੋ ਗਿਆ ਹੈ।

'ਮਿਰਜ਼ਾ' ਬਣ ਕੇ ਖ਼ੁਸ਼ੀ ਮਹਿਸੂਸ ਕਰ ਰਿਹਾ ਹਾਂ ਗਿੱਪੀ ਗਰੇਵਾਲ

ਗਾਇਕ ਅਤੇ ਨਾਇਕ ਗਿੱਪੀ ਗਰੇਵਾਲ ਅੱਜ ਪੰਜਾਬੀ ਫ਼ਿਲਮਾਂ ਅਤੇ ਗਾਇਕੀ ਦੇ ਖੇਤਰ ਦਾ ਬਿਨਾਂ ਸ਼ੱਕ ਸਭ ਤੋਂ 'ਹੌਟ ਸਟਾਰ' ਹੈ। ਚਾਹੇ ਉਸ ਦੁਆਰਾ ਗਾਏ ਗੀਤਾਂ ਦੀ ਟੇਪ ਹੋਵੇ ਤੇ ਚਾਹੇ ਉਸ ਦੀ ਕੋਈ ਫ਼ਿਲਮ ਹੋਵੇ ਉਹ ਹਰ ਪਾਸੇ ਸਫ਼ਲਤਾ ਦੇ ਝੰਡੇ ਗੱਡ ਰਿਹਾ ਹੈ। ਉਹ ਕਮਾਲ ਦੀ ਸੂਝ-ਬੂਝ ਅਤੇ ਆਪਣੇ ਕੰਮ ਪ੍ਰਤੀ ਸਮਰਪਣ ਭਾਵ ਰੱਖਣ ਵਾਲਾ ਬੰਦਾ ਹੈ। ਇਹੀ ਕਾਰਨ ਹੈ ਕਿ ਉਹ ਜੋ ਵੀ ਕਰਦਾ ਹੈ ਤੇ ਜਿੰਨਾ ਵੀ ਕਰਦਾ ਹੈ ਉਸ ਦੀ ਚਰਚਾ ਜ਼ਰੂਰ ਹੁੰਦੀ ਹੈ। ਉਹ ਹਮੇਸ਼ਾ ਹੀ ਕੁਝ ਨਵਾਂ ਤੇ ਕੁਝ ਵੱਖਰਾ ਕਰਨ ਦੀ ਤਾਕ ਵਿਚ ਰਹਿੰਦਾ ਹੈ। ਇਹੀ ਕਾਰਨ ਹੈ ਕਿ ਅੱਜ ਉਹ ਆਪਣੇ ਸਮਕਾਲੀਆਂ ਤੋਂ ਕਿਤੇ ਅੱਗੇ ਲੰਘ ਗਿਆ ਹੈ। ਇਨ੍ਹੀਂ ਦਿਨੀਂ ਉਹ ਇਕ ਵਾਰ ਫਿਰ ਆਪਣੀ 6 ਅਪ੍ਰੈਲ ਨੂੰ ਰਿਲੀਜ਼ ਹੋਣ ਜਾ ਰਹੀ ਨਵੀਂ ਫ਼ਿਲਮ 'ਮਿਰਜ਼ਾ' ਨੂੰ ਲੈ ਕੇ ਚੁਫ਼ੇਰੇ ਚਰਚਾ ਵਿਚ ਹੈ। ਪੇਸ਼ ਹਨ ਉਸ ਨਾਲ ਇਸ ਫ਼ਿਲਮ ਸਬੰਧੀ ਹੋਈ ਗੱਲਬਾਤ ਦੇ ਕੁਝ ਅੰਸ਼-
? ਪਿਛਲੇ ਵਰ੍ਹੇ ਦੀ ਸਭ ਤੋਂ ਚਰਚਿਤ ਅਤੇ ਕਮਾਊ ਫ਼ਿਲਮ 'ਜੀਹਨੇ ਮੇਰਾ ਦਿਲ ਲੁੱਟਿਆ' ਦੀ ਸ਼ਾਨਦਾਰ ਕਾਮਯਾਬੀ ਤੋਂ ਬਾਅਦ 'ਮਿਰਜ਼ਾ' ਵਿਚ ਕੰਮ ਕਰਨਾ ਕਿਵੇਂ ਲੱਗਾ ?
-ਬਹੁਤ ਹੀ ਵਧੀਆ ਲੱਗ ਰਿਹਾ ਹੈ ਜੀ। 'ਜੀਹਨੇ ਮੇਰਾ ਦਿਲ ਲੁੱਟਿਆ' ਇਕ ਕਾਮੇਡੀ ਫ਼ਿਲਮ ਸੀ ਜਦਕਿ 'ਮਿਰਜ਼ਾ' ਇਕ ਐਕਸ਼ਨ ਫ਼ਿਲਮ ਹੈ। ਦੋਵੇਂ ਹੀ ਵੱਖਰੀ ਤਰ੍ਹਾਂ ਦੇ ਸਬਜੈਕਟ ਸਨ। ਸੋ, ਮੈਂ ਖ਼ੁਸ਼ ਹਾਂ ਕਿ ਮੈਂ ਇਨ੍ਹਾਂ ਦੋਵਾਂ ਹੀ ਫ਼ਿਲਮਾਂ ਦਾ ਇਕ ਹਿੱਸਾ ਹਾਂ।
? ਆਪਣੀ ਇਸ ਫ਼ਿਲਮ ਬਾਰੇ ਸਾਡੇ ਪਾਠਕਾਂ ਨੂੰ ਕੋਈ ਜਾਣਕਾਰੀ ਦਿਓ ?
-ਫ਼ਿਲਮ ਦੀ ਕਹਾਣੀ ਪੂਰੀ ਤਰਾਂ ਨਾਲ ਐਕਸ਼ਨ ਅਤੇ ਰੁਮਾਂਸ ਭਰਪੂਰ ਹੈ ਜਿਸ ਨੂੰ ਦੇਖ ਕੇ ਹਰ ਸਿਨੇਮਾਪ੍ਰੇਮੀ ਖ਼ੁਸ਼ੀ ਮਹਿਸੂਸ ਕਰੇਗਾ। ਇਸ ਫ਼ਿਲਮ ਦਾ ਨਿਰਮਾਣ ਪ੍ਰਸਿੱਧ ਗੀਤਕਾਰ ਇੰਦਾ ਰਾਏਕੋਟੀ ਅਤੇ ਅਮਨ ਖੜਕੜ ਦੁਆਰਾ ਕੀਤਾ ਗਿਆ ਹੈ ਤੇ ਇਸਨੂੰ 'ਜੱਗ ਜਿਉਂਦਿਆਂ ਦੇ ਮੇਲੇ' ਫ਼ੇਮ ਨਿਰਦੇਸ਼ਕ ਬਲਜੀਤ ਸਿੰਘ ਦਿਓ ਨੇ ਨਿਰਦੇਸ਼ਤ ਕੀਤਾ ਹੈ। ਫ਼ਿਲਮ ਦੇ ਬਾਕੀ ਕਲਾਕਾਰਾਂ ਵਿਚ ਹੀਰੋਇਨ ਮੈਂਡੀ ਤੱਖਰ, ਬਾਲੀਵੁੱਡ ਅਦਾਕਾਰ ਰਾਹੁਲ ਦੇਵ, ਬੀਨੂੰ ਢਿੱਲੋਂ, ਬੀ. ਐੱਨ. ਸ਼ਰਮਾ ਅਤੇ ਉੱਘਾ ਸੰਗੀਤ ਨਿਰਦੇਸ਼ਕ ਹਨੀ ਸਿੰਘ ਸ਼ਾਮਿਲ ਹਨ। ਹਾਲੀਵੁੱਡ ਦੇ ਕੈਮਰਾਮੈਨ ਟੋਬੀ ਗੋਰਮੈਨ ਦੁਆਰਾ ਕੈਨੇਡਾ, ਅਮਰੀਕਾ ਅਤੇ ਪੰਜਾਬ ਵਿਖੇ ਫ਼ਿਲਮਾਈ ਗਈ ਇਸ ਫ਼ਿਲਮ ਦੀ ਕਹਾਣੀ ਅਤੇ ਸਕਰੀਨ ਪਲੇਅ ਬਲਜੀਤ ਸਿੰਘ ਦਿਓ ਦੁਆਰਾ ਹੀ ਲਿਖਿਆ ਗਿਆ ਹੈ।
? 'ਮਿਰਜ਼ਾ' ਦੀ ਸਫ਼ਲਤਾ ਨੂੰ ਲੈ ਕੇ ਕਿੰਨੇ ਕੁ ਆਸਵੰਦ ਹੋ?
-ਦੇਖੋ ਜੀ, ਹਰ ਬੰਦਾ ਜਿਸ ਨੇ ਕਿਸੇ ਕੰਮ 'ਤੇ ਮਿਹਨਤ ਕੀਤੀ ਹੋਵੇ ਉਹ ਆਪਣੀ ਸਫ਼ਲਤਾ ਲਈ ਉਮੀਦਾਂ ਤਾਂ ਰੱਖਦਾ ਹੈ ਇਸੇ ਤਰਾਂ ਅਸੀਂ ਇਸ ਫ਼ਿਲਮ 'ਤੇ ਬਹੁਤ ਮਿਹਨਤ ਕੀਤੀ ਹੈ। ਤਕਨੀਕ ਪੱਖੋਂ ਇਸ ਫ਼ਿਲਮ ਨੂੰ ਅਸੀਂ ਹਾਲੀਵੁੱਡ ਅਤੇ ਚੋਟੀ ਦੀਆਂ ਹਿੰਦੀ ਫ਼ਿਲਮਾਂ ਦੇ ਹਾਣ ਦੀ ਬਣਾਉਣ ਦਾ ਯਤਨ ਕੀਤਾ ਹੈ। ਇਸ ਲਈ ਅਸੀਂ ਚਾਹੁੰਦੇ ਹਾਂ ਕਿ ਇਹ ਫ਼ਿਲਮ ਵੀ ਸਫ਼ਲ ਹੋਵੇ ਤਾਂ ਜੋ ਸਾਡੀ ਮਿਹਨਤ ਦਾ ਮੁੱਲ ਮੁੜ ਸਕੇ। ਬਾਕੀ ਦਰਸ਼ਕਾਂ ਦੇ ਹੱਥ ਹੈ ਕਿ ਉਹ ਸਾਡੇ ਲਈ ਕੀ ਫ਼ੈਸਲਾ ਸੁਣਾਉਂਦੇ ਹਨ।
? ਕਿਉਂਕਿ ਤੁਸੀਂ ਨਾਇਕ ਹੋਣ ਦੇ ਨਾਲ-ਨਾਲ ਇਕ ਗਾਇਕ ਵੀ ਹੋ, ਇਸ ਲਈ ਇਸ ਫ਼ਿਲਮ ਦਾ ਸੰਗੀਤ ਬਣਾਉਣ ਵੇਲੇ ਵੀ ਕੋਈ ਖ਼ਾਸ ਧਿਆਨ ਰੱਖਿਆ ਗਿਆ ?
-ਹਾਂ ਜੀ ਆਪਣੇ ਵੱਲੋਂ ਤਾਂ ਇਸ ਫ਼ਿਲਮ ਨੂੰ ਸੰਗੀਤਕ ਪੱਖੋਂ ਵੀ ਸਫ਼ਲ ਬਣਾਉਣ ਵਿਚ ਬਲਜੀਤ ਭਾਅ ਜੀ ਨੇ ਕੋਈ ਕਸਰ ਬਾਕੀ ਨਹੀਂ ਛੱਡੀ। ਇਸ ਕਰਕੇ ਹੀ ਉਨ੍ਹਾਂ ਨੇ ਅਜੋਕੇ ਸਮੇਂ ਦੇ ਸਭ ਤੋਂ ਸਫ਼ਲ ਸੰਗੀਤ ਨਿਰਦੇਸ਼ਕ ਹਨੀ ਸਿੰਘ ਅਤੇ ਜਤਿੰਦਰ ਸ਼ਾਹ ਦੀਆਂ ਸੇਵਾਵਾਂ ਲਈਆਂ ਹਨ, ਜਿਨ੍ਹਾਂ ਨੇ ਇੰਦਾ ਰਾਏਕੋਟੀ, ਬਚਨ ਬੇਦਿਲ, ਵੀਤ ਬਲਜੀਤ ਅਤੇ ਅਲਫ਼ਾਜ਼ ਦੁਆਰਾ ਲਿਖੇ ਗੀਤਾਂ ਨੂੰ ਪੂਰੀ ਰੂਹ ਨਾਲ ਸੰਗੀਤਬੱਧ ਕੀਤਾ ਹੈ। ਫ਼ਿਲਮ ਵਿਚਲੇ ਗੀਤਾਂ ਨੂੰ ਮੇਰੇ ਤੋਂ ਇਲਾਵਾ ਰਾਹਤ ਫ਼ਤਹਿ ਅਲੀ ਖਾਨ, ਸੁਨਿਧੀ ਚੌਹਾਨ, ਕਮਲ ਖ਼ਾਨ ਅਤੇ ਗੁਰਲੇਜ਼ ਅਖ਼ਤਰ ਨੇ ਆਪਣੀਆਂ ਆਵਾਜ਼ਾਂ ਦਿੱਤੀਆਂ ਹਨ।
? ਐਡੇ ਵੱਡੇ ਬਜਟ ਦੀ ਫ਼ਿਲਮ ਦੀ ਰਿਲੀਜ਼ਿੰਗ ਲਈ ਤੁਸੀਂ ਕੋਈ ਖ਼ਾਸ ਤਿਆਰੀਆਂ ਕੀਤੀਆਂ ਹਨ ? ઠ ઠ ઠ ઠ ઠ ઠ
-ਕੋਈ ਖ਼ਾਸ ਤਾਂ ਨਹੀਂ ਕਿਉਂਕਿ ਮੈਂ ਇਨ੍ਹੀਂ ਦਿਨੀਂ ਆਪਣੀ ਇਕ ਹੋਰ ਫ਼ਿਲਮ 'ਕੈਰੀ ਆਨ ਜੱਟਾ' ਦੀ ਸ਼ੂਟਿੰਗ ਵਿਚ ਮਸਰੂਫ਼ ਹਾਂ ਪਰ ਮੈਨੂੰ ਇਸ ਗੱਲ ਦੀ ਖ਼ੁਸ਼ੀ ਹੈ ਕਿ ਇਹ ਪਹਿਲੀ ਪੰਜਾਬੀ ਫ਼ਿਲਮ ਹੈ ਜੋ ਇਕੋ ਵੇਲੇ ਅਮਰੀਕਾ, ਕੈਨੇਡਾ, ਇੰਗਲੈਂਡ, ਆਸਟ੍ਰੇਲੀਆ, ਮਲੇਸ਼ੀਆ ਅਤੇ ਇਟਲੀ ਤੋਂ ਬਿਨਾਂ 80 ਤੋਂ ਵਧੇਰੇ ਪ੍ਰਿੰਟਾਂ ਨਾਲ ਪੰਜਾਬ, ਮੁੰਬਈ, ਕਲਕੱਤਾ, ਹਰਿਆਣਾ ਅਤੇ ਰਾਜਸਥਾਨ ਵਿਚ ਰਿਲੀਜ਼ ਕੀਤੀ ਜਾ ਰਹੀ ਹੈ।

ਸਿਆਲੀ ਭਗਤ ਵਧੀਆ ਫ਼ਿਲਮ ਦੀ ਉਡੀਕ 'ਚ

ਐਸ. ਐਨ. ਡੀ. ਟੀ. ਕਾਲਜ 'ਚ ਪੜ੍ਹਦਿਆਂ ਹੀ ਸਿਆਲੀ ਭਗਤ ਐਡ ਫ਼ਿਲਮਾਂ ਕਰਨ ਲੱਗ ਪਈ ਸੀ ਤੇ 2007 'ਚ ਆਈ ਫ਼ਿਲਮ 'ਦਾ ਟਰੇਨ' 'ਚ ਅੰਜਲੀ ਦੀਕਸ਼ਤ ਦਾ ਕਿਰਦਾਰ ਨਿਭਾਅ ਕੇ ਉਹ ਫ਼ਿਲਮੀ ਦੁਨੀਆ ਦੀ ਪਿਆਰੀ ਅਭਿਨੇਤਰੀ ਵੀ ਬਣੀ। ਗੁੱਡ ਲੱਕ, ਹੱਲਾ ਬੋਲ, ਬਲੇਡ ਬਾਬਜੀ (ਤੇਲਗੂ) ਨਿਊਟੋਨਿਨ ਮੁੰਦਰਾਮ ਵਿਧੀ (ਤੇਲਗੂ), ਕ੍ਰਿਕਟ, ਪੇਇੰਗ ਗੈਸਟ, ਇੰਕੋਸਾਰੀ (ਤੇਲਗੂ), ਇੰਪੇਸ਼ੈਂਟ ਵਿਵੇਕ, ਨਾਟੀ ਐਟ ਫਰਟੀ, ਘੋਸਟ ਆਦਿ ਫ਼ਿਲਮਾਂ ਕਰ ਚੁੱਕੀ ਸਿਆਲੀ ਕੋਲ ਤਿੰਨ ਹੋਰ ਫ਼ਿਲਮਾਂ ਹਨ, ਜਿਨ੍ਹਾਂ ਦੀ ਉਹ ਸ਼ੂਟਿੰਗ ਕਰ ਰਹੀ ਹੈ। ਸ਼ੂਟ ਆਊਟ, ਦਾ ਸੈਂਟ ਹੂ ਥਾਟ ਅਦਰਵਾਇਜ਼, ਮੈਂ ਰੋਨੀ ਔਰੀ ਰੋਨੀ ਆਦਿ ਦੀ ਸ਼ੂਟਿੰਗ ਲਗਾਤਾਰ ਚਲ ਰਹੀ ਹੈ। ਫ਼ਿਲਮੀ ਦੁਨੀਆ ਦਾ ਅਸੂਲ ਹੈ ਕਿ ਇਥੇ ਮਿੱਠੇ-ਪਿਆਰੇ ਬਣ ਕੇ ਜਿੰਨਾ ਮਰਜ਼ੀ ਕੰਮ ਲੈ ਲਓ, ਜਿਸ ਤੋਂ ਸਿਆਲੀ ਭਗਤ ਕਾਫ਼ੀ ਦੂਰ ਹੈ। ਫ਼ਿਲਮ 'ਬਲੈਕ ਐਂਡ ਵਾਈਟ' ਦੇ ਫ਼ਿਲਮਾਂਕਣ ਸਮਾਂ ਨਿਰਮਾਤਾ-ਨਿਰਦੇਸ਼ਕ ਹਰਬੰਸ ਲਾਲੀ ਨਾਲ ਵੀ ਝਗੜਾ ਹੋ ਗਿਆ ਸੀ। ਨਿਰਮਾਤਾ ਨੂੰ ਕਾਫ਼ੀ ਤੰਗ ਕੀਤਾ ਗਿਆ ਸੀ ਜਿਸ ਕਰਕੇ ਸਿਆਲੀ ਭਗਤ ਦਾ ਸਾਰਾ ਰੋਲ ਹੀ ਕੱਟ ਦਿੱਤਾ ਗਿਆ। ਸਿਆਲੀ ਚਾਹੁੰਦੀ ਹੈ ਕਿ ਉਸ ਨੂੰ ਵਧੀਆ ਫ਼ਿਲਮ ਮਿਲੇ...।

ਦਾਦਾ ਜੀ ਨੂੰ ਕਰਿਸ਼ਮਾ ਜਿਆਦਾ ਪਿਆਰੀ ਸੀ—ਕਰੀਨਾ

'ਮੇਰੇ ਦਾਦਾ ਰਾਜ ਕਪੂਰ ਦਾ ਝੁਕਾਅ ਕਰਿਸ਼ਮਾ ਵੱਲ ਸੀ ਕਿਉਂਕਿ ਉਨ੍ਹਾਂ ਦੋਵਾਂ ਦੀਆਂ ਅੱਖਾਂ ਦਾ ਰੰਗ ਨੀਲਾ ਸੀ ਜਦੋਂ ਕਿ ਮੇਰੀ ਅਤੇ ਮੇਰੇ ਪਿਤਾ ਜੀ ਦੀਆਂ ਅੱਖਾਂ ਦਾ ਰੰਗ ਹਰਾ ਸੀ।' ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਰੀਨਾ ਨੇ ਕਿਹਾ, ''ਗਰਮੀਆਂ ਦੇ ਮੌਸਮ 'ਚ ਦਾਦਾ ਜੀ ਕਰਿਸ਼ਮਾ ਨੂੰ ਦੋ ਅੰਬ ਦਿੰਦੇ ਸਨ ਜਦੋਂ ਕਿ ਮੈਨੂੰ ਸਿਰਫ ਇੱਕ ਹੀ ਮਿਲਦਾ ਸੀ।
ਮੈਨੂੰ ਆਪਣੇ ਦਾਦਾ ਜੀ ਨੂੰ ਖੁਸ਼ ਕਰਨ ਲਈ ਸਖਤ ਮਿਹਨਤ ਕਰਨੀ ਪੈਂਦੀ ਸੀ। ਭਾਰਤੀ ਸਿਨੇਮਾ ਦੇ ਪ੍ਰਸਿੱਧ ਪਰਿਵਾਰਾਂ ਚੋਂ ਇੱਕ ਕਪੂਰ ਖਾਨਦਾਨ ਨੂੰ ਵਧਾਈ ਦੇਣ ਲਈ ਬੈਂਡਸਟੈਂਡ 'ਤੇ ਇੱਕ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ ਸੀ। ਇੱਥੇ ਕਰੀਨਾ ਆਪਣੇ ਪਿਤਾ ਰਣਧੀਰ ਕਪੂਰ ਨਾਲ ਉਸਦੇ ਦਾਦਾ ਜੀ ਦੀ ਮੂਰਤੀ ਦਾ ਉਦਘਾਟਨ ਕਰਨ ਆਈ ਸੀ।
ਕਰੀਨਾ ਨੇ ਕਿਹਾ, ''ਮੇਰੇ ਕੋਲ ਸ਼ਬਦ ਨਹੀਂ ਹਨ। ਮੇਰੇ ਪਿਤਾ ਅਤੇ ਦਾਦਾ ਜੀ ਕਾਰਨ ਹੀ ਅੱਜ ਮੈਂ ਇਸ ਮੁਕਾਮ 'ਤੇ ਹਾਂ। ਕਿਸ ਕੁੜੀ ਨੂੰ ਅਜਿਹਾ ਮੌਕਾ ਮਿਲਦਾ ਹੈ।'' ਕਰੀਨਾ ਨੇ ਕਿਹਾ, ''ਅਦਾਕਾਰੀ ਕਪੂਰ ਖਾਨਦਾਨ ਦੀਆਂ ਨਸਾਂ ਅਤੇ ਖੂਨ 'ਚ ਹੈ। ਮੇਰੇ ਲਈ ਭਾਰਤੀ ਸਿਨੇਮਾ ਦੇ ਸੌ ਸਾਲਾਂ ਦਾ ਇਸ ਤੋਂ ਵਧੀਆ ਗਿਫਟ ਹੋ ਕੀ ਹੋ ਸਕਦਾ ਹੈ।''

ਲੁੱਟਾਂ-ਖੋਹਾਂ ਦੀਆਂ ਵਾਰਦਾਤਾਂ ਕਰਨ ਵਾਲੇ ਗਿਰੋਹ ਦਾ ਪਰਦਾਫ਼ਾਸ਼

 ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਜ਼ਿਲ੍ਹਾ ਪੁਲਿਸ ਮੁਖੀ
 ਇੰਦਰਮੋਹਨ ਸਿੰਘ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦੇ ਹੋਏ।
 ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਪੁਲਿਸ ਵੱਲੋਂ ਗ੍ਰਿਫਤਾਰ ਕੀਤੇ ਗਏ
ਚਾਰ ਦੋਸ਼ੀ ਬਰਾਮਦ ਕੀਤੇ ਸਾਮਾਨ ਨਾਲ।

ਸ੍ਰੀ ਮੁਕਤਸਰ ਸਾਹਿਬ- 28 ਮਾਰਚ - ਜ਼ਿਲ੍ਹਾ ਪੁਲਿਸ ਨੇ ਸ੍ਰੀ ਮੁਕਤਸਰ ਸਾਹਿਬ ਜ਼ਿਲ੍ਹੇ ਵਿਚ ਕਈ ਵੱਡੀਆਂ ਘਟਨਾਵਾਂ ਵਿਚ ਸ਼ਾਮਿਲ ਲੁੱਟਾਂ ਖੋਹਾਂ ਕਰਨ ਵਾਲੇ ਇਕ ਵੱਡੇ ਗਿਰੋਹ ਦਾ ਪਰਦਾਫ਼ਾਸ਼ ਕਰਦਿਆਂ ਚਾਰ ਮੈਂਬਰਾਂ ਨੂੰ ਕਾਬੂ ਕਰ ਕੇ ਇਕ ਚੋਰੀ ਦੀ ਕਾਰ, ਪਿਸਤੌਲ ਅਤੇ ਹੋਰ ਕਾਫੀ ਸਾਮਾਨ ਬਰਾਮਦ ਕੀਤਾ ਹੈ।
ਜਦ ਕਿ ਗਿਰੋਹ ਦਾ ਇਕ ਮੈਂਬਰ ਭੱਜਣ ਵਿਚ ਸਫ਼ਲ ਹੋ ਗਿਆ। ਇਸ ਸਬੰਧੀ ਜ਼ਿਲ੍ਹਾ ਪੁਲਿਸ ਮੁਖੀ ਸ: ਇੰਦਰਮੋਹਨ ਸਿੰਘ ਨੇ ਦੱਸਿਆ ਕਿ ਥਾਣਾ ਕੋਟਭਾਈ ਦੇ ਐੱਸ. ਐੱਚ. ਓ ਪਰਮਿੰਦਰ ਸਿੰਘ ਨੇ ਸਮੇਤ ਪੁਲਿਸ ਪਾਰਟੀ ਬੇਆਬਾਦ ਜਗ੍ਹਾ 'ਤੇ ਪਿੰਡ ਭਲਾਈਆਣਾ ਦੇ ਸੇਮਨਾਲੇ ਦੀ ਪਟੜੀ ਕੋਲ ਡਾਕਾ ਮਾਰਨ ਦੀ ਤਿਆਰੀ ਕਰ ਰਹੇ ਇਕ ਗਿਰੋਹ ਦੇ ਚਾਰ ਮੈਂਬਰਾਂ ਜਸਵਿੰਦਰ ਸਿੰਘ ਪੁੱਤਰ ਸੁਰਜੀਤ ਸਿੰਘ ਪਿੰਡ ਨਾਜਮਵਾਲਾ (ਫਿਰੋਜ਼ਪੁਰ), ਗੁਰਬਾਜ ਸਿੰਘ ਪੁੱਤਰ ਮੁਖਤਿਆਰ ਸਿੰਘ, ਤਰਸੇਮ ਸਿੰਘ ਪੁੱਤਰ ਕਰਤਾਰ ਸਿੰਘ ਦੋਵੇਂ ਪਿੰਡ ਬੂੜਾ ਗੁੱਜਰ (ਮੁਕਤਸਰ), ਮਨਦੀਪ ਸਿੰਘ ਪੁੱਤਰ ਸ਼ਿੰਗਾਰ ਸਿੰਘ ਪਿੰਡ ਮੱਲੋਕੀ (ਜ਼ੀਰਾ) ਨੂੰ ਗ੍ਰਿਫਤਾਰ ਕਰ ਲਿਆ, ਜਦੋਂ ਕਿ ਉਨ੍ਹਾਂ ਦਾ ਇਕ ਸਾਥੀ ਗੋਰਾ ਸਿੰਘ ਪੁੱਤਰ ਅਨੋਖ ਸਿੰਘ ਪਿੰਡ ਸੁਖਨਾ ਅਬਲੂ ਭੱਜਣ ਵਿਚ ਸਫਲ ਹੋ ਗਿਆ। ਗ੍ਰਿਫਤਾਰ ਕੀਤੇ ਗਿਰੋਹ ਦਾ ਮੁਖੀ ਜਸਵਿੰਦਰ ਸਿੰਘ ਪਹਿਲਾਂ ਇਕ ਵੱਡੇ ਗਿਰੋਹ ਦਾ ਮੈਂਬਰ ਵੀ ਰਿਹਾ ਹੈ, ਜਿਸ ਤੋਂ ਵੱਖ-ਵੱਖ ਥਾਵਾਂ ਤੋਂ ਚੋਰੀ ਕੀਤੀਆਂ 50 ਕਾਰਾਂ ਬਰਾਮਦ ਕੀਤੀਆਂ ਗਈਆਂ ਸਨ। ਇਸ ਬਾਅਦ ਤੋਂ ਜਸਵਿੰਦਰ ਸਿੰਘ ਵੱਲੋਂ ਇਕ ਅਲੱਗ ਗਿਰੋਹ ਬਣਾ ਕੇ ਮੋਗਾ, ਫਿਰੋਜ਼ਪੁਰ ਅਤੇ ਮੁਕਤਸਰ ਜ਼ਿਲ੍ਹੇ ਵਿਚ ਲੁੱਟਾਂ ਖੋਹਾਂ ਦੀਆਂ ਵਾਰਦਾਤਾਂ ਕੀਤੀਆਂ ਜਾ ਰਹੀਆਂ ਸਨ। ਵੱਖ-ਵੱਖ ਮੁਕੱਦਮਿਆਂ ਵਿਚ ਅਦਾਲਤ ਨੇ ਇਸ ਨੂੰ ਭਗੌੜਾ ਕਰਾਰ ਦਿੱਤਾ ਹੋਇਆ ਸੀ। ਗ੍ਰਿਫਤਾਰ ਦੋਸ਼ੀਆਂ ਕੋਲੋਂ ਮੁਕਤਸਰ ਤੋਂ ਚੋਰੀ ਹੋਈ ਸਵਿਫਟ ਡਿਜ਼ਾਇਰ ਕਾਰ, ਇਕ ਲੈਪਟਾਪ, ਇਕ ਪਿਸਤੌਲ 315 ਬੋਰ, 70 ਕਾਰਤੂਸ , ਇਕ ਕਾਪਾ, ਇਕ ਕਿਰਚ, ਇਕ ਬੇਸਬਾਲ ਤੋਂ ਇਲਾਵਾ ਕਾਰਾਂ ਚੋਰੀ ਕਰਨ ਲਈ ਵਰਤੀਆਂ ਜਾਂਦੀਆਂ ਚਾਬੀਆਂ, ਵੱਖ-ਵੱਖ ਗੱਡੀਆਂ ਦੀਆਂ ਸਟੇਰਿੰਗ ਲਾਕ ਕਿੱਟਾਂ, ਲੋਹਾ ਕੱਟਣ ਵਾਲੀ ਆਰੀ ਸਮੇਤ ਬਲੇਡ, ਚੋਰੀ ਕੀਤੀਆਂ ਗੱਡੀਆਂ ਦੇ ਜ਼ਾਅਲੀ ਦਸਤਾਵੇਜ਼ ਤਿਆਰ ਕਰਨ ਲਈ ਵੱਖ-ਵੱਖ ਅਥਾਰਟੀਆਂ ਦੀਆਂ ਮੋਹਰਾਂ, ਆਰ. ਸੀ. ਖਾਲੀ ਕਾਪੀਆਂ, ਡਰਾਇਵਿੰਗ ਲਾਇੰਸੈਂਸ ਬਣਾਉਣ ਵਾਲੀਆਂ ਖਾਲੀ ਕਾਪੀਆਂ ਬਰਾਮਦ ਹੋਈਆਂ ਹਨ। ਦੋਸ਼ੀਆਂ ਖਿਲਾਫ਼ ਵੱਖ-ਵੱਖ ਧਰਾਵਾਂ ਤਹਿਤ ਮੁਕੱਦਮਾ ਦਰਜ ਕਰ ਲਿਆ ਹੈ। ਇਸ ਮੌਕੇ ਪੁਲਿਸ ਉਪ ਕਪਤਾਨ ਹੈੱਡਕੁਆਰਟਰ ਸ: ਜਸਵਿੰਦਰ ਸਿੰਘ ਘਾਰੂ, ਪੁਲਿਸ ਉਪ ਕਪਤਾਨ ਗਿੱਦੜਬਾਹਾ ਸ੍ਰੀ ਜਗਦੀਸ਼ ਕੁਮਾਰ ਬਿਸ਼ਨੋਈ ਅਤੇ ਥਾਣਾ ਕੋਟਭਾਈ ਦੇ ਮੁੱਖੀ ਸ: ਪਰਮਿੰਦਰ ਸਿੰਘ ਵੀ ਹਾਜਰ ਸਨ।

ਪ੍ਰੀਖਿਆ ਕੇਂਦਰ ਅੰਦਰੋਂ ਅਗਵਾ ਕੀਤਾ ਨੌਜਵਾਨ ਫਿਰੋਜ਼ਪੁਰ ਤੋਂ ਬਰਾਮਦ

ਜਗਰਾਉਂ.- 28 ਮਾਰਚ  ਪਿੰਡ ਹੇਰਾਂ ਦੇ ਪ੍ਰੀਖਿਆ ਕੇਂਦਰ ਅੰਦਰੋਂ ਪਿਸਤੌਲ ਦੀ ਨੋਕ 'ਤੇ ਅਗਵਾ ਕਰ ਕੇ ਲਿਜਾਏ ਗਏ ਨੌਜਵਾਨ ਨੂੰ ਪੁਲਿਸ ਨੇ ਬਰਾਮਦ ਕਰ ਲਿਆ ਹੈ।
ਐੱਸ. ਐੱਸ. ਪੀ. ਲੁਧਿਆਣਾ (ਦਿਹਾਤੀ) ਅਮਰ ਸਿੰਘ ਚਾਹਲ ਨੇ ਦੱਸਿਆ ਕਿ ਹਾਂਸ ਕਲਾਂ ਦੇ ਰਹਿਣ ਵਾਲੇ ਨੌਜਵਾਨ ਜਗਤਾਰ ਸਿੰਘ ਨੂੰ ਪ੍ਰੀਖਿਆ ਕੇਂਦਰ ਦੇ ਅੰਦਰੋਂ ਅਗਵਾ ਕਰ ਕੇ ਲੈ ਜਾਣ ਵਾਲੇ ਨੌਜਵਾਨਾਂ ਨੂੰ ਕਾਬੂ ਕਰਨ ਲਈ ਪੰਜਾਬ ਭਰ ਦੇ ਪੁਲਿਸ ਥਾਣਿਆਂ ਨੂੰ ਸੂਚਨਾ ਭੇਜੀ ਗਈ ਸੀ ਤੇ ਫ਼ਿਰੋਜ਼ਪੁਰ ਸ਼ਹਿਰ ਦੇ ਬੱਸ ਅੱਡੇ ਨੇੜੇ ਲੱਗੇ ਪੁਲਿਸ ਨਾਕੇ ਨੂੰ ਦੇਖ ਕਥਿਤ ਦੋਸ਼ੀਆਂ ਨੇ ਅਗਵਾ ਕੀਤੇ ਨੌਜਵਾਨ ਜਗਤਾਰ ਸਿੰਘ ਉਤਾਰ ਦਿੱਤਾ ਤੇ ਆਪ ਮੌਕੇ ਤੋਂ ਖਿਸਕਣ 'ਚ ਕਾਮਯਾਬ ਹੋ ਗਏ। ਸੂਚਨਾ ਮਿਲਣ 'ਤੇ ਫਿਰੋਜ਼ਪੁਰ ਪੁਲਿਸ ਵੱਲੋਂ ਜਗਤਾਰ ਸਿੰਘ ਨੂੰ ਆਪਣੀ ਸੁਰੱਖਿਆ 'ਚ ਲੈ ਲਿਆ ਗਿਆ, ਜਿਥੋਂ ਸਥਾਨਕ ਪੁਲਿਸ ਨੇ ਉਸ ਨੂੰ ਸਹੀ ਸਲਾਮਤ ਵਾਪਿਸ ਲੈ ਆਂਦਾ। ਪੁਲਿਸ ਮੁਖੀ ਅਨੁਸਾਰ ਅਗਵਾਕਾਰਾਂ ਨੇ ਰਸਤੇ 'ਚ ਵੀ ਨੌਜਵਾਨ ਦੀ ਕੁੱਟਮਾਰ ਕੀਤੀ। ਉਨ੍ਹਾਂ ਕਿਹਾ ਕਿ ਪੁਲਿਸ ਦੀ ਪਹਿਲੀ ਕੋਸ਼ਿਸ਼ ਅਗਵਾ ਹੋਏ ਨੌਜਵਾਨ ਨੂੰ ਬਰਾਮਦ ਕਰਨਾ ਸੀ ਜੋ ਕਰ ਲਿਆ ਤੇ ਹੁਣ ਦੋਸ਼ੀਆਂ ਨੂੰ ਵੀ ਜਲਦੀ ਹੀ ਕਾਬੂ ਕਰ ਲਿਆ ਜਾਵੇਗਾ।

ਕਾਰ ਦੀ ਫੇਟ ਵੱਜਣ ਨਾਲ ਸਕੂਟਰ ਸਵਾਰ ਪਤੀ-ਪਤਨੀ ਦੀ ਮੌਤ

 ਹਾਦਸੇ 'ਚ ਨੁਕਸਾਨੀ ਗਈ ਕਾਰ ਅਤੇ (ਸੱਜੇ) ਮਾਰੇ ਗਏ ਗੁਰਮੇਜ ਸਿੰਘ ਤੇ ਉਸ ਦੀ ਪਤਨੀ ਜਸਵੀਰ ਕੌਰ ਦੀਆਂ ਪੁਰਾਣੀਆਂ ਤਸਵੀਰਾਂ।

ਸੁਲਤਾਨਪੁਰ ਲੋਧੀ, 28 ਮਾਰਚ ਅੱਜ ਸਵੇਰੇ ਲਗਭਗ 9 ਵਜੇ ਸੁਲਤਾਨਪੁਰ ਲੋਹੀਆਂ ਸੜਕ 'ਤੇ ਪਿੰਡ ਦੀਪੇਵਾਲ ਨੇੜੇ ਸਕੂਟਰ ਅਤੇ ਕਾਰ ਦੇ ਹੋਏ ਹਾਦਸੇ ਵਿਚ ਸਕੂਟਰ ਸਵਾਰ ਪਤੀ-ਪਤਨੀ ਦੀ ਮੌਕੇ ਤੇ ਮੌਤ ਹੋ ਗਈ। ਪਿੰਡ ਸੱਦੂਪੁਰ ਨਿਵਾਸੀ ਗੁਰਮੇਜ ਸਿੰਘ ਪੁੱਤਰ ਦਰਸ਼ਨ ਸਿੰਘ ਵਾਸੀ ਸਿੱਦੂਪੁਰ ਅਤੇ ਉਨ੍ਹਾਂ ਦੀ ਪਤਨੀ ਸਕੂਟਰ ਤੇ ਗੁਰਦੁਆਰਾ ਬੇਰ ਸਾਹਿਬ ਵੱਲ ਆ ਰਹੇ ਸਨ।
ਸੁਲਤਾਨਪੁਰ ਲੋਧੀ ਵੱਲੋਂ ਆ ਰਹੀ ਇਕ ਸਵਿਫਟ ਕਾਰ ਨੇ ਇਕ ਬੱਸ ਨੂੰ ਓਵਰਟੇਕ ਕਰਦੇ ਸਮੇਂ ਸਕੂਟਰ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ। ਕਾਰ ਭੱਠੇ ਨੇੜੇ ਖਤਾਨਾ ਵੱਲ ਦੋਵਾਂ ਨੂੰ ਸਕੂਟਰ ਸਮੇਤ ਧੂਹ ਕੇ ਲੈ ਗਈ। ਟੱਕਰ ਇਨ੍ਹੀ ਭਿਅੰਕਰ ਸੀ ਕਿ ਦੋਵਾਂ ਦੀ ਮੌਕੇ ਤੇ ਹੀ ਮੌਤ ਹੋ ਗਈ। ਕਾਰ ਨੰਬਰ ਪੀ.ਬੀ.08 ਐਨ. 8621 ਨੂੂੰ ਜੱਲੋਪੁਰ ਨਿਵਾਸੀ 22 ਸਾਲਾ ਗੁਰਸ਼ਰਨ ਸਿੰਘ ਪੁੱਤਰ ਗਿਆਨ ਸਿੱਘ ਜੱਲੋਪੁਰ ਚਲਾ ਰਿਹਾ ਸੀ। ਤੀਰਥ ਸਿੰਘ ਇੰਸਪੈਕਟਰ ਤੇ ਹਵਲਦਾਰ ਭਜਨ ਸਿੰਘ ਨੇ ਮੌਕੇ 'ਤੇ ਪੁੱਜ ਕੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਗੁਰਸ਼ਰਨ ਸਿੰਘ ਨੂੰ ਹਿਰਾਸਤ 'ਚ ਲੈ ਲਿਆ ਹੈ।
ਪੋਸਟ ਮਾਰਟਮ ਪਿੱਛੋਂ ਸ਼ਾਮ 6 ਵਜੇ ਮ੍ਰਿਤਕ ਜੋੜੇ ਦਾ ਪਿੰਡ ਸਿੱਧੂਪੁਰ ਵਿਖੇ ਇੱਕ ਹੀ ਚਿਤਾ ਵਿੱਚ ਸਸਕਾਰ ਕਰ ਦਿੱਤਾ ਗਿਆ। ਇਸ ਮੌਕੇ ਬਲਾਕ ਸੰਮਤੀ ਮੈਂਬਰ ਦਵਿੰਦਰ ਸਿੰਘ ਜੰਮੂ, ਮਾ: ਮਨਜੀਤ ਸਿੰਘ, ਅਮਰਜੀਤ ਸਿੰਘ ਰਾਣਾ, ਸੁਰਿੰਦਰ ਸਿੰਘ ਰਤਨਪਾਲ, ਗੁਰਨਾਮ ਸਿੰਘ ਰਤਨਪਾਲ, ਗੁਰਚਰਨ ਸਿੰਘ ਸਫਰੀ, ਬਚਿੰਤ ਸਿੰਘ ਸਾ: ਸਰਪੰਚ, ਧਰਮ ਸਿੰਘ ਪੰਚ, ਸਾਧੂ ਸਿੰਘ ਪੰਚ, ਸੁਰਜੀਤ ਸਿੰਘ ਜੋਸਣ ਸਮੇਤ ਵੱਡੀ ਗਿਣਤੀ ਵਿੱਚ ਇਲਾਕਾ ਨਿਵਾਸੀ ਅਤੇ ਰਿਸ਼ਤੇਦਾਰ ਹਾਜ਼ਰ ਸਨ।

ਕੈਨੇਡੀਅਨ ਸਿਆਸਤਦਾਨ ਰੂਬੀ ਢੱਲਾ ਭਾਰਤ ਪਹੁੰਚੇ

 ਰੂਬੀ ਢੱਲਾ ਅਤੇ ਉਨ੍ਹਾਂ ਦੇ ਪਰਿਵਾਰਿਕ ਮੈਂਬਰਾਂ ਦਾ ਭਾਰਤ ਪਰਤਣ 'ਤੇ ਸਵਾਗਤ ਕਰਦੇ ਹੋਏ ਸੁਪਰਡੈਂਟ ਡਾ: ਬੀ. ਐੱਸ. ਬੇਦੀ, ਕੇਵਲ ਸਿੰਘ ਭੱਟੀ ਤੇ ਹੋਰ।

ਅਟਾਰੀ. 28 ਮਾਰਚ  ਕੈਨੇਡਾ ਦੀ ਸਾਬਕਾ ਸੰਸਦ ਮੈਂਬਰ ਅਤੇ ਪੰਜਾਬੀ ਮੂਲ ਦੀ ਉੱਘੀ ਸਿਆਸਤਦਾਨ ਰੂਬੀ ਢੱਲਾ ਪਾਕਿਸਤਾਨ ਸਥਿਤ ਗੁਰਧਾਮਾਂ ਦੇ ਦਰਸ਼ਨ ਕਰਨ ਅਤੇ ਆਪਣੇ ਪੜਨਾਨਕਿਆਂ ਦੇ ਪੁਸ਼ਤੈਨੀ ਘਰ ਵੇਖ ਕੇ ਵਾਪਸ ਭਾਰਤ ਪਰਤ ਆਏ। ਰੂਬੀ ਢੱਲਾ ਦੇ ਨਾਲ ਗਈ ਉਨ੍ਹਾਂ ਦੀ ਮਾਤਾ ਅਤੇ ਮਾਸੀਆਂ ਆਪਣੇ ਨਾਨਕਿਆਂ ਦੇ ਘਰ ਵੇਖ ਕੇ ਆਉਣ ਤੋਂ ਬਾਅਦ ਕਾਫੀ ਖੁਸ਼ ਨਜ਼ਰ ਆ ਰਹੀਆਂ ਸਨ।
ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਅੰ ਰੂਬੀ ਢੱਲਾ ਨੇ ਕਿਹਾ ਕਿ ਉਹ ਬੜੀ ਖੁਸ਼ ਹੈ ਕਿ ਉਸ ਨੇ ਆਪਣੀ ਅਤੇ ਆਪਣੀ ਮਾਂ ਅਤੇ ਮਾਸੀਆਂ ਦੀ ਇੱਛਾ ਪੂਰੀ ਕਰਦਿਆਂ ਆਪਣੀ ਮਾਂ ਦੇ ਕਸੂਰ ਵਿਖੇ ਸਥਿਤ ਉਨ੍ਹਾਂ ਨੇ ਨਾਨਕੇ ਘਰ ਨੂੰ ਵੇਖਿਆ, ਜਿਥੇ 80 ਵਰੇਂ ਪਹਿਲਾਂ ਉਨ੍ਹਾਂ ਦੀ ਨਾਨੀ ਨੇ ਜਨਮ ਲਿਆ ਅਤੇ ਉਨ੍ਹਾਂ ਦੀ ਮਾਂ ਖੇਡਦੀ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਵੀ ਕਸੂਰ ਸਥਿਤ ਉਨ੍ਹਾਂ ਘਰ ਉਵੇ ਹੀ ਹੈ। ਉਨ੍ਹਾਂ ਕਿਹਾ ਕਿ ਕਸੂਰ ਵਾਸੀਆਂ ਨੇ ਉਨ੍ਹਾਂ ਨੂੰ ਬਹੁਤ ਪਿਆਰ ਦਿੱਤਾ ਅਤੇ ਬੜਾ ਲਾਡ ਕੀਤਾ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਉਥੇ ਗੁਰਦੁਆਰਾ ਨਨਕਾਣਾ ਸਾਹਿਬ ਪੰਜਾਬ ਸਾਹਿਬ ਅਤੇ ਹੋਰ ਗੁਰਧਾਮਾਂ ਦੇ ਦਰਸ਼ਨ ਕਰ ਕੇ ਗੁਰੂ ਸਾਹਿਬ ਦਾ ਅਸ਼ੀਰਵਾਦ ਲਿਆ। ਇਸ ਮੌਕੇ ਰੂਬੀ ਢੱਲਾ ਦੀ ਮਾਤਾ ਤਵਿੰਦਰ ਢੱਲਾ ਨੇ ਕਿਹਾ ਕਿ ਉਹ ਪਹਿਲੀ ਵਾਰ ਪਾਕਿਸਤਾਨ ਗਏ ਸਨ ਅਤੇ ਉਨ੍ਹਾਂ ਦੀ ਬੇਟੀ ਨੇ ਉਸ ਦੀ ਅਤੇ ਉਸ 2 ਭੈਣਾਂ ਜੋ ਇੰਗਲੈਂਡ ਤੋਂ ਆਈਆਂ ਹਨ ਦੀ ਇੱਛਾ ਪੂਰੀ ਕਰ ਦਿੱਤੀ ਹੈ।

ਅੱਠ ਨੌਜਵਾਨ ਪਾਣੀ ਵਾਲੀ ਟੈਂਕੀ 'ਤੇ ਚੜ੍ਹੇ

ਪਾਣੀ ਵਾਲੀ ਟੈਂਕੀ 'ਤੇ ਚੜ੍ਹੇ ਹੋਏ ਨੌਜਵਾਨ ਅਤੇ (ਹੇਠਾਂ)
ਨੌਜਵਾਨ ਸੰਤ ਜਗਜੀਤ ਸਿੰਘ ਤੋਂ ਅਸ਼ੀਰਵਾਦ ਲੈਂਦੇ ਹੋਏ।

ਬਠਿੰਡਾ, 28 ਮਾਰਚ- ਸਿੱਖ ਕੌਮ ਦੇ ਜ਼ਿੰਦਾ ਸ਼ਹੀਦ ਭਾਈ ਬਲਵੰਤ ਸਿੰਘ ਰਾਜੋਆਣਾ ਨੂੰ ਫ਼ਾਂਸੀ ਦੇਣ ਖਿਲਾਫ਼ ਜੋਸ਼ ਵਿਚ ਆਏ ਅੱਠ ਨੌਜਵਾਨ ਅੱਜ ਅੰਮ੍ਰਿਤਸਰ ਕੌਮੀ ਸ਼ਾਹ ਮਾਰਗ 'ਤੇ ਪਿੰਡ ਗਿੱਲ ਪੱਤੀ ਅਤੇ ਭੋਖੜਾ ਵਿਚਕਾਰ ਬਣੀ ਵਾਟਰ ਵਰਕਸ ਦੀ ਪਾਣੀ ਵਾਲੀ ਟੈਂਕੀ ਉਪਰ ਚੜ੍ਹ ਗਏ। ਨੌਜਵਾਨਾਂ ਨੇ ਭਾਈ ਰਾਜੋਆਣਾ ਦੇ ਹੱਕ ਵਿਚ ਨਾਅਰੇਬਾਜ਼ੀ ਕਰਦਿਆਂ ਉਸ ਨੂੰ ਬਿਨ੍ਹਾਂ ਸ਼ਰਤ ਰਿਹਾਅ ਕਰਨ ਦੀ ਮੰਗ ਕੀਤੀ। ਘਟਨਾ ਦੀ ਸੂਚਨਾ ਮਿਲਦਿਆ ਹੀ ਡੀ. ਐੱਸ. ਪੀ, ਤਹਿਸੀਲਦਾਰ ਬਠਿੰਡਾ ਸ: ਅਵਤਾਰ ਸਿੰਘ ਮੱਕੜ ਭਾਰੀ ਪੁਲਿਸ ਫੌਰਸ ਸਮੇਤ ਮੌਕੇ 'ਤੇ ਪੁੱਜੇ ਅਤੇ ਨੌਜਵਾਨਾਂ ਨੂੰ ਟੈਂਕੀ ਤੋਂ ਹੇਠਾਂ ਉਤਰਨ ਲਈ ਕਿਹਾ। ਪਰ ਨੌਜਵਾਨ ਆਪਣੀ ਮੰਗ 'ਤੇ ਅੜੇ ਰਹੇ। ਪ੍ਰਾਪਤ ਜਾਣਕਾਰੀ ਅਹਨੁਸਾਰ ਹਰਪ੍ਰੀਤ ਸਿੰਘ ਤੇ ਕੁਲਦੀਪ ਸ਼ਰਮਾ ਵਾਸੀ ਗੋਨਿਆਣਾ ਮੰਡੀ, ਮਨਦੀਪ ਸਿੰਘ ਮਨੀ, ਕਰਮਜੀਤ ਸਿੰਘ, ਗ਼ਗਨਦੀਪ ਸਿੰਘ, ਸ਼ਾਮ ਸਿੰਘ ਅਤੇ ਰਣਜੀਤ ਸਿੰਘ ਵਾਸੀਅਨ ਪਿੰਡ ਕੋਠੇ ਨੱਥਾ ਸਿੰਘ ਵਾਲੇ ਅਤੇ ਪ੍ਰਦੀਪ ਸਿੰਘ ਬਰਾੜ ਵਾਸੀ ਮਹਿਮਾ ਸਰਜਾ ਅੱਜ ਭਾਈ ਰਾਜੋਆਣਾਂ ਦੀ ਫ਼ਾਂਸੀ ਖਿਲਾਫ਼ ਸਿੱਖ ਸੰਗ਼ਤਾਂ ਵੱਲੋਂ ਕੱਢੇ ਗਏ ਰੋਸ ਮਾਰਚ ਵਿਚ ਸ਼ਾਮਿਲ ਸਨ। ਉਕਤ ਸਿੱਖ ਨੌਜਵਾਨ ਇਸ ਕਦਰ ਜੋਸ਼ ਵਿਚ ਆ ਗਏ ਕਿ ਉਹ ਪਿੰਡ ਗਿੱਲਪੱਤੀ ਅਤੇ ਭੋਖੜਾ ਦੇ ਵਿਚਕਾਰ ਸਥਿੱਤ ਪਾਣੀ ਵਾਲੀ ਟੈਂਕੀ ਉਪਰ ਜਾ ਚੜ੍ਹੇ। ਸਿੱਖ ਨੌਜਵਾਨ ਬੋਲੇ ਸੋ ਨਿਹਾਲ ਦੇ ਜੈਕਾਰੇ ਅਤੇ ਭਾਈ ਰਾਜੋਆਣਾਂ ਦੇ ਹੱਕ ਵਿਚ ਨਾਅਰੇਬਾਜ਼ੀ ਕਰ ਰਹੇ ਸਨ। ਨੌਜਵਾਨਾਂ ਦੇ ਸਿਰਾਂ 'ਤੇ ਪੀਲੇ ਪਟਕੇ ਬੰਨੇ ਹੋਏ ਸਨ ਅਤੇ ਹੱਥਾਂ ਵਿਚ ਕੇਸਰੀ ਝੰਡੇ ਫੜੇ ਹੋਏ ਸਨ। ਉਹ ਪਾਣੀ ਵਾਲੀ ਟੈਂਕੀ ਤੋਂ ਵਾਰ-ਵਾਰ ਭਾਈ ਰਾਜੋਆਣਾਂ ਦੀ ਰਿਹਾਈ ਦੀ ਮੰਗ ਕਰਦੇ ਰਹੇ। ਨੌਜਵਾਨਾਂ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਭਾਈ ਰਾਜੋਆਣਾ ਨੂੰ ਰਿਹਾਅ ਨਾ ਕੀਤਾ ਗਿਆ ਤਾਂ ਉਹ ਕੋਈ ਵੀ ਸਖ਼ਤ ਕਦਮ ਉਠਾ ਸਕਦੇ ਹਨ। ਜ਼ਿਲ੍ਹਾ ਪ੍ਰਸਾਸ਼ਨ ਨੇ ਵੱਡੀ ਗਿਣਤੀ ਪੁਲਿਸ ਟੈਂਕੀ ਦੇ ਆਸੇ-ਪਾਸੇ ਤਾਇਨਾਤ ਕਰ ਦਿੱਤੀ। ਨੇੜਲੇ ਪਿੰਡਾਂ ਦੇ ਕੁੱਝ ਮੋਹਤਵਰ ਵਿਅਕਤੀਆਂ ਨੇ ਪਾਣੀ ਵਾਲੀ ਟੈਂਕੀ ਉਪਰ ਚੜ੍ਹ ਕੇ ਨੌਜਵਾਨਾਂ ਨੂੰ ਹੇਠਾਂ ਉਤਰਨ ਲਈ ਮਨਾ ਲਿਆ। ਪਰ ਉਕਤ ਸਿੱਖ ਨੌਜਵਾਨਾਂ ਨੇ ਸ਼ਰਤ ਰੱਖ ਦਿੱਤੀ ਕਿ ਉਹ ਕਿਸੇ ਧਾਰਮਿਕ ਆਗੂ ਦੇ ਕਹਿਣ 'ਤੇ ਹੀ ਹੇਠਾਂ ਉਤਰਣਗੇ। ਮੌਕੇ 'ਤੇ ਪੁੱਜੇ ਜ਼ਿਲ੍ਹਾ ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਬਲਕਾਰ ਸਿੰਘ ਬਰਾੜ, ਭਾਜਪਾ ਆਗੂ ਪ੍ਰਸ਼ੋਤਮ ਦਾਸ ਟੰਡਨ, ਰਾਜਾ ਸਰਪੰਚ ਅਤੇ ਹੋਰਨਾਂ ਨੌਜਵਾਨਾਂ ਦੀ ਸ਼ਰਤ ਮੁਤਾਬਿਕ ਸੰਤ ਜਗਜੀਤ ਸਿੰਘ ਟਿਕਾਣਾ ਭਾਈ ਜਗਤਾ ਨੂੰ ਪਾਣੀ ਵਾਲੀ ਟੇੈਂਕੀ ਕੋਲ ਲਿਆਂਦਾ ਅਤੇ ਟੈਕੀ 'ਤੇ ਚੜ੍ਹੇ ਨੌਜਵਾਨਾਂ ਨਾਲ ਮੋਬਾਇਲ 'ਤੇ ਗੱਲ ਕਰਵਾਈ। ਨੌਜਵਾਨਾਂ ਨੇ ਸੰਤਾਂ ਨੂੰ ਦੱਸਿਆ ਕਿ ਸਿੱਖ ਸੰਗ਼ਤਾਂ ਨੇ ਭਾਈ ਰਾਜੋਆਣਾ ਦੀ ਰਿਹਾਈ ਦੀ ਮੰਗ ਨੂੰ ਲੈ ਕੇ ਬਠਿੰਡਾ-ਅੰਮ੍ਰਿਤਸਰ ਕੌਮੀ ਸ਼ਾਹ ਮਾਰਗ 'ਤੇ ਕਈ ਘੰਟੇ ਆਵਾਜਾਈ ਠੱਪ ਕੀਤੀ ਸੀ। ਪਰ ਕੋਈ ਵੀ ਪ੍ਰਸਾਸਨਿਕ ਅਧਿਕਾਰੀ ਉਨ੍ਹਾਂ ਦੀ ਗੱਲ ਸੁਨਣ ਨਹੀਂ ਆਇਆ। ਨੌਜਵਾਨਾਂ ਦਾ ਕਹਿਣਾ ਸੀ ਕਿ ਸਿੱਖ ਕੌਮ ਦੇ ਨੌਜਵਾਨਾਂ ਦੀ ਭਾਵਨਾਵਾਂ ਭਾਈ ਰਾਜੋਆਣਾ ਨਾਲ ਜੁੜੀਆਂ ਹੋਈਆਂ ਹਨ। ਇਸ ਲਈ ਭਾਈ ਸਾਹਿਬ ਨੂੰ ਰਿਹਾਅ ਕਰ ਦੇਣਾ ਚਾਹੀਦਾ ਹੈ। ਸੰਤ ਜਗਜੀਤ ਸਿੰਘ ਵੱਲੋ ਉਨ੍ਹਾਂ ਦੀ ਗੱਲ ਨੂੰ ਸਰਕਾਰ ਤੱਕ ਪਹੁੰਚਾਉਣ ਦੇ ਭਰੋਸੇ ਬਾਅਦ ਅੱਠੇ ਨੌਜਵਾਨ ਟੈਂਕੀ ਤੋਂ ਹੇਠਾਂ ਉੱਤਰ ਆਏ। ਨੌਜਵਾਨਾਂ ਦੇ ਪਾਣੀ ਵਾਲੀ ਟੈਂਕੀ ਤੋਂ ਉਤਰਨ ਤੋਂ ਬਾਅਦ ਜ਼ਿਲ੍ਹਾ ਪ੍ਰਸਾਸ਼ਨ ਨੂੰ ਸੁੱਖ ਦਾ ਸਾਹ ਮਿਲਿਆ। ਇਸ ਮੌਕੇ ਅਮੀਰ ਸਿੰਘ ਮੱਕੜ ਸ਼ਹਿਰੀ ਪ੍ਰਧਾਨ, ਚਰਨਜੀਤ ਸ਼ਰਮਾ ਪ੍ਰੈਸ ਸੈਕਟਰੀ ਸ਼੍ਰੋਮਣੀ ਅਕਾਲੀ ਦਲ, ਕੁਲਵੰਤ ਸਿੰਘ ਸਰਕਲ ਪ੍ਰਧਾਨ ਤੋਂ ਇਲਾਵਾ ਵੱਡੀ ਗਿਣਤੀ ਇਲਾਕਾ ਨਿਵਾਸੀ ਪੁੱਜੇ ਹੋਏ ਸਨ।

ਟੀ. ਵੀ. ਜਗਤ ਦੇ ਸਭ ਤੋਂ ਵੱਡੇ ਰਿਆਲਟੀ
ਸ਼ੋਅ ਦੇ ਆਖਰੀ 12 'ਚ ਪੁੱਜੀ ਸੋਨੀਆ

ਸਟਾਰ ਟੀ. ਵੀ. ਦੇ ਰਿਅਲਟੀ ਸ਼ੋਅ ਦੌਰਾਨ ਸੋਨੀਆ ਸ਼ਰਮਾ।

ਨੂਰਪੁਰ ਬੇਦੀ, 28 ਮਾਰਚ -ਪੰਜਾਬ ਦੇ ਅਨੰਦਪੁਰ ਸਾਹਿਬ ਦੀ ਸੁਰੀਲੀ ਕਲਾਕਾਰ ਸੋਨੀਆ ਸ਼ਰਮਾ ਨੇ ਟੀ. ਵੀ. ਜਗਤ ਦੇ ਸਭ ਤੋਂ ਵੱਡੇ ਰਿਅਲਟੀ ਸ਼ੋਅ 'ਜੋ ਜੀਤਾ ਵਹੀ ਸੁਪਰ ਸਟਾਰ-2' ਦੇ ਆਖਰੀ 12 ਪ੍ਰਤੀਯੋਗੀਆ ਵਿਚ ਦਾਖਲਾ ਪਾ ਲਿਆ ਹੈ। ਪਿਛਲੇ ਇਕ ਮਹੀਨੇ ਤੋਂ ਮੁੰਬਈ ਵਿਚ ਹੋ ਰਹੇ ਆਡੀਸ਼ਨਾਂ ਨੂੰ ਪਾਰ ਕਰਦੀ ਹੋਈ ਸੋਨੀਆ ਨੇ ਅਪਣੀ ਕਲਾ ਦਾ ਲੋਹਾ ਮੰਨਵਾਇਆ ਹੈ। ਉਹ ਇਸ ਮੁਕਾਬਲੇ ਵਿਚ ਥਾਂ ਬਣਾਉਣ ਵਾਲੀ ਉੱਤਰੀ ਭਾਰਤ ਦੇ ਰਾਜਾਂ ਦੀ ਇਕਲੌਤੀ ਕਲਾਕਾਰ ਹੈ। ਸਟਾਰ ਪਲੱਸ ਚੈਨਲ 'ਤੇ 31 ਮਾਰਚ ਤੋਂ ਹਰੇਕ ਸ਼ਨੀਵਾਰ ਅਤੇ ਐਤਵਾਰ ਰਾਤੀ 9 ਤੋਂ 10 ਵਜੇ ਪ੍ਰਸਾਰਿਤ ਹੋਣੇ ਵਾਲੇ ਇਸ ਪ੍ਰੋਗਰਾਮ ਵਿਚ ਸੋਨੀਆ ਆਪਣੀ ਸੁਰੀਲੇ ਸੁਰਾਂ ਦੀ ਕਲਾ ਦਾ ਜਾਦੂ ਬਿਖੇਰੇਗੀ। ਆਪਣੀ ਇਸ ਚੋਣ ਸਬੰਧੀ ਮੁੰਬਈ ਤੋਂ ਟੈਲੀਫੋਨ 'ਤੇ ਗੱਲਬਾਤ ਦੌਰਾਨ ਸੋਨੀਆ ਸ਼ਰਮਾ ਨੇ ਦੱਸਿਆ ਕਿ ਇਹ ਮੁਕਾਬਲਾ ਬੁਹਤ ਹੀ ਚੁਣੌਤੀਆਂ ਭਰਪੂਰ ਹੈ ਕਿਉਂਕਿ ਇਸ ਮੁਕਾਬਲੇ ਵਿਚ ਵੱਖ-ਵੱਖ ਟੀ. ਵੀ. ਚੈਨਲਾਂ 'ਤੇ ਪ੍ਰਸਾਰਤਿ ਹੋ ਚੁੱਕੇ ਰਿਅਲਟੀ ਸ਼ੋਆਂ ਦੇ ਜੇਤੂ ਕਲਾਕਾਰ ਹੀ ਭਾਗ ਲੈ ਰਹੇ ਹਨ। ਹਰੇਕ ਪ੍ਰਤੀਯੋਗੀ ਇਕ ਤੋਂ ਵੱਧ ਕੇ ਇਕ ਹੈ। ਸੋਨੀਆ ਨੇ ਦੱਸਿਆ ਕਿ ਇਸ ਰਿਅਲਟੀ ਸ਼ੋਅ ਵਿਚ ਐਂਕਰ ਦੀ ਭੂਮਿਕਾ ਪ੍ਰਸਿੱਧ ਫਿਲਮੀ ਅਦਾਕਾਰਾ ਮੰਦਿਰਾ ਬੇਦੀ ਨਿਭਾਏਗੀ। ਜਦਕਿ ਜੱਜਾਂ ਦੀ ਭੂਮਿਕਾ ਵਿਚ ਸ਼ਾਨ, ਸ਼ਾਂਤਨੂ ਮੋਏਤ੍ਰਾ ਅਤੇ ਸਵਾਨੰਦ ਕਿਰਕਿਰੇ ਸਮੇਤ ਹੋਰ ਦਿੱਗਜ਼ ਸ਼ਾਮਿਲ ਹੋਣਗੇ। ਉਸ ਨੇ ਦੱਸਿਆ ਕਿ ਇਹ ਸ਼ੋਅ ਸ਼ੁਰੂ ਤੋਂ ਹੀ ਪਬਲਿਕ ਵੋਟਿੰਗ 'ਤੇ ਆਧਾਰਿਤ ਹੋਏਗਾ। ਸੋਨੀਆ ਨੇ ਕਿਹਾ ਕਿ ਉਹ ਇਸ ਸ਼ੋਅ ਵਿਚ ਪੰਜਾਬ ਸਮੇਤ ਉੱਤਰੀ ਭਾਰਤ ਦਾ ਨਾਂਅ ਰੌਸ਼ਨ ਕਰੇਗੀ। ਉਸ ਨੇ ਦੱਸਿਆ ਕਿ ਉਹ ਪੰਜਾਬ ਦੀ ਗੁਰੂਆਂ ਦੀ ਧਰਤੀ ਅਨੰਦਪੁਰ ਸਾਹਿਬ ਦੀ ਜੰਮਪਲ ਹੈ ਅਤੇ ਆਪਣੇ ਪਿਤਾ ਦੀ ਨੌਕਰੀ ਕਾਰਨ ਉਹ ਅੱਜਕੱਲ ਕੁਰੂਕਸ਼ੇਤਰ ਵਿਖੇ ਰਹਿ ਰਹੀ ਹੈ।

ਐੱਲ. ਪੀ. ਜੀ. ਸੁਰੱਖਿਆ ਮੇਲਿਆਂ 'ਚ 13 ਹਜ਼ਾਰ
ਤੋਂ ਵਧ ਗ੍ਰਹਿਣੀਆਂ ਨੇ ਹਿੱਸਾ ਲਿਆ

ਜਲੰਧਰ, 28 ਮਾਰਚ- ਹਿੰਦੁਸਤਾਨ ਪੈਟਰੋਲੀਅਮ ਕਾਰਪੋਰੇਸ਼ਨ ਦੀ ਐਲ. ਪੀ. ਜੀ. ਯੂਨਿਟ ਵੱਲੋਂ ਆਯੋਜਿਤ ਸੁਰੱਖਿਆ ਸੰਚੇਤਨਾ ਮੁਹਿੰਮ ਮੇਲੇ 'ਚ 13000 ਗ੍ਰਹਿਣੀਆਂ ਨਾਲ ਇਕੱਠੇ ਹੋ ਕੇ ਪੰਜਾਬ 'ਚ ਹੁਸ਼ਿਆਰਪੁਰ, ਬਠਿੰਡਾ, ਲੁਧਿਆਣਾ, ਜਲੰਧਰ ਜ਼ਿਲ੍ਹਿਆਂ 'ਚ ਘਰ ਵਿਚ ਰਸੋਈ ਸੁਰੱਖਿਆ ਸਮੱਸਿਆਵਾਂ ਦੇ ਬਾਰੇ 'ਚ ਜਾਗਰੂਕਤਾ ਫੈਲਾਈ। ਗ੍ਰਹਿਣੀਆਂ ਵੱਲੋਂ ਦਸੂਹਾ, ਭਾਂਗਲਾ, ਗੜ੍ਹਦੀਵਾਲਾ, ਹਰਿਆਣਾ, ਬੰਗਾ ਅਤੇ ਮਾਹਿਲਪੁਰ ਜਿਹੇ ਕਸਬਿਆਂ ਨਾਲ ਪ੍ਰਭਾਵਸ਼ਾਲੀ ਸਾਂਝੀਦਾਰੀ ਦੇਖੀ ਗਈ। ਐੱਚ. ਪੀ. ਗੈੱਸ ਨੇ ਇਸ ਪ੍ਰੋਗਰਾਮ ਦਾ ਆਯੋਜਨ ਸੁਰੱਖਿਆ ਸੰਚੇਤਨਾ ਮੁਹਿੰਮ ਦੇ ਤਹਿਤ ਪਿੰਡ ਮੇਲਿਆਂ ਦੇ ਤੌਰ 'ਤੇ ਕੀਤਾ ਸੀ, ਜੋ ਭਾਰਤ ਦਾ ਮੌਲਿਕ ਮਨੋਰੰਜਨ ਸਾਧਨ ਹੈ। ਇਸ ਵਿਚ ਪਿੰਡ ਦੀਆਂ ਸਾਰੀਆਂ ਔਰਤਾਂ ਨੇ ਗੰਭੀਰਤਾ ਨਾਲ ਹਿੱਸਾ ਲਿਆ। ਭਾਰਤ ਦੇ ਪੇਂਡੂ ਖੇਤਰਾਂ ਵਿਚ ਐੱਲ. ਪੀ. ਜੀ. ਦੇ ਵਧਦੇ ਹੋਏ ਪ੍ਰਯੋਗ ਦੇ ਨਾਲ ਐੱਚ. ਪੀ. ਗੈੱਸ ਦਾ ਮੁੱਖ ਕੇਂਦਰਿਤ ਇਨ੍ਹਾਂ ਖੇਤਰਾਂ ਵਿਚ ਐੱਲ. ਪੀ. ਜੀ. ਗੈੱਸ ਦੇ ਸੁਰੱਖਿਅਤ ਇਸਤੇਮਾਲ ਦੇ ਪ੍ਰਤੀ ਜਾਗਰੂਕਤਾ ਵਧਾਉਣ ਵੱਲ ਹੈ। ਇਸ ਮੁਹਿੰਮ ਦੇ ਬਾਰੇ 'ਚ ਐੱਚ. ਪੀ. ਸੀ. ਐੱਲ. ਦੇ ਡੀ. ਜੀ. ਐੱਮ., ਐੱਲ. ਪੀ. ਜੀ. ਸੇਲਜ਼ ਐਂਡ ਮਾਰਕੀਟਿੰਗ ਸ਼੍ਰੀ ਸ਼ੁਭੰਕਰ ਬਿਸਵਾਸ ਨੇ ਦੱਸਿਆ ਕਿ ਪਿਛਲੇ ਦੋ ਵਰ੍ਹਿਆਂ ਵਿਚ ਇਸ ਅਭਿਆਨ ਦੇ ਦੋ ਪੱਧਰਾਂ ਨੂੰ ਪਾਰ ਕਰ ਲਿਆ ਹੈ। ਇਸ ਸਾਲ ਸਾਡਾ ਟੀਚਾ 3 ਟੀਅਰ ਅਤੇ 4 ਟੀਅਰ ਕਸਬਿਆਂ ਵਿਚ ਸਥਿਤ ਔਰਤਾਂ 'ਤੇ ਵਿਸ਼ੇਸ਼ ਕੇਂਦਰਿਤ ਕਰਨ ਦੇ ਨਾਲ ਐੱਸ. ਈ. ਬੀ./ਸੀ. ਵਿਚ 50 ਲੱਖ ਲੋਕਾਂ ਤੱਕ ਪਹੁੰਚਣ ਦਾ ਹੈ।'

ਪਹਿਲੀ ਤੋਂ ਟੋਲ ਟੈਕਸ 'ਚ 10 ਫੀਸਦੀ ਵਾਧਾ

ਮੋਗਾ, 28 ਮਾਰਚ -ਪੰਜਾਬ ਅੰਦਰ ਸੜਕ ਉੱਪਰ ਚੱਲਣ ਵਾਲੇ ਹਰੇਕ ਵਾਹਨ ਉੱਪਰ ਲੱਗ ਰਹੇ ਟੋਲ ਟੈਕਸ ਵਿਚ 1 ਅਪ੍ਰੈਲ ਤੋਂ ਵਾਧਾ ਕੀਤਾ ਜਾ ਰਿਹਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੀ.ਡੀ. ਅਗਰਵਾਲ ਇਨਫਰਾਟੈਕਚਰ ਪ੍ਰਾਈਵੇਟ ਲਿਮਟਿਡ ਦੇ ਡਾਇਰੈਕਟਰ ਮਾਰਦਵ ਸੋਨੀ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਨਾਲ ਹੋਏ ਸਮਝੌਤੇ ਤਹਿਤ ਟੋਲ ਟੈਕਸ ਵਿਚ ਹਰ ਸਾਲ 10 ਫੀਸਦੀ ਦਾ ਵਾਧਾ ਕੀਤਾ ਜਾਂਦਾ ਹੈ ਜੋ ਇਸ ਸਾਲ ਵੀ 1 ਅਪ੍ਰੈਲ 2012 ਤੋਂ 10 ਪ੍ਰਤੀਸ਼ਤ ਦਾ ਵਾਧਾ ਕੀਤਾ ਜਾਵੇਗਾ। ਜਿਸ ਨਾਲ ਸੜਕ ਉੱਪਰ ਚੱਲਣ ਵਾਲੇ ਹਰ ਵਾਹਨ ਚਾਲਕ ਨੂੰ ਵਧਿਆ ਹੋਇਆ ਟੋਲ ਟੈਕਸ ਦੇਣਾ ਪਵੇਗਾ।

ਸ਼ਿਵ ਸੈਨਾ ਪ੍ਰਧਾਨ ਵੱਲੋਂ ਭੁੱਖ ਹੜਤਾਲ

ਸ਼ਿਵ ਸੈਨਾ ਮਹਾਂ ਸੰਗਰਾਮ ਦੇ ਕੌਮੀ ਪ੍ਰਧਾਨ ਸ੍ਰੀ ਦਿਆਲ ਸਿੰਘ ਨੰਦਾ ਨੂੰ
ਸਨਮਾਨਿਤ ਕਰਦੇ ਹੋਏ ਸਿੱਖ ਜਥੇਬੰਦੀਆਂ ਦੇ ਆਗੂ।

ਸੰਗਰੂਰ, 28 ਮਾਰਚ - ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ 31 ਮਾਰਚ ਨੂੰ ਦਿੱਤੀ ਜਾਣ ਵਾਲੀ ਫਾਂਸੀ ਦੇ ਵਿਰੋਧ ਵਜੋਂ ਜਿਥੇ ਸਮੁੱਚੇ ਸਿੱਖ ਜਥੇਬੰਦੀਆਂ ਵਲੋਂ ਪੰਜਾਬ ਬੰਦ ਦਾ ਸੱਦਾ ਦਿੱਤਾ ਗਿਆ ਹੈ ਉਥੇ ਹੀ ਸ਼ਿਵ ਸੈਨਾ ਮਹਾਂ ਸੰਗਰਾਮ ਦੇ ਕੌਮੀ ਪ੍ਰਧਾਨ ਸ੍ਰੀ ਦਿਆਲ ਸਿੰਘ ਨੰਦਾ ਵੱਲੋਂ ਸੰਗਰੂਰ ਦੇ ਡਿਪਟੀ ਕਮਿਸ਼ਨਰ ਦਫ਼ਤਰ ਅੱਗੇ ਭਾਈ ਰਾਜੋਆਣਾ ਦੀ ਰਿਹਾਈ ਲਈ ਆਪਣੀ ਭੁੱਖ ਹੜਤਾਲ ਸ਼ੁਰੂ ਕਰ ਦਿੱਤੀ ਸੀੁੰ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਸ੍ਰੀ ਨੰਦਾ ਨੇ ਕਿਹਾ ਕਿ ਉਹ ਭਾਈ ਬਲਵੰਤ ਸਿੰਘ ਰਾਜੋਆਣਾ ਨੂੰ ਫਾਂਸੀ ਦੀ ਸਜ਼ਾ ਦੇਣ ਦਾ ਵਿਰੋਧ ਕਰਦੇ ਹਨ ਅਤੇ ਉਨ੍ਹਾਂ ਦੀ ਰਿਹਾਈ ਤੱਕ ਉਹ ਭੁੱਖ ਹੜਤਾਲ ਜਾਰੀ ਰੱਖਣਗੇ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿਚ ਅਮਨ ਬਹਾਲੀ ਅਤੇ ਸ਼ਾਂਤੀ ਨੂੰ ਕਾਇਮ ਰੱਖਿਆ ਜਾਣਾ ਚਾਹੀਦਾ ਹੈ। ਭੁੱਖ ਹੜਤਾਲ 'ਤੇ ਬੈਠੇ ਸ੍ਰੀ ਨੰਦਾ ਨੂੰ ਸਿੱਖ ਜਥੇਬੰਦੀਆਂ ਵਲੋਂ ਸਿਰੋਪਾ ਪਾ ਕੇ ਸਨਮਾਨਿਤ ਵੀ ਕੀਤਾ ਗਿਆ। ਇਸ ਮੌਕੇ ਉਨ੍ਹਾਂ ਨਾਲ ਸ਼ਿਵ ਸੇੈਨਾ ਮਹਾ ਸੰਗਰਾਮ ਦੇ ਸੂਬਾ ਪ੍ਰਧਾਨ ਅਵਤਾਰ ਸਿੰਘ ਰਾਜਾ, ਸੁਰਿੰਦਰ ਸਿੰਘ ਸੇਖੋਂ, ਲੱਕੀ ਸ਼ਰਮਾ, ਸਿਕੰਦਰ ਮਾਨ ਅਤੇ ਰਾਜ ਕੁਮਾਰ ਧੂਰੀ ਵੀ ਮੌਜੂਦ ਸਨ।

ਸੜਕ ਬਣਾਉਣ ਤੋਂ ਪਹਿਲਾਂ ਸੀਵਰੇਜ਼ ਠੀਕ ਕਰਨ ਦੀ ਮੰਗ

ਅਬੋਹਰ, 28 ਮਾਰਚ -ਮਾਡਲ ਟਾਊਨ ਨਿਵਾਸੀਆਂ ਨੇ ਅਧਿਕਾਰੀਆਂ ਨੂੰ ਪੱਤਰ ਭੇਜ ਕੇ ਸੜਕ ਬਣਾਉਣ ਤੋਂ ਪਹਿਲਾਂ ਸੀਵਰੇਜ਼ ਪ੍ਰਬੰਧ ਸੁਧਾਰਨ ਦੀ ਮੰਗ ਕੀਤੀ ਹੈ। ਜਾਣਕਾਰੀ ਦਿੰਦਿਆਂ ਮਲਕੀਤ ਸਿੰਘ, ਟੀ. ਕੇ. ਦੱਤਾ, ਰੋਸ਼ਨ ਲਾਲ, ਮੋਹਨ ਲਾਲ, ਓ.ਪੀ. ਪੁਜਾਰਾ, ਇੰਦਰਜੀਤ ਸਿੰਘ ਤੇ ਦਰਸ਼ੀ ਗਰੋਵਰ ਨੇ ਦੱਸਿਆ ਕਿ ਉਨ੍ਹਾਂ ਦੇ ਮੁਹੱਲੇ 'ਚ ਲੱਖਾਂ ਰੁਪਏ ਖ਼ਰਚ ਕੇ ਸੜਕ ਬਣ ਰਹੀ ਹੈ। ਪਰ ਇਸ ਨਾਲ ਸਮੱਸਿਆ ਹੱਲ ਨਹੀਂ ਹੋਣੀ। ਕਿਉਂਕਿ ਸੀਵਰੇਜ ਸਿਸਟਮ ਦਾ ਮਾੜਾ ਹਾਲ ਹੈ। ਉਨ੍ਹਾਂ ਮੰਗ ਕੀਤੀ ਹੈ ਕਿ ਸੜਕ ਬਣਨ ਤੋਂ ਪਹਿਲਾਂ ਸੀਵਰੇਜ ਸਿਸਟਮ ਵਿਚ ਸੁਧਾਰ ਕੀਤਾ ਜਾਵੇ। ਨਹੀਂ ਤਾਂ ਪਰਨਾਲਾ ਉੱਥੇ ਦਾ ਉੱਥੇ ਹੀ ਰਹਿ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਸੀਵਰੇਜ਼ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਪਹਿਲਾਂ ਹੀ ਬਿਮਾਰੀਆਂ ਫੈਲਣ ਦਾ ਖ਼ਤਰਾ ਹੈ।

ਥਾਣੇਦਾਰ ਤਬਦੀਲ

ਅਬੋਹਰ, 28 ਮਾਰਚ -ਉਪ ਮੰਡਲ ਅਧੀਨ ਪੈਂਦੇ ਥਾਣਾ ਖੂਈਆਂ ਸਰਵਰ ਦੇ ਥਾਣੇਦਾਰ ਵੀਰ ਚੰਦ ਨੂੰ ਇੱਥੋਂ ਤਬਦੀਲ ਕਰਕੇ ਥਾਣਾ ਸਦਰ ਜਲਾਲਾਬਾਦ ਭੇਜ ਦਿੱਤਾ ਗਿਆ ਹੈ। ਜਦਕਿ ਉਨ੍ਹਾਂ ਦੀ ਥਾਂ 'ਤੇ ਸ: ਦਰਸ਼ਨ ਸਿੰਘ ਨੂੰ ਨਿਯੁਕਤ ਕੀਤਾ ਗਿਆ ਹੈ ਜੋ ਕਿ ਫ਼ਰੀਦਕੋਟ ਤੋਂ ਤਬਦੀਲ ਹੋ ਕਿ ਇੱਥੇ ਆਏ ਹਨ ਤੇ ਇਸ ਤੋਂ ਪਹਿਲਾਂ ਵੀ ਉਹ ਕਾਫ਼ੀ ਸਮਾਂ ਥਾਣਾ ਖੂਈਆਂ ਸਰਵਰ ਵਿਚ ਤੈਨਾਤ ਰਹੇ ਹਨ।

ਖੇਤਰੀ ਪਾਰਟੀਆਂ ਇੱਕਜੁੱਟ ਹੋ ਕੇ ਕੇਂਦਰ ਦੀ ਘਪਲੇਬਾਜ਼ ਸਰਕਾਰ
ਤੋਂ ਜਨਤਾ ਦਾ ਖਹਿੜਾ ਛੁਡਾਉਣ-ਓਮ ਪ੍ਰਕਾਸ਼ ਚੌਟਾਲਾ

ਇਨੈਲੋ ਮੁਖੀ ਓਮ ਪ੍ਰਕਾਸ਼ ਚੌਟਾਲਾ ਚੰਦੂਮਾਜਰਾ ਪਰਿਵਾਰ
ਨਾਲ ਦੁੱਖ ਸਾਂਝਾ ਕਰਦੇ ਹੋਏ।

ਫ਼ਤਹਿਗੜ੍ਹ ਸਾਹਿਬ, 28 ਮਾਰਚ  - ਇਨੈਲੋ ਮੁਖੀ ਅਤੇ ਹਰਿਆਣਾ ਦੇ ਸਾਬਕਾ ਮੁੱਖ ਮੰਤਰੀ ਓਮ ਪ੍ਰਕਾਸ਼ ਚੌਟਾਲਾ ਨੇ ਪੰਜਾਬ ਵਾਸੀਆਂ ਵਲੋਂ ਬਲਵੰਤ ਸਿੰਘ ਰਾਜੋਆਣਾ ਦੀ ਫਾਂਸੀ ਦੀ ਸਜ਼ਾ ਰੱਦ ਕਰਵਾਉਣ ਦੇ ਲਈ ਅਮਨ ਸ਼ਾਂਤੀ ਨਾਲ ਦਿੱਤੇ ਗਏ ਪੰਜਾਬ ਬੰਦ ਦੇ ਸੱਦੇ ਦੀ ਭਰਪੂਰ ਸ਼ਲਾਘਾ ਕਰਦਿਆਂ ਕਿਹਾ ਕਿ ਅਮਨ ਅਮਾਨ ਨਾਲ ਕੀਤਾ ਗਿਆ ਰੋਸ ਪ੍ਰਰਦਰਸ਼ਨ ਅਸਰਦਾਇਕ ਹੁੰਦਾ ਹੈ। ਸ੍ਰੀ ਚੌਟਾਲਾ ਅੱਜ ਪਿੰਡ ਚੰਦੂਮਾਜਰਾ ਵਿਖੇ ਪ੍ਰੋ. ਪ੍ਰੇਮ ਸਿੰਘ ਚੰਦੂਮਾਜਰਾ ਨਾਲ ਉਨ੍ਹਾਂ ਦੇ ਭਰਾ ਉਜਾਗਰ ਸਿੰਘ ਦੇ ਦਿਹਾਂਤ 'ਤੇ ਦੁੱਖ ਸਾਂਝਾ ਕਰਨ ਆਏ ਸਨ। ਸ੍ਰੀ ਚੌਟਾਲਾ ਨੇ ਕਿਹਾ ਕਿ ਪੰਜਾਬੀਆਂ ਦਾ ਦੇਸ਼ ਨੂੰ ਆਜ਼ਾਦ ਕਰਵਾਉਣ ਲਈ ਕੀਤੀਆਂ ਗਈਆਂ ਕੁਰਬਾਨੀਆਂ ਦਾ ਬਹੁਤ ਵੱਡਾ ਯੋਗਦਾਨ ਹੈ। ਉਨ੍ਹਾਂ ਕੇਂਦਰ ਦੀ ਯੂ. ਪੀ. ਏ. ਸਰਕਾਰ 'ਤੇ ਵਰਦਿਆਂ ਕਿਹਾ ਕਿ ਇਹ ਸਰਕਾਰ ਘਪਲਿਆਂਦੀ ਸਰਕਾਰ ਹੈ। ਉਨ੍ਹਾਂ ਕਿਹਾ ਕਿ ਨਵਾਂ ਸਾਹਮਣੇ ਆਇਆ ਕੋਲਾ ਘੋਟਾਲਾ 11 ਲੱਖ ਹਜ਼ਾਰ ਕਰੋੜ ਦਾ ਨਹੀਂ ਸਗੋਂ 42 ਲੱਖ ਹਜ਼ਾਰ ਕਰੋੜ ਦਾ ਹੈ। ਦੇਸ਼ ਦੀਆਂ ਖੇਤਰੀ ਪਾਰਟੀਆਂ ਨੂੰ ਚਾਹੀਦਾ ਹੈ ਕਿ ਉਹ ਇਸ ਸਰਕਾਰ ਨੂੰ ਸੱਤਾ ਤੋਂ ਲਾਂਭੇ ਕਰਨ ਲਈ ਅੱਗੇ ਆਉਣ। ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਸਜ਼ਾ ਰੱਦ ਕਰਵਾਉਣ ਲਈ ਪੰਜਾਬ ਬੰਦ ਦੌਰਾਨ ਅਮਨ ਸ਼ਾਂਤੀ ਕਾਇਮ ਰੱਖਣ ਲਈ ਉਨ੍ਹਾਂ ਪੰਜਾਬ ਦੇ ਲੋਕਾਂ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ਸ਼੍ਰੋਮਣੀ ਕਮੇਟੀ ਮੈਂਬਰ ਕਰਨੈਲ ਸਿੰਘ ਪੰਜੋਲੀ, ਬਾਬਾ ਰਣਜੀਤ ਸਿੰਘ ਢੱਡਰੀਆਂ ਵਾਲੇ, ਗੁਰਵਿੰਦਰ ਸਿੰਘ ਜਿੰਦੂ ਚੇਅਰਮੈਨ ਜ਼ਿਲ੍ਹਾ ਪ੍ਰੀਸ਼ਦ ਮੋਹਾਲੀ, ਸਿਮਰਨਜੀਤ ਸਿੰਘ ਚੰਦੂਮਾਜਰਾ ਡਿਪਟੀ ਐਡਵੋਕੇਟ ਜਨਰਲ, ਐਡਵੋਕੇਟ ਨਰਿੰਦਰ ਸਿੰਘ ਟਿਵਾਣਾ, ਐਡਵੋਕੇਟ ਜਸਵਿੰਦਰ ਸਿੰਘ ਗਰੇਵਾਲ, ਹਰਭਜਨ ਸਿੰਘ ਚਨਾਰਥਲ, ਬਲਜੀਤ ਸਿੰਘ ਭੁੱਟਾ, ਜਰਨੈਲ ਸਿੰਘ ਹਿੰਦੂਪੁਰ, ਸੁਖਬੀਰ ਸਿੰਘ, ਜਸਵਿੰਦਰ ਸਿੰਘ ਕੌਂਸਲਰ ਪਟਿਆਲਾ, ਜਗਦੀਸ਼ ਕੁਮਾਰ ਜੱਗਾ ਵਾਈਸ ਚੇਅਰਮੈਨ ਰਾਜਪੁਰਾ, ਨਿਰਪਾਲ ਸਿੰਘ ਵੜਿੰਗ ਚੇਅਰਮੈਨ ਪੀਏਡੀਬੀ ਰਾਜਪੁਰਾ, ਹਰਵਿੰਦਰਪਾਲ ਸਿੰਘ ਹਰਪਾਲਪੁਰ ਚੇਅਰਮੈਨ ਮਾਰਕੀਟ ਕਮੇਟੀ ਪਟਿਆਲਾ, ਹਰਿੰਦਰਪਾਲ ਸਿੰਘ ਚੰਦੂਮਾਜਰਾ ਚੇਅਰਮੈਨ ਸਹਿਕਾਰੀ ਬੈਂਕ ਪਟਿਆਲਾ, ਜਰਨੈਲ ਸਿੰਘ ਬਲਸੂਆਂ ਵਾਈਸ ਚੇਅਰਮੈਨ ਮਾਰਕੀਟ ਕਮੇਟੀ ਰਾਜਪੁਰਾ, ਹਰਦੇਵ ਸਿੰਘ ਹਰਪਾਲਪੁਰ, ਨਿਰਦੇਵ ਸਿੰਘ ਆਕੜੀ, ਅਵਰਿੰਦਰ ਸਿੰਘ ਕੰਗ, ਟੋਡਰ ਸਿੰਘ, ਮਹਿੰਦਰਜੀਤ ਸਿੰਘ ਖਰੋੜੀ, ਜਗਜੀਤ ਸਿੰਘ ਕੋਹਲੀ, ਸੁਖਦੇਵ ਸਿੰਘ ਢੀਂਡਸਾ ਸਾਬਕਾ ਇੰਸਪੈਕਟਰ, ਕੁਲਦੀਪ ਸਿੰਘ ਤਿਸਾਬਲੀ, ਜਿੰਦਰ ਤਿਸਾਬਲੀ ਆਦਿ ਨੇ ਵੀ ਚੰਦੂਮਾਜਰਾ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟਾਈ।

 ਵਿਧਾਨ ਸਭਾ 'ਚ ਹੰਗਾਮਾ
ਜਾਖੜ ਨੇ ਸ਼ਰਮਾ ਤੇ ਭਾਜਪਾ ਨੂੰ ਲਲਕਾਰਿਆ

ਚੰਡੀਗੜ੍ਹ, 28 ਮਾਰਚ-ਅੱਜ ਪੰਜਾਬ ਵਿਧਾਨ ਸਭਾ ਵਿਚ ਸਿਫਰ ਕਾਲ ਦੇ ਦੌਰਾਨ ਮਰਹੂਮ ਮੁੱਖ ਮੰਤਰੀ ਸ. ਬੇਅੰਤ ਸਿੰਘ ਦੇ ਹੱਤਿਆ ਕੇਸ ਵਿਚ ਫਾਂਸੀ ਦੀ ਸਜ਼ਾ ਦਾ ਸਾਹਮਣਾ ਕਰ ਰਹੇ ਭਾਈ ਬਲਵੰਤ ਸਿੰਘ ਰਾਜੋਆਣਾ ਨੂੰ ਬਚਾਉਣ ਲਈ ਦਿੱਤੀ ਗਈ 'ਪੰਜਾਬ ਬੰਦ' ਦੇ ਸੱਦੇ ਨੂੰ ਲੈ ਕੇ ਹੰਗਾਮਾ ਹੋ ਗਿਆ ਜੋ ਲਗਪਗ 10 ਮਿੰਟ ਤੱਕ ਜਾਰੀ ਰਿਹਾ। ਜਿਉਂ ਹੀ ਸਵੇਰੇ 10 ਵਜੇ ਸਦਨ ਦੀ ਕਾਰਵਾਈ ਸ਼ੁਰੂ ਹੋਈ ਤਾਂ ਵਿਰੋਧੀ ਦਲ ਦੇ ਆਗੂ ਸੁਨੀਲ ਜਾਖੜ ਨੇ ਇਕ ਅਖਬਾਰ ਲਹਿਰਾਉਂਦੇ ਹੋਏ ਦੋਸ਼ ਲਾਇਆ ਕਿ ਇਸ ਸਦਨ ਦੇ ਅਕਾਲੀ ਮੈਂਬਰ ਸ੍ਰੀ ਨਰੇਸ਼ ਸ਼ਰਮਾ ਜ਼ੀਰਕਪੁਰ ਵਿਚ ਲੋਕਾਂ ਨੂੰ ਭੜਕਾ ਰਹੇ ਹਨ ਤੇ ਦੁਕਾਨਾਂ ਬੰਦ ਕਰਾਉਣ ਲਈ ਮਜ਼ਬੂਰ ਕਰ ਰਹੇ ਹਨ, ਜਿਸ ਤੋਂ ਇਉਂ ਲੱਗਦਾ ਹੈ ਕਿ ਰਾਜ ਸਰਕਾਰ ਆਪ ਹੀ ਅਮਨ-ਕਾਨੂੰਨ ਨੂੰ ਖਰਾਬ ਕਰਨ ਵਿਚ ਲੱਗੀ ਹੋਈ ਹੈ। ਸਰਕਾਰ ਜੁਆਬ ਦੇਵੇ ਕਿ ਉਹ ਇਸ ਬਾਰੇ ਕੀ ਕਰ ਰਹੀ ਹੈ? ਇਸ ਦੇ ਨਾਲ ਹੀ ਉਨ੍ਹਾਂ ਭਾਜਪਾ ਨੂੰ ਲਪੇਟਦੇ ਹੋਏ ਕਿਹਾ ਕਿ ਉਹ ਇਸ ਨਾਜ਼ਕ ਮਾਮਲੇ ਬਾਰੇ ਚੁੱਪ ਕਿਉਂ ਬੈਠੀ ਹੈ? ਉਹ ਆਪਣਾ ਪੱਖ ਸਪੱਸ਼ਟ ਕਰੇ। ਇਸ 'ਤੇ ਸਦਨ ਵਿਚ ਕੁਝ ਸ਼ੋਰ-ਸ਼ਰਾਬਾ ਜਿਹਾ ਮੱਚ ਗਿਆ ਤੇ ਕਈ ਅਕਾਲੀ ਅਤੇ ਕਾਂਗਰਸੀ ਮੈਂਬਰ ਆਪੋ ਆਪਣੀਆਂ ਸੀਟਾਂ 'ਤੇ ਖੜ੍ਹੇ ਹੋ ਕੇ ਕੁਝ ਕਹਿਣ ਲੱਗੇ ਜੋ ਪੂਰਾ ਪ੍ਰੈਸ ਗੈਲਰੀ ਤੱਕ ਸੁਣਾਈ ਨਾ ਦਿੱਤਾ। ਪਰ ਮਾਲ ਮੰਤਰੀ ਸ. ਬਿਕਰਮ ਸਿੰਘ ਮਜੀਠੀਆ ਨੇ ਉਚੀ ਦੇਣੀ ਕਿਹਾ ਕਿ ਸ੍ਰੀ ਸ਼ਰਮਾ ਤਾਂ ਲੋਕਾਂ ਨੂੰ ਸਮਝਾਉਣ ਬੁਝਾਉਣ ਅਤੇ ਅਮਨ ਸ਼ਾਂਤੀ ਬਣਾਈ ਰੱਖਣ ਬਾਰੇ ਅਪੀਲਾਂ ਕਰਨ ਗਏ ਸਨ। ਕਾਂਗਰਸੀ ਮੈਂਬਰ, ਭੜਕਾਊ ਗੱਲਾਂ ਕਰ ਕੇ ਮਾਹੌਲ ਖਰਾਬ ਨਾ ਕਰਨ। ਇਸ ਮੌਕੇ 'ਤੇ ਸ੍ਰੀ ਨਰੇਸ਼ ਸ਼ਰਮਾ ਜੋ ਕਿ ਹੰਗਾਮਾ ਅਰਾਈ ਦੇ ਦੌਰਾਨ ਸਦਨ ਵਿਚ ਮੌਜੂਦ ਸਨ ਨੇ ਆਪਣੀ ਸੀਟ 'ਤੇ ਖੜ੍ਹੇ ਹੋ ਕੇ ਸਪੱਸ਼ਟੀਕਰਨ ਦੇਣ ਦੀ ਕੋਸ਼ਿਸ਼ ਕਰਨ ਲੱਗੇ ਤਾਂ ਸ. ਮਜੀਠੀਆ ਦੇ ਉੱਤਰ ਦੇਣ ਪਿੱਛੋਂ ਉਹ ਆਪਣੀ ਸੀਟ 'ਤੇ ਬੈਠ ਗਏ। ਦਿਲਚਸਪ ਤੇ ਵਰਨਣਯੋਗ ਗੱਲ ਇਹ ਹੈ ਕਿ ਅੱਜ 14ਵੀਂ ਵਿਧਾਨ ਸਭਾ ਦੇ ਪਹਿਲੇ ਇਜਲਾਸ ਦੇ ਆਖਰੀ ਦਿਨ ਹੋਈ ਹੰਗਾਮਾ ਅਰਾਈ ਸਮੇਂ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ, ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ, ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੇ ਕਾਂਗਰਸ ਵਿਧਾਇਕ ਦਲ ਦੀ ਸਾਬਕਾ ਨੇਤਾ ਬੀਬੀ ਰਾਜਿੰਦਰ ਕੌਰ ਭੱਠਲ ਗੈਰ ਹਾਜ਼ਰ ਸਨ। ਇਨ੍ਹਾਂ ਦੀ ਗੈਰ ਹਾਜ਼ਰੀ ਸਦਨ ਵਿਚ ਦੋਵੇਂ ਧਿਰਾਂ ਮਹਿਸੂਸ ਕਰ ਰਹੀਆਂ ਸਨ ਅਤੇ ਭਾਜਪਾ ਵਾਲੇ ਚੁੱਪ ਕਰਕੇ ਸਭ ਕੁਝ ਸੁਣ ਰਹੇ ਸਨ। ਪਰ ਸੰਸਦੀ ਮਾਮਲਿਆਂ ਬਾਰੇ ਮੰਤਰੀ ਸ੍ਰੀ ਮਦਨ ਮੋਹਨ ਮਿੱਤਲ ਨੇ ਕਾਂਗਰਸੀ ਮੈਂਬਰਾਂ ਦੇ ਵਿਹਾਰ ਬਾਰੇ ਹੀ ਕੁਝ ਗੱਲਾਂ ਕਹੀਆਂ ਅਸਲ ਮੁੱਦੇ ਨੂੰ ਛੋਹਿਆ ਤੱਕ ਨਾ । ਹਾਲਾਂਕਿ ਉਸ ਸਮੇਂ ਭਾਜਪਾ ਵਿਧਾਇਕ ਦਲ ਦੇ ਆਗੂ ਭਗਤ ਚੂਨੀ ਲਾਲ ਤੇ ਭਾਜਪਾ ਪੰਜਾਬ ਦੇ ਪ੍ਰਧਾਨ ਅਸ਼ਵਨੀ ਸ਼ਰਮਾ ਸਦਨ ਵਿਚ ਮੌਜੂਦ ਸਨ। ਕਾਂਗਰਸ ਦੇ ਚਰਨਜੀਤ ਸਿੰਘ ਚੰਨੀ, ਤ੍ਰਿਪਤ ਰਾਜਿੰਦਰ ਸਿੰਘ ਬਾਜਵਾ ਤੇ ਭਾਜਪਾ ਦੇ ਮਨੋਰੰਜਨ ਕਾਲੀਆ ਅਤੇ ਆਜ਼ਾਦ ਮੈਂਬਰ ਬਲਵਿੰਦਰ ਸਿੰਘ ਬੈਂਸ ਨੇ ਵੀ ਕਈ ਮਾਮਲੇ ਉਠਾਏ ਪਰ ਉਨ੍ਹਾਂ ਦਾ ਸਦਨ ਨੇ ਕੋਈ ਗੰਭੀਰ ਨੋਟਿਸ ਨਾ ਲਿਆ। ਇਸ ਦੌਰਾਨ ਅੰਮ੍ਰਿਤਸਰ ਸ਼ਹਿਰ ਦੇ ਇਕ ਹਲਕੇ ਤੋਂ ਭਾਜਪਾ ਟਿਕਟ 'ਤੇ ਜਿੱਤੀ ਡਾ. ਨਵਜੋਤ ਕੌਰ ਸਿੱਧੂ ਨੇ ਅਜੇ ਤੱਕ ਵੀ ਵਿਧਾਇਕ ਵਜੋਂ ਸਹੁੰ ਨਹੀਂ ਚੁੱਕੀ। ਦੱਸਿਆ ਗਿਆ ਹੈ ਕਿ ਉਹ ਕੁਝ ਬਿਮਾਰ ਹਨ ਜਿਸ ਕਾਰਨ ਉਨ੍ਹਾਂ ਇਸ ਨਵੀਂ ਵਿਧਾਨ ਸਭਾ ਦੇ ਪਹਿਲੇ ਇਜਲਾਸ ਵਿਚ ਹਾਜ਼ਰੀ ਤੱਕ ਨਹੀਂ ਲਗਵਾਈ। ਹੁਣ ਉਨ੍ਹਾਂ ਨੂੰ ਸਪੀਕਰ ਸ. ਚਰਨਜੀਤ ਸਿੰਘ ਅਟਵਾਲ ਕਿਸੇ ਦਿਨ ਵਿਧਾਇਕ ਵਜੋਂ ਉਨ੍ਹਾਂ ਨੂੰ ਸਹੁੰ ਚੁਕਾਉਣਗੇ। ਕਾਨੂੰਨੀ ਪੱਖ ਤੋਂ ਡਾ. ਨਵਜੋਤ ਕੌਰ ਸਿੱਧੂ ਉਸ ਦਿਨ ਤੋਂ ਹੀ ਬਕਾਇਦਾ ਵਿਧਾਇਕ ਸਮਝੇ ਜਾਣਗੇ, ਜਦੋਂ ਉਹ ਸਹੁੰ ਚੁੱਕਣਗੇ।

ਵੈਟ ਦੀ ਦੁਗਣੀ ਰਕਮ ਨਗਰ ਕੌਂਸਲਾਂ 'ਚ ਭੇਜਣ ਦੀ ਮੰਗ

ਜਲੰਧਰ, 28 ਮਾਰਚ- ਪੰਜਾਬ ਮੁਲਾਜ਼ਮ ਮਿਉਂਸਪਲ ਐਕਸ਼ਨ ਕਮੇਟੀ ਦੇ ਆਗੂ ਗੁਰਪ੍ਰੀਤ ਸਿੰਘ ਵਾਲੀਆ ਨੇ ਸਰਕਾਰ ਤੋਂ ਮੰਗ ਕਰਦੇ ਹੋਏ ਕਿਹਾ ਹੈ ਕਿ ਇਸ ਵੇਲੇ ਰਾਜ ਭਰ ਦੀਆਂ ਨਗਰ ਪੰਚਾਇਤਾਂ ਤੇ ਨਗਰ ਕੌਂਸਲਾਂ ਦੀ ਵਿੱਤੀ ਹਾਲਤ ਕਾਫ਼ੀ ਮਾੜੀ ਹੈ ਤੇ ਇਸ ਲਈ ਉਨ੍ਹਾਂ ਨੂੰ ਵੈਟ ਦੀ ਰਕਮ ਦੁੱਗਣੀ ਭੇਜਣ ਦੀ ਮੰਗ ਕੀਤੀ ਹੈ। ਨਗਰ ਕੌਂਸਲਾਂ ਦੇ ਮੁਲਾਜ਼ਮਾਂ ਨੂੰ ਦੋ-ਦੋ ਮਹੀਨੇ ਤੋਂ ਤਨਖ਼ਾਹਾਂ ਨਹੀਂ ਮਿਲ ਰਹੀਆਂ ਹਨ ਤੇ ਤਿੰਨ ਸਾਲ ਤੋਂ ਮੁਲਾਜ਼ਮਾਂ ਦੀ ਜੀ. ਪੀ. ਐਫ. ਫ਼ੰਡ ਅਜੇ ਤੱਕ ਜਮਾਂ ਨਹੀਂ ਹੋਇਆ ਹੈ। ਉਲਟਾ ਜੀ. ਪੀ. ਐਫ. 'ਤੇ ਲੱਗਦਾ 8 ਫ਼ੀਸਦੀ ਵਿਆਜ ਵੀ ਖ਼ਤਮ ਹੋ ਰਿਹਾ ਹੈ। ਉਨ੍ਹਾਂ ਹੋਰ ਮੰਗ ਕਰਦੇ ਹੋਏ ਕਿਹਾ ਹੈ ਕਿ ਆਦਰਸ਼ ਚੋਣ ਜ਼ਾਬਤਾ ਲੱਗ ਜਾਣ ਕਾਰਨ ਅਹਿਮ ਮੰਗਾਂ ਰਹਿ ਗਈਆਂ ਹਨ , ਜਿਸ ਵਿਚ ਕਲਰਕਾਂ ਨੂੰ ਇੰਸਪੈਕਟਰ ਬਣਾਉਣ ਸਮੇਤ ਹੋਰ ਵੀ ਮੰਗਾਂ ਨੂੰ ਪੁਰੀਆਂ ਕਰਨਾ ਚਾਹੀਦਾ ਹੈ। ਸ. ਵਾਲੀਆ ਨੇ ਕਿਹਾ ਕਿ ਨਗਰ ਪੰਚਾਇਤਾਂ ਤੇ ਨਗਰ ਕੌਂਸਲਾਂ ਦੀ ਵਿੱਤੀ ਹਾਲਤ ਇਸ ਕਰਕੇ ਵੀ ਮਜ਼ਬੂਤ ਕਰਨ ਲਈ ਲੋੜ ਹੈ ਕਿਉਂਕਿ ਵਿਕਾਸ ਦੇ ਕੰਮ ਵਿੱਤੀ ਸੰਕਟ ਕਰਕੇ ਪ੍ਰਭਾਵਿਤ ਹੋ ਰਹੇ ਹਨ।

ਝੁਲਸੇ ਤਿੱਬਤੀ ਨਾਗਰਿਕ ਦੀ ਮੌਤ

ਨਵੀਂ ਦਿੱਲੀ, 28 ਮਾਰਚ -ਚੀਨ ਦੇ ਰਾਸ਼ਟਰਪਤੀ ਹੂ ਜੀਨਤਾਓ ਦੀ ਭਾਰਤ ਫੇਰੀ ਦਾ ਵਿਰੋਧ ਕਰ ਰਹੇ ਇਕ ਤਿੱਬਤੀ ਨੌਜਵਾਨ ਨੇ ਆਪਣੇ ਆਪ ਨੂੰ ਅੱਗ ਲਗਾ ਲਈ ਸੀ ਜਿਸ ਕਾਰਨ ਉਹ ਬੁਰੀ ਤਰ੍ਹਾਂ ਅੱਗ 'ਚ ਝੁਲਸ ਗਿਆ ਸੀ, ਦੀ ਅੱਜ ਰਾਮ ਮਨੋਹਰ ਲੋਹੀਆ ਹਸਪਤਾਲ 'ਚ ਸਵੇਰੇ ਮੌਤ ਹੋ ਗਈ ਹੈ। ਆਪਣੇ ਆਪ ਨੂੰ ਅੱਗ ਲਗਾ ਕੇ ਚੀਨ ਦੇ ਰਾਸ਼ਟਰਪਤੀ ਦਾ ਵਿਰੋਧ ਕਰ ਰਹੇ ਜੈਮਯੈਂਗ ਯੇਸ਼ੀ ਨਾਂਅ ਦੇ ਇਸ ਨੌਜਵਾਨ ਦੀ ਮੌਤ ਦੀ ਪੁਸ਼ਟੀ ਉਸ ਦੇ ਇਲਾਜ ਕਰ ਰਹੇ ਡਾ ਐਲ. ਕੇ. ਮਖੀਜਾ ਨੇ ਦਿੱਤੀ। ਚੀਨ ਦੇ ਰਾਸ਼ਟਰਪਤੀ ਦੀ ਭਾਰਤ ਫੇਰੀ ਦਾ ਜੰਤਰ-ਮੰਤਰ 'ਚ ਵਿਰੋਧ ਕਰ ਰਹੇ ਤਿੱਬਤੀਆਂ 'ਚ ਉਸ ਵੇਲੇ ਯੇਸ਼ੀ ਨਾਂਅ ਦੇ ਨੌਜਵਾਨ ਨੇ ਆਪਣੇ ਆਪ ਨੂੰ ਅੱਗ ਲਗਾ ਲਈ ਸੀ।

ਭਾਰਤ-ਪਾਕਿ ਵੱਲੋਂ ਵੂਲਰ ਬੈਰਜ ਪ੍ਰੋਜੈਕਟ ਬਾਰੇ ਵਿਚਾਰ ਵਟਾਂਦਰਾ

ਨਵੀਂ ਦਿੱਲੀ, 28 ਮਾਰਚ- ਭਾਰਤ ਅਤੇ ਪਾਕਿਸਤਾਨ ਦੇ ਪਾਣੀ ਸ੍ਰੋਤਾਂ ਦੇ ਮੰਤਰਾਲੇ ਦੇ ਸੀਨੀਅਰ ਅਧਿਕਾਰੀਆਂ ਨੇ ਇਥੇ ਇਕ ਮੀਚਿੰਗ ਦੌਰਾਨ ਤੁਲਬੁਲ ਨੇਵੀਗੇਸ਼ਨ/ਵੂਲਰ ਬੈਰੇਜ ਪ੍ਰੋਜੈਕਟ ਬਾਰੇ ਵਿਚਾਰ ਵਟਾਂਦਰਾ ਕੀਤਾ ਜਿਸ ਤੋਂ ਬਾਅਦ ਭਾਰਤ ਨੇ ਇਸ ਗੱਲ ਦੀ ਸਹਿਮਤੀ ਪ੍ਰਗਟਾਈ ਕਿ ਉਹ ਪਾਕਿਸਤਾਨ ਨੂੰ ਇਸ ਬਾਰੇ ਵਾਧੂ ਤਕਨੀਕਾਂ ਮੁਹੱਈਆ ਕਰਵਾਏਗਾ। ਵਿਦੇਸ਼ ਮੰਤਰਾਲੇ ਵੱਲੋਂ ਮਿਲੀ ਜਾਣਕਾਰੀ ਮੁਤਾਬਿਕ ਪਾਕਿਸਤਾਨ ਅਗਲੇ ਦੌਰ ਦੀ ਗੱਲਬਾਤ ਤੋਂ ਪਹਿਲਾਂ ਇਸ ਮੁੱਦੇ ਨਾਲ ਸਬੰਧਤ ਸਾਰੇ ਤੱਥਾਂ ਦੀ ਸਮੀਖਿਆ ਕਰੇਗਾ। ਇਸ ਗੱਲਬਾਤ ਦੌਰਾਨ ਭਾਰਤੀ ਟੀਮ ਦੀ ਅਗਵਾਈ ਪਾਣਾ ਸ੍ਰੋਤਾਂ ਦੇ ਮੰਤਰਾਲੇ ਦੇ ਸਕੱਤਰ ਧਰੁਵ ਵਿਜੈ ਸਿੰਘ ਨੇ ਕੀਤੀ ਜਦੋਂ ਕਿ ਪਾਕਿਸਤਾਨੀ ਦਲ ਦੀ ਅਗਵਾਈ ਪਾਣੀ ਅਤੇ ਬਿਜਲੀ ਮੰਤਰਾਲੇ ਦੇ ਸਕੱਤਰ ਇਮਤਿਆਜ਼ ਕਾਜ਼ੀ ਨੇ ਕੀਤੀ। ਦੱਸਿਆ ਜਾਂਦਾ ਹੈ ਕਿ ਗੱਲਬਾਤ ਬਹੁਤ ਹੀ ਦੋਸਤਾਨਾ ਮਾਹੌਲ 'ਚ ਹੋਈ।

ਅਮਰੀਕਾ ਨੇ ਐਚ-1ਬੀ ਵੀਜ਼ਾ ਫੀਸ 'ਚ ਕੀਤਾ ਵਾਧਾ

ਵਾਸ਼ਿੰਗਟਨ, 28 ਮਾਰਚ - ਅਮਰੀਕਾ ਨੇ ਅਗਲੇ ਵਿੱਤੀ ਵਰ੍ਹੇ ਤੋਂ ਐਚ-1ਬੀ ਵੀਜ਼ੇ ਦੀ ਫੀਸ 'ਚ ਵਾਧਾ ਕਰਨ ਦਾ ਫੈਸਲਾ ਲਿਆ ਹੈ ਜਿਸ ਨਾਲ ਜਿਸ ਨਾਲ ਭਾਰਤ ਦੀਆਂ ਕਈ ਸੂਚਨਾ ਤਕਨੀਕ (ਆਈ. ਟੀ.) ਕੰਪਨੀਆਂ ਪ੍ਰਭਾਵਤ ਹੋਣਗੀਆਂ। ਅਮਰੀਕਾ ਦੀ ਨਾਗਰਿਕਤਾ ਅਤੇ ਇਮੀਗਰੇਸ਼ਨ ਸਰਵਿਸਜ਼ (ਯੂ. ਐਸ. ਸੀ. ਆਈ. ਐਸ.) ਨੇ ਇਸ ਵੀਜ਼ੇ ਲਈ ਫੀਸ ਦੀ ਨਵੀਂ ਸੂਚੀ ਜਾਰੀ ਕੀਤੀ ਹੈ ਜਿਸ ਅਨੁਸਾਰ ਵੀਜ਼ੇ ਲਈ ਅਪੀਲ ਕਰਨ ਵਾਲੇ ਨੂੰ 325 ਡਾਲਰ ਤੋਂ ਲੈ ਕੇ 2000 ਡਾਲਰ ਤਕ ਫੀਸ ਅਦਾ ਕਰਨੀ ਹੋਵੇਗੀ ਜੋ ਅਮਰੀਕਾ 'ਚ 50 ਜਾਂ ਇਸ ਤੋਂ ਜ਼ਿਆਦਾ ਕਾਮਿਆਂ ਨੂੰ ਕੰਮ 'ਤੇ ਰੱਖੇਗਾ ਅਤੇ ਜਿਨ੍ਹਾਂ 'ਚ 50 ਫੀਸਦੀ ਤੋਂ ਜ਼ਿਆਦਾ ਕਾਮੇ ਐਚ-1ਬੀ ਜਾਂ ਐਲ-1 ਵੀਜ਼ੇ 'ਤੇ ਕੰਮ ਕਰਨਗੇ। ਇਸ ਸਾਲ ਤੋਂ ਯੂ.ਐਸ.ਸੀ.ਆਈ.ਐਸ. ਨੇ ਕਿਸੇ ਕੰਪਨੀ 'ਚ ਕੰਮ ਕਰਦੇ 1 ਤੋਂ 25 ਤਕ ਕਾਮਿਆਂ ਲਈ 750 ਡਾਲਰ ਅਤੇ 26 ਜਾਂ ਇਸ ਤੋਂ ਜ਼ਿਆਦਾ ਕਾਮਿਆਂ ਲਈ 1500 ਡਾਲਰ ਫੀਸ ਰੱਖੀ ਹੈ।

ਸਾਲ ਵਿਚ ਕੇਵਲ ਮਈ ਮਹੀਨੇ ਹੀ ਹੋਣਗੇ
ਅਧਿਆਪਕਾਂ ਦੇ ਤਬਾਦਲੇ- ਜਥੇ: ਮਲੂਕਾ

ਚੰਡੀਗੜ੍ਹ. 27 ਮਾਰਚ ਪੰਜਾਬ ਦੇ ਭਾਸ਼ਾ ਤੇ ਸਿੱਖਿਆ ਮੰਤਰੀ ਸ. ਸਿਕੰਦਰ ਸਿੰਘ ਮਲੂਕਾ ਨੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਨੇ ਰਾਜ ਦੇ ਸਰਕਾਰੀ, ਪ੍ਰਾਇਮਰੀ, ਮਿਡਲ ਹਾਈ ਤੇ ਹਾਇਰ ਸਕੈਂਡਰੀ ਸਕੂਲਾਂ ਵਿਚ ਕੰਮ ਕਰਨ ਵਾਲੇ ਹਜ਼ਾਰਾਂ ਅਧਿਆਪਕਾਂ ਦੀਆਂ ਤਬਦੀਲੀਆਂ ਕਰਨ ਬਾਰੇ ਇੱਕ ਨਵੀਂ ਨੀਤੀ ਤਿਆਰ ਕੀਤੀ ਹੈ, ਜਿਸ ਦੇ ਅਨੁਸਾਰ ਸਾਰੇ ਸਾਲ ਵਿਚ ਕੇਵਲ ਮਈ ਮਹੀਨੇ ਇੱਕ ਵਾਰ ਹੀ ਤਬਦੀਲੀ ਕੀਤੀ ਜਾਵੇਗੀ, ਅੱਗੇ ਪਿੱਛੇ ਨਹੀਂ। ਸਬੰਧਿਤ ਅਧਿਆਪਕ ਖਾਲੀ ਪਈਆਂ ਆਸਾਮੀਆਂ ਤੇ ਆਪਣੇ ਮਨਪਸੰਦ ਦੇ ਤਿੰਨ ਸਟੇਸ਼ਨ ਲਿਖ ਕੇ ਦੇ ਸਕਦਾ ਹੈ, ਜਿਸ ਵਿਚੋਂ ਕਿਸੇ ਇੱਕ ਸਟੇਸ਼ਨ 'ਤੇ ਉਸ ਦਾ ਤਬਾਦਲਾ ਕਰ ਦਿੱਤਾ ਜਾਵੇਗਾ। ਫਿਰ ਤਿੰਨ ਸਾਲ ਤੱਕ ਉਸ ਦੀ ਤਬਦੀਲੀ ਬਿਲਕੁਲ ਨਹੀਂ ਕੀਤੀ ਜਾਵੇਗੀ।
ਇੱਕ ਸਵਾਲ ਦੇ ਉੱਤਰ ਵਿਚ ਸ. ਮਲੂਕਾ ਨੇ ਕਿਹਾ ਕਿ ਮੇਰੀ ਰਾਏ
ਹੈ ਕਿ ਸਾਰੇ ਸਰਕਾਰੀ ਸਕੂਲਾਂ ਦਾ ਇੱਕ ਹੀ ਡਾਇਰੈਕਟੋਰੇਟ ਬਣਾ ਦਿੱਤਾ ਜਾਵੇ, ਦੂਜੇ ਸ਼ਬਦਾਂ ਵਿਚ 2 ਦੀ ਥਾਂ ਸਾਰੇ ਸਰਕਾਰੀ ਸਕੂਲਾਂ ਦਾ ਕੰਟਰੋਲ ਕੇਵਲ ਇੱਕ ਡਾਇਰੈਕਟਰ ਦੇ ਅਧੀਨ ਹੀ ਕਰ ਦਿੱਤਾ ਜਾਵੇ, ਪਰ ਇਸ ਬਾਰੇ ਅੰਤਿਮ ਫ਼ੈਸਲਾ ਸੋਚ ਸਮਝ ਕੇ ਕੀਤਾ ਜਾਵੇਗਾ।''
ਵਰਨਣਯੋਗ ਹੈ ਕਿ ਕੁੱਝ ਸਕੂਲਾਂ ਦਾ ਪ੍ਰਬੰਧ ਪੰਚਾਇਤੀ ਰਾਜ ਸੰਸਥਾਵਾਂ ਕੋਲ ਹੈ ਤੇ ਕੁੱਝ ਇੱਕ ਦੀ ਨਿਗਰਾਨੀ ਸਿੱਖਿਆ ਵਿਭਾਗ ਕਰਦਾ ਹੈ। ਇਕ ਹੋਰ ਸਵਾਲ ਦੇ ਉੱਤਰ ਵਿਚ ਸ. ਮਲੂਕਾ ਨੇ ਦੱਸਿਆ ਕਿ ਪਿਛਲੀ ਬਾਦਲ ਸਰਕਾਰ ਦੇ ਦੌਰ ਵਿਚ ਭਾਸ਼ਾ ਵਿਭਾਗ ਪੰਜਾਬ ਦੇ ਸਲਾਹਕਾਰ ਬੋਰਡ ਨੇ ਪੰਜਾਬੀ, ਹਿੰਦੀ, ਸੰਸਕ੍ਰਿਤ ਤੇ ਉਰਦੂ ਭਾਸ਼ਾਵਾਂ ਦੇ ਲੇਖਕਾਂ, ਸਾਹਿਤਕਾਰਾਂ ਤੇ ਦੋ ਸ਼੍ਰੋਮਣੀ ਪੰਜਾਬੀ ਪੱਤਰਕਾਰਾਂ ਨੂੰ 2 ਸਾਲਾਂ ਲਈ ਪੁਰਸਕਾਰ ਦੇਣ ਬਾਰੇ ਚੁਣਿਆ ਸੀ, ਉਨ੍ਹਾਂ ਨੂੰ ਸਨਮਾਨਿਤ ਕਰਨ ਲਈ ਛੇਤੀ ਹੀ ਸਮਾਗਮ ਦੀ ਤਾਰੀਖ ਨਿਸਚਤ ਕੀਤੀ ਜਾਵੇਗੀ। ਸੰਭਵ ਹੈ ਕਿ ਇਹ ਪੁਰਸਕਾਰ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਤੋਂ ਦਿਵਾਏ ਜਾਣ।

ਬੜੂੰਦੀ 'ਚ ਵਿਸ਼ਾਲ ਨਗਰ ਕੀਰਤਨ 'ਤੇ ਰੈਣ ਸੁਬਾਈ ਕੀਰਤਨ ਦਰਬਾਰ

 ਨਾਨਕਸਰ ਠਾਠ ਬੜੂੰਦੀ ਵਿਖੇ ਬਾਬਾ ਈਸ਼ਰ ਸਿੰਘ ਤੇ ਬਾਬਾ ਜਗੀਰ ਸਿੰਘ ਦੇ ਜਨਮ ਦਿਨ ਸਬੰਧੀ ਸਜਾਏ ਨਗਰ ਕੀਰਤਨ ਦੌਰਾਨ ਬਾਬਾ ਧੰਨਾ ਸਿੰਘ ਚੌਰ ਸਾਹਿਬ ਦੀ ਸੇਵਾ ਕਰਦੇ ਹੋਏ, ਨਾਲ ਦੀ ਤਸਵੀਰ 'ਚ ਭੋਰਾ ਸਾਹਿਬ ਤੋਂ ਬਾਬਾ ਈਸ਼ਰ ਸਿੰਘ ਦੀ ਤਸਵੀਰ ਨਾਲ ਪੰਡਾਲ 'ਚ ਆ ਰਹੇ ਪਾਠੀ ਸਿੰਘ ਅਤੇ ਬਾਬਾ ਹਰਭਜਨ ਸਿੰਘ।

ਜਗਰਾਉਂ/ਲੋਹਟਬੱਦੀ. 27 ਮਾਰਚ  ਨਾਨਕਸਰ ਸੰਪਰਦਾਇ ਦੇ ਮਹਾਨ ਸੰਤ ਬਾਬਾ ਈਸ਼ਰ ਸਿੰਘ ਦੇ ਨਾਨਕੇ ਨਗਰ ਬੜੂੰਦੀ (ਲੁਧਿਆਣਾ) ਸਥਿਤ ਸੱਚਖੰਡ ਵਾਸੀ ਬਾਬਾ ਜਗੀਰ ਸਿੰਘ ਬੜੂੰਦੀ ਵਾਲਿਆਂ ਦੇ ਤਪ ਅਸਥਾਨ ਪੱਤੀ ਮਾਨ ਵਿਖੇ ਮੌਜੂਦਾ ਸੰਚਾਲਕ ਬਾਬਾ ਧੰਨਾ ਸਿੰਘ ਬੜੂੰਦੀ ਵੱਲੋਂ ਖ਼ਾਲਸਾ ਪੰਥ ਦੇ ਸਾਜਨਾ ਦਿਵਸ ਨੂੰ ਸਮਰਪਿਤ ਬਾਬਾ ਈਸ਼ਰ ਸਿੰਘ ਅਤੇ ਬਾਬਾ ਜਗੀਰ ਸਿੰਘ ਦੇ ਜਨਮ ਦਿਹਾੜੇ ਸਬੰਧੀ ਚੱਲ ਰਹੇ 26 ਦਿਨਾਂ ਤੁੱਕ-ਤੁੱਕ ਵਾਲੇ 17 ਸ੍ਰੀ ਸੰਪਟ ਅਖੰਡ ਪਾਠ ਅਤੇ ਸ੍ਰੀ ਅਖੰਡ ਪਾਠਾਂ ਦੀਆਂ ਲੜੀਆਂ ਦੀ ਸਮਾਪਤੀ ਹੋਈ। ਇਸ ਤੋਂ ਪਹਿਲਾਂ ਪੂਰੇ ਨਗਰ ਦੀ ਪ੍ਰਕਿਰਮਾ ਲਈ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਛੱਤਰ ਛਾਇਆ ਹੇਠ ਪੰਜ ਪਿਆਰਿਆਂ ਦੀ ਅਗਵਾਈ 'ਚ ਵਿਸ਼ਾਲ ਨਗਰ ਕੀਰਤਨ ਸਜਾਏ ਗਏ, ਜਿਸ 'ਚ ਦੇਸ਼ਾਂ, ਵਿਦੇਸ਼ਾਂ ਤੋਂ ਪੁੱਜੇ ਸੰਗਤਾਂ ਦੇ ਠਾਠਾਂ ਮਾਰਦੇ ਇਕੱਠ ਨੇ ਸੰਗਤਾਂ ਦਾ ਮਹਾਂਪੁਰਸ਼ਾਂ ਪ੍ਰਤੀ ਪ੍ਰੇਮ ਉਜਾਗਰ ਕੀਤਾ। ਨਗਰ ਕੀਰਤਨ ਦੇ ਵੱਖ-ਵੱਖ ਪੜਾਵਾਂ 'ਤੇ ਅੰਤਰਰਾਸ਼ਟਰੀ ਢਾਡੀ ਚਰਨ ਸਿੰਘ ਆਲਮਗੀਰ, ਢਾਡੀ ਗੁਰਨਾਮ ਸਿੰਘ, ਢਾਡੀ ਗੁਰਬਖ਼ਸ਼ ਸਿੰਘ ਅਲਬੇਲਾ, ਢਾਡੀ ਕਮਲ ਸਿੰਘ ਬੱਦੋਵਾਲ, ਢਾਡੀ ਬਰਖੁਰਦਾਰ ਗੌਸਲਾਂ ਵਾਲੇ, ਢਾਡੀ ਸਤਨਾਮ ਸਿੰਘ ਚਮਿੰਡਾ, ਗਿਆਨੀ ਕੁੰਢਾ ਸਿੰਘ ਮਹੋਲੀ, ਢਾਡੀ ਸਾਧੂ ਸਿੰਘ ਰਾਜਸਥਾਨੀ ਤੋਂ ਇਲਾਵਾ ਕਵੀਸ਼ਰੀ ਜਥਿਆਂ 'ਚ ਗੁਰਨਾਮ ਸਿੰਘ ਬਰਾੜ, ਪੰਡਤ ਸੋਮਨਾਥ ਸਿੰਘ ਰੋਡਿਆਂ ਵਾਲੇ, ਪੰਜਾਬ ਸਿੰਘ ਪੰਜਾਬ, ਰੂਪ ਸਿੰਘ ਅਲਬੇਲਾ ਆਦਿ ਨੇ ਬਾਬਾ ਜੀ ਦੇ ਜੀਵਨ 'ਤੇ ਚਾਨਣਾ ਪਾਇਆ। ਨਗਰ ਕੀਰਤਨ ਉਪਰੰਤ ਰੈਣ ਸੁਬਾਈ ਕੀਰਤਨ ਦਰਬਾਰ ਸਜਾਏ ਗਏ। ਇਸ ਮੌਕੇ ਬਾਬਾ ਧੰਨਾ ਸਿੰਘ ਬੜੂੰਦੀ ਨੇ ਕਿਹਾ ਕਿ ਮਨੁੱਖਤਾ ਦੇ ਰਹਿਬਰ ਸੰਤ ਮਹਾਂਪੁਰਸ਼ ਜਦੋਂ ਵੀ ਸੰਸਾਰ 'ਤੇ ਆਉਂਦੇ ਹਨ ਤਾਂ ਉਹ ਇਸ ਭੂਮੀ ਨੂੰ ਨਾਮ ਦੀ ਕਮਾਈ ਨਾਲ ਸਿੰਜਦੇ ਹਨ, ਨਾਮ ਰੂਪੀ ਫ਼ਸਲ ਰਹਿੰਦੀ ਦੁਨੀਆਂ ਤੱਕ ਆਪਣਾ ਫ਼ਲ ਦਿੰਦੀ ਹੋਈ ਲੋਕਾਈਂ ਨੂੰ ਪ੍ਰਮਾਤਮਾ ਨਾਲ ਜੋੜਦੀ ਹੈ।
ਇਸ ਮੌਕੇ ਕੀਰਤਨੀ ਜਥਿਆਂ 'ਚ ਭਾਈ ਜੋਗਿੰਦਰ ਸਿੰਘ ਰਿਆੜ, ਭਾਈ ਗੁਰਚਰਨ ਸਿੰਘ ਰਸੀਆ, ਭਾਈ ਬਲਪ੍ਰੀਤ ਸਿੰਘ ਲੁਧਿਆਣਾ, ਭਾਈ ਇੰਦਰਪਾਲ ਸਿੰਘ, ਭਾਈ ਗੁਰਇਕਬਾਲ ਸਿੰਘ ਲੱਖਾ ਨੇ ਰਸਭਿੰਨੇ ਕੀਰਤਨ ਦੁਆਰਾ ਹਾਜ਼ਰੀ ਲੁਆਈ। ਇਸ ਮੌਕੇ ਮਹਾਂਪੁਰਸ਼ਾਂ 'ਚ ਬਾਬਾ ਹਰਭਜਨ ਸਿੰਘ ਨਾਨਕਸਰ, ਸੰਤ ਸੇਵਾ ਸਿੰਘ, ਸੰਤ ਬਾਬਾ ਸੁਖਦੇਵ ਸਿੰਘ ਭੁੱਚੋ ਕਲਾਂ, ਭਾਈ ਤਜਿੰਦਰ ਸਿੰਘ ਜਿੰਦੂ, ਸੰਤ ਰਵਿੰਦਰ ਸਿੰਘ ਜੌਨੀ, ਸੰਤ ਅਵਤਾਰ ਸਿੰਘ ਧੂਲਕੋਟ, ਸੰਤ ਬੇਅੰਤ ਸਿੰਘ ਬੇਰ ਕਲਾਂ, ਸੰਤ ਪਿਆਰਾ ਸਿੰਘ ਸਿਰਥਲਾ, ਸੰਤ ਬਲਵੰਤ ਸਿੰਘ ਸੁਖਮਨੀ ਨਾਨਕਸਰ, ਮਹੰਤ ਪ੍ਰਤਾਪ ਸਿੰਘ ਦੇ ਸੇਵਾਦਾਰ ਬਾਬਾ ਹਰਬੰਸ ਸਿੰਘ, ਬਾਬਾ ਸਤਨਾਮ ਸਿੰਘ ਸੀਸ ਮਹਿਲ, ਝੋਰੜਾਂ ਤੋਂ ਬਾਬਾ ਜੀ ਦੇ ਭਤੀਜੇ ਬਾਬਾ ਹਰਚੰਦ ਸਿੰਘ, ਬਾਬਾ ਕਰਤਾਰ ਸਿੰਘ, ਬਾਬਾ ਹਰਪਾਲ ਸਿੰਘ, ਸੰਤ ਰਜਨੀਸ਼ ਸਿੰਘ ਨੱਥੂਮਾਜਰਾ, ਸੰਤ ਰਣਜੀਤ ਸਿੰਘ ਫਲੌਂਡ ਵਿਸ਼ੇਸ਼ ਤੌਰ 'ਤੇ ਪਹੁੰਚੇ। ਠਾਠ ਦੇ ਪ੍ਰਮੁੱਖ ਸੇਵਾਦਾਰਾਂ 'ਚ ਭਾਈ ਗੁਰਮੇਲ ਸਿੰਘ ਨੀਲੂ, ਭਾਈ ਈਸ਼ਰ ਸਿੰਘ, ਭਾਈ ਕੁਲਦੀਪ ਸਿੰਘ, ਭਾਈ ਦਵਿੰਦਰ ਸਿੰਘ, ਭਾਈ ਜਸਵੀਰ ਸਿੰਘ ਲੱਡੂ, ਬਾਈ ਰਵੀ ਸਿੰਘ, ਭਾਈ ਨਵਜੋਤ ਸਿੰਘ ਗੋਲੂ ਨੇ ਸਮਾਗਮ ਨੂੰ ਸਫ਼ਲਤਾ ਪੂਰਵਕ ਨੇਪਰੇ ਚਾੜ੍ਹਨ ਲਈ ਸਹਿਯੋਗ ਦਿੱਤਾ। ਇਸੇ ਦੌਰਾਨ ਹੀ ਰੂਹਾਨੀਅਤ ਕਿਰਨ ਆਰਟਸ ਵੱਲੋਂ ਪ੍ਰੋ: ਨਿਰਮਲ ਜੌੜਾ ਦਾ ਲਿਖਿਆ ਨਾਟਕ ਮਾਤਾ ਗੁਜਰ ਕੌਰ (ਸਾਕਾ ਸਰਹੰਦ) ਦਾ ਸਫ਼ਲ ਮੰਚਨ ਕੀਤਾ ਗਿਆ। ਮੰਚ ਸੰਚਾਲਨ ਦੀ ਭੂਮਿਕਾ ਰਾਏ ਸਿੰਘ ਲੱਖਾ ਨੇ ਨਿਭਾਈ।

ਉੱਤਰ ਪੱਤਰੀ ਸਾੜਨ ਵਾਲੇ ਵਿਦਿਆਰਥੀ 'ਤੇ ਪਰਚਾ ਦਰਜ

 ਉੱਤਰ ਪੱਤਰੀ ਸਾੜਨ ਵਾਲਾ ਵਿਦਿਆਰਥੀ ਜਤਿੰਦਰ ਸਿੰਘ
ਪੁਲਿਸ ਕਰਮਚਾਰੀ ਨਾਲ।

ਮੋਗਾ.- 27 ਮਾਰਚ ૿ ਕੱਲ੍ਹ ਦਸਵੀਂ ਜਮਾਤ ਦੇ ਇਕ ਵਿਦਿਆਰਥੀ ਜਿਸ ਨੇ ਹਿਸਾਬ ਦਾ ਪੇਪਰ ਮਾੜਾ ਹੋਣ 'ਤੇ ਉੱਤਰ ਪੱਤਰੀ ਪਾੜ ਕੇ ਸਾੜ ਦਿੱਤੀ ਸੀ, ਵਿਰੁੱਧ ਪੁਲਿਸ ਨੇ ਪਰਚਾ ਦਰਜ ਕਰ ਲਿਆ ਹੈ।
ਉਕਤ ਵਿਦਿਆਰਥੀ ਜਤਿੰਦਰ ਸਿੰਘ ਪੁੱਤਰ ਮੁਖਤਿਆਰ ਸਿੰਘ ਵਾਸੀ ਨੰਗਲ (ਮਖੂ) ਜੋ ਕਿ ਸੀਤਾ ਰਾਮ ਮੈਮੋਰੀਅਲ ਆਰਕਲੈਂਡ ਗਾਰਮੈਂਟ ਸੀਨੀਅਰ ਸੈਕੰਡਰੀ ਸਕੂਲ ਵਿਚ ਦਾਨੀ ਸੱਜਣਾਂ ਦੇ ਖਰਚੇ 'ਤੇ ਪੜ੍ਹਾਈ ਕਰ ਰਿਹਾ ਸੀ। ਉਹ ਦਸਵੀਂ ਦਾ ਇਮਤਿਹਾਨ ਫਤਹਿਗੜ੍ਹ ਪੰਜਤੂਰ ਦੇ ਪ੍ਰੀਖਿਆ ਕੇਂਦਰ ਵਿਚ ਦਿੰਦਾ ਸੀ ਜਿਥੇ ਕੱਲ੍ਹ ਇਸ ਨੇ ਹਿਸਾਬ ਦਾ ਪੇਪਰ ਮਾੜਾ ਹੋਣ 'ਤੇ ਉੱਤਰ ਪੱਤਰੀ ਲੈ ਕੇ ਬਾਹਰ ਦੌੜ ਗਿਆ ਅਤੇ ਬਾਹਰ ਲਿਜਾ ਕੇ ਉੱਤਰੀ ਪੱਤਰੀ ਪਾੜ ਕੇ ਸਾੜ ਦਿੱਤੀ।
ਪ੍ਰੀਖਿਆ ਕੇਂਦਰ ਵਿਚ ਡਿਊਟੀ ਕਰ ਰਹੇ ਸਟਾਫ ਨੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ। ਪੁਲਿਸ ਵੱਲੋਂ ਵਿਦਿਆਰਥੀ ਨੂੰ ਕਾਬੂ ਕਰ ਕੇ ਦਫਾ 406, 201 ਤਹਿਤ ਪਰਚਾ ਦਰਜ ਕਰ ਕੇ ਮਾਣਯੋਗ ਅਦਾਲਤ ਵਿਚ ਪੇਸ਼ ਕੀਤਾ ਜਿਥੇ ਅਦਾਲਤ ਨੇ ਉਸ ਨੂੰ 16 ਦਿਨਾਂ ਲਈ ਫਰੀਦਕੋਟ ਦੀ ਬਾਲ ਜੇਲ੍ਹ ਵਿਚ ਭੇਜ ਦਿੱਤਾ ਹੈ।

'ਵਰਸਿਟੀ ਨੇ ਐੱਮ.ਏ. ਅਤੇ ਐੱਮ.ਐੱਸ.ਸੀ. ਦੇ ਨਤੀਜੇ ਐਲਾਨੇ

ਅੰਮ੍ਰਿਤਸਰ, 27 ਮਾਰਚ-ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਵੱਲੋਂ ਦਸੰਬਰ 2011 ਵਿਚ ਲਈਆਂ ਗਈਆਂ ਐੱਮ. ਏ. ਅਤੇ ਐੱਮ. ਐੱਸ. ਸੀ. ਸਮੈਸਟਰ ਪਹਿਲਾ ਅਤੇ ਤੀਜਾ ਦੀਆਂ ਪ੍ਰੀਖਿਆਵਾਂ ਦੇ ਨਤੀਜਿਆਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਪ੍ਰੋਫੈਸਰ ਮੁਖੀ (ਪ੍ਰੀਖਿਆਵਾਂ) ਪ੍ਰੋ. ਆਰ.ਕੇ. ਮਹਾਜਨ ਨੇ ਦੱਸਿਆ ਕਿ ਐੱਮ.ਏ.- ਹਿਸਟਰੀ, ਪੰਜਾਬੀ, ਰਾਜਨੀਤੀ ਸ਼ਾਸਤਰ, ਪਬਲਿਕ ਐਡਮਨਿਸਟ੍ਰੇਸ਼ਨ, ਸੰਸਕ੍ਰਿਤ, ਧਰਮ ਅਧਿਐਨ, ਸੰਗੀਤ ਇੰਸਟਰੂਮੈਂਟਲ, ਫਰੈਂਚ, ਫਰਮਾਰਮਿੰਗ ਆਰਟ, ਡਾਂਸ, ਫਾਈਨ ਆਰਟਸ, ਜਿਓਗ੍ਰਫੀ, ਹਿਸਟਰੀ ਆਫ ਆਰਟ ਦੇ ਸਮੈਸਟਰ ਪਹਿਲਾ ਦੇ ਨਤੀਜਿਆਂ ਤੋਂ ਇਲਾਵਾ ਐੱਮ.ਐੱਸ.ਸੀ.-ਗਣਿਤ, ਇੰਟਰਨੈੱਟ ਸਟੱਡੀਜ਼, ਇਨਟੀਰੀਅਰ ਡਿਜ਼ਾਇਨ, ਕੰਪਿਊਟਰ ਸਾਇੰਸ, ਬਾਇਓਟੈਕਨਾਲੋਜੀ, ਬੌਟਨੀ, ਬਾਇਓਇਨਫਰਮੈਟਿਕਸ, ਫਿਜ਼ਿਕਸ, ਜ਼ਿਓਲੋਜੀ ਦੇ ਸਮੈਸਟਰ ਪਹਿਲਾ ਅਤੇ ਐੱਮ. ਐੱਸ. ਸੀ. ਬਾਇਓ ਟੈਕਨਾਲੋਜੀ, ਬਾਇਓ ਇਨਫਰਮੈਟਿਕਸ, ਫਿਜ਼ਿਕਸ, ਜ਼ਿਓਲੋਜੀ ਅਤੇ ਕੰਪਿਊਟਰ ਸਾਇੰਸ ਦੇ ਤੀਜੇ ਸਮੈਟਸਟਰ ਦੇ ਨਤੀਜੇ ਐਲਾਨ ਦਿੱਤੇ ਗਏ ਹਨ ਜੋ ਯੂਨੀਵਰਸਿਟੀ ਦੀ ਵੈਬਸਾਈਟ 'ਤੇ ਵੀ ਉਪਲਬਧ ਹਨ।

1133 ਅਧਿਆਪਕ ਕਰ ਰਹੇ ਨੇ ਅਹੁਦਾ ਸੰਭਾਲਣ ਦੀ ਉਡੀਕ

ਰੂਪਨਗਰ. 27 ਮਾਰਚ  ਵੱਖ-ਵੱਖ ਕੈਟਾਗਰੀਆਂ ਨਾਲ ਸਬੰਧਿਤ ਪੰਜਾਬ ਦੇ 1133 ਅਧਿਆਪਕ/ਅਧਿਆਪਕਾਵਾਂ ਆਪਣੀ ਡਿਊਟੀ 'ਤੇ ਹਾਜ਼ਰ ਹੋਣ ਲਈ ਪੰਜਾਬ ਸਰਕਾਰ ਦੇ ਆਦੇਸ਼ ਵੀ ਉਡੀਕ ਵਿਚ ਹਨ। ਵੱਖ-ਵੱਖ ਸਮੇਂ ਅਦਾਲਤਾਂ ਵਿਚ ਪੈਂਦੀਆਂ ਰਿਟ ਪਟੀਸ਼ਨਾਂ ਕਾਰਨ ਇਹ ਅਸਾਮੀਆਂ ਬੀਤੇ ਸਵਾ ਚਾਰ ਸਾਲ ਤੋਂ ਲਟਕ ਰਹੀਆਂ ਹਨ।
ਇਨ੍ਹਾਂ ਅਧਿਆਪਕਾਂ ਵਿਚੋਂ ਨਵਤੇਜ ਸਿੰਘ, ਪ੍ਰਕਾਸ਼ ਚੰਦ, ਸੀਮਾ ਰਾਣੀ, ਸਿਮਰਨਜੀਤ ਕੌਰ, ਸਤਨਾਮ ਸਿੰਘ, ਕਮਲ ਕਿਸ਼ੋਰ ਆਦਿ ਨੇ ਪੰਜਾਬ ਦੇ ਮੁੱਖ ਮੰਤਰੀ ਅਤੇ ਸਿੱਖਿਆ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਉਨ੍ਹਾਂ ਨੂੰ ਛੇਤੀ ਸਕੂਲਾਂ ਵਿਚ ਭੇਜਿਆ ਜਾਵੇ। ਵਰਨਣਯੋਗ ਹੈ ਜ਼ਿਲ੍ਹਾ ਰੂਪਨਗਰ ਵਿਚ 10, ਅੰਮ੍ਰਿਤਸਰ ਵਿਚ 187, ਬਠਿੰਡਾ ਵਿਚ 61, ਬਰਨਾਲਾ ਵਿਚ 20, ਫਤਿਹਗੜ੍ਹ ਸਾਹਿਬ ਵਿਚ 14, ਫਰੀਦਕੋਟ ਵਿਚ 15, ਫਿਰੋਜ਼ਪੁਰ ਵਿਚ 54, ਗੁਰਦਾਸਪੁਰ ਵਿਚ 147, ਹੁਸ਼ਿਆਰਪੁਰ ਵਿਚ 31, ਜਲੰਧਰ ਵਿਚ 101, ਕਪੂਰਥਲਾ ਵਿਚ 65, ਲੁਧਿਆਣਾ ਵਿਚ 193, ਮਾਨਸਾ ਵਿਚ 25, ਮੋਗਾ ਵਿਚ 73, ਮੁਕਤਸਰ ਵਿਚ 67, ਮੁਹਾਲੀ ਵਿਚ 73, ਸ਼ਹੀਦ ਭਗਤ ਸਿੰਘ ਨਗਰ ਵਿਚ 16, ਪਟਿਆਲਾ ਵਿਚ 67, ਸੰਗਰੂਰ ਵਿਚ 76 ਅਤੇ ਤਰਨਤਾਰਨ ਵਿਚ 112 ਅਸਾਮੀਆਂ 'ਤੇ ਟੀਚਿੰਗ ਫੈਲੋਜ਼ ਦੀ ਬਕਾਇਦਾ ਜਾਬਤਾ-ਬੱਧ ਚੋਣ ਹੋ ਚੁੱਕੀ ਹੈ।

ਭਤੀਜੇ ਵੱਲੋਂ ਚਾਚੇ ਦੀ ਹੱਤਿਆ

 ਹੱਤਿਆ ਬਾਰੇ ਜਾਣਕਾਰੀ ਦਿੰਦੇ ਹੋਏ ਡੀ.ਐੱਸ.ਪੀ. ਹਰਵਿੰਦਰ
ਸਿੰਘ ਵਿਰਕ।

ਤਪਾ ਮੰਡੀ/ਰੂੜੇਕੇ ਕਲਾਂ 27 ਮਾਰਚ  ਨੇੜਲੇ ਪਿੰਡ ਧੌਲਾ ਵਿਖੇ ਇਕ ਵਿਅਕਤੀ ਨੂੰ ਉਸ ਦੇ ਭਤੀਜੇ ਨੇ ਇੱਟ ਮਾਰ ਕੇ ਮਾਰ ਦਿੱਤਾ ਹੈ। ਇਸ ਸਬੰਧੀ ਸਬ-ਡਵੀਜ਼ਨ ਦੇ ਡੀ. ਐੱਸ. ਪੀ ਸ: ਹਰਵਿੰਦਰ ਸਿੰਘ ਨੇ ਦੱਸਿਆ ਕਿ ਪਿੰਡ ਧੌਲਾ ਦਾ ਬਲਦੇਵ ਸਿੰਘ ਪੁੱਤਰ ਭਾਗ ਸਿੰਘ ਜੋ ਕਿੱਤੇ ਵੱਜੋਂ ਮਿਸਤਰੀ ਹੈ, ਉਸ ਨੇ ਅਪਣਾ ਘਰ ਬਣਾਉਣਾ ਸ਼ੁਰੂ ਕੀਤਾ ਹੋਇਆ ਸੀ ਤੇ ਉਸ ਦਾ ਭਤੀਜਾ ਗਗਨਦੀਪ ਸਿੰਘ ਜੋ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਰਹਿੰਦਾ ਸੀ, ਕਈ ਦਿਨਾਂ ਤੋਂ ਉਸ ਕੋਲ ਆਇਆ ਹੋਇਆ ਸੀ। ਰਾਤ ਵੇਲੇ ਗਗਨਦੀਪ ਨੇ ਅਪਣੇ ਚਾਚੇ ਦੇ ਸਿਰ ਵਿਚ ਇੱਟਾਂ ਮਾਰ ਕੇ ਉਸ ਨੂੰ ਮਾਰ ਦਿੱਤਾ ਅਤੇ ਉਥੋਂ ਦੌੜ ਗਿਆ। ਪੁਲਿਸ ਨੇ ਮ੍ਰਿਤਕ ਦੇ ਬੇਟੇ ਰਣਜੀਤ ਸਿੰਘ ਦੇ ਬਿਆਨਾਂ 'ਤੇ ਮਾਮਲਾ ਦਰਜ ਕਰ ਲਿਆ ਹੈ 'ਤੇ ਲਾਸ਼ ਨੂੰ ਪੋਸਟ ਮਾਰਟਮ ਲਈ ਭੇਜ ਦਿੱਤਾ।

ਭਾਜਪਾ ਪੰਜਾਬ ਦੇ ਅਮਨ-ਚੈਨ ਨੂੰ ਲਾਂਬੂ ਲਾਉਣ ਤੋਂ ਗੁਰੇਜ ਕਰੇ-ਖਾਲਸਾ

ਅ ਸੀਨੀਅਰ ਕਾਂਗਰਸੀ ਆਗੂ ਪ੍ਰਮਿੰਦਰਪਾਲ ਸਿੰਘ ਖਾਲਸਾ ਅਤੇ
ਸੁਰਿੰਦਰਪਾਲ ਸਿੰਘ ਗੋਲਡੀ ਗੱਲਬਾਤ ਕਰਦੇ ਹੋਏ।

ਜਲੰਧਰ. 27 ਮਾਰਚ  ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਨੇ ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਫਾਂਸੀ ਰੱਦ ਕਰਵਾਉਣ ਲਈ ਸਵਰਗੀ ਮੁੱਖ ਮੰਤਰੀ ਸ. ਬੇਅੰਤ ਸਿੰਘ ਦੇ ਪਰਿਵਾਰ ਨੂੰ ਆਪਣੇ ਨਾਲ ਸਹਿਮਤ ਕਰਕੇ ਜੋ ਨੀਤੀ ਅਪਣਾਈ ਹੈ, ਉਹ ਇਕ ਸ਼ਲਾਘਾਯੋਗ ਉਪਰਾਲਾ ਹੈ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਕਾਂਗਰਸੀ ਆਗੂ ਸ. ਪ੍ਰਮਿੰਦਰਪਾਲ ਸਿੰਘ ਖਾਲਸਾ ਅਤੇ ਸੁਰਿੰਦਰਪਾਲ ਸਿੰਘ ਗੋਲਡੀ ਨੇ ਕਰਦਿਆਂ ਕਿਹਾ ਕਿ ਇਸ ਮਾਮਲੇ 'ਚ ਅਕਾਲੀ ਦਲ ਨਾਲੋਂ ਕਾਂਗਰਸ ਦਾ ਪੱਖ ਵਧੇਰੇ ਸਪੱਸ਼ਟ ਹੈ। ਉਨ੍ਹਾਂ ਕਿਹਾ ਕਿ ਇਸ ਦੇ ਉਲਟ ਭਾਜਪਾ ਅਤੇ ਉਸ ਦੀਆਂ ਸਹਿਯੋਗੀ ਜਥੇਬੰਦੀਆਂ ਵਲੋਂ ਪੰਜਾਬ ਦੀ ਸ਼ਾਂਤੀ ਨੂੰ ਭੰਗ ਕਰਨ ਵਾਲੇ ਬਿਆਨ ਜਾਰੀ ਕੀਤੇ ਜਾ ਰਹੇ ਹਨ। ਸ. ਖਾਲਸਾ ਨੇ ਕਿਹਾ ਕਿ ਇਕ ਪਾਸੇ ਸਵਰਗੀ ਬੇਅੰਤ ਸਿੰਘ ਦਾ ਪਰਿਵਾਰ ਇਹ ਕਹਿ ਰਿਹਾ ਹੈ ਕਿ ਉਨ੍ਹਾਂ ਨੂੰ ਫਾਂਸੀ ਰੱਦ ਕਰਨ 'ਤੇ ਕੋਈ ਇਤਰਾਜ਼ ਨਹੀਂ ਹੈ ਤਾਂ ਅਜਿਹੇ ਸਮੇਂ ਭਾਜਪਾ ਵਲੋਂ ਇਹ ਸਟੈਂਡ ਲੈਣਾ ਕਿ ਕਾਨੂੰਨ ਨੂੰ ਆਪਣਾ ਕੰਮ ਕਰਨ ਦੇਣਾ ਚਾਹੀਦਾ ਹੈ, ਬਹੁਤ ਹੀ ਗੈਰ-ਜ਼ਿੰਮੇਵਾਰਾਨਾ ਹੈ।

3 ਅਪ੍ਰੈਲ ਨੂੰ ਰੇਲ ਚੱਕਾ ਜਾਮ ਕੀਤਾ ਜਾਵੇਗਾ-ਗਰੇਵਾਲ

 ਸੁਖਮਿੰਦਰਪਾਲ ਸਿੰਘ ਗਰੇਵਾਲ ਪੱਤਰਕਾਰਾਂ
ਨਾਲ ਗੱਲਬਾਤ ਕਰਦੇ ਹੋਏ।

ਅਜੀਤਗੜ੍ਹ. 27 ਮਾਰਚ ਭਾਰਤੀ ਜਨਤਾ ਪਾਰਟੀ ਕਿਸਾਨ ਮੋਰਚਾ ਦੇ ਕੌਮੀ ਸਕੱਤਰ ਸੁਖਮਿੰਦਰਪਾਲ ਸਿੰਘ ਗਰੇਵਾਲ ਨੇ ਕਿਹਾ ਕਿ ਕਿਸਾਨਾਂ ਨੂੰ ਕਣਕ ਦੀ ਫਸਲ 'ਤੇ 500 ਰੁਪਏ ਪ੍ਰਤੀ ਕਵਿੰਟਲ ਬੋਨਸ ਅਤੇ ਸੁਆਮੀਨਾਥਨ ਕਮਿਸ਼ਨ ਦੀ ਰਿਪੋਰਟ ਨੂੰ ਇੰਨ-ਬਿੰਨ ਲਾਗੂ ਕਰਵਾਉਣ ਦੀ ਮੰਗ ਨੂੰ ਲੈ ਕੇ 3 ਅਪ੍ਰੈਲ ਨੂੰ ਸਮੁੱਚੇ ਪੰਜਾਬ 'ਚ ਰੇਲ ਗੱਡੀਆਂ ਰੋਕ ਕੇ ਅੰਦੋਲਨ ਨੂੰ ਪੂਰੀ ਤਰ੍ਹਾਂ ਕਾਮਯਾਬ ਕੀਤਾ ਜਾਵੇਗਾ।
ਅੱਜ ਇਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਗਰੇਵਾਲ ਨੇ ਦੱਸਿਆ ਕਿ ਪਹਿਲੇ ਪੜਾਅ ਵਿੱਚ ਦੇਸ਼ ਦੇ ਅੱਠ ਖੇਤੀ ਪ੍ਰਧਾਨ ਸੂਬਿਆਂ ਵਿੱਚ ਕਿਸਾਨ ਰੇਲ ਪਟੜੀਆਂ 'ਤੇ ਬੈਠ ਕੇ ਗੱਡੀਆਂ ਰੋਕਣਗੇ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਵਿੱਚ ਸਾਹਨੇਵਾਲ, ਸੰਗਰੂਰ ਅਤੇ ਬਠਿੰਡਾ ਵਿੱਚ ਗੱਡੀਆਂ ਰੋਕੀਆਂ ਜਾਣਗੀਆਂ ਅਤੇ ਯੂ. ਪੀ. ਏ. ਸਰਕਾਰ ਨੂੰ ਜਗਾਉਣ ਲਈ ਪੰਜਾਬ ਤੋਂ ਇਲਾਵਾ ਹਰਿਆਣਾ, ਬਿਹਾਰ, ਰਾਜਸਥਾਨ, ਜੰਮੂ-ਕਸ਼ਮੀਰ, ਮੱਧ ਪ੍ਰਦੇਸ਼, ਉੱਤਰ ਪ੍ਰਦੇਸ਼ ਅਤੇ ਉਤਰਾਖੰਡ ਵਿਖੇ 3 ਅਪ੍ਰੈਲ ਨੂੰ ਰੇਲ ਗੱਡੀਆਂ ਰੋਕੀਆਂ ਜਾਣਗੀਆਂ।

ਅੰਮ੍ਰਿਤਸਰ ਹਵਾਈ ਅੱਡੇ 'ਤੇ ਯਾਤਰੀ ਤੋਂ 50 ਕਾਰਤੂਸ ਬਰਾਮਦ

ਰਾਜਾਸਾਂਸੀ. ਹੇਰ/ 27 ਮਾਰਚ ਅਮਰੀਕਨ ਕਸਟਮ ਅਧਿਕਾਰੀਆਂ ਕੋਲੋਂ ਲਿਖ਼ਤੀ ਆਗਿਆ ਪ੍ਰਾਪਤ ਇਕ ਪ੍ਰਵਾਸੀ ਭਾਰਤੀ ਕੋਲੋਂ ਸ੍ਰੀ ਗੁਰੂ ਰਾਮਦਾਸ ਕੌਮਾਂਤਰੀ ਹਵਾਈ ਅੱਡੇ ਦੇ ਕਸਟਮ ਅਧਿਕਾਰੀਆਂ ਨੇ 50 ਰੌਂਦ (9 ਐੱਮ. ਐੱਮ.) ਬਰਾਮਦ ਕੀਤੇ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਅੱਜ ਤੜਕੇ 4:40 ਵਜੇ ਇੱਥੇ ਪੁੱਜੀ ਕਤਰ ਏਅਰਵੇਜ਼ ਉਡਾਣ ਨੰਬਰ 298 ਰਾਹੀਂ ਪੁੱਜੇ ਪ੍ਰਵਾਸੀ ਭਾਰਤੀ ਸਲਵੰਤ ਸਿੰਘ ਪੁੱਤਰ ਅਜੀਤ ਸਿੰਘ ਵਾਸੀ ਮਾਕੋਵਾਲ ਥਾਣਾ ਰਮਦਾਸ, ਤਹਿ ਅਜਨਾਲਾ, ਜ਼ਿਲ੍ਹਾ ਅੰਮ੍ਰਿਤਸਰ ਕੋਲੋਂ ਸਾਮਾਨ 'ਚ (ਐਕਸਰੇ ਸਕੈਨਿੰਗ) ਰਾਹੀਂ ਜਾਂਚ-ਪੜਤਾਲ ਕਰਨ 'ਤੇ 50-9 ਐੱਮ. ਐੱਮ. ਦੇ ਰੌਂਦ ਬਰਾਮਦ ਕੀਤੇ ਗਏ। ਕਸਟਮ ਅਧਿਕਾਰੀਆਂ ਵੱਲੋਂ ਪੁੱਛਗਿੱਛ ਦੌਰਾਨ ਉਕਤ ਪ੍ਰਵਾਸੀ ਭਾਰਤੀ ਵਿਅਕਤੀ ਨੇ ਦੱਸਿਆ ਕਿ ਅਮਰੀਕਾ 'ਚ ਉਸ ਕੋਲੋਂ 9 ਐੱਮ.ਐੱਮ. ਦਾ ਲਾਇਸੈਂਸੀ ਪਿਸਤੌਲ ਹੈ, ਜਿਸ ਦੇ ਇਹ ਰੌਂਦ ਅਮਰੀਕੀ ਕਸਟਮ ਅਧਿਕਾਰੀਆਂ ਦੇ ਧਿਆਨ ਹਿੱਤ ਹਨ ਤੇ ਲਿਖ਼ਤੀ ਰੂਪ ਰਸੀਦ ਵੀ ਪ੍ਰਾਪਤ ਹੈ।
ਪਤਾ ਲੱਗਾ ਹੈ ਕਿ ਕਸਟਮ ਅਧਿਕਾਰੀਆਂ ਵੱਲੋਂ ਅਮਰੀਕਾ ਦੇ ਕਸਟਮ ਅਧਿਕਾੀਆਂ ਨਾਲ ਰਾਬਤਾ ਕਾਇਮ ਕਰਕੇ ਉਕਤ ਵਿਕਅਤੀ 50 ਰੌਂਦ ਜਮ੍ਹਾਂ ਕਰਕੇ ਇਹ ਕਹਿ ਕੇ ਛੱਡ ਦਿੱਤਾ ਗਿਆ ਹੈ, ਜਾਂਦੇ ਸਮੇਂ 50 ਰੌਂਦ ਵਾਪਸ ਦੇ ਦਿੱਤੇ ਜਾਣਗੇ। ਇਸ ਸਬੰਧੀ ਜਦ ਅੰਮ੍ਰਿਤਸਰ ਦੇ ਕਸਟਮ ਕਮਿਸ਼ਨਰ ਨਾਲ ਰਾਬਤਾ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਰੌਂਦ (ਕਾਰਤੂਸ) ਆਉਣੇ ਸਵੀਕਾਰ ਹਨ, ਜੇਕਰ ਕਿਸੇ ਵਿਅਕਤੀ ਕੋਲ ਲਾਇਸੈਂਸ ਹੋਵੇ ਪਰ ਅਮਰੀਕਾ 'ਤੋਂ ਪੁੱਜੇ ਉਕਤ ਵਿਅਕਤੀ ਕੋਲ ਲਾਇਸੈਂਸ ਮੌਜੂਦ ਨਹੀਂ ਸੀ, ਇਸ ਲਈ ਕਾਰਤੂਸ ਜਮ੍ਹਾਂ ਕਰ ਲਏ ਗਏ ਹਨ ਜੋ ਵਾਪਸ ਜਾਂਦੇ ਸਮੇਂ ਦਿੱਤੇ ਜਾਣਗੇ।

ਪੁਲਿਸ ਨੇ ਅਗਵਾ ਵਿਅਕਤੀ ਨੂੰ ਧਾੜਵੀਆਂ
 ਕੋਲੋਂ ਛੁਡਵਾਇਆ-ਪਰਚਾ ਦਰਜ

 ਅਗਵਾ ਹੋਇਆ ਵਿਅਕਤੀ ਬਰਾਮਦਗੀ ਤੋਂ ਬਾਅਦ
 ਪੁਲਿਸ ਪਾਰਟੀ ਨਾਲ।

ਅਬੋਹਰ. 27 ਮਾਰਚ  ਉਪ ਮੰਡਲ ਦੇ ਪਿੰਡ ਬਿਸ਼ਨਪੁਰਾ ਵਿਚ ਸੱਤਾਧਾਰੀ ਧਿਰ ਨਾਲ ਸਬੰਿਧਤ ਕੁੱਝ ਵਿਅਕਤੀਆਂ ਨੇ ਇੱਕ ਵਿਅਕਤੀ ਦੀ ਢਾਣੀ ਵਿਚ ਦਾਖ਼ਲ ਹੋ ਕੇ ਉੱਥੇ ਮੌਜੂਦ ਵਿਅਕਤੀਆਂ ਦੀ ਕੁੱਟਮਾਰ ਕੀਤੀ ਅਤੇ ਇੱਕ ਵਿਅਕਤੀ ਨੂੰ ਜਬਰੀ ਅਗਵਾ ਕਰ ਕੇ ਅਤੇ ਉਨ੍ਹਾਂ ਦੀ ਲਾਇਸੰਸੀ ਬਾਰਾਂ ਬੋਰ ਬੰਦੂਕ ਨਾਲ ਲੈ ਗਏ। ਪੁਲਿਸ ਨੇ ਕਾਰਵਾਈ ਕਰਦਿਆਂ ਅਗਵਾ ਵਿਅਕਤੀ ਨੂੰ ਧਾੜਵੀਆਂ ਦੇ ਚੁੰਗਲ ਵਿਚੋਂ ਛੁਡਾ ਲਿਆ ਹੈ ਜਦ ਕਿ ਬਾਰਾਂ ਬੋਰ ਬੰਦੂਕ ਦੀ ਬਰਾਮਦਗੀ ਬਾਰੇ ਅਜੇ ਤਫ਼ਤੀਸ਼ ਚੱਲ ਰਹੀ ਹੈ।
ਮੌਕੇ 'ਤੇ ਪਹੁੰਚੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਪਿੰਡ ਬਿਸ਼ਨਪੁਰਾ ਵਾਸੀ ਰਜਿੰਦਰ ਕੁਮਾਰ ਨੇ ਦੱਸਿਆ 'ਕੱਲ੍ਹ ਜਦ ਮੈਂ ਆਪਣੇ ਰਿਸ਼ਤੇਦਾਰ ਦਲੀਪ ਬਿਸ਼ਨੋਈ ਪੁੱਤਰ ਓਮ ਪ੍ਰਕਾਸ਼ ਵਾਸੀ ਬਿਸ਼ਨਪੁਰਾ ਦੀ ਢਾਣੀ ਗਿਆ ਤਾਂ ਯੂਥ ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਸੰਜੀਵ ਗੋਦਾਰਾ ਆਪਣੇ ਵੀਂਹ-ਪੱਚੀ ਸਾਥੀਆਂ ਨਾਲ ਹਥਿਆਰਾਂ-ਲਾਠੀਆਂ ਨਾਲ ਲੈਸ ਹੋ ਕੇ ਘਰ ਵਿਚ ਦਾਖ਼ਲ ਹੋਏ ਅਤੇ ਉੱਥੇ ਮੌਜੂਦ ਘਰ 'ਚ ਕੰਮ ਕਰਦੇ ਮਜ਼ਦੂਰਾਂ ਅਤੇ ਘਰ ਦੀਆਂ ਔਰਤਾਂ ਨਾਲ ਕੁੱਟਮਾਰ ਸ਼ੁਰੂ ਕਰ ਦਿੱਤੀ।
ਉਸ ਨੇ ਅੱਗੇ ਦੱਸਿਆ ਕਿ ਉਸ ਵੇਲੇ ਦਲੀਪ ਬਿਸ਼ਨੋਈ ਘਰ ਵਿਚ ਮੌਜੂਦ ਨਹੀਂ ਸੀ। ਮੈਂ ਘਰ ਦੀ ਛੱਤ ਉੱਪਰੋਂ ਛਾਲ ਮਾਰ ਕੇ ਭੱਜ ਕੇ ਜਾਨ ਬਚਾਈ ਜਦ ਕਿ ਧਾੜਵੀ ਮੇਰੇ ਗੰਨਮੈਨ ਕਪਿਲ ਉਰਫ਼ ਪਹਿਲਵਾਨ ਨੂੰ ਸਮੇਤ ਮੇਰੀ ਬਾਰਾਂ ਬੋਰ ਦੀ ਲਾਇਸੰਸੀ ਗੰਨ ਅਗਵਾ ਕਰ ਕੇ ਲੈ ਗਏ।' ਪੁਲਿਸ ਨੇ ਸੂਚਨਾ ਮਿਲਦਿਆਂ ਹੀ ਮੌਕੇ 'ਤੇ ਕਾਰਵਾਈ ਕਰਦਿਆਂ ਸੀਤੋ ਗੁੰਨੋ-ਮਹਿਰਾਣਾ ਲਿੰਕ ਮਾਰਗ 'ਤੇ ਸਥਿਤ ਵਿਜੈਪਾਲ ਉਰਫ਼ ਰਾਏ ਸਾਹਿਬ ਦੀ ਢਾਣੀ ਵਿਚੋਂ ਇੱਕ ਕਮਰੇ ਵਿਚ ਬੰਦ ਅਗਵਾ ਕੀਤਾ ਗੰਨਮੈਨ ਕਪਿਲ ਨੂੰ ਬਰਾਮਦ ਕਰ ਲਿਆ। ਥਾਣਾ ਬਹਾਵਵਾਲਾ ਦੇ ਮੁਖੀ ਮੱਖਣ ਸਿੰਘ ਨੇ ਦੱਸਿਆ ਕਿ ਪੂਨਮ ਬਿਸ਼ਨੋਈ ਪਤਨੀ ਦਲੀਪ ਬਿਸ਼ਨੋਈ ਦੇ ਬਿਆਨਾਂ 'ਤੇ ਵਿਜੇ ਪਾਲ ਉਰਫ਼ ਰਾਏ ਸਾਹਿਬ ਅਤੇ 19 ਹੋਰ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਧਾਰਾ 451, 380, 323, 148, 149, 365, 506, 427 ਦੇ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਉਨ੍ਹਾਂ ਦੱਸਿਆ ਕਿ ਅਗਵਾ ਹੋਏ ਕਪਿਲ ਦਾ ਡਾਕਟਰੀ ਮੁਆਇਨਾ ਕਰਵਾ ਕੇ ਉਸ ਨੂੰ ਫ਼ਾਰਗ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਸੰਜੀਵ ਗੋਦਾਰਾ ਜ਼ਿਲ੍ਹਾ ਪ੍ਰਧਾਨ ਯੂਥ ਅਕਾਲੀ ਦਲ ਦੇ ਖ਼ਿਲਾਫ਼ ਅਜੇ ਕਿਸੇ ਨੇ ਬਿਆਨ ਦਰਜ ਨਹੀਂ ਕਰਵਾਏ ਅਤੇ ਅਣਪਛਾਤੇ ਵਿਅਕਤੀਆਂ ਦੀ ਸ਼ਨਾਖ਼ਤ ਕਰਨ ਬਾਰੇ ਜਾਂਚ ਚੱਲ ਰਹੀ ਹੈ।

ਵਿਦਿਆਰਥਣ ਵੱਲੋਂ ਖ਼ੁਦਕੁਸ਼ੀ

ਨਵਾਂਸ਼ਹਿਰ, 27 ਮਾਰਚ -ਇਥੋਂ ਦੇ ਇੱਕ ਚਰਚਿਤ ਕਾਲਜ ਦੀ ਵਿਦਿਆਰਥਣ ਵੱਲੋਂ ਸਲਫ਼ਾਸ ਖਾ ਕੇ ਆਪਣੀ ਜੀਵਨ ਲੀਲ੍ਹਾ ਸਮਾਪਤ ਕਰ ਲਏ ਜਾਣ ਦੀ ਖ਼ਬਰ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਇੱਥੋਂ ਦੇ ਇੱਕ ਮਸ਼ਹੂਰ ਕਾਲਜ 'ਚ 20 ਸਾਲਾ ਬੀ. ਬੀ. ਏ ਦੀ ਵਿਦਿਆਰਥਣ ਨੇ ਚੜ੍ਹਦੀ ਸਵੇਰ ਨੂੰ ਹੀ ਸਲਫ਼ਾਸ ਦੀਆਂ ਕਿਸੇ ਪ੍ਰੇਸ਼ਾਨੀ ਕਾਰਨ 3 ਗੋਲੀਆਂ ਖਾ ਲਈਆਂ, ਜਿਸ ਕਾਰਨ ਉਸ ਦੀ ਹਾਲਤ ਵਿਗੜਦੀ ਗਈ ਤੇ ਉਹ ਮੁੱਖ ਸੜਕ ਦੇ ਕਿਨਾਰੇ ਜਾ ਡਿੱਗੀ। ਦਿਨ ਚੜ੍ਹਦੇ ਸਾਰ ਜਦੋਂ ਕਾਲਜ ਦੇ ਪ੍ਰਬੰਧਕਾਂ ਨੂੰ ਇਸ ਦੀ ਭਿਣਕ ਪਈ ਤਾਂ ਉਨ੍ਹਾਂ ਨੇ ਉਕਤ ਲੜਕੀ ਨੂੰ ਤੁਰੰਤ ਸਿਵਲ ਹਸਪਤਾਲ ਵਿਚ ਭਰਤੀ ਕਰਵਾਇਆ ਜਿੱਥੇ ਉਸ ਦੀ ਗੰਭੀਰ ਹਾਲਤ ਨੂੰ ਵੇਖਦਿਆਂ ਡਾਕਟਰ ਵੱਲੋਂ ਪੀ. ਜੀ. ਆਈ. ਲਈ ਰੈਫ਼ਰ ਕਰ ਦਿੱਤਾ ਗਿਆ। ਕਾਲਜ ਦੇ ਪ੍ਰਬੰਧਕਾਂ ਵੱਲੋਂ ਪੀ. ਜੀ. ਆਈ. ਦੀ ਬਜਾਇ ਉਸ ਦੀ ਹਾਲਤ ਨਾਜ਼ੁਕ ਵੇਖ ਕੇ ਉਸ ਨੂੰ ਇੱਥੋਂ ਦੇ ਹੀ ਇੱਕ ਨਿੱਜੀ ਹਸਪਤਾਲ ਵਿਚ ਦਾਖਲ ਕਰਵਾ ਦਿੱਤਾ ਪਰ ਦੇਰ ਸ਼ਾਮ ਲੜਕੀ ਦੀ ਮੌਤ ਹੋ ਗਈ। ਲਾਸ਼ ਨੂੰ ਪੋਸਟ-ਮਾਰਟਮ ਲਈ ਨਵਾਂਸ਼ਹਿਰ ਦੇ ਸਿਵਲ ਹਸਪਤਾਲ ਦੇ ਲਾਸ਼ ਘਰ ਵਿਚ ਰੱਖ ਦਿੱਤਾ ਗਿਆ ਹੈ। ਥਾਣਾ ਸਿਟੀ ਦੀ ਪੁਲਿਸ ਵੱਲੋਂ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਪਰ ਪੁਲਿਸ ਹਾਲੇ ਕਿਸੇ ਨਤੀਜੇ ਤੇ ਨਹੀਂ ਪਹੁੰਚ ਸਕੀ।

ਨਵੀਂ ਪੰਜਾਬ ਵਿਧਾਨ ਸਭਾ ਦਾ ਖੁਸ਼ਗੁਵਾਰ ਪਹਿਲੂ
ਕਾਂਗਰਸੀਆਂ ਵੱਲੋਂ ਸਰਕਾਰੀ ਖਾਣੇ ਦਾ ਬਾਈਕਾਟ ਖ਼ਤਮ

ਚੰਡੀਗੜ੍ਹ, 27 ਮਾਰਚ -14ਵੀਂ ਪੰਜਾਬ ਵਿਧਾਨ ਸਭਾ ਦੀ ਸ਼ੁਰੂਆਤ ਦਾ ਇਕ ਖ਼ੁਸ਼ਗੁਵਾਰ ਪਹਿਲੂ ਇਹ ਸਾਹਮਣੇ ਆਇਆ ਹੈ ਕਿ ਇਸ ਰਾਜ ਦੀ ਪ੍ਰਮੁੱਖ ਵਿਰੋਧੀ ਪਾਰਟੀ ਕਾਂਗਰਸ ਨਾਲ ਸਬੰਧਤ ਵਿਧਾਇਕਾਂ ਨੇ ਸਪੀਕਰ, ਮੁੱਖ ਮੰਤਰੀ ਅਤੇ ਦੂਜੇ ਅਕਾਲੀ-ਭਾਜਪਾ ਮੰਤਰੀਆਂ ਵੱਲੋਂ ਚੱਲ ਰਹੇ ਇਜਲਾਸ ਦੇ ਦੌਰਾਨ ਦਿੱਤੇ ਜਾਣ ਵਾਲੇ ਲੰਚ ਤੇ ਡਿਨਰ ਦਾ ਬਾਈਕਾਟ ਕਰਨ ਦਾ ਸਿਲਸਿਲਾ ਖ਼ਤਮ ਕਰ ਦਿੱਤਾ, ਜੋ ਪਿਛਲੇ 5 ਸਾਲ ਤੋਂ ਚਲਾ ਆ ਰਿਹਾ ਸੀ। ਇਸ ਦਾ ਕਾਰਨ ਅਕਾਲੀ-ਭਾਜਪਾ ਸਰਕਾਰ ਅਤੇ ਕਾਂਗਰਸ ਵਿਚਾਲੇ ਹੱਦੋਂ ਵੱਧ ਚੱਲ ਰਿਹਾ ਟਕਰਾਓ ਸੀ। ਕਈ ਕਾਂਗਰਸੀ ਤੇ ਅਕਾਲੀ ਵਿਧਾਇਕਾਂ ਦੀ ਰਾਏ ਹੈ ਕਿ ਬਾਈਕਾਟ ਦਾ ਮੁੱਖ ਕਾਰਨ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਕਾਲੀ-ਭਾਜਪਾ ਗਠਜੋੜ ਪ੍ਰਤੀ ਧਾਰਨ ਕੀਤੀ ਗਈ ਸਿਆਸੀ ਦੁਸ਼ਮਣੀ ਸੀ। ਨਵੀਂ ਪੰਜਾਬ ਵਿਧਾਨ ਸਭਾ ਦੇ ਚੱਲ ਰਹੇ ਪਹਿਲੇ ਇਜਲਾਸ ਦੇ ਦੌਰਾਨ ਸਪੀਕਰ ਸ. ਚਰਨਜੀਤ ਸਿੰਘ ਅਟਵਾਲ ਵੱਲੋਂ ਮੰਤਰੀਆਂ, ਵਿਧਾਇਕਾਂ, ਸਰਕਾਰੀ ਅਧਿਕਾਰੀਆਂ ਅਤੇ ਪੱਤਰਕਾਰਾਂ ਦੇ ਸਨਮਾਨ ਵਿਚ ਅੱਜ ਇਥੇ ਅਸੈਂਬਲੀ ਕੰਪਲੈਕਸ ਵਿਚ ਦੁਪਹਿਰ ਦਾ ਜੋ ਖਾਣਾ ਦਿੱਤਾ ਗਿਆ, ਉਸ ਵਿਚ ਅਕਾਲੀ-ਭਾਜਪਾ, ਕਾਂਗਰਸੀ ਅਤੇ ਆਜ਼ਾਦ ਵਿਧਾਇਕ ਵੀ ਸ਼ਾਮਿਲ ਹੋਏ। ਪਰ ਇਸ ਖਾਣੇ ਵਿਚ ਪੰਜਾਬ ਪ੍ਰਦੇਸ਼ ਕਮੇਟੀ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਗੈਰ-ਹਾਜ਼ਰ ਦੇਖੇ ਗਏ। ਪਰ ਉਨ੍ਹਾਂ ਦੇ ਲਗਭਗ ਸਾਰੇ ਕਾਂਗਰਸੀ ਵਿਧਾਇਕ ਜ਼ਰੂਰ ਪਹੁੰਚੇ ਹੋਏ ਸਨ। ਅੱਜ ਦੇ ਖਾਣੇ ਵਿਚ ਕਾਂਗਰਸ ਵਿਧਾਇਕ ਦਲ ਦੇ ਨਵੇਂ ਨੇਤਾ ਸੁਨੀਲ ਜਾਖੜ ਅਤੇ ਸਾਬਕਾ ਮੁੱਖ ਮੰਤਰੀ ਬੀਬੀ ਰਾਜਿੰਦਰ ਕੌਰ ਭੱਠਲ ਵੀ ਨਜ਼ਰ ਨਹੀਂ ਆਏ। ਕੁਝ ਨੌਜਵਾਨ ਕਾਂਗਰਸੀ ਤੇ ਅਕਾਲੀ ਵਿਧਾਇਕਾਂ ਨੇ ਉਮੀਦ ਪ੍ਰਗਟ ਕੀਤੀ ਹੈ ਕਿ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਅਕਾਲੀ ਤੇ ਕਾਂਗਰਸੀ ਵਿਧਾਇਕਾਂ ਵਿਚਾਲੇ ਕ੍ਰਿਕਟ ਦਾ ਫਰੈਂਡਲੀ ਮੈਚ ਖੇਡਣ ਬਾਰੇ ਪੁਰਾਣੀ ਰਿਵਾਇਤ ਨੂੰ ਫਿਰ ਤੋਂ ਸੁਰਜੀਤ ਕਰਨ ਲੱਗੇ ਹਨ। ਵਰਨਣਯੋਗ ਗੱਲ ਇਹ ਹੈ ਕਿ ਇਸ ਤਰ੍ਹਾਂ ਦਾ ਫਰੈਂਡਲੀ ਕ੍ਰਿਕਟ ਮੈਚ ਕਈ ਸਾਲ ਪਹਿਲਾਂ ਜਦੋਂ ਖੇਡਿਆ ਗਿਆ ਸੀ ਤਾਂ ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਦਾ ਵਿਰੋਧ ਕੀਤਾ ਸੀ, ਪਰ ਉਸ ਸਮੇਂ ਦੀ ਕਾਂਗਰਸ ਵਿਧਾਇਕ ਦਲ ਦੇ ਨੇਤਾ ਬੀਬੀ ਰਾਜਿੰਦਰ ਕੌਰ ਭੱਠਲ ਨੇ ਹਾਂ-ਪੱਖੀ ਹੁੰਗਾਰਾ ਭਰਿਆ ਸੀ, ਜਿਸ ਨੂੰ ਕੈਪਟਨ ਦੇ ਕੁਝ ਇਕ ਕਾਂਗਰਸੀ ਵਿਧਾਇਕਾਂ ਨੇ ਪਸੰਦ ਨਹੀਂ ਸੀ ਕੀਤਾ।

ਪੰਜਾਬ ਕਲਚਰ ਸੁਸਾਇਟੀ ਦੀ 'ਵਿਨੀਪੈਗ ਸ਼ਾਖਾ'
 ਦਾ ਗਠਨ-ਨਵੀ ਭੰਗੂ ਪ੍ਰਧਾਨ ਬਣੇ

ਰਵਿੰਦਰ ਰੰਗੂਵਾਲ ਤੇ ਹੋਰ ਮੈਂਬਰ ਨਵੀ ਭੰਗੂ ਨੂੰ ਵਿਨੀਪੈਗ ਇਕਾਈ
ਦਾ ਪ੍ਰਧਾਨ ਨਿਯੁਕਤ ਕਰਨ ਸਮੇਂ।

ਲੁਧਿਆਣਾ, 27 ਮਾਰਚ (-ਪੰਜਾਬ ਕਲਚਰ ਸੁਸਾਇਟੀ ਵੱਲੋਂ ਵਿਦੇਸ਼ਾਂ ਵਿਚ ਵਸਦੇ ਪੰਜਾਬੀ ਮੂਲ ਦੇ ਨੌਜਵਾਨਾਂ ਨੂੰ ਵਿਰਸੇ ਨਾਲ ਜੋੜਨ ਲਈ ਭਰਪੂਰ ਯਤਨ ਕੀਤੇ ਜਾਣਗੇ ਅਤੇ ਇਸ ਮੰਤਵ ਲਈ ਵਿਦੇਸ਼ਾਂ ਵਿਚ ਸੁਸਾਇਟੀ ਦੀਆਂ ਇਕਾਈਆਂ ਸਥਾਪਿਤ ਕੀਤੀਆਂ ਜਾਣਗੀਆਂ। ਇਹ ਫ਼ੈਸਲਾ ਅੱਜ ਇੱਥੇ ਸੁਸਾਇਟੀ ਦੀ ਮੀਟਿੰਗ ਵਿਚ ਕੀਤਾ ਗਿਆ, ਜਿਸ ਦੀ ਪ੍ਰਧਾਨਗੀ ਸੁਸਾਇਟੀ ਦੇ ਸੰਸਥਾਪਕ ਪ੍ਰਧਾਨ ਸ੍ਰੀ ਰਵਿੰਦਰ ਰੰਗੂਵਾਲ ਨੇ ਕੀਤੀ। ਸ: ਰੰਗੂਵਾਲ ਨੇ ਇਸ ਮੌਕੇ ਵਿਨੀਪੈਗ ਇਕਾਈ ਦਾ ਗਠਨ ਕਰਦਿਆਂ ਸ੍ਰੀ ਨਵੀ ਭੰਗੂ ਨੂੰ ਇਕਾਈ ਦਾ ਪ੍ਰਧਾਨ ਨਿਯੁਕਤ ਕੀਤਾ। ਉਨ੍ਹਾਂ ਕਿਹਾ ਕਿ ਸ: ਭੰਗੂ ਪਿਛਲੇ 15 ਸਾਲਾਂ ਤੋਂ ਜਥੇਬੰਦੀ ਨਾਲ ਜੁੜਕੇ ਪੰਜਾਬੀ ਸੱਭਿਆਚਾਰ ਦੀ ਸੇਵਾ ਕਰ ਰਹੇ ਹਨ। ਇਨ੍ਹਾਂ ਵੱਲੋਂ ਕੈਨੇਡਾ ਦੀ ਧਰਤੀ 'ਤੇ ਰਹਿੰਦਿਆਂ ਵੀ ਸੱਭਿਆਚਾਰ ਦਾ ਝੰਡਾ ਬੁਲੰਦ ਰੱਖਿਆ ਗਿਆ ਹੈ। ਇਸ ਸਮੇਂ ਦੀਦਾਰਜੀਤ ਸਿੰਘ ਲੋਟੇ, ਕਮਲ ਭੰਗੂ, ਰਣਦੀਪ ਚਾਹਲ, ਜਰਨੈਲ ਸਿੰਘ ਤੂਰ, ਕੰਵਲਜੀਤ ਸਿੰਘ, ਗੁਰਸ਼ਰਨ ਸਿੰਘ ਮੱਗੂ, ਕੁਲਜੀਤ ਸਿੰਘ ਜਗਦੇਵ, ਰਜਿੰਦਰ ਮਲਹਾਰ (ਗਾਇਕ), ਗੀਤਕਾਰ ਖੁਦ ਗੁਹਾਰੀਆ, ਤੋਚੀ ਤੁਰਕੋਟੀਆ, ਰਕੇਸ਼ ਜੋਗੀ, ਵਿੰਦਰ ਕੁਮਾਰ ਰਾਜੂ ਅਤੇ ਗੁਰਕ੍ਰਿਪਾਲ ਸਿੰਘ ਵੀ ਹਾਜ਼ਰ ਸਨ।

ਕਿਸੇ ਵੀ ਡਾਇਰੈਕਟਰ ਸਿਰ ਨਾ ਸਜਿਆ ਚੇਅਰਮੈਨੀ ਦਾ ਤਾਜ

ਲੋਹਟਬੱਦੀ, 27 ਮਾਰਚ -ਭਾਵੇਂ ਵੇਰਕਾ ਮਿਲਕ ਪਲਾਂਟ ਲੁਧਿਆਣਾ ਦੇ ਬੋਰਡ ਆਫ਼ ਡਾਇਰੈਕਟਰ ਦੀ ਚੋਣ ਹੋਈ ਨੂੰ ਕਰੀਬ ਡੇਢ ਸਾਲ ਦਾ ਸਮਾਂ ਹੋ ਗਿਆ ਹੈ, ਜਿਨ੍ਹਾਂ 'ਚ ਪੰਜਾਬ ਦੀ ਸੱਤਾ 'ਤੇ ਕਾਬਜ਼ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ 11 ਅਤੇ ਕਾਂਗਰਸ ਦਾ ਸਿਰਫ ਇਕ ਹੀ ਡਾਇਰੈਕਟਰ ਹੈ। ਪਿੰਡਾਂ ਅੰਦਰ ਸਥਿਤ ਵੇਰਕਾ ਦੁੱਧ ਉਤਪਾਦਕ ਸਹਿਕਾਰੀ ਸਭਾਵਾਂ ਦੇ ਪ੍ਰਧਾਨਾਂ ਅਤੇ ਅਧਿਕਾਰਤ ਮੈਂਬਰ ਵੋਟਰਾਂ ਵਲੋਂ ਚੁਣੇ ਗਏ ਇੰਨ੍ਹਾਂ ਡਾਇਰੈਕਟਰਾਂ 'ਚੋਂ ਚੇਅਰਮੈਨ ਅਤੇ ਉਪ ਚੇਅਰਮੈਨ ਚੁਣਨ ਲਈ ਪਹਿਲਾਂ ਬੀਤੀ 26 ਨਵੰਬਰ 2010 ਦਾ ਸਮਾਂ ਤੈਅ ਕੀਤਾ ਸੀ ਪਰ ਇਸ ਚੋਣ ਨੂੰ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕਰ ਕੇ 24 ਨਵੰਬਰ 2010 ਨੂੰ ਹੀ ਮੁੱਖ ਮੰਤਰੀ ਸ:ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਦੇ ਨਿਰਦੇਸ਼ਾਂ 'ਤੇ ਸ਼੍ਰੋਮਣੀ ਯੂਥ ਅਕਾਲੀ ਦਲ ਬਾਦਲ ਦੇ ਮੌਜੂਦਾ ਪ੍ਰਧਾਨ ਬਿਕਰਮ ਸਿੰਘ ਮਜੀਠੀਆ ਨੇ ਸਾਰੇ ਡਾਇਰੈਕਟਰਜ਼ ਅਤੇ ਜ਼ਿਲ੍ਹੇ ਦੀ ਸਮੁੱਚੀ ਲੀਡਰਸ਼ਿੱਪ ਨੂੰ ਚੰਡੀਗੜ੍ਹ ਬੁਲਾ ਕੇ ਹਰ ਇਕ ਦੀ ਨਿੱਜੀ ਰਾਇ ਜਾਣੀ ਅਤੇ ਚੁਣੇ ਗਏ ਡਾਇਰੈਕਟਰਾਂ ਪਾਸੋਂ ਅਕਾਲੀ ਦਲ ਬਾਦਲ ਲਈ ਸੇਵਾ ਨਿਭਾਉਣ ਦੇ ਸਮੇਂ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਫਿਰ 29 ਜੁਲਾਈ 2011 ਨੂੰ ਪਾਰਟੀ ਹਾਈਕਮਾਨ ਦੇ ਨਿਰਦੇਸ਼ਾਂ 'ਤੇ ਦੂਜੀ ਵਾਰ ਚੋਣ ਰੱਖੀ ਗਈ ਪ੍ਰੰਤੂ ਸਤੰਬਰ ਮਹੀਨੇ ਸ਼੍ਰੋਮਣੀ ਕਮੇਟੀ ਚੋਣਾਂ ਦੇ ਮੱਦੇਨਜ਼ਰ ਚੋਣ ਫਿਰ ਮੁਲਤਵੀ ਕਰ ਦਿੱਤੀ ਗਈ ਅਤੇ ਮੁੜ ਵਿਧਾਨ ਸਭਾ ਚੋਣਾਂ ਤੱਕ ਮੁਲਤਵੀ ਹੀ ਕਰੀ ਰੱਖਿਆ। ਹੁਣ ਨਵਾਂ ਇਤਿਹਾਸ ਸਿਰਜ ਕੇ ਸੂਬੇ ਦੀ ਸੱਤਾ 'ਤੇ ਕਾਬਜ਼ ਹੋਏ ਅਕਾਲੀ-ਭਾਜਪਾ ਸਰਕਾਰ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵਲੋਂ ਇਹ ਚੋਣ ਕਰਾਉਣ ਲਈ ਫਿਰ 27 ਮਾਰਚ ਦਾ ਦਿਨ ਤੈਅ ਕਰਵਾਇਆ। ਅੱਜ ਅਕਾਲੀ ਦਲ ਨਾਲ ਸਬੰਧਿਤ ਸਾਰੇ ਹੀ ਡਾਇਰੈਕਟਰ ਵਿਭਾਗ ਵੱਲੋਂ ਜਾਰੀ ਚੋਣ ਪ੍ਰੋਗਰਾਮ 'ਚ ਸ਼ਾਮਿਲ ਵੀ ਹੋ ਰਹੇ ਸਨ ਪਰ ਹਾਈਕਮਾਨ ਦੇ ਇਸ਼ਾਰੇ 'ਤੇ ਇਹ ਚੋਣ ਨਾ ਹੋ ਸਕੀ। ਇਸ ਵੱਕਾਰੀ ਅਹੁਦੇ ਲਈ ਸ਼ੁਰੂ ਤੋਂ ਹੀ ਪਹਿਲਾਂ ਚੇਅਰਮੈਨ ਰਹੇ ਅਜਮੇਰ ਸਿੰਘ ਭਾਗਪੁਰ ਭਰਾ ਸ਼ਰਨਜੀਤ ਸਿੰਘ ਢਿੱਲੋਂ ਕੈਬਨਿਟ ਮੰਤਰੀ ਪੰਜਾਬ ਅਤੇ ਜਗਜੀਤ ਸਿੰਘ ਭੋਲਾ ਦਾਖਾ ਫਰਜ਼ੰਦ ਮਨਪ੍ਰੀਤ ਸਿੰਘ ਇਯਾਲੀ ਚੇਅਰਮੈਨ ਜ਼ਿਲ੍ਹਾ ਪ੍ਰੀਸ਼ਦ ਲੁਧਿਆਣਾ ਆਹਮੋ-ਸਾਹਮਣੇ ਸਨ ਪਰ ਅੱਜ ਕੱਲ੍ਹ ਦੀਆਂ ਸੂਚਨਾਵਾਂ 'ਚ ਅਜਮੇਰ ਸਿੰਘ ਭਾਗਪੁਰ ਦੇ ਸਿਰ ਮੁੜ ਤਾਜ ਸਜਣ ਦੇ ਚਰਚੇ ਸਨ, ਜਦਕਿ ਸਾਬਕਾ ਮੰਤਰੀ ਮਹੇਸ਼ਇੰਦਰ ਸਿੰਘ ਗਰੇਵਾਲ ਵੀ ਆਪਣੇ ਡਾਇਰੈਕਟਰ ਲਈ ਕਿਸੇ ਅਹੁਦੇ ਦੀ ਤਾਕ 'ਚ ਸਨ। ਦੂਜੇ ਪਾਸੇ ਇਕਬਾਲ ਸਿੰਘ ਡਾਂਗੋਂ ਡਾਇਰੈਕਟਰ ਆਪਣੀ ਸੀਨੀਆਰਤਾ ਅਨੁਸਾਰ ਬਣਦਾ ਅਹੁਦਾ ਪ੍ਰਾਪਤ ਕਰਨ ਲਈ ਪਾਰਟੀ ਹਾਈਕਮਾਨ ਅੱਗੇ ਆਪਣੇ ਪੱਖ ਰਹੇ ਸਨ। ਸੂਤਰਾਂ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਅੱਜ ਦੀ ਚੋਣ ਨੂੰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਆਦੇਸ਼ਾਂ 'ਤੇ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕੀਤਾ ਗਿਆ ਦੱਸਿਆ ਜਾਂਦਾ ਹੈ।

ਸੁੰਦਰ ਦਸਤਾਰ ਸਜਾਉਣ ਵਾਲੇ ਨੌਜਵਾਨ
ਸਨਮਾਨਿਤ ਹੋਣਗੇ-ਬਾਬਾ ਸਰੂਪ ਸਿੰਘ

ਗੁਰਦਾਸਪੁਰ, 27 ਮਾਰਚ -ਨੌਜਵਾਨਾਂ ਅੰਦਰ ਦਸਤਾਰਾਂ ਸਜਾਉਣ ਪ੍ਰਤੀ ਉਤਸ਼ਾਹ ਪੈਦਾ ਕਰਨ ਲਈ ਸੰਤ ਸਰੂਪ ਸਿੰਘ ਚੰਡੀਗੜ੍ਹ ਵਾਲਿਆਂ ਵੱਲੋਂ 'ਪ੍ਰਗਟਿਓ ਖਾਲਸਾ ਸਮਾਗਮ' ਦੌਰਾਨ ਦਸਤਾਰ ਸਜਾਉਣ ਦੇ ਮੁਕਾਬਲੇ ਕਰਵਾਏ ਜਾਣਗੇ ਜਿਨ੍ਹਾਂ ਦੌਰਾਨ ਅੱਵਲ ਰਹਿਣ ਵਾਲੇ ਨੌਜਵਾਨਾਂ ਨੂੰ ਵਿਸ਼ੇਸ਼ ਤੌਰ 'ਤੇ ਸਨਮਾਨਿਤ ਕੀਤਾ ਜਾਵੇਗਾ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਭਾਈ ਜਸਵਿੰਦਰ ਸਿੰਘ ਪਾਹੜਾ ਨੇ ਅੱਜ ਇਥੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਗੁਰਦੁਆਰਾ ਸੰਤਸਰ ਸਾਹਿਬ ਚੰਡੀਗੜ੍ਹ ਵਿਖੇ ਵਿਸਾਖੀ ਦੇ ਪਵਿੱਤਰ ਦਿਹਾੜੇ ਨੂੰ ਸਮਰਪਿਤ ਕਰਵਾਏ ਜਾ ਰਹੇ ਤਿੰਨ ਰੋਜਾ 'ਪ੍ਰਗਟਿਓ ਖਾਲਸਾ ਸਮਾਗਮ' ਦੌਰਾਨ 61 ਆਖੰਡ ਪਾਠ ਸਾਹਿਬਾਂ ਦੇ ਮਹਾਨ ਜਾਪ ਹੋਣਗੇ ਜਿਨ੍ਹਾਂ ਦੀ ਆਰੰਭਤਾ 6 ਅਪ੍ਰੈਲ ਨੂੰ ਹੋਵੇਗੀ ਅਤੇ 8 ਅਪ੍ਰੈਲ ਨੂੰ ਸੰਪੂਰਨਤਾ ਦੇ ਭੋਗ ਪਾਏ ਜਾਣਗੇ। ਉਨ੍ਹਾਂ ਦੱਸਿਆ ਕਿ ਇਸ ਸਮਾਗਮ ਦੌਰਾਨ ਸ਼ਾਮ ਨੂੰ 4 ਵਜੇ ਤੋਂ 12 ਵਜੇ ਤੱਕ ਰਾਤ ਦੇ ਦੀਵਾਨ ਵੀ ਸਜਾਏ ਜਾਣਗੇ ਜਿਨ੍ਹਾਂ ਦੌਰਾਨ ਸਿੱਖ ਪੰਥ ਦੇ ਮਹਾਨ ਜਥੇਦਾਰ ਅਤੇ ਰਾਗੀ ਜੱਥੇ ਸੰਗਤਾਂ ਨੂੰ ਗੁਰਬਾਣੀ ਨਾਲ ਜੋੜਨ ਦੇ ਇਲਾਵਾ ਸਿੱਖ ਕੌਮ ਦੇ ਮਾਣਮੱਤੇ ਇਤਿਹਾਸ ਤੋਂ ਜਾਣੂ ਕਰਵਾਉਣਗੇ।
ਉਨ੍ਹਾਂ ਦੱਸਿਆ ਕਿ ਇਸ ਸਮਾਗਮ ਦੌਰਾਨ ਸ਼ਮੂਲੀਅਤ ਕਰਨ ਵਾਲੀਆਂ ਸੰਗਤਾਂ ਦੀ ਸਹੂਲਤ ਲਈ ਬੱਸਾਂ ਦਾ ਵਿਸ਼ੇਸ਼ ਪ੍ਰਬੰਧ ਕੀਤਾ ਗਿਆ ਹੈ ਅਤੇ ਗੁਰਦੁਆਰਾ ਸੰਤਸਰ ਸਾਹਿਬ ਵਿਖੇ ਸੰਗਤਾਂ ਦੀ ਰਿਹਾਇਸ਼ ਲਈ ਵੀ ਸੁਚੱਜੇ ਪ੍ਰਬੰਧ ਕੀਤੇ ਗਏ ਹਨ।

ਈ. ਟੀ. ਟੀ. ਅਧਿਆਪਕ ਮੁਅੱਤਲ

ਜਲੰਧਰ, 27 ਮਾਰਚ -ਸਰਕਾਰੀ ਐਲੀਮੈਂਟਰੀ ਸਕੂਲ ਮਾੜੀ ਸਮਰਾ ਬਲਾਕ ਭਿੱਖੀਵਿੰਡ, ਤਰਨ ਤਾਰਨ ਦੇ ਈ. ਟੀ. ਟੀ. ਅਧਿਆਪਕ ਹਰਮਨਬੀਰ ਸਿੰਘ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਇਸ ਸਬੰਧੀ ਆਦੇਸ਼ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਦੇ ਡਾਇਰੈਕਟਰ-ਕਮ-ਸਪੈਸ਼ਲ ਸਕੱਤਰ ਪੰਜਾਬ ਸਰਕਾਰ ਸ. ਬਲਵਿੰਦਰ ਸਿੰਘ ਵਲੋਂ ਦਿੱਤੇ ਗਏ ਹਨ। ਜਿਸ 'ਤੇ ਕਾਰਵਾਈ ਕਰਦੇ ਹੋਏ ਜ਼ਿਲ੍ਹਾ ਪ੍ਰੀਸ਼ਦ ਤਰਨਤਾਰਨ ਦੇ ਉਪ ਮੁੱਖ ਕਾਰਜਕਾਰੀ ਅਧਿਕਾਰੀ ਵਲੋਂ ਇਨ੍ਹਾਂ ਹੁਕਮਾਂ 'ਤੇ ਅਮਲ ਕਰਨ ਲਈ ਇਕ ਪੱਤਰ ਬਲਾਕ ਵਿਕਾਸ ਤੇ ਪੰਚਾਇਤ ਅਫਸਰ ਭਿੱਖੀਵਿੰਡ ਨੂੰ ਲਿਖ ਦਿੱਤਾ ਗਿਆ ਹੈ। ਮੁਅੱਤਲੀ ਦੌਰਾਨ ਹਰਮਨਬੀਰ ਸਿੰਘ ਦਾ ਸਦਰ ਮੁਕਾਮ ਦਫਤਰ ਡਵੀਜ਼ਨਲ ਡਿਪਟੀ ਕਮਿਸ਼ਨਰ ਪੰਚਾਇਤ ਜਲੰਧਰ ਵਿਖੇ ਨਿਯਤ ਕੀਤਾ ਗਿਆ ਹੈ ਅਤੇ ਗੁਜ਼ਾਰਾ ਭੱਤਾ ਇਸ ਸ਼ਰਤ 'ਤੇ ਦਿੱਤਾ ਜਾਵੇਗਾ, ਕਿ ਉਹ ਇਹ ਸਰਟੀਫਿਕੇਟ ਪੇਸ਼ ਕਰੇਗਾ ਕਿ ਇਸ ਸਮੇਂ ਦੌਰਾਨ ਉਸ ਨੇ ਕੋਈ ਨੌਕਰੀ ਜਾਂ ਕੋਈ ਹੋਰ ਕੰਮ ਨਹੀਂ ਕੀਤਾ।

ਦਿੱਲੀ ਗੁ: ਕਮੇਟੀ ਵੱਲੋਂ ਭਾਈ ਰਾਜੋਆਣਾ ਦੀ
ਸਜ਼ਾ ਮੁਆਫ਼ੀ ਲਈ ਰਾਸ਼ਟਰਪਤੀ ਨੂੰ ਪਟੀਸ਼ਨ

ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਫ਼ਾਂਸੀ ਦੀ ਸਜ਼ਾ ਨੂੰ ਖਤਮ ਕਰਨ ਦੀ ਮੰਗ ਨੂੰ ਲੈ ਕੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ: ਪਰਮਜੀਤ ਸਿੰਘ ਸਰਨਾ, ਆਰ. ਐਸ. ਜੌੜਾ, ਸਕੱਤਰ ਦਿੱਲੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸ: ਕਰਤਾਰ ਸਿੰਘ ਕੋਛੜ, ਸ: ਮੋਹਨਪਾਲ ਸਿੰਘ ਤੇ ਸ: ਮਨਜੀਤ ਸਿੰਘ ਸਰਨਾ ਰਾਸ਼ਟਰਪਤੀ ਨੂੰ ਮੰਗ-ਪੱਤਰ ਦੇਣ ਮਗਰੋਂ ਰਾਸ਼ਟਰਪਤੀ ਭਵਨ 'ਚੋਂ ਬਾਹਰ ਆਉਂਦੇ ਹੋਏ।

ਨਵੀਂ ਦਿੱਲੀ, 27 ਮਾਰਚ -ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਫਾਂਸੀ ਦੀ ਸਜ਼ਾ ਮੁਆਫ ਕਰਵਾਉਣ ਦੀ ਮੰਗ ਨੂੰ ਲੈ ਕੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਪਰਮਜੀਤ ਸਿੰਘ ਸਰਨਾ, ਪੰਜਾਬੀ ਸਿਵਲ ਸੁਸਾਇਟੀ ਦੇ ਪ੍ਰਧਾਨ ਰਘਬੀਰ ਸਿੰਘ ਜੌੜਾ, ਕਰਤਾਰ ਸਿੰਘ ਕੋਛੜ, ਮਨਜੀਤ ਸਿੰਘ ਸਰਨਾ ਤੇ ਮੋਹਨਪਾਲ ਸਿੰਘ 'ਤੇ ਆਧਾਰਿਤ ਇਕ ਵਫ਼ਦ ਨੇ ਰਾਸ਼ਟਰਪਤੀ ਸ੍ਰੀਮਤੀ ਪ੍ਰਤਿਭਾ ਪਾਟਿਲ ਦੇ ਨਾਂਅ ਇਕ ਪਟੀਸ਼ਨ ਰਾਸ਼ਟਰਪਤੀ ਦਫ਼ਤਰ ਵਿਚ ਸੌਂਪੀ । ਇਸ ਪਟੀਸ਼ਨ ਰਾਹੀਂ ਮੰਗ ਕੀਤੀ ਕਿ ਦੇਸ਼ ਅਤੇ ਪੰਜਾਬ ਦੇ ਵੱਡੇ ਹਿੱਤਾਂ ਨੂੰ ਮੁੱਖ ਰੱਖਦਿਆਂ ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਫਾਂਸੀ ਸਜ਼ਾ ਮੁਆਫ ਕੀਤੀ ਜਾਵੇ। ਇਸ ਪਟੀਸ਼ਨ ਵਿਚ ਜ਼ੋਰ ਦੇ ਕੇ ਕਿਹਾ ਗਿਆ ਹੈ ਕਿ ਅੱਤਵਾਦ ਤੇ ਹਿੰਸਾ ਭਾਵੇਂ ਦੇਸ਼ ਦੇ ਕਿਸੇ ਵੀ ਹਿੱਸੇ ਵਿਚ ਹੋਵੇ, ਅਸੀਂ ਉਸ ਦਾ ਪੁਰਜ਼ੋਰ ਵਿਰੋਧ ਕਰਦੇ ਹਾਂ ਅਤੇ ਮਹਿਸੂਸ ਕਰਦੇ ਹਾਂ ਕਿ ਅਮਨ ਅਤੇ ਕਾਨੂੰਨ ਦੇ ਵਾਤਾਵਰਨ ਵਿਚ ਹੀ ਦੇਸ਼ ਤਰੱਕੀ ਦੀਆਂ ਪੁਲਾਘਾਂ ਪੁੱਟ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਈ ਰਾਜੋਆਣਾ ਜੋ 16 ਵਰ੍ਹਿਆਂ ਤੋਂ ਵੱਧ ਸਮਾਂ ਜੇਲ੍ਹ ਦੀ ਕਾਲ ਕੋਠੜੀ ਵਿਚ ਬਿਤਾ ਚੁੱਕਾ ਹੈ , ਨੂੰ ਫਾਂਸੀ ਦਿੱਤੇ ਜਾਣਾ ਮਨੁੱਖੀ ਕਦਰਾਂ ਕੀਮਤਾਂ ਦੇ ਵਿਰੁੱਧ ਹੋਵੇਗਾ। ਉਕਤ ਪਟੀਸ਼ਨ ਵਿਚ ਕਈ ਤੱਥਾਂ ਦੀ ਜਾਣਕਾਰੀ ਦਿੱਤੀ ਗਈ ਹੈ, ਜਿਸ ਦੇ ਆਧਾਰ 'ਤੇ ਭਾਈ ਰਾਜੋਆਣਾ ਨੂੰ ਫਾਂਸੀ ਦੇਣਾ ਕਿਸੇ ਵੀ ਤਰੀਕੇ ਜਾਇਜ਼ ਨਹੀਂ ਹੋਵੇਗਾ। ਸ: ਪਰਮਜੀਤ ਸਿੰਘ ਸਰਨਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸ੍ਰੀ ਅਕਾਲ ਤਖਤ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨਾਲ ਫੋਨ 'ਤੇ ਗੱਲਬਾਤ ਕਰਦਿਆਂ ਉਨ੍ਹਾਂ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਆਦੇਸ਼ ਜਾਰੀ ਕਰਨ ਕਿ ਉਹ ਪੰਜਾਬ ਵਿਧਾਨ ਸਭਾ ਵਿਚ ਭਾਈ ਰਾਜੋਆਣਾ ਨੂੰ ਫਾਂਸੀ ਦਿੱਤੇ ਜਾਣ ਦੇ ਵਿਰੁੱਧ ਮਤਾ ਪਾਸ ਕਰਨ।

ਰਾਜੋਆਣਾ ਦੀ ਸਜ਼ਾ ਉਮਰ ਕੈਦ 'ਚ
ਤਬਦੀਲ ਕੀਤੀ ਜਾਵੇ-ਕੈਪਟਨ

ਚੰਡੀਗੜ੍ਹ, 25 ਮਾਰਚ - ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਨੇ ਅੱਜ ਇੱਥੋਂ ਜਾਰੀ ਇੱਕ ਬਿਆਨ ਵਿਚ ਮਰਹੂਮ ਮੁੱਖ ਮੰਤਰੀ ਸ: ਬੇਅੰਤ ਸਿੰਘ ਦੇ ਪਰਿਵਾਰ ਵੱਲੋਂ ਭਾਈ ਬਲਵੰਤ ਸਿੰਘ ਰਾਜੋਆਣਾ ਦੀ ਸਜ਼ਾ ਨੂੰ ਮੌਤ ਤੋਂ ਘਟਾਕੇ ਉਮਰ ਕੈਦ ਵਿਚ ਤਬਦੀਲ ਕਰਨ ਦੇ ਦਿੱਤੇ ਗਏ ਵਿਚਾਰ ਦੀ ਸ਼ਲਾਘਾ ਕਰਦਿਆਂ ਕਿਹਾ ਹੈ ਕਿ ਪ੍ਰਦੇਸ਼ ਕਾਂਗਰਸ ਇਸ ਵਿਚਾਰ ਦਾ ਸਮਰਥਨ ਕਰੇਗੀ। ਉਨ੍ਹਾਂ ਕਿਹਾ ਕਿ ਅਗਰ ਮੌਜੂਦਾ ਰਾਜ ਸਰਕਾਰ ਦੇਸ਼ ਦੇ ਰਾਸ਼ਟਰਪਤੀ ਨੂੰ ਇਸ ਮੰਤਵ ਲਈ ਅਪੀਲ ਜਾਂ ਪਟੀਸ਼ਨ ਭੇਜੇਗੀ ਤਾਂ ਉਹ ਉਸ ਦਾ ਸਮਰਥਨ ਕਰਨਗੇ। ਕੈਪਟਨ ਅਮਰਿੰਦਰ ਸਿੰਘ ਨੇ ਸਪੱਸ਼ਟ ਕੀਤਾ ਕਿ ਮਰਹੂਮ ਸ. ਬੇਅੰਤ ਸਿੰਘ ਨੇ ਸੂਬੇ ਵਿਚ ਸ਼ਾਂਤੀ ਦੀ ਸਥਾਪਤੀ ਲਈ ਆਪਣੀ ਜਾਨ ਦਿੱਤੀ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਵੀ ਅੱਜ ਇਸ ਗੱਲ ਲਈ ਇੱਕਮੁੱਠ ਹਨ ਕਿ ਸੂਬੇ ਵਿਚਲੀ ਸ਼ਾਂਤੀ ਨੂੰ ਹਰ ਕੀਮਤ 'ਤੇ ਬਹਾਲ ਰੱਖਿਆ ਜਾਵੇ ਅਤੇ ਇਸੇ ਲਈ ਉਨ੍ਹਾਂ ਵੱਲੋਂ ਰਾਜੋਆਣਾ ਦੀ ਮੌਤ ਦੀ ਸਜ਼ਾ ਨੂੰ ਉਮਰ ਕੈਦ ਵਿਚ ਬਦਲੇ ਜਾਣ ਦੀ ਮੰਗ ਕੀਤੀ ਗਈ ਹੈ। ਕੈਪਟਨ ਅਮਰਿੰਦਰ ਸਿੰਘ ਨੇ ਸਪੱਸ਼ਟ ਕੀਤਾ ਕਿ ਕਾਂਗਰਸ ਪਾਰਟੀ ਉਕਤ ਵਿਚਾਰ ਨਾਲ ਸਹਿਮਤ ਹੈ ਅਤੇ ਰਾਜੋਆਣਾ ਨੂੰ ਦਿੱਤੀ ਗਈ ਮੌਤ ਦੀ ਸਜ਼ਾ ਉਮਰ ਕੈਦ ਵਿਚ ਤਬਦੀਲ ਕੀਤੀ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਪਾਰਟੀ ਨੂੰ ਇਸ ਮੰਤਵ ਲਈ ਸਰਕਾਰ ਨੂੰ ਵੀ ਕੋਈ ਸਮਰਥਨ ਦੇਣ ਵਿਚ ਇਤਰਾਜ਼ ਨਹੀਂ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੀ ਸ਼ਾਂਤੀ ਵੱਡੀ ਕੀਮਤ ਅਦਾ ਕਰਕੇ ਪ੍ਰਾਪਤ ਕੀਤੀ ਗਈ ਹੈ ਅਤੇ ਇਸ ਨੂੰ ਕਾਇਮ ਰੱਖਣਾ ਸਾਡਾ ਸਾਰਿਆਂ ਦਾ ਸਾਂਝਾ ਫਰਜ਼ ਹੈ।

ਹੁਣ ਦਿੱਲੀ 'ਤੇ ਕਬਜ਼ਾ ਕਰਨਾ ਹੈ-ਮੁਲਾਇਮ

ਲਖਨਊ, 25 ਮਾਰਚ - ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ 'ਚ ਮਿਲੀ ਜਿੱਤ ਤੋਂ ਉਤਸ਼ਾਹਿਤ ਸਮਾਜਵਾਦੀ ਪਾਰਟੀ (ਸਪਾ) ਮੁਖੀ ਮੁਲਾਇਮ ਸਿੰਘ ਯਾਦਵ ਨੇ ਕਾਰਕੁੰਨਾਂ ਨੂੰ ਕਿਹਾ ਕਿ 2012 ਦਾ ਮਿਸ਼ਨ ਜਿੱਤਣ ਤੋਂ ਬਾਅਦ ਹੁਣ ਸਾਡਾ ਟੀਚਾ ਆਉਣ ਵਾਲੀਆਂ ਲੋਕ ਸਭਾ ਚੋਣਾਂ 'ਚ ਭਾਰੀ ਜਿੱਤ ਹਾਸਲ ਕਰਕੇ ਦਿੱਲੀ 'ਤੇ ਕਬਜ਼ਾ ਕਰਨਾ ਹੈ। ਪਾਰਟੀ ਦਫ਼ਤਰ 'ਚ ਕਾਰਕੁੰਨਾਂ ਨੂੰ ਸੰਬੋਧਨ ਕਰਦੇ ਹੋਏ ਮੁਲਾਇਮ ਨੇ ਕਿਹਾ ਕਿ ਤੁਹਾਡੀ ਲੋਕਾਂ ਦੀ ਮਿਹਨਤ ਅਤੇ ਲਗਨ ਤੋਂ ਸਮਾਜਵਾਦੀ ਪਾਰਟੀ ਨੇ ਲਖਨਊ ਦੀ ਲੜਾਈ ਜਿੱਤ ਲਈ। ਹੁਣ ਇਸ ਸ਼ਾਨਦਾਰ ਜਿੱਤ ਤੋਂ ਬਾਅਦ ਸਾਡਾ ਟੀਚਾ ਸਾਲ 2012 'ਚ ਹੋਣ ਵਾਲੀਆਂ ਆਮ ਚੋਣਾਂ 'ਚ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਸਭਾ ਸੀਟਾਂ ਜਿੱਤਣਾ ਹੈ। ਯਾਦਵ ਨੇ ਕਿਹਾ ਕਿ ਲੋਕ ਸਭਾ ਦੀਆਂ ਜ਼ਿਆਦਾ ਤੋਂ ਜ਼ਿਆਦਾ ਸੀਟਾਂ ਜਿੱਤ ਕੇ ਹੀ ਦਿੱਲੀ 'ਤੇ ਕਬਜ਼ਾ ਕਰ ਸਕਾਂਗੇ। ਯਾਦਵ ਨੇ ਕਿਹਾ ਕਿ ਪਾਰਟੀ ਕਾਰਕੁੰਨ ਆਪਣੇ-ਆਪਣੇ ਖੇਤਰਾਂ 'ਚ ਵਾਪਸ ਜਾਣ। ਜਨਤਾ ਨਾਲ ਸੰਪਰਕ ਕਰਨ। ਉਨ੍ਹਾਂ ਦੀਆਂ ਸਮੱਸਿਆਵਾਂ ਨੂੰ ਹੱਲ ਕਰਨ ਦੀਆਂ ਕੋਸ਼ਿਸ਼ਾਂ ਕਰਨ। ਕਿਸਾਨਾਂ ਅਤੇ ਬੇਰੁਜ਼ਗਾਰਾਂ ਦੇ ਮਾਮਲਿਆਂ 'ਤੇ ਵਿਸ਼ੇਸ਼ ਧਿਆਨ ਦੇਣ।

ਮਜੀਠਾ ਨੇੜੇ ਲੁਟੇਰਿਆਂ ਨੇ ਕੀਤਾ ਨੌਜਵਾਨ ਦਾ ਕਤਲ

ਕਤਲ ਕੀਤੇ ਨੌਜਵਾਨ ਨਿਰਮਲ ਸਿੰਘ ਦੀ
ਪੁਰਾਣੀ ਤਸਵੀਰ।

ਜੇਠੂਵਾਲ/ਮਜੀਠਾ/ਕੱਥੂਨੰਗਲ, 25 ਮਾਰਚ -ਇੱਥੋਂ ਥੋੜ੍ਹੀ ਦੂਰ ਪੈਂਦੇ ਪਿੰਡ ਮਜਵਿੰਡ ਵਿਖੇ ਲੁਟੇਰਿਆਂ ਵੱਲੋਂ ਇੱਕ ਨੌਜਵਾਨ ਦਾ ਕਤਲ ਕਰਨ ਦਾ ਸਮਾਚਾਰ ਹੈ। ਇੱਥੋਂ ਥੋੜ੍ਹੀ ਦੂਰ ਪੈਂਦੇ ਪਿੰਡ ਮੱਜਵਿੰਡ ਵਿਖੇ ਬੀਤੀ ਰਾਤ ਚੋਰਾਂ ਵੱਲੋਂ ਪਿੰਡ ਦੇ ਇੱਕ ਕਿਸਾਨ ਦੀ ਹਵੇਲੀ 'ਚ ਰੱਖੀਆਂ ਗਈਆਂ ਟ੍ਰੈਕਟਰ ਦੀਆਂ ਹੱਲਾਂ ਨੂੰ ਗਿਣੀ-ਮਿਣੀ ਸ਼ਾਜਿਸ਼ ਤਹਿਤ ਚੋਰੀ ਕਰਕੇ ਘੋੜਾਂ-ਰੇੜ੍ਹੇ 'ਤੇ ਲੱਦ ਕੇ ਲੈ ਕੇ ਜਾ ਰਹੇ ਸਨ ਕਿ ਪਿੰਡ ਦੇ ਹੀ ਵਸਨੀਕ ਨੌਜਵਾਨ ਨਿਰਮਲ ਸਿੰਘ ਪੁੱਤਰ ਕਸ਼ਮੀਰ ਸਿੰਘ ਜਿਸ ਦਾ ਘਰ ਪਿੰਡ ਦੇ ਬਾਹਰ ਵਾਰ ਹੋਣ ਕਰਕੇ ਉਸਨੇ ਵੇਖ ਲਿਆ ਤਾਂ ਉਸ ਨੂੰ ਸ਼ੱਕ ਹੋ ਗਿਆ ਤੇ ਉਸ ਨੇ ਆਪਣੇ ਘਰ ਆ ਕੇ ਵੀ ਦੱਸਿਆ ਅਤੇ ਨੌਜਵਾਨ ਨੇ ਇਕੱਲਿਆਂ ਹੀ ਦਲੇਰੀ ਕਰਦਿਆਂ ਆਪਣਾ ਮੋਟਰਸਾਈਕਲ ਲੈ ਕੇ ਚੋਰਾਂ ਨੂੰ ਫੜਣ ਲਈ ਉਨ੍ਹਾਂ ਦੇ ਪਿੱਛੇ ਚਲਾ ਗਿਆ, ਜਿਸ 'ਤੇ ਇਕੱਲਾ ਹੋਣ ਕਰਕੇ ਨੌਜਵਾਨ ਨਿਰਮਲ ਸਿੰਘ ਨੂੰ ਚੋਰਾਂ ਵੱਲੋਂ ਤੇਜ਼ਧਾਰ ਹਥਿਆਰਾਂ ਨਾਲ ਵਾਰ ਕਰਦਿਆਂ ਕਤਲ ਕਰ ਦਿੱਤਾ। ਨਿਰਮਲ ਸਿੰਘ ਨੂੰ ਕਤਲ ਕਰਕੇ ਚੋਰਾਂ ਨੇ ਉਸ ਦੀ ਲਾਸ਼ ਨੂੰ ਪਿੰਡ ਮੱਜਵਿੰਡ ਦੇ ਖੇਤਾਂ 'ਚ ਸੁੱਟ ਦਿੱਤਾ ਅਤੇ ਚੋਰੀ ਕੀਤੀਆਂ ਟ੍ਰੈਕਟਰ ਦੀਆਂ ਹੱਲਾਂ ਤੇ ਮ੍ਰਿਤਕ ਨੌਜਵਾਨ ਦਾ ਮੋਟਰਸਾਈਕਲ ਵੀ ਚੋਰ ਲੈ ਕੇ ਰਫੂਚੱਕਰ ਹੋ ਗਏ। ਪੁਲਿਸ ਵੱਲੋਂ ਡੀ. ਐੱਸ. ਪੀ. ਗੁਰਸੇਵਕ ਸਿੰਘ ਬਰਾੜ ਤੇ ਥਾਣਾ ਮੁਖੀ ਹਰਭਾਲ ਸਿੰਘ ਵੱਲੋਂ ਪੁਲਿਸ ਪਾਰਟੀ ਸਮੇਤ ਮ੍ਰਿਤਕ ਦੀ ਲਾਸ਼ ਨੂੰ ਕਬਜ਼ੇ 'ਚ ਲੈ ਕੇ ਅਗਲੇਰੀ ਕਾਰਵਾਈ ਕਰਦਿਆਂ ਲਾਸ਼ ਪੋਸਟਮਾਰਟਮ ਲਈ ਭੇਜ ਦਿੱਤੀ ਹੈ ਤੇ ਦੋਸ਼ੀਆਂ ਦੀ ਭਾਲ ਸਰਗਰਮੀ ਨਾਲ ਜਾਰੀ ਹੈ। ਮ੍ਰਿਤਕ ਆਪਣੇ ਪਿੱਛੇ ਇਕ ਛੋਟੀ ਬੱਚੀ ਤੇ ਵਿਧਵਾ ਛੱਡ ਗਿਆ ਹੈ।

ਪਾਕਿ ਵੀ ਚਾਹੁੰਦਾ ਹੈ ਅਸੈਨਿਕ ਪ੍ਰਮਾਣੂ ਤਕਨੀਕ-ਗਿਲਾਨੀ

ਇਸਲਾਮਾਬਾਦ, 25 ਮਾਰਚ -ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਯੂਸਫ ਰਜ਼ਾ ਗਿਲਾਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਦੇਸ਼ ਵੀ ਗੈਰ ਫੌਜੀ ਪ੍ਰਮਾਣੂ ਤਕਨੀਕ ਚਾਹੁੰਦਾ ਹੈ ਕਿਉਂਕਿ ਸਾਡਾ ਮੰਨਣਾ ਹੈ ਕਿ ਭਾਰਤ ਨਾਲ ਕਿਸੇ ਵੀ ਤਰਾਂ ਦਾ ਰਣਨੀਤਕ ਅਸੰਤੁਲਨ ਖੇਤਰ 'ਚ ਅਸਥਿਰਤਾ ਪੈਦਾ ਕਰ ਸਕਦਾ ਹੈ। ਗਿਲਾਨੀ ਨੇ ਕਿਹਾ ਕਿ ਅਸੀਂ ਅਮਰੀਕਾ ਨਾਲ ਇਸ ਸਬੰਧੀ ਗੱਲਬਾਤ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ ਕਿਉਂਕਿ ਜੇਕਰ ਭਾਰਤ ਅਤੇ ਪਾਕਿਸਤਾਨ 'ਚ ਇਸ ਤਰਾਂ ਦਾ ਅਸੰਤੁਲਨ ਹੋਵੇਗਾ ਤਾਂ ਖੇਤਰ 'ਚ ਸਥਿਰਤਾ ਨਹੀਂ ਹੋਵੇਗੀ। ਸਿਓਲ ਵਿਖੇ ਹੋਣ ਵਾਲੇ ਪ੍ਰਮਾਣੂ ਸੁਰੱਖਿਆ ਸੰਮੇਲਨ 'ਚ ਹਿੱਸਾ ਲੈਣ ਲਈ ਜਾਣ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨੇ ਰਾਵਲਪਿੰਡੀ 'ਚ ਸੈਨਾ ਦੇ ਹਵਾਈ ਅੱਡੇ 'ਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅਸੀਂ ਅਮਰੀਕਾ ਨੂੰ ਕਹਾਂਗੇ ਕਿ ਪ੍ਰਮਾਣੂ ਤਕਨੀਕ ਸਾਡੀ ਜ਼ਰੂਰਤ ਹੈ। ਦੱਸਣਯੋਗ ਹੈ ਕਿ ਬੀਤੇ ਕਈ ਸਾਲਾਂ ਤੋਂ ਪਾਕਿਸਤਾਨ ਪ੍ਰਮਾਣੂ ਤਕਨੀਕ ਬਾਰੇ ਭਾਰਤ ਵਰਗੀ ਸੰਧੀ ਲਈ ਅਮਰੀਕਾ ਸਮੇਤ ਪੂਰਬੀ ਦੇਸ਼ਾਂ 'ਤੇ ਦਬਾਅ ਬਣਾਉਂਦਾ ਰਿਹਾ ਹੈ।

ਡੇਹਲੋਂ ਨੇੜੇ ਟਰੱਕ ਹਾਦਸੇ 'ਚ 3 ਮੌਤਾਂ, 16 ਜ਼ਖ਼ਮੀ

ਡੇਹਲੋਂ ਨੇੜੇ ਵਾਪਰੇ ਹਾਦਸੇ 'ਚ ਨੁਕਸਾਨੇ ਗਏ ਟਰੱਕ ਅਤੇ ਇੰਨਸੈੱਟ ਮ੍ਰਿਤਕ ਬਿੰਦਰ ਸਿੰਘ, ਗੁਰਦੀਪ ਸਿੰਘ, ਸਾਧੂ ਰਾਮ ਦੀਆਂ ਪੁਰਾਣੀਆਂ ਤਸਵੀਰਾਂ।

ਡੇਹਲੋਂ/ਆਲਮਗੀਰ, 25 ਮਾਰਚ-ਬੀਤੀ ਰਾਤ ਕਰੀਬ 11:30 ਵਜੇ ਲੁਧਿਆਣਾ-ਡੇਹਲੋਂ-ਮਾਲੇਰਕੋਟਲਾ ਸੜਕ ਤੇ ਕਸਬਾ ਡੇਹਲੋਂ ਨਜ਼ਦੀਕ ਵਾਪਰੇ ਟਰੱਕ ਹਾਦਸੇ 'ਚ ਤਿੰਨ ਵਿਅਕਤੀਆਂ ਦੀ ਮੌਤ ਹੋ ਜਾਣ (ਜਿਹਨਾਂ 'ਚ 21 ਸਾਲਾ ਨੌਜਵਾਨ ਸ਼ਾਮਿਲ ਹੈ) ਅਤੇ 16 ਤੋਂ ਵੱਧ ਵਿਅਕਤੀਆਂ ਦੇ ਜ਼ਖ਼ਮੀ ਹੋਣ ਦੀ ਮੰਦਭਾਗੀ ਖ਼ਬਰ ਹੈ। ਜਿਨ੍ਹਾਂ 'ਚੋਂ 7 ਵਿਅਕਤੀ ਦਿਆ ਨੰਦ ਹਸਪਤਾਲ ਲੁਧਿਆਣਾ ਵਿਖੇ ਸਖ਼ਤ ਜ਼ਖ਼ਮੀ ਹੋਣ ਕਾਰਨ ਜ਼ੇਰੇ ਇਲਾਜ ਹਨ, ਜਦਕਿ ਇਨ੍ਹਾਂ 'ਚ ਦੋ ਗੰਭੀਰ ਰੂਪ 'ਚ ਰੀਡ ਦੀ ਹੱਡੀ ਟੁੱਟ ਜਾਣ ਕਾਰਨ ਤੇ ਲੱਤਾਂ ਬੁਰੀ ਤਰ੍ਹਾਂ ਟੁੱਟ ਜਾਣ ਕਾਰਨ ਜ਼ਿੰਦਗੀ-ਮੌਤ ਦੀ ਲੜਾਈ ਲੜ ਰਹੇ ਹਨ। ਕਸਬਾ ਡੇਹਲੋਂ ਸਮੇਤ ਆਸ ਪਾਸ ਦੇ ਪਿੰਡਾਂ ਰੁੜਕਾ, ਖੱਟੜਾ, ਗੁਰਮ, ਢੋਡੇ ਤੋਂ ਦੋ ਟਰੱਕਾਂ 'ਚ ਸਵਾਰ 125 ਦੇ ਕਰੀਬ ਸੰਗਤਾਂ ਸਿਰਸੇ ਨੂੰ ਮੱਥਾ ਟੇਕਣ ਜਾ ਰਹੇ ਸਨ ਕਿ ਡੇਹਲੋਂ ਤੋਂ ਕਰੀਬ 2 ਕਿਲੋਮੀਟਰ ਦੂਰੀ ਤੇ ਹੀ ਮੰਦਭਾਗਾ ਹਾਦਸਾ ਵਾਪਰ ਗਿਆ। ਹੋਰ ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਕਿ ਸਾਰੀਆਂ ਸੰਗਤਾਂ ਟਰੱਕ ਨੰਬਰ ਪੀ.ਬੀ. 10 ਜੀ 9531 ਅਤੇ ਟਰੱਕ ਨੰਬਰ ਪੀ.ਬੀ. 10 ਸੀ.ਬੀ. 7575 ਦੋ ਟਰੱਕਾਂ 'ਚ ਸਵਾਰ ਹੋ ਕੇ ਜਿਉਂ ਹੀ ਸਿਰਸੇ ਨੂੰ ਚੱਲੀਆਂ ਕਸਬਾ ਡੇਹਲੋਂ ਤੋਂ ਥੋੜੀ ਦੂਰ ਪਿੰਡ ਲਹਿਰੇ ਤੋਂ ਪਹਿਲਾਂ ਲੁਧਿਆਣਾ ਮਲੇਰਕੋਟਲਾ ਸੜਕ 'ਤੇ ਦੋਵੇਂ ਟਰੱਕ ਖੱਬੇ ਪਾਸੇ ਖੜੇ ਕਰ ਦਿੱਤੇ ਟਰੱਕ 'ਚ ਸਵਾਰ ਸੰਗਤਾਂ ਅਨੁਸਾਰ ਕਿ ਦੋਵੇਂ ਟਰੱਕ ਖੜੇ ਕਰਕੇ ਲਾਗਲੇ ਪਿੰਡ ਰੁੜਕਾ ਤੋਂ ਕੋਈ ਭੁੱਲੀ ਚੀਜ਼ ਲੇਣ ਉਡੀਕ ਕਰ ਰਹੇ ਸਨ ਜਦਕਿ ਟਰੱਕਾਂ 'ਚੋਂ ਕੁਝ ਵਿਅਕਤੀ ਹੇਠਾਂ ਉਤਰ ਗਏ ਸਨ ਅਤੇ ਆਪਸ 'ਚ ਗੱਲਾਂ ਹੀ ਕਰ ਰਹੇ ਸਨ ਤਾਂ ਡੇਹਲੋਂ ਵਾਲੇ ਪਾਸਿਓਂ ਪਿੱਛੋਂ ਆਏ ਰੇਤੇ ਦੇ ਭਰੇ ਟਰੱਕ ਨੰਬਰ ਐਚ.ਆਰ. 56-2597 ਨੇ ਤੇਜ਼ ਰਫ਼ਤਾਰ ਨਾਲ ਟੱਕਰ ਮਾਰੀ ਜਿਸ ਕਾਰਨ ਜਿਥੇ ਇਕ ਸੰਗਤਾਂ ਵਾਲਾ ਟਰੱਕ ਟੋਇਆ 'ਚ ਉਤਰ ਗਿਆ ਤੇ ਉਸ ਵਿਚ ਬੈਠੇ ਦੋ ਵਿਅਕਤੀ ਸਖ਼ਤ ਜ਼ਖ਼ਮੀ ਹੋਣ ਕਾਰਨ ਮੌਕੇ ਤੇ ਹੀ ਮੌਤ ਹੋ ਗਈ ਜਿਨ੍ਹਾਂ ਦੀ ਪਛਾਣ ਬਿੰਦਰ ਸਿੰਘ ਪੁੱਤਰ ਸਰਨਾ ਸਿੰਘ ਉਮਰ 50 ਸਾਲ, ਪਿੰਡ ਰੁੜਕਾ ਅਤੇ ਗੁਰਦੀਪ ਸਿੰਘ ਪੁੱਤਰ ਮਸਤਾਨ ਸਿੰਘ ਉਮਰ 21 ਸਾਲ ਪਿੰਡ ਖੱਟੜਾ ਚੁਹਾਰਮ ਵਜੋਂ ਹੋਈ, ਜਦਕਿ ਰੁੜਕਾ ਨਿਵਾਸੀ ਤੀਸਰਾ ਸਾਧੂ ਰਾਮ ਪੁੱਤਰ ਪਿਆਰੇ ਲਾਲ ਉਮਰ ਕਰੀਬ 48 ਸਾਲ ਸਖ਼ਤ ਜ਼ਖਮਾਂ ਦੀ ਤਾਬ ਨਾ ਝਲਦਾ ਹੋਇਆ ਦਮ ਤੋੜ ਗਿਆ। ਤਿੰਨਾਂ ਮ੍ਰਿਤਕਾਂ ਦੀਆਂ ਲਾਸ਼ਾਂ ਸਿਵਲ ਹਸਪਤਾਲ ਡੇਹਲੋਂ ਵਿਖੇ ਲਿਆਂਦੀਆਂ ਗਈਆਂ ਹਨ। ਇਥੇ ਦੱਸਣਯੋਗ ਹੈ ਕਿ ਹਾਦਸਾ ਵਾਪਰਨ ਤੋਂ ਬਾਅਦ ਤਿੰਨ 108 ਐਂਬੂਲੈਸਾਂ ਰਾਹੀਂ ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਡੇਹਲੋਂ ਵਿਖੇ ਲਿਆਂਦਾ ਗਿਆ। ਜਿਨ੍ਹਾਂ ਨੂੰ ਮੌਕੇ ਤੇ ਹਾਜ਼ਰ ਡਾ: ਜਸਨੀਬ ਸੰਧੂ, ਫਾਰਮਾਸਿਸਟ ਕਰਮਜੀਤ ਸਿੰਘ, ਸਟਾਫਰ ਪਵਨਦੀਪ ਕੌਰ ਸਮੇਤ ਟੀਮ ਨੇ ਮੁਢਲੀ ਸਹਾਇਤਾ ਦੇ ਕੇ ਅੱਗੇ ਰੈਫਰ ਕਰ ਦਿੱਤਾ। ਜ਼ਖ਼ਮੀਆਂ ਦੀ ਪਛਾਣ ਗੰਭੀਰ ਰੂਪ ਸ਼ਿੰਗਾਰਾ ਸਿੰਘ, ਜਿਸਦੀ ਰੀਡ ਦੇ ਹੱਡੀ ਦੋ ਜਗ੍ਹਾ ਤੋਂ ਟੁੱਟ ਗਈ ਹੈ। ਨੌਜਵਾਨ ਮਨਦੀਪ ਸਿੰਘ ਰਿੰਕੂ ਪੁੱਤਰ ਬਲਦੇਵ ਸਿੰਘ ਡੇਹਲੋਂ ਜਿਸ ਦੀਆਂ ਲੱਤਾਂ ਬੁਰੀ ਤਰ੍ਹਾਂ ਟੁੱਟ ਚੁੱਕੀਆਂ ਹਨ, ਦੋਵੇਂ ਜ਼ਿੰਦਗੀ ਮੌਤ ਦੀ ਲੜਾਈ ਦਿਆ ਨੰਦ ਹਸਪਤਾਲ ਵਿਖੇ ਲੜ ਰਹੇ ਹਨ, ਜਦਕਿ ਬਾਕੀ ਗੁਰਮ ਪਿੰਡ ਦੇ ਪੰਜ ਸਖ਼ਤ ਜ਼ਖ਼ਮੀ ਲਖਵਿੰਦਰ ਸਿੰਘ (22 ਸਾਲ), ਕੁਲਵਿੰਦਰ ਸਿੰਘ (23), ਹਰਨੇਕ ਸਿੰਘ (50), ਭੂਸ਼ਣ (40), ਨਰੇਸ਼ 30 ਸਾਲ ਸਾਰੇ ਗੁਰਮ ਨਿਵਾਸੀ ਵੀ ਜ਼ੇਰੇ ਇਲਾਜ ਹਨ, ਜਦੋਂਕਿ ਬਾਕੀ ਹੋਰ ਜ਼ਖ਼ਮੀਆਂ ਦੀ ਪਛਾਣ 16 ਸਾਲਾ ਕੁਲਵਿੰਦਰ ਸਿੰਘ ਪਿੰਡ ਨੰਗਲ, 19 ਸਾਲਾ ਤੇਜਿੰਦਰ ਸਿਘ ਢੋਡੇ, ਭਗਵਾਨ ਸਿੰਘ ਪੁੱਤਰ ਦਲਬਾਰਾ ਸਿੰਘ 40 ਸਾਲ ਪਿੰਡ ਡੇਹਲੋਂ, ਕੁਲਜੀਤ ਸਿੰਘ 14 ਸਾਲ ਪੁੱਤਰ ਨਾਜਰ ਸਿੰਘ, ਤਰਸੇਮ ਸਿੰਘ (18) ਪੁੱਤਰ ਭਗਵਾਨ ਸਿੰਘ ਡੇਹਲੋਂ, ਗੁਰਨਾਮ ਸਿੰਘ (45) ਪੁੱਤਰ ਸੰਤ ਸਿੰਘ ਨੰਗਲ, ਸੁਰਿੰਦਰ ਕੌਰ ਪਤਨੀ ਸ਼ਿੰਗਾਰਾ ਸਿੰਘ, ਮਨਵਿੰਦਰ ਸਿੰਘ ਬੰਟੀ ਪੁੱਤਰ ਸ਼ਿੰਗਾਰਾ ਸਿੰਘ, ਪਲਵਿੰਦਰ ਸਿੰਘ ਪੁੱਤਰ ਗੁਰਸ਼ਰਨ ਸਿੰਘ ਵਜੋਂ ਹੋਈ ਹੈ। ਸਿਵਲ ਹਸਤਪਾਲ ਮ੍ਰਿਤਕਾਂ ਦੇ ਵਾਰਸਾਂ ਨਾਲ ਦੁੱਖ ਸਾਂਝਾ ਕਰਨ ਪੁੱਜੇ ਹਲਕਾ ਗਿੱਲ ਦੇ ਵਿਧਾਇਕ ਸ: ਦਰਸ਼ਨ ਸਿੰਘ ਸ਼ਿਵਾਲਿਕ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ ਇਕ ਇਕ ਲੱਖ ਆਪਣੇ ਅਖਤਿਆਰੀ ਫੰਡ 'ਚੋਂ ਦੇਣ ਦਾ ਐਲਾਨ ਕੀਤਾ, ਜਦਕਿ ਦੁਪਹਿਰ ਬਾਅਦ ਸੀ. ਐਮ. ਓ. ਸ੍ਰੀ ਸੁਭਾਸ਼ ਬੱਤਾ, ਐਸ.ਐਮ.ਓ. ਜਸਵੀਰ ਸਿੰਘ ਵੀ ਮ੍ਰਿਤਕਾਂ ਦੇ ਪੋਸਟ ਮਾਰਟਮ ਸਬੰਧੀ ਪੁੱਜੇ ਪਰ ਕੋਈ ਵੀ ਪੁਲਿਸ ਅਤੇ ਪ੍ਰਸ਼ਾਸਨ ਦੇ ਉਚ ਅਧਿਕਾਰੀ ਨਾ ਪੁੱਜਾ।

ਫ਼ੌਜ ਮੁਖੀ ਤੇ ਰੱਖਿਆ ਮੰਤਰਾਲਾ ਫਿਰ ਆਹਮੋ-ਸਾਹਮਣੇ

ਨਵੀਂ ਦਿੱਲੀ, 25 ਮਾਰਚ - ਉਮਰ ਵਿਵਾਦ ਨੂੰ ਲੈ ਕਿ ਆਹਮੋ-ਸਾਹਮਣੇ ਰਹੇ ਸੈਨਾ ਮੁਖੀ ਜਨਰਲ ਵੀ.ਕੇ. ਸਿੰਘ ਤੇ ਰੱਖਿਆ ਮੰਤਰਾਲੇ ਇਕ ਵਾਰ ਫਿਰ ਤੋਂ ਟਕਰਾਅ ਵਾਲੀ ਸਥਿਤੀ 'ਚ ਹਨ। ਇਸ ਵਾਰ ਦੋਵਾਂ ਵਿਚਕਾਰ ਆਸਾਮ ਰਾਈਫਲ ਦੇ ਨਵੇਂ ਮੁਖੀ ਦੀ ਨਿਯੁਕਤੀ ਨੂੰ ਲੈ ਕੇ ਮੱਤਭੇਦ ਵਧ ਗਏ ਹਨ। ਸੁਪਰੀਮ ਕੋਰਟ 'ਚ ਉਮਰ ਵਿਵਾਦ ਨੂੰ ਲੈ ਕੇ ਰੱਖਿਆ ਮੰਤਰਾਲੇ ਦੇ ਖ਼ਿਲਾਫ ਲੜਾਈ ਹਾਰਨ ਵਾਲੇ ਸੈਨਾ ਮੁਖੀ ਨੇ ਆਸਾਮ ਰਾਈਫਲ ਦੇ ਮੁਖੀ ਲਈ ਸੈਨਾ ਦੇ ਇਕ ਸੀਨੀਅਰ ਅਧਿਕਾਰੀ ਜਨਰਲ ਏ. ਕੇ. ਚੌਧਰੀ ਦੇ ਨਾਂਅ ਦੀ ਸਿਫਾਰਸ਼ ਕੇਂਦਰੀ ਗ੍ਰਹਿ ਮੰਤਾਰਲੇ ਕੋਲ ਕੀਤੀ ਸੀ। ਆਸਾਮ ਰਾਈਫਲ ਗ੍ਰਹਿ ਮੰਤਰਾਲੇ ਦੇ ਤਹਿਤ ਆਉਂਦਾ ਹੈ। ਸੂਤਰਾਂ ਮੁਤਾਬਿਕ ਰੱਖਿਆ ਮੰਤਰਾਲੇ ਨੇ ਗ੍ਰਹਿ ਮੰਤਰਾਲੇ ਨੂੰ ਕਿਹਾ ਹੈ ਕਿ ਉਹ ਸੈਨਾ ਮੁਖੀ ਦੇ ਪ੍ਰਸਤਾਵ 'ਤੇ ਵਿਚਾਰ ਨਾ ਕਰੇ ਕਿਉਂਕਿ ਇਸ ਨਾਂਅ ਨੂੰ ਭੇਜਣ ਲਈ ਨਾ ਤਾਂ ਰੱਖਿਆ ਮੰਤਰਾਲੇ ਤੋਂ ਤੇ ਨਾ ਹੀ ਕਿਸੇ ਹੋਰ ਸੰਸਥਾ ਤੋਂ ਪ੍ਰਵਾਨਗੀ ਲਈ ਗਈ ਹੈ। ਰੱਖਿਆ ਮੰਤਰਾਲੇ ਨੇ ਹੁਣ ਸੈਨਾ ਨੂੰ ਕਿਹਾ ਹੈ ਕਿ ਉਹ ਨਿਯੁਕਤੀਆਂ ਦੇ ਲਈ ਅਧਿਕਾਰੀਆਂ ਦੇ ਨਾਂਅ ਦੀ ਨਵੀਂ ਸੂਚੀ ਭੇਜੇ ਪਰ ਇਸ ਸਬੰਧ 'ਚ ਉਸ ਵਲੋਂ ਭੇਜੇ ਗਏ ਪੱਤਰ ਦਾ ਕੋਈ ਜਵਾਬ ਨਹੀਂ ਆਇਆ ਹੈ। ਇਸ ਤੋਂ ਪਹਿਲਾਂ ਸੈਨਾ ਨੇ ਜਨਰਲ ਚੌਧਰੀ ਤੇ ਜਨਰਲ ਜੇ. ਪੀ. ਨੇਹਰਾ ਸਮੇਤ ਤਿੰਨ ਅਧਿਕਾਰੀਆਂ ਦੇ ਨਾਂਅ ਦੀ ਸੂਚੀ ਗ੍ਰਹਿ ਮੰਤਰਾਲੇ ਕੋਲ ਭੇਜੀ ਸੀ। ਅਧਿਕਾਰੀਕ ਸੂਤਰਾਂ ਮੁਤਾਬਿਕ ਇਹ ਬੜੀ ਅਜੀਬ ਗੱਲ ਹੈ ਕਿ ਸੈਨਾ ਮੁਖੀ ਰੱਖਿਆ ਮੰਤਰਾਲੇ ਨੂੰ ਨਜ਼ਰਅੰਦਾਜ਼ ਕਰਕੇ ਸਿੱਧਾ ਗ੍ਰਹਿ ਮੰਤਰਾਲੇ ਨਾਲ ਸੰਪਰਕ ਕਰ ਰਿਹੇ ਹਨ।

ਸਾਹਿਲਾ ਦੇ ਕਤਲ ਵਿਚ ਇਸਤੇਮਾਲ ਹਥਿਆਰ ਬਰਾਮਦ

ਨਵੀਂ ਦਿੱਲੀ, 25 ਮਾਰਚ-ਸੀ. ਬੀ. ਆਈ. ਨੇ ਐਤਵਾਰ ਨੂੰ ਦਾਅਵਾ ਕੀਤਾ ਕਿ ਉਸ ਨੂੰ ਇਹ ਗੰਨ ਮਿਲ ਗਈ ਹੈ ਜਿਸ ਦਾ ਇਸਤੇਮਾਲ ਸਾਹਿਲਾ ਮਹਿਸੂਦ ਦੀ ਹੱਤਿਆ ਲਈ ਕੀਤਾ ਗਿਆ। ਭਾਰਤ ਵਿਚ ਬਣੀ ਇਹ ਗੰਨ ਮਾਮਲੇ 'ਚ ਦੋਸ਼ੀ ਸ਼ਾਕਿਬ ਅਲੀ ਉਰਫ ਡੇਂਜਰ ਤੋਂ ਮਿਲੀ ਹੈ। ਸੀ. ਬੀ. ਆਈ. ਨੇ ਸਨਿਚਰਵਾਰ ਨੂੰ ਕੰਟਰੈਕਟ ਕਿਲਰ ਇਹਫਾਨ ਦਾ ਬਿਆਨ ਦਰਜ ਕੀਤਾ। 2 ਦਿਨ ਪਹਿਲਾਂ ਇਰਫਾਨ ਨੇ ਅਦਾਲਤ ਵਿਚ ਕਿਹਾ ਸੀ ਕਿ ਉਹ ਆਪਣਾ ਬਿਆਨ ਦਰਜ ਕਰਵਾਉਣਾ ਚਾਹੁੰਦਾ ਹੈ।

ਪਾਕਿਸਤਾਨ 'ਚ ਹੋਵੇਗਾ ਭਗਤ ਸਿੰਘ ਦੇ ਨਾਂਅ 'ਤੇ ਚੌਕ!

ਲਾਹੌਰ, 25 ਮਾਰਚ -ਪਾਕਿਸਤਾਨ ਸਰਕਾਰ ਲਾਹੌਰ 'ਚ ਮੌਜੂਦਾ ਸ਼ਾਦਮਾਨ ਚੌਂਕ ਦਾ ਨਾਂਅ ਅਮਰ ਸ਼ਹੀਦ ਭਗਤ ਸਿੰਘ ਦੇ ਨਾਂਅ 'ਤੇ ਰੱਖਣ ਲਈ ਰਾਜ਼ੀ ਹੋ ਸਕਦੀ ਹੈ। ਇਕ ਅੰਗਰੇਜ਼ੀ ਅਖ਼ਬਾਰ ਦੇ ਮੁਤਾਬਿਕ ਪਾਕਿਸਤਾਨ ਦੀ ਭਗਤ ਸਿੰਘ ਸੰਸਥਾ ਦੇ ਮੁਖੀ ਤੇ ਪੰਜਾਬ ਰਾਜ ਦੇ ਰਾਜਪਾਲ ਦੇ ਮਨੁੱਖੀ ਅਧਿਕਾਰ ਸਲਾਹਕਾਰ ਅਬਦੁੱਲਾ ਮਲਿਕ ਨੇ ਦੱਸਿਆ ਹੈ ਕਿ ਪੰਜਾਬ ਦੇ ਮੁੱਖ ਮੰਤਰੀ ਸ਼ਾਹਬਾਜ਼ ਸ਼ਰੀਫ ਦੇ ਬੁਲਾਰੇ ਪਰਵੇਜ਼ ਰਾਸ਼ਿਦ ਨੇ ਭਗਤ ਸਿੰਘ ਸੰਸਥਾ ਦੇ ਅਧਿਕਾਰੀਆਂ ਦੇ ਨਾਲ ਮੁਲਾਕਾਤ ਕਰਕੇ ਇਹ ਭਰੋਸਾ ਦਿੱਤਾ ਹੈ ਕਿ ਸ਼ਾਦਮਾਨ ਚੌਕ ਦਾ ਨਾਂਅ ਭਗਤ ਸਿੰਘ ਦੇ ਨਾਂਅ 'ਤੇ ਰੱਖੇ ਜਾਣ ਸਬੰਧੀ ਮਤੇ ਨੂੰ ਸੰਸਦ 'ਚ ਪਾਸ ਕਰਵਾਇਆ ਜਾਵੇਗਾ। ਸ਼ਹੀਦ ਭਗਤ ਸਿੰਘ, ਰਾਜਗੁਰੂ ਤੇ ਸੁਖਦੇਵ ਨੂੰ 23 ਮਾਰਚ, 1931 ਨੂੰ ਲਾਹੌਰ 'ਚ ਫ਼ਾਂਸੀ ਦੇ ਦਿੱਤੀ ਗਈ ਸੀ। ਜਾਣਕਾਰਾਂ ਦਾ ਮੰਨਣਾ ਹੈ ਕਿ ਤਿੰਨਾਂ ਦੇਸ਼ ਭਗਤਾਂ ਨੇ ਸ਼ਾਦਮਾਨ ਚੌਂਕ 'ਚ ਫਾਂਸੀ ਨੂੰ ਗਲੇ ਲਗਾਇਆ ਸੀ। ਪਾਕਿਸਤਾਨ ਦੇ ਕਈ ਸੰਗਠਨ ਇਸ ਚੌਕ ਦਾ ਨਾਂਅ ਭਗਤ ਸਿੰਘ ਦੇ ਨਾਂਅ 'ਤੇ ਰੱਖਣ ਦੀ ਮੰਗ ਕਰ ਰਹੇ ਹਨ।

ਮਹਾਤਮਾ ਗਾਂਧੀ ਇਕ 'ਤਾਕਤ' ਸਨ-ਰਾਸ਼ਟਰਪਤੀ

ਜਲਗਾਓਂ, 25 ਮਾਰਚ-ਰਾਸ਼ਟਰਪਤੀ ਪ੍ਰਤਿਭਾ ਪਾਟਿਲ ਨੇ ਅੱਜ ਕਿਹਾ ਕਿ ਮਹਾਤਮਾ ਗਾਂਧੀ ਕੇਵਲ ਇਕ ਵਿਅਕਤੀ ਹੀ ਨਹੀਂ ਸਗੋਂ ਇਕ ਅਜਿਹੀ ਸ਼ਕਤੀ ਸਨ ਜਿਨ੍ਹਾਂ ਦੀਆਂ ਸਿੱਖਿਆਵਾਂ ਤੋਂ ਨੌਜਵਾਨ ਪੀੜੀ ਨਵੀਂ ਤਾਕਤ ਤੇ ਦੂਰ ਦ੍ਰਿਸ਼ਟੀ ਲੈ ਸਕਦੀ ਹੈ। ਜਲਗਾਓਂ 'ਚ ਗਾਂਧੀ ਖੋਜ ਸੰਸਥਾ ਦਾ ਉਦਘਾਟਨ ਕਰਨ ਤੋਂ ਬਾਅਦ ਰਾਸ਼ਟਰਪਤੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਬਹੁਤ ਖੁਸ਼ੀ ਮਹਿਸੂਸ ਹੋ ਰਹੀ ਹੈ ਕਿ ਰਾਸ਼ਟਰ ਪਿਤਾ ਦੀਆਂ ਰਚਨਾਵਾਂ ਤੇ ਯਾਦਗਾਰਾਂ ਨੂੰ ਉਨਾਂ ਦੇ ਜੱਦੀ ਸ਼ਹਿਰ 'ਚ ਇਕੱਤਰ ਕਰਕੇ ਰੱਖਿਆ ਜਾ ਰਿਹਾ ਹੈ। ਰਾਸ਼ਟਰਪਤੀ ਪਾਟਿਲ ਨੇ ਕਿਹਾ ਕਿ ਗਾਂਧੀ ਜੀ 1922 'ਚ ਜਲਗਾਓਂ ਆਏ ਸਨ। ਉਨ੍ਹਾਂ ਕਿਹਾ ਕਿ ਸਿਰਫ ਇਹੋ ਜਾਣਨਾ ਜ਼ਰੂਰੀ ਨਹੀਂ ਕਿ ਗਾਂਧੀ ਜੀ ਕੌਣ ਸਨ ਸਗੋਂ ਉਨ੍ਹਾਂ ਦੀਆਂ ਸਿੱਖਿਆਵਾਂ ਨੂੰ ਸਮਝਣਾ ਚਾਹੀਦਾ ਹੈ ਜੇਕਰ ਨੌਜਵਾਨ ਗਾਂਧੀ ਜੀ ਨੂੰ ਚੰਗੀ ਤਰ੍ਹਾਂ ਸਮਝ ਜਾਣ ਤਾਂ ਉਨ੍ਹਾਂ 'ਚ ਨਵੀਂ ਤਾਕਤ ਤੇ ਦੂਰ ਦ੍ਰਿਸ਼ਟੀ ਪੈਦਾ ਹੋ ਜਾਵੇਗੀ।

ਉੱਚ ਸਿੱਖਿਆ ਲਈ ਆਸਟ੍ਰੇਲੀਆ ਦਾ
ਵੀਜ਼ਾ ਲੈਣਾ ਹੋ ਜਾਵੇਗਾ ਅੱਜ ਤੋਂ ਸੌਖਾ

ਨਵੀਂ ਦਿੱਲੀ, 25 ਮਾਰਚ - ਅੱਜ ਤੋਂ ਲਾਗੂ ਹੋ ਰਹੀ ਨਵੀਂ ਵੀਜ਼ਾ ਪ੍ਰਣਾਲੀ ਤਹਿਤ ਆਸਟ੍ਰੇਲੀਆ 'ਚ ਉਚੇਰੀ ਸਿੱਖਿਆ ਲਈ ਜਾਣਾ ਆਸਾਨ ਹੋ ਜਾਵੇਗਾ। ਹੁਣ ਆਸਟ੍ਰੇਲੀਆ ਦੀਆਂ ਪ੍ਰਵਾਨਤ ਯੁਨੀਵਰਸਿਟੀਆਂ ਵਿਚ ਗਰੈਜੂਏਸ਼ਨ, ਪੋਸਟ ਗਰੈਜੂਏਸ਼ਨ ਜਾਂ ਪੀ. ਐਚ. ਡੀ ਕਰਨ ਲਈ ਵੀਜ਼ਾ ਲੈਣ ਵਾਸਤੇ ਘੱਟ ਦਸਤਾਵੇਜ਼ ਦੇਣੇ ਪੈਣਗੇ। ਇਸ ਤੋਂ ਇਲਾਵਾ ਵਿਦਿਆਰਥੀਆਂ ਲਈ ਕੰਮ ਕਰਨ ਦੀਆਂ ਸ਼ਰਤਾਂ ਵੀ ਨਰਮ ਕਰ ਦਿੱਤੀਆਂ ਗਈਆਂ ਹਨ ਤੇ ਵਿਦਿਆਰਥੀ ਦੋ ਹਫਤਿਆਂ ਦੌਰਾਨ ਵਧ ਤੋਂ ਵਧ 40 ਘੰਟੇ ਕੰਮ ਕਰ ਸਕਣਗੇ ਜਦ ਕਿ ਪਹਿਲਾਂ ਹਰੇਕ ਵਿਦਿਆਰਥੀ ਇਕ ਹਫਤੇ ਦੌਰਾਨ 20 ਘੰਟੇ ਤੋਂ ਵਧ ਕੰਮ ਨਹੀਂ ਸੀ ਕਰ ਸਕਦਾ।